བཙན་བྱོལ།

དབུས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་མེད་པའི་བོད་མི་གནས་ཡུལ་ཡོ་རོབ་རྒྱལ་ཁབ་ཁག་ཏུ་མ་འོངས་པར་བོད་ཀྱི་གཞོན་ནུ་ལྷན་ཚོགས་ཀྱི་ཡན་ལག་སྒྲིག་འཛུགས་གསར་འཛུགས་གནང་ཐུབ་རྒྱུ་ནི་གནད་ཆེ་ཞིག་ལ་ངོས་འཛིན་ཞུ་བཞིན་ཡོད་པ་གསུངས་སོང་།ཟླ་བ་སྔོན་མའི་ཚེས་ ༡༩ ཉིན་དབུ་འཛུགས་ཀྱིས་ཁ་སང་ཟླ་ ༤ ཕྱི་ཚེས་ ༧ བར་ཁྱོན་ཟླ་བ་གཅིག་མན་ཙམ་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲིད་གཅོད་ལགས་དང་། སྤྱི་ཚོགས་ཞབས་ཞབས་ཞུའི་འགན་འཛིན་བཀྲིས་དར་རྒྱས་ལགས་གཉིས་ནས་བོད་མི་གནས་ཡུལ་ཡོ་རོབ་རྒྱལ་ཁབ་ཨོ་སི་ཊི་ཡ། ཇར་མ་ནི། བྷེལ་ཇམ། ཧོར་ལན་ཌི། སེ་པཱན། ཕ་རན་སི། དེ་བཞིན་སུད་སི་བཅས་ཡོ་རོབ་རྒྱལ་ཁབ་ཁག་བདུན་ནང་སྐོར་སྐྱོད་གནང་ཡོད་པ་རེད།སྐོར་སྐྱོད་ཀྱི་དམིགས་འདུན་གཙོ་བོ་ས་གནས་སོ་སོའི་ནང་གི་བོད་མི་རྒན་གཞོན་དར་གསུམ་དང་ལྷན་དུ་དངོས་སུ་གདོང་ཐུག་གིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ངོ་སྤྲོད་དང་། བོད་དོན་གནས་བབས། དེ་བཞིན་བོད་དོན་ཐོག་བོད་རིགས་གཞོན་སྐྱེས་ཀྱི་འགན་ཁུར་སོགས་དང་འབྲེལ་བའི་གོ་རྟོགས་སྤེལ་ཕྱིར་ཡིན་པ་རེད་འདུག་པ་དང་། ཁོང་རྣམ་ནས་བྷེལ་ཇམ་ཁུལ་དུ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་སླར་གསོ་དང་རྒྱུན་ལས་གསར་འདེམས་གནང་ཐུབ་པ་བྱུང་འདུག ཁ་སང་ཕྱི་དྲོ་སུད་སི་གྲོང་ཁྱེར་ཛུ་རིག་ནང་ས་གནས་བོད་མི་ཚོར་བོད་དོན་གཏམ་བཤད་གནང་བ་དང་། ཐེངས་དེའི་ཡོ་རོབ་རྒྱལ་ཁབ་བདུན་ནང་གི་སྐོར་སྐྱོད་ལས་རིམ་འཇུག་སྒྲིལ་གནང་བ་དང་བསྟུན། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་འགྲིན་སྲིད་གཅོད་ལགས་སུ་སྐོར་སྐྱོད་ལས་རིམ་སྤྱི་ཡོངས་དང་འབྲེལ་བའི་སྐོར་བཀའ་འདྲི་ཞུས་པར་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་མེད་པའི་བོད་མི་གནས་ཡུལ་ཡོ་རོབ་རྒྱལ་ཁག་ནང་མ་འོངས་པར་བོད་ཀྱི་གཞོན་ནུ་ལྷན་ཚོགས་ཀྱི་ཡན་ལག་སྒྲིག་འཛུགས་ཤིག་གསར་འཛུགས་ཐུབ་དགོས་གལ་ཡིན་པར་ངོས་འཛིན་ཞུ་བཞིན་ཡོད་པ་གསུངས་སོང་། རྩ་བའི་ད་ལྟའི་ཆར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཁྱབ་ཁོངས་སུ་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ལ་ གཞོན་ལྷན་གྱི་ས་གནས་ཁག་ ༨༧ དང་ཚོགས་མི་ ༣༥༠༠༠ ལྷག་ཡོད་པ་བཅས་བཙན་བྱོལ་བོད་མིའི་གཞུང་འབྲེལ་མི་ཚོགས་པ་ཆེ་གྲས་ཤིག་ཡིན་པ་རེད།

དབུས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་ནས་ཉེ་སྔོན་སྐབས་ ༡༦ པའི་བོད་པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་འདུས་ ༧ པའི་ཐོག་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་དགོས་ངེས་ཀྱི་འོས་གྲངས་བརྒྱ་ཆ་ལོན་མེད་སྐོར་དང་འབྲེལ་ནས་ངོས་ལེན་གནང་མེད་པ་ཡོངས་བསྒྲགས་གནང་སོང་།རྩ་བའི་ཉེ་སྔོན་ཉེ་སྔོན་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པ། ཕྱི་ཟླ་ ༣ ཚེས་ ༢༢ ཉིན་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༢ གཞིར་བཟུང་སྲིད་སྐྱོང་བློ་བཟང་སེང་གེ་མཆོག་ནས་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་གྲོས་ཚོགས་ནང་ངོ་སྤྲོད་ཀྱིས་དགག་བྱ་ཡོད་མེད་གཟིགས་སྐབས། དགག་བྱ་གནང་བར་བརྟེན་གསང་བའི་འོས་བསྡུ་གནང་རྗེས་སྤྱི་འཐུས་ ༢༡ གིས་རྒྱབ་སྐྱོར་གནང་ནས་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་ཡོད་ཀྱང་། དེ་ཉིན་ཆེས་མཐོའི་ཁྲིམས་ཞིབ་ཁང་ནས་ཚོགས་གཙོ་སྦྲེལ་པོའི་མཚན་ཐོག་ལ་ཕྱག་བྲིས་ཤིག་ཕུལ་ཏེ་རྒྱབ་སྐྱོར་འོས་ཤོག་ ༢༡ ཐོབ་པ་དེ་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ ལས་ཉུང་བ་ཡིན་སྐོར་དང་འབྲེལ་བའི་ཛ་དྲག་གི་ཕྱག་བྲིས་ཕུལ་ཡོད་པ་དེ་ལྟར་ཡང་། ཚེས་ ༢༣ ཉིན་སྤྱི་འཐུས་ཚོགས་གཙོ་མཆོག་གིས་གནད་དོན་དེའི་སྐོར་གསར་འགོད་པར་དོགས་དྲི་བཀའ་ལན་གནང་སྐབས་རྩ་བའི་སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། དེ་བཞིན་འོས་འཕེན་ཕྱོགས་སོགས་ཁྲིམས་ཞིབ་ཁང་གང་གི་ཁྱབ་འོག་ཏུ་མེད་པ་དེ་ལྟར་ཡང་། ད་ལན་ཆེས་མཐོའི་ཁྲིམས་ཞིབ་ཁང་གི་ཕྱག་བྲིས་འབྱོར་བ་བཞིན་ལན་འདེབས་ཕུལ་བའི་ནང་དེ་སྔའི་གྲོས་ཚོགས་ནང་བརྒྱ་ཆ་བགོ་ཕྱོགས་ཀྱི་འགྲོ་ལུགས་གཞིར་བཟུང་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ དེ་ ༢༡ དང་གྲངས་ཆུང་ ༥༠ ཡིན་པ་ལྟར། བཀའ་བློན་གྱི་འོས་འདེམས་དང་འབྲེལ་བའི་སྒྲིག་གཞི་དོན་ཚན་ ༨༦ གཞིར་བཟུང་བཀའ་བློན་གྱི་འོས་མིར་དགག་བྱ་བྱུང་ཚེ་བགྲོ་གླེང་མི་དགོས་པར་ངོ་ཡོད་སྤྱི་འཐུས་ཀྱི་གསང་བའི་འོས་ཤོག་འཕང་ཐོག་འོས་འདེམས་བྱ་དགོས་པ་དང་། དེར་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་སྐོར་གསལ་ཡོད་ཀྱང་། དེ་ཉིན་སྤྱི་འཐུས་ ༤༣ ཡོད་སྟབས་བརྒྱ་ཆ་ ༥༠ ཐོབ་པར་སྤྱི་འཐུས་ ༢༡་༥ དགོས་ཀྱི་ཡོད་པ་དང་། ཚོགས་གཙོ་མཆོག་གིས་བཅའ་ཁྲིམས་དོན་ཚན་ ༤༩ པའི་ནང་སྤྱི་འཐུས་རྩ་འབོར་དང་ངོ་ཡོད་ཆ་དགོས་རྩིས་སྐོར་སྐབས་འཕྲོས་ལྷག་དཀར་ཆ་རྩིས་མ་དགོས་ཞེས་པ་དེ་ལུང་འདྲེན་གྱིས་བརྒྱ་ཆ་ ༥༠ ལོན་པར་ངོས་འཛིན་གནང་གི་ཡོད་པ་དེའི་ཐོག་གནས་ཀྱི་ཡོད་ཅེས་གསུངས་པ་མ་ཟད། ཚོགས་གཙོས་མཇུག་སྡོམ་གསུང་བཤད་ནང་དུའང་དེ་རང་ནན་བརྗོད་གནང་ཡོད་པ་རེད།དེ་རིང་ཕྱི་ཚེས་ ༤ སྔ་དྲོ་ཚོུད་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་ཁྲིམས་དྲུང་བཀྲིས་རྒྱ་མཚོ་ལགས་དབུ་བཞུགས། ཟུང་དྲུང་ཐུབ་བསྟན་ཚེ་རིང་ལགས་ཀྱིས་ཆེས་མཐོའི་ཁྲིམས་ཞིབ་ཁང་གི་བཀའ་བློན་ལ་ངོས་བཞེས་གནང་མེད་པའི་གསར་འགོད་གསལ་བསྒྲགས་སྒྲོག་སྦྱང་གནང་བའི་ནང་ཉེ་སྔོན་གྲོས་ཚོགས་ནས་བཀའ་བློན་འོས་འདེམས་ཀྱི་གསལ་བསྒྲགས་སྤེལ་མ་ཐག ཆེས་མཐོའི་ཁྲིམས་ཞིབ་ཁང་གི་ངོས་ནས་ཚོགས་གཙོ་སྦྲེལ་པོར་མང་མོས་བརྒྱ་ཆ་ ༥༠ ཡི་ཆ་རྐྱེན་ཚང་གི་མེད་སྐོར་གྱི་ཐུགས་ཞིབ་དགོས་པའི་ཕྱག་བྲིས་ཕུལ་ཡོད་པ་དང་། ཕྱག་བྲིས་ལ་བཀའ་ལན་འབྱོར་བ་དང་། ཚོགས་གཙོས་གསར་འགོད་པར་འགྲེལ་བརྗོད་གནང་བར་ཆེས་འཐོའི་ཁྲིམས་ཞིབ་ཁང་གི་ངོས་ལེན་མེད་པའི་ཐག་གཅོད་གནང་ཡོད་པ་དང་། དེ་རྗེས་ཚོགས་གཙོ་སྦྲེལ་པོས་རེ་འདུན་བཞིན་ཚོགས་གཙོ་སྦྲེལ་པོ་དང་ཁྲིམས་ཞིབ་པ་ཆེ་བ། སྲིད་སྐྱོང་བཅས་ཁྲིམས་ཞིབ་ཁང་དུ་བཞུགས་མོལ་ཚོགས་འདུ་ཚོགས་ཡོད་པ། དེ་རྗེས་བཀའ་ཤག་ཁྲིམས་ཞིབ་ཁང་ལ་བཅར་ནས་བཀའ་བསྡུར་གནང་རྗེས་བཀའ་དྲུང་ཡིག་ཚང་ནས་དམ་འབུལ་གྱི་ཞུ་སྐུལ་འབྱོར་ཡོད་པར་ཁྲིམས་ཞིབ་ཁང་ནས་བདམས་ཐོན་བཀའ་བློན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་པས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ་བཅའ་ཁྲིམས་དོན་ཚན་ ༢༥ པ་ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་ཕེབས་ཐབས་མེད་པའི་ཐག་གཅོད་གནང་བ་སོགས་རྒྱུད་རིམ་ཆ་ཚང་ངོ་སྤྲོད་གནང་བ་བརྒྱུད་ཆེས་མཐོའི་ཁྲིམས་ཞིབ་ཁང་གི་ངོས་ནས་གཙོ་བོ་དོན་ཚན་ ༥ ཡི་ཐོག་ནས་ཐག་གཅོད་དང་རྒྱུ་མཚན་གསལ་བཤད་གནང་སོང་།དེའང་བཀའ་བློན་དུ་བདམས་ཐོན་བྱུང་བའི་དགོས་ངེས་གྲངས་ཚད་ཀྱི་ཆ་རྐྱེན་ནི་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་པ་དེར་འཕྲོས་ལྷག་སྐར་ཆ་བརྩི་མ་དགོས་པའི་ཆ་རྐྱེན་བཞག་མེད་པ་དང་། སྲིད་སྐྱོང་མཆོག་གིས་བཅའ་ཁྲིམས་དོན་ཚན་ ༢༢ གཞིར་བཟུང་སྤྱི་འཐུས་ལྷན་ཚོགས་སུ་བཀའ་བློན་འོས་གཞི་མིང་འདོན་གནང་བ་གང་ཞིག་བཅའ་ཁྲིམས་ནང་གསལ་དགོས་ངེས་ཀྱི་བརྒྱ་ཆའི་གྲངས་ཚད་ལོན་མེད་པ་མངོན་སུམ་དུ་གྲུབ་ཡོད་པའི་མང་མོས་མ་ཐོབ་པ་ཞིག་ལ་འོས་ཐོན་བྱུང་བའི་གསལ་བསྒྲགས་བྱས་པ་དེ་བཅའ་ཁྲིམས་དོན་ཚན་འདིའི་དགོངས་དོན་དང་འགལ་ཡོད་སྐོར་དང་འབྲེལ། བཅའ་ཁྲིམས་དོན་ཚན་ ༢༢ པའི་དགོངས་དོན་ལ་མངོན་གསལ་གྱི་གནོད་འགལ་བྱས་ཡོད་པ་གསུངས་སོང་།དེ་བཞིན་བཅའ་ཁྲིམས་དོན་ཚན་ ༢༢ རྩིས་གཞི་བརྒྱ་ཆ་ ༥༠ ཡིན་པ་དང་། དོན་ཚན་ ༤༩ ནང་གསེས་ ༡ རྩིས་གཞི་ནི་གྲངས་ཆ་གསུམ་ཆ་གཉིས་ཡིན་པ་ལྟར། སྔ་མ་ནི་བཀའ་བློན་གྱི་འོས་འདེམས་བྱེད་སྟངས་སྐོར་ཡིན་པ་དང་། ཕྱི་མ་ནི་སྤྱི་འཐུས་ལྷན་ཚོགས་དང་དེའི་རྒྱུན་ལས་སུ་སྤྱི་འཐུས་ཀྱི་ཉུང་ཚད་སྐོར་ཡིན་སྟབས་ཆ་རྐྱེན་དེ་དག་དོན་གནད་ཐ་དད་ཡིན་པ་ལས་བཀའ་བློན་འོས་ཐོན་གྱི་དགོས་ངེས་གྲངས་ཚད་ལ་སྦྱོར་མི་རུང་བ་ཡིན་པ་གསུངས་ཡོད།དེ་གཞིན་སྤྱི་འཐུས་ལྷན་ཚོགས་ནས་བདམས་ཐོན་བྱུང་བར་ངོས་འཛིན་བྱས་པའི་རྒྱབ་རྟེན་དུ་བརྒྱ་ཆ་འགོད་སྟངས་ཀྱི་རེའུ་མིག་གཞིར་བཟུང་གནང་ཡིན་པ་གསུངས་པ་དེ་ནི། ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཤོག་ངོས་གཉིས་ཅན་དང་། དེའི་མཉམ་སྤྱི་འཐུས་གྲངས་དང་བརྒྱ་ཆ་གསུམ་ཆ་ ༢ བརྒྱ་ཆ་ ༥༠ བརྒྱ་ཆ་བཞི་ཆ་གསུམ་ཞེས་པ་རེའུ་མིག་ཤོག་ངོས་གཅིག་ཅན་ཞིག་འདུག་པ་དེ་ཡིན་པ་དང་། བཀའ་བློན་གྱི་འོས་འདེམས་ཚང་མར་དེ་དོན་གནང་བ་བྱུང་ཡོད་ཅེས་བཀོདཡོད་སྟབས། དེའི་སྔའི་བཀའ་ཤག་སྐབས་ ༡༢ དང་ ༡༣  དེ་བཞིན་སྐབས་ ༡༤ དང་ ༡༥ བཅས་ཀྱི་གནད་དོན་ལུང་འདྲེན་དང་འབྲེལ་སྐབས་དེ་དག་ཐོག་བརྒྱ་ཆ་རྩིས་སྐོར་བྱེད་དགོས་པ་བྱུང་མེད་སྐོར་དང་འབྲེལ། རེའུ་མིག་དེ་ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཡིན་པ་ལས། བཀའ་བློན་གྱི་འོས་འདེམས་སྐབས་བརྒྱ་ཆ་བགོ་སྟངས་སྐོར་མིན་པ་རེའུ་མིག་འགོ་བརྗོད་ནས་རྟོགས་ཐུབ་ཀྱི་ཡོད་པ་ལྟར། སྤྱི་འཐུས་ལྷན་ཚོགས་ནས་ཡིག་ཆ་དེས་བཅའ་ཁྲིམས་དོན་ཚན་ ༢༢ ནང་གསལ་བཀའ་བློན་དུ་བདམས་ཐོན་ཡོང་བ་ལ་བརྒྱ་ཆ་ ༥༠ ལས་མ་ཉུབ་བ་དགོས་པའི་ཆ་རྐྱེན་འདིར་བསྒྱུར་བཅོས་གཏོང་ཐབས་མེད་ཅེས་ཚོགས་གཙོ་སྦྲེལ་པོར་གསལ་པོ་ཞུས་ཟིན་ཡོད་པ། ལྷག་པར་དུ་ཆེས་མཐོའི་ཁྲིམས་ཞིབ་ཁང་ནས་བཅའ་ཁྲིམས་དང་འགལ་བའི་བྱ་སྤྱོད་རྣམས་གསལ་འདོན་གནང་ཟིན་རྗེས་ད་དུང་མུ་མཐུད་ སྤྱི་འཐུས་ལྷན་ཚོགས་ནང་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། འོས་འཕེན་སྟངས་ཁྲིམས་ཞིབ་ཁང་གང་གི་ཡང་ཁྱབ་ཁོངས་ལ་ཡོད་མ་རེད་ཅེས་གསུངས་པ་ནི་བཅའ་ཁྲིམས་དོན་ཚན་ ༤༦ དང་ ༥༨ གཉིས་མཉམ་བསྲེས་བཏང་སྟེ་འགྲེལ་ལོག་གནང་བ་ཞིག་ཡིན་པ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྲུང་སྐྱོབ་བྱ་རྒྱུ་དེ་ཁྲིམས་ཞིབ་ཁང་གི་འདོར་དུ་མེད་པའི་ལས་འགན་ཡིན་སྟབས། འོས་ཐོན་མ་བྱུང་བའི་འོས་གཞི་དེར་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཡོང་བའི་ཞུ་སྐུལ་བྱུང་བ་ཡང་རང་བཞིན་གྱིས་ངོས་བཞེས་གནང་ཐབས་མེད་སྐོར་དང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༦ ནང་གསལ་ལྟར། ཆེས་མཐོའི་ཁྲིམས་ཞིབ་ཁང་འདི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་དང༌། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན་པ་དང་། དེར་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་པའི་སྐུ་དབང་དང་། དེ་བཞིན་བཅའ་ཁྲིམས་དོན་ཚན་ ༥ ནང་གསལ་ལྟར་ཁྲིམས་ལུགས་དང་། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་རུང་ནུས་ལྡན་ཡིན་མིན་བཅའ་ཁྲིམས་ཀྱི་ཚད་འཛིན་ཐག་གཅོད་བྱེད་པའི་སྐུ་དབང་བཅས་བཙན་བྱོལ་བོད་མིའི་བཅའ་ཁྲིམས་ཀྱིས་ཆེས་མཐོའི་ཁྲིམས་ཞིབ་ཁང་ལ་བསྐུར་ཡོད་པས། ཀ་བ་གསུམ་གྱི་དབང་ཆའི་ས་མཚམས་ལས་མ་འགལ་བའི་ཐོག་ནས་ཐག་གཅོད་བྱས་པ་ཞིག་ཡིན་པ་དང་། བཅའ་ཁྲིམས་ཀྱིས་བསྐུར་བའི་འགན་དབང་རྣམས་ལག་བསྟར་བྱེད་སྐབས་སུ་བཅའ་ཁྲིམས་ཀྱི་དགོངས་དོན་ལ་དོ་ཕོག་དང་གནོད་འགལ་བྱེད་པའི་བྱ་སྤྱོད་མཐོང་བཞིན་དུ་དེར་སྣང་མེད་དམ། གུ་བཤངས་སམ། བབ་བསྟུན་ནམ། མཐུན་འགྱུར་བྱ་རྒྱུ་ནི་ཁྲིམས་ཞིབ་ཁང་གནས་དགོས་པའི་རྒྱུ་མཚན་དང་རྒྱབ་འགལ་ཡིན་པས། ཁྲིམས་ཞིབ་ཁང་ནས་བཅའ་ཁྲིམས་སྲུང་སྐྱོབ་ཀྱི་དམ་བཅའ་ནམ་ཡང་འདོར་ཐབས་མེད་པ་བཅས་གསུངས་སོང་། ཁྲིམས་ཞིབ་ཁང་གི་གསར་འགོད་ལྷན་ཚོགས་གྲུབ་རྗེས་གསར་འགོད་པ་རྣམས་ནས་སྤྱི་འཐུས་ཚོགས་གཙོ་པདྨ་འབྱུང་གནས་ལགས་སུ་འཀའ་འདྲི་ཞུས་པར་སྤྱི་འཐུས་ལྷན་ཚོགས་ཀྱི་ངོས་ནས་བཀའ་བློན་བདམས་མཐོན་གྱི་གསལ་བསྒྲགས་གནང་བའི་ཐོག་དེ་སྔ་བཅའ་ཁྲིམས་དགོངས་དོན་བཞིན་བརྒྱ་ཆ་ ༥༠ ལོན་པར་ངོས་འཛིན་ཐག་གཅོད་གནང་བ་དེའི་ཐོག་གནས་ཀྱི་ཡོད་པ་གསུངས་སོང་། དེ་བཞིན་ད་རེས་ཆེས་མཐོའི་ཁྲིམས་ཞིབ་ཁང་གི་སྤྱི་འཐུས་ལྷན་ཚོགས་ནས་བཅའ་ཁྲིམས་དོན་ཚན་ ༢༢ དགོངས་དོན་ལ་མངོན་གསལ་ཐོག་གནོད་འགལ་བྱས་ཡོད་སྐོར་གསུངས་པའི་ཐོག་ལན་འདེབས་གནང་ཡོད་པ་རེད། དེའི་བར་ན་བཀའ་བློན་གྱི་འོས་མི་བཀའ་དྲུང་རྫོང་ཁ་སྟོབས་རྒྱལ་ལགས་བཀའ་དྲུང་གི་ལས་གནས་ནས་རྩ་དགོངས་ཞུས་ཟིན་པ་ལྟར། ད་ལྟའི་འཕྲོད་བསྟེན་ལས་ཁུངས་ཀྱི་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་བཀའ་དྲུང་ཡིག་ཚང་གི་དྲུང་ཆེར་བསྐོ་གཞག་གནང་ཡོད་པ་བཞིན་ཟླ་ ༤ ཚེས་ ༨ ནས་ལས་ཁུར་དབུ་འཛུགས་གནང་གི་ཡོད་པ་རེད།

དེ་རིང་སྔ་དྲོ་ཚོུད་ ༡༠ སྟེང་དྷ་ས་གངས་སྐྱིད་དུ་རྟེན་གཞི་བྱས་པའི་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་ཆབ་སྲིད་བཙོན་ཟུར་དང་བོད་དོན་ལས་འགུལ་བ་དགའ་ལྡན་གྲྭ་བག་གྲོ་ལགས་ཀྱིས་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་པའི་ཁོང་གི་བརྩམས་ཆོས་བཅོ་ལྔ་པ་བོད་རང་བཙན་ཁུངས་སྐྱེལ་གྱི་ལོ་རྒྱུས་དཔེ་དེབ་ཅིག་དབུ་འབྱེད་གནང་སོང་།དཔེ་དེབ་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་ཚོགས་གཙོ་པདྨ་འབྱུང་གནས་མཆོག་གིས་གཙོས་པའི་བཞུགས་སྒར་ཁུལ་གྱི་ཚོགས་སྐྱིད་ཁག་གི་སྐུ་ཚབ་རྣམ་པ། དེ་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་སྲི་ཞུ་བ་ཁག་ཅིག གསར་འགོད་པ་བཅས་མི་སུམ་ཅུ་ལྷག་འདུ་འཛོམས་གནང་ཡོད་པ་རེད།སྐབས་དེར་ཆབ་སྲིད་བཙོན་ཟུར་རྩོམ་པ་པོ་གྲྭ་བག་གྲོ་ལགས་ཀྱིས་རང་ཉིད་བོད་ཀྱི་འཐབ་རྩོད་ཁྲོད་ཇི་ལྟར་ཞུགས་པའི་ལོ་རྒྱུས་དང་འབྲེལ་ནས་རྒྱ་ནག་གིས་བོད་ཀྱི་ལོ་རྒྱུས་ལ་འཁྱོག་བཤད་དུ་མ་བྱས་ཡོད་པར་བརྟེན་ཁོང་གིས་འདས་པའི་མི་ལོ་གསུམ་གྱི་ནང་དཀའ་བ་ཁྱད་དུ་བསད་ནས་ལོ་རྒྱུས་ཀྱི་རྒྱུ་ཆ་ཕྱོགས་སྒྲིག་གནང་སྟེ་བོད་རང་བཙན་ཁུངས་སྐྱེལ་གྱི་ཕྱག་དེབ་དེ་བརྩམས་སྐོར་འགྲེལ་གསུངས་སོང་། སྔ་ལོར་རང་ཉིད་ཀྱི་མི་ཚེ་ནང་གི་དམ་བཅའ་གལ་ཆེན་ཞིག་བསྒྲུབས་ཡོད་སྟབས་སང་ཉིན་ཤི་ཡང་གནོང་འགྱོད་ཅི་ཡང་མེད་ཅེས་དཔེ་དེབ་དེ་ངོ་སྤྲོད་གནང་ཡོད། ཚོགས་གཙོ་མཆོག་གིས་གྲྭ་བག་གྲོ་ལགས་ཀྱིས་དུས་རྟག་ཏུ་བོད་དོན་ཆེད་དུ་ཕྱག་ལས་རྒྱ་ཆེར་གནང་བཞིན་པར་བསྔགས་བརྗོད་གནང་བ་དང་སྦྲགས། ཁོང་གི་དཔེ་དེབ་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་པ་འདི་མ་འོངས་པར་དྲི་བ་དྲིས་ལན་གྱི་ངོ་བོར་པར་བསྐྲུན་ཞུས་ནས་བོད་ཀྱི་བྱིས་པ་ཚོར་ངོ་སྤྲོད་གནང་ཐུབ་ཚེ་དགེ་མཚན་ཆེ་བ་ཡོད་པ་གསུངས་སོང་།རྩ་བའི་གྲྭ་བག་གྲོ་ལགས་ནི་ལོ་རབས་བདུན་ཅུ་བར་ལྷ་ས་གྲོང་ཁྱེར་གྱི་སྟག་རྩེ་རྫོང་ཁོངས་སུ་འཁྲུངས་ཤིང་། ཕྱིས་སུ་དགའ་ལྡན་དགོན་པར་ཆོས་ཞུགས་གནང་ནས་གྱ་བརྒྱད་ལོར་བོད་ལ་རང་བཙན་དགོས་པའི་རྔམ་སྟོན་ཁྲོམ་སྐོར་ནང་ཞུགས་པར་བརྟེན་རྒྱ་ནག་གིས་འཛིན་བཟུང་བཙོན་འཇུག་བྱས་ཡོད་ཀྱང་། རྗེས་སུ་གློད་བཀྲོལ་ཐོབ་རྗེས་གོ་གཅིག་ལོར་བཙན་བྱོལ་དུ་འབྱོར་ཡོད་པ་རེད། ༸རྒྱལ་བའི་བཀའ་མངགས་ལྟར་བོད་ནང་གི་དངོས་ཡོད་དྲག་གནོན་མཚོན་པར་བྱེད་པའི་རྩོམ་སྒྲིག་གི་ལས་ལ་ཞུགས་ཏེ་འཛམ་གླིང་སྟེང་གི་དམྱལ་བ་དང་། བོད་རྒྱ་ནག་གི་བཙོན་ར་སོགས་ཀྱི་མཚོན་པའི་དཔེ་དེབ་བཅོ་ལྔ་པར་རྩོམ་སྒྲིག་དང་པར་བསྐྲུན་གནང་ཡོད།  དེ་རིང་དབུ་འབྱེད་གནང་བའི་དཔེ་དེབ་དེ་ནི་བོད་ཀྱི་ལོ་རྒྱུས་ཀྱི་ཡིག་ཆ་དང་པར་རིས་འཚོལ་ཞིབ་གནང་བ་བརྒྱུད་ནས་རྒྱ་ནག་གིས་བོད་ཀྱི་དངོས་ཡོད་ལོ་རྒྱུས་ལ་འཁྱོག་བཤད་བྱས་ཏེ་འཛམ་གླིང་གི་མི་མང་ལ་བསླུ་བྲིད་གཏོང་བཞིན་པ་དེར་དགག་ལན་དང་། བོད་དེ་ལོ་རྒྱུས་ཀྱི་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ་ཁུངས་སྐྱེལ་གནང་བའི་དཔེ་དེབ་ཅིག་རེད།

ཁ་སང་འདི་ག་རྒྱ་གར་གྱི་རྒྱལ་ས་ལྡི་ལིའི་ India International Centre ལྟེ་གནས་ཁང་དུ་བཀའ་ཁྲི་ཟུར་པ་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་དང་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས། རྒྱ་གར་གྱི་མཁས་དབང་ཁག་གཅིག་བཅས་ཀྱི་དབར་རྒྱ་གར་གྱི་སློབ་གྲྭ་ཁག་ཏུ་གནའ་རབས་ཀྱི་ལེགས་བཤད་གོང་འཕེལ་ཡོང་ཐབས་ཀྱི་བསླབ་གཞི་གསར་སྒྲིག་དང་འབྲེལ་བའི་མཁས་པའི་ལྷན་ཚོགས་ཤིག་ཚོགས་སོང་།༸དཔལ་ལྡན་དགའ་ལྡན་ཕོ་བྲང་གི་ཡིག་ཚང་དང་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ཐུན་མོང་གིས་གོ་སྒྲིག་འོག་ཉིན་གྲངས་གཉིས་ཀྱི་རིང་ལྷན་ཚོགས་ཚོགས་པ་དེའི་དགོས་དམིགས་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་གཅིག་ནི་དེང་དུས་ཀྱི་རྒྱ་གར་བ་ཚོ་ཕྱི་དངོས་པོའི་དཔལ་འབྱོར་གྱི་མཐུན་རྐྱེན་ཁོ་ནའི་རྗེས་སུ་མ་སོང་བར་སོ་སོ་རང་ཉིད་ལ་ཡོད་པའི་གནའ་རབས་ཀྱི་ལེགས་བཤད་དེ་དག་མི་ཉམས་རྒྱུན་འཛིན་ཐུབ་པ་གནང་རྒྱུ་དང་། ལྷག་པར་དུ་མིའི་སེམས་རྒྱུད་ལ་ཞི་བདེ་བསྐྲུན་ཐུབ་པའི་ནུས་ལྡན་གྱི་རིག་གཞུང་དེ་མི་ཉམས་རྒྱུན་འཛིན་ཙམ་མིན་པར་ལེགས་བཤད་དེ་དག་གོང་འཕེལ་ཡོང་ཐབས་ཀྱི་དགོངས་གཞི་ཡོད་པ་ལྟར། ཉིན་གྲངས་གཉིས་ཀྱི་རིང་ཚོགས་ཀྱི་ཡོད་པའི་མཁས་པའི་བགྲོ་གླེང་དེ་རྒྱ་གར་གྱི་གཞི་རིམ་སློབ་གྲྭའི་བསླབ་གཞི་གསར་སྒྲིག་དང་འབྲེལ་བའི་ལྷན་ཚོགས་ཤིག་ཡིན་པ་རེད། མཁས་པའི་ལྷན་ཚོགས་ཐོག་རྒྱ་གར་གྱི་ལྟ་གྲུབ་ཆེ་ཁག་དྲུག་གི་མཁས་དབང་ཁག་གཅིག་ནས་ལྷན་ཞུགས་གནང་ཡོད་པ་དང་མཁས་དབང་དེ་དག་དབར་གནའ་བོའི་སྒྲུང་གཏམ་སོགས་ཀྱི་སྐོར་བགྲོ་གླེང་གནང་གི་ཡོད་པ་ལྟར། འདི་ག་རླུང་འཕྲིན་ཁང་ནས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས་སུ་བཅར་འདྲི་ཞུས་པར་གཞི་རིམ་སློབ་གྲྭ་ཁག་ཏུ་གཏིང་ཟབ་ཀྱི་ལྟ་གྲུབ་སློབ་མཚན་སོགས་སློབ་ཁྲིད་བྱེད་རྒྱུའི་གོ་སྐབས་མེད་སྟབས་བཟང་སྤྱོད་ཀྱི་བསླབ་བྱ་ཡོད་པའི་སྒྲུང་གཏམ་སོགས་ཀྱི་ལམ་ནས་ལེགས་བཤད་གོང་འཕེལ་ཡོང་ཐབས་གནང་གི་ཡོད་པ་སོགས་འགྲེལ་བརྗོད་གནང་སོང་།དེ་བཞིན་ཉིན་གྲངས་གཉིས་ཀྱི་རིང་ཚོགས་པའི་མཁས་པའི་བགྲོ་གླེང་ལྷན་ཚོགས་འདི་དང་ཕྱི་ཚེས་ ༤ ནས་ ༦ བར་༸གོང་ས་མཆོག་དབུ་བཞུགས་ཐོག་ཆོས་ལུགས་ལ་མ་བརྟེན་པའི་བཟང་སྤྱོད་དང་འབྲེལ་བའི་རྒྱལ་སྤྱིའི་རང་བཞིན་ལྡན་པའི་ལྷན་ཚོགས་གཉིས་དབར་ལ་འབྲེལ་བ་གང་ཡོད་མེད་བཅར་འདྲི་ཞུས་པར་རྩ་བའི་ཆ་ནས་འགྲོ་ཕྱོགས་ཀྱི་ཐོག་ནས་མཐུན་པའི་ཆ་ཡོད་ནའང་། ཁ་སང་དང་དེ་རིང་ཚོགས་པའི་མཁས་པའི་ལྷན་ཚོགས་དེ་རྒྱ་གར་སྲོལ་རྒྱུན་རིག་གནས་ཁག་གཞི་རིམ་སློབ་གྲྭ་དང་མང་ཚོགས་ནང་ཐུགས་ཕན་གསོས་ཐབས་ཤིག་དང་། རྒྱལ་སྤྱིའི་རང་བཞིན་ལྡན་པའི་ལྷན་ཚོགས་དེ་བཟང་སྤྱོད་དང་འབྲེལ་བའི་འཛིན་རིམ་བཅུ་གཉིས་དབར་གྱི་སྤྱི་ཡོངས་ཀྱི་སྐད་ཡིག་མང་པོའི་ནང་བསླབ་གཞི་བཀོད་སྒྲིག་གནང་རྒྱུའི་ལས་འཆར་ཞིག་ཡིན་པར་འགྲེལ་བརྗོད་གནང་ཡོད།

