བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་ལྷོ་ཨ་མི་རི་ཀའི་རྒྱལ་ཁབ་སྦར་ཛིལ་ནང་གི་གཞུང་འབྲེལ་འཚམས་གཟིགས་ལེགས་གྲུབ་ཀྱིས་ཁ་སང་ Columbia ནང་ཕེབས་འབྱོར་གྱིས་ཁུལ་དེའི་གྲགས་ཆེ་བའི་བརྒྱུད་ལམ་ཁག་གི་བཀའ་འདྲི་དང་ལེན་དང་ཀོ་ལོམ་བི་ཡའི་བསམ་མཛོད་ལྟེ་གནས་ཁང་གི་ཚོགས་མི་དང་ལྷན་བོད་ནང་གི་ཛ་དྲག་གནས་སྟངས་སྐོར་ལ་བགྲོ་གླེང་གནང་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་འགན་བཞེས་རྗེས་སུ་ལྷོ་ཨ་རི་ཁུལ་དུ་གཞུང་འབྲེལ་འཚམས་གཟིགས་ཐོག་མ་དེ་གནང་བཞིན་ཡོད་པ་ལྟར་ཁ་སང་སྔ་དྲོར་ལྷོ་ཨ་རིའི་རྒྱལ་ཁབ་ Columbia རྒྱལ་ས་ Bogota ལ་ཕེབས་འབྱོར་བྱུང་སྟེ་གནམ་ཐང་དུ་ཀོ་ལམ་བི་ཡ་ཡུལ་གྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་ Claudia Bonitto ལགས་དང་ཁོང་གི་སྐུ་ཟླ་གཉིས་གཙོས་བོད་དོན་རྒྱབ་སྐྱོར་བ་ཁག་གིས་དགའ་བསུའི་སྣེ་ལེན་ཞུས་ཡོད་པ་དང་། དེ་རྗེས་ཀོ་ལོ་བིས་ཡ་ནང་གི་མཛད་རིམ་ཐོག་མར་ཡུལ་རྒྱལ་ཡོངས་རླུང་འཕྲིན་ཁང་ཆེ་ཤོས་ Caracol Radio La W ཞེས་པས་སྲིད་སྐྱོང་མཆོག་ལ་སྐར་མ་ ༤༥ རིང་བོད་དོན་དང་འབྲེལ་བའི་གནད་དོན་སྐོར་བཀའ་འདྲི་ཞུས་ཡོད་པ་དང་སྐབས་དེར་སྲིད་སྐྱོང་མཆོག་གིས་གཙོ་བོ་བོད་ནང་གི་ཛ་དྲག་གནས་སྟངས་སྐོར་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་བོད་མིའི་སྒྲིག་འཛུགས་ཀྱི་གནས་སྟངས་སོགས་ངོ་སྤྲོད་གནང་སྟེ་ཁོང་ལྷོ་ཨ་རིར་གཞུང་འབྲེལ་མཚམས་གཟིགས་སུ་ཕྱོགས་ཕེབས་ དོན་གཙོ་བོ་ནི་ཡུལ་དེའི་གནས་སྟངས་རྒྱུས་ལོན་དང་ལྷག་དོན་བོད་དོན་ལ་རྒྱབ་སྐྱོར་འཚོལ་ཐབས་ཆེད་ཡིན་པར་གསུངས་འདུག
སྲིད་སྐྱོང་མཆོག་གིས་ཀོ་ལོམ་བི་ཡའི་གསར་ཤོག་ཁང་ཆེ་གྲས་ El Spectador གྱི་བཀའ་འདྲི་དང་ལེན་གནང་རྗེས་ El Bosque གཙུག་ལག་སློབ་གཉེར་ཁང་གིས་བཀའ་འདྲི་ལས་རིམ་ཞིག་གོ་སྒྲིག་ཞུས་པར་ལྷན་ཞུགས་གནང་བ་དང་ཕྱི་དྲོ་ཀོ་ལོམ་བི་ཡའི་བསམ་མཛོད་ལྟེ་གནས་ཁང་ཁག་གི་འགན་འཛིན་དང་ཚོགས་མི་ལྷན་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་དང་དེའི་ཤུགས་། བོད་ཀྱི་ངོ་བོ་དང་རིག་གཞུང་སོགས་ཀྱི་སྐོར་ལ་བགྲོ་གླེང་གནང་རྗེས་ Civil Society མི་སྣ་ཁག་ཅིག་དང་ལྷན་དུ་བོད་དོན་དང་འབྲེལ་བའི་བཀའ་མོལ་ལྷུག་པོ་གནང་འདུག
སྲིད་སྐྱོང་སྤེན་པ་ཚེ་རིང་མཆོག་ནས་ Columbia ནང་གི་གཞུང་འབྲེལ་འཚམས་གཟིགས་ལེགས་གྲུབ་རྗེས་ཁོས་ཊ་རི་ཀ མེ་སི་ཀོ དེ་ནས་ཨ་རི་བཅས་སུ་འཚམས་གཟིགས་གནང་རྒྱུ་ཡིན་པ་རེད།
