༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་གཏན་ཁེལ་འདུགདཔལ་ལྡན་རྒྱུད་གྲྭ་སྨད་སྟོད་གཉིས་ནས་ཇི་ལྟར་གསོལ་འདེབས་ཞུས་དོན་ལྟར་མགོན་པོ་༸གང་ཉིད་མཆོག་ནས་བཀའ་བཞེས་བཟང་པོ་སྨིན་སྩལ་གྱིས་འདི་ལོའི་ཟླ་ ༧ ཚེས་ ༨ ནས་ ༡༠ བཅས་ཉིན་གྲངས་གསུམ་རིང་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་ཡིན་པ་དང་། ཚེས་ ༨ ཉིན་གྱི་སྔ་དྲོར་སྔོན་འགྲོའི་སྟ་གོན་གྱི་རིམ་པ་དང་ཚེས་ ༩ དང་ ༡༠ བཅས་གཉིས་རིང་དངོས་གཞིའི་བཀའ་དབང་སྩལ་རྒྱུ་རེད་འདུག གཞི་རྩའི་འཛམ་གླིང་གི་ཡུལ་གྲུ་ཕལ་མོ་ཆེར་ད་ཆ་ཏོག་དབྱིབས་གཉན་རིམས་ཀྱི་གནས་སྟངས་ཕྲན་བུ་ཇེ་བཟང་དུ་ཕྱིན་པར་བརྟེན་མགོན་པོ་༸གང་ཉིད་མཆོག་གི་མཛད་འཆར་རྣམས་ཀྱང་རིམ་བཞིན་སྔར་ལྟར་བསྐྱང་གནང་མཛད་རྒྱུ་དབུ་འཛུགས་གནང་ཡོད་པ་རེད། ༸གོང་ས་མཆོག་གི་མཛད་འཆར་ལ་གཞིགས་ན།  རིང་མིན་ཟླ་བ་འདིའི་ཕྱི་ཚེས་ ༢༥ ཉིན་༸དཔལ་ས་སྐྱའི་ཆོས་བརྒྱུད་འཛིན་པ་ཡོངས་ནས་ཐེག་ཆེན་ཆོས་གླིང་གཙུག་ལག་ཁང་དུ་མགོན་པོ་༸གང་ཉིད་མཆོག་༸སྐུ་ཚེ་མི་འཇིག་རྡོ་རྗེ་འཆང་གི་ངོ་བོར་བརྟན་ཕྱིར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་གཏན་ཁེལ་བ་དང་། དེ་བཞིན་ཟླ་ ༦ ཚེས་ ༡དང་ ༢ བཅས་ཉིན་གྲངས་གཉིས་རིང་༸གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་གསུང་ཆོས་བཀའ་དྲིན་སྩལ་རྒྱུ་རེད་འདུག དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་འཁོད་པའི་གནས་ཚུལ་ནང་གསལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙུག་ལག་སློབ་དཔོན་ Lia Diskin ལགས་ཀྱི་སྤྱི་ཚོགས་ཞབས་ཞུའི་ལས་དོན་ལ་ཆེ་བསྟོད་ཀྱིས་རྒྱ་གར་གྱི་མི་སེར་གྱི་གཟེངས་རྟགས་མཐོ་ཤོས་བཞི་པ་པདྨ་ཤྲི་གཟེངས་རྟགས་ཐོབ་པར་འཚམས་འདྲི་མཛད་འདུག རྩ་བའི་གཙུག་ལག་སློབ་དཔོན་ Lia Diskin ལགས་སུ་ Padma Shri གཟེངས་རྟགས་དེ་བཞིན་ཕྱི་ལོ་ ༢༠༢༠ འི་ཟླ་བ་ ༡ པོའི་ནང་འབུལ་འདུག་ཀྱང་ཁོ་མོའི་ཕྱག་ཏུ་གཟེངས་རྟགས་དེ་ཉིད་ཁས་ས་ཕྱི་ཚེས་ ༦ ཉིན་ São Paulo གྲོང་ཁྱེར་ནང་རྟེན་གཞི་བྱས་པའི་ Swami Vivekananda Cultural Center ཞེས་རིག་གཞུང་བསྟི་གནས་ཁང་དུ་མཛད་སྒོ་ཞིག་ཚོགས་པའི་ཐོག་འབུལ་བཞེས་གནང་འདུག   སྐབས་དེའི་མཛད་སྒོར་ལྷོ་ཨ་རིའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་དང་བོད་ཁང་གི་འགན་འཛིན་ལྷན་ཚོགས་ཀྱི་ཚོགས་མི་རྣམས་ཀྱང་མགྲོན་འབོད་གནང་འདུག གཙུག་ལག་སློབ་དཔོན་ Lia Diskin ལགས་ནི་རྩོམ་པ་པོ་ཞིག་དང་བྷ་ར་ཛིལ་བོད་ཁང་གི་འགན་འཛིན་ལྷན་ཚོགས་ཀྱི་ཚོགས་མི་ཡིན་པ་མ་ཟད་བྷ་ར་ཛིལ་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་མཛད་སྐབས་འབྲེལ་མཐུད་གནང་མཁན་ཞིག་ཀྱང་ཆགས་ཀྱི་འདུག  ཁོང་གི་སྤྱི་ཚོགས་ཞབས་ཞུའི་ལས་དོན་ལ་ཆེ་བསྟོད་ཀྱིས་འཛམ་གླིང་གི་ཚོགས་སྡེ་ཁག་ནས་གཟེངས་རྟགས་མང་པོ་ཕུལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ཤར་ཊི་མོར་གྱི་དབུ་ཁྲིད་སྐུ་ཞབས་ Jose Ramos Horta མཆོག་ཡུལ་དེའི་སྲིད་འཛིན་དུ་འོས་འདེམས་བྱུང་བར་དགའ་བསུའི་འཚམས་འཕྲིན་སྩལ་འདུགའདི་ལོའི་ཕྱི་ཟླ་ ༣ དང་ ༤ པའི་ལྷོ་ཤར་ཨེ་ཤ་ཡའི་མངའ་ཁུལ་དུ་ཡོད་པའི་ East  Timor རྒྱལ་ཁབ་ཀྱི་རྒྱལ་ཡོངས་འོས་བསྡུ་ཆེན་མོའི་ཁྲོད་ཡུལ་དེའི་ Fretilin ཚོགས་པའི་སྲིད་འཛིན་འོས་མི་ Francisco Guterres ལགས་ལ་འོས་གྲངས་བརྒྱ་ཆ་ ༣༧ དང་ དེ་བཞིན་ CNRT ཚོགས་པའི་སྲིད་འཛིན་འོས་མི་ Jose Ramos Horta ལགས་སུ་འོས་གྲངས་བརྒྱ་ཆ་ ༦༢ ཀྱི་ཐོག་ནས་མང་མོས་རྒྱལ་ཁ་ཐོབ་སྟེ་སླར་ཡང་སྲིད་འཛིན་དུ་བདམས་ཐོན་བྱུང་ཡོད་པ་རེད།༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཤར་ཊི་མོར་རྒྱལ་ཁབ་ཀྱི་སྲིད་འཛིན་ཟུར་པ་དང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ Jose Ramos Horta མཆོག་ལ་སྲིད་འཛིན་གྱི་འོས་བསྡུ་ཁྲོད་སླར་རྒྱལ་ཁ་ཐོབ་པར་བསྔགས་བརྗོད་མཛད་པ་དང་སྦྲགས་ཏེ་འཚམས་འདིའི་གསུང་འཕྲིན་ཞིག་སྩལ་བའི་ནང་། རྒྱལ་སྤྱིའི་ནོ་སྦེལ་ཞི་བདེ་གཟེངས་རྟགས་ཐོབ་མཁན་ཤར་ཊི་མོར་གྱི་དབུ་ཁྲིད་སྐུ་ཞབས་ Jose Ramos Horta མཆོག་དེ་སྔ་ ༡༩༩༠ ལོ་མགོར་བཞུགས་སྒར་དྷརྨ་སཱ་ལཱར་གཟིགས་སྐོར་དབུ་འཛུགས་གནང་བ་ནས་བཟུང་ལོ་མང་རིང་མགོན་པོ་༸གང་ཉིད་མཆོག་དང་ཐུགས་འདྲིས་ཟབ་མོ་ཡོད་པ་དང་། ཉེ་ཆར་སྐུ་ཞབས་ཁོང་སླར་ཤར་ཊི་མོར་གྱི་སྲིད་འཛིན་དུ་འོས་འདེམས་བྱུང་ནས་གལ་ཆེའི་ཐུགས་འགན་བཞེས་གནང་ཡོད་པ་དེས་ཁོང་གི་དབུ་ཁྲིད་འོག་ཤར་ཊི་མོར་གྱི་མི་མང་ཚོར་མ་འོངས་པར་མུ་མཐུད་ཞི་བདེ་དང་དཔལ་འབྱོར་དང་ཤེས་ཡོན་ཕུན་སུམ་ཚོགས་པའི་འཚོ་བ་ལོངས་སུ་སྤྱོད་ཐུབ་པ་དང་དེ་བཞིན་སྤྱི་ཚོགས་ནང་གི་དབྱུལ་ཕོངས་ཉམ་ཐག་རྣམས་ཀྱི་འཚོ་བ་གོང་འཕེལ་གཏོང་ཐུབ་རྒྱུར་གཟིགས་སྐྱོང་གནང་བའི་ཐུགས་རེ་ཡོད་པའི་ལམ་སྟོན་མཛད་འདུགམགོན་པོ་༸གང་ཉིད་མཆོག་གིས་སྐུ་ཞབས་ Jose Ramos Horta མཆོག་སྲིད་འཛིན་གནང་རིང་ལ་བྱ་གཞག་མཐའ་དག་ལམ་ལྷོང་ཡོང་བ་དང་ལྷག་དོན་ཤར་ཊི་མོར་གྱི་མི་མང་ཚོའི་ཐུགས་རེ་དང་མངོན་འདོད་གྲུབ་ཆེད་སླད་མར་གདོང་ལེན་བྱ་དགོས་རིགས་ལ་གདོང་ལེན་བྱ་ཐུབ་པའི་ཐུགས་སྨོན་ཡོད་ཅེས་བཀའ་སྩལ་འདུག རྩ་བའི་སྐུ་ཞབས་ Jose Ramos Horta ལགས་ཕྱི་ལོ་ ༡༩༤༩ ལོར་འཁྲུངས་ཤིང་ད་བར་ཤར་ཊི་མོར་གྱི་ཕྱི་སྲིད་བློན་ཆེན་དང་སྲིད་བློན། སྲིད་འཛིན་སོགས་གནང་མྱོང་ཡོད་པ་མ་ཟད་དེ་སྔ་ ༡༩༩༦ ལོར་སྐུ་ཞབས་ཁོང་ལ་རྒྱལ་སྤྱིའི་ནོ་སྦེལ་ཞི་བདེའི་གཟེངས་རྟགས་ཕུལ་ཡོད་པ་རེད།

དེ་རིང་སྔ་དྲོ་རྒྱ་གར་བྱང་ཤར་ཁུལ་གྱི་ཨ་རུ་ནཱ་ཅལ་མངའ་སྡེའི་མོན་ཡུལ་གྱི་ Preserve Culture Promote Dialect ཞེས་པའི་ཚོགས་པའི་འགན་འཛིན་བསྟན་འཛིན་འབྱོར་ལྡན་ལགས་དང་ཁོང་གི་ཕྱག་རོགས་བཅས་ནས་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་ཞུས་ཏེ། འདི་ལོའི་༸སྐུའི་འཁྲུངས་སྐར་དུས་ཆེན་གྱི་ཉིན་མོར་མོན་ཁུལ་དུ་གསར་རྒྱག་ཟིན་པའི་༸རྒྱལ་བའི་ཕོ་བྲང་དེ་ཉིད་དྲ་ཐོག་གམ་བརྙན་པར་བརྒྱུད་དབུ་འབྱེད་མཛད་གནང་ཡོང་བའི་ཇི་ལྟར་གསོལ་འདེབས་ཞུས་པ་ལྟར་མགོན་པོ་གང་༸ཉིད་མཆོག་གིས་བརྙན་པར་བརྒྱུད་སྐར་མ་བཙུ་ཙམ་གྱི་བཀའ་སློབ་བཀའ་དྲིན་ཆེ་བ་བསྩལ་རྒྱུའི་བཀའ་བཞེས་བཟང་པོ་ཐོབ་འདུགཁོང་རྣམ་པའི་མཇལ་ཁ་གྲུབ་མཚམས་སུ་མོན་ཡུལ་གྱི་ Preserve Culture