རྒྱ་གར་རྒྱལ་ཡོངས་སུ་རྒྱ་ནག་ཝུ་ཧན་གྱི་གྲོང་ཁྱེར་ལས་ཆེས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་གདལ་གྱི་ངལ་བ་ཕྲན་བུ་བཟང་དུ་ཕྱིན་པ་དང་བསྟུན་རྒྱ་གར་མངའ་སྡེ་བི་ཧཱར་གྱི་གྷ་ཡ་རྫོང་དུ་ཆགས་པའི་གནས་མཆོག་རྡོ་རྗེ་གདན་གྱི་བྱང་ཆུབ་ཆེན་པོའི་མཆོད་རྟེན་རིན་པོ་ཆེ་སླར་ཡང་དབུ་འབྱེད་གནང་བ་མ་ཟད། ཟླ་བ་འདིའི་ཚེས་ ༨ ནས་དབུ་འཛུགས་ཀྱིས་རྒྱལ་ཡོངས་སྔ་འགྱུར་རྙིང་མའི་འཛམ་གླིང་ཞི་བདེར་དམིགས་པའི་སྨོན་ལམ་ཆེན་མོ་ཐེངས་ ༣༣ པ་འཚོགས་བཞིན་འདུག
སྨོན་ལམ་ཆེན་མོ་ཐེངས་ ༣༣ པ་དེ་ནི་ཏོག་དབྱིབས་གཉན་རིམས་ཁྱབ་གདལ་འགྲོ་བཞིན་པའི་དབང་གིས་རྒྱུན་ལྡན་ལྟར་ཉིན་བཅུའི་རིང་ཚོགས་ཀྱི་མེད་ཀྱང་། ད་ལན་ཉིན་གྲངས་བཞིའི་རིང་ཚོགས་ཀྱི་ཡོད་པ་རེད།
གཞི་རྩའི་ཕྱི་ལོ་ ༢༠༡༩ ལོའི་ལོ་མཇུག་ཙམ་ནས་རྒྱ་ནག་ཝུ་ཧན་གྱི་གྲོང་ཁྱེར་ལས་ཆེས་ཐོག་མར་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་གྱིས་འཛམ་གླིང་ཡོངས་ལ་གཉན་རིམས་དེ་ཁྱབ་གདལ་ཆེས་ཆེར་འགྲོ་བཞིན་པའི་ཛ་དྲག་གི་ངལ་སེལ་ཆེད་དུ་ས་ཕྱོགས་གང་སར་མང་ཚོགས་ཕོན་ཆེ་འདུ་འཛོམས་གནང་སྟེ་ཆོས་ལུགས་དང་ལེགས་བྱང་། དེ་བཞིན་ཆབ་སྲིད་སོགས་ཀྱི་གནང་སྒོ་ཡོངས་རྫོགས་དུས་ཐོག་ཏུ་ཚོགས་མ་ཐུབ་པར་ཕྱིར་འགྱངས་གནང་དགོས་བྱུང་བ་ལྟར། རྡོར་གདན་ཁུལ་གྱི་བོད་ཀྱི་ཆོས་བརྒྱུད་ཁག་གི་ལོ་འཁོར་སྨོན་ལམ་ཆེན་མོ་རེ་ཞིག་འཚོགས་མ་ཐུབ་པར་ཕྱིར་འགྱངས་གནང་དགོས་ཁེལ་ཡོད་པ་དེ་ལྟར་ནའང་། འཛམ་གླིང་ཡུལ་གྲུ་ཀུན་ཏུ་ཞི་བདེ་འབྱུང་བ་དང་། ནད་མུག་འཁྲུག་རྩོད་སོགས་དུས་ཀྱི་རྒུད་པ་ཞི་བའི་ཆེད་སྔ་འགྱུར་རྙིང་མའི་སྨོན་ལམ་ཆེན་མོར་མཆོད་རྟེན་རིན་པོ་ཆེའི་འཛིན་སྐྱོང་ལྷན་ཚོགས་དང་ས་གནས་ཀྱི་འབྲེལ་ཡོད་ལས་ཁུངས་སོགས་ནས་ཆོག་མཆན་གནང་དོན་ལྟར། སྤྱི་ཚོགས་རྒྱང་བཀྱེད་དང་གཉན་རིམས་སྔོན་འགོག་གི་ལམ་སྟོན་ཁག་ལག་བསྟར་གནང་བའི་ཐོག་ནས་ཟླ་བ་འདིའི་ཕྱི་ཚེས་ ༨ ནས་དབུ་འཛུགས་ཀྱིས་ཚེས་ ༡༡ བར་ཁྱོན་ཉིན་བཞིའི་རིང་འཚོགས་བཞིན་ཡོད་པ་རེད།
གསར་འགོད་པས་སྔ་འགྱུར་རྙིང་མའི་སྨོན་ལམ་ཚོགས་པའི་ཚོགས་གཙོ་༸སྐྱབས་རྗེ་རི་མགོ་སྤྲུལ་སྐུ་མཆོག་ལ་ཞལ་པར་བརྒྱུད་ནས་སྨོན་དང་འབྲེལ་བའི་བཀའ་འདྲི་ཁག་ཅིག་ཞུས་པར་ཁོང་གིས། རྡོར་གདན་རྣམ་གྲོལ་གླིང་དགོན་པའི་དགེ་འདུན་པ་གཙོ་བོར་གྱུར་པའི་ཕྱོགས་མཐའ་ཁག་ནས་ཕེབས་པའི་དགེ་འདུན་པ། དེ་བཞིན་གཉུག་མར་གནས་པ་དང་གློ་བུར་དུ་ལྷགས་པའི་མང་ཚོགས་ཕེབས་ཡོད་སྐོར་གསུངས་པ་དང་ཆབས་ཅིག སྨོན་ལམ་ཚོགས་པའི་དགོས་དམིགས་གཙོ་བོ་གང་ཡིན་པ་སོགས་ངོ་སྤྲོད་གནང་སོང་།
ཕྱོགས་མཚུངས་སུ་བཀའ་བརྒྱུད་དགུན་ཆོས་ཆེན་མོ་ཕྱི་ཟླ་ ༡ ཚེས་ ༢༣ ནས་ཁ་སང་ཚེས་ ༩ བར་དྲ་ལམ་དུ་ཚོགས་ཡོད་པ་མ་ཟད། ༸དཔལ་༸རྒྱལ་དབང་ཀརྨ་པ་སྐུ་ཕྲེང་བཅུ་བདུན་པ་ཆེན་པོ་མཆོག་གིས་དྲ་ལམ་ཐད་གཏོང་བརྒྱུད་སེམས་ཙམ་སུམ་ཅུའི་པའི་བཀའ་ཆོས་ཀྱང་སྩལ་ཡོད་པ་རེད། 
ཁ་སང་བཀའ་བརྒྱུད་དགུན་ཆོས་ཆེན་མོ་རེ་ཞིག་མཇུག་སྒྲིལ་མཛད་པ་དང་བསྟུན་༸དཔལ་༸རྒྱལ་དབང་ཀརྨ་པ་མཆོག་གིས་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་རྡོར་གདན་དུ་སྨོན་ལམ་འཚོགས་ཐབས་བྲལ་བས་དགོན་སྡེ་སོ་སོར་ཟླ་བ་འདིའི་ཚེས་ ༡༠ ནས་དབུ་འཛུགས་ཀྱིས་ཚེས་ ༡༦ བར་ཁྱོན་ཉིན་བདུན་རིང་བཀའ་བརྒྱུད་སྨོན་ལམ་འཕར་མ་འཚོགས་རྒྱུ་དང་སྨོན་ལམ་གྱི་ཉིན་མཐའ་མ་སྟེ། ཕྱི་ཚེས་ ༡༦ ཉིན་ལྷ་མོ་འོད་ཟེར་ཅན་མའི་སྟོང་མཆོད་འཚོགས་རྒྱུ་ཡིན་པའི་ཡོངས་ཁྱབ་བཀའ་སྩལ་གནང་ཡོད།
