འོས་བསྡུ་ཆེན་མོ། ༢༠༢༡

ཡོ་རོབ་ཁུལ་གྱི་བོད་མིའི་མི་འབོར་མང་ཤོས་གནས་པའི་སྦེལ་ཇམ་ས་གནས་འོས་བསྡུ་ལས་ཁང་གི་ཁྱབ་ཁོངས་ཡོ་རོབ་རྒྱལ་ཁབ་སྦེལ་ཇམ་གཙོས་ཕ་རན་སི་དང། ཧོར་ལན་ཌི། དེ་བཞིན་སཱི་པན་བཅས་རྒྱ་ཁབ་བཞིའི་ནང་གི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གྲངས་གཤབར་གནང་ཟིན་པ་དང་འབྲེལ་ནས་ཁ་སང་ཕྱོགས་བསྡོམས་གྲུབ་འབྲས་གསལ་བསྒྲགས་གནང་ཡོད་ཅིང། ཐེངས་འདིའི་སྲིད་སྐྱོང་གི་སྔོན་འགྲོའི་འོས་བསྡུར་མང་ཚོགས་ཁྲོད་ཡོངས་གྲགས་ཡིན་པའི་འོས་གཞི་ཁག་གི་འོས་གྲངས་ཀྱི་གྲུབ་འབྲས་ལ་གཞིགས་ཚེ་སྲིད་སྐྱོང་འོས་གཞིར་བཞེངས་མཁན་སྤེན་པ་ཚེ་རིང་ལ་འོས་གྲངས། ༡༤༡༩ དང་དབུ་དཀར་ཚང་སྐལ་བཟང་རྡོ་རྗེ་ལ་འོས་གྲངས། ༡༢༠༦ རྒྱ་རི་སྒྲོལ་མར་འོས་གྲངས་ ༤༧༦ འབྲོང་ཆུང་དངོས་གྲུབ་ལ་འོས་གྲངས། ༣༦༠ བློ་བཟང་སྙན་གྲགས་ལ་འོས་གྲངས། ༢༨ དེ་བཞིན་ཨཱཙཱརྱ་ཡེ་ཤེས་ཕུན་ཚོགས་ལ་འོས་གྲངས།  ༨ བཅས་ཐོབ་འདུགསྤྱིར་ད་རེས་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུར་སྦེལ་ཇམ་ས་གནས་འོས་བསྡུ་ལས་ཁང་གི་ཁྱབ་ཁོངས་རྒྱལ་ཁབ་བཞི་ནས་བོད་མི་ཁྱོན་ ༤༠༤༣ གྱིས་དེབ་སྐྱེལ་གནང་ཡོད་པ་ལྟར་དངོས་སུ་སྔོན་འགྲོ་འོས་བསྡུར་མི་གྲངས་ ༣༥༤༦ ནས་ཆ་ཤས་བཞེས་འདུག གསར་འགོད་པས་འོས་བསྡུའི་གྲུབ་འབྲས་གསལ་བསྒྲགས་གནང་རྗེས་སྦེལ་ཇམ་ས་གནས་འོས་བསྡུའི་འགན་འཛིན་དང་སྦེལ་ཇམ་སྐུ་ཚབ་དོན་གཅོད་བཀྲིས་ཕུན་ཚོགས་ལགས་སུ་འོས་བསྡུའི་ལས་དོན་སྤྱི་དང་སྒོས་གྲང་བཤེར་གནང་ཕྱོགས་སོགས་ཀྱི་ཐོག་བཅར་འདྲི་ཞུས་པར་ཏོག་དབྱིབས་ནད་ཡམས་རྐྱེན་གྱིས་ས་གནས་སུ་མང་ཚོགས་འདུ་འཛོམས་གནང་བར་དམ་དྲག་ཆེས་ཆེར་གནང་རྐྱེན་སྦེལ་ཇམ་ས་གནས་འོས་བསྡུ་ལས་ཁང་གིས་སྦེལ་ཇམ་ནང་དུ་གཞུང་གི་བཀོད་ཁྱབ་སོགས་དང་མཐུན་པའི་ཐོག་ནས་མང་གཙོའི་ཁེ་དབང་ལོངས་སུ་སྤྱོད་རྒྱུའི་གོ་སྐབས་བསྐྲུན་ཐུབ་པ་དེ་ནི་དམིགས་བསལ་གྱི་མཛད་རྗེས་ཤིག་ལ་ངོས་འཛིན་གནང་སྐོར་གསུངས་ཡོད།

རྒྱ་གར་གཙོ་བོར་གྱུར་པའི་བོད་མི་གནས་ཡུལ་རྒྱལ་སྤྱིའི་ཡུལ་གྲུ་གང་སར་ ༢༠༢༡ ལོའི་སྲིད་སྐྱོང་དང་སྤྱི་འཐུས་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་ལས་རིམ་གནང་བཞིན་པ་དང་བསྟུན། ཁ་ཉིན་རྒྱ་ནག་གཞུང་འབྲེལ་གྱི་གསར་ཁང་ Global Times གི་དྲ་གནས་ཐོག་གནས་ཚུལ་ཞིག་སྤེལ་བར་བཙན་བྱོལ་བོད་མིའི་འོས་བསྡུའི་ལས་རིམ་ལ་ཁྱད་གསོད་དང་སྦྲགས་འོས་བསྡུའི་བརྒྱུད་རིམ་ཁྲོད་གྲུབ་འབྲས་གང་འདྲ་ཞིན་ཐོན་ཡང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་གང་ཡང་གཏང་ཐུབ་ཀྱི་མ་རེད་ཅེས་བཤད་འདུག བཙན་བྱོ་བོད་གཞུང་དང་བོད་མིའི་སྒྲིག་འཛུགས་ཀྱི་མ་འོངས་འགོ་ཁྲིད་དུ་གང་ཟག་སུ་ཞིག་བདམས་ཐོན་བྱུང་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས། དེ་བཞིན་ཨ་རི་གཞུང་ལ་བོད་ཀྱི་གནད་དོན་ཐོག་རྒྱ་ནག་དང་ལྷན་དུ་ཐབས་བྱུས་ལྡན་པའི་ཐོག་གླེང་སློང་གནང་རོགས་ཞེས་སོགས་འབོད་སྐུལ་ཞུ་རྒྱུ་གཙོས་པའི་གནད་དོན་མང་དག་ཅིག་ལ་གདོང་ལེན་གནང་དགོས་སྐོར་བཤད་པར་མ་ཟད། རྒྱ་ནག་གཞུང་གིས་སྔོན་ཚུད་ནས་བོད་ཀྱི་གནད་དོན་ཐོག་སྒྲིག་སྲོལ་དང་འཆར་གཞི་ཁག་གཏན་འབེབས་བྱས་ཡོད་སྟབས། འགྲོ་བཞིན་པའི་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཁྲོད་གྲུབ་འབྲས་གང་འདྲ་ཞིན་ཐོན་ཡང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྱུར་བ་གང་ཡང་གཏང་ཐུབ་ཀྱི་མ་རེད་ཅེས་བཤད་འདུགལྷག་པར་དུ་རྒྱ་ནག་གི་བོད་གནད་ཉམས་ཞིབ་ལྟེ་གནས་ཁང་གི་གཙོ་འཛིན་ Xiao Jie ཟེར་བ་དེ་ཡིས་སྲིད་སྐྱོང་ཞེས་པ་དེ་ཕྱིའི་རྒྱལ་ཁབ་ཁག་ནས་དཔལ་འབྱོར་འཚོལ་སྒྲུབ་བྱེད་མཁན་གྱི་ཚོགས་པ་ཞིག་གི་འགོ་ཁྲིད་ཡིན་པ་དང་། སྲིད་སྐྱོང་ཞེས་པ་དེ་ཐོག་མར་ ༢༠༡༡ ལོར་འདེམས་སྒྲུག་བྱས་ཡོད་ཀྱང་། དོན་ངོ་མར་དབང་ཚད་ཆ་ཚང་ད་ལྟ་ཡང་༸གོང་ས་མཆོག་དང་ཁོང་གི་ཉེ་འཁོར་གྱི་མི་སྣ་ཁག་ཅིག་ལ་ཡོད་རེད་ཅེས་བཤད་འདུགདེ་བཞིན་རྒྱ་ནག་ཆབ་སྲིད་གྲོས་ཚོགས་ཀྱི་གྲངས་ཉུང་མི་རིགས་དང་ཆོས་ལུགས་ལས་དོན་ཚོགས་ཆུང་གི་ཚོགས་གཙོ་ཟུར་པ་ Zhu Weiqun ཟེར་བ་དེ་ཡིས་ཀྱང་བཙན་བྱོལ་བོད་གཞུང་ཟེར་བ་དེ་ད་ཆ་ལུང་ཚན་དང་ཆོས་ལུགས་འཐེན་འཁྱེར་སོགས་ཀྱི་དཀའ་ངལ་ནང་དུ་ལྷུང་ཞིང་། དུས་ནམ་ཞིག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་མ་ཟིན་པའི་གནས་སྟངས་བྱུང་སྐབས་ནང་འགལ་གྱི་དཀའ་རྙོག་དེ་མི་རབས་གཞོན་པ་ཚོས་གདོང་ལེན་བྱེད་ཐུབ་ཀྱི་མ་རེད་ཅེས་བརྗོད་འདུགཐེངས་འདིར་རྒྱ་ནག་གིས་ཐེ་བྱུས་བྱེད་བཞིན་པའི་གནད་དོན་དང་འབྲེལ་ཏེ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག་ལ་བཀའ་འདྲི་ཁག་ཅིག་ཞུས་པར་ང་ཚོའི་ངོས་ནས་རྒྱ་ནག་ཕྱོགས་ནས་སྐད་ཆ་དེ་འདྲ་ཞིག་བཤད་པར་སྔོན་དཔག་ཐུབ་ཀྱི་ཡོད་པ་དང་། རྒྱ་ནག་དེ་རྒྱལ་སྤྱིའི་འགྲོ་ལུགས་ལྟར་མང་གཙོའི་ཐོག་འགྲོ་ཐུབ་ཀྱི་མེད་སྟབས་ང་ཚོར་མི་འདོད་པའི་རྣམ་པ་ཁོ་ན་བསྟན་ནས་མ་བསྡད་པར་འཛམ་གླིང་ཀུན་གྱི་འགྲོ་སྟངས་མཐུན་ཞིང་། འགྲོ་བ་མིའི་གཞིའི་ཐོབ་ཐང་ངམ་ཁེ་དབང་ལོངས་སུ་སྤྱོད་རྒྱུར་བསམ་བློ་གཏོང་དགོས་ཞེས་བརྡ་ལན་གནང་སོང་།དེ་བཞིན་ཕྱི་ཚེས་ ༣ ཉིན་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོ་གནང་སྐབས་སུ་སྲིད་སྐྱོང་བློ་བཟང་སེང་གེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱེས་འཁོད་བོད་མི་རྣམས་འཛམ་གླིང་ཡུལ་གྲུ་གང་སར་གནས་ཀྱང་ཚང་མས་མང་གཙོའི་ཁེ་དབང་ལོངས་སུ་སྤྱད་ནས་འོས་བསྡུར་ཆ་ཤས་བཞེས་ཡོད་པ་དང་ལྷག་དོན་བོད་ནང་གི་བོད་མིའི་མངོན་འདོད་ནི་མང་གཙོ་ཡིན་པ་དང་། རྒྱ་ནག་ནང་ཡོད་པའི་རྒྱ་རིགས་མང་ཚོགས་རྣམས་ཀྱི་མངོན་འདོད་ཀྱང་མང་གཙོ་ཡིན་སྟབས། རྒྱ་གཞུང་གིས་བཙན་བྱོལ་བོད་མི་རྣམས་ཀྱིས་མང་གཙོའི་ལམ་བཟང་ཕྱག་བསྟར་གནང་ཕྱོགས་ལས་མིག་དཔེ་ལེན་རྒྱུ་གལ་ཆེན་པོ་རེད་ཅེས་གསུངས་ཡོད།

ཡོ་རོབ་ཁུལ་དུ་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་ཀྱི་གནས་སྟངས་ལ་ལྟོས་མེད་འདི་གར་གནས་སྡོད་བོད་མི་རྒན་གཞོན་དར་གསུམ་གྱིས་མང་གཙོའི་ཁེ་དབང་ལོངས་སུ་སྤྱོད་དེ་ཟླ་ ༡ ཚེས་ ༣ ཉིན་ཡོ་རོབ་རྒྱལ་ཁབ་ཁྱོན་ ༡༥ ནང་ཚ་ཚ་འུར་འུར་གྱིས་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་ཆེན་མོ་གནང་ཡོད་ཅིང། ཁ་སང་ཕྱི་ཚེས་ ༥ ནས་དབུ་འཛུགས་ཀྱིས་ཡོ་རོབ་ས་གནས་འོས་བསྡུ་ལས་ཁང་སོ་སོའི་ཁྱབ་ཁོངས་རྒྱལ་ཁབ་ཁག་གི་འོས་ཤོག་གྲངས་བཤེར་དང་གྲུབ་འབྲས་གསལ་བསྒྲགས་གནང་ཡོད་པ་རེད། ཁ་སང་ཕྱི་དྲོ་ཡོ་རོབ་ཀྱི་ཚོུད་ ༩༌༣༠ ཡོལ་ཙམ་ལ་སུད་སི་ས་གནས་འོས་བསྡུ་ལས་ཁང་གིས་ཁྱབ་ཁོངས་སུད་སི་དང་ལིག་ཏེན་སིཊཡན། འཇར་མ་ནི། དེ་བཞིན་ཨོ་སི་ཀྲིརིཡ་བཅས་ཀྱི་ཐེངས་འདིའི་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་གྲུབ་འབྲས་གསལ་བསྒྲགས་གནང་ཡོད་པ་དང། ད་ལན་སུད་སི་ས་གནས་འོས་བསྡུ་ལས་ཁང་གི་ཁྱབ་ཁོངས་ཨི་ཊ་ལི་རྒྱལ་ཁབ་ཕུད་པའི་སུད་སི་དང་ལིག་ཏེན་སིཊཡན། འཇར་མ་ནི། དེ་བཞིན་ཨོ་སི་ཀྲོརིཡ་བཅས་རྒྱལ་ཁབ་བཞིའི་འོས་བསྡུའི་གྲུབ་འབྲས་ལ་གཞིགས་ན། སྲིད་སྐྱོང་འོས་གཞིར་བཞེངས་མཁན་སྤེན་པ་ཚེ་རིང་ལ་འོས་གྲངས། ༡༢༧༣ དང་དབུ་དཀར་ཚང་སྐལ་བཟང་རྡོ་རྗེ་ལ་འོས་གྲངས། ༡༠༦༥ རྒྱ་རི་སྒྲོལ་མར་འོས་གྲངས་ ༦༦༧ འབྲོང་ཆུང་དངོས་གྲུབ་ལ་འོས་གྲངས། ༤༦༠ བློ་བཟང་སྙན་གྲགས་ལ་འོས་གྲངས། ༥༠ དེ་བཞིན་ཨཱཙཱརྱ་ཡེ་ཤེས་ཕུན་ཚོགས་ལ་འོས་གྲངས།  ༡༠ བཅས་ཐོབ་འདུག སྐབས་དེར་འོས་བསྡུའི་གྲུབ་འབྲས་གསལ་བསྒྲགས་གནང་ཟིན་མཚམས་སུ་གསར་འགོད་པས་སུད་སི་བོད་ཀྱི་སྐུ་ཚབ་དོན་གཅོད་དང་ས་གནས་འོས་བསྡུ་འགན་འཛིན་འཆི་མེད་རིག་འཛིན་ལགས་སུ་གནས་འདྲི་ཞུས་པར་སུད་སི་ས་གནས་འོས་བསྡུ་ལས་ཁང་གི་ཁྱབ་ཁོངས་སུ་འོས་བསྡུའི་འཐུས་མི་ཡོད་པའི་རྒྱལ་ཁབ་ལྔའི་ཁོངས་ནས་ད་ལན་ཨི་ཊ་ལི་རྒྱལ་ཁབ་ནང་དུ་ཏོག་དབྱིབས་ནད་ཡམས་ཁྱབ་གདལ་ཆེས་ཆེར་འགྲོ་བཞིན་པའི་རྐྱེན་གྱིས་སྲིད་གཞུང་ནས་མང་ཚོགས་ཐོག་འགྲུལ་བཞུད་བཀག་སྡོམ་དམ་དྲག་ཆེན་པོ་གནང་བར་བརྟེན། འོས་བསྡུའི་གྲངས་བཤེར་དེ་ཕྱི་ཚེས་ ༧ བར་ཕྱིལ་བཤོལ་གནང་ཡོད་པར་འགྲེལ་བརྗོད་གནང་ཡོད།  