Day1

དེ་རིང་ཟླ་ ༣ ཚེས་ ༡༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་གཉིས་པའི་ཚོགས་ཐེངས་གཉིས་པའི་ཐོག་བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་སྤྱི་མོས་ཀྱིས་རྒྱབ་སྐྱོར་གནང་ཐོག་གཏན་འབེབས་གནང་སོང་། ཁ་སང་དང་དེ་རིང་བཅས་གྲོས་ཚོགས་སུ་བོད་ནང་གི་ད་ལྟའི་ཛ་དྲག་གནས་སྟངས་དང་འབྲེལ་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གི་ལས་རིམ་གནང་དོན་ལྟར་ཁྱོན་སྤྱི་འཐུས་ ༡༩ ནས་བགྲོ་གླེང་གི་ཆ་ཤས་བཞེས་ཏེ་བཀའ་བསྡུར་ལྷུག་པོ་གནང་ཡོད། སྐབས་དེར་སྤྱི་འཐུས་རྣམས་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་འཆར་ལ་སྤྱི་མོས་ཀྱིས་རྒྱབ་སྐྱོར་ཞུས་ཡོད་པ་དང་འབྲེལ། བཙན་བྱོལ་བོད་མི་ཚོས་ཞལ་ནས་གདུང་སེམས་བསྐྱེད་ཡོད་གཅིག་པོ་གསུངས་བ་ཙམ་མིན་པར་བཙན་བྱོལ་བོད་མི་ནང་ཁུལ་དབར་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མེད་པར་ཆིག་སྒྲིག་གྱི་ནུས་པ་མཉམ་སྤུངས་ཐོག་དོན་དམ་པའི་གདུང་སེམས་མཉམ་བསྐྱེད་གནང་གལ་ཡིན་པ་སོགས་གསུངས་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་སྐབས་དེར་བཀའ་ཤག་གི་ངོས་ནས་ཀྱང་བོད་ནང་གི་ཛ་དྲག་གནས་སྟངས་ཐོག་གི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཐོག་རྒྱབ་སྐྱོར་དང་སྦྲགས། གྲོས་ཆོད་དེ་ལས་འཕྲོས་ནས་ཁ་སང་དང་དེ་རིང་བཅས་སུ་སྤྱི་འཐུས་རེ་ཟུང་ནས་རང་ལུས་མེར་སྲེག་དང་འབྲེལ་བའི་དྲི་བ་ཁག་ཅིག དེ་དང་འབྲེལ་ནས་རྒྱལ་སྤྱིའི་ཁྲོད་ནས་བོད་དོན་ཐོག་གཟིགས་ཕྱོགས་ལ་འགྱུར་བ་ཡོད་མེད་སྐོར་བཀའ་འདྲི་ཞུས་ཡོད་སྟབས། སྲིད་སྐྱོང་མཆོག་གིས་རྒྱལ་སྤྱིའི་ཐོག་ནས་བོད་ནང་གི་ཛ་དྲག་གནས་སྟངས་ཐོག་ཐུགས་འཚབ་དང་བོད་དོན་ལ་རྒྱབ་སྐྱོར་གནང་མུས་ཡིན་པ་གསུངས་ཡོད།  དེ་བཞིན་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དེ་དང་འབྲེལ་ནས་སྤྱི་འཐུས་ཁག་ཅིག་གིས་ཆབ་སྲིད་དང་བོད་མིའི་ཆིག་སྒྲིལ། དེ་བཞིན་ཡིད་ཆས་དང་སེམས་ཤུགས་ཀྱི་ཆ་ནས་ཉམས་རྒུད་དུ་འགྲོ་ཡི་ཡོད་པའི་སྐོར་གསུང་མཁན་བྱུང་ཡོད་པ་དང་འབྲེལ་སྲིད་སྐྱོང་མཆོག་གིས་བཀའ་ཤག་གི་ངོས་འཛིན་གནང་ཕྱོགས