Monthly Archives: February, 2017

དེ་རིང་ཟླ་ ༢ ཚེས་ ༢༢ ཉིན་སྔ་དྲོ་ཚོུད་ ༡༠།༠༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཞུགས་སྒར་མེག་ལོར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཉེ་འཁྲིས་སུ་ཆབ་སྲིད་བཙོན་ཟུར་བཞུགས་ཤག་གྲུ་འཛིན་དགའ་ཚལ་ཁང་གསར་རྒྱག་ལེགས་གྲུབ་བྱུང་བ་དབུ་འབྱེད་གནང་སོང་། བོད་མིའི་སྒྲིག་འཛུགས་ནས་བོད་ཀྱི་ཆབ་སྲིད་བཙོན་ཟུར་ཨོ་སི་ཊོ་ལིར་གཞི་སྤོས་ཁོངས་སུ་རྒྱན་མ་ཐོན་པར་སྡོད་ཁང་དགོས་རིགས་དང་། ཕྱི་རྒྱལ་དུ་གཞི་སྤོས་གནང་འདོད་མེད་པ། དེ་བཞིན་དྷ་ས་ས་གནས་འགོ་འཛིན་ལས་ཤག་མེད་པའི་དཀའ་ངལ་བཅས་སེལ་ཐབས་སླད་ཕྱི་ལོ་ ༢༠༡༤ ཕྱི་ཟླ་ ༡༠ ནས་དྷ་ས་དགའ་ལྡན་ཆོས་གླིང་ཉེ་འདབས་སུ་ས་ཆ་རྒྱ་ཁྱོན་ཕི་ཀྲི་གྲུ་བཞི་མ་ ༨༠༨༥ ཐོག་ཧིན་སྒོར་འབུམ་ ༡༧༦ གི་འགྲོ་གྲོན་བཏང་སྟེ་གྲུ་འཛིན་དགའ་ཚལ་ཞེས་པའི་སྡོད་ཁང་གསར་རྒྱག་གྱི་ལས་གཞི་དབུ་འཛུགས་གནང་ཡོད་པ་རེད། མཛད་སྒོ་དེའི་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ལྷན་ཁང་ཁག་གི་བཀའ་བློན་རྣམ་པ། ལས་གཞིའི་ཐོག་མཐུན་འགྱུར་རོགས་དངུལ་གནང་མཁན་ཨི་ཊ་ལིར་རྟེན་གཞི་བྱས་པའི་ཝི་མ་ལ་རོགས་ཚོགས་ཀྱི་ཚོགས་གཙོ་དང་འབྲེལ་ཡོད་ལས་བྱེད། དེ་བཞིན་ལྷན་ཁང་གི་དྲུང་ཆེ་རྣམ་པ་དང་། ཆབ་སྲིད་བཙོན་ཟུར་སོགས་ལྷན་འཛོམས་བྱུང་འདུག སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཨར་ལས་གསར་རྒྱག་གི་ལས་གཞི་དེའི་རྒྱབ་ལྗོངས་ཀྱི་ལོ་རྒྱུས་དང་བཅས་སྙིང་བསྡུས་ངོ་སྤྲོད་གནང་པ་དང་འབྲེལ། ལས་གཞི་དེའི་ཆེད་ཐོག་མཐའ་བར་གསུམ་དུ་མཐུན་འགྱུར་རོགས་དངུལ་དང་ལས་དོན་ཡོངས་ཀྱི་ཐད་ཕྱག་ལས་གནང་མཁན་ཀུན་ལ་ཐུགས་རྗེ་ཆེ་ཞུ་སོགས་གནང་ཡོད་པ་རེད། རྩ་བའི་སྡོད་ཁང་གསར་རྒྱག་གི་ལས་གཞི་འདིར་ཁྱོན་འགྲོ་གྲོན་ཧིན་སྒོར་འབུམ་ ༡༧༦ བཏང་པའི་ཁོངས་ནས་འབུམ་ ༥༠ དབུས་བོད་མིའི་སྒྲིག་འཛུགས་ནས་གནང་ཡོད་པ་དང་། དེ་མིན་འགྲོ་གྲོན་ཧིན་སྒོར་འབུམ་ ༡༢༦ ཨི་ཊ་ལིར་རྟེན་གཞི་བྱས་པའི་ཝི་མ་ལ་རོགས་ཚོགས་ནས་གནང་པ་ཞིག་ཡིན་པ་རེད། ཝི་མ་ལ་རོགས་ཚོགས་ཀྱི་ཚོགས་གཙོ་ལྕམ་མི་མི་ལགས་ཀྱིས་ཚོགས་པའི་ངོས་ནས་རོགས་སྐྱོར་གནང་པ་ལྟར། ལས་གཞི་དེ་དངོས་སུ་ལེགས་གྲུབ་ཟིན་པ་མཐོང་རྒྱུ་རྒྱུ་བྱུང་བ་ནི་ཧ་ཅང་དགའ་ཚོར་ཆེན་པོ་བྱུང་སྐོར་འགྲེལ་བརྗོད་གནང་པ་དང་འབྲེལ། ད་ལྟའི་ཆར་ཁང་རྩིག་གཉིས་ལས་མེད་པ་དང་། མ་འོངས་པར་ཐོག་རྩིག་གསུམ་པ་དང་བཞི་པ་བཅས་བརྒྱབ་རྒྱུ་དང་ཆབ་སྲིད་བཙོན་ཟུར་གང་མང་བཞུགས་རྒྱུ་བྱུང་བར་རེ་སྨོན་གནང་གི་འདུག གཞི་རྩའི་བོད་ཀྱི་ཆབ་སྲིད་བཙོན་ཟུར་སྡོད་ཁང་གསར་པ་དེར་ཁང་རྩིག་གཉིས་ལས་མེད་ཀྱང་། མ་འོངས་པར་རྩིག་རྨང་དེར་ཐོག་རྩིག་བཞི་པར་བརྒྱབ་རྒྱུ་ཡོད་པ་རེད་འདུག། ད་ལྟའི་ཆར་སྡོད་ཁང་དེར་ཁྱོན་ཁང་པ་ ༡༦ ཡོད་པ་དང་། ཁང་པ་ ༡༡ བོད་ཀྱི་ཆབ་སྲིད་བཙོན་ཟུར་ཚོའི་བཞཱུགས་ཤག་ཡིན་པ་དང་། དེ་མིན་ཁང་པ་ ༥ དྷ་ས་ས་གནས་འགོ་འཛིན་གྱི་ལས་ཤག་ཡིན་པ་རེད་འདུག

སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷོ་མོགས་ཀྱིས་ཇི་ནི་ཝ་འགྲོ་བ་མིའི་ཐོབ་ཐང་དང་མང་གཙོའི་ལྷན་ཚོགས་ཐེངས་ ༩ ཐོག་བོད་དོན་གསུང་བཤད་གནང་པ་དང་འབྲེལ། འགྲོ་བ་མིའི་ཐོབ་ཐང་ལ་གུས་བརྩི་གནང་མཁན་ཚོས་ངེས་པར་དུ་བོད་ཐོག་དོ་སྣང་གནང་རོགས་ཞེས་ཞུས་པ་དང་སྦྲགས། ལྷག་དོན་རིན་པོ་ཆེ་དམ་པའི་གནད་དོན་ལ་ཁྲིམས་ཐོག་ནས་ཞིབ་འཇུག་མཐིལ་ཕྱིན་ཞིག་ཡོང་ཐབས་སུ་རྒྱ་གཞུང་ལ་འདྲི་རྩད་གནང་རོགས་ཞེས་འབོད་སྐུལ་ཞུས་འདུག དེའང་ཟླ་ ༢ ཚེས་ ༢༠ ཉིན་རྒྱབ་ནས་དབུ་འཛུགས་ཀྱིས་ཁ་སང་བར་སུད་སི་གྲོང་ཁྱེར་ཇི་ནི་ཝ་ནང་བསྐོང་ཚོགས་གནང་ཡོད་པ་དང་། ལྷན་ཚོགས་དེའི་ཐོག་འཛམ་གླིང་རྒྱལ་ཁབ་ཁག་འདྲ་མིན་གྱི་མང་གཙོ་དང་འགྲོ་བ་མིའི་ཐོབ་ཐང་ལས་འགུལ་བ། གསར་འགོད་པ། ཆབ་སྲིད་བཙོན་ཟུར། དེ་བཞིན་གཞུང་འབྲེལ་མིན་པའི་སྐུ་ཚབ་སོགས་ཁྱོན་མི་གྲངས་ ༥༠༠ ལྷག་ཙམ་ལྷན་ཞུགས་གནང་ཡོད་པའི་ཁོངས། ཨུ་རུ་སུ། ཨི་རན། ཊར་ཀི་དང་ཝི་ཏི་ནམ་ལ་སོགས་པའི་རྒྱལ་ཁབ་འདྲ་མིན་ ༡༤ འི་འགྲོ་བ་མིའི་ཐོབ་རྩོད་ལེན་པ་དང་ཆབ་སྲིད་བཙོན་ཟུར་བཅས་ཀྱིས་རང་ཉིས་ཀྱི་ནང་མིར་འཕྲད་པའི་ངལ་བ་རྣམས་ཀྱི་ཐོག་ལ་གསུང་བཤད་གནང་ཡོད་པ་དང་། དེ་བཞིན་བོད་མིའི་ཕྱོགས་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་དམ་པའི་ཚ་མོ་ཉི་མ་ལྷ་མོ་ལགས་ཀྱང་ལྷན་ཞུགས་ཀྱིས་གསུང་བཤད་གནང་ཡོད་པ་རེད། སྐབས་དེར་ཉི་མ་ལྷ་མོ་ལགས་ཀྱིས་ཁོ་མོ་རང་གི་ཨ་ཞང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་དངོས་ཡོད་གནས་ཚུལ་ཁག་འཛམ་གླིང་མང་ཚོགས་ལ་བདེན་པ་ར་འཕྲོད་ཡོང་ཕྱིར་ངལ་བ་དུ་མ་བརྒྱུད་ནས་རང་དབང་ལུང་པ་རྒྱ་གར་དུ་བྲོས་བྱོལ་ཕེབས་སྐོར་ངོ་སྤྲོད་དང་འབྲེལ། རྒྱ་གཞུང་གིས་རིན་པོ་ཆེ་མཆོག་ལ་ཕྱི་ལོ་ ༢༠༠༢ ལོར་མ་ཉེས་ཁ་གཡོག་འོག་འཛིན་བཟུང་གིས་ལོ་ངོ་ ༡༣ རིང་མི་སྤྱོད་ལས་འདས་པའི་མནར་གཅོད་ཚད་མེད་བཏང་པ་མ་ཟད། མཐར་ཕྱི་ལོ་ ༢༠༡༥ ཟླ་ ༧ ཚེས་ ༡༢ ཉིན་བཙོན་ཁང་ནང་སྐུ་བཀྲོངས་པའི་གནས་ཚུལ་ཐོན་ཚུལ་མངོན་གསལ་གནང་འདུག དེ་བཞིན་ཁོང་གིས་ཨ་ཞང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་ད་ཆ་འཛམ་གླིང་འདིའི་ཐོག་སྐུ་འཚོ་བཞུགས་མེད་ཀྱང་། ཁོང་གིས་དུས་ནམ་ཡང་ཡིད་མ་ཞུམ་པར་མུ་མཐུད་རྒྱལ་སྤྱིའི་ཚོགས་སྡེ་ཁག་ལ་རིན་པོ་ཆེའི་གནད་དོན་ལ་ཁྲིམས་ཐོག་ནས་ཞིབ་འཇུག་མཐིལ་ཕྱིན་ཡོང་རྒྱུ་དང་། ཁྱད་པར་དུ་བོད་ནང་འགྲོ་བ་མིའི་ཐོབ་ཐང་ཡར་རྒྱས་ཡོང་བར་ཁ་ཞེ་གཉིས་མེད་ཀྱི་རྒྱབ་སྐྱོར་ཡོང་བའི་འབོད་སྐུལ་ཞུས་འདུག