སྤྱིར་ད་རེས་སུད་སི་ས་གནས་འོས་བསྡུའི་ལས་ཁང་གི་ཁྱབ་ཁོངས་ཡོ་རོབ་རྒྱལ་ཁབ་ལྔ་ནས་མང་ཚོགས་ཁྱོན་ ༤༥༨༣ ནས་ ༢༠༢༡ ལོའི་སྲིད་སྐྱོང་གི་སྔོན་འགྲོའི་འོས་བསྡུ་སླད་དུ་དེབ་སྐྱེལ་གནང་ཡོད་པ་དང། དེ་དག་ཁྲོད་དངོས་སུ་ཐེངས་འདིའི་སྔོན་འགྲོའི་འོས་བསྡུར་མང་ཚོགས་ ༣༦༦༨ ནས་ཆ་ཤས་བཞེས་འདུགསུད་སི་ས་གནས་འོས་བསྡུ་འགན་འཛིན་འཆི་མེད་རིག་འཛིན་ལགས་ཀྱིས་ནད་ཡམས་གནས་སྟངས་ཁྲོད་མང་ཚོགས་བརྒྱ་ཆ་ ༨༠ ལྷག་ནས་སྔོན་འགྲོའི་འོས་བསྡུར་ཆ་ཤས་བཞེས་པ་འདི་ནི་ཚད་མཐོ་པོར་ངོས་འཛིན་གནང་གི་ཡོད་ཅེས་གསུངས་སོང་། སྤྱིར་ཡོ་རོབ་རྒྱལ་ཁབ་ནང་འདི་ལོའི་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་དེ་སུད་སི་དང་སྦེལ་ཇམ། དེ་བཞིན་དབྱིན་ཡུལ་བཅས་ས་གནས་འོས་བསྡུ་ལས་ཁང་གསུམ་གྱི་འོག་འོས་བསྡུའི་ལས་རིམ་གཉེར་ཡོད་པ་དང། གསར་འགོད་པས་ཁ་སང་སྦེལ་ཇམ་ས་གནས་འོས་བསྡུའི་འགན་འཛིན་དང་དོན་གཅོད་གཅིག་ལྕོགས་བཀྲིས་ཕུན་ཚོགས་ལགས་སུ་འབྲེལ་བ་ཞུས་པར་སྦེལ་ཇམ་ས་གནས་འོས་བསྡུ་ལས་ཁང་གི་ཁོངས་འོས་བསྡུའི་ཚོགས་ཆུང་ཁག་གི་གྲངས་བཤེར་ཁ་སང་ནས་དབུ་འཛུགས་གནང་ཡོད་པ་དང། འོས་བསྡུའི་ཕྱོགས་བསྡོམས་ཀྱི་གྲུབ་འབྲས་དེ་སྒྲིག་གཞིའི་དགོངས་དོན་ལྟར་དེ་རིང་དང་སང་ཉིན་གང་རུང་ཞིག་ལ་དོན་གཅོད་ཁང་གི་དྲ་རྒྱའི་ཐོག་བས་གསལ་བསྒྲགས་གནང་རྒྱུ་ཡིན་སྐོར་གསུངས་སོང་། དེ་མིན་དབྱིན་ཡུལ་ས་གནས་འོས་བསྡུ་ལས་ཁང་ནས་ས་གནས་ཀྱི་གནས་བབ་ལ་གཞིགས་ཏེ་ཁྱབ་ཁོངས་རྒྱལ་ཁབ་ཁག་གི་ཕྱོགས་བསྡོམས་སྔོན་འགྲོའི་འོས་བསྡུའི་གྲུབ་འབྲས་དེ་ གཟའ་འཁོར་འདིའི་རེས་གཟའ་སྤེན་པའི་ནང་ཚུད་ལ་གསལ་བསྒྲགས་གནང་འཆར་འདུག གཞི་རྩའི་དབུས་འོས་བསྡུ་ལས་ཁང་གིས་བཙན་བྱོལ་བོད་མིའི་སྔོན་འགྲོའི་འོས་བསྡུ་ཟིན་པའི་རྗེས་ཀྱི་ཕྱག་ཚོད་ཉི་ཤུ་རྩ་བཞིའི་རྗེས། ཕྱི་ལོ་ ༢༠༢༡ ཟླ་  ༡ ཚེས་ ༥ ནས་ཕྱི་ཚེས་ ༡༡ བར་ཉིན་གྲངས་ ༧ གྱི་རིང་འོས་ཤོག་གྲངས་བཤེར་གནང་རྒྱུའི་དུས་ཚོད་བཞག་ཡོད་པ་རེད།

ཁ་སང་ཕྱི་ཟླ་ ༡ ཚེས་ ༣ ཉིན་བྱེས་འཁོད་བོད་མི་ཚོས་མང་གཙོའི་ཁེ་དབང་ལོངས་སུ་སྤྱད་ནས་ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་མཉམ་ཞུགས་དང་འབྲེལ། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་སྩལ་གནང་བའི་མང་གཙོ་དེ་རྒྱལ་སྤྱིའི་མང་གཙོའི་རྒྱལ་ཁབ་ཁག་དང་དཔུང་པ་མཉམ་གཤིབ་ཀྱིས་འགྲོ་བཞིན་པ་འདིས་རྒྱ་གཞུང་ལ་བརྡ་ལན་གསལ་པོ་ཞིག་བཏང་ཡོད་པ་གསུངས་ཡོད།ཁ་སང་བཙན་བྱོལ་བོད་མིའི་གནས་ཡུལ་རྒྱ་གར་ནང་གི་གཞིས་སྒར་ཁག་ཏུ་བོད་མི་ཚོས་མང་གཙོའི་ཁེ་དབང་ལོངས་སུ་སྤྱད་ནས་ ༢༠༢༡ ལོའི་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་དངོས་སུ་དབུ་འཛུགས་གནང་ཡོད་པ་ལྟར། འདི་ག་རྒྱ་གར་བྱང་ཕྱོགས་༸རྒྱའི་བའི་བཞུགས་སྒར་དྷ་རམ་ས་ལར་མཚོན་ན་འོས་བསྡུ་གནང་ཡུལ་གྱི་ས་ཚིགས་ ༡༦ ཐོག་བོད་མི་སེར་སྐྱ་མི་མང་རྣམས་འཚང་ཁ་ཤིག་ཤིག་ངང་ཕེབས་ཏེ་འོས་ཤོག་འཕངས་ཡོད་ཅིང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་ལྷན་ཁང་ཁག་གི་བཀའ་བློན་རྣམས་དབུས་སྨན་རྩིས་ཁང་དུ་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུར་ཆ་ཤས་བཞེས་ཡོད།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་གསར་ཁང་ཁག་གི་བཅར་འདྲིར་དང་ལེན་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱེས་འཁོད་བོད་མི་རྣམས་འཛམ་གླིང་ཡུལ་གྲུ་གང་སར་གནས་ཀྱང་ཚང་མས་མང་གཙོའི་ཁེ་དབང་ལོངས་སུ་སྤྱད་ནས་འོས་བསྡུར་ཆ་ཤས་བཞེས་ཡོད་པ་དང་ལྷག་དོན་བོད་ནང་གི་བོད་མིའི་མངོན་འདོད་ནི་མང་གཙོ་ཡིན་པ་དང་། རྒྱ་ནག་ནང་ཡོད་པའི་རྒྱ་རིགས་མང་ཚོགས་རྣམས་ཀྱི་མངོན་འདོད་ཀྱང་མང་གཙོ་ཡིན་སྟབས། རྒྱ་གཞུང་གིས་བཙན་བྱོལ་བོད་མི་རྣམས་ཀྱིས་མང་གཙོའི་ལམ་བཟང་ཕྱག་བསྟར་གནང་ཕྱོགས་ལས་མིག་དཔེ་ལེན་དགོས་གལ་ཡིན་པ་གསུངས་ཡོད།དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་ནས་ཐེ་ཝན་དང་ཧོང་ཀོང་ནང་དམ་དྲག་བཀག་སྡོམ་ཤུགས་ཆེ་བྱེད་ཀྱི་ཡོད་ཀྱང་མང་ཚོགས་རྣམས་ཀྱིས་མང་