་དེ་ལྟར་མིན་པ་གསུངས་སོང་། གཞན་ཡང་གྲོས་ཆོད་གྲོས་འཆར་དེ་དང་འབྲེལ་ཨ་རིའི་སྒོར་མོ་ས་ཡ་གཅིག་དང་ཕྱེད་ཀའི་གནད་དོན་དེའི་རྐྱེན་པས་སྤྱི་ཚོགས་ནང་དུ་འཁྲུག་ཐེབས་ཡོད་པའི་གནད་དོན་སྐོར་གླེང་སློང་བྱུང་ཡོད་སྟབས། སྲིད་སྐྱོང་མཆོག་ནས་བཀའ་ཤག་ནས་ཨ་སྒོར་ས་ཡ་གཅིག་དང་ཕྱེད་ཀའི་གནད་དོན་དེ་གྲོས་ཚོགས་ནས་བཀའ་འཁྲོལ་ཞུས་ཟིན་པ་ཞིག་ཡིན་པ་དང་། སྤྱི་ཚོགས་འཁྲུག་བཞིན་པ་དེ་ནི་མི་རེ་ཟུང་གིས་འགྲེལ་ལོག་གནང་རྐྱེན་ཡིན་པས་བགྲོ་གླེང་དང་གསལ་བཤད་རིམ་པས་ཨ་རིའི་དོན་གཅོད་ཀྱི་སྔོན་རྩིས་སྐབས་གནང་རྒྱུ་ཡིན་པ་སོགས་གསུངས་ཡོད་པ་རེད།

དེ་རིང་ཟླ་ ༣ ཚེས་ ༡༤ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་བ་དང་འབྲེལ། ཐེངས་འདིའི་སྔོན་རྩིས་གྲོས་ཚོགས་ཐོག་བོད་མིའི་སྒྲིག་འཛུགས་ནས་རྩིས་ལོ་ ༢༠༡༨་༡༩ ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་ཧིན་སྒོར་ས་ཡ་ ༢༦༥༣ ལྷག་འཆར་འབུལ་ཞུས་ཏེ་སྔ་ལོའི་སྔོན་རྩིས་བཀའ་ཁྲོལ་གཏན་འབེབས་བྱུང་བ་ལ་གཞིགས་ན་སྒོར་ས་ཡ་ ༢༡༨ ལྷག་གི་མང་བ་ཆགས་ཀྱི་འདུག དེ་རིང་སྔ་དྲོ་ཚོུད་ ༩།༣༠ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་བསྐྱངས་པ་དང་སྦྲགས། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་དང་པོ་ཚོགས་ཡོད། དབུ་འབྱེད་གསུང་བཤད་སྐབས་ཚོགས་གཙོ་མཆོག་གིས་ད་བར་བོད་རྒྱ་གཉིས་ཀྱི་དཀའ་ངལ་སེལ་རྒྱུའི་ཐད་ལ་གཉིས་སྨན་དབུ་མའི་ལམ་གྱི་ཐོག་ནས་རྒྱ་ནག་དང་ལྷན་སྔ་རྗེས་སུ་འབྲེལ་མོལ་ལམ་ནས་སེལ་རྒྱུར་འབད་བརྩོན་དུ་མ་གནང་ཡོད་པ་མ་ཟད། འབྲེལ་མོལ་དེ་ཡང་དོན་དང་ལྡན་པ་ཞིག་ཡོང་རྒྱུའི་ཐད་ལ་ཡིག་ངག་གཉིས་ཐོག་ནས་གོ་བརྡ་གསལ་པོ་སྤྲད་པ་དེ་ལྟར་ཡང་རྒྱ་གཞུང་གི་ངོས་ནས་དེའི་ཐོག་གོམ་པ་མདུན་བསྐྱོད་མ་བྱས་མེད་སྟབས་རང་གནས་སུ་ལྷག་ཡོད་པ་གསུངས་སོང་། ལྷག་པར་དུ་ད་བར་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དེའི་འོག་བོད་མིའི་ཞི་རྒོལ་རིམ་པ་བྱུང་བ་མ་ཟད་ཕྱོ་ལོ་ ༢༠༠༩ ལོ་ནས་ད་བར་བོད་ནང་བོད་མི་ ༡༥༢ ནས་རང་ལུས་མེར་བསྲེགས་གནང་ཡོད་པ་སོགས་ལུང་འདྲེན་གྱིས་རྒྱ་ནག་གཞུང་གིས་༸གོང་ས་མཆོག་གི་དགོངས་གཞི་དང་བོད་ནང་གི་བོད་མིའི་མངོན་འདོད། དེ་བཞིན་རྒྱལ་སྤྱིའི་སྤྱི་ཚོགས་ནས་བོད་དོན་ལ་རྒྱབ་སྐྱོར་བཅས་ཀྱི་གནས་བབ་ལ་བསྐྱར་དུ་རྟོག་ཞིབ་དང། ཕུགས་རྒྱང་རིང་པོའི་དགོངས་པ་བཞེས་ཐོག་བོད་རྒྱ་འབྲེལ་མོལ་བསྐྱར་མཐུད་ཡོང་རྒྱུར་འབོད་སྐུལ་གནང་ཡོད། དེ་བཞིན་བོད་གཞིས་བྱེས་གཉིས་སུ་གྱེས་ནས་མི་ལོ་ ༦༠ སོང་བའི་དུས་ཡུན་དེའི་ནང་བོད་མི་ཚོར་༸གོང་ས་མཆོག་གིས་ཐུགས་བརྩེ་བ་ཆེན་པོས་བསྐྱངས་དང་སྐྱོང་བཞིན་པར་བརྟེན་བོད་ཀྱི་ཆོས་དང་རིག་གཞུང། སྐད་ཡིག གོམས་སྲོལ། ལྷག་པར་དུ་བོད་ཀྱི་རྩ་དོན་ཐོག་རྒྱལ་སྤྱིའི་སྤྱི་ཚོགས་ནས་དོ་སྣང་དང་རྒྱབ་སྐྱོར་ཐོབ་པ་དེ་དག་མགོན་པོ་༸གང་ཉིད་མཆོག་གི་བཀྲིན་ཉག་གཅིག་ཡིན་པ་དང་། ད་ལྟའི་མི་རིབས་འདིས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གང་ཡིན་པ་དེ་རྒྱུན་སྐྱོང་ཚད་ལྡན་ཞིག་ཞུས་ནས་མ་འོངས་པའི་བོད་ཀྱི་ལོ་རྒྱུས་ཐོག་ནག་ཐིག་མ་ཕོག་པ་ཞིག་གནང་གནད་ཡིན་པ་གསུངས་ཡོད། ཐེངས་འདིའི་སྔོན་རྩིས་གྲོས་ཚོགས་དབུ་འཛུགས་མ་གནང་གོང་དུ་སྔ་དྲོ་ཚོགས་དུས་ལས་རིམ་ཐོག་གཙོ་བོ་སྔ་ལོ་ཕྱི་ལོ་ ༢༠༡༧ ཟླ་ ༡༡ ནས་ཉེ་ཆར་ཟླ་ ༣ ཚེས་ ༧ བར་བོད་དོན་ཆེད་རང་ལུས་མེར་བསྲེགས་གནང་མཁན་སྐུ་འདས་གྲོངས་སུ་གྱུར་བ་གྲྭ་བསྟན་དགའ་ལགས་དང་དཀོན་དཔེ་ལགས། ཚེ་ཁོ་ལགས་གསུམ་གྱིས་གཙོས་པའི་ད་བར་བོད་དོན་ཆེད་སྐུ་སྲོག་བློས་གཏོང་གནང་མཁན་རྒྱལ་གཅེས་པ་ཡོངས་ཀྱི་སྙིང་སྟོབས་ལ་ཆེ་བསྟོད་ཞུ་རྒྱུའི་གཞུང་འབྲེལ་མྱ་ངན་གུས་འདུད་དང་རྗེས་དྲན་གྱི་གྲོས་ཆོད་གྲོས་འཆར་་གྲོས་ཚོགས་སུ་སྙོན་སྒྲོན་གནང་ལྷན་གྲོས་ཚོགས་འཐུས་མི་ཚོ་སྐུ་བཞེངས་ཐོག་མྱ་ངན་གུས་འདུད་ཞུས་ཡོད་པ་རེད། ལྷག་པར་དུ་ད་ལན་གྲོས་ཚོགས་སུ་སྤྱི་འཐུས་ལྷན་ཚོགས་ནས་བཏོན་གནང་བའི་བོད་ནང་ཛ་དྲག་གནས་སྟངས་ལ་གཞིགས་པའི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་འཆར་དེའི་ནང་དོན་ཚན་ལྔ་ཡོད་པ་ལས། བོད་མི་རང་ལུས་མེར་བསྲེགས་གནང་མཁན་རྣམ་པའི་མངོན་འདོད་དང་ཞལ་ཆེམས་ལ་རྒྱ་གཞུང་གིས་འགན་ཁུར་བདག་སྤྲོད་དགོས་པ། རྒྱ་གཞུང་ནས་བོད་རྒྱ་འབྲེལ་མོལ་མྱུར་དུ་འགོ་འཛུགས་དགོས་པ། བོད་ནང་འཛིན་པའི་དྲག་རྩུབ་ཀྱི་སྲིད་བྱུས་འཕྲལ་དུ་འཚམས་འཇོག་དགོས་པ། གཙུག་ལག་ཁང་གི་མེ་སྐྱོན་ཐོག་རྒྱལ་ཚོགས་ཀྱིས་གཙོས་པའི་རྒྱལ་སྤྱིའི་རིག་དངོས་སྲུང་སྐྱོབ་ཚོགས་སྒེར་ཁག་ནས་ཞིབ་འཇུག་མཐིལ་ཕྱིན་གནང་རྒྱུར་ནན་སྐུལ། བོད་མི་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་དགོས་པ་དང་། དེ་དག་གི་འཕྲོད་བསྟེན་ལ་རྒྱ་གཞུང་ནས་འགན་ལེན་དགོས་པ། ད་བར་བོད་དོན་ལ་རྒྱབ་སྐྱོར་གནང་མཁན་རྒྱལ་སྤྱིའི་གཞུང་སྒེར་ཚོགས་ཁག་ལ་བཀྲིན་ཆེ་ཞུ་རྒྱུ་བཅས་རེད་འདུག སྐབས་དེའི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དང་འབྲེལ། གཞིས་ལུས་བོད་མིའི་སྙིང་སྟོབས་ལ་རྗེས་དྲན་དང་ཆེ་བསྟོད་ཞུས་པ་དང་འབྲེལ་བགྲོ་གླེང་ལྷུག་པོ་གནང་ཡོད། ལྷག་པར་དུ་སྤྱི་འཐུས་ཁག་ཅིག་ནས་ད་ལྟའི་དུས་སྐབས་འདིར་རྒྱལ་སྤྱིའི་རང་དབང་ཅན་གྱི་རྟོག་ཞིབ་ཀྱི་ཐོག་ནས་བོད་ནང་གི་བོད་མི་ཚོར་མང་མོས་འོས་བསྡུའི་ཐོབ་ཐང་ཞིག་སྤྲོད་རྒྱུའི་སྤོབས་པ་དང་གདེང་ཚོད་རྒྱ་ནག་གཞུང་ཡོད་མེད་བལྟ་རྒྱུའི་དུས་ཚོད་རན་ཡོད་སྐོར་གསུངས་ཡོད། སྤྱི་འཐུས་ལ་ལས་བོད་ནང་གི་བོད་མི་ཚོར་གདུང་སེམས་མཉམ་བསྐྱེད་ཚད་ལྡན་ཞིག་གནང་དགོས་གལ་ ཡིན་པ་དང། དེ་བཞིན་བོད་དོན་ལ་གདུང་སེམས་མཉམ་བསྐྱེད་ཐོག་ཚང་མ་ནུས་པ་མཉམ་སྤུངས་གནང་གནད་ཡིན་པའང་གསུངས་སོང་། རྩ་བའི་སྤྱི་འཐུས་ལྷན་ཚོགས་ཀྱི་ཕྱི་ཟླ་གསུམ་པའི་གྲོས་ཚོགས་ནི། སྔོན་རྩིས་གྲོས་ཚོགས་ཤིག་ཆགས་ཀྱི་ཡོད་པ་དང། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྒྱུན་གྲོན་དང། དམིགས་བཀར། དམིགས་བསལ། ཟུར་བཀོད། དེ་བཞིན་བར་སྐལ་བཅས་ལོ་འཁོར་མོ་གཅིག་གི་འགྲོ་གྲོན་ཁག འཛིན་སྐྱོང་བཀའ་ཤག་ནས་གྲོས་ཚོགས་ཐོག་འཆར་འབུལ་ཞུ་ཡི་ཡོད་པ་ལྟར། དེ་རིང་ཉིན་རྒྱབ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༨ དང་ ༢༠༡༩ ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་སྔོན་རྩིས་འཆར་འབུལ་ཞུས་ཡོད་པ་རེད། འདི་ལོའི་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༨ དང་ ༡༩ ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་འཆར་འབུལ་ཞུས་ཡོད་པ་དེ། ཧིན་སྒོར་ས་ཡ་ ༢༦༥༣ ལྷག་ཆགས་ཀྱི་འདུག་པ་དང། འདི་ནི་སྔ་ལོའི་སྔོན་རྩིས་བཀའ་འཁྲོལ་གཏན་འབེབས་གནང་བ་ལས་ཧིན་སྒོར་ས་ཡ་  ༢༡༨ ལྷག་མང་བ་བྱུང་འདུག་པ་མ་ཟད། བརྒྱ་ཆར་གཞིགས་ཚེ་ ༨.