བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་དེ་རིང་ཉིན་རྒྱབ་གསར་འགོད་གསལ་བསྒྲགས་སྤེལ་བར་གཟའ་འཁོར་འདིའི་ནང་རྒྱ་གར་ནང་གི་བཙན་བྱོལ་བོད་མིའི་སྤྱི་ཚོགས་ཁྲོད་བོད་མི་དྲུག་ལ་ Covid-19 གཉན་རིམས་ཕོག་ཡོད་པ་དང་། དེའི་ཁོངས་ནས་གཅིག་འདས་གྲོངས་སུ་གྱུར་བའི་གནས་ཚུལ་ཡོངས་གྲགས་གནང་སོང་།
གསར་འགོད་གསལ་བསྒྲགས་ཐོག་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་ཚེ་རིང་མཚམས་གཅོད་ལགས་ཀྱིས་འགྲེལ་བརྗོད་གནང་བར་གཞིགས་ན། གཟའ་འཁོར་འདིའི་ནང་བོད་མི་དྲུག་ལ་གཉན་རིམས་ཕོག་ཡོད་པ་ལྟར་དེའི་ཁོངས་ནས་ལ་དྭགས་ནས་གཅིག་དང་རྒྱ་གར་གྱི་རྒྱལ་ས་ལྡི་ལི་ནས་གཉིས། དེ་བཞིན་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་ནས་གསུམ་བཅས་བྱུང་བ་དང་། འདོད་རྒུ་གླིང་ནས་རང་ལོ་ ༦༧ ཡིན་པའི་སྐྱེས་མ་ཞིག་འདས་གྲོངས་སུ་གྱུར་འདུག དམ་པ་དེ་ཉིད་ཐོག་མའི་ཆར་སྨན་ཁང་དུ་ནད་གཞི་གཞན་ཕོག་པའི་རྐྱེན་གྱིས་སྨན་པ་བསྟེན་ཕྱིར་བཅར་ཡོད་ཀྱང་། དེའི་རྗེས་སུ་སྨན་པས་ཏོག་དབྱིབས་གཉན་རིམས་ཕོག་ཡོད་སྐོར་གསུངས་འདུག
སྤྱིར་ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་ཕོག་མཁན་འབུམ་ ༢༧ ལྷག་ཙམ་བྱུང་ཡོད་པ་དེ་ལྟར་ཡང་། དེའི་ཁོངས་ནས་དྲག་སྐྱེད་བྱུང་བའི་བརྒྱ་ཆ་ ༧༣ ཆགས་ཀྱི་ཡོད་པ་དང་བཙན་བྱོལ་བོད་མིའི་ཁྲོད་ཏོག་དབྱིབས་གཉན་རིམས་ཕོག་མཁན་ད་བར་ཁྱོན་ ༩༤ བྱུང་བའི་ཁོངས་ནས་ ༣ འདས་གྲོངས་སུ་གྱུར་ཡོད་པ་དང་། བོད་མི་ ༦༨ དྲག་སྐྱེད་བྱུང་བ། དེ་བཞིན་གཉན་རིམས་ཀྱིས་མནར་བཞིན་པ་ ༢༣ བཅས་ཡོད་པ་རེད།
