རིང་མིན་ཕྱི་ཟླ་ ༧ ཚེས་ ༦ ཉིན་བོད་མིའི་བླ་མ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་གྱ་ལྔ་བདག་གིར་བཞེས་ཀྱི་ཡོད་པ་དང་བསྟུན་ཁེ་ན་ཌའི་ Toronto གྲོང་ཁྱེར་ནས་རྒྱལ་ས་ Otawa བར་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་འདུག
ལས་འགུལ་དེ་ཁ་སང་སྔ་དྲོ་ཚོུད་ ༡༠ ཐོག་ཊོ་རན་ཊོ་ནང་གནས་བཞུགས་རེས་གཟའ་ལྷག་པ་སྟེ་ལྷག་དཀར་ནམ་ཡིན་ལ་བོད་དོན་ལས་འགུལ་སྤེལ་མཁན་སངས་རྒྱས་སྐྱབས་ལགས་ཀྱིས་དང་བླངས་ཐོག་ཁུལ་དེར་རྟེན་གཞི་བྱས་པའི་རྒྱ་ནག་གི་གཞུང་ཚབ་ལས་ཁུངས་མདུན་ནས་དབུ་འཛུགས་གནང་འདུག སྐབས་དེར་ Ontario བོད་རིགས་སྤྱི་མཐུན་ཚོགས་པ་དང་ས་གནས་གཞོན་ནུ་དང་བེུད་ལྷན་ཚོགས། དེ་བཞིན་མོད་ཁམས་ཆུ་བཞི་སྒང་དྲུག་སོགས་གཞུང་འབྲེལ་མིན་པའི་ཚོགས་པ་ལྔའི་སྐུ་ཚབ་རྣམ་པ་ལྷན་ཞུགས་ཀྱིས་ཁོང་གིས་དང་བླངས་ཐོག་ནས་༸སྐུའི་འཁྲུངས་སྐར་དང་བསྟུན་ཞི་བའི་གོམ་བགྲོད་ཀྱི་ལས་འགུལ་སྤེལ་བར་བསྔགས་བརྗོད་དང་ལམ་ལྷོང་ཡོང་བར་བོད་མི་ཡོངས་ནས་རྒྱབ་སྐྱོར་གནང་དགོས་པའི་འབོད་སྐུལ་ཞུས་སོང་།
ཐེངས་འདིའི་ཞི་བའི་གོམ་བགྲོད་བརྒྱུད་དེ་སངས་རྒྱས་སྐྱབས་ལགས་ཀྱིས་ཁེ་ན་ཌ་དང་རྒྱལ་ས་ Otawa རྟེན་གཞི་བྱས་པའི་རྒྱ་ནག་གཞུང་ཚབ་ཁང་དང་རྒྱལ་སྤྱིའི་ལྷན་ཁང་བཅས་ལ་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་བོད་རྒྱ་གཉིས་ཀྱི་དཀའ་རྙོག་སེལ་ཆེད་དྲང་བདེན་གྱི་ཐོག་ནས་ཞི་བའི་གྲོས་མོལ་གནང་དགོས་པ། དེ་བཞིན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྒྱབ་སྐྱོར་དགོས་པ། བོད་མི་ཆབ་སྲིད་བཙོན་པ་དགུང་ལོ་ཆུང་ཤོས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་གཙོས་པའི་བཀྲིས་དབང་ཕྱུག་ལགས་དང་དེ་མིན་བོད་མིའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པ་བཅས་ཀྱི་དགོས་འདུན་དོན་ཚན་གསུམ་ཆེད་བཏོན་གནང་རྒྱུ་རེད་འདུག
ལས་རིམ་ལྟར་ན་སངས་རྒྱས་སྐྱབས་ལགས་ཁ་སང་ Toronto ནས་དབུ་འཛུགས་ཀྱིས་རྒྱལ་ས་ Otawa བར་རྟེན་གཞི་བྱས་པའི་རྒྱ་ནག་གཞུང་ཚབ་བར་གོམ་བགྲོད་གནང་ནས་དེར་ཟས་བཅད་ངོ་རྒོལ་གནང་རྒྱུ་ཡིན་པ་མ་ཟད། དེ་རྗེས་ཨོ་ཊ་ཝ་ནས་ཕྱིར་ཊོ་རན་ཊོ་བར་ཞི་བའི་གོམ་བགྲོད་གནང་མཐར་༸སྐུའི་འཁྲུངས་ཉིན་ས་གནས་དེར་ཕྱིར་འབྱོར་ཐབས་གནང་རྒྱུ་རེད་འདུག
གཞི་རྩའི་སངས་རྒྱས་སྐྱབས་ལགས་ཀྱིས་རྒྱུན་དུ་ཊོ་རན་ཊོ་ནང་རྟེན་གཞི་བྱས་པའི་རྒྱ་ནག་གི་ཚོང་འབྲེལ་དོན་གཅོད་ལས་ཁུངས་མདུན་དུ་ལྷག་དཀར་ནམ་ཡིན་ལ་བོད་དོན་ལས་འགུལ་སྤེལ་ནས་ད་བར་ལོ་གཉིས་ལྷག་འགྲོ་མུས་ཡིན་པ་རེད། ཐེངས་འདིའི་གོམ་བགྲོད་ལས་འགུལ་དང་འབྲེལ་ཉིན་གཅིག་གི་རིང་ལ་བོད་མི་གཅིག་ནས་མཉམ་ཞུགས་གནང་འདུག
