༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཙོས་པའི་ཧི་མཱ་ལ་ཡའི་རི་བརྒྱུད་ཀྱི་མང་ཚོགས་ནས་དཔལ་ན་ལནྡྲའི་གཞུང་ ཆེན་རྣམས་རིམ་བཞིན་རྒྱ་གར་ནང་སླར་གསོ་ཡོང་རྒྱུར་ཞབས་འདེགས་སྒྲུབས་དགོས་པ་དང། དེའང་ནང་ཆོས་དང་འབྲེལ་མ་དགོས་པར་ཤེས་ཡོན་གྱི་འདུ་ཤེས་ཁོ་ནའི་ཐོག་ནས་གནང་དགོས་ཀྱི་རེད་ཅེས་བཀའ་གནང་འདུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཨ་རིའི་ནང་གི་མཛད་འཆར་ཁག་ལེགས་པར་གྲུབ་རྗེས་ཁ་ས་སྔ་དྲོ་རྒྱ་གར་བྱང་ཕྱོགས་ལ་དྭགས་ཀྱི་རྒྱལ་ས་སླེ་ཞི་བའི་ཚལ་ཕོ་བྲང་དུ་༸ཞབས་སོར་བདེ་བར་འཁོད་མ་ཐག དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གིས་དབུས་པའི་མཁན་བླ་སྤྲུལ་ཁག་ཅིག ས་གནས་ཀྱི་གྲོས་ཚོགས་འཐུས་མི། ལ་དྭགས་རང་སྐྱོང་རི་ལྗོངས་ཡར་རྒྱས་ཚོགས་པའི་འགོ་དཔོན་དང་དེ་བཞིན་བོད་མིའི་སྒྲིགས་འཛུགས་ཀྱི་ལ་སྤྱི་སོགས་སེར་སྐྱ་མང་ཚོགས་ཁག་ཅིག་ལ་ཚོུད་ཕྱེད་ཀ་ལྷག་ཙམ་རིང་ལ་བཀའ་སློབ་ལམ་སྟོན་མཛད་ཡོད་པ་རེད། མགོན་པོ་༸གང་ཉིད་མཆོག་གིས་སྐབས་དེར་ཁོང་རྣམས་ལ་འཚམས་འདྲི་དང་འབྲེལ་ད་རེས་ལ་དྭགས་སུ་ཆིབས་སྒྱུར་མཛད་དོན་སྐོར་བཀའ་སྩལ་བ་མ་ཟད། ཉེ་ལམ་མགོན་པོ་མཆོག་ཨ་རིའི་ནང་༸སྐུའི་འཕྲོད་བཞེས་བརྟག་དཔྱད་གནང་པའི་བརྒྱུད་རིམ་ཁག་ངོ་སྤྲོད་གནང་ནས་ད་ཆ་མགོན་པོ་༸གང་ཉིད་མཆོག་སྐུ་གཟུགས་བདེ་ཐང་ཡིན་ཞེས་བཀའ་སྩལ་འདུག ༸གོང་ས་མཆོག་གིས་ད་དུང་ལ་དྭགས་ཀྱི་མང་ཚོགས་རྣམས་ཕ་མེས་ནས་ནང་པ་སངས་རྒྱས་པའི་ཆོས་དང་སྒོས་བོད་གངས་ཅན་པའི་སངས་རྒྱས་པའི་ཆོས་ལ་དད་པ་བྱེད་མཁན་ཞིག་ཆགས་ཡོད་པས་དེའང་གཙོ་བོ་དཔལ་ན་ལནྡྲའི་ཆོས་བརྒྱུད་དྲི་མ་མེད་པ་འཛིན་མཁན་ཞིག་ཆགས་ཡོད་ཅེས་བཀའ་སྩལ་འདུག ལྷག་དོན་ལ་དྭགས་གཙོས་པའི་ཧི་མཱ་ལ་ཡའི་མང་ཚོགས་ནས་ནང་པའི་ཆོ་ག་ཕྱག་ལེན་གནང་རྒྱུ་གཙོ་བོར་ངོས་མ་འཛིན་པར་གཞུང་ཆེན་ཁག་ལ་བསླབ་པ་སློབ་གཉེར་གནང་སྟེ། དཔལ་ན་ལནྡྲའི་གཞུང་ཆེན་དེ་དག་རྒྱ་གར་ནང་སླར་གསོ་ཐུབ་རྒྱུར་ཞབས་འདེགས་སྒྲུབས་དགོས་ཀྱི་རེད་ཅེས་ལམ་སྟོན་མཛད་འདུག   གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ནང་ཟླ་བ་གཅིག་ལྷག་ཙམ་རིང་བཞུགས་ཞག་མཛད་ཀྱི་ཡོད་པ་དང། མགོན་པོ་༸གང་ཉིད་མཆོག་ནས་དུས་ཡུན་དེའི་ཁྲོད་ལ་དྭགས་ཀྱི་རྒྱལ་ས་སླེ་དང་ཟངས་དཀར། ནུབ་ར་། ཏུར་ཏུཀ་སོགས་སུ་ཆིབས་སྒྱུར་གྱིས་བཀའ་ཆོས་དང་ཚེ་དབང་སོགས་ཀྱི་མཛད་འཆར་ཁག་ཅིག་བསྐྱང་གཏན་འཁེལ་བ་མ་ཟད། རིང་མིན་ཟླ་ ༧ ཚེས་ ༦ སྟེ་༸གོང་ས་མཆོག་གི་༸སྐུའི་འཁྲུངས་ལྷ་དབྱར་གསོལ་ཉིན་མགོན་པོ་༸གང་ཉིད་དབུ་བཞུགས་ཐོག་སླེ་ཞི་བའི་ཚལ་དུ་མཛད་སྒོ་གཟབ་རྒྱས་ཤིག་ཚོགས་གཏན་འཁེལ་དོན་ལྟར། ལ་དྭགས་ས་ཕྱོགས་གང་ས་ནས་མང་ཚོགས་སྟོང་ཕྲག་དུ་མ་འདུ་འཛོམས་གནང་གི་ཡོད་པ་རེད།

ཁ་སང་ཟླ་ ༦ ཚེས་ ༢༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་རྒྱ་གཞུང་གི་བཙོན་ཁང་ནང་མཆིན་པའི་སྐྲན་ནད་ཕོག་རྐྱེན་སྨན་བཅོས་ཆེད་གློད་བཀྲོལ་ཐོབ་པའི་རྒྱ་རིགས་འགྲོ་བ་མིའི་ཐོབ་ཐང་འཐབ་རྩོད་པ་དང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ལ་ཐུགས་གསོའི་གསུང་འཕྲིན་ཞིག་བསྩལ་འདུག མགོན་པོ་༸གང་ཉིད་མཆོག་གི་ཐུགས་གསོའི་གསུང་འཕྲིན་དེའི་ནང་ངོས་རང་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་བཙོན་ཁང་ནས་གློད་བཀྲོལ་ཐོབ་པར་ཐུགས་དགྱེས་ཚོར་ཆེན་པོ་བྱུང་ཡང་། དེ་མཚུངས་ཁོང་ལ་འབྲས་ནད་ཀྱི་ནད་གཞི་ཕོག་སྟབས་འཕྲོད་བསྟེན་གྱི་གནས་སྟངས་སྐྱོ་བོ་ཆགས་པར་ཐུགས་ཕམ་ཆེན་པོ་བྱུང་ཞེས་བཀའ་བསྩལ་འདུག ༸གོང་ས་མཆོག་ནས་སྐུ་ཞབས་ Liu Xiaobo ལགས་ནི་རྒྱ་གཞུང་གིས་ཉེས་མེད་འཛིན་བཟུང་བཙན་ཁྲིད་བྱས་པའི་ཆབ་སྲིད་བཙོན་པ་གྲགས་ཆེ་ཤོས་གྲས་ཤིག་ཡིན་པ་དང་། ཁོང་གིས་ད་བར་སྐུ་ལས་དང་སྡུག་སྦྱོང་ཚད་མེད་མྱངས་པ་དེ་དག་གིས་རྒྱ་ནག་དེ་ཞི་བདེ་ལྷིང་འཇགས་ལྡན་པའི་ཡར་རྒྱས་ཅན་གྱི་རྒྱལ་ཁབ་ཞིག་ཏུ་འགྱུར་རྒྱུ་སྤྱི་དང་སྒོས་འཛམ་གླིང་སྤྱིའི་ཞི་བདེ་ལ་ཕན་པའི་ཐུགས་རེ་མཛད་འདུག གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Liu Xiaobo