ཁོང་གིས་ད་རེས་ཁོང་རང་ཉིད་ཞིང་གཤེགས་རིན་པོ་ཆེ་མཆོག་གི་ཚ་མོ་ཙམ་མིན་པར་གཞིས་ལུས་རྒྱ་ཆེ་བོད་མི་ཡོངས་ཀྱི་མངོན་འདོད་དང་ངོ་བོ་མཚོན་པའི་ཐོག་ནས་འདིར་བཅར་བ་ཡིན་སྟབས། འགྲོ་བ་མིའི་ཐོབ་ཐང་ལ་གུས་བརྩི་གནང་མཁན་ཚོས་ངེས་པར་དུ་བོད་དོན་ཐོག་དོ་སྣང་གནང་སྟེ་བོད་ནང་གི་ཛ་དྲག་གནས་སྟངས་ལ་དོན་ཕན་སོན་པའི་རྒྱབ་སྐྱོར་གནང་བའི་དགོས་འདུན་ཤུགས་ཆེ་བཏོན་འདུག གཞི་རྩའི་ཇི་ནི་ཝའི་འགྲོ་བ་མིའི་ཐོབ་ཐང་དང་མང་གཙོའི་ལྷན་ཚོགས་ཐེངས་ ༧ ཐོག་བོད་མིའི་སྒྲིག་འཛུགས་ཕྱི་དྲིལ་བཀའ་ཟུར་བདེ་སྐྱིད་ཆོས་དབྱངས་མཆོག་དང་། སྔ་ལོའི་ལྷན་ཚོགས་ཐེངས་ ༨ སྐབས་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ལྷན་བཅར་གྱིས་གསུང་བཤད་གནང་ཡོད་པ་རེད།

ཉན་པ།: Listen ཕབ་ལེན། Download བོད་ཀྱི་བེུད་ནུས་སྟོབས་གོང་སྤེལ་གྱི་ཚོགས་ཆེན་དང་པོའི་ཐོག་བཀའ་ཤག་གིས་གསུམ་པའི་ཚེས་བཅིུས་དེ་བེུད་ཀྱི་ཉིན་མོར་སྲུང་བརྩི་ཞུ་རྒྱུ་ཡིན་གསུངས་སོང་། རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་འདྲི་རྩད་ནན་པོ་གནང་དགོས་པའི་འབོད་སྐུལ། བསྟན་འཛིན་པདྨ་ལགས་ཨེ་ཤེ་ཡ་ཐཡི་ཁུ་ཚུར་རྩེད་འགྲན་ནང་མཉམ་ཞུགས་གནང་རྒྱུ། བོད་མདོ་དབུས་ཁམས་གསུམ་དུ་ལོ་གསར་སྲུང་བརྩི་ཞུ་སྲོལ་ཡོད་པ་ལས། - མདོ་སྟོད། གླུ་གཞས་ལེ་ཚན། བདེ་སྐྱིད་ཚེ་རིང་གི་གླུ་གཞས་དབྱངས་གསལ། Tuesday 21/02/2017 First Tibetan Women's Empowerment Conference: Kashag to commemorate March 12 as Women’s Day Rights groups urge UN to press China on continued rights violation Tenzin Pema to compete in Muaythai World Championship Losar Series: Losar Celebration in Dotoe Song Feature : ‘Yangsel’ by Rapper Dickey Tsering

རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་རྒྱལ་སྤྱིའི་བོད་དོན་ལས་འགུལ་ཁང་། Tibet Justice Center དེ་བཞིན་བོད་རང་བཙན་སློབ་ཕྲུག་ཚོགས་པ་བཅས་བོད་དོན་རྒྱབ་སྐྱོར་ཚོགས་པ་བཞིས་གཙོས་པའི་རྒྱལ་སྤྱིའི་ཉེས་ཡངས་ཚོགས་པ་དང་འགྲོ་བ་མིའི་ཐོང་ཐང་ལྟ་ཞིབ་ཚོགས་པ། འཛམ་གླིང་ཡུ་གུར་ལྷན་ཚོགས་སོགས་ཁྱོན་རྒྱལ་སྤྱིའི་ཚོགས་སྡེ་ཁག་ ༡༨ ཙམ་ནས་མཉམ་རུབ་ཀྱིས་རྒྱ་གཞུང་གིས་རྒྱ་ནག་དང་བོད། ཤིན་ཅང་དང་ཧོང་ཀོང་སོགས་ཀྱི་ནང་ཆོས་དད་འདྲ་མིན་དང་གྲངས་ཉུང་མི་རིགས། སྤྱི་དམངས་ཀྱི་ཐོབ་ཐང་རྩོད་ལེན་པ་རྣམས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་མུ་མཐུད་གཏོང་བཞིན་ཡོད་སྟབས། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་སྟེང་གནད་དོན་དེ་དག་གི་ཐོག་རྒྱ་གཞུང་ལ་འདྲི་རྩད་ནན་པོ་གནང་དགོས་པའི་ཞུ་འབོད་བྱས་འདུག དེ་ཡང་ཚོགས་པ་ ༡༨ དེ་དག་གི་ངོས་ནས་ཟླ་ ༢ ཚེས་ ༡༦ ཉིན་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཏན་འཇགས་ཚོགས་མི་རྒྱལ་ཁབ་ཀྱི་སྐུ་ཚབ་རྣམ་པའི་མཚན་ཐོག་ལ་ཞུ་སྙན་ཕུལ་འདུག