Promote Dialect ཞེས་པའི་ཚོགས་པའི་འགན་འཛིན་བསྟན་འཛིན་འབྱོར་ལྡན་ལགས་ཀྱིས་དེ་སྔ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནས་རྒྱ་གར་དུ་བཙན་བྱོལ་ལ་ཆིབས་བསྒྱུར་སྐབས་རྟ་དབང་ཁུལ་དུ་བཞུགས་ཞག་མཛད་ཡོད་པ་དང་། ལྷག་པར་དུ་གནས་དེ་ནི་མགོན་པོ་༸གང་ཉིད་མཆོག་༸སྐུ་དངོས་༸ཞབས་སོར་འཁོད་དེ་བྱིན་གྱིས་བརླབས་པའི་གནས་ཤིག་ཡིན་སྟབས། ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་དབུས་པའི་གྲོས་ཚོགས་འཐུས་མི་རྣམ་པ་གཉིས་དང་ས་གནས་མི་མང་གི་ལམ་སྟོན་འོག་མོན་པ་རླུང་ལ་ཞེས་པའི་ས་ཁུལ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་དང་འགྲེམས་སྟོན་ཁང་ཞིག་གསར་བཞེངས་ལེགས་གྲུབ་ཡོད་པ་ལྟར། འདི་ལོའི་༸སྐུའི་འཁྲུངས་སྐར་དུས་ཆེན་གྱི་ཉིན་མོར་མོན་ཁུལ་དུ་གསར་རྒྱག་ཟིན་པའི་༸རྒྱལ་བའི་ཕོ་བྲང་དེ་ཉིད་དྲ་ཐོག་གམ་བརྙན་པར་བརྒྱུད་དབུ་འབྱེད་མཛད་གནང་ཡོང་བའི་ཇི་ལྟར་གསོལ་འདེབས་ཞུས་པ་ལྟར་མགོན་པོ་གང་༸ཉིད་མཆོག་གིས་བརྙན་པར་བརྒྱུད་སྐར་མ་བཙུ་ཙམ་གྱི་བཀའ་སློབ་བཀའ་དྲིན་ཆེ་བ་བསྩལ་རྒྱུའི་བཀའ་བཞེས་བཟང་པོ་ཐོབ་འདུགཁོང་རྣམ་པ་བཞུགས་སྒར་དུ་ཆེད་བཅར་ཞུས་དོན་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་ལམ་སྟོན་འོག་བོད་ཀྱི་དཔེ་མཛོད་ཁང་དུ་བཅར་ནས་དགེ་བཤེས་ལྷག་རྡོར་ལགས་དང་ཐུག་འཕྲད་ཀྱིས་འགྲེམས་སྟོན་ཁང་གསར་རྒྱག་དང་འབྲེལ་བའི་ལམ་སྟོན་ཁག་ཅིག་ཞུས་པ་དང་དེ་བཞིན་བོད་ཀྱི་འགྲེལམས་སྟོན་ཁང་དུ་ཆེད་དུ་བཅར་གྱིས་ལམ་སྟོན་ཡང་ཞུས་འདུགབསྟན་འཛིན་འབྱོར་ལྡན་ལགས་ཀྱིས་མོན་དང་བོད་རིགས་ཚོའི་ཆོས་རིག་དང་འཚོ་སྡོད་བྱེད་སྟངས་སོགས་ཕལ་ཆེ་བ་གཅིག་མཚུངས་ཆགས་ཀྱི་ཡོད་པ་དང་། ལྷག་པར་དུ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་དུས་ནས་དུས་སུ་ང་ཚོའི་ས་མཚམས་བོད་དང་ལྷན་དུ་ཡོད་པ་ལས་རྒྱ་ནག་དང་ལྷན་དུ་མེད་ཅེས་གསུངས་ཡོད་པ་ལྟར་ང་ཚོ་མོན་པ་རྣམས་༸གོང་ས་༸སྐྱབས་མགོན་ཆེན་པོ་མཆོག་གི་སློབ་མ་ངོ་མ་ཞིག་ཡིན་སྟབས་དུས་ནམ་ཡང་བོད་མིའི་རྩ་དོན་ལ་རྒྱབ་སྐྱོར་ཡོད་ཅེས་གསུངས་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕ་རན་སིའི་ད་ལྟའི་སྲིད་འཛིན་ལས་ཐོག་སྐུ་ཞབས་ Emmanuel Macron ལགས་སྲིད་འཛིན་གྱི་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་སྟེ་སླར་ཡང་ཡུལ་དེའི་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འདྲི་སྩལ་བ་དང་སྦྲགས། ད་བར་ཕ་རན་སིའི་གཞུང་མང་གཉིས་ནས་བོད་མི་ཚོ་ལ་རོགས་རམ་བསྟུད་མར་གནང་བཞིན་པ་དེ་ནི་བོད་མིའི་བསོད་ནམས་དང་ལས་དབང་བཟང་པོ་ཞིག་ལ་དགོངས་བཞིན་ཡོད་སྐོར་བཀའ་སྩལ་མཛད་འདུག ཕྱི་ཟླ་ ༤ ཚེས་ ༡༠ ནས་དབུ་འཛུགས་གནང་བའི་ཡོ་རོབ་ཕ་རན་སི་རྒྱལ་ཁབ་ཀྱི་སྲིད་འཛིན་གྱི་འོས་བསྡུ་ཆེན་མོའི་ལས་རིམ་འདི་ཁ་སང་ཕྱི་ཚེས་ ༢༤ ཉིན་དངོས་སུ་མཇུག་སྒྲིག་གནང་བ་དང་སྦྲགས་ཏེ། ད་ལྟའི་སྲིད་འཛིན་ལས་ཐོག་སྐུ་ཞབས་ Emmanue Macron ལགས་ལ་འོས་གྲངས་བརྒྱ་ཆ་ ༥༨་༥༥ ཐོབ་པའི་ཐོག་ནས་སླར་ཡར་ཡུལ་དེའི་སྲིད་འཛིན་དུ་བདམས་ཐོན་བྱུང་ཡོད་པ་ལྟར། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Emmanue