ལགས་ཀྱིས་དེ་སྔ་མཚན་རྟགས་བསྐྱོན་པའི་རྒྱ་ནག་གི་མང་གཙོ་བཅོས་བསྒྱུར་དང་རང་དབང་། དེ་བཞིན་ཁྲིམས་ལུགས་དབང་འཛིན་སོགས་དང་འབྲེལ་བའི་ཁྲིམས་འཆར་ཨང་ ༨ ཞེས་པ་དེ་མགོན་པོ་༸གང་ཉིད་མཆོག་ཙམ་མ་ཟད། རྒྱ་རིགས་ཤེས་ལྡན་མི་སྣ་མང་དག་ཞིག་ལ་སེམས་འགུལ་ཐེབས་ཐུབ་པ་བྱུང་ཡོད་སྐོར་སོགས་བཀའ་འགྲེལ་དང་སྦྲགས། མགོན་པོ་མཆོག་ནས་རྣམ་ཀུན་སྐུ་ཞབས་ Liu Xiaobo ལགས་ཀྱི་འཕྲོད་བསྟེན་དང་བདེ་ཐབས་ཐོག་ཐུགས་སྨོན་གནང་བཞིན་ཡོད་པ་དང་། རྒྱ་ནག་གཞུང་ནས་ཡིན་ནས་སྐུ་ཞབས་ Liu Xiaobo ལགས་ཀྱི་འཕྲོད་བསྟེན་སྨན་བཅོས་སླད་དགོས་ངེས་ཀྱི་མཐུན་འགྱུར་ལེགས་ཤོས་དེ་སྦྱོར་རྒྱུ་དང་། སྨན་བཅོས་ཁག་ལམ་ལྷོང་ཡོང་བར་ཐུགས་རེ་ཡོད་ཅེས་བཀའ་བསྩལ་འདུག གཞི་རྩའི་ཟླ་བ་འདིའི་ཚེས་ ༢༦ ཉིན་རྒྱ་ནག་གཞུང་གིས་སྐུ་ཞབས་ Liu Xiaobo ལགས་སྨན་བཅོས་ཀྱི་ཐོབ་ཐང་འོག་བཙོན་གྲོལ་བཏང་པའི་གནས་ཚུལ་ཡོངས་ཁྱབ་བྱུང་རྗེས། ཨ་རིས་གཙོས་པའི་རྒྱལ་སྤྱིའི་གཞུང་དང་ཚོགས་པ། དེ་བཞིན་ལས་འགུལ་བ་སོགས་མང་པོ་ཞིག་ནས་སྐུ་ཞབས་ Liu Xiaobo ལགས་ཀྱི་གཟུགས་གཞིའི་གནས་སྟངས་ཐད་ལ་སེམས་ཚབས་དང་སྦྲགས། རྒྱ་ནག་གཞུང་ནས་སྐུ་ཞབས་ Liu Xiaobo ལགས་ལ་རང་ཉིད་ཀྱི་འདོད་མོས་ལྟར་རྒྱ་ནག་ནང་ཙམ་མ་ཟད། ཕྱིའི་རྒྱལ་ཁབ་ཁག་ཏུ་སྨན་བཅོས་ཆེད་བསྐྱོད་རྒྱུར་ཐོབ་ཐང་སྤྲོད་དགོས་པ་དང་། ཟང་བཙོན་འོག་ཡོད་པའི་ཁོང་གི་བཟའ་ཟླ་ Liu Xia ལགས་ཀྱང་འཕྲལ་དུ་གློད་བཀྲོལ་བཏང་དགོས་པའི་ཞུ་འབོད་རིམ་པ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནང་གི་མཛད་འཕྲིན་ཁག་ལེགས་གྲུབ་ཀྱིས་ཁ་སང་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད་པ་དང་། དེ་རིང་ ༦ ཚེས་ ༢༨ ཉིན་སྔ་དྲོ་རྒྱལ་ས་ལྡི་ལི་ནས་མཁའ་ལམ་བརྒྱུད་ལ་དྭགས་རྒྱལ་ས་སླེ་བ་ཀུ་ལ་གནམ་ཐང་དུ་༸ཞབས་སོར་བདེ་བར་འཁོད་འདུག མགོན་པོ་༸གང་ཉིད་མཆོག་གནམ་ཐང་ནས་སླེའི་ཕོ་བྲང་དུ་ཆིབས་སྒྱུར་སྐབས་ཕེབས་ལམ་གྱི་གཡས་གཡོན་དུ་བོད་རིགས་གཙོས་པའི་ས་གནས་མང་ཚོགས་རྣམས་ཀྱིས་ཕྱག་ཏུ་དྭངས་གཙང་མཇལ་དར་གཙོས་བདུག་སྤོས་བསྣམས་ཤིང་། གྲོ་སོ་ཕྱེ་མར་ཆང་ཕུད་བཅས་འདེགས་འབུལ་གྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་སྔོན་སྒྲིག་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སུ་ཟླ་ ༦ ཚེས་ ༢༨ ནས་ཟླ་ ༨ ཚེས་ ༩ བར་ཟླ་བ་གཅིག་ལྷག་རིང་ལ་བཞུགས་ཞག་མཛད་རྒྱུ་དང་ཆོས་འབྲེལ་སོགས་ཀྱི་མཛད་འཕྲིན་ཁག་ཅིག་བསྐྱང་རྒྱུ་ཡིན་པ་རེད། དེ་རིང་ཟླ་ ༦ ཚེས་ ༢༨ ནས་ཟླ་ ༧ ཚེས་ ༥ བར་ཞི་བའི་ཚལ་ཕོ་བྲང་དུ་སྐུ་ངལ་གསོ་བཞུགས་མཛད་རྒྱུ་དང། ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་མགོན་པོ་༸གང་ཉིད་མཆོག་ཕྱི་ལུགས་ལྟར་དགུངས་གྲངས་ ༨༢ བཞེས་པའི་༸སྐུའི་འཁྲུངས་ལྷ་དབྱར་གསོལ་སྲུང་བརྩི་དང་སྦྲགས། བོད་མི་དང་ལ་དྭགས་གཞུང་དམངས་གཉིས་ནས་སྔར་དང་མི་འདྲ་བའི་སྲུང་བརྩི་རྒྱས་པ་ཞུ་རྒྱུ་མ་ཟད། ལ་དྭགས་བསོད་ནམས་གླིང་གཞིས་སྒར་གྱི་བོད་མི་རྣམས་ནས་མགོན་པོ་༸གང་ཉིད་མཆོག་ལ་བསྟན་འགྲོའི་ཕན་བདེའི་སླད་༸སྐུ་ཚེ་མི་འཇིག་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་བསྟར་འབུལ་ཞུ་རྒྱུ་རེད་འདུག ད་རེས་ཀྱི་འཁྲུངས་ལྷ་དབྱར་གསོལ་གྱི་མཛད་སྟོན་དང་བརྟན་བཞུགས་བསྟར་འབུལ་ཞུ་ཕྱིར་ལ་དྭགས་བསོད་ནམས་གླིང་བོད་མིའི་གཞིས་སྒར་གྱི་ཁྱབ་ཁོངས་ཐག་རིང་བྱང་ཐང་ཁུལ་གྱི་བོད་མི་རྣམས་ནས་༸སྐུའི་འཁྲུངས་སྐར་སྔར་ནུར་སྲུང་བརྩི་ཞུ་རྒྱུ་དང་། ཁོང་རྣམས་ནས་ཞི་བའི་ཚལ་ཕོ་བྲང་དུ་༸སྐུའི་འཁྲུངས་སྐར་གྱི་དགའ་སྟོན་མཛད་སྒོར་མཉམ་ཞུགས་གནང་གི་འདུག ༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ལ་འགྱུར་བ་ཕྲན་བུ་ཕྱིན་ཡོད་པ་དང་། དེའང་མགོན་པོ་མཆོག་ཐོག་མ་ལ་དྭགས་ནུབ་རར་ཆིབས་སྒྱུར་དང་དེ་རྗེས་ཟངས་དཀར་ཁུལ་དུ་ཆིབས་སྒྱུར་མཛད་གཏན་འཁེལ་འདུག ཟླ་ ༧ ཚེས་ ༡༠ ནས་ ༡༣ བར་ལ་དྭགས་ནུབ་ར་ཁུལ་དུ་ཆིབས་བསྒྱུར་གྱིས་ཁུལ་དེར་རྟེན་གཞི་བྱས་པའི་བདེ་དགོན་བཀྲ་ཤིས་ཆོས་གླིང་དགོན་དུ་ཚོགས་རྒྱུའི་ཕར་ཕྱིན་དབྱར་ཆོས་ཆེན་མོའི་འཇུག་བསྡོམས་མཛས་སྒོར་དབུ་བཞུགས་མཛད་རྒྱུ་དང། དེ་རྗེས་ཚེས་ ༡༡ ནས་ ༡༣ བར་༸གོང་ས་མཆོག་ནས་ཁུལ་དེའི་སེར་སྐྱ་མང་ཚོགས་ལ་སློབ་དཔོན་ཀཱ་མ་ལ་ཤི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཀའ་ཆོས་དང་ཚེ་དབང་བཅས་སྩལ་རྒྱུ། དེ་བཞིན་ཚེས་ ༡༤ ཉིན་ནུབ་རེའི་ཉི་འདབས་ཀྱི་ས་གནས་ Turtukདུ་ཆིབས་སྒྱུར་གྱིས་ས་གནས་མང་ཚོགས་ལ་བཀའ་སློབ་སོགས་ཀྱི་མཛད་འཆར་བསྐྱང་རྒྱུ་ཡིན་པ་དང་།  ཕྱི་ཚེས་ ༡༦ ནས་ ༡༨ བར་ཟངས་དཀར་ཁུལ་དུ་སྤྱན་རས་གཟིགས་ཕྱག་སྟོང་སྤྱན་སྟོང་གི་བཀའ་དབང་བཀའ་དྲིན་སྩལ་རྒྱུ་མ་ཟད། ཟླ་ ༧ ཚེས་ ༢༨ ནས་ ༣༠ བར་ལ་དྭགས་རྒྱལ་ས་སླེ་ཞི་བའི་ཚལ་མང་ཚོགས་ཚོར་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོའི་གསུང་ཆོས་དང་སྤྱན་རས་གཟིགས་ངན་སོང་ཀུན་གྲོལ་གྱི་བཀའ་དབང་བཀའ་དྲིན་སྩལ་རྒྱུ་ཡིན་པ་རེད་འདུག

རིང་མིན་ཟླ་ ༧ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ཕྱི་ལུགས་མཆོག་དགུང་གྲངས་ ༨༢ བཞེས་པའི་༸སྐུའི་འཁྲུངས་ལྷ་དབྱར་གསོལ་འཁེལ་གྱི་ཡོད་པ་དང་བསྟུན། ཁ་སང་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དང་ཨ་རི་བོད་ཀྱི་སྐུ་ཚབ་དོན་ཁང་གཉིས་ཀྱིས་རྐང་འགན་བཞེས་ཐོག་ཡུལ་དེའི་གྲོས་ཚོགས་ནང་དུ་མགོན་པོ་༸གང་ཉིད་མཆོག་ལ་ཆེ་བསྟོད་ཀྱི་༸སྐུའི་འཁྲུངས་སྐར་དུས་ཆེན་སྔ་ནུར་སྲུང་བརྩི་ཞུས་འདུག མཛད་སྒོའི་ཐོག་ཨ་མི་རི་ཀའི་མང་གཙོ་ཚོགས་པའི་འགོ་ཁྲིད་ལྕམ་ Nancy Pelosi མཆོག་གཙོས་པའི་ཨ་རིའི་གྲོས་ཚོགས་འཐུས་མི་སྐུ་ཞབས་ Jim Sensenbreaner མཆོག་དང་སྐུ་ཞབས་ Jim McGovern མཆོག་སོགས་ཨ་རིའི་གྲོས་ཚོགས་འཐུས་མིའི་སྐུ་ཚབ་བཅུ་གཉིས་ལྷག་དང་ཨ་མི་རི་ཀའི་རྒྱལ་ཚོགས་ཀྱི་སྐུ་ཚབ་ཟུར་པ་སྐུ་ཞབས་ Keith Harper མཆོག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་མགོན་པོ་༸གང་ཉིད་མཆོག་གི་ཐུགས་ཉེ་བའི་མཛའ་གྲོགས་སྐུ་ཞབས་ Richard Gere ལགས་དང་ཚོགས་པ་དེའི་ཚོགས་གཙོ་སྐུ་ཞབས་ Matteo Mecacci མཆོག གཞན་ཡང་ཨ་རི་བོད་ཀྱི་སྐུ་ཚབ་དོན་གཅོད་སྤེན་པ་ཚེ་རིང་ལགས་ཀྱིས་གཙོས་པའི་གནད་ཡོད་མི་སྣ་དང་བོད་རིགས་བཅས་ཁྱོན་མང་ཚོགས་གསུམ་བརྒྱ་ལྷག་ནས་མཉམ་ཞུགས་གནང་འདུག སྐབས་དེར་ལྕམ་སྐུ་ Nancy Pelosi མཆོག་གིས་གཙོས་པའི་གྲོས་ཚོགས་འཐུས་མི་རྣམས་ནས་རིམ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དང་འབྲེལ་བའི་འཚམས་འདྲིའི་གསུང་བཤད་གནང་ཡོད་པ་དང་། སྐབས་དེར་སྐུ་ཞབས་ Jim McGovern མཆོག་ནས་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་སྐབས་ཨ་རིའི་གྲོས་ཚོགས་འཐུས་མི་རྣམས་ནས་རང་ཉིད་ཀྱི་ཆབ་སྲིད་ཚོགས་པ་དང་མངའ་སྡེ་སོགས་ཀྱི་དབྱེ་བ་མེད་པར་བསམ་པ་གཅིག་མཐུན་ཐོག་ནས་མཉམ་འཛོམས་ཀྱིས་༸སྐུའི་འཁྲུངས་སྐར་སྲུང་བརྩི་ཞུ་བཞིན་པ་འདི་ནི་ཨ་རིའི་གྲོས་ཚོགས་དང་མི་དམངས་ཀྱི་ངོས་ནས་མགོན་པོ་མཆོག་ལ་གུས་བརྩི་དང་ཆེ་མཐོང་། ལྷག་དོན་དུ་མགོན་པོ་མཆོག་གི་བྱམས་བརྩེ་དང་ཞི་བདེ་སོགས་དང་འབྲེལ་བའི་ལམ་སྟོན་བཀའ་སློབ་ཁག་ལ་ཡིད་ཆེས་ཞུ་བཞིན་པའི་རྣམ་པ་གསལ་པོ་རེད་ཅེས་འགྲེལ་བརྗོད་དང་འབྲེལ། ༸གོང་སམཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་། རྒྱ་གཞུང་གི་དྲག་པོའི་སྲིད་བྱུས་འོག་སྐྱབས་བཅོལ་དུ་གནས་བཞིན་པའི་བོད་མི་རྣམས་རང་ཉིད་ཀྱི་ཕ་ཡུལ་དུ་ཕྱིར་ལོག་ཐུབ་ནས་ཐུན་མོང་མ་ཡིན་པའི་སྐད་ཡིག་དང་རིག་གཞུང་ཁག་རང་དབང་ངང་ལོངས་སུ་སྤྱོད་རྒྱུའི་རང་དབང་གང་མགྱོགས་ཐོབ་པའི་རེ་བ་ཡོད་ཅེས་གསུངས་འདུག དེ་བཞིན་སྐུ་ཞབས་ Richard Gere ལགས་ནས་ད་བར་བོད་དོན་ལ་རྒྱབ་སྐྱོར་གནང་མཁན་གྱི་ཨ་རིའི་གྲོས་ཚོགས་འཐུས་མི་སྤྱི་དང་ལྷག་པར་དུ་གྲོས་ཚོགས་འཐུས་མི་དང་བོད་ཀྱི་གནད་དོན་དབར་ལ་རྒྱུན་དུ་ཕྱག་ལས་གནང་མཁན་གྱི་ལས་བྱེད་ཡོངས་ལ་ཐུགས་རྗེ་ཆེ་ཞུས་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་། མགོན་པོ་༸གང་ཉིད་མཆོག་གང་མགྱོགས་རྒྱལ་ས་ལྷར་ཡོད་པའི་པོ་ཏ་ལའི་གཟིམས་ཆུང་ནང་དུ་གདན་འདྲེན་ཞུ་རྒྱུར་མུ་མཐུད་ཕྱག་ལས་གནང་དགོས་གལ་ཡིན་པ་སོགས་གསུངས་འདུག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་ཀྱིས་གཙོས་པའི་ཚོགས་གཙོ་སྐུ་ཞབས་ Matteo Mecacci