ཏོག་དབྱིབས་གཉན་རིམས་ཁྱབ་གདལ་གྱི་རྐྱེན་གྱིས་སླེབས་ལ་ཉེ་བའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་གྲ་སྒྲིག་དང་འབྲེལ་ནས་བོད་མིའི་གཞིས་སྒར་ཁག་ཅིག་ཏུ་འོས་བསྡུ་གནང་ཡུལ་གྱི་ས་ཚིགས་དང་ལས་བྱེད་སོགས་མང་དུ་བཏང་སྟེ་གཉན་རིམས་སྔོན་འགོག་ཐད་དམིགས་བསལ་སྟ་གོན་གནང་རྒྱུ་རེད་འདུག
ཏོག་དབྱིབས་གཉན་རིམས་རྐྱེན་པས་འཛམ་གླིང་ཁྱོན་ཡོངས་ཀྱི་མི་རྒྱུ་གཉིས་ཀར་ངལ་བ་ཆེས་ཆེར་འཕྲད་བཞིན་པ་དང་ལྷག་དོན་ཉེ་བའི་ཆར་གཉན་རིམས་ཁྱབ་བརྡལ་གྱི་གནས་ཚུལ་དེ་ཉིན་རེ་བཞིན་ཇེ་མང་དུ་འགྲོ་བཞིན་པའི་ཛ་དྲག་གི་དུས་སྐབས་འདིར་རིང་མིན་ཕྱི་ཟླ་ ༡ ཚེས་ ༣ ཉིན་བཙན་བྱོལ་བོད་མི་གནས་སྡོད་བྱ་ཡུལ་ས་གནས་གང་སར་དབུས་འོས་བསྡུ་ལས་ཁུངས་ཀྱིས་བཀོད་ཁྱབ་ཕེབས་དོན་ལྟར་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་གནང་གཏན་ཁེལ་ཡོད་པ་རེད།
རླུང་འཕྲིན་ཁང་གིས་བཞུགས་སྒར་དྷ་རམ་ས་ལར་ལ་གཙོས་བོད་མི་འདུ་གནས་ཁག་ཅིག་ཏུ་འོས་བསྡུའི་སྟ་གོན་དང་འབྲེལ་བའི་གནས་ཚུལ་རྒྱུས་ལོན་ཞུས་དོན་ལྟར། དྷ་རྨ་ས་ལར་མཚོན་ན་ཁ་ཉིན་དྷ་ས་ས་གནས་འོས་བསྡུ་ལས་ཁང་གིས་འོས་བསྡུ་གནང་ཡུལ་གྱི་ས་གནས་སམ་ས་ཚིགས་དང་དུས་ཚོད་གང་ཡིན་སྐོར་མང་ཚོགས་ལ་གསལ་བསྒྲགས་ཤིག་སྤེལ་བར་འདི་ལོ་དྷ་རམ་ས་ལར་སྔར་རྒྱུན་བཞིན་འོས་བསྡུ་བྱ་ཡུལ་གྱི་ས་ཚིགས་ཁག་བཅིུག་གྲ་སྒྲིག་གནང་ཡོད་པ་དེ་དག་ནི་གངས་སྐྱིད་དང་ལྷ་རྒྱལ་རི། ཤུག་གསེབ་བཙུན་དགོན། དྷ་སྟེང་བོད་ཁྱིམ་སློབ་གྲྭ། སཱ་ར་མཐོ་སློབ། ཤེས་རབ་དགའ་ཚལ་སློབ་གླིང་། དྷ་ཤོད་བོད་ཁྱིམ། གོ་པར་པུར་བོད་ཁྱིམ། ཅ་མོན་ཌ། ནོར་གླིང་རིག་གཞུང་གཅེས་སྐྱོང་ཁང་། དེ་བཞིན་རྒྱུད་སྟོད་གྲྭ་ཚང་བཅས་ཡིན་པ་བཀོད་འདུག ད་ལན་གཉན་རིམས་ཁྱབ་བརྡལ་གྱི་རྐྱེན་གྱིས་འོས་བསྡུ་བྱ་ཡུལ་གྱི་ས་གནས་གསར་པ་གསུམ་གྲ་སྒྲིག་གནང་ཡོད་པ་དེ་དག་ནི་སྨན་རྩིས་ཁང་དང་ཡོངས་གླིང་སློབ་གྲྭ བོད་ཀྱི་ཟློས་གར་ཚོགས་པ་བཅས་ཆགས་ཀྱི་འདུག
བོད་མི་འདུ་སྡོད་ཀྱི་གཞིས་སྒར་ཆེ་ཤོས་མོན་གྷོ་འདོད་རྒུ་གླིང་ནང་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ལས་རིམ་ནང་ད་བར་བོད་མི་ ༥༩༤༣ གྱིས་དེབ་སྐྱེལ་གནང་ཟིན་འདུག་པ་དང་ལྷག་དོན་ད་ལན་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ཁྲོད་གཞིས་སྒར་དེའི་ནང་སྤྱིར་འོས་བསྡུ་གནང་ཡུལ་གྱི་ས་གནས་ཁག་བདུན་སྔར་བཞིན་རང་འཇགས་གནས་མུས་རེད་འདུག་པ་དང་། དེའི་ནང་གསེས་དགའ་ལྡན་བླ་སྤྱི་དང་འབྲས་སྤུངས་བླ་སྤྱི་གཉིས་ཀྱི་དགེ་འདུན་པ་རྣམས་སྡེ་ཚན་བཞི་རེར་ཆ་བགོས་ཀྱིས་ཁྱོན་འོས་བསྡུ་བྱ་ཡུལ་གྱི་ས་ཚིགས་བཅུ་བཞི་ཙམ་ཞིག་གྲ་སྒྲིག་གནང་གཏན་འཁེལ་འདུག