Macron ལགས་ཀྱི་སྲིད་འཛིན་ལས་ཡུན་རིང་ནང་གདོན་ལེན་གནང་དགོས་པའི་གནད་དོན་ཐམས་བཅད་ལ་གདོང་ལེན་གནང་སྟེ་ཕ་རན་སི་མི་མང་གི་རེ་བ་དང་མངོན་འདོད་ཁག་ལམ་ལྷོང་ལྡན་པའི་ཐོག་ནས་བསྒྲུབ་ཐུབ་པ་མ་ཟད་འཛམ་གླིང་འདི་སྔར་ལྷག་ཞི་བདེ་དང་བདེ་སྐྱིད་ལྡན་པ་ཞིག་བཟོ་རྒྱུར་ཞབས་འདེགས་བསྒྲུབ་ཐུབ་པའི་སྨོན་འདུན་གྱི་མཚམས་སྦྱོར་དང་བཅས་འཚམས་འདྲི་མཛད་འདུགམགོན་པོ་༸གང་ཉིད་མཆོག་གིས་ད་བར་ཕ་རན་སི་རྒྱལ་ཁབ་ཀྱི་དབུ་ཁྲིད་རིམ་བྱོན་རྣམ་པ་དང་མི་མང་རྣམས་ནས་བོད་མི་ལ་མཛའ་འབྲེལ་གྱི་མཐུན་འགྱུར་རོགས་རམ་དང་། ལྷག་པར་དུ་བོད་ཀྱི་ཐུན་མོང་མ་ཡིན་པའི་ནང་པ་སངས་རྒྱས་པའི་ཆོས་དང་། འགྲོ་བ་སྤྱི་ལ་སྨན་པའི་ཞི་བདེ་དང་འཚེ་བ་མེད་པ། དེ་བཞིན་གཞན་ཕན་སོགས་ཀྱི་གཞི་རྩར་བཟུང་བའི་བོད་ཀྱི་རིག་གཞུང་ཁག་མི་ཉམས་རྒྱུན་འཛིན་དང་སྲུང་སྐྱོབ་གནང་རྒྱུའི་ཐོག་རོགས་རམ་གནང་དང་གནང་བཞིན་པ་དེ་ནི་བོད་མིའི་བསོད་ནམས་དང་ལས་དབང་བཟང་པོ་ཞིག་ལ་དགོངས་བཞིན་ཡོད་པར་བཀའ་སྩལ་བ་དང་ཆབས་ཅིག བོད་མི་ཡོངས་ཀྱི་ཚབ་ཞུས་ཏེ་ཕ་རན་སིའི་དབུ་ཁྲིད་རྣམ་པ་དང་མི་མང་བཅས་ལ་ཐུགས་རྗེ་ཆེ་ཞེས་བཀའ་སྩལ་འདུགརྩ་བའི་ཐེངས་འདིའི་ཕ་རན་སི་རྒྱལ་ཁབ་ཀྱི་སྲིད་འཛིན་གྱི་འོས་བསྡུ་ཆེན་མོའི་ནང་སྐུ་ཞབས་ Emmanue Macron ལགས་ལ་འོས་གྲངས་བརྒྱ་ཆ་ ༥༨་༥༥ ཁོང་གི་ཁ་གཏད་ལྕམ་སྐུ་ Marine Le Pen ལགས་ལ་འོས་གྲངས་བརྒྱ་ཆ་ ༤༡་༤༥ བཅས་ཐོབ་ཡོད་པ་ལྟར་སྐུ་ཞབས་ Emmanue Macron ལགས་སླར་ཡང་སྲིད་འཛིན་གྱི་རྒྱལ་ཁ་ཐོབ་པ་འདི་ནི་འདས་པའི་ལོ་ངོ་ ༢༠ ནང་ཕ་རན་སིའི་ལས་ཐོག་སྲིད་འཛིན་ཞིག་བསྐྱར་དུ་སྲིད་འཛིན་ལ་འོས་འདེམས་བྱུང་བ་ཐེངས་དང་པོ་ཆགས་ཀྱི་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གོ་ལོའི་ཉིན་མོ་དང་བསྟུན་རང་ཅག་ཐུན་མོང་གི་རྟེན་གཞིར་གྱུར་པའི་གོ་ལ་འདི་སྲུང་སྐྱོབ་སླད་རང་གཞན་ཀུན་གྱིས་ཕྱར་གྲུ་མཉམ་འདེགས་གནང་དགོས་པའི་ལམ་སྟོན་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ལོ་ ༢༠༢༢ ཕྱི་ཟླ་ ༤ ཕྱི་ཚེས་ ༢༢ ཉིན་སྩལ་བའི་ཡོངས་ཁྱབ་གསུང་འཕྲིན་ནང་། དེ་རིང་འཛམ་གླིང་གི་ཉིན་མོར་འགྲོ་བ་མི་ཙམ་མ་ཟད་ཐ་ན་སྲོག་ཆགས་འབུ་སྲིན་ཕྲ་མོ་མཚོན་པའི་སེམས་ཅན་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དེ་དྲན་སྐུལ་མཛད་པ་དང་སྦྲགས། ང་ཚོ་ཚང་མས་གོ་ལ་འདིའི་ཐོག་ཐུན་མོང་གི་འཚོ་གནས་ཆེད་དུ་འགན་ཁུར་བཞེས་དགོས་སྐོར་བཀའ་སྩལ་བ་དང་། ལྷག་དོན་འགྲོ་བ་མི་ཞིག་ཡིན་པའི་ཆ་ནས་ཁྱད་དུ་འཕགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལྡན་ཡོད་ཀྱང་ད་ལྟའི་འཛམ་གླིང་འདིའི་གནས་སྟངས་ལ་བལྟས་ཚེ་དེ་ལས་ལྷག་པ་ཞིག་གནང་དགོས་པ་ཆགས་ཡོད་སྟབས། མ་འོངས་པར་ཡོངས་སྒྲིལ་ཤེས་ཡོན་ཞེས་ནང་བསམ་བློ་ཡར་རྒྱས་ཀྱི་སྟེང་ནས་ཤེས་ཡོན་གྱི་ལམ་ལུགས་ཤིག་བསྐྲུན་དགོས་པ་ནི་མེད་དུ་མི་རུང་བའི་གནད་འགག་ཆགས་ཡོད་པའི་གཞེན་སྐུལ་གནང་འདུག