ལགས་དང་ཚོགས་གཞོན་བུ་ཆུང་ཚེ་རིང་ལགས། དེ་བཞིན་ཚོགས་པ་དེའི་ལས་བྱེད་དང་ཨ་རི་སྐུ་ཚབ་དོན་གཅོད་སྤེན་པ་ཚེ་རིང་ལགས་བཅས་ནས་ཨ་རིའི་ཕྱི་སྲིད་ལས་དོན་ཚོགས་ཆུང་གི་ཚོགས་མི་དྲུག་དང་གྲོས་ཚོགས་ཀྱི་སྔོན་རྩིས་བསྐྱར་ཞིབ་ཚོགས་ཆུང་གི་ཚོགས་གཙོ་ Harold Rogers ལགས། ལས་བྱེད་ཁག་ཅིག་དང་ཐུག་འཕྲད་ཀྱིས་བོད་དོན་སྐོར་དང་། ལྷག་པར་དུ་ཨ་རི་གཞུང་ནས་བོད་དོན་ཐོག་གནང་བཞིན་པའི་མ་དངུལ་དང་ལས་འཆར་སོགས་ཀྱི་ཐོག་ལ་གྲོས་བསྡུར་གནང་འདུག་པ་དང་། སྐབས་དེར་ཨ་རི་གྲོས་ཚོགས་ཀྱི་སྔོན་རྩིས་བསྐྱར་ཞིབ་ཚོགས་ཆུང་གི་ངོས་ནས་ཨ་རི་གཞུང་ནས་བོད་ཐོག་གནང་བཞིན་པའི་མ་དངུལ་དང་ལས་འཆར་ཁག་མུ་མཐུད་གནང་རྒྱུར་རྒྱབ་སྐྱོར་ཡོད་པ་སོགས་གསུངས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རི་མི་ནེ་སོ་ཊ་མངའ་སྡེའི་ནང་གི་མཛད་འཕྲིན་ཁག་ལེགས་པར་གྲུབ་ཏེ་ཁ་སང་ཚེས་པ་ ༢༥ ཉིན་བོས་ཊོན་གྲོང་ཁྱེར་ནང་ཆིབས་སྒྱུར་གྱིས་ས་གནས་བོད་མི་ཚོར་ང་ཚོ་རྒྱ་གཞུང་གི་སྒྲོམ་གཞི་འོག་དཔུང་པ་མཉམ་གཤིབ་ཐོག་འགྲོ་ཐུབ་ཚེ་དགེ་མཚན་ཆེ་བར་གཟིགས་ཀྱི་འདུག་ཅེས་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ནང་ཨ་རིའི་མངའ་སྡེ་ཁག་གསུམ་གྱི་ནང་ཉིན་གྲངས་བཅུའི་རིང་མཛད་རིམ་བསྐྱངས་པའི་ཁྲོད། ཁ་སང་བོས་ཊོན་གྲོང་ཁྱེར་ནང་༸ཞབས་སོར་འཁོད་བསྟུན་ས་གནས་བོད་རིགས་གཙོ་བོར་གྱུར་པའི་བོད་མི་བརྒྱ་ཕྲག་ཁ་ཤས་ཀྱིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས་པ་མ་ཟད། སྐབས་དེར་མགོན་པོ་མཆོག་གི་བཞུགས་གནས་གསོལ་མགྲོན་ཁང་དུ་༸ཞབས་སོར་འཁོད་མཚམས་སུ་ཨ་རིའི་ Massachusetts མངའ་སྡེའི་སྤྱི་ཁྱབ་པའི་སྐུ་ཚབ་དང་ས་གནས་ Boston གྲོང་ཁྱེར་སྤྱི་ཁྱབ་པ་བཅས་ནས་གཞུང་འབྲེལ་གྱི་ཕེབས་བསུ་ཞུས་འདུག ཁ་སང་སྔ་དྲོ་༸གོང་ས་མཆོག་ནས་བོས་ཊོན་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་གྲོང་ཁྱེར་དེའི་ Sheraton མགྲོན་ཁང་དུ་ས་གནས་བོད་རིགས་དང་དེ་བཞིན་ཁུལ་གཞན་ནས་ཕེབས་པའི་མི་གྲངས་ ༢༠༠༠ ཙམ་ལ་དམིགས་བསལ་མཇལ་ཁ་དང་བཀའ་སློབ་བསྩལ་པའི་ཁྲོད། མགོན་པོ་༸གང་ཉིད་མཆོག་གིས་ང་ཚོ་ད་བར་ལོ་ངོ་ ༥༨ རིང་ལ་བོད་མི་རིགས་ཀྱི་རིག་གཞུང་དང་བཅས་པ་ཛ་དྲག་ཆེ་བའི་གནས་སྟངས་ཤིག་གི་འོག་ཏུ་ལྷུང་བའི་དུས་ཡུན་འདིའི་ཁྲོད་གཙོ་བོ་གཞིས་ལུས་རྒྱ་ཆེ་མང་ཚོགས་ཀྱི་ལྷག་བསམ་དང་མི་རིགས་ཀྱི་ཞེན་ཁོག་གཡོ་བ་མེད་པ་དང་། དེ་བཞིན་བཙན་བྱོལ་ནང་དུའང་བོད་མི་ཚོས་རང་ཉིད་བོད་པ་ཞིག་ཡིན་པའི་འདུ་ཤེས་འགྱུར་མེད་གནས་པར་བསྔགས་བརྗོད་མཛད་པ་དང་ཆབས་ཅིག ང་ཚོ་མི་རབས་གསར་པ་ཚོས་བོད་གཞིས་ལུས་རྒྱ་ཆེ་མི་མང་གི་སེམས་ཤུགས་འཁྱེར་བའི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་པར་དང་དོད་གནང་རྒྱུ་གནད་ཆེ་རེད་ཅེས་ལམ་སྟོན་མཛད་འདུག ལྷག་དོན་མགོན་པོ་༸གང་ཉིད་མཆོག་གིས་ད་ལྟ་འཛམ་གླིང་འདི་འགྱུར་བ་འགྲོ་བཞིན་ཡོད་པས་མ་འོངས་པར་འཛམ་གླིང་གི་མདུན་ལམ་འདི་ཕན་ཚུན་མཉམ་རུབ་བྱེད་ནས་འགྲོ་དགོས་པ་མ་གཏོགས་ཕན་ཚུན་ཁ་གྱེས་ན་ཕན་ཐོགས་གང་ཡང་ཡོད་མ་རེད་ཅེས་བཀའ་བསྩལ་བ་དང་སྦྲགས།  བོད་མི་ཚང་མས་གངས་ཅན་པ་གཅིག་གྱུར་གྱི་འདུ་ཤེས་འཛིན་པའི་ཐོག་ནས་སྐྱིད་སྡུག་དང་ལེགས་ངན་གང་ཞིག་བྱུང་རུང་ཆོས་ཁ་གསུམ་པོ་གཅིག་སྒྲིལ་དགོས་གལ་ཡིན་པ་བཀའ་བསྩལ་འདུག ཁྱད་པར་དུ་ང་ཚོའི་ཁྲོད་ཁག་ཅིག་གིས་རང་བཙན་རྩོད་རྒྱུ་དེས་བོད་མི་དུམ་བུ་གཅིག་ལ་ཁེ་ཕན་བསྐྲུན་པ་མ་གཏོགས་བོད་ཡོངས་རྫོགས་གཅིག་ཏུ་སྒྲིལ་རྒྱུར་དཀའ་ལས་ཁག་པོ་ཡིན་པར་བརྟེན་བོད་མི་རྣམས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞི་འོག་ཞུགས་ཏེ་བོད་ཆོལ་ཁ་གསུམ་པོ་དཔུང་པ་མཉམ་གཤིབ་ཐོག་འགྲོ་ཐུབ་ཚེ་དགེ་མཚན་ཆེ་བར་གཟིགས་ཀྱི་འདུག་ཅེས་བཀའ་བསྩལ་འདུག ༸གོང་ས་མཆོག་ནས་ Boston ནང་དུ་བོད་མི་ཚོར་བཀའ་སློབ་བསྩལ་རྗེས་གྲོང་ཁྱེར་དེའི་ནང་རྟེན་གཞི་བྱས་པའི་ Healthy mind ལྟེ་གནས་ཁང་དུ་ཚན་རིག་པ་དང་མཁས་པ་ཁག་ཅིག་གི་ལྷན་དུ་བྱམས་པ་དང་སྙིང་རྗེ། བཟང་སྤྱོད་གོང་འཕེལ་གཏོང་ཕྱོགས་སྐོར་གྱི་ཚོགས་འདུར་དབུ་བཞུགས་མཛད་ཡོད་པ་རེད། རྩ་བའི་མགོན་པོ་༸གང་ཉིད་མཆོག་ནས་བོས་ཊོན་ནང་ཆིབས་བསྒྱུར་མ་བསྐྱང་གོང་སྟེ་ཕྱི་ཚེས་ ༢༡ ཉིན་Minnesota མངའ་སྡེའི་ Minneapolis གྲོང་ཁྱེར་ནང་ཆིབས་སྒྱུར་གྱིས་ཁུལ་དེར་རྟེན་གཞི་བྱས་པའི་Starkey Hearing བཟོ་ཁང་ཁང་དུ་ཆིབས་བསྒྱུར་གྱིས་བཟོ་ཚོང་ཁང་དེའི་ལས་བྱེད་ཚོར་བཀའ་སློབ་དང་དེ་ནས་ཚེས་པ་ ༢༤ ཉིན་མི་ནེ་སོ་ཊ་མངའ་ཁུལ་གྱི་བོད་མི་ཚོར་བཀའ་སློབ་བསྩལ་བ་སོགས་ཀྱི་མཛད་འཕྲིན་ཁག་ཅིག་བསྐྱངས་ཡོད་པ་རེད། མཛད་འཆར་ལྟར་ན། དེ་རིང་ཕྱི་དྲོ་༸གོང་ས་མཆོག་ཨ་རི་ Boston ནས་ Frankfurt བརྒྱུད་རྒྱ་གར་ཕྱོགས་སུ་ཆིབས་ཐོན་གནང་གི་ཡོད་པ་དང་། ཚེས་ ༢༨ ཉིན་རྒྱ་གར་བྱང་ཕྱོགས་ཇཱ་མུ་དང་ཀཤྨིར་མངའ་སྡེའི་ལ་དྭགས་ས་གནས་སུ་ཆིབས་བསྒྱུར་བསྐྱང་སྟེ་ཆོས་འབྲེལ་གྱི་མཛད་འཆར་ཁག་ཅིག་ཐུགས་གཏན་འཁེལ་ཡོད་པ་མ་ཟད། ཁུལ་དེར་མགོན་པོ་༸གང་ཉིད་མཆོག་དབུ་བཞུགས་ཐོག་ལ་དྭགས་མི་དམངས་དང་ས་གནས་བོད་མི་རྣམས་ནས་༸སྐུའི་འཁྲུངས་སྐར་དུས་ཆེན་རྒྱས་པ་སྲུང་བརྩི་ཞུ་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༦ ཚེས་ ༡༢ ཉིན་བྱང་རྩེ་ཆོས་རྗེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་འདུག ༸གོང་ས་མཆོག་ནས་ཟླ་བ་འདིའི་ཚེས་ ༡༢ ཉིན་དགའ་ལྡན་ཁྲི་ཐོག་ཁང་དུ་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་པའི་བཀའ་ཡིག་ཕྱག་རྟགས་དངོས་སུ་བསྩལ་ཡོད་པ་དང་། དགའ་ལྡན་ཁྲི་ཐོག་ཁང་གིས་ཟླ་བ་འདིའི་ཚེས་ ༢༤ ཉིན་གནས་ཚུལ་དེ་ཡོངས་ཁྱབ་གསལ་བསྒྲགས་གནང་ཡོད་པ་རེད། འདི་ལོ་ཕྱི་ཟླ་ ༨ ཚེས་ ༤ སྟེ་བོད་ཟླ་ ༦ ཚེས་ ༡༢ ཉིན་དངོས་སུ་དགའ་ལྡན་ཁྲི་པའི་གསེར་ཁྲི་མངའ་གསོལ་གྱི་མཛད་སྒོ་ཚོགས་ཐུགས་གཏན་འཁེལ་འདུག འདི་ག་རླུང་འཕྲིན་ཁང་གི་གསར་འགོད་པར་བྱང་རྩེ་ཆོས་རྗེ་རྗེ་བཙུན་བློ་བཟང་བསྟན་འཛིན་མཆོག་གི་དགེ་ཕྲུག་དགེ་བཤེས་བློ་བཟང་ཐབས་མཁས་ལགས་ཀྱིས་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་ཚུལ་དང་འདི་བཞིན་རིན་པོ་ཆེ་མཆོག་ནས་རྣམ་ཀུན་ཉམས་བཞེས་གནང་ཕྱོགས་སོགས་ཀྱི་སྐོར་འགྲེལ་བརྗོད་གནང་སོང་། རྩ་བའི་བྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་ནི། ༡༩༣༥ ལོར་བོད་གཙང་སྟོད་ལྷ་རྩེ་ཁུལ་དུ་སྐུ་འཁྲུངས་པ་དང་། དགུང་ལོ་བཅུའི་སྐབས་༸གོང་ས་ལྔ་པ་ཆེན་པོས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་ཀྱིས་མཁན་ཆེན་བསྟན་འཛིན་རྒྱ་མཚོའི་དྲུང་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། དེ་ནས་དགོན་པའི་སྒྲིག་སྲོལ་ལྟར་ཆོས་སྤྱོད་རབ་གསལ་དང་རྒྱན་འཇུག་གཉིས་སོགས་ཐུགས་འཛིན་གནང་ནས་ཚོགས་རྒྱུགས་ཕུལ་ཏེ་སློབ་གཉེར་པའི་གྲལ་དུ་ཚུད། དེར་བློ་རྟགས་སོགས་ལ་སྦྱང་བརྩོན་གནང་བར་མ་ཟད། ༸གོང་ས་ལྔ་པ་ཆེན་པོས་མཛད་པའི་ཕར་ཕྱིན་དང་། དབུ་མ། འདུལ་མཛོད་བཅས་ཀྱི་རང་ལུགས་གང་ཡིན་ཐུགས་འཛིན་གནང་སྟེ་འདུས་མང་དབུས་སུ་ཚོགས་རྒྱུགས་ཕུལ་གནང་འདུག དགུང་ལོ་བཅུ་དྲུག་གི་སྐབས་སེར་བྱེས་གྲྭ་ཚང་དུ་སྒྲིག་ཞུགས་གནང་སྟེ་སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་དགེ་བཤེས་ངག་དབང་དགེ་འདུན་རྣམ་གཉིས་ཀྱིས་གཙོས་པའི་བཤེས་གཉེན་དུ་མའི་དྲུང་ནས་གཞུང་ཆེན་དག་ལ་བསླབ་པ་སློབ་གཉེར་གནང་འདུག ཕྱི་ལོ་ ༡༩༦༠ ལོར་བཙན་བྱོལ་དུ་ཕེབས་ནས་སྦག་ས་ཆོས་སྒར་དུ་མུ་མཐུད་སློབ་གཉེར་གནང་པ་དང་། དེ་རྗེས་སྦེལ་ཀོབ་བོད་མིའི་གཞིས་ཆགས་སུ་གནས་སྤོས་ཀྱིས་༸གོང་ས་མཆོག་གིས་བཀའ་འབྲེལ་ལྟར་སེར་བྱེས་གྲྭ་ཚང་གི་སྒྲིག་ཁོངས་སུ་ཞུགས་ནས་མུ་མཐུད་སློབ་གཉེར་གནང་པ་མ་ཟད། སྔ་ཕྱིར་གྲྭ་ཚང་གི་དཔེ་ཁྲིད་དགེ་རྒན་དང་མཁན་ཁྲིར་ཕེབས་པ་སོགས་ལས་གནས་མང་དག་གི་ཐུགས་འགན་བཞེས་མྱོང་ཡོད་པ་རེད། ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས་པ་དང་། ༸གོང་ས་མཆོག་གི་བཀའ་བཞིན་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་གསང་སྔགས་རྡོ་རྗེ་ཐེག་པའི་ཟབ་ཆོས་དུ་མ་གསན་བཞེས་མཛད་འདུག ཕྱི་ལོ་ ༡༩༨༡ ལོར་༸གོང་ས་མཆོག་གིས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོར་ཕེབས་པ་དང་། ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཡོད་པ་རེད། ༢༠༡༠ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་རྩེ་ཆོས་རྗེའི་མཚན་གནས་བསྩལ་འདུག་པ་དང་། འདི་ལོའི་ཟླ་ ༦ ཚེས་ ༡༢ ཉིན་༸གོང་ས་མཆོག་ནས་དགའ་ལྡན་ཁྲི་ཐོག་ཁང་དུ་རིན་པོ་ཆེ་མཆོག་དགའ་ལྡན་ཁྲི་ཐོག་ ༡༠༤ པར་བསྐོ་གཞག་མཛད་པའི་བཀའ་ཡིག་ཕྱག་རྟགས་དངོས་སུ་བསྩལ་ཡོད་པ་རེད།  

བོད་མིའི་བླ་ན་མེད་པའི་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་མཆོག་ཨ་རིའི་ San Diego དང་། Orange County ས་གནས་གཉིས་ནང་གི་མཛད་འཕྲིན་ཁག་ལེགས་པར་གྲུབ་བསྟུན། ཁ་སང་ཚེས་ ༢༡ ཉིན་ Minnesota མངའ་སྡེའི་ Minneapolis གྲོང་ཁྱེར་ནང་༸ཞབས་སོར་བདེ་བར་འཁོད་གནང་འདུག སྐབས་དེར་མགོན་པོ་མཆོག་གི་བཞུགས་གནས་གསོལ་མགྲོན་ཁང་དུ་༸ཞབས་སོར་འཁོད་མཚམས་སུ་ཕེབས་ལམ་གྱི་གཡས་གཡོན་དུ་ས་གནས་བོད་མི་ཚོས་ཕྱག་ཏུ་དྭངས་གཙང་མཇལ་དར་གཙོས་བདུག་སྤོས་བསྣམས་ཤིང། བཀྲིས་ཞོལ་པ་འཁྲབ་སྟོན་དང་གྲོ་སོ་ཕྱེ་མར་ཆང་ཕུད་བཅས་འདེགས་འབུལ་གྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག མགོན་པོ་༸གང་ཉིད་མཆོག་ལ་ཐེངས་འདིའི་ཆིབས་སྒྱུར་གསོལ་འདེབས་ཞུ་མཁན་ Starkey Hearing Foundation ཐེབས་རྩ་ཁང་གི་སྐུ་ཞབས་ Bill Austin ལགས་དང་ཁོང་གི་སྐུ་ཟླ་གཉིས་ནས་༸གོང་ས་མཆོག་ལ་ཕེབས་བསུའི་འཚམས་འདྲི་ཞུས་ཡོད་པ་རེད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་མི་ནེ་པོ་ལེས་ནང་ཆིབས་བསྒྱུར་གསོལ་འདེབས་ཞུ་མཁན་ Starkey Hearing Foundation ཐེབས་རྩ་ཁང་ནི། འཛམ་གླིང་ནང་གི་རྣ་བ་གསལ་པོ་གོ་རྒྱུའི་ཡོ་ཆས་བཟོ་ཚོང་ཁང་ཆེ་གྲས་ཤིག་ཡིན་པ་དང་། བཟོ་ཚོང་ཁང་དེའི་ངོས་ནས་ད་བར་རྒྱལ་ཁབ་ ༡༤༠ ལྷག་ནང་རྣ་མཆོག་གསལ་པོ་མ་གོ་མཁན་མང་ཚོགས་ས་ཡ་གཅིག་མན་ཙམ་ལ་རིན་མེད་ཀྱི་བརྟག་དཔྱད་དང་། རྣ་བ་གསལ་པོ་གོ་ཐུབ་པའི་ཡོ་ཆས་འགོད་འགྲེམས་གནང་ཡོད་པ་མ་ཟད། ལྷག་དོན་ལོ་ཤས་གོང་ལ་ཁོང་གིས་བོད་མིའི་གཞིས་སྒར་ཁག་ཏུ་སྐོར་བསྐྱོད་ཀྱིས་བོད་མི་རྣམས་ལ་དེ་མཚུངས་ཀྱིས་རིན་མེད་བརྟག་དཔྱད་སོགས་ཀྱང་གནང་ཡོད་པ་རེད།  ཐེབས་རྩ་ཁང་དེ་ཆེད་བཙུགས་གནང་མཁན་སྐུ་ཞབས་ Bill Austin ལགས་ནས་སྔ་ལོ་བཞུགས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཡོད་པ་དང་། སྐབས་དེར་༸གོང་ས་མཆོག་གིས་ཐེབས་རྩ་ཁང་དེའི་ངོས་ནས་གནང་བཞིན་པའི་རླབས་ཆེན་གྱི་ལས་འཆར་ལ་བསྔགས་བརྗོད་ཀྱང་མཛད་ཡོད་པ་རེད། འདི་ག་རླུང་འཕྲིན་ཁང་ལ་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་གིས་གསུངས་པར་ད་རེས་སྤྱི་ནོར་༸གོང་ས་༸སྐྱབས་མགོན་པོ་མཆོག་ནས་ Minneapolis ནང་ཉིན་གསུམ་རིང་མཛད་འཆར་བསྐྱང་རྒྱུ་དང་། དེ་ཡང་གཙོ་བོ་དེ་རིང་དང་སང་ཉིན་བཅས་ཉིན་གཉིས་རིང་ལ་མགོན་པོ་མཆོག་གིས་ཁུལ་དེར་ནང་རྟེན་གཞི་བྱས་པའི་ Starkey Hearing བཟོ་ཚོང་ཁང་དུ་ཆིབས་བསྒྱུར་གྱིས་བཟོ་ཚོང་ཁང་དེའི་ལས་བྱེད་ཚོར་བཀའ་སློབ་བསྩལ་གནང་རྒྱུ་དང་།  དེ་ནས་གནངས་ཕྱི་ཚེས་ ༢༤ ཉིན་མི་ནེ་སོ་ཊ་མངའ་ཁུལ་གྱི་བོད་མི་ཚོར་བཀའ་སློབ་བསྩལ་གནང་གི་ཡོད་པ་མ་ཟད། དེ་རྗེས་ཚེས་ ༢༥ ཉིན་མགོན་པོ་༸གང་ཉིད་མཆོག་བོས་ཊོན་གྲོང་ཁྱེར་དུ་ཆིབས་སྒྱུར་མཛད་ནས་བོད་མིར་བཀའ་སློབ་བསྩལ་རྒྱུ་དང་། དེ་བཞིན་ Healthy mind ལྟེ་གནས་ཁང་དུ་ཚན་རིག་པ་དང་མཁས་པ་ཁག་ཅིག་གི་ལྷན་དུ་བྱམས་པ་དང་སྙིང་རྗེ། བཟང་སྤྱོད་གོང་འཕེལ་གཏོང་ཕྱོགས་སྐོར་གྱི་ཚོགས་འདུར་དབུ་བཞུགས་མཛད་གཏན་འཁེལ་ཡོད་པ་སོགས་གསུངས་སོང་།

བོད་མིའི་བླ་ན་མ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རེས་གཟའ་ཉི་མའི་ཉིན་རྒྱབ་ཏུ་ཨ་རིའི་California མངའ་སྡེ་དང་San diego གྲོང་ཁྱེར་དང་ཉེ་འཁྲིས་Portland དང་ Seatle བཅས་ནས་བཅར་བའི་བོད་མི་༦༥༠ཙམ་ལ་ཞིག་ལ་ཟུར་དུ་མཇལ་ཁ་དང་བཀའ་སློབ་བཀྲིན་བསྩལ་འདུག མགོན་པོ་༸གང་ཉིད་མཆོག་གིས་སྐབས་དེའི་འདུ་འཛོམ་ས་ཐོག་ས་གནས་བོད་མི་རྣམས་ལ་དེ་རིང་སང་གི་འཛམ་གླིང་འདིའི་ནང་ནང་པ་སངས་རྒྱས་པའི་ལྟ་གྲུབ་ཀྱི་གལ་གནད་དང་བོད་སྐད་ཡིག་གི་རིན་ཐང་། བོད་མིའི་མི་རབས་གསར་རྙིང་གི་འོས་འགན་དང་མང་ཚོགས་ནས་བསྟན་པ་འཛིན་སྐྱོང་སྤེལ་གསུམ་བྱས་པའི་དགེ་མཚན་སོགས་ཀྱི་སྐོར་ལ་ལམ་སྟོན་རྒྱ་ཆེ་བསྩལ་འདུག་པ། དེ་ཡང་༸གོང་ས་མཆོག་གིས་ཐོག་མར་ང་ཚོ་ད་བར་ལོ་ངོ་༥༨ རིང་ལ་བོད་མི་རིགས་རིག་གཞུང་དང་བཅས་པ་ཛ་དྲག་གཉེན་འཕྲང་ཅན་ཞིག་ཏུ་ལྷུང་བའི་དུས་ཡུན་འདིའི་ཁྲོད། གཙོ་ཆེ་གཞིས་ལུས་རྒྱ་ཆེ་མང་ཚོགས་ཀྱི་ལྷག་བསམ་དང་མི་རིགས་ཀྱི་ཞེན་ཁོག་གཡོ་བ་མེད་པ་དང་། དེ་བཞིན་བཙན་བྱོལ་ནང་དུའང་རང་ཉིད་བོད་པའི་་འདུ་ཤེས་འགྱུར་བ་མེད་པ་གནས་པར་བསྔགས་བརྗོད་མཛད་པ་དང་ཆབས་ཅིག ད་དུང་མུ་མཐུད་ང་ཚོའི་མི་རབས་གསར་པ་ཚོས་བོད་སྐད་ཡིག་ཤེས་དགོས་ཡག་གལ་ཆེན་པོ་ཞེ་དྲགས་ཡིན་པ་དེ་ལྟར་ཡང་། དེ་རིང་སང་སངས་རྒྱས་པའི་ལྟ་གྲུབ་ཀྱི་ཆ་ནས་འཛམ་གླིང་སྤྱི་ལ་ཕན་པ་འགྲུབ་ཡག་གི་གོ་སྐབས་དང་ཆ་རྐྱེན་ཡོད་པ་ཞིག་ཆགས་ཀྱི་ཡོད་པ་ལམ་སྟོན་བཀྲིན་བསྩལ་འདུག ཁྱད་པར་དུ་མགོན་པོ་མཆོག་གིས་དགོན་པ་གྲྭ་ཚང་དང་དགེ་འདུན་པ་གཅིག་པུས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་རྒྱུའི་སྔར་ལམ་ཁག་ཅིག་འགྱུར་བཅོས་བཏང་ནས། མང་ཚོགས་དང་སྤྱི་ཚོགས་སྤྱིས་བསྟན་པ་འཛིན་སྐྱོང་སྤེལ་གསུམ་གནང་ཐུབ་ཚེ་སངས་རྒྱས་ཀྱི་བསྟན་པ་ཡུན་རིང་གནང་ཐུབ་རྒྱུའི་དགེ་མཚན་སྐོར་ལའང་བཀའ་གནང་འདུག ད་དུང་༸གོང་ས་མཆོག་གིས་ས་གནས་བོད་མི་རྣམས་པ་འཛོམས་ཡོད་པ་དེའི་ཐོག་སྔ་ལོའི་འོས་བསྡུ་སྐབས་ཀྱི་གནས་ཚུལ་ཁག་ཅིག་ལས་༸གང་ཉིད་ཐུགས་ཕམ་བྱུང་ཡོད་པ་བཀའ་གནང་དང་འབྲེལ། ད་ཆ་གནས་སྟངས་ཡག་ཐག་གཅོད་ཡོད་སྟབས། ང་ཚོ་བོད་མི་ཚོས་དེ་སྔ་ཆོས་རྒྱལ་ཚོའི་སྐབས་ནས་ཆོལ་གསུམ་གཅིག་ཏུ་གནས་པ་བཞིན། ད་དུང་མུ་མཐུད་བསམ་བློ་རྒྱ་ཆེ་ནས་བཏང་ནས་རྡོག་གཅིག་ཏུ་སྒྲིག་གལ་ཡིན་པ་ལས་རྐྱེན་ངན་ཆུང་ཚག་རིགས་ཀྱི་གཞན་དབང་དུ་འགྲོ་རྒྱུ་མེད་པའི་ལམ་སྟོན་བླ་ན་མེད་པ་མཛད་འདུག ཁ་སང་ཉིན་རྒྱབ་མགོན་པོ་༸གང་ཉིད་མཆོག་གིས་ད་རེས་ California མངའ་སྡེ་དང་San diego གྲོང་ཁྱེར་དུ་ཁུལ་དེའི་བོད་མི་རྣམས་ལ་བཀའ་སློབ་བསྩལ་བའི་མཐའ་མཇུག་ཏུ་གཞིས་བྱེས་བོད་མི་ཡོངས་ལ་གཏམ་བཟང་ཞིག་ལ། ༸གང་ཉིད་མཆོག་ཟླ་བ་འདིའི་ཚེས་༡༣དང་༡༤་བཅས་སུ་Mayo་སྨན་ཁང་དུ་༸སྐུའི་འཕྲོས་བཞེས་བརྟག་དཔྱད་གང་ལེགས་ཀྱིས་སྐུ་གཟུགས་གསལ་ཐང་ཡིན་པ་བཀའ་གནང་འདུག གྲོང་ཁྱེར་ San Diego ནང་གི་མཛད་འཕྲིན་ལེགས་གྲུབ་དང་འབྲེལ་དེ་རིང་ཚེས་༡༩དང་སང་ཉིན་ཕྱི་ཚེས་༢༠བཅས་ཁུལ་དེའི་ Orange county Beach ས་གནས་སུ་ཆིབས་སྒྱུར་གྱིས་འཚོང་པ་འབྱོར་ལྡན་དང་ཤེས་ཡོན་ཐོག་ཕྱག་ལས་གནང་མཁན་མི་སྣ་ཁག་ཅིག་དང་མཇལ་མོལ་གྱིས་སློབ་གྲྭ་དང་སྤྱི་ཚོགས་ནང་བྱམས་བརྩེ་གོང་སྤེལ་གནང་ཐབས་སྐོར་ལམ་སྟོན་བཀའ་སློབ་སྩལ་གྱི་འདུག་པ་དང་། ཕྱི་ཚེས་༢༡ནས་༸གོང་ས་མཆོག་Minnesota ཆིབས་སྒྱུར་གྱིས་ཉིན་བཞི་རིང་བཞུགས་ཞག་མཛད་འཆར་འདུག་པ་མ་ཟད། ཚེས་༢༥ཉིན་༸གང་ཉིད་མཆོག་ Boston གྲོང་ཁྱེར་དུ་ཆིབས་སྒྱུར་མཛད་ནས་ཁུལ་དེའི་ནང་གི་ Healthy mind ལྟེ་གནས་ཁང་དུ་ཚན་རིག་པ་དང་མཁས་པ་ཁག་ཅིག་དང་ལྷན་དུ་བྱམས་པ་དང་སྙིང་རྗེ། དེ་བཞིན་བཟང་སྤྱོད་གོང་འཕེལ་གཏོང་ཕྱོགས་སྐོར་གྱི་ཚོགས་འདུར་དབུ་བཞུགས་མཛད་རྒྱུའི་མཛད་འཆར་ཐུགས་གཏན་འཁེལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་སེན་ཌི་ཡ་གོ་ནང་མང་ཚོགས་ ༢༥༠༠༠ ལྷག་ལ་བཀའ་སློབ་སྩལ་བ་དང་འབྲེལ། འཛམ་གླིང་ཁྱོན་ཡོངས་ལ་དཀའ་ངལ་འདྲ་མིན་འཕྲད་བཞིན་པའི་དུས་སྐབས་འདིར་ངལ་བ་དེ་དག་སེལ་བར་ཚང་མས་ཁྱིམ་ཚང་གཅིག་གི་ནང་མི་ལྟར་འདུ་ཤེས་འཛིན་ཏེ་ཤུགས་སྣོན་བསྐྱོན་དགོས་པའི་དུས་ལ་བབ་འདུག་ཅེས་བཀའ་བསྩལ་འདུག ཨ་རིའི་ཁེལ་ཕོ་ནི་ཡ་མངའ་སྡེ་ནང་རྟེན་གཞི་བྱས་པའི་སེན་ཌི་ཡ་གོ་གཙུག་ལག་སློབ་གཉེར་ཁང་ནས་ཇི་ལྟར་གསོལ་འདེབས་ཞུ་དོན་ལྟར། ཁ་སང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་མི་རིགས་དང་རྒྱབ་ལྗོངས་འདྲ་མིན་གྱི་སྤྱི་ཚོགས་འཆམ་མཐུན་གོང་བུ་གཅིག་ཏུ་གནས་ཐབས་སྐོར་བཀའ་སློབ་བཀྲིན་བསྩལ་གནང་ཡོད་པ་རེད། སྐབས་དེར་༸གོང་ས་མཆོག་གིས་འཛམ་གླིང་ཐོག་ཡོད་པའི་འགྲོ་བ་མི་ཚང་མར་བདེ་སྐྱིད་ལྡན་པའི་མི་ཚེ་སྐྱེལ་རྒྱུའི་ཐོབ་ཐང་གཅིག་མཚུངས་ཡོད་པ་དང་། མི་ཚེའི་དོན་སྙིང་དེའང་བདེ་སྐྱིད་ཅིག་ཡིན་པ་རེད། འོན་ཀྱང་རང་འབྱུང་གི་གནོད་འཚེ་ཕུད་པའི་དེ་མིན་མི་འདོད་བཞིན་དུ་འཕྲད་པའི་ངལ་བ་མང་དག་ཞིག་ནི་འགྲོ་བ་མི་རང་གིས་བཟོས་སྟབས་དེར་ཡིད་སྐྱོ་དགོས་པའི་གནས་སྟངས་ཤིག་རེད་ཅེས་ལམ་སྟོན་གནང་འདུག