དེའི་ནང་ཚོགས་པ་དེ་དག་གིས་སྔར་ལོ་རྒྱལ་ཚོགས་ཀྱི་འགྲོ་མིའི་ཐོབ་ཐང་གི་གཙོ་འཛིན་མཆོག་གིས་རྒྱ་ནག་ནང་དུ་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནད་དོན་གླེང་སློང་གནང་པ་དང་འབྲེལ། རྒྱ་གཞུང་ལ་རང་རྒྱལ་ཁབ་ཀྱི་ཁྲིམས་རྣམས་ལག་བསྟར་བྱེད་དགོས་པ་དང། རྒྱལ་སྤྱིའི་ཐོག་ཁས་ལེན་ཞུས་པ་ཁག་ལག་བསྟར་དོན་འཁྱོལ་གནང་སྟེ་རྒྱ་གཞུང་གི་བཙོན་འཇུག་འོག་ཡོད་པའི་འགྲོ་བ་མིའི་ཐོབ་ཐང་ཁྲིམས་རྩོད་པ་དང་ལས་འགུལ་བ་རྣམས་འཕྲལ་མར་གློད་བཀྲོལ་ཐོངས་དགོས་པའི་འབོད་སྐུལ་གནང་དོན་བཞིན། སྔ་ལོའི་ཕྱི་ཟླ་ ༣ པའི་ནང་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་ཚོགས་མི་རྒྱལ་ཁབ་ ༡༢ སྐུ་ཚབ་རྣམས་ཚོས་གཙོ་འཛིན་མཆོག་གིས་ཞུ་དོན་ལ་རྒྱབ་སྐྱོར་གྱི་བསྒྲགས་གཏམ་ཞིག་སྤེལ་ཡོད་པ་དང་། ཕྱི་ལོ་ ༢༠༡༦ ལོར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩོད་ལེན་པ་འཛིན་བཟུང་དང་གར་སོང་ཆ་མེད་དུ་བཏང་བ་མ་ཟད། མང་ཚོགས་ལ་ཁྲིམས་ཀྱི་འགྲོ་ལུགས་ཀྱི་ཐོབ་ཐང་མ་སྤྲད་པ་སོགས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་མུ་མཐུད་གཏོང་བཞིན་ཡོད་པ་ཐེར་བཏོན་དང་ཆབས་ཅིག རིང་མིན་ཟླ་ ༢ ཚེས་ ༢༧ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༤ པའི་ཐོག་ལྷན་ཚོགས་ཀྱིས་རྒྱལ་སྤྱིའི་གཞུང་ཚོགས་ཁག་གི་ལྷན་དུ་ཟུངའབྲེལ་གྱིས་རྒྱ་ནག་ནང་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ཐོག་རྒྱ་ནག་དང་མཉམ་དུ་གླེང་སློང་གནང་དགོས་པའི་ཞུ་འབོད་ཀྱང་གནང་འདུག ཞུ་སྙན་དེའི་ནང་གཞན་ཞིག་ལ་སྔར་ལོ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་བསྒྲགས་གཏམ་དེའི་བརྒྱུད་ནས་རྒྱ་ནག་ནང་དུ་འགྲོ་བ་མིའི་ཐོབ་ཐང་རྩོད་ལེན་གནང་མཁན་དང་དེ་དག་གི་ནང་མི་རྣམས་ལ་སེམས་འགུལ་ཤུགས་ཆེ་ཐེབས་ཡོད་ཀྱང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཡར་རྒྱས་གང་ཡང་ཕྱིན་མེད་པ་མ་ཟད། དོན་གནད་ཁ་ཤས་ཐོག་གནས་སྟངས་ད་དུང་སྡུག་ཏུ་ཕྱིན་ཡོད་སྐོར་གསུངས་ཏེ་རྒྱ་གཞུང་གིས་དོན་དག་དེར་སྣང་མེད་དུ་བཞག་པའི་རྣམ་པ་ཆེས་མངོན་གསལ་ཡིན་པ་ཐེར་བཏོན་གནང་འདུག དེ་བཞིན་རྒྱ་ནག་གཞུང་གི་བཙོན་འཇུག་འོག་ཡོད་པའི་རྒྱ་རིག་ཁྲིམས་རྩོད་པ་རྣམས་གློག་བཀྲོལ་བཏང་མེད་པ་དང། ལ་ལ་ཞིག་བཙོན་ གྲོལ་བཏང་ཡོད་ཀྱང་སྡིགས་ར་དང་སུན་གརྩེར་བཟོ་རྐྱེན་རང་གི་ཕྱག་ལས་མུ་མཐུད་གནང་མ་ཐུབ་པ་དང་། དེ་མིན་རྒྱལ་ཁབ་གཞན་གྱི་མི་སེར་ཡིན་པ་ཧོང་ཀོང་ནང་དུ་དཔེ་དེབ་ཚོང་འགྲེམས་པ་ཁག་གཅིག་འཛིན་བཟུང་གིས་ཟླ་བ་མང་པོ་གར་སོང་ཆ་མེད་དུ་ཕྱིན་པ། ཧོང་ཀོང་ནང་གི་མང་གཙོའི་ལས་དོན་ལ་རྒྱ་གཞུང་གི་ཐེ་བྱུས་བྱས་པ། བཙོན་འཇུག་འོག་ཡོད་པའི་ཁྲིམས་རྩོད་པ་རྣམས་ལ་ཁྲིམས་ལུགས་ལྟར་ཐོབ་ཐང་མ་སྤྲད་པ། ཡུ་གུར་ཤེས་ལྡན་མི་སྣ་ Ilham Tohti མུ་མཐུད་བཙོན་ཁང་ནང་ཚེ་བཙོན་མྱོང་བཞིན་ཡོད་པ་དང། བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་མུ་མཐུད་བཀག་ཉར་བྱེད་བཞིན་པ་མ་ཟད། གསེར་རྟ་བླ་རུང་སྒར་དུ་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་མུ་མཐུད་གཏོང་བཞིན་ཡོད་སྐོར་སོགས་ཀྱི་གནད་དོན་མང་དག་ཞིག་ཐེར་བཏོན་གནང་འདུག ཚོགས་པ་དེ་དག་ནས་སྙན་ཞུ་དེའི་བརྒྱུད་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩོད་ལེན་པར་མནར་གཅོད་གཏོང་བཞིན་པ་འཕྲལ་མར་མཚམས་འཇོག་དང་དོན་འཁྱོལ་གྱི་ལག་བསྟར་དགོས་པ། རྒྱ་ནག་གཞུང་འབྲེལ་མ་ཡིན་པའི་ཚོགས་སྡེ་ཁག་དང་འབྲེལ་བའི་སྲིད་བྱུས་དང། འཇིགས་སྐུལ་བར་གདོང་ལེན་གྱི་སྲིད་བྱུས་ལ་བསྐྱར་ཞིབ། དེ་བཞིན་རྒྱ་ནག་གི་ཆོས་དོན་དང་འབྲེལ་བའི་སྒྲིག་གཞི་ཁག་གིས་ཡུ་གུར་དང་བོད་མི་གྲངས་ཉུང་མི་རིགས་རྣམས་ཀྱི་ཐོག་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པའི་གནད་དོན་ར་འཕྲོད་བྱེད་དགོས་པ་དང་། དེ་བཞིན་བོད་མི་དང་ཡུ་གུར་བ་དབུས་པའི་མང་ཚོགས་ཀྱི་སྨྲ་བརྗོད་རང་དབང་དང་འགྲོ་འདུག་སྤྱོད་གསུམ་གྱི་རང་དབང་ལ་ལྷོད་ཡངས་དགོས་པ་སོགས་ཀྱི་གནོན་ཤུགས་སྤྲོད་དགོས་པའི་དོན་གནད་ཁག་ ༥ བཏོན་གནང་འདུག

བོད་མིའི་སྒྲིག་འཛུགས་བཀའ་ཤག་གི་ལམ་སྟོན་གནང་དོན་ལྟར་ནང་སྲིད་ལས་ཁུངས་ཀྱིས་གོ་སྒྲིག་འོག་དབུས་བོད་ཀྱི་སྨན་རྩིས་ཁང་གི་ཚོགས་ཁང་དུ་བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་དབུ་འཛུགས་གནང་སོང་། དེ་རིང་ཟླ་ ༢ ཚེས་ ༢༡ ཉིན་སྔ་དྲོ་ཚོུད་  ༩ །༠༠ སྟེང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བེུད་ནུས་སྟོབས་གོང་སྤེལ་ཚན་པས་གོ་སྒྲིག་འོག་བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་དུ་བོད་ཀྱི་སྨན་རྩིས་ཁང་གི་ཚོགས་ཁང་དུ་བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་དབུ་འཛུགས་གནང་སོང་བ་དང་ཆབས་ཅིག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གིས་འདི་ལོ་ནས་གསུམ་པའི་བཅིུས་ཏེ་བེུད་སྒེར་ལངས་ཀྱི་ཉིན་མོ་དེ་བེུད་ཉིན་མོར་སྲུང་བརྩི་ཞུ་རྒྱུའི་གསལ་བསྒྲགས་བསྐྱངས་གནང་ཡོད་པ་རེད། ཉིན་གསུམ་རིང་ཚོགས་རྒྱུའི་ཚོགས་ཆེན་འདིའི་ཐོག་རྒྱ་གར་དང་བལ་ཡུལ། དེ་བཞིན་ཕྱི་རྒྱལ་བཅས་ཀྱི་ས་ཁུལ་མི་འདྲ་བ་ ༥༣  ནས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་དང་། དེ་བཞིན་མཐོ་སློབ་ཁག་སློབ་སྦྱོང་གནང་བཞིན་པའི་བེུད་སྐུ་ཚབ་ ༣༠༠ ཙམ་ཕེབས་འདུག ཚོགས་ཆེན་གོ་སྒྲིག་གནང་མཁན་ནང་སྲིད་ལས་ཁུངས་ཀྱི་སྐུ་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་བོད་མིའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དབུས་ཕྱི་ནང་གི་སྐུ་མགྲོན་རྣམ་པ་དང་། ཚོགས་བཅར་ཡོངས་ལ་མཚམས་འདྲི་དང་སྦྲགས། ཚོགས་ཆེན་འདི་ནི་ད་ལྟའི་བཀའ་ཤག་གིས་དེ་སྔ་ ༢༠༠༨ ལོར་གཏན་འབེབས་གནང་པའི་བེུད་ཀྱི་ནུས་ཤུགས་གོང་སྤེལ་གྱི་སྲིད་བྱུས་དང་འབྲེལ། ཚོགས་ཆུང་གཅིག་ཆེད་བཙུགས་ཀྱིས་དུས་ཀྱི་འགྱུར་འགྲོས་ལ་གཞིགས་ཏེ་དགོས་མཁོའི་རིགས་སྣོན་འཕྲི་སྤོར་གཅོག་དང་བསྐྱར་བཅོས་གནང་སྟེ་ཉེ་ཆར་ཟླ་ ༢ ཚེས་ ༢ ཉིན་གཏན་འབེབས་གནང་པ་ཞིག་ཆགས་ཀྱི་ཡོད་པ་ངོ་སྤྲོད་དང་། ལྷག་པར་དུ་ཚོགས་ཆེན་འདིའི་དགོས་དམིགས་གཙོ་བོ་ནི་བེུད་ཚོར་ཕྱོགས་གང་སྤྱིའི་ཐོག་ནས་ནུས་པ་འདྲ་མིན་ཡོད་པ་ཁག་སྤྱི་ཚོགས་ནང་བཏོན་མ་ནུས་པའམ་བཏོན་མ་ཐུབ་པའི་རྒྱུ་རྐྱེན་ཇི་ཡིན་བཙལ་གཅོད་གཏང་རྒྱུ་དེ་ཡིན་པ་གསུངས་ཡོད་པ་རེད། ད་དུང་ནང་སྲིད་བཀའ་བློན་མཆོག་གིས་སྤྱིར་བོད་པའི་སྤྱི་ཚོགས་ཀྱི་ལམ་ལུགས་དང་ཁྲིམས་སྒྲིག་གཞི་གང་དུའང་ཕོ་མོའི་དབར་ལ་དབྱེ་འབྱེད་རིགས་མེད་ཅིང་། དེ་སྔ་བོད་ནང་གི་ལུང་ཁུག་ས་གནས་རེ་ཟུང་ནང་ཁྱོ་གས་བཟའ་ཟླར་ཉེས་རྡུང་པ་བཏང་པ་བྱུང་ཡོད་པ་དེ་ནི་སྤྱི་ཚོགས་ཀྱི་གནས་སྟངས་མ་ཤེས་པ་དང་ཡུལ་ལུང་གི་གོམས་གཤིས་ངན་པའི་དབང་གིས་ཡིན་སྐོར་གསུངས་ཡོད། ཚོགས་ཆེན་གྱི་དབུ་འབྱེད་མཛད་སྒོའི་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་འཛིན་སྐྱོང་གི་ངོས་ནས་སྒྲིག་འཛུགས་ནང་ཕོ་མོ་དབྱེ་འབྱེད་རིགས་སྤུ་ཙམ་ཡང་མེད་ཅེས་གསུངས་པ་དང་སྦྲགས། ཚོགས་ཆེན་འདི་ནི་སྤྱི་ཚོགས་ནང་འདྲ་མཉམ་དང་དབྱེ་འབྱེད་མེད་པ་གཞི་བཞག་ནས་མ་ཡིན་པར་གཙོ་བོ་བོད་ཀྱི་བེུད་ནུས་སྟོབས་གོང་སྤེལ་གྱི་སྲིད་བྱུས་དེ་གལ་ཆེར་ངོས་འཛིན་གནང་པའི་ཐོག་ནས་བེུད་ལ་ཤེས་ཡོན་གྱི་ཆ་ནས་སློབ་ཡོན་དང་། འཕྲོད་བསྟེན་གྱི་ཆ་ནས་མ་དང་བྱིས་པའི་ལས་འཆར། ནང་སྲིད་ལས་ཁུངས་སུ་བེུད་སྟོབས་སྤེལ་བའི་ཚན་པ་ཟུར་བཙུགས་སོགས་འཛིན་སྐྱོང་ནས་དེའི་ཐད་དུས་ཀྱི་འགྱུར་འགྲོས་ལ་གཞིགས་ཏེ་མཐུན་འགྱུར་གང་མང་དང་གང་ཐུབ་སྦྱར་དང་སྦྱོར་མུས་ཡིན་སྐོར་གསུངས་གནང་སོང། ད་དུང་སྲིད་སྐྱོང་མཆོག་གིས་སྐབས་དེར་ཚོགས་བཅར་བ་ཡོངས་ལ་བཀའ་ཤག་ནས་གཏམ་བཟང་ཞིག་ཡོད་ཅེས་གསུངས་ཏེ་འདི་ལོ་ནས་ཕྱི་ཟླ་ ༣ ཚེས་ ༡༢ ཉིན་མོ་དེ་བེུད་ཉིན་མོར་སྲུང་བརྩི་གནང་རྒྱུའི་ཐག་གཅད་གནང་སྐོར་གསུངས་ཡོད། ཁྱད་པར་དུ་སྲིད་སྐྱོང་མཆོག་གིས་ཚོགས་བཅར་བ་ཡོངས་ལ་ཐེངས་འདིའི་ཚོགས་ཆེན་ཐོག་ནས་གཙོ་བོ་བཀའ་ཤག་གིས་གཏན་འབེབས་གནང་པའི་བེུད་ནུས་སྟོབས་གོང་སྤེལ་གྱི་སྲིད་བྱུས་དོན་ཚན་བདུན་ཅན་དེ་ཚགས་ཚུད་ཡོང་མིན་གཙོ་བོ་ས་གནས་ས་གནས་ཐོག་ཏུ་ལག་བསྟར་གནང་ཕྱོགས་ལ་རག་ལུས་ཡོད་པ་ལམ་སྟོན་གནང་ཡོད། ཚོགས་ཆེན་འདིའི་རིང་ལ་མཁས་པ་དང་གནད་ཡོད་མི་སྣའི་གསུང་བཤད་གོ་སྒྲིག་གནང་ཡོད་པ་བཞིན། དེ་རིང་དབུ་འབྱེད་མཛད་སྒོ་གྲུབ་བསྟུན་གནད་ཡོད་མི་སྣས་གསུང་བཤད་ཀྱི་ཐོག་མར་ཆོར་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་ཀྱི་ཆོས་རིག་ནང