དེ་རིང་ཟླ་ ༤ ཚེས་ ༢ ཉིན་སྔ་དྲོ་ཚོུད་ ༡༠ སྟེང་ བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོགས་ཁང་དུ་དཔལ་འབྱོར་ཚོང་ལས་ཡར་ཐོན་རམ་འདེགས་ལས་གཞི་ཚན་པ་དང་། ཨིན་ཡུལ་བོད་ཁང་ཐེབས་རྩ། དེ་བཞིན་ཁེ་ན་ཌ་མོན་ཁྲི་ཡོལ་དུ་རྟེན་གཞི་བྱས་པའི་བོད་པའི་གསར་གཏོད་ཚོགས་པ་བཅས་ཟུང་འབྲེལ་གྱིས་གསར་འགོད་གསལ་བསྒྲགས་ཤིག་གནང་བ་དང་སྦྲགས།  བཙན་བྱོལ་བོད་མིའི་གཞིས་ཆགས་ཁག་ཏུ་ཡོད་པའི་བོད་མི་གཞོན་སྐྱེས་ཚོ་རྒྱུན་གནས་དང་བོད་ཀྱི་ཡུལ་སྲོལ་གོམས་གཤིས་མི་ཉམས་ཡོང་སླད་གཞོན་སྐྱེས་རྣམས་ལ་ལས་ཀའི་གོ་སྐབས་བསྐྲུན་པའི་ལས་འཆར་འགྲན་བསྡུར་ཡོངས་ཁྱབ་དང་འགྲན་བསྡུར་དེའི་ཁྲོད་ལས་འཆར་རྩེ་ཕུད་སོན་པར་བོད་པའི་གསར་གཏོད་ཚོགས་པས་མ་དངུལ་ཧིན་སྒོར་ས་ཡ་བཅུ་གསོལ་རས་གནང་རྒྱུ་ཡིན་པ་གསལ་བསྒྲགས་གནང་སོང་། གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་དྲུང་ཆེ་ཡེ་ཤེས་དབང་མོ་ལགས་ལྷན་ཞུགས་ཐོག་ཨིན་ལེན་སྐུ་ཚབ་དོན་གཅོད་ཟུར་པ་ཐུབ་བསྟན་བསམ་གྲུབ་ལགས་ནས་ Skype དྲྭ་རྒྱ་ལམ་བརྒྱུད་མཉམ་ཞུགས་གནང་ཡོད་པ་དང་། སྐབས་དེར་བཀའ་བློན་མཆོག་གིས་ལས་འཆར་དེ་རྒྱ་གར་ནང་རྟེན་གཞི་བྱས་པའི་གཞིས་ཆགས་ཏུ་ཆེད་དམིགས་ཀྱིས་སྤེལ་དགོས་པ་དང་།   ལས་འཆར་དེ་བཙན་བྱོལ་བོད་མིའི་གཞིས་ཆགས་ཁག་ཏུ་ཡོད་པའི་བོད་མི་གཞོན་སྐྱེས་ཚོ་རྒྱུན་གནས་ཐུབ་ཐབས་དང་ཕུགས་རྒྱང་རིང་པོའི་ལས་ཀའི་གོ་སྐབས་བསྐྲུན་པའི་འཆར་གཞི་དང། ལས་འཆར་དེའི་འོག་ཉུང་མཐར་བོད་མི་ ༢༠ ལྷག་ལ་ལས་ཀ་བསྐྲུན་ཐུབ་ཐབས་སོགས་འབྲེལ་བརྗོད་དང་ངོ་སྤྲོད་གནང་ཡོད།ལས་འཆར་དེའི་ཐོག་འཛུལ་ཞུགས་པ་རྣམས་ཀྱིས་འཚང་སྙན་ཕྱི་ལོ་ ༢༠༡༩ ཟླ་ ༨ ཚེས་ ༡ ནང་ཚུད་དུ་བོད་ཀྱི་གསར་གཏོད་ཡིག་ཚང་དུ་སྙན་ཞུ་འབྱོར་ཐུབ་པ་དགོས། Yeti@tibetinnovations.org ཞེས་པའི་གློག་འཕྲིན་ཁ་བྱང་ཐོག་ཕུལ་དགོས་པ་དང། ལས་འཆར་དེ་འབྲེལ་ཞིབ་ཕྲའི་གནས་ཚུལ་རྣམས་དཔལ་འབྱོར་ལས་ཁུངས་ཀྱི་ཁྱབ་ཁོངས་ཡར་ཐོན་ཚོང་ལས་རམ་འདེགས་ཚན་པ་དང་བོད་པའི་གསར་གཏོད་ཟུང་འབྲེལ་གྱི་གསར་བཟོ་ཞུས་པའི་དྲྭ་རྒྱ་ www.tibetinnovations.org ཐོག་ནས་གཟིགས་གནང་དགོས་ཀྱི་འདུགགཞི་རྩའི་ལས་འཆར་འདི་ཕྱི་ལོ་ ༢༠༠༩ ལོར་ཁེ་ན་ཌ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་མཛད་སྐབས་བོད་མིའི་གཞིས་ཆགས་ཁག་ཏུ་གཞོན་སྐྱེས་ཚོར་ཡོངས་འབབ་ཡག་པོ་ཡོད་པའི་ལས་ཀ་འཚོལ་ཐབས་མེད་པར་ཕྱིའི་ལུང་པར་བསྐྱོད་ནས་གཞིས་ཆགས་རྒྱུན་གནས་ཐུབ་རྒྱུར་ལྡོག་ཕྱོགས་ཀྱི་ཤུགས་རྐྱེན་ཐེབས་བཞིན་པའི་ཐད་བཀའ་སློབ་ཕེབས་དོན་ལྟར་ལས་འཆར་འདི་བཀོད་སྒྲིག་གནང་བ་ཞིག་ཡིན་པ་རེད།

ཉེ་སྔོན་ཕྱི་ཟླ་གསུམ་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ སྐབས་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་དང་ཚོགས་ཞུགས་ཀྱི་སྐུ་ཚབ་མི་སྣ་སོགས་ལ་ཕྱོགས་ཡོངས་ནས་གནོན་ཤུགས་སྤྲད་ནས་རྒྱ་ནག་་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་གླེང་སློང་མི་ཡོང་བའི་ཐབས་ཤེས་བྱས་ཡོད་པ་མངོན་གསལ་གནང་ཡོད།ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་དེའི་ཐོག་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཁག་གི་སྐུ་ཚབ་མི་སྣ་རྣམས་ལ་ཡི་གེ་ཞིག་ཕུལ་ཡོད་པ་ལྟ་ཞིབ་ཚོགས་པར་ལག་སོན་བྱུང་བ་དང་། དེ་བཞིན་ལྷན་ཚོགས་ཐོག་རྒྱ་གཞུང་གི་སྐུ་ཚབ་མི་སྣ་མང་པོ་ཆེད་བཅར་གྱིས་གནོད་ཤུསག་སྤྲད་དེ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབས་ཐད་སྐྱོན་བརྗོད་གནང་མི་ཆོག་པར་བསྔགས་བརྗོད་བྱེད་དགོས་བའི་ངན་སྐུལ་བྱས་ཡོད་པ་སོགས་མངོན་གསལ་གནང་འདུག རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་མི་སྣ་རྣམས་ལ་གནོན་ཤུགས་སྤྲོད་ཐབས་སུ་ཕུལ་བའི་ཡི་གེའི་ནང་རྒྱལ་ཚོགས་ཀྱི་ཚོགས་ཞུགས་སྐུ་ཚབ་རྣམས་ལ་ཕྱོགས་གཉིས་ཀྱི་རྒྱལ་ཁབ་ཀྱི་འབྲེལ་ལམ་དང་། དེ་བཞིན་ཕྱོགས་ཡོངས་ཀྱི་མཉམ་འབྲེལ་གཙོར་འཛིན་གྱི་ཐོག་ནས་དོ་ཕོག་འགྲོ་སྲིད་པ་དང།  ཁེ་ན་ཊ་དང་ཨ་རི་སོགས་ཀྱིས་ཕྱི་ཚེས་ ༡༣ ཉིན་རྒྱ་ནག་ནང་གི་ཡུ་གུར་མི་སེར་གྱི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་ཚོགས་འདུ་གཙོ་གྱུར་ལྷན་ཚོགས་སྤྱི་ཡོངས་ཐོག་འཛུལ་ཞུགས་དང་རྒྱབ་སྐྱོར་མི་བྱེད་པའི་ངན་སྐུལ་དང་ཉེན་བརྡ་བཏང་ཡོད་པ་གསལ་འདོན་བྱས་འདུགརྒྱལ་ཚོགས་ཀྱི་ཚོགས་མི་སྐུ་ཚབ་རྣམས་ལ་དོན་ཚན་དགུའི་ཐོག་ནས་སྤྲད་པའི་ཞུ་ཡིག་ནང་རྒྱལ་ཚོགས་ཀྱིས་ལས་བྱེད་པ་རྣམས་ནས་དེ་སྔོན་རྒྱ་ནག་གི་དུས་བཀག་བསྐྱར་ཞིབ་སྐབས་ཚོགས་པ་ཁག་གིས་ཕུལ་བའི་སྙན་ཐོ་རྣམས་ཕྱིར་བསྡུ་བྱེད་དགོས་པ། དེ་བཞིན་རྒྱལ་ཚོགས་ཀྱིས་ཚོགས་མི་རྣམས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བསྟོད་བསྔགས་གཏོང་དགོས་པ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་ཡུ་གུར་ས་ཁུལ་གྱི་པར་རིས་འགྲེམས་སྟོན་བྱས་ཏེ་ཡུ་གུར་མི་མང་རྒྱ་ནག་གི་སྲིད་གཞུང་གི་འོག་ཏུ་བདེ་སྐྱིད་ཀྱི་འཚོ་བར་རོལ་བཞིན་པ་མངོན་གསལ་བྱེད་ཐབས་སོགས་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲད་པ་དག་ཐེར་འདོན་གནང་ཡོད་པ་རེད། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ Geneva སྡེ་ཚན་གྱི་ངེས་སྟོན་པ་John Fisher