རྒྱ་ནག་གི་Tiktok མཉེན་ཆས་ཚོང་གཉེར་ཁང་གིས་ཉོས་པའི་སྙན་གྲགས་ཆེ་བའི་དབྱིན་ཇིའི་གསར་འགྱུར་མཉེན་ཆས་ News Republic ཞེས་པ་དེའི་ནང་རྒྱ་ནག་དང་ཚོར་རྣོ་བའི་གནད་དོན། དེ་བཞིན་བོད་དང་ཏཱ་ལའི་བླ་མ་དང་འབྲེལ་བའི་གནས་ཚུལ་རྣམས་བཀག་སྡོམ་བྱེད་བཞིན་ཡོད་པ་ཤེས་རྟོགས་བྱུང་འདུག
དེ་ཡང་ The Telegraph གསར་ཁང་གིས་ཁ་སང་འདོན་སྤེལ་གནང་བའི་གནས་ཚུལ་ལ་གཞིགས་ན། News Republic ཟེར་བ་གསར་འགྱུར་མཉེན་ཆས་དེས་བོད་དང་། ཏཱ་ལའི་བླ་མ་དེ་བཞིན་གསར་འགོད་རང་དབང་སོགས་རྒྱ་ནག་དང་ཚོར་རྣོ་བའི་གནད་དོན་མང་དག་ཅིག་མིང་གཞུང་ནག་པོའི་ནང་ཐོ་འགོད་ཀྱིས་དེ་དག་བརྒྱུད་སྤེལ་བྱེད་རྒྱུར་བཀག་སྡོམ་བྱེད་བཞིན་ཡོད་པ་གསུངས་འདུག
སྤྱིར་དེ་སྔ་ཕྱི་ལོ་ ༢༠༡༤ ཁོ་ནར་ཨ་རི་དང་དབྱིན་ཡུལ་ནང་News Republic ཟེར་བ་གསར་འགྱུར་མཉེན་ཆས་དེ་ཕབ་ལེན་གནང་མཁན་མི་གྲངས་ས་ཡ་ལྔ་ཙམ་བྱུང་འདུག དེ་ཙམ་མ་ཟད། ཕྱི་ལོ་ ༢༠༡༥ ལོར་མཉེན་ཆས་དེར་མཉེན་ཆས་རྩེ་ཕུད་ཀྱི་གཟེངས་རྟགས་ཀྱང་ཐོབ་མྱོང་ཡོད་པ་རེད་འདུག མཉེན་ཆས་དེ་ཐོག་མར་ཧྥ་རན་སིའི་ནང་ཆེད་འཛུགས་བྱས་པ་ཞིག་དང་། རིམ་བཞིན་ཕྱི་ལོ་ ༢༠༡༧ ལོར་TikTok མཉེན་ཆས་གཉེར་མཁན་རྒྱ་ནག་གི་ Bytedance ཚོང་ལས་ཁང་གིས་ཉོས་པ་ཞིག་རེད་འདུག
རྩ་བའི་Tiktok ཞེས་པའི་རྒྱ་ནག་གིས་བཟོས་པའི་མཉེན་ཆས་དེའི་ནང་གནམ་བདེ་སྒོ་མོ་ཆེ་དང་། བོད་རང་བཙན། དེ་བཞིན་ Falun Gong དང་འབྲེལ་བའི་གནད་དོན་རྣམས་བཀག་འགོག་བྱེད་ཀྱི་ཡོད་པ་མངོན་གསལ་བྱུང་བ་མ་ཟད། རྒྱ་ནག་གི་མཉེན་ཆས་དེ་དང་སྐད་འཕྲིན་བརྒྱུད་མི་སྒེར་གྱི་གསང་བ་རྐུ་འཁྱེར་བྱེད་ཀྱི་ཡོད་པའི་གནད་དོན་ཡང་བྱུང་བ་རེད། ལྷག་པར་དུ་ཉེ་ལམ་རྒྱ་དཀར་ནག་གི་མཐའ་མཚམས་དམག་མིའི་བར་གདོང་ཐུག་གིས་ཟླ་བ་ ༧ པའི་ནང་རྒྱ་གར་དབུས་གཞུང་གིས་རྒྱ་གར་གྱི་བདེ་འཇགས་སྲུང་སྐྱོབ་ཀྱི་མིང་ཐོག་ནས་ Tiktok དང་སྐད་འཕྲིན་གྱི་གཙོས་པའི་རྒྱ་ནག་གི་མཉེན་ཆས་ ༥༩ ཙམ་ཞིག་བཀག་སྡོམ་བྱས་ཡོད་པ་རེད།
མ་ཟད། ཨ་རིའི་སྲིད་འཛིན་ Donald Trump མཆོག་གིས་ཀྱང་རྒྱལ་ཁབ་ཀྱི་བདེ་འཇགས་ལ་དམིགས་ཏེ་TikTok དང་སྐད་འཕྲིན་མཉེན་ཆས་གང་མགྱོགས་བཀག་སྡོམ་གནང་རྒྱུ་ཡིན་པའི་བཀོད་ཁྱབ་གནང་ཡོད་ཀྱང་། གྷོ་གྷལ་ཚོང་ལས་ཁང་གིས་ TikTok མཉེན་ཆས་དེ་ཉོ་རྒྱུ་ཡིན་སྐོར་བརྗོད་པ་ལྟར་སྲིད་འཛིན་མཆོག་གིས་ TikTok མཉེན་ཆས་གཉེར་མཁན་རྒྱ་ནག་གི་ Bytedance ཚོང་ལས་ཁང་ལ་ཕྱི་ཟླ་ ༩ ཚེས་ ༡༥ ནང་ཚུད་དུ་མཉེན་ཆས་བཙོང་ཟིན་དགོས་པའི་དུས་བཅད་སྤྲད་ཡོད་པ་དང་གལ་ཏེ་དུས་ཡུན་དེའི་རིང་གྷོ་གྷལ་ཚོང་ལས་ཁང་གིས་ཉོས་མ་ཚར་ན་མཉེན་ཆས་དེ་ཡོངས་སུ་བཀག་སྡོམ་གནང་རྒྱུ་ཡིན་པའི་བཀོད་ཁྱབ་གནང་ཡོད་པ་རེད།