་བེུད་ཀྱི་གནས་བབ་སྐོར་དང་། དེའི་རྗེས་སུ་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་བེུད་འགོ་ཁྲིད་ཀྱི་གནད་འགག་གླེང་བ་ཅེས་པའི་ཐོག་གསུང་བཤད་དང་དེའི་ཐོག་ལ་དྲི་བ་དྲིས་ལན་བཅས་གནང་སོང་། ཉིན་རྒྱབ་ཏུ་ཚོགས་ཆུང་ཁག་བདུན་དུ་ཆ་བགོས་ཀྱིས་ཤེས་ཡོན་དང་འཕྲོད་བསྟེན། དེ་བཞིན་དཔལ་འབྱོར་སོགས་བརྗོད་གཞི་ལྔའི་ཐོག་ལ་གྲོས་བསྡུར་གནང་ཡོད།

ཉན་པ།: Listen ཕབ་ལེན། Download ༸གོང་ས་མཆོག་གིས་རྒྱལ་ཁབ་ཀྱི་བདག་དབང་གཙོ་བོ་ཡུལ་དེའི་མང་ཚོགས་ལ་ཡོད་པ་བཀའ་བསྩལ་འདུག བོད་ནང་དོན་གྲུབ་རྒྱལ་གྱི་ལོ་རྒྱུས་དེབ་དབུ་འབྱེད། སུད་སི་གཞུང་ནས་སྐྱབས་བཅོལ་བོད་མི་རྣམས་ཀྱི་རྒྱལ་ཁོངས་རྒྱ་ནག་ཅེས་བཀོད་རྒྱུ། བོད་མདོ་དབུས་ཁམས་གསུམ་དུ་ལོ་གསར་སྲུང་བརྩི་ཞུ་སྲོལ་ཡོད་པ་ལས། - དབུས་གཙང། Monday 20/02/2017 A country’s sovereignty lies with its people: Dalai Lama Tibetan representative refutes Chinese media assumption of change in Swiss policy on Tibet Book Release: ‘My Son Dhondup Gyal’ A mother’s tribute to her deceased son Losar Series: Utsang Losar Celebration

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གསར་ཁང་གྲགས་ཅན་ NDTV གསར་ཁང་གིས་ཆེད་དོན་བཀའ་འདྲིར་བཀའ་ལན་སྩལ་བའི་ཁྲོད། མགོན་པོ་༸གང་ཉིད་མཆོག་གིས་དེང་སང་འཛམ་གླིང་ནང་གི་དཀའ་ངལ་ཁག་ཅིག་ལ་གདོང་ལེན་དང་ཨ་རིའི་སྲིད་འཛིན་གསར་པའི་སྲིད་བྱུས་ཐོག་དགོངས་ཚུལ་ཇི་ཡོད་སོགས་གནད་དོན་ཁག་ཅིག་གི་སྐོར་བཀའ་ལན་བཀྲིན་བསྩལ་འདུག ལས་རིམ་དེ་ནི་ཁ་ཉིན་ཟླ་ ༡ ཚེས་ ༡༨ ཉིན་གསར་ཁང་དེའི་ Off the Cuff ཞེས་པའི་སྐར་མ་ ༤༠ རིང་བཀའ་འདྲིའི་ལས་རིམ་ཐོག་སྤྱི་ཁྱབ་རྩོམ་སྒྲིག་པ་སྐུ་ཞབས་ Shekhar Gupta ལགས་ཀྱིས་གཙོ་སྐྱོང་གནང་ཡོད་པ་དང་། སྐབས་དེར་ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་ཐེངས་འདིའི་ལས་རིམ་ཐོག་བསྐྱར་དུ་ཆིབས་བསྒྱུར་མཛད་པར་དགའ་བསུའི་འཚམས་འདྲི་ཞུས་པ་དང་སྦྲགས། ད་ལྟའི་དཀའ་རྙོག་ཅན་གྱི་འཛམ་གླིང་འདིའི་ཐོག་མགོན་པོ་༸གང་ཉིད་མཆོག་གིས་ཞི་བདེ་བག་ཕེབས་ངང་ཇི་ལྟར་གནང་བཞིན་ཡོད་སྐོར་བཀའ་འདྲི་ཞུས་པར་༸གོང་ས་མཆོག་གིས་མགོན་པོ་༸གང་ཉིད་མཆོག་དཔལ་ན་ལེནྡྲའི་ཆོས་བརྒྱུད་དྲི་མ་མེད་པའི་སློབ་མ་ཞིག་ཡིན་པའི་ཆ་ནས་དཀའ་ངལ་གང་ཞིག་འཕྲད་རུང་དེའི་རྒྱུ་རྐྱེན་ཁག་རྩད་གཅོད་ཀྱིས་རྣམ་དཔྱོད་བེད་སྤྱོད་གནང་དགོས་སྟབས། དཀའ་ངལ་དེ་དག་ལ་བརྟེན་ནས་མགོན་པོ་༸གང་ཉིད་ལ་འཕྲད་བཞིན་པའི་སུན་སྣང་གི་ཚོར་བ་རྣམས་རིམ་པས་ཉུང་དུ་འགྲོ་རྒྱུར་ཕན་ཐོགས་ཡོང་གི་འདུག་ཅེས་བཀའ་བསྩལ་འདུག