གཙོ་ཕྱག་བསྟར་ཇི་ལྟར་གནང་བཞིན་པ་དེ་དག་ལ་བལྟས་ནས་མང་གཙོ་འདི་ཧ་ཅང་གལ་ཆེན་པོ་ཆགས་ཀྱི་ཡོད་པ་དང་ལྷག་དོན་བོད་ནི་རྒྱ་ནག་གིས་བཙན་བཟུང་འོག་ཉིན་རེ་བཞིན་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་དེ་ལྟར་ཡང་། བཙན་བྱོལ་བོད་མི་རྣམས་ཀྱིས་རྒྱ་གཞུང་གིས་ཀླ་ཀློ་ལྟ་བུའི་བྱ་སྤྱོད་སྤེལ་བཞིན་པའི་གནས་སྟངས་འོག་དཀའ་སྡུག་ཚད་མེད་མྱངས་དང་མྱོང་བཞིན་པའི་གཞིས་ལུས་བོད་མི་རྒྱ་ཆེ་མང་ཚོགས་དུས་ནམ་ཡང་བརྗེད་ཐབས་མེད་ཅེས་གསུངས་འདུགསྲིད་སྐྱོང་བློ་བཟང་སེང་གེ་མཆོག་གིས་ང་ཚོའི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཟུང་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཚད་ལྡན་ཞིག་རྩོད་ཀྱི་ཡོད་པ་ལྟར་མུ་མཐུད་ནས་དེ་ལྟར་གནང་རྒྱུ་ཡིན་ཞེས་འགྲེལ་བརྗོད་དང་སྦྲགས། ད་ལན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༧ པའི་བོད་མི་མང་སྤྱི་འཐུས་བཞེངས་མཁན་ཡོངས་ལ་རྗེས་སུ་ཡི་རང་དང་ལྷག་དོན་སྲིད་སྤྱི་གཉིས་ཀྱི་འོས་མིར་གང་ཟག་སུ་མི་སུ་འདྲ་ཞིག་ཕེབས་ཀྱང་། ཁོང་རྣམ་པས་བོད་མིའི་སྒྲིག་འཛུགས་ཆེད་དུ་ཐུགས་འཁུར་བཞེས་དགོས་པ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་དང་མཐུན་པའི་ཞབས་ཕྱི་ཞུ་དགོས་ཡོད་པར་བརྟེན་ཕྱག་ལས་གང་གནང་ཐམས་ཅད་ལམ་ལྷོང་ཡོང་བའི་སྨོན་འདུན་དང་ང་ཚོས་ཁོང་རྣམ་པར་རྡོག་རྩ་ཆིག་སྒྲིལ་གནང་ཐོག་རྒྱབ་སྐྱོར་གནང་དགོས་གལ་ཡིན་པ་སོགས་གསུངས་འདུགགཞི་རྩའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་སྐབས་འོས་འཕེན་པའི་མིང་གཞུང་དེབ་སྐྱེལ་གནང་མཁན་མི་གྲངས་ཁྲི་བརྒྱད་ལྷག་བྱུང་ཡོད་པ་དང་། ལྷག་པར་དུ་འདི་ལོ་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ཁྱོན་འོས་བསྡུ་གནང་ཡུལ་གྱི་སྡེ་ཚན་མི་འདྲ་བ་ ༥༠༠ ལྷག་གྲ་སྒྲིག་གནང་ཡོད་པར་མ་ཟད། བཙན་བྱོལ་བོད་མིའི་འོས་བསྡུ་ལས་རིམ་ཡོངས་རྫོགས་ལེགས་གྲུབ་ཀྱིས་ཚོུད་ ༢༤ རྗེས་སུ་ས་གནས་སོ་སོར་ཉིན་གྲངས་བདུན་གྱི་ནང་ཚུད་སྔོན་འགྲོའི་འོས་ཤོག་གྲངས་བཤེར་གནང་ནས་དབུས་འོས་བསྡུ་ལས་ཁང་ལ་ཕུལ་དགོས་ཀྱི་འདུག དབུས་འོས་བསྡུ་ལས་ཁང་ནས་ཕྱི་ཟླ་ ༢ ཚེས་ ༨ ཉིན་སྒྲིག་གསལ་འོས་དམིགས་དྲུག་ལས་མ་མང་བ་སྔོན་གྲོའི་འོས་གཞིར་གསལ་བསྒྲགས་གནང་གཏན་ཁེལ་ཡོད་པ་རེད།

ཁ་སང་ཕྱི་ལོ་ ༢༠༢༡ ལོའི་ཕྱི་ཟླ་ ༡ ཚེས་ ༣ ཉིན་བཙན་བྱོལ་བོད་མི་རྣམས་ཀྱིས་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་མཉམ་ཞུགས་གནང་ཡོད་པ་དང་། ཐོག་མའི་འཆར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམ་རྐྱེན་པས་ཐེངས་འདིའི་འོས་བསྡུ་ཆེན་མོར་དོ་ཕོག་དང་བར་ཆད་རིགས་འཕྲད་སྲིད་པར་ཐུགས་འཚབ་ཆེན་པོ་བྱུང་ཡོད་ཀྱང་། རྒྱལ་ཁབ་ཁག་ཅིག་ཏུ་སྔོན་འགྲོའི་འོས་བསྡུ་ཉིན་གཅིག་དང་ཁག་ཅིག་ཏུ་ཉིན་གཉིས་བཅས་སོ་སོར་སྔ་སྣུར་གནང་ཡོད་པ་དང་། གཞན་ཡང་ས་གནས་སོ་སོའི་མཐུན་རྐྱེན་ལ་གཞིགས་ཏེ་ཟུར་བཀག་ལ་བཞུགས་པའི་བོད་མི་མི་ཉུང་བ་ཞིག་འོས་བསྡུར་མཉམ་ཞུགས་གནང་མ་ཐུབ་པ་བྱུང་བ་མ་གཏོགས་ད་ལྟ་བར་དུ་ངལ་བ་ཆེ་བ་གང་ཡང་འཕྲད་མེད་པ་རེད།ད་ཆ་སྔོན་འགྲོའི་འོས་བསྡུ་ཆེན་མོ་ལེགས་གྲུབ་དང་བསྟུན་མང་ཚོགས་ཁྲོད་དྲི་བ་ཁག་ཅིག་གླེང་སློང་གནང་བཞིན་པ་ནི་འོས་སྒམ་བདག་གཉེར་དང་གྲངས་བཤེར་གནང་ཕྱོགས། དེ་བཞིན་འོས་བསྡུའི་གྲུབ་འབྲས་གསལ་བསྒྲགས་གནང་དུས་ནམ་ཡིན་དེ་དག་ཆགས་ཡོད་པ་རེད།རླུང་འཕྲིན་ཁང་ལ་ཁ་སང་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་སྔོན་འགྲོའི་འོས་བསྡུ་ཆེན་མོ་གྲུབ་ཟིན་རྗེས་ཕྱག་ཚོད་ཉི་ཤུ་རྩ་བཞིའི་རྗེས་སུ་་གྲངས་བཤེར་གནང་རྒྱུ་དབུ་འཛུགས་གནང་དགོས་སྟབས་ས་གནས་ཁག་ཁ་ཤས་ཀྱིས་སྔོན་འགྲོའི་འོས་བསྡུ་སྔ་སྣུར་གནང་རྐྱེན་འོས་སྒམ་ཉིན་གྲངས་གཅིག་དང་གཉིས་ཀྱི་རིང་ཉར་གནང་དགོས་པ་ཆགས་ཡོད་ཀྱང་། ས་གནས་ཁག་ཏུ་འོས་སྒམ་ཇི་ཡོད་རྣམས་བདག་གཉེར་ལེགས་པོ་གནང་གི་ཡོད་སྐོར་གསུངས་ཡོད། སྤྱིར་བཙན་བྱོལ་བོད་མའི་འོས་བསྡུའི་སྒྲིག་གཞིའི་ནང་གསལ་དོན་ལྟར་ན། འོས་སྒམ་ལ་རྟགས་ཐེལ་རྒྱག་པའི་སྐབས་ས་གནས་འོས་བསྡུ་ལས་ཁང་དུ་འགན་འཛིན་དང༌འགན་འཛིན་ལས་རོགས། ཟུར་དཔང་གི་གསུམ་ཆ་གཉིས་ངེས་པར་དུ་འཛོམས་དགོས་པ་དང་། བཙན་བྱོལ་བོད་མིའི་སྔོན་འགྲོའི་འོས་དེ་ཡོངས་སུ་གྲུབ་ཟིན་པའི་རྗེས་ཀྱི་ཕྱག་ཚོད་ཉི་ཤུ་རྩ་བཞིའི་རྗེས། ཕྱི་ལོ་ ༢༠༢༡ ལོའི་ཕྱི་ཟླ་  ༡ ཚེས་ ༥ ནས་ཕྱི་ཚེས་ ༡༡ བར་ཉིན་གྲངས་ ༧ རིང་འོས་ཤོག་གྲངས་བཤེར་གནང་རྒྱུའི་དུས་ཚོད་བཞག་ཡོད་པ་རེད།དེ་རྗེས་ཕྱི་ཚེས་ ༢༢ ནང་ཚུད་སྔོན་འགྲོའི་འོས་ཤོག་གི་བྱུང་སོང་བསྡད་གསུམ་གྱི་གནས་སྟངས་དང་གྲངས་བཤེར་ཕྱོགས་བསྡོམས་དབུས་འོས་བསྡུ་ལས་ཁང་དུ་འབྱོར་ནས་ཕྱི་ཟླ་ ༡ ཚེས ༢༩ ནས་ཕྱི་ཟླ་ ༢ ཚེས་ ༠༧ བར་ལ་དབུས་འོས་བསྡུ་ལས་ཁང་ནས་སྔོན་འགྲོའི་འོས་ཤོག་གྲངས་བཤེར་ཕྱོགས་བསྡོམས་གནང་རྗེས། ཕྱི་ལོ་ ༢༠༢༡ ལོའི་ཕྱི་ཟླ་ ༢ ཚེས་ ༠༨ ཉིན་སྲིད་སྤྱི་གཉིས་ཀྱི་སྔོན་འགྲོའི་འོས་གཞིའི་གསལ་བསྒྲགས་དང་། དེ་བཞིན་ཕྱི་ཟླ་ ༣ ཚེས་ ༢༡ ཉིན་དངོས་གཞིའི་འོས་གཞི་གསལ་བསྒྲགས་གནང་རྒྱུ་ཡིན་པ་རེད།དེའི་བར་ན། ཨ་རི་ནང་དེ་སྔ་ས་གནས་ཁག་གི་འོས་སྒམ་ལ་རྟགས་ཐེལ་རྒྱག་པའི་སྒོ་ནས་ས་གནས་འོས་བསྡུ་ལས་ཁང་གི་འགན་འཛིན་དང༌འགན་འཛིན་ལས་རོགས། ཟུར་དཔང་གི་གསུམ་ཆ་གཉིས་ངེས་པར་དུ་ཨ་རི་དོན་གཅོད་ལས་ཁུངས་སུ་ཕེབས་ནས་གྲངས་བཤེར་གནང་གི་ཡོད་རུང་། འདི་ལོར་ཏོག་དབྱིབས་གཉེན་རིམས་ཀྱི་རྐྱེན་གྱིས་དབུས་འོས་བསྡུ་ལས་ཁང་ནས་བཀའ་འཁྲོལ་གནང་བའི་སྒོ་ནས་ས་གནས་ཁག་གི་འོས་སྒམ་བསྣམས་ནས་སྐུ་ཚབ་དོན་ཁང་དུ་ཆེད་བཅར་ཞུ་མི་དགོས་པར་ས་གནས་འོས་བསྡུའི་ཁོངས་སུ་འཕྲལ་སེལ་གྱི་འོས་བསྡུའི་འགན་འཛིན་ལས་རོགས་བསྐོ་བཞག་གནང་སྟེ་ཕྱི་ཚེས་ ༥ ནས་ས་གནས་སོ་སོར་གྲངས་བཤེར་གནང་གི་ཡོད་པ་རེད་འདུག ཁ་སང་འདི་ག་རླུང་འཕྲིན་ཁང་གིས་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་སུ་ས་གནས་ཀྱི་འོས་བསྡུ་དང་འབྲེལ་བའི་སྐོར་ལ་བཀའ་འདྲི་ཞུས་སྐབས་འདི་ལོར་ཏོག་དབྱིབས་གཉན་རིམས་དང་ས་གནས་གཞུང་གི་ཁྲིམས་སྒྲིག་སོགས་དུ་མར་བརྟེན་ནས་འོས་བསྡུའི་ལས་རིམ་ལ་ཉིན་གྲངས་གཉིས་དང་གསུམ་བཅས་སོ་སོར་སྔ་སྣུར་བྱ་རྒྱུ་གཙོས། དེ་སྔ་ཨ་རིའི་ཁྱབ་ཁོངས་ས་གནས་ཁག་གི་འོས་ལེགས་གྲུབ་རྗེས་སུ་ས་གནས་འོས་བསྡུ་ལས་ཁང་གི་འཐུས་མི་གསུམ་ཆ་གཉིས་ནས་འོས་སྒམ་བསྣམས་ནས་དོན་ཁང་དུ་གྲངས་བཤེར་སླད་ཆེད་ཕེབས་གནང་དགོས་ཀྱི་ཡོད་སྟབས། དོན་ཁང་དུ་འཐུས་མི་བརྒྱ་ལྷག་ལྷན་འཛོམས་བྱུང་གི་ཡོད་སྟབས། འདི་ལོར་ཏོག་དབྱིབས་གཉན་རིམས་དང་ཡུལ་ཁྲིམས་ལ་གཞིགས་ཏེ་དབུས་འོས་བསྡུ་ལས་ཁང་ནས་བཀའ་འཁྲོལ་གནང་ཐོག་ས་གནས་འོས་བསྡུའི་ཁོངས་སུ་འཕྲལ་སེལ་གྱི་འོས་བསྡུའི་འགན་འཛིན་ལས་རོགས་བསྐོ་བཞག་གནང་ནས་ཕྱི་ཚེས་ ༥ ནས་ས་གནས་སོ་སོར་གྲངས་བཤེར་གནང་གི་ཡོད་དང་། གྲངས་བཤེར་གྲུབ་མཚམས་སུ་གློག་འཕྲིན་བརྒྱུད་ཕུལ་དགོས་ཀྱི་ཡོད་པར་མ་ཟད། གློག་འཕྲིན་བརྒྱུད་ཐོ་གཞུང་འབྱོར་མཚམས་སུ་རྒྱལ་སའི་ཁུལ་གྱི་ས་གནས་འོས་བསྡུའི་ཚོགས་ཆུང་གི་ཚོགས་མི་རྣམས་གདན་ཞུ་གནང་སྟེ་ཕྱོགས་བསྡོམས་གནང་ནས་གསལ་བསྒྲགས་གནང་རྒྱུ་ཡིན་པ་གསུངས་ཡོད།ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རི་ཁུལ་དུ་བོད་མི་ཆིག་ཁྲི་བཞི་སྟོང་ལྷག་ནས་དེབ་སྐྱེལ་གནང་ཡོད་པ་དང་། འོས་བསྡུ་བྱ་ཡུལ་གྱི་སྡེ་ཚན་སུམ་ཅུ་སོ་གཅིག་ཆེད་འཛུགས་གནང་སྐོར་གསུངས་སོང་།

ཁ་སང་དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། དབྱིན་ཡུལ་གཙོ་བོར་གྱུར་བའི་ཡུ་རོབ་རྒྱལ་ཁབ་ཁག་ནང་དུ་Mutant Covid ཞེས་པའི་ཏོག་དབྱིབས་གཉན་རིམས་གསར་མ་ཁྱབ་བརྡལ་གྱི་རླབས་རྒྱུན་གསར་བ་ཞིག་ཐོན་ཡོད་པར་བརྟེན་རྒྱལ་ཁབ་མང་པོ་ཞིག་གནས་སྐབས་སུ་ཁྱིམ་སྡོད་བཀག་རྒྱའི་འོག་གནས་ཡོད་སྟབས། རྒྱལ་ཁབ་དེ་དག་གི་ནང་གནས་བའི་བོད་མི་རྣམས་ཀྱིས་ཕྱི་ལོ་༢༠༢༡་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་འོས་བསྡུ་དེ་ཉིན་བརྒྱ་དུས་གཅིག་ལ་བྱེད་ཐུབ་མིན་གྱི་ཐད་ནས་བློ་འཚབ་བྱེད་གཞི་ཞིག་ཏུ་གྱུར་འདུགདེ་རིང་འདི་གའི་གསར་འགོད་པས་ཞལ་པར་བརྒྱུད་དབྱིན་ཡུལ་གྱི་སྐུ་ཚབ་དོན་གཅོད་ཁང་གི་ལས་བྱེད་དང་། ཁུལ་དེའི་འོས་བསྡུའི་འགན་འཛིན་གྱི་ལས་རོགས་ཚེ་རིང་མཚོ་མོ་ལགས་སུ་ད་ལྟའི་དབྱིན་ཡུལ་ནང་གི་རིམས་ནད་ཁྲོད་ཀྱི་བོད་མིའི་གནས་བབ་སྤྱི་དང་། དེ་བཞིན་མང་ཚོགས་ཀྱི་ཁྲོད་དུ་ཐུགས་འཚབ་འབྱུང་བཞིན་པའི་འོས་བསྡུའི་ལས་རིམ་དུས་ཐོག་ཏུ་ལེགས་འགྲུབ་འབྱུང་མིན་གྱི་ཐད་ནས་བཀའ་འདྲི་ཞུས་པར་ཁོང་གིས།  