དེ་བཞིན་མགོན་པོ་༸གང་ཉིད་མཆོག་གིས་འཛམ་གླིང་འདིའི་ཐོག་ང་ཚོ་ཚང་མ་ཕན་ཚུན་གཅིག་ལ་གཅིག་བརྟེན་གྱི་ཐོག་ནས་གནས་དགོས་སྟབས། གོ་ལའི་གནམ་གཤིས་འགྱུར་ལྡོག་གི་ངལ་བ་དེས་འཛམ་གླིང་སྤྱིར་ལྡོག་ཏུ་མེད་པའི་ཤུགས་རྐྱེན་ཐེབས་བཞིན་ཡོད་པའི་མཚམས་སུ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་འཛིན་སྟེ་གོ་ལའི་གནད་དོན་དེ་ཆེས་གནད་ཆེར་ངོས་འཛིན་གནང་དགོས་པའི་ལམ་སྟོན་སྩལ་བ་དང་ཆབས་ཅིག ད་ཆ་ང་ཚོས་ངེས་པར་དུ་འཛམ་གླིང་ནང་གི་ Fossil Fuels འམ་རྡོ་སྣུམ་དང་རྡོ་སོལ་སོགས་རང་བྱུང་གི་ཐོན་རྫས་སྤྱོད་བཞིན་པ་དེ་དག་ལ་བརྟེན་རྒྱུ་ཉུང་དུ་གཏོང་དགོས་པའི་ཛ་དྲག་གི་གོམ་པ་སྤོ་དགོས་པ་དང་། དེ་ལས་བསྐྱར་གསོ་བྱེད་རུང་བའི་ཐོན་ཁུངས་ཁག་ལ་མང་ཙམ་བརྟེན་དགོས་པ་མ་ཟད། ང་ཚོས་ཤིང་ནགས་རྩ་གཏོར་གཏོང་རྒྱུ་ལས་ལྗོན་ཤིང་འདེབས་འཛུགས་དང་ལྗོན་ཤིང་ལ་ལྟ་རྟོག་གི་ལས་གཞི་གང་མང་སྤེལ་ཏེ་ཁོར་ཡུག་སྲུང་སྐྱོབ་ཀྱི་གནང་སྒོར་ཐུགས་སྣང་གནང་དགོས་པའི་ལམ་སྟོན་བཀྲིན་ཆེ་བ་མཛད་འདུག དེ་བཞིན་གསུང་འཕྲིན་ནང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེ་ཧྲིལ་པོའི་ནང་བོད་དང་དེ་ནས་མགོན་པོ་༸གང་ཉིད་མཆོག་གི་བཞུགས་གནས་དྷརྨ་སཱ་ལཱར་གངས་འབབ་ཚད་ཉུང་དུ་འགྲོ་བཞིན་ཡོད་པ་དངོས་སུ་གཟིགས་མྱོང་ཡོད་སྐོར་བཀའ་སྩལ་བ་དང་འབྲེལ། རྒྱལ་སྤྱིའི་ཚན་རིག་པ་ཁག་ཅིག་གིས་མགོན་པོ་༸གང་ཉིད་མཆོག་ལ་མ་འོངས་པར་བོད་གཙོ་བོར་གྱུར་པའི་ས་ཆ་ཁག་གཅིག་རིམ་པས་བྱེ་ཐང་དུ་འགྱུར་རྒྱུའི་ཉེན་ཁ་ཡོད་སྐོར་སྙན་སེང་ཞུས་པ་ལུང་འདྲེན་མཛད་དེ། ༸གོང་ས་མཆོག་གིས་༸སྐུ་ཚེའི་ནང་གི་ཐུགས་བསྐྱེད་ཆེན་པོ་གཅིག་ནི་ཁོར་ཡིག་སྲུང་སྐྱོབ་མཛད་རྒྱུ་དེ་ཡིན་སྟབས། ༸གོང་ས་མཆོག་ས་གནས་གང་དུ་ཆིབས་བསྒྱུར་མཛད་ཀྱང་གས་ཆག་སླ་བའི་བོད་མཐོ་སྒང་གི་ཁོར་ཡུག་སྲུང་སྐྱོབ་སྐོར་ལ་བཀའ་སློབ་སྩལ་གྱི་ཡོད་པ་བཀའ་སྩལ་མཛད་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་གཞན་ཡང་ང་ཚོའི་མི་ཚེ་འདི་རེ་བར་གཞི་བཅོལ་ཡོད་པ་དང་། རེ་བ་ཞེས་པ་འདི་མ་འོངས་པ་དང་འབྲེལ་ཡོད། མ་འོངས་པའི་སྐོར་ཁག་ཐེག་ངེས་བརྟན་འཕེལ་བ་གང་ཡང་མེད་ཀྱང་། རང་ཉིད་ཀྱིས་རྣམ་པ་ཀུན་ཏུ་རེ་བ་བཟང་ས་ཞིག་ལ་རྒྱག་རྒྱུ་དང་། གང་ལྟར་བློས་དཔྱད་པའི་ཐོག་ནས་དཀའ་ངལ་དག་ལ་གདོང་ལེན་གནང་དགོས་པར་ལམ་སྟོན་རྒྱ་ཆེར་སྩལ་བ་མ་ཟད། ད་ཆ་རང་ཅག་ཐུན་མོང་གི་གོ་ལ་འདིར་ཚ་དྲོད་ཤུགས་ཆེ་འཕེལ་བཞིན་པའི་ཛ་དྲག་གི་གནས་སྟངས་སེལ་ཐབས་སླད་གཞོན་སྐྱེས་མང་དག་གིས་མཉམ་རུབ་ཀྱིས་ཐབས་ལམ་འཚོལ་ཐབས་དང་སྤེལ་རེས་བྱེད་དགོས། གཞོན་སྐྱེས་ཚོ་ནི་ང་ཚོའི་རེ་བ་རེད་ཅེས་བཀའ་སྩལ་འདུག དེ་འབྲེལ་ངལ་བར་གདོང་ལེན་ཆེད་ང་ཚོ་ཚང་མས་མཉམ་རུབ་ངང་འབད་སྤུངས་ཀྱིས་དུས་བཅས་རེའུ་མིག་འཆར་འགོད་ཐོག་ནས་ལས་འགུལ་སྤེལ་དགོས་ཞེས་བཀའ་སྩལ་འདུག ལར་ནས་མགོན་པོ་༸གང་ཉིད་མཆོག་གིས་རང་གཞན་ཀུན་གོ་ལ་འདི་ཉིད་ལ་བརྟེན་ནས་འཚོ་དགོས་ཀྱི་ཡོད་སྟབས། དེའི་ནང་ཞི་བདེ་བག་ཕེབས་ངང་གནས་པ་ཙམ་མིན་པར་གོ་ལ་སྤྱིར་འཕྲད་པའི་ངལ་བ་སེལ་ཐབས་སུ་རང་གཞན་ཚང་མས་འགན་བཞེས་རྒྱུ་ནི་ཤིན་ཏུ་གནད་ཆེ་ཆགས་ཡོད་པའི་ལམ་སྟོན་མཛད་འདུག