གསར་འགོད་པ་སྐུ་ཞབས་ཤེ་ཁར་གུབ་ཏ་ལགས་ཀྱིས་ད་ལྟའི་འཛམ་གླིང་འདིའི་ནང་མང་གཙོའི་ལམ་ལུགས་ལས་སྲིད་དབང་སྒེར་འཛིན་གྱི་ལམ་ལུགས་དེ་དར་སྤེལ་ཤུགས་ཆེ་རུ་འགྲོ་བཞིན་པའི་གནད་དོན་ལ་༸གོང་ས་མཆོག་གི་ངོས་ནས་གཟིགས་ཚུལ་ཇི་ཡོད་བཀའ་འདྲི་ཞུས་པར་མགོན་པོ་མཆོག་གིས་ང་ཚོའི་འཛམ་གླིང་འདིའི་བདག་དབང་གཙོ་བོ་མང་ཚོགས་ལ་ཡོད་པ་ལས། འགོ་ཁྲིད་གང་ཟག་སྒེར་གཅིག་གཉིས་ལ་མེད་སྐོར་བཀའ་ནན་སྩལ་བ་མ་ཟད། འགྲོ་བ་མིའི་རང་བཞིན་དེ་སྙིང་རྗེ་ཅན་དང་བསམ་ཤེས་ཅན་ཞིག་ཡིན་སྟབས། མགོན་པོ་མཆོག་གིས་དུས་ཀུན་ཏུ་འགྲོ་བ་མི་ལ་ཡིད་ཆེས་གནང་གི་ཡོད། འོན་ཀྱང་རྒྱལ་ཁབ་ཀྱི་འགོ་ཁྲིད་ཅེས་པ་རིམ་བཞིན་འཕོ་འགྱུར་འགྲོ་ངེས་ཡིན་པ་བཀའ་བསྩལ་འདུག སྤྱི་ཁྱབ་རྩོམ་སྒྲིག་པ་གུབ་ཏ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་ནག་དེ་རྒྱལ་སྤྱིའི་ཁྲོད་འགོ་ཁྲིད་བྱ་རྒྱུར་གྲ་སྒྲིག་འདུག་གམ་མི་འདུག་ཞེས་བཀའ་འདྲི་ཞུས་པར་༸གོང་ས་མཆོག་གིས་རྒྱ་ནག་དེ་ མི་འབོར་མང་ཤོས་ཡོད་པའི་རྒྱལ་ཁབ་ཅིག་ཡིན་པ་གང་ཞིག་ལ་མི་མང་རྣམས་རིག་གཞུང་ལྡན་པ་ཞིག་ཆགས་ཡོད་ཀྱང་། དོན་དངོས་ཐོག་རྒྱ་ནག་ནང་གི་ལམ་ལུགས་དེ་ད་ལྟ་ཡིན་ནའང་ཆེས་དམ་བསྒྲགས་ཤིག་ཏུ་ཆགས་པ་བཀའ་སྩལ་དང་སྦྲགས། རྒྱ་ནག་དེ་རྒྱ་མི་རིགས་ལ་བདག་གི་ཡོད་པ་ལས་རྒྱལ་ཁབ་དེའི་ཆབ་སྲིད་ཚོགས་པ་དང་དེ་བཞིན་གང་ཟག་མི་སྒེར་རེ་བཟུང་ལ་བདག་དབང་ཡོད་པ་ཞིག་མ་རེད་ཅེས་བཀའ་ལན་མཛད་ཡོད་པ་རེད། བཀའ་འདྲིའི་ལས་རིམ་དེའི་ཐོག་གསར་འགོད་པས་༸གོང་ས་མཆོག་ལ་ད་ལྟའི་ཨ་རིའི་སྲིད་འཛིན་གསར་པས་ཨ་རི་ནང་སྐྱབས་བཅོལ་ཡོང་རྒྱུར་བཀག་སྡོམ་བྱེད་བཞིན་པའི་གནད་དོན་ཐད་བཀའ་འདྲི་ཞུས་པའི་སྐབས་སུ་མགོན་པོ་མཆོག་གིས་སྲིད་འཛིན་ཌོ་ནལ་ཊམ་མཆོག་གིས་སྐྱབས་བཅོལ་ཐོག་འཛིན་པའི་སྲིད་བྱུས་དེར་ད་ཆ་སྤྱི་ཚོགས་ཁྲོད་ལ་ལབ་གླེང་གང་ཙམ་བྱུང་བཞིན་ཡོད་སྟབས། དེའི་ཐད་དམིགས་བསལ་གང་ཡང་གསུང་རྒྱུ་མེད་སྐོར་བཀའ་སྩལ་བ་དང་ཆབས་ཅིག སྲིད་འཛིན་ Donald trump མཆོག་གི་ལས་དོན་གང་འདྲ་གནང་མིན་ཐད་ང་ཚོའི་རིམ་བཞིན་ཤེས་ཀྱི་རེད་ཅེས་བཀའ་བསྩལ་འདུག དེ་བཞིན་སྐབས་དེར་གསར་འགོད་པས་༸གོང་ས་མཆོག་ལ་ད་ལྟའི་སྲིད་འཛིན་ཌོ་ནལ་ཊམ་མཆོག་ལ་དམིགས་བསལ་ལམ་སྟོན་གང་ཞིག་མཛད་རྒྱུ་ཡོད་མད་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་མང་ཚོགས་ལ་གསུང་བཤད་དང་མི་སྣ་མཇལ་འཕྲད་བཅས་གནང་སྐབས་སྐབས་དེའི་ཁོར་ཡུག་གནས་བབ་ལ་གཞིགས་ཏེ་བཀའ་མོལ་གནང་པ་ལས། དམིགས་བསལ་གྱི་གྲ་སྒྲིག་གང་ཡང་གནང་སྲོལ་མེད་ཅེས་བཀའ་སྩལ་དང་འབྲེལ། མ་འོངས་པར་སྲིད་འཛིན་ Donal Trump མཆོག་དང་མཇལ་འཕྲད་བྱ་རྒྱུའི་གོ་སྐབས་ཐོབ་ཚེ་སྐབས་དེའི་གནས་བབ་ལ་གཞིགས་ཏེ་ཁོང་དང་ལྷན་བཀའ་མོལ་མཛད་རྒྱུ་ཡིན་ཅེས་བཀའ་བསྩལ་འདུག

ཉན་པ།: Listen ཕབ་ལེན། Download བོད་ཀྱི་བེུད། དགེ་བཤེས་མ་རྣམ་སྒྲོལ་ཕུན་ཚོགས་ལགས་དང་ལྷན་དུ་གླེང་མོལ། Sunday 19/02/2017 Women of Tibet: Geshema Namdrol Phuntsok