ལགས་ཀྱིས་རྒྱ་ནག་གིས་ལོ་ངོ་དུ་མའི་རིང་ལ་རྒྱལ་ཚོགས་ཀྱི་འགྲོ་བ་མིའི་ཐང་ཚོགས་པའི་རྩ་བའི་གྲུབ་ཆ་དེར་གནོན་སྐྱོན་བཟོས་ནས་ནུས་བ་ཇེ་ཞན་དུ་གཏོང་ཐབས་བྱེད་བཞིན་ཡོདཔ་གསལ་འདོན་གནང་ཡོད་པ་དང་། དེ་བཞིན་རྒྱ་ནག་གིས་ཡུ་གུར་མི་རིགས་ལ་དྲག་གནོན་བྱེད་བཞིན་པའི་གནས་སྟངས་དེར་རྒྱལ་སྤྱིའི་སྒང་ནས་གླེང་སློང་མང་པོ་འབྱུང་བཞིན་པར་བརྟེན་རྒྱ་ནག་སྲིད་གཞུང་ད་ཆ་འཇིགས་དངངས་ཀྱི་གནས་བབས་ཤིག་ཏུ་ལྷག་ཡོད་སྟབས་མང་ཚོགས་ཡོངས་དང་མི་སྒེར་སོགས་ཚང་མར་གནོན་ཤུགས་སྤྲད་ནས་རྒྱལ་སྤྱིའི་སྟེང་གནས་དོན་དེའི་ཐད་ཐེ་གཏོགས་མི་ཡོང་བའི་ཐབས་ཤེས་གཏོང་བཞིན་ཡོད་པར་བསྒྲགས་འདུགརྒྱ་ནག་གིས་ཐབས་བརྒྱ་ཇུས་སྟོང་གིས་ཡུ་གུར་མི་མང་གི་ཐོབ་ཐང་ལ་དྲག་གནོན་བྱེད་བཞིན་པར་སྐྱོན་བརྗོད་ཡོད་ཚད་འགོག་ཐབས་བྱེད་ཡོད་ཀྱང་ཉེ་ཆར་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱལ་སྤྱིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་དང་། ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་གཙོས་ཆེད་མཁས་པ་རྣམས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་སྐྱོན་བརྗོད་དྲག་པོ་བྱེད་པ་དང་འབྲེལ། འཕྲལ་དུ་རང་དབང་ལྡན་པའི་རྟོག་ཞིབ་རུ་ཁག་རྣམས་བཀག་རྒྱ་མེད་པར་ཤིན་ཅང་ནང་ས་ཁུལ་དུ་བསྐྱོད་དུ་འཇུག་དགོས་པའི་འབོད་སྐུལ་གནང་ཡོད་པ་རེད། རིང་མིན་འཚོགས་ལ་ཉེ་བའི་ཕྱི་ཟླ་དྲུག་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༡ པའི་སྐབས་རྒྱལ་སྤྱིའི་སྲིད་གཞུང་ཡོངས་ཀྱིས་རྒྱ་ནག་གི་འགྲོ་བ་མིའིཐོབ་ཐང་གི་གནས་སྟངས་དེ་རྒྱལ་སྤྱིའི་ནང་ཚད་དང་ལྡན་པ་བཟོ་དགོས་བའི་ཞུ་སྐུལ་གནང་ཡོད་པ་གསུངས་འདུག

ཨ་རིར་རྟེན་གཞི་བྱས་པའི་བོད་དོན་ལས་འགུལ་ཁང་གིས་དབུ་ཁྲིད་པའི་ཐོག་ཟླ་ ༣ ཚེས་ ༢༥ དང་ ༢༦ བཅས་ཉིན་གཉིས་ཀྱི་རིང་བོད་དོན་ཞུ་གཏུགས་ཀྱི་ལས་འགུལ་ཞིག་སྤེལ་ཡོད་པ་ལྟར། ལས་འགུལ་དེའི་ནང་ཨ་རིའི་མངའ་སྡེ་ ༢༤ ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་ ༡༥༠ ལྷག་འདུ་འཛོམས་བྱུང་བ་མ་ཟད་དྲྭ་ཐོག་ནས་འཛུལ་ཞུགས་གནང་མཁན་སྟོང་ཕྲག་ལྷག་བྱུང་འདུགཐེངས་འདིའི་ཞུ་གཏུགས་ཀྱི་ལས་འགུལ་དེའི་ཁྲོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་དང་འབྲེལ་ཡོད་ལས་བྱེད་བཅས་ལ་མཇའ་འཕྲད་ཞུས་ནས་གཙོ་བོ་དོན་ཚོན་གསུམ་ཅན་གྱི་དགོས་འདུན་ཞིག་ཆེད་བཏོན་ཐོག་ཨ་རིའི་གཞུང་ནས་བོད་དོན་ཐོག་རྒྱབ་སྐྱོར་མུ་མཐུད་ཡོང་བའི་ཞུ་སྐུལ་ནན་པོ་ཞུས་འདུག རེ་ཞུའི་དོན་ཚན་གསུམ་པོ་དེ་དག་ནི།  གྲོས་ཚོགས་འཐུས་མི་རྣམས་ནས་ཨ་རིའི་ཕྱི་འབྲེལ་གྱི་དྲུང་ཆེ་ Mike Pompeo མཆོག་གི་མཚན་ཐོག་ལ་རྒྱ་ནག་གི་དབང་འཛིན་གྱི་འོག་ཏུ་བོད་མི་རྣམས་ཀྱི་བདེ་རྩ་ལ་སེམས་ཁྲལ་ཡོད་པའི་ཞུ་ཡིག་ཅིག་ཕུལ་ནས་ན་ནིང་བོད་ནང་དུ་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་བ་དེ་དང་། དེ་བཞིན་ཕྱི་ལོ་ ༢༠༠༢ ལོར་གཏན་འབེབས་གནང་བའི་བོད་ཀྱི་སྲིད་བྱུས་ཀྱི་ཁྲིམས་གཞི་གཉིས་ཕྱག་བསྟར་དོ་ནན་གནང་དགོས་བའི་འབོད་སྐུལ་ཞུ་དགོས་པ་དང་། བོད་ནང་གི་བསམ་བློའི་རང་དབང་དང་ཆོས་ལུགས་དད་མོས་ཀྱི་རང་དབང་ལ་གཙིགས་འཛིན་གྱིས་བོད་ཀྱི་ཆབ་སྲིད་བཙོན་པ་དག་ལ་རྒྱབ་སྐྱོར་གནང་རྒྱུ། ཨ་རིའི་སྲིད་གཞུང་གི་ངོས་ནས་བོད་དོན་རྒྱབ་སྐྱོར་མཇུག་སྐྱོང་གིས་བོད་ཀྱི་གནད་དོན་དང་འབྲེལ་བའི་བྱ་གཞག་གི་ཆེད་དུ་རོགས་དངུལ་གནང་སྐྱོང་ཡོང་བའི་རེ་སྐུལ་བཅས་དོན་ཚན་གསུམ་གྱི་ཞུ་སྐུལ་གནང་འདུགལས་འགུལ་ནང་མཉམ་ཞུགས་གནང་མཁན་རྣམས་ཀྱིས་འགྲེལ་བརྗོད་གནང་བར་གཞིགས་ན་ཨ་རིའི་གྲོས་ཚོགས་ཀྱི་འཐུས་མི་དང་། འབྲེལ་ཡོད་ལས་བྱེད་བཅས་ཀྱིས་གདན་དོན་དེ་དག་ལ་ངོས་ལེན་ཡོད་པའི་རྣམ་འགྱུར་ཡག་པོ་བསྟན་པ་མ་ཟད་མ་འོངས་པར་ཡང་མུ་མཐུད་མཇུག་སྐྱོང་གནང་ངེས་ཡིན་པའི་བརྡ་ལན་གནང་ཡོད་པ་བཀོད་འདུགརྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་འདི་ལོའི་ཞུ་གཏུགས་ཀྱི་ལས་འགུལ་ནང་མཉམ་ཞུགས་གནང་མཁན་དེ་སྔ་ལས་མང་བ་བྱུང་ཡོད་པ་དང་དེའི་རྒྱུ་མཚན་གཙོ་བོ་ནི། ཨ་རིའི་ངོས་ནས་ལོ་ངོ་བཅོ་ལྔའི་རྗེས་སུ་ཉེ་ལམ་བོད་དོན་རྒྱབ་སྐྱོར་གྱི་ཁྲིམས་གཞི་གཏན་འབེབས་གནང་ཡོད་རྐྱེན་ཡིན་སྐོར་གསུངས་འདུག ཁོང་གིས་ད་དུང་བོད་དོན་ཞུ་གཏུགས་པ་རྣམས་ཕྱི་ཚེས་ ༢༥ ཉིན་ཨ་རིའི་རྒྱལ་སར་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་དུ་འདུ་འཛོམས་བྱུང་སྐབས་ཨ་རིའི་སྲིད་གཞུང་གི་ངོས་ནས་བོད་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་བྱུང་བའི་ཆ་ཤས་འོག་ཚེས་ ༢༥ ཉིན་དམིགས་བསལ་སྙན་ཐོ་འདོན་སྤེལ་གནང་ཡོད་པ་སྙན་གསེང་ཞུས་པ་མ་ཟད། སྙན་ཐོ་དེ་ནི་ཁྲིམས་གཞི་གཏན་འབེབས་བྱུང་བ་ནས་དོན་དམ་གྱིས་ཕྱག་བསྟར་གནང་ཕྱོགས་ཀྱི་གོམ་པ་དང་པོ་སྤོས་པ་ཞིག་རེད་ཅེས་གསུངས་འདུག ཁོང་གིས་འདས་པའི་ཟླ་ཤས་ཀྱི་ནང་དུ་བོད་དོན་རྒྱབ་སྐྱོར་གྱི་ཚ་རླབས་གསར་པ་ཞིག་འཕྱུར་བཞིན་པ་འགྲེལ་བརྗོད་གནང་དེ་འདི་ལོའི་བོད་དོན་ཞུ་གཏུགས་ཉིན་མོར་ཨ་རིའི་མངའ་སྡེ་སོ་སོ་ནས་ མཉམ་ཞུགས་ཧ་ཅང་མང་པོ་གནང་བར་བཀའ་དྲིན་རྗེས་དྲན་ཞུས་པ་དང་སྦྲགས། བོད་དོན་ཞུ་གཏུགས་འདི་ལྟ་བུ་བརྒྱུད་ནས་ཨ་རིའི་ནང་དུ་བོད་དོན་རྒྱབ་སྐྱོར་ཤུགས་ཆེར་འཕེལ་བཞིན་པར་བརྟེན་ ༢༠༡༩ ནང་སྔར་ལས་ལྷག་པའི་ལས་དོན་བསྒྲུབ་ཐུབ་པར་རམ་འདེགས་གནང་དགོས་བའི་རེ་སྐུལ་གནང་འདུག

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་མཐའ་མའི་ཐོག་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གི་གྲོས་ཚོགས་མཇུག་བསྡུམ་གྱི་གསུང་བཤད་གནང་བའི་ཁྲོད། གྲོས་ཚོགས་ཀྱི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་བཞིན་ངོ་ཡོད་བོད་མི་སྤྱི་འཐུས་ ༤༣ ལས་སྤྱི་འཐུས་ ༢༡ གིས་རྒྱབ་སྐྱོར་གནང་བའི་ཐོག་བཀའ་བློན་དུ་བདམས་ཐོན་བྱུང་ཡོད་ཀྱང་། ཆེས་མཐོའི་ཁྲིམས་ཞིབ་ཁང་གིས་བཙན་བྱོལ་བོད་མིའི་བཅའ་ཁྲིམས་ནང་གསལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༨༦ ནང་གསལ་ལྟར། ངོ་ཡོད་སྤྱི་འཐུས་ཀྱི་རྒྱ་ཆ་ ༥༠ ལོན་མེད་པའི་རྒྱུ་མཚན་དང་འབྲེལ་ཏེ་བདམས་ཐོན་བཀའ་བློན་སྟོབས་རྒྱལ་ཚེ་རིང་ལགས་བཀའ་བློན་དུ་ངོས་བཞེས་གནང་མེད་པའི་གནས་སྟངས་འོག་ལུས་ཡོད་པ་གསུངས་སོང་།  གཞི་རྩའི་སྐབས་དེའི་བཀའ་བློན་འོས་འདེམས་སྐབས་སུ་ངོ་ཡོད་སྤྱི་འཐུས་ ༤༣ ཡོད་པ་ལས་དགོས་ངེས་འོས་གྲངས་ ༢༡༌༥ ཡོད་ཀྱང་། བཀའ་བློན་འོས་མི་སྟོབས་རྒྱལ་ཚེ་རིང་ལགས་འོས་གྲངས་ ༢༡ ཐོབ་པས་བཀའ་བློན་དུ་བདམས་ཐོན་བྱུང་མཚམས་སུ་བཅའ་ཁྲིམས་དགོངས་དོན་ལྟར་ཁོང་ལ་ངོ་ཡོད་སྤྱི་འཐུས་ ༥༠ ཡི་རྒྱབ་སྐྱོར་ཐོབ་ཀྱི་ཡོད་མེད་ཐོག་གླེང་གཞི་ཞིག་བྱུང་ཡོད་པ་མ་ཟད། སྐབས་དེར་ཆེས་མཐོའི་ཁྲིམས་ཞིབ་ཁང་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་མཚན་ཐོག་ལ་འདྲི་རྩད་ཞིག་ཀྱང་གནང་ཡོད་པ་རེད།དེ་རིང་ཚོགས་གཙོ་མཆོག་གིས་མཇུག་བསྡོམ་གྱི་གསུང་བཤད་སྐབས་ཐེངས་འདིའི་གྲོས་ཚོགས་ཚོགས་དུས་བདུན་པའི་ཐོག་གཞུང་འབྲེལ་མྱ་ངན་དུས་འདུད་དང་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གཏན་འབེབས་དང་། ལྷག་པར་དུ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ཕྱི་ལོ་ ༡༠༡༩ དང་ ༢༠༢༠ ལོའི་སྔོན་རྩིས་གཏན་འབེབས་སོགས་ལས་དོན་རྣམས་གང་ལེགས་བྱུང་བར་བསྔགས་བརྗོད་དང་སྦྲགས། ཚོགས་དུས་འདིའི་ཐོག་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་སྙན་ཐོའི་ནང་བོད་ཁྱིམ་གྱི་ཁྱབ་ཁོངས་ཏཱ་ལའི་བླ་མའི་མཐོ་སློབ་ཁང་གི་ཨར་ལས་ལས་གཞི་དང་འབྲེལ་བའི་གནད་དོན་ཐོག་གྲོས་ཚོགས་ནས་ཞིབ་འཇུག་ཚོགས་ཆུང་ཞིག་ཆེད་འཛུགས་གནང་དགོས་པའི་རྒྱབ་གཉེར་ཞུས་པ་དང་། དེའང་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་དང་འབྲེལ་བ་ཡོད་སྟབས་གལ་སྲིད་ལས་རྙོད་དེ་རིགས་རྐྱེན་པས་༸གོང་ས་མཆོག་ལ་མཚན་ཤས་བཟོ་ཚེ་ང་ཚོ་སུས་ཀྱང་འགན་བཟོད་ཐབས་མེད་པར་བརྟེན་རྩིས་ཀྱི་སྐྱོན་གནད་སེལ་ཆེད་དུ་རྒྱབ་གཉེར་ཞུས་ཡོད་པ་ལྟར་སྤྱི་འཐུས་རྒྱུན་ལས་ནང་གྲོས་བསྡུར་གནང་རྒྱུ་ཡིན་པ་སོགས་གསུངས་ཡོད།གཞི་རྩའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་འདི་བཞིན་ཟླ་བ་འདིའི་ཕྱི་ཚེས་ ༡༩ ནས་དེ་རིང་ཚེས་ ༢༩ བར་ཚོགས་ཡོད་པ་དང་། ཚོགས་དུས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༩༌༢༠ ལོའི་དགོས་དངུལ་སྔོན་རྩིས་སྒོར་ས་ཡ་ ༢༥༠༥,༦༦༣,༧༩༨ བཀའ་འཁྲོལ་གཏན་འབེབས་དང་སྦྲགས། ཚོགས་གཙོ་མཆོག་ནས་ལས་ཉིན་དེ་དག་རིང་སྤྱི་འཐུས་རྣམ་པས་རྒྱ་ཆེ་མང་ཚོགས་ལ་ཐུགས་མ་ཕམ་པ་ཞིག་གནང་ཡོད་པའི་ཐུགས་ཚོར་ཆེན་པོ་བྱུང་ཞེས་གསུངས་སོང་།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་མཐའ་མའི་ཐོག་སྲིད་སྐྱོང་མཆོག་གིས་ལྔ་དང་ལྔ་བཅུའི་འཆར་སྣང་ལྷན་ཚོགས་རིམ་པ་གསུམ་བསྐོང་ཚོགས་གནང་བའི་གྲུབ་དོན་ཐོག་བཀའ་འདྲི་མང་དག་ཅིག་ཕེབས་དོན་ལྟར་གསལ་བཤད་ལན་འདེབས་གནང་བར་བཀའ་ཤག་སྐབས་ ༡༤ པའི་ངོས་ནས་བོད་རྒྱའི་དཀའ་རྙོག་སེལ་རྒྱུ་དང་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་རྒྱུ་ཡིན་ཞེས་གསུངས་ཡོད་པ་བཞིན་ད་ལྟའི་བཀའ་ཤག་ལའང་གདེང་སྤོབས་ཆེན་པོ་ཡོད་ཅེས་གསུངས་སོང་།དེ་རིང་སྔ་དྲོ་དྲི་བ་དྲིས་ལན་གྱི་དུས་ཚོད་མེད་པའི་ཐོག་ནས་གྲོས་ཚོགས་དབུ་འཛུགས་གནང་བ་དང་འབྲེལ། ཁྲིམས་བཟོའི་ལས་དོན་ཁག་གཅིག་གཏན་འབེབས་ཀྱི་ལས་རིམ་གྲུབ་རྗེས་སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་གི་ལྔ་དང་ལྔ་བཅུའི་འཆར་སྣང་ཐོག་བགྲོ་གླེང་དང་བཀའ་འདྲི་གནང་ཁག་ཐོག་ལེན་འདེབས་གསལ་བཤད་གནང་བར་རིང་མིན་ཕྱི་ཟླ་ ༥ པའི་ནང་བོད་རྒྱ་འབྲེལ་མོལ་གྱི་ལས་དོན་ཚོགས་ཆུང་གི་ཚོགས་འདུ་ཞིག་འཚོགས་གཏན་ཁེལ་ཡོད་པ་དང་། བོད་རྒྱ་འབྲེལ་མོལ་བསྐྱར་གསོ་གནང་མ་ཐུབ་པའི་རྒྱུ་རྐྱེན་གཙོ་བོ་དེ་རྒྱ་ནག་ལ་ཐུག་ཡོད་པ་ལས་བཀའ་ཤག་གི་ངོས་ནས་དུས་རྟག་ཏུ་གྲ་སྒྲིག་ཡོད་ཅེས་བསྐྱར་ནན་གསུངས་ཡོད་པ་རེད། དེ་སྔ་སྲིད་སྐྱོང་མཆོག་གིས་ཕྱི་ལོ་ ༢༠༡༠ ལོར་སྐབས་དེའི་བཀའ་བློན་ཁྲི་པའི་འོས་མིར་བཞེང་སྐབས་བོད་རྒྱའི་དཀའ་རྙོག་སེལ་རྒྱུ་དང་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་སྐོར་གསུངས་ཡོད་པའི་ཐོག་ད་རེས་གྲོས་ཚོགས་སུ་སླར་ཡང་དྲི་བ་ཕེབས་དོན་ལྟར་སྲིད་སྐྱོང་གི་ངོས་ནས་བོད་ནང་གི་བོད་མིའི་མངོན་འདོད་གསལ་པོ་རྟོགས་ཀྱི་ཡོད་པ་དང་། བོད་མི་རང་ལུས་མེར་བསྲེགས་གནང་མཁན་རྣམས་ཀྱི་འབོད་སྒྲ་ལས་མངོན་གསལ་བྱུང་ཡོད་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུའི་ཐད་དུས་ད་ལྟའང་སྔར་བཞིན་གདེང་སྤོབས་ཆེན་པོ་ཡོད་པ་གསུངས་ཡོད།སྲིད་སྐྱོང་མཆོག་གིས་༸གོང་ས་མཆོག་གི་བཀའ་དགོངས་གཞིར་བཟུང་བརྒྱ་ཆ་བརྒྱ་ཐམ་པ་བསྒྲུབས་ཡོད་པར་གདེང་སྤོབས་ཆེན་པོའི་ཐོག་ནས་ཞུ་ཐུབ་ཀྱི་ཡོད་ཅེས་གསུངས་པ་དང་འབྲེལ། ཆིག་སྒྲིལ་དང་འབྲེལ་བའི་དྲི་བར་བོད་མི་མང་ཚོགས་ཁྲོད་ལ་ཆིག་སྒྲིལ་གྱི་གནས་བབས་ཧ་ལས་པའི་ཚད་མཐོ་པོ་ཡོད་སྐོར་གསུངས་པ་དང་ཆབས་ཅིག སྲིད་སྐྱོང་རང་ཉིད་ཀྱིས་ ༢༠༡༡ དང་ ༢༠༡༦ གི་འོས་བསྡུའི་ཉམས་མྱོང་ལ་གཞིགས་ཏེ་ ༢༠༡༦ ལོའི་འོས་བསྡུའི་རྗེས་སུ་བསླབ་བྱ་བླང་རྒྱུ་གལ་ཆེ་ཤོས་གཅིག་གཟིགས་པ་ནི་འོས་བསྡུའི་རྒྱལ་ཕམ་གྱི་གྲུབ་འབྲས་སོན་པའི་རྗེས་སུ་རྒྱལ་ཁ་སོན་པར་ཡི་རང་དང་ཕམ་མཁན་ཕམ་པ་ལྟར་བཞུགས་དགོས་གལ་ཡིན་པ་གསུངས་སོང་བ་མ་ཟད། དེ་ལྟར་གནང་ཐུབ་པའི་རེ་བ་གནང་བཞིན་ཡོད་པ་གསུངས་ཡོད།རྩ་བའི་ཐེངས་འདིའི་གྲོས་ཚོགས་ཀྱི་ལས་ཉིན་དང་པོར་བོད་ནང་གི་ཛ་དྲག་གི་གནས་བབས་དང་འབྲེལ་གཞུང་འབྲེལ་གྲོས་ཆོས་གྲོས་ཆར་ཞིག་གཏན་འབེབས་གནང་བའི་ནང་དགྲ་བོ་རྒྱ་ནག་ཞེས་ཚིག་བཀོད་སྟངས་ཐོག་སྤྱི་འཐུན་ཕན་ཚུན་དབར་བགྲོ་གླེང་ཤུགས་ཆེན་པོ་གནང་སྐོར་དང་འབྲེལ། སྲིད་སྐྱོང་མཆོག་གིས་དེ་རིང་གྲོས་ཚོགས་སུ་༸གོང་ས་མཆོག་གིས་དེ་སྔ་ཕྱི་ལོ་ ༡༩༩༡ ལོའི་ཕྱི་ཟླ་ ༡༠ པའི་ནང་ཨ་རིའི་ Yale གཙུག་ལག་སློབ་གཉེར་ཁང་དུ་ embracing the enemy ཞེས་དགྲ་བོ་གདུལ་བའམ་ཐག་ཉེར་གཏང་དགོས་པའི་བཀའ་སློབ་བསྩལ་ཡོད་པ་ཞིག་ལུང་འདྲེན་དང་འབྲེལ་ཏེ་༸གོང་ས་མཆོག་དང་དབུ་མའི་ལམ་ལ་རྒྱབ་སྐྱོར་ཐོབ་པའི་རྒྱུ་མཚན་གལ་ཆེ་ཤོས་གཅིག་ནི་ང་ཚོའི་དགྲ་བོ་ལ་བྱམས་དང་སྙིང་རྗེ། དེ་བཞིན་གཉིས་སྨན་གྱི་ཐོག་ནས་ངོས་འཛིན་གནང་ཕྱོགས་དེ་ཡིན་པ་ལྟར་ཚིག་དེས་བོད་མིའི་དབུ་མའི་ལམ་གྱི་སྲིད་བྱུས་དེ་རླབས་ཆེན་ཇི་ཙམ་ཡིན་པ་མངོན་གསལ་གནང་གི་ཡོད་པ་གསུངས་སོང་།དེ་བཞིན་སྲིད་སྐྱོང་མཆོག་གིས་ཁ་སང་བགྲོ་གླེང་ཁྲོད་ཀྱི་དྲི་བ་རིམ་པར་གསལ་བཤད་གནང་བ་ལས་རྒྱལ་སྤྱིའི་ངོས་ནས་བོད་མིའི་གཉིས་སྨན་དབུ་མའི་ལམ་གྱི་འཐབ་རྩོད་ལ་རྒྱབ་སྐྱོར་གནང་མཁན་མང་དུ་ཕྱིན་ཡོད་པ་དང། ད་ལྟའི་ཨ་རིའི་སྲིད་འཛིན་ Trump མཆོག་གི་ངོས་ནས་༸གོང་ས་མཆོག་དང་མཇལ་འཕྲད་དང་དབུ་མའི་ལམ་ལ་རྒྱབ་སྐྱོར་ཡོད་པ་སོགས་ཞལ་ནས་གསུངས་མེད་ཀྱང། ཁོང་གི་ལས་ཡུན་དབུ་འཛུགས་གནང་བ་ནས་བཟུང་ད་བར་བོད་ནང་འདྲ་མཉམ་འགྲུལ་སྐྱོད་ཀྱི་རང་དབང་ཁྲིམས་འཆར་དང། Asia Reassurance Act ཞེས་ཨེ་ཤ་ཡ་ཡོངས་ལ་ཨ་རིའི་གཞུང་གི་སྲིད་བྱུས་དང་འབྲེལ་བའི་གལ་ཆེའི་ཁྲིམས་འཆར་གཉིས་ལ་མཚན་རྟགས་བསྐྱོན་ཡོད་པ་དང། རོགས་དངུལ་མང་དུ་བཏང་བ། དེ་བཞིན་ཨ་རིའི་སྲིད་འཛིན་གཞོན་པ་དང་ཕྱི་སྲིད་བློན་ཆེན། ཕོ་བྲང་དཀར་པོ་དང་ཕྱི་སྲིད་ལས་ཁུངས་ཀྱི་ལས་བྱེད་བཅས་སྤྱི་ཡོངས་ནས་བོད་མིའི་སྒྲིག་འཛུགས་ལ་ཁས་ལེན་གནང་རྒྱུ་དང་། བོད་དོན་ཐོག་དེ་སྔའི་སྲིད་བྱུས་ལ་འགྱུར་བ་གང་ཡང་མེད་པར་བོད་དོན་རྒྱབ་སྐྱོར་གནང་བཞིན་ཡོད་པ་གསལ་པོ་མངོན་རྒྱུ་ཡོད་སྐོར་སོགས་གསུངས་སོང་།དེ་མཚུངས་ནང་སྲིད་ཐད་ ༢༠༡༤ ལོར་རྒྱ་གར་གཞུང་གི་གཏན་འབེབས་གནང་བའི་ Tibetan Rehabilitation Act ཞེས་པའི་རྒྱ་གར་གཞུང་གི་སྲིད་བྱུས་ལག་བསྟར་ཡིན་ནའང་རེད། དཔལ་འབྱོར་ཐད་བོད་མིའི་སྒྲིག་འཛུགས་ཀྱི་བང་མཛོད་ཐོག་སྒོར་ས་ཡ་ ༡༠༠༠ གསོག་སྒྲུབ་ཞུས་པ་མ་ཟད། མང་ཚོགས་ལ་མ་དངུལ་བུན་གཡར་བཅས་ཀྱི་ལས་གཞི་རིམ་པ་བརྒྱུད་བོད་མིའི་སྤྱི་ཚོགས་དེ་རང་ཁ་རང་གསོའི་གནས་སུ་གོམ་སྐྱོད་བྱེད་བཞིན་ཡོད་སྐོར་གསུང་པ་མ་ཟད། བོད་མི་ཆབ་སྲིད་བཙོན་ཟུར་ཐོག་དོ་སྣང་ཆེ་ཙམ་གནང་དགོས་པར་ངོས་ལེན་གནང་བ་བཞིན་ཕྱག་ལས་གནང་མུས་ཡིན་པ་དང། Australia ནང་དུ་བོད་ནས་ཕེབས་མཁན་འམ་ཡང་ན་ཉམ་ཐག་སོགས་སུ་གཏང་དགོས་མིན་ཐད་དགོངས་འཆར་ཕུལ་དོན་བཞིན་བཅའ་ཁྲིམས་ཀྱི་སྒྲོམ་གཞི་འོག་ནས་འཆར་གཞི་དེའི་ཐོག་དགོངས་པ་ཟབ་ནན་བཞེས་བཞིན་ཡོད་པ་སོགས་གསལ་བཤད་གནང་བ་དང་འབྲེལ། སྤྱི་འཐུས་ལྷན་ཚོགས་ནས་བཀའ་ཤག་གི་གསལ་བཤད་གནང་བའི་དོན་གནད་རྣམས་སྤྱི་འཐུས་ལྷན་ཚོགས་ཀྱི་བློ་ངེས་བྱུང་བའི་གྲོས་ཆོད་ཡང་འཇོག་གནང་ཡོད།