ད་ལྟའི་གནས་བབ་འདིའི་ཁྲོད་དེབ་སྐྱེལ་བྱས་ཟིན་པའི་ས་གནས་ཀྱི་བོད་མི་རྣམས་ཀྱིས་ཉིན་བརྒྱ་དུས་གཅིག་ལ་འོས་འཕེན་གནང་རྒྱུ་ཁག་པོ་ཆགས་ཡོད་པར་ངོ་སྤྲོད་གནང་བ་དང་སྦྲགས།  དེར་འབྲེལ་གྱི་གནས་བབ་ཀྱི་ཐད་ནས་དབུས་འོས་བསྡུ་ལྷན་ཁང་ལ་ཡང་སྙན་གསེང་ཞུས་ཡོད་སྐོར་གསུངས་ཡོད། གཞི་རྩའི་གོང་ནས་ཚེ་རིང་མཚོ་མོ་ལགས་ཀྱིས་ངོ་སྤྲོད་གནང་བ་ལྟར། དབུས་འོས་བསྡུ་ལས་ཁང་ལ་ས་གནས་ཀྱི་གནས་བབ་ཀྱི་ཐད་ནས་སྙན་གསེང་ཞུས་པ་དང་འབྲེལ་ནས་འདི་གའི་གསར་འགོད་པས་དབུས་འོས་བསྡུ་ལས་ཁང་དུ་དེར་འབྲེལ་གྱི་གནས་ཚུལ་ཐད་ནས་བཀའ་འདྲི་ཁག་ཅིག་ཞུ་ཐབས་བྱས་ཀྱང་།  དབུས་འོས་བསྡུ་ལས་ཁང་གིས་ཉིན་གཉིས་ཀྱི་རིང་ལ་ཚོགས་འདུ་ཡོད་པར་བརྗོད་དེ་བཅར་འདྲིའི་གོ་སྐབས་སྤྲད་མ་སོང་། རྩ་བའི་བདུན་ཕྲག་སྔོན་མ་ནས་བཟུང་དབྱིན་ཡུལ་གྱི་ཁུལ་དུ་ཏོག་དབྱིབས་གཉན་སྲིན་གྱི་ངོ་བོརའགྱུར་བ་ཐེབས་ནས་རིམས་ནད་ཁྱབ་བརྡར་ཤུགས་ཆེར་འགྲོ་འགོ་བརྩམས་ཡོད་སྟབས། ད་ཆ་དབྱིན་ཡུལ་གྱི་ནང་དུ་གནམ་གྲུ་སོགས་ཀྱི་འགྲོ་སྐྱོད་ཀྱི་ལམ་ཁ་ཡོངས་སུ་བཀག་ཡོད་པ་རེད། ཁ་སང་རྒྱ་གར་གྱི་གྲོང་ཁྱེར་ཆེ་ཁག་ལྔའིནང་དུ་ཡང་ཡང་དབྱིན་ཡུལ་གྱི་གནམ་གྲུར་བསྡད་ནས་ཡོང་མཁན་གྱི་རིམས་ནད་གསར་མ་ཕོག་མཁན་ཁག་ཅིག་གསར་དུ་ཤེས་རྟོག་བྱུང་ཡོད་པ་རེད་འདུག

ཏོག་དབྱིབས་གཉན་རིམས་ཁྱབ་གདལ་གྱི་རྐྱེན་གྱིས་སླེབས་ལ་ཉེ་བའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་གྲ་སྒྲིག་དང་འབྲེལ་ནས་བོད་མིའི་གཞིས་སྒར་ཁག་ཅིག་ཏུ་འོས་བསྡུ་གནང་ཡུལ་གྱི་ས་ཚིགས་དང་ལས་བྱེད་སོགས་མང་དུ་བཏང་སྟེ་གཉན་རིམས་སྔོན་འགོག་ཐད་དམིགས་བསལ་སྟ་གོན་གནང་རྒྱུ་རེད་འདུགཏོག་དབྱིབས་གཉན་རིམས་རྐྱེན་པས་འཛམ་གླིང་ཁྱོན་ཡོངས་ཀྱི་མི་རྒྱུ་གཉིས་ཀར་ངལ་བ་ཆེས་ཆེར་འཕྲད་བཞིན་པ་དང་ལྷག་དོན་ཉེ་བའི་ཆར་གཉན་རིམས་ཁྱབ་བརྡལ་གྱི་གནས་ཚུལ་དེ་ཉིན་རེ་བཞིན་ཇེ་མང་དུ་འགྲོ་བཞིན་པའི་ཛ་དྲག་གི་དུས་སྐབས་འདིར་རིང་མིན་ཕྱི་ཟླ་ ༡ ཚེས་ ༣ ཉིན་བཙན་བྱོལ་བོད་མི་གནས་སྡོད་བྱ་ཡུལ་ས་གནས་གང་སར་དབུས་འོས་བསྡུ་ལས་ཁུངས་ཀྱིས་བཀོད་ཁྱབ་ཕེབས་དོན་ལྟར་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་གནང་གཏན་ཁེལ་ཡོད་པ་རེད།རླུང་འཕྲིན་ཁང་གིས་བཞུགས་སྒར་དྷ་རམ་ས་ལར་ལ་གཙོས་བོད་མི་འདུ་གནས་ཁག་ཅིག་ཏུ་འོས་བསྡུའི་སྟ་གོན་དང་འབྲེལ་བའི་གནས་ཚུལ་རྒྱུས་ལོན་ཞུས་དོན་ལྟར། དྷ་རྨ་ས་ལར་མཚོན་ན་ཁ་ཉིན་དྷ་ས་ས་གནས་འོས་བསྡུ་ལས་ཁང་གིས་འོས་བསྡུ་གནང་ཡུལ་གྱི་ས་གནས་སམ་ས་ཚིགས་དང་དུས་ཚོད་གང་ཡིན་སྐོར་མང་ཚོགས་ལ་གསལ་བསྒྲགས་ཤིག་སྤེལ་བར་འདི་ལོ་དྷ་རམ་ས་ལར་སྔར་རྒྱུན་བཞིན་འོས་བསྡུ་བྱ་ཡུལ་གྱི་ས་ཚིགས་ཁག་བཅིུག་གྲ་སྒྲིག་གནང་ཡོད་པ་དེ་དག་ནི་གངས་སྐྱིད་དང་ལྷ་རྒྱལ་རི། ཤུག་གསེབ་བཙུན་དགོན། དྷ་སྟེང་བོད་ཁྱིམ་སློབ་གྲྭ། སཱ་ར་མཐོ་སློབ། ཤེས་རབ་དགའ་ཚལ་སློབ་གླིང་། དྷ་ཤོད་བོད་ཁྱིམ། གོ་པར་པུར་བོད་ཁྱིམ། ཅ་མོན་ཌ། ནོར་གླིང་རིག་གཞུང་གཅེས་སྐྱོང་ཁང་། དེ་བཞིན་རྒྱུད་སྟོད་གྲྭ་ཚང་བཅས་ཡིན་པ་བཀོད་འདུག ད་ལན་གཉན་རིམས་ཁྱབ་བརྡལ་གྱི་རྐྱེན་གྱིས་འོས་བསྡུ་བྱ་ཡུལ་གྱི་ས་གནས་གསར་པ་གསུམ་གྲ་སྒྲིག་གནང་ཡོད་པ་དེ་དག་ནི་སྨན་རྩིས་ཁང་དང་ཡོངས་གླིང་སློབ་གྲྭ  བོད་ཀྱི་ཟློས་གར་ཚོགས་པ་བཅས་ཆགས་ཀྱི་འདུགབོད་མི་འདུ་སྡོད་ཀྱི་གཞིས་སྒར་ཆེ་ཤོས་མོན་གྷོ་འདོད་རྒུ་གླིང་ནང་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ལས་རིམ་ནང་ད་བར་བོད་མི་ ༥༩༤༣  གྱིས་དེབ་སྐྱེལ་གནང་ཟིན་འདུག་པ་དང་ལྷག་དོན་ད་ལན་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ཁྲོད་གཞིས་སྒར་དེའི་ནང་སྤྱིར་འོས་བསྡུ་གནང་ཡུལ་གྱི་ས་གནས་ཁག་བདུན་སྔར་བཞིན་རང་འཇགས་གནས་མུས་རེད་འདུག་པ་དང་། དེའི་ནང་གསེས་དགའ་ལྡན་བླ་སྤྱི་དང་འབྲས་སྤུངས་བླ་སྤྱི་གཉིས་ཀྱི་དགེ་འདུན་པ་རྣམས་སྡེ་ཚན་བཞི་རེར་ཆ་བགོས་ཀྱིས་ཁྱོན་འོས་བསྡུ་བྱ་ཡུལ་གྱི་ས་ཚིགས་བཅུ་བཞི་ཙམ་ཞིག་གྲ་སྒྲིག་གནང་གཏན་འཁེལ་འདུགམོན་གྷོ་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་མོན་གྷོ་ནང་དེ་སྔ་གཉན་རིམས་ཕོག་མཁན་གྱི་གྲངས་ཐོ་མང་ཤོས་ཤིག་ཆགས་ཡོད་ཀྱང་རིམ་པས་སྔོན་འགོག་གི་བྱེད་སྒོ་ཁག་ལ་དམ་དོན་གནང་བ་བརྒྱུད་ཟླ་བ་སྔོན་མ་ནས་དེ་རིང་བར་གཞིས་སྒར་དེའི་ནང་ནད་པ་གཅིག་ཀྱང་མེད་པའི་གནས་སྟངས་ཤིག་ཆགས་ཡོད་སྐོར་དང་སྦྲགས། རིང་མིན་སླེབས་ལ་ཉེ་བའི་འོས་བསྡུ་ཆེན་མོའི་གྲ་སྒྲིག་དང་འབྲེལ་ནས་ས་གནས་འོས་བསྡུའི་ཚོགས་མི་དང་ཟུར་དཔང་རྣམ་པ་གཞིས་གྲོང་ཁག་དང་དགོན་སྡེ་ཁག་སོ་སོའི་ལས་ཀྱི་སྣེ་མོ་བ་རྣམ་པ་བརྒྱུད་ནས་མང་ཚོགས་ལ་འོས་བསྡུ་བྱ་ཡུལ་གྱི་ས་གནས་དང་དུས་ཚོད། དེ་བཞིན་འོས་བསྡུའི་སྐབས་སྒེར་སོ་སོས་སྔོན་འགོག་གི་བྱེད་སྒོ་གང་གནང་དགོས་མིན་སོགས་ཀྱི་གལ་ཆེའི་ལམ་སྟོན་ཁག་གནང་ཡོད་པ་གསུངས་སོང་། རྒྱ་གར་བྱང་ཕྱོགས་ལ་དྭགས་སུ་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་སྔོན་འགྲོའི་འོས་བསྡུ་ལས་རིམ་འདིའི་ནང་བོད་མི་དེབ་སྐྱེལ་གནང་མཁན་གྱི་ཁ་གྲངས་ ༤༠༠༠ ཙམ་བྱུང་འདུག་པ་དང་ལྷག་དོན་ལ་དྭགས་ནང་དེ་སྔ་ཏོག་དབྱིབས་གཉན་རིམས་ཕོག་མཁན་མང་པོ་བྱུང་རྐྱེན་ཐེངས་འདིར་འོས་བསྡུའི་གྲ་སྒྲིག་དང་འབྲེལ་བསོད་ནམས་གླིང་བོད་མིའི་གཞིས་ཆགས་ཀྱི་ཁྱབ་ཁོངས་བྱང་ཐང་ས་གནས་ཁག་བརྒྱད་པོར་སྤྱིར་བུ་ས་ཚིགས་རེ་རེ་དང་ལྷག་དོན་སླེ་རུ་རྒྱུན་དུ་གོ་སྒྲིག་ཞུ་རྒྱུའི་སྤྱིར་བུ་ས་ཚིགས་བཞིའི་ཐོག་ས་ཚིགས་གཉིས་མང་དུ་བཏང་ནས་ཁྱོན་སྤྱིར་བུ་ས་ཚིགས་བཅུ་བཞི་སྟ་གོན་གནང་རྒྱུ་རེད་འདུག རྩ་བའི་རླུང་འཕྲིན་ཁང་ནས་བོད་མི་འདུ་སྡོད་ཀྱི་ས་གནས་ཆེ་ཁག་གཞན་ཁག་ནང་འོས་བསྡུའི་ལས་རིམ་གྲ་སྒྲིག་དང་འབྲེལ་བའི་གནས་ཚུལ་རྒྱུས་ལོན་གནང་སྐབས་ས་གནས་ཁག་ཅིག་ཏུ་འོས་བསྡུ་བྱ་ཡུལ་གྱི་ས་ཚིགས་དེ་སྔ་བཞིན་རང་སོར་གནས་ངེས་ཡིན་པ་དང་ཡང་གཞིས་སྒར་ཁག་ཅིག་ཏུ་ད་ལྟའི་ཆར་འོས་བསྡུ་བྱ་ཡུལ་གྱི་ས་ཚིགས་གྲ་སྒྲིག་ཐད་མུ་མཐུད་གོ་བསྡུར་གནང་བཞིན་ཡོད་སྐོར་གསུངས་སོང་།

ཁོང་རང་ཉིད་ ༢༠༢༡ ལོའི་སྲིད་སྐྱོང་འོས་མིར་བཞེངས་ནས་བརྒྱུད་ལམ་ཁག་ལ་སྲིད་སྐྱོང་གི་འོས་མི་གཞན་ཚོ་དང་སྡིངས་ཆ་གཅིག་གི་སྟེང་བགྲོ་གླེང་གོ་སྒྲིག་ཞུ་རྒྱུའི་འབོད་སྐུལ་ཞུས་ཀྱང་། ད་ལྟའི་གནད་དོན་མང་པོ་དབང་གིས་བགྲོ་གླེང་དེ་ལྟར་གོ་སྒྲིག་ཞུ་ཐབས་བྲལ་སྟབས་མང་གཙོའི་འགྲོ་ལུགས་བཞིན་འོས་མི་དང་རྒྱ་ཆེའི་མི་མང་དབར་གོ་རྟོགས་སྤེལ་རྒྱུའི་གོ་སྐབས་ཚད་ལྡན་མ་བྱུང་བ་དང་། དེ་བཞིན་སྤྱི་ཚོགས་ཁྲོད་གལ་ཆེའི་ལས་འཆར་ཁག་ལ་བགྲོ་གླེང་ཟབ་མོ་མེད་པར་དེ་སྔ་ཕྱི་ལོ་ ༢༠༡༦ ལོའི་འོས་བསྡུ་བཞིན་གཞི་མེད་སྐྱོན་བརྗོད་བྱེད་འགོ་ཚུགས་པ་བཅས་རྒྱུ་མཚན་དོན་ཚན་གཉིས་ཀྱི་ཐོག་ནས་ ༢༠༢༡ ལོའི་སྲིད་སྐྱོང་གི་འོས་གཞིའི་ཁོངས་ནས་ཕྱིར་འཐེན་གནང་རྒྱུ་ཡིན་ཞེས་གསུངས་འདུག

དབུས་འོས་བསྡུ་ལས་ཁང་ནས་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་དང་འབྲེལ་ནས་འདི་ལོའི་ཕྱི་ཟླ་ ༩ ཚེས་ ༡ ནས་ཕྱི་ཟླ་ ༡༠ ཚེས་ ༡༥ བར་ཉིད་གྲངས་ ༤༥ དང་དེ་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༠ པའི་དགོངས་དོན་བཞིན་ཕྱི་ཟླ་ ༡༠ ཚེས་ ༡༦ ནས་ ༣༠ བར་འོས་འཕེན་པའི་མིང་ཐོ་སྣོན་འཕྲི་གནང་རྒྱུ་བཅས་ཀྱི་དུས་ཚོད་གནང་དོན་ལྟར་འདས་པའི་དུས་ཡུན་དེའི་རིང་རྒྱ་གར་གཙོས་ཕྱི་རྒྱལ་ཡུལ་གྲུ་ཁག་ ༢༦ ནས་སྲི་སྤྱི་གཉིས་ཀྱི་འོས་འཕེན་པའི་དེབ་སྐྱེལ་གནང་མཁན་ ༧༩༦༩༧ ལས་བྱུང་མེད་པ་དང་འབྲེལ་ཏེ་སླར་དེབ་འགོད་གནང་རྒྱུའི་གོ་སྐབས་གཉིས་པ་ཞིག་གནང་སོང་།དེ་རིང་ཟླ་ ༡༡ ཚེས་ ༡༦ ཉིན་གྱི་ཕྱེད་ཡོལ་ཚོུད་ ༣༌༠༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གི་འགན་འཛིན་དབང་འདུས་ཚེ་རིང་ལགས་དང་འགན་འཛིན་ལས་འཕར་དགེ་བཤེས་མ་བདེ་ལེགས་དབང་མོ་ལགས་གཉིས་དབུ་བཞུགས་ཀྱིས་གསར་འགོད་ལྷན་ཚོགས་ཤིག་སྐོང་ཚོགས་གནང་སྟེ། དབུས་འོས་བསྡུ་ལས་ཁང་ནས་སྲིད་སྤྱི་གཉིས་ཀྱི་འོས་བསྡུ་ཆེན་མོ་དང་འབྲེལ་འོས་འཕེན་པའི་མིང་གཞུང་དེབ་འགོད་གནང་རྒྱུའི་དུས་ཚོད་གནང་བ་བཞིན་ཕྱི་ཟླ་ ༡༠ ཚེས་ ༣༡ ཉིན་རྒྱ་གར་གཙོས་ཕྱི་རྒྱལ་ཁག་ ༢༦ ནང་ཡོད་པའི་ས་གནས་འོས་བསྡུ་ལས་ཁང་ ༥༨ ནས་འོས་འཕེན་པའི་མིང་གཞུང་དེབ་འགོད་དང་འབྲེལ་བའི་ལས་གཞི་གཙང་སྒྲིལ་ཟིན་ནས་ད་བར་རྒྱ་གར་ནང་ཁྱོན་བསྡོམས་འོས་འཕེན་པའི་གྲངས་ ༥༥༦༨༣ དང་ཕྱི་རྒྱལ་ཁག་ནང་འོས་འཕེན་པའི་གྲངས་ ༢༤༠༡༤ བཅས་ཁྱོན་བཙན་བྱོལ་ནང་སྲིད་སྤྱི་གཉིས་ཀྱི་འོས་འཕེན་པའི་དེབ་སྐྱེལ་གནང་མཁན་ ༧༩༦༩༧ བྱུང་ཡོད་པ་གསུངས་སོང་། ད་ལྟའི་ཆར་འོས་འཕེན་པའི་དེབ་སྐྱེལ་གནང་མཁན་ ༧༩༦༩༧ བྱུང་བ་དེ་ནི་དེ་སྔ་ ༢༠༡༦ ལོའི་འོས་བསྡུ་ཆེན་མོའི་སྐབས་སུ་དེབ་སྐྱེལ་བྱུང་བ་དང་བསྡུར་ཚེ་ ༡༠༨༨༠ ཉུང་བ་ཆགས་ཀྱི་ཡོད་པ་དང་། ཐེངས་འདིའི་གསར་འགོད་ལྷན་ཚོགས་ཐོག་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག་གིས་ཉེ་ལམ་ས་གནས་འོས་བསྡུའི་འགན་འཛིན་རྣམས་ལ་འོས་བསྡུའི་ཟབ་སྦྱོང་ཕུལ་སྐབས་ས་གནས་མང་དག་ཅིག་ནས་དགོངས་འཆར་བྱུང་བ་ལྟར་དབུས་འོས་བསྡུ་ལས་ཁང་གིས་དགོངས་པ་ཆེ་བཞེས་ཐོག་སླར་ཡང་ཕྱི་ལོ་ ༢༠༢༠ ཕྱི་ཟླ་ ༡༢ ཕྱི་ཚེས་ ༢༣ ནས་ ༢༨ བར་ཉིན་གྲངས་ལྔའི་རིང་མིང་གཞུང་དེབ་འགོད་གནང་རྒྱུའི་གོ་སྐབས་གཉིས་པ་ཞིག་གནང་སོང་བ་དང་། གོང་ཚེས་རྗེས་ཀྱི་འོས་འཕེན་པ་རང་ལོ་ ༡༨ ཧྲིལ་པོ་གསར་དུ་ལོན་རིགས་རྣམས་ ༢༠༢༡ ཕྱི་ཟླ་ ༡ ཚེས་ ༢ བར་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཙན་ ༡༨ ནང་གསེས་ ༣ པའི་༼ག༽ པ་གཞིར་བཟུང་འོས་འཕེན་པའི་མིང་གཞུང་དེབ་འགོད་གནང་ཆོག་པ་གསུངས་ཡོད།  རྩ་བའི་དེ་སྔ་ཕྱི་ལོ་ ༢༠༡༡ ལོའི་བཀའ་སྤྱིའི་འོས་བསྡུ་ཆེན་མོ་སྐབས་འོས་འཕེན་པའི་མིང་གཞུང་དེབ་སྐྱེལ་གནང་མཁན་ ༨༣༩༩༠ དང་། ༢༠༡༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་སྐབས་ཁྱོན་འོས་འཕེན་པའི་དེབ་སྐྱེལ་གནང་མཁན་ ༩༠༣༧༧ བྱུང་ཡོད། གསར་འགོད་ལྷན་ཚོགས་ཐོག་ཉེ་ལམ་ཨ་རིར་གནས་བཞུགས་བོད་རང་བཙན་འཐབ་རྩོད་པ་དང་རྩོམ་པ་པོ་འཇམ་དབྱངས་ནོར་བུ་ལགས་ཀྱིས་Youtube དྲ་ལམ་བརྒྱུད་བཙན་བྱོལ་བོད་མིའི་སྲིད་སྐྱོང་འོས་འདེམས་ཀྱི་སྐོར་ལ་བསམ་གཞིགས་གནང་བ་ཞེས་པའི་བཀའ་མོལ་ནང་དེ་སྔ་སྲིད་སྤྱི་གཉིས་ཀྱི་འོས་བསྡུའི་ནང་རང་བཙན་འཐབ་རྩོད་པ་རྣམས་བྱུས་གཏོགས་མེད་པ་དང་། དབུ་མའི་ལམ་ཁོ་རང་ཚོ་རང་འཁུར་རང་སིམ་ལྟ་བུར་གནང་ཡོད་སྐོར་གསུངས་པ་དང་འབྲེལ་ཏེ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག་གིས་སྐབས་དེའི་འོས་བསྡུའི་བརྒྱུད་རིམ་སྐབས་ཀྱི་ཐག་གཅོད་ཁག་འགྲེལ་བརྗོད་གནང་བ་དང་སྦྲགས། འཇམ་དབྱངས་ནོར་བུ་ལགས་ཀྱི་བཀའ་མོལ་དེ་ནི་ཧ་ཅང་གི་ཐལ་ཆའི་བཀའ་མོལ་ཞིག་ཡིན་པ་དང་། དབུས་འོས་བསྡུ་ལས་ཁང་འདི་ནི་འོས་བསྡུའི་ལས་རིམ་གནང་རྒྱུ་ལས་ལྟ་བ་དང་ལངས་ཕྱོགས་སོགས་གང་ཡིན་གྱི་གནས་སྟངས་ལ་རྩ་བ་ནས་གཟིགས་ཀྱི་མེད་པར་གསུངས་སོང་། འཇམ་དབྱངས་ནོར་བུ་ལགས་ནས་ཐེངས་འདིའི་འོས་བསྡུའི་སྐབས་བོད་ཀྱི་རྒྱལ་དར་སྤྱོད་མི་ཆོག་པ་བཟོས་པ་དེ་ནི་རྒྱལ་ཁབ་ཅིག་གི་འོས་འདེམས་མིན་པར་བཙན་བྱོལ་གྱི་བདེ་དོན་ཚོགས་པ་ཞིག་གི་འགོ་ཁྲིད་འདེམས་རྒྱུ་ཡིན་ནམ་གང་ཡིན་ཞེས་གསུངས་པར་གསལ་བཤད་གནང་ཡོད། རྩ་བའི་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༧ པའི་བོད་མི་མང་སྤྱི་འཐུས་རྣམ་པའི་སྔོན་འགྲོའི་འོས་བསྡུ་ཆེན་མོ་དེ་ ༢༠༢༡ ལོའི་ཕྱི་ཟླ་ ༡ ཚེས་ ༣ ཉིན་དང་དངོས་གཞིའི་འོས་བསྡུ་ཆེན་མོ་དེ་ཕྱི་ཟླ་ ༤ ཚེས་ ༡༡ བཅས་སུ་གནང་གཏན་འཁེལ་ཡོད་པ་དང་དབུས་འོས་བསྡུ་ལས་ཁང་གི་ཁྱབ་ཁོངས་སུ་རྒྱ་གར་གཙོས་ཕྱི་རྒྱལ་ཁག་ ༢༦ ནང་ས་གནས་འོས་བསྡུ་ལས་ཁང་གྲངས་ ༥༨ ནས་དེའི་ཐོག་གྲ་སྒྲིག་གནང་མུས་ཡིན་པ་རེད།