དེ་རིང་ཞོགས་པར་ཁྲིགས་སེ་རིན་པོ་ཆེ་མཆོག་དང་རྒྱ་གར་གྲོས་ཚོགས་འཐུས་མི་ཟུར་པ་དང་ལ་དྭགས་ནང་པ་ཚོགས་འདུའི་ཚོགས་གཙོ་ཐུབ་བསྟན་ཚེ་དབང་ལགས། དེ་བཞིན་ལ་དྭགས་དགོན་ཚོགས་ཀྱི་གཙོ་འཛིན་རྒན་བཤད་སྒྲུབ་བྱམས་པ་ལགས། ལིང་ཤེད་དགོན་པའི་སྐུ་ཚབ་བཅས་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཅར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༢༠༢༢ ལོའི་དབྱར་དུས་སུ་ལ་དྭགས་ལ་ཆིབས་བསྒྱུར་བཀའ་དྲིན་བསྐྱང་གནང་ཡོང་བའི་གསོལ་འདེབས་ཇི་ལྟར་ཞུས་པ་བཞིན་མགོན་པོ་༸གང་ཉིད་མཆོག་གིས་འདི་ལོའི་ཕྱི་ཟླ་བདུན་པའམ་བརྒྱད་པའི་ནང་ལ་དྭགས་སུ་ཆིབས་བསྒྱུར་མཛད་རྒྱུའི་བཀའ་བཞེས་སྨིན་སྩལ་མཛད་འདུག གསར་འགོད་པས་ཐེངས་འདིའི་མཇལ་ཁ་དང་འབྲེལ་ནས་ཁྲིགས་སེ་རིན་པོ་ཆེ་མཆོག་ལ་བཅར་འདྲི་ཁག་ཅིག་ཞུས་པར་དེ་རིང་སྔ་དྲོ་མགོན་པོ་༸གང་ཉིད་མཆོག་དང་མཇལ་ཁ་ཞུས་སྐབས་༸གོང་ས་མཆོག་༸སྐུ་ངལ་གསོ་བཞུགས་མཛད་རྒྱུ་ཁོ་ནའི་ཆེད་དུ་ལ་དྭགས་ལ་ཆིབས་བསྒྱུར་བཀའ་དྲིན་བསྐྱང་རྒྱུའི་གསོལ་འདེབས་ཇི་ཞུས་ལྟར་ཐུགས་བརྩེ་བ་ཆེན་པོས་དེ་དོན་བཀའ་བཞེས་བཟང་པོ་སྨིན་སྩལ་ཐོབ་ཡོད་པ་མ་ཟད། མཇལ་ཁའི་སྐབས་ལིང་ཤེད་དགོན་པའི་སྐུ་ཚབ་ནས་འདི་ལོར་ལིང་ཤེད་དགོན་དུ་དབྱར་ཆོས་ཆེན་པོ་ཚོགས་ཀྱི་ཡོད་སྟབས་དེར་ཆིབས་བསྒྱུར་བསྐྱང་གནང་ཡོང་བའི་གསོལ་འདེབས་ཞུས་ཡོད་ཀྱང་མགོན་པོ་༸གང་ཉིད་མཆོག་ནས་གཟིགས་ཀྱི་ཡིན་ཞེས་པ་ཙམ་ལས་ཆིབས་བསྒྱུར་མཛད་གཏན་ཁེལ་བའི་བཀའ་སྩལ་མཛད་མི་འདུག མགོན་པོ་༸གང་ཉིད་མཆོག་དང་མཇལ་མོལ་གྲུབ་མཚམས་སུ་ལ་དྭགས་པའི་སྐུ་ཚབ་རུ་ཁག་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དགུང་ཚིགས་ལྷན་བཞེས་དང་འབྲེལ་ཏེ་མཇལ་མོལ་གནང་ཡོད་པ་ལྟར། སྐབས་དེར་ལ་དྭགས་ནང་པ་ཚོགས་འདུའི་ཚོགས་གཙོ་སྐུ་ཞབས་ཐུབ་བསྟན་ཚེ་དབང་ལགས་ཀྱིས་བོད་ཀྱི་གནད་དོན་དང་འབྲེལ་ནས་ལ་དྭགས་པ་གཙོ་བོར་གྱུར་པའི་ཧི་མཱ་ལ་ཡའི་རྒྱལ་བརྒྱུད་ཀྱི་མི་རིགས་ཡོངས་མཉམ་དུ་ཡོད་ཅེས་གསུངས་སོང་། གཞི་རྩའི་ཕྱི་ལོ་ ༢༠༡༩ ལོའི་ཕྱི་ཟླ་ ༡༢ ནང་ལ་དྭགས་ནང་ཚོགས་དགོན་ཚོགས་སྐུ་ཚབ་རུ་ཁག་ཅིག་བཞུགས་སྒར་དུ་ཆེད་བཅར་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་དབྱར་དུས་སུ་ལ་དྭགས་ལ་ཆིབས་བསྒྱུར་བཀྲིན་བསྐྱངས་ནས་ཐུགས་ལྷོད་ལྷོད་ངང་༸སྐུ་ངལ་གསོ་བཞུགས་མཛད་རྒྱུའི་གསོལ་འདེབས་ཞུས་པ་ལྟར། མགོན་པོ་༸གང་ཉིད་མཆོག་ནས་ཀྱང་ཐུགས་བརྩེ་ཆེན་པོས་བཀའ་བཞེས་བཟང་པོ་སྨིན་སྩལ་མཛད་ཡོད་ཀྱང་། རྒྱ་ནག་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ཆིབས་བསྒྱུར་མཛད་ཐུབ་མེད་པ་རེད།

དེ་རིང་སྔ་དྲོར་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱིས་གཙོས་པའི་༸དཔལ་ལྡན་འབྲས་སྤུངས་སྒོ་མང་བཅས་ཀྱི་མཁན་བླ་གསར་པ་ཁག་ཅིག་༸རྒྱལ་བའི་བཞུགས་སྒར་དྷརྨ་སཱ་ལཱར་ཆེད་བཅར་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་དང་ལམ་སྟོན་བཀའ་སློབ་ཞུས་འདུག༸གོང་ས་མཆོག་གིས་སྐབས་དེར་དགོན་སྡེ་ཁག་གི་མཁན་བླ་ལས་ཟུར་རྣམས་ལ་ཉེ་སྔོན་ཏོག་དབྱིབས་གཉན་རིམས་ཁྱབ་གདལ་གྱི་ཛ་དྲག་གནས་སྟངས་སྐབས་ཉམ་ཐག་རྣམས་ལ་སྐམ་ཟས་སོགས་ཀྱི་རོགས་རམ་ལས་དོན་རླབས་ཆེན་གཉེར་བར་ཐུགས་དགྱེས་ཚོར་ཆེན་པོས་ཡི་རང་བསྔགས་བརྗོད་མཛད་པ་མ་ཟད། རིང་མིན་བདེ་མཆོག་ཚེ་ལྷ་དཀར་པོའི་བཀའ་དབང་བསྩལ་རྒྱུའི་བཀའ་བཞེས་བཟང་པོ་སྨིན་སྩལ་མཛད་འདུགརླུང་འཕྲིན་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་དང་བཀའ་སློབ་སྩལ་གྲུབ་བསྟུན་༸དཔལ་ལྡན་རྒྱུད་སྨད་གྲྭ་ཚང་གི་མཁན་རིན་པོ་ཆེ་བསྟན་འཛིན་བཟང་པོ་ལགས་སུ་དེ་རིང་གི་གཟིམ་ཆུང་མཇལ་ཁ་དང་འབྲེལ་བའི་བཀའ་འདྲི་ཁག་ཅིག་ཞུས་ཡོད། ༸སྐུ་པར་བདག་དབང་། ༸དཔལ་ལྡན་དགའ་ལྡན་ཕོ་བྲང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་བཞུགས་སྒར་༸རྒྱལ་བའི་ཕོ་བྲང་དུ་འཛམ་གླིང་གི་ས་གནས་འདྲ་མིན་ནས་བཅར་བའི་དད་ལྡན་མི་སྣ་ཁག་ཅིག་ལ་དམིགས་བསལ་མཇལ་ཁ་སྩལ་བ་དང་སྦྲགས་གོ་ལ་སྤྱིའི་བདེ་དོན་དང་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གནང་རྒྱུའི་ཐོག་དགོངས་པ་བཞེས་དགོས་པའི་ལམ་སྟོན་མཛད་འདུག མགོན་པོ་༸གང་ཉིད་མཆོག་གིས་མཇལ་ཁའི་སྐབས་ New Zealand ཡི་ Māori ཞེས་པའི་གདོད་མའི་མི་རིགས་ཀྱི་ལུགས་སྲོལ་ལྟར་སྣ་རྩེ་ཐུག་རེས་བྱེད་རྒྱུ་ཡིན་ཞེས་ཕྲུ་གུ་ཞིག་ལ་ཤངས་རྩེས་མཇལ་ཁ་སྩལ་བའི་ཐོག་ནས་འཚམས་འདྲི་མཛད་པ་དང་སྦྲགས། མགོན་པོ་མཆོག་གི་མི་ཐོག་རིང་ལ་འཛམ་གླིང་ཐོག་དཀའ་རྙོག་མང་དག་ཅིག་འཕྲད་ཡོད་པ་དང་། མ་འོངས་མི་རབས་གསར་པའི་སྐབས་སུ་འཛམ་གླིང་འདི་ཞི་བདེ་དང་འདྲ་མཉམ་ལྡན་པའི་སྤྱི་ཚོགས་ཤིག་ཆགས་ཐུབ་པའི་ཐུགས་རེ་ཆེན་པོ་ཡོད་པ་དང་། དེས་ན་མི་རབས་གསར་པ་ཚོ་མི་རེ་ངོ་རེར་འཛམ་གླིང་ནང་མི་ཐེར་འབུམ་བདུན་ཡོད་པ་རྣམས་གཅིག་གྱུར་ཡིན་པའི་འདུ་ཤེས་ཐོག་ནས་དོན་དམ་གྱི་ཞི་བདེ་བསྐྲུན་རྒྱུའི་འགན་ཡོད་པར་བཀའ་སྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་ཆ་གོ་ལའི་ཚ་དྲོད་རྒྱས་པ་ནས་ཛ་དྲག་ཅན་གྱི་གནད་དོན་ཆགས་ཡོད་པ་སོགས་གནམ་གཤིས་འགྱུར་ལྡོག་དང་འབྲེལ་བའི་དཀའ་ངལ་འཕྲད་པ་དེ་ནི་ཛ་དྲག་རང་བཞིན་གྱི་ངལ་བ་ཞིག་ཡིན་པ་དང་། ཛ་དྲག་རང་བཞིན་གྱི་དཀའ་ངལ་དེ་འདྲ་ཞིག་ཡོད་བཞིན་པའི་ཁྲོད་དུ་ང་ཚོ་ཕན་ཚུལ་དབར་འཐབ་འཛིང་བྱེད་ཡག་དེ་བེད་སྤྱོད་མེད་པ་ཞིག་རེད་ཅེས་བཀའ་སྩལ་བ་དང་ཆབས་ཅིག ད་ཆ་ང་ཚོའི་ངོས་ནས་ངའི་རྒྱལ་ཁབ་དང་ངའི་གླིང་ཕྲན་སོགས་རང་ཉིད་ཁོ་ནའི་ཆེད་དུ་བསམ་བློ་གཏན་རྒྱུ་ལས་གོ་ལ་སྤྱི་དང་འགྲོ་བ་མི་སྤྱིའི་བདེ་དོན་ལ་དགོངས་པ་བཞེས་གལ་ཡིན་པ་མ་ཟད།  གཙོ་བོ་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་པའི་འདུ་ཤེས་ཐོག་ནས་ཡོང་ཐུབ་པ་ཞིག་ཡིན་སྐོར་སོགས་ལམ་སྟོན་བཀའ་དྲིན་བ་སྩལ་འདུག

དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་འཚོགས་བཞིན་པའི་བོད་ཀྱི་ཞོ་སྟོན་རྒྱས་པ་ཐེངས་ ༢༥ ཐོག་མཉམ་ཞུགས་གནང་མཁན་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་པ་ཁག་གི་ཚོགས་མི་ལས་བྱེད་ཡོངས་ལ་དམིགས་བསལ་མཇལ་དང་བླང་དོར་བཀའ་སློབ་བཀྲིན་ཆེ་བ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་དེ་སྔ་བོད་ཀྱི་རྒྱལ་ས་ལྷ་སར་ཞོ་སྟོན་ཉིན་མ་ལྔ་ཙམ་རིང་ཚོགས་ཀྱི་ཡོད་པ་དང་སྐབས་དེར་མགོན་པོ་༸གང་ཉིད་མཆོག་༸རྒྱལ་ཡུམ་ཆེན་མོ་མཆོག་དང་མཇལ་འཕྲད་ཡང་ཡང་བྱུང་གི་སྟབས་དུས་ཚོད་དེ་ནི་ཆེས་སྐྱིད་ཤོས་ཤིག་དང་། དེ་ནི་དབྱར་ཁའི་གུང་སེང་རིང་ཤོས་ཤིག་ཀྱང་ཡིན་པ་སོགས་དྲན་གསོ་མཛད་ཡོད། མགོན་པོ་༸གང་ཉིད་མཆོག་ནས་ང་ཚོ་བཙན་བྱོལ་བ་ཆགས་ནས་རང་མགོ་གང་ཐོན་བྱས་ནས་མ་ཕྱིན་པར་བོད་ཀྱི་ཆོས་དང་རིག་གཞུང་། ལེགས་བྱང་ཁག་འཛིན་སྐྱོང་གནང་སྟེ་གནས་ཡོད་པ་དང་། ལྷག་པར་དུ་བོད་མི་ཚོས་བཤད་སྒྲུབ་ཟུང་འབྲེལ་ཐོག་བདག་གཅེས་གནང་བའི་ནང་པ་སངས་རྒྱས་པའི་ཆོས་ལ་ད་ཆ་རྒྱ་ནག་ནང་ལ་དམིགས་བསལ་དོ་སྣང་བྱེད་མཁན་མང་དུ་འགྲོ་བཞིན་པ་མ་ཚད་པར་དད་པ་ཙམ་མིན་པར་ཚན་རིག་དང་མཐུན་པའི་བོད་ཀྱི་ནང་ཆོས་ལ་རྒྱལ་སྤྱིའི་ཚན་རིག་མཁས་པ་ཚོས་ཀྱང་དོ་སྣང་ཆེན་པོ་བྱེད་བཞིན་ཡོད་པ་སོགས་བཀའ་སྩལ་བ་དང་ཆབས་ཅིག ང་ཚོ་བཙན་བྱོལ་ལ་གྱུར་བའི་རྐྱེན་ངན་དེ་གྲོགས་ལ་ཤར་ནས་འཛམ་གླིང་ས་ཕྱོགས་གང་སར་བོད་ཀྱི་ཆོས་རིག་དང་ལེགས་བྱང་སོགས་ཁྱབ་སྤེལ་ཐུབ་ཡོད་སྟབས། བོད་མི་ཚོའི་ངོས་ནས་བོད་ཀྱི་ཆོས་རིག་དེ་དག་མུ་མཐུད་བདག་གཅེས་གནང་གལ་ཡིན་པའི་ལམ་སྟོན་མཛད་ཡོད། དེ་བཞིན་ཆོས་རྒྱལ་སྲོང་བཙན་སྒམ་པོ་མཆོག་གིས་དབུས་པའི་ཆོས་རྒྱལ་ཚོས་བོད་ཀྱི་ཡི་གེ་གསར་གཏོད་དང་དཔལ་ནཱ་ལེནྡཱའི་རིག་གཞུང་རྣམས་བོད་བསྒྱུར་གནང་བ་སོགས་རླབས་ཆེན་གྱི་མཛད་རྗེས་བསྐྱངས་ཁག་དྲན་གསོ་མཛད་དེ། ང་ཚོ་བོད་མི་རྣམས་བཙན་བྱོལ་བ་ཞིག་ཆགས་ཡོད་ཀྱང་ལོ་རྒྱུས་ལྡན་པའི་བོད་པའི་རིག་གཞུང་དག་ལ་གཞིགས་ན་བོད་མི་རྣམས་སེམས་ཞུམ་མི་དགོས་པར་སྤོབས་པ་གནང་འོས་པ་ཞིག་ཆགས་ཡོད་པར་བཀའ་སྩལ་གྲུབ་མཚམས་སུ་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་ཁག་གི་སྐུ་ཚབ་རེ་རེའི་ངོས་ནས་མགོན་པོ་༸གང་ཉིད་མཆོག་ལ་རྣམ་ཐར་རེ་གཟིགས་ཕུད་ཞུས་ཡོད། རྣམ་མཐར་གཟིགས་ཕུད་སྤྱན་འབུལ་ཞུ་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་མདོ་སྨད་ཙོང་ཁའི་ཡུལ་ནས་ཡོང་བའི་ལྷ་མོ་དོན་གྲུབ་ཞུ་བའི་བུ་དེས་ད་བར་༸རྒྱལ་བའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་གཙོ་གྱུར་རིས་སུ་མ་ཆད་པའི་བསྟན་པ་སྤྱིར་སྨན་པའི་ཞབས་འདེགས་ཞུས་ཡོད་པ་དེ་དག་ལ་བོད་མི་ཚོའི་ངོས་ནས་སྤོབས་པ་གནང་འོས་པ་དང་། ད་ལྟའི་ཆར་ལྷ་བླའི་བཀའ་ལུང་ཁག་ལ་གཞིགས་ན་མགོན་པོ་༸གང་ཉིད་མཆོག་ད་དུང་དགུང་ལོ་བཅུ་བཅོ་ལྔ་བར་བཞུགས་ངེས་ཡིན་པ་ལྟར་བོད་མི་ཚོའི་ངོས་ནས་ཀྱང་ཧུར་ཐག་གནང་རོགས་ཞེས་བཀའ་སྩལ་མཛད་ཡོད། དེ་རིང་མཇལ་ཁའི་ཐོག་ཉེ་ཆར་བཞུགས་སྒར་དུ་ཚོགས་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་ཐོག་བཅར་བའི་ཚོགས་མི་རྣམས་ཀྱང་ལྷན་ཞུགས་གནང་ཡོད་པ་དང་འབྲེལ། མགོན་པོ་༸གང་ཉིད་མཆོག་གིས་དབུ་མའི་ལམ་ཞེས་རྒྱ་ཆེ་ས་ནས་དགོངས་པ་བཞེས་ཚེ་བོད་ཙམ་མིན་པར་རྒྱ་ནག་ལའང་འགྱུར་བ་འགྲོ་ཐབས་དང་། ལྷག་པར་དུ་ང་ཚོས་རང་སྐྱོང་ཞེས་པ་དེ་ཆབ་སྲིད་འཛིན་སྐྱོང་གི་སྐད་ཆ་ཞིག་མིན་པར་བོད་ཆོལ་ཁ་གསུམ་ལ་མིང་དོན་མཚུངས་པའི་རང་སྐྱོང་གི་གནས་བབ་འོག་བོད་ཀྱི་ཐུན་མིན་ཆོས་རིག་དང་ལེགས་བྱང་བཅས་པ་བདག་གཅེས་གནང་རྒྱུའི་ཐོབ་ཐང་བྱུང་རྒྱུ་ཡིན་སྐོར་བཀའ་སྩལ་བ་མ་ཟད། རིམ་པས་ཆོས་རིག་ཐོག་ནས་རྒྱ་ནག་ལ་ཕར་དབང་བསྒྱུར་བྱེད་ཐུབ་པའི་ཐུགས་རེ་ཡོད་པར་བཀའ་སྩལ་མཛད་ཡོད་པ་རེད།