༩ ལྷག་ཙམ་འཕར་ཆ་བྱུང་འདུག  ད་རེས་འཛིན་སྐྱོང་བཀའ་ཤག་གི་ངོས་ནས་ལས་དོན་འཆར་སྒྲིག་དང་དགོས་དངུལ་རྒྱབ་གཉེར་དངུལ་འབོར་ཆེ་ཤོས་གྲོས་ཚོགས་སུ་འཆར་འབུལ་ཁོངས་སུ་ཤེས་ཡོན་ཐོག་ཧིན་སྒོར་ས་ཡ་ ༣༠༡ དང། མང་ཚོགས་ཀྱི་འཕྲོད་བསྟེན་ཆེད་སྒོར་ས་ཡ་ ༡༣༠ ལྷག ཉམ་ཐག་ལྟ་སྐྱོང་ལས་འཆར་ཆེད་སྒོར་ས་ཡ་ ༡༠༥  མང་ཚོགས་ཀྱི་བདེ་དོན་ཆེད་སྒོར་ས་ཡ་ ༡༧༤ བཅས་ཆགས་ཀྱི་འདུག དེ་བཞིན་དཔལ་འབྱོལ་བཀའ་བློན་མཆོག་གིས་རྩིས་ལོ་ ༢༠༡༨ དང་ ༢༠༡༩ ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་སྔོན་རྩིས་འཆར་འབུལ་ཞུས་གྲུབ་རྗེས་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་པདྨ་འབྱུང་གནས་ལགས་ནས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་ཞུས་ཡོད་པ་རེད། གཞི་རྩའི་སྔ་དྲོ་གྲོས་ཚོགས་ཀྱི་ཚོགས་ཐེངས་དང་པོའི་ཐོག་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་གྲོས་འཆར་ཐད་ལ་ཉེ་སྔོན་སྐུ་གཤེགས་རྒྱ་གར་གསར་འགོད་མཐུན་ཚོགས་ཀྱི་ཚོགས་གཙོ་དང་བོད་དོན་རྒྱབ་སྐྱོར་བ་དམ་པ་ Nand Kishore Trikha མཆོག་དང། བོད་མི་མང་སྤྱི་ཟུར་ཧོར་གཙང་བློ་བཟང་བསྟན་འཛིན་ལགས་བཅས་ལ་གཞུང་འབྲེལ་མྱ་ངན་གུས་འདུད་རྗེས་དྲན་ཞུས་པའི་གྲོས་ཆོད་གྲོས་འཆར་གྲོས་ཚོགས་སུ་སྙོན་སྒྲོན་གནང་ལྷན་གྲོས་ཚོགས་འཐུས་མི་ཚོ་སྐུ་བཞེངས་ཐོག་མྱ་ངན་གུས་འདུད་ཀྱང་ཞུས་ཡོད་པ་རེད།

དེ་རིང་ཟླ་ ༩ ཚེས་ ༡༩ ཉིན་ནས་དབུ་འཛུགས་ཀྱིས་ཚེས་ ༢༨ བར་འཚོག་རྒྱུའི་ཐེངས་འདིའི་གྲོས་ཚོགས་ཀྱི་ཚོགས་དུས་ཐོག་གཟུགས་གཞི་བདེ་མིན་རྐྱེན་པས་སྤྱི་འཐུས་གཅིག་མ་གཏོགས་གཞན་ཚང་མ་ཚོགས་བཅར་གནང་འདུག་པ་དང། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་གནམ་བསྟན་འཕེལ་མཆོག་ནས་ཚོགས་འདུ་དབུ་འབྱེད་ཀྱི་གསུང་བཤད་གནང་སྐབས་བོད་ནང་རྒྱ་གཞུང་གི་དྲག་གནོན་དང་སྡུག་རྩུབ་ཀྱི་སྲིད་བྱུས་ལ་ངོ་རྒོལ་ཞུ་སླད་ད་བར་རང་སྲེག་གནང་མཁན་བོད་མི་ ༡༤༩ བྱུང་བའི་གནས་སྟངས་ཆགས་ཡོད་ཀྱང་། རྒྱ་གཞུང་གིས་ཁོང་རྣམ་པའི་མངོན་འདོད་ལྟར་རྟོག་ཞིབ་དང་ཚུལ་མཐུན་གྱི་ལན་འདེབས་གང་ཡང་བྱས་མེད་པ་མ་ཟད། བོད་མིའི་ཐོག་ལ་སླངར་ལྷག་དམ་དྲག་གི་སྲིད་བྱུས་སྤེལ་མུས་ཡིན་པ་མངོན་གསལ་དང་སྦྲགས། ད་ལྟའི་གཞུང་འཛིན་པ་ཞི་ཅིང་ཕིང་གཙོས་ཏང་གི་ཚོགས་ཆེན་ ༡༩ པ་ཚོགས་པའི་རྗེས་འབྲེལ་འགོ་ཁྲིད་ཚོས་བོད་ཐོག་དགོངས་པ་ཆེ་བཞེས་གནང་དགོས་གལ་ཡིན་པ་དང་བོད་དོན་བསྐྱར་ཞིབ་ཡོང་རེ་དང་། བོད་མིའི་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་འབྲེལ་མོལ་ཡོང་ཐབས་གནང་གལ་ཡིན་པའི་འབོད་སྐུལ་གནང་སོང་། དེ་བཞིན་ཚོགས་གཙོ་མཆོག་ནས་དེ་སྔ་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རུ་ཁག་བོད་ནང་ཕེབས་རྒྱུའི་གོ་སྐབས་བྱུང་བའི་རྗེས་དང། འདི་ལོ་བཞུགས་སྒར་དུ་ཆེད་ཕེབས་ཀྱིས་༸གོང་ས་མཆོག་དང་མཇལ་འཕྲད་ཞུས་པ་མ་ཟད། བོད་དོན་ཐད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་པ། གཞན་ཡང་རྒྱལ་ཁབ་གཞན་གྱི་གྲོས་ཚོགས་འཐུས་མིའི་རུ་ཁག་དྷ་སར་ཕེབས་པ་སྤྱི་ཡོངས་ཀྱི་ཆ་ནས་བོད་དོན་ལ་རྒྱབ་སྐྱོར་ཚད་མཐོ་པོ་གནང་གི་ཡོད་སྟབས། བོད་མིའི་ངོས་ནས་རིག་པ་སྒྲིམ་ནས་བོད་དོན་ཐོག་ཕྱག་ལས་གནང་བ་ཡིན་ན་དོན་དམ་ཐོག་ནས་རྒྱབ་སྐྱོར་གནང་མཁན་ཤུགས་ཆེན་པོ་ཡོད་པ་གསུངས་སོང། ལྷག་པར་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་དགུང་ལོ་བགྲེས་པོ་ཕེབས་ཟིན་ཀྱང་བོད་མི་དང་བོད་དོན་ཆེད་དུ་སྐུ་ངལ་འཛེམས་གནང་བཞིན་པ་ལྟར་བོད་མི་རྣམས་ནས་ཀྱང་མགོན་པོ་༸གང་ཉིད་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་༸གོང་ས་མཆོག་གི་ཐུགས་དགོངས་བཞིན་འགན་ཁུར་བླངས་ཐོག་ཕྱག་ལས་གནང་གལ་ཡིན་པ་ནན་བརྗོད་གནང་ཡོད། ཚོགས་གཙོ་མཆོག་གི་དབུ་འབྱེད་གསུང་བཤད་གྲུབ་མཚམས་སུ་སྤྱི་འཐུས་ཁག་ཅིག་གིས་ཉེ་སྔོན་འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་དབར་ཡིག་འབྲེལ་མང་དག་ཞིག་གནང་པའི་ཁྲོད། འཛིན་སྐྱོང་བཀའ་ཤག་གིས་སྤྱི་འཐུས་ལ་བཏང་བའི་ཡིག་འབྲེལ་ཞིག་གི་ནང་བོད་མི་མང་སྤྱི་འཐུས་རྣམས་ནི་བཅའ་ཁྲིམས་རིན་པོ་ཆེར་བརྩི་འཇོག་བྱེད་མཁན་མིན་པ་སོགས་