མོན་གྷོ་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་མོན་གྷོ་ནང་དེ་སྔ་གཉན་རིམས་ཕོག་མཁན་གྱི་གྲངས་ཐོ་མང་ཤོས་ཤིག་ཆགས་ཡོད་ཀྱང་རིམ་པས་སྔོན་འགོག་གི་བྱེད་སྒོ་ཁག་ལ་དམ་དོན་གནང་བ་བརྒྱུད་ཟླ་བ་སྔོན་མ་ནས་དེ་རིང་བར་གཞིས་སྒར་དེའི་ནང་ནད་པ་གཅིག་ཀྱང་མེད་པའི་གནས་སྟངས་ཤིག་ཆགས་ཡོད་སྐོར་དང་སྦྲགས། རིང་མིན་སླེབས་ལ་ཉེ་བའི་འོས་བསྡུ་ཆེན་མོའི་གྲ་སྒྲིག་དང་འབྲེལ་ནས་ས་གནས་འོས་བསྡུའི་ཚོགས་མི་དང་ཟུར་དཔང་རྣམ་པ་གཞིས་གྲོང་ཁག་དང་དགོན་སྡེ་ཁག་སོ་སོའི་ལས་ཀྱི་སྣེ་མོ་བ་རྣམ་པ་བརྒྱུད་ནས་མང་ཚོགས་ལ་འོས་བསྡུ་བྱ་ཡུལ་གྱི་ས་གནས་དང་དུས་ཚོད། དེ་བཞིན་འོས་བསྡུའི་སྐབས་སྒེར་སོ་སོས་སྔོན་འགོག་གི་བྱེད་སྒོ་གང་གནང་དགོས་མིན་སོགས་ཀྱི་གལ་ཆེའི་ལམ་སྟོན་ཁག་གནང་ཡོད་པ་གསུངས་སོང་།
རྒྱ་གར་བྱང་ཕྱོགས་ལ་དྭགས་སུ་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་སྔོན་འགྲོའི་འོས་བསྡུ་ལས་རིམ་འདིའི་ནང་བོད་མི་དེབ་སྐྱེལ་གནང་མཁན་གྱི་ཁ་གྲངས་ ༤༠༠༠ ཙམ་བྱུང་འདུག་པ་དང་ལྷག་དོན་ལ་དྭགས་ནང་དེ་སྔ་ཏོག་དབྱིབས་གཉན་རིམས་ཕོག་མཁན་མང་པོ་བྱུང་རྐྱེན་ཐེངས་འདིར་འོས་བསྡུའི་གྲ་སྒྲིག་དང་འབྲེལ་བསོད་ནམས་གླིང་བོད་མིའི་གཞིས་ཆགས་ཀྱི་ཁྱབ་ཁོངས་བྱང་ཐང་ས་གནས་ཁག་བརྒྱད་པོར་སྤྱིར་བུ་ས་ཚིགས་རེ་རེ་དང་ལྷག་དོན་སླེ་རུ་རྒྱུན་དུ་གོ་སྒྲིག་ཞུ་རྒྱུའི་སྤྱིར་བུ་ས་ཚིགས་བཞིའི་ཐོག་ས་ཚིགས་གཉིས་མང་དུ་བཏང་ནས་ཁྱོན་སྤྱིར་བུ་ས་ཚིགས་བཅུ་བཞི་སྟ་གོན་གནང་རྒྱུ་རེད་འདུག
རྩ་བའི་རླུང་འཕྲིན་ཁང་ནས་བོད་མི་འདུ་སྡོད་ཀྱི་ས་གནས་ཆེ་ཁག་གཞན་ཁག་ནང་འོས་བསྡུའི་ལས་རིམ་གྲ་སྒྲིག་དང་འབྲེལ་བའི་གནས་ཚུལ་རྒྱུས་ལོན་གནང་སྐབས་ས་གནས་ཁག་ཅིག་ཏུ་འོས་བསྡུ་བྱ་ཡུལ་གྱི་ས་ཚིགས་དེ་སྔ་བཞིན་རང་སོར་གནས་ངེས་ཡིན་པ་དང་ཡང་གཞིས་སྒར་ཁག་ཅིག་ཏུ་ད་ལྟའི་ཆར་འོས་བསྡུ་བྱ་ཡུལ་གྱི་ས་ཚིགས་གྲ་སྒྲིག་ཐད་མུ་མཐུད་གོ་བསྡུར་གནང་བཞིན་ཡོད་སྐོར་གསུངས་སོང་།
