གཟའ་འཁོར་གཅིག་འདིའི་ནང་རྒྱ་གར་དང་བལ་ཡུལ་ནང་གི་བཙན་བྱོལ་བོད་མིའི་འདུས་སྡོད་ཁྲོད་ཏོག་དབྱིབས་ནད་གཞི་ཁྱབ་གདལ་དེ་སྔར་ལས་ཤུགས་ཆེར་ཕྱིན་ནས་བོད་མི་ ༡༤༨ ལ་གཉན་རིམས་ཕོག་ཡོད་འདུག
དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༨ པ་སྤེལ་སྐབས་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འགྲེལ་བརྗོད་གནང་བར་ད་བར་བཙན་བྱོལ་བོད་མིའི་འདུས་སྡོད་ས་ཁུལ་ཁག་ཏུ་ཁྱོན་བོད་མི་ ༥༣༥༦ ལ་ཏོག་དབྱིབས་གཉན་རིམས་ཕོག་ཡོད་ཀྱང་དེའི་ཁོངས་ནས་ ༤༨༩༧ དྲག་སྐྱེད་བྱུང་ཡོད་པ་དང། ད་ལྟའི་ཆར་ནད་ཀྱིས་མནར་བཞིན་པ་བོད་མི་ཁྱོན་ ༣༢༧ ཡོད་པ་ལས་འདས་པའི་བདུན་ཕྲག་གཅིག་ཁོ་ནའི་ནང་རྒྱ་གར་དང་བལ་ཡུལ་གཉིས་སུ་བོད་མི་གཉན་རིམས་ཕོག་མཁན ༡༤༨ བྱུང་ཡོད་པ་ནི་གཟའ་འཁོར་སྔོན་མ་དང་བསྡུར་ན་མང་བ་ཆགས་འདུག
ཁོང་གིས་རྒྱ་གར་རྒྱལ་ཡོངས་ནང་ལ་མཚོན་ན་འདས་པའི་ཚོུད་ ༢༤ ནང་ནད་གཞི་གསར་པ་ཕོག་མཁན་གྱི་གྲངས་ཐོ་འདི་འཕར་ཆ་ཆེན་པོ་བྱུང་སྟེ་མི་གྲངས་ ༥༨༡ གི་ཚེ་སྲོག་ཤོར་ཡོད་པ་དང་དེ་ནི་གཙོ་བོ་རྒྱ་གར་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཁྲོད་ཀྱི་སྒོ་རྒྱ་སོགས་རིམ་པས་ལྷོང་ཡང་བཏང་ནས་མི་མང་འགྲུལ་བཞུད་དང་འདུ་འཛོམས་གནང་བ་སོགས་ལ་བརྟེན་ནས་ཡོང་གི་ཡོད་པ་མ་ཟད། ད་ཆ་བོད་མིའི་འདུས་སྡོད་ཀྱི་གཞིས་སྒར་ཁག་ཏུའང་ནད་གཞི་ཕོག་མཁན་གྱི་གྲངས་ཐོར་འཕར་ཆ་ཤུགས་ཆེ་འབྱུང་བཞིན་ཡོད་ཀྱང་། བོད་མི་དེ་དག་ལས་ཏོག་དབྱིབས་སྔོན་ཁབ་ཐོབ་མཁན་རྣམས་ལ་ཉེན་ཁ་ཆུང་བ་འདུག་ཅེས་གསུངས་སོང་བ་དང་ཆབས་ཅིག་ཏུ་བོད་མི་མང་ཚོགས་ནས་གཉན་རིམས་དྲག་སྐྱེད་མ་བྱུང་བར་དུ་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་པའི་གཞེན་སྐུལ་གནང་ཡོད། 
ཚེ་རིང་མཚམས་གཅོད་ལགས་ཀྱིས་ད་ཆ་རྒྱ་གར་དང་ལྷོ་ཤར་ཨེ་ཤ་ཡའི་ས་ཁུལ་མང་པོའི་ནང་ཆར་དུས་འགོ་འཛུགས་དང་འབྲེལ་འདིའི་སྐབས་སུ་དུག་སྦྲང་སོགས་ཀྱི་རྐྱེན་པས་གཉན་ཁའི་ནད་གཞི་གཞན་མང་དག་ཅིག་ཡོང་གི་ཡོད་པར་འགྲེལ་བརྗོད་དང་སྦྲགས། བོད་མི་མང་ཚོགས་ནས་དམིགས་བསལ་ཐུགས་སྣང་གནང་གིས་གཙང་སྦྲ་འཕྲོད་བསྟེན་གང་ལེགས་གནང་དགོས་སྐོར་གསུངས་པ་མ་ཟད། ཕྱི་ལུགས་ཀྱི་སྨན་པ་བསྟན་འཛིན་རྣམ་སྒྲོལ་ལགས་ཀྱིས་ཀྱང་གཉན་རིམས་སྔོན་འགོག་གི་ཐབས་ལམ་བསྟེན་ཚུལ་དང་ལྷག་དོན་བལ་ཡུལ་ནང་ཉེ་ཆར་ཨ་རི་ནས་བཟོས་པའི་ཏོག་དབྱིབས་སྔོན་ཁབ་དང་དེ་བཞིན་རྒྱ་ནག་གིས་བཟོས་པའི་སྔོན་ཁབ་གཉིས་ཐོབ་ཡོད་པ་དེ་དག་མཉམ་འབྲེལ་རྒྱལ་ཚོགས་ནས་ཆོག་མཆན་ཐོབ་པ་ཞིག་ཡིན་སྟབས་བོད་མི་རྣམས་ནས་དངངས་སྐྲག་གནང་མི་དགོས་པ་དེ་ལྟར་ནའང་། བལ་ཡུལ་དུ་གནས་བཞུགས་བོད་མི་དེ་དག་ནས་ Johnson & Johnson སྔོན་ཁབ་བཞེས་ན་ལེགས་སྐོར་གསུངས་ཡོད།
སྤྱིར་འདི་ལོའི་ཟླ་བ་དང་པོའི་ཚེས་ ༡༦ ནས་བཟུང་རྒྱ་གར་གྱི་ནང་དུ་ཏོག་དབྱིབས་གཉན་རིམས་ཀྱི་འགོག་ཁབ་རྒྱག་རྒྱུ་དབུ་འཛུགས་གནང་ཡོད་པ་ལྟར། ད་ལྟའི་བར་དུ་རྒྱ་གར་ནང་གི་བོད་མི་གྲངས་ ༡༩༧༧༡ ལ་འགོག་ཁབ་གཉིས་ཀ་དང་མི་གྲངས་ ༢༦༡༦༦ ལ་སྔོན་ཁབ་དང་པོ་བརྒྱབ་ཟིན་པ་མ་ཟད། བལ་ཡུལ་ནང་གི་བོད་མི་གྲངས་ ༤༠༣ ལ་སྔོན་ཁབ་གཉིས་ཀ་བརྒྱབ་ཡོད་པ་དང་མི་གྲངས་ ༡༠༤༥ ལ་སྔོན་ཁབ་དང་པོ་བརྒྱབ་ཡོད་པ་རེད།