ལྷག་དོན་འགྲོ་བ་མི་རྣམས་ནས་འགྲོ་བ་མིའི་གཅིག་འགྱུར་གྱི་འདུ་ཤེས་མི་འཛིན་པར་རང་ཉིད་ཀྱི་ཆོས་ལུགས་དང་མི་རིགས། དེ་བཞིན་རྒྱལ་ཁོངས་སོགས་གལ་ཆེ་བར་འཛིན་པའི་དབང་ལས་དེ་ལྟར་ཡོང་གི་ཡོད་སྐོར་བཀའ་བསྩལ་བ་དང་ཆབས་ཅིག ཚང་མའི་ངོས་ནས་འཛམ་གླིང་སྟེང་ཡོད་པའི་འགྲོ་བ་མི་ཐེར་འབུམ་བདུན་པོ་ཚང་མ་འགྲོ་བ་མི་གཅིག་འགྱུར་གྱི་འདུ་ཤེས་འཛིན་དགོས་པ་དང། འགྲོ་བ་མི་སུ་འདྲ་ཞིག་ཡིན་རུང་བྱམས་བརྩེ་མི་འདོད་མཁན་མེད་པ་ལྟར། རང་རྒྱུད་ལ་ཡོད་པའི་བྱམས་བརྩེ་དེ་མུ་མཐུད་ནས་རྒྱུན་སྐྱོང་གནང་ཚེ་མ་འོངས་པར་རང་ཉིད་ཀྱི་དགྲ་བོ་དེ་ཡང་རང་ཉིད་ཀྱི་གྲོགས་པོ་ཡག་ཤོས་ཤིག་ཏུ་འགྱུར་གྱི་རེད་ཅེས་བཀའ་བསྩལ་འདུག དེ་བཞིན་༸གོང་ས་མཆོག་གིས་འཛམ་གླིང་ནང་གི་མི་འབོར་འཕར་བཞིན་པ་དང་བསྟུན་གོ་ལ་སྤྱི་དང་སྒོས་སུ་རྒྱལ་ཁབ་སོ་སོའི་ནང་དུ་དབུལ་ཕྱུག་དབར་གྱི་ཁྱད་པར་ཆེན་པོ་ཡོད་པ་རེད། སྟོབས་ཆེན་རྒྱལ་ཁབ་ཨ་རི་ཡིན་ཡང་དེའི་སྤྱི་ཚོགས་ཁྲོད་དུ་དབུལ་ཕྱུག་གཉིས་ཀྱི་དབར་ཁྱད་པར་ཡོད་པ་དང་། དེ་ནི་བཟང་སྤྱོད་ཀྱི་ཆ་ནས་ནོར་བ་ཞིག་མིན་པར་དོན་དངོས་ཀྱི་ཐོག་ནས་སྤྱི་ཚོགས་ཀྱི་དཀའ་ངལ་ཞིག་ཡིན་པ་རེད། དེས་ན་སྤྱི་ཚོགས་ཁྲོད་ཀྱི་མང་ཚོགས་དབུལ་པོ་རྣམས་ཀྱི་འཚོ་བའི་གནས་སྟངས་ཡར་རྒྱས་གཏོང་དགོས་གལ་ཡིན་པའི་ལམ་སྟོན་བཀའ་སློབ་བསྩལ་བ་མ་ཟད། ལྷག་པར་དུ་མགོན་པོ་མཆོག་གིས་ཕྱིའི་དངོས་པོ་ཡར་རྒྱས་ཕྱིན་འགྲོ་བཞིན་ཡོད་པ་ལྟར། གོ་ལ་ཧྲིལ་པོ་འཕོ་འགྱུར་འགྲོ་བཞིན་པའི་དུས་མཚམས་འདིར་ཆོས་དད་ཡོད་མེད་ལ་མ་ལྟོས་པར་འགྲོ་བ་མའི་བྱམས་བརྩེའི་རིན་ཐང་གལ་ཆེར་ངོས་འཛིན་གྱིས་ཁྱིམ་ཚང་གཅིག་གི་ནང་མི་ལྟར་འདུ་ཤེས་འཛིན་ཏེ་ཤུགས་སྣོན་བསྐྱོན་དགོས་པའི་དུས་ལ་བབ་འདུག་ཅེས་བཀའ་བསྩལ་འདུག སྐབས་དེར་མགོན་པོ་མཆོག་གིས་ཚོུད་གཅིག་མན་ཙམ་གྱི་བཀའ་སློབ་བསྩལ་གྲུབ་རྗེས་མང་ཚོགས་ནས་མགོན་པོ་མཆོག་ལ་སྤྱི་ཚོགས་ལ་བྱམས་བརྩེ་ཁྱབ་སྤེལ་བྱེད་ཕྱོགས་དང། རང་རྒྱུད་ཀྱི་སེམས་ལ་ཞི་བདེ་བསྐྲུན་ཐབས། མགོན་པོ་མཆོག་གི་ཡིད་སྨོན་གནང་ཡུལ་གྱི་མི་སྣ་སུ་ཡིན་སོགས་ཀྱི་ཐད་ལ་བཀའ་འདྲི་ཞུས་པར་༸གོང་ས་མཆོག་གིས་ངོས་ཀྱི་ཡིད་སྨོན་ཆེ་ཤོས་ཞུ་ཡུལ་ནི་རྒྱ་གར་གྱི་མེས་པོ་དམ་པ་གྷན་དྷཱི་མཆོག་དང། ཨ་རིའི་མི་རིགས་ནག་པོའི་རང་དབང་རྩོད་ལེན་པ་སྐུ་ཞབས་ Martin Luther king དེ་བཞིན་ལྷོ་ཨ་ཧྤི་རི་ཀའི་ཡི་ཤུ་ཆོས་དཔོན་ཌེས་མིན་ཊུ་ཊུ་མཆོག ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་ Václav Havel  མཆོག་དང་རྒྱ་གར་གྱི་སྲིད་འཛིན་དང་པོ་ Rajendra Prasad བཅས་ཡིན་ཞེས་བཀའ་ལན་མཛད་པ་དང་ཆབས་ཅིག མགོན་པོ་མཆོག་ནི་མེས་པོ་དམ་པ་གྷན་དྷཱི་མཆོག་གི་རྗེས་འབྲང་པ་ཞིག་ལ་ངོས་འཛིན་ཞུ་བཞིན་ཡོད་སྐོར་བཀའ་བསྩལ་ཡོད་པ་རེད། ཁ་སང་༸གོང་ས་མཆོག་གིས་ San Diego མང་ཚོགས་ལ་ ༢༥༠༠༠ བརྒལ་བར་བཀའ་སློབ་བསྩལ་རྒྱུའི་ལས་རིམ་ཐོག་ གྲོང་ཁྱེར་སྤྱི་ཁྱབ་པ་སྐུ་ཞབས་ Kevin Faulconer མཆོག་ནས་མགོན་པོ་ད་ལན་གྲོང་ཁྱེར་དེའི་ནང་ཆིབས་བསྒྱུར་མཛད་པར་ཐུགས་རྗེ་བླ་མེད་དུ་ཆེ་ཞུས་པ་དང་འབྲེལ། སེན་ཌི་ཡ་གོ་གཞུང་མང་གཉིས་ཀྱི་ངོས་ནས་མགོན་པོ་༸གང་ཉིད་མཆོག་ལ་ཆེ་བསྟོད་ཚུལ་དུ་གྲོང་ཁྱེར་གྱི་ལྡེ་མིག་ཡང་ཕུལ་ཡོད་པ་རེད། རྩ་བའི་ཁ་སང་༸གོང་ས་༸སྐྱབས་མགོན་ཆེན་པོ་མཆོག་གིས་ San Diego མང་ཚོགས་རྣམས་ལ་བཀའ་སློབ་མ་བསྩལ་གོང་དུ་གསར་འགོད་ལྷན་ཚོགས་ཤིག་གི་ཐོག་གཙོ་བོ་མགོན་པོ་མཆོག་གི་ཐུགས་ཀྱི་མཛད་འཁུར་གསུམ་དང། ཆོས་ལུགས་མཐུན་སྒྲིལ། དེ་བཞིན་བོད་མིའི་ཆོས་རིག་དང་སྐད་ཡིག  ཁོར་ཡུག་སྲུང་སྐྱོབ་བཅས་ནི་བོད་མི་ཙམ་མིན་པར་འབྲེལ་ཡོད་ཚང་མར་ལ་འོས་འགན་ཡོད་པ་བཀའ་བསྩལ་བ་མ་ཟད། ལྷག་དོན་ད་ལྟའི་དུས་སྐབས་འདིར་རྒྱ་ནག་གི་སྲིད་འཛིན་ཞི་ཅིང་ཕིང་ནས་སྣེ་ཁྲིད་པའི་འོག་བྱམས་བརྩེ་གཞི་རྩར་ཟིན་པའི་རིག་གནས་གསར་བརྗེ་ཞིག་ཡོང་དགོས་པར་བཀའ་སློབ་བསྐྱར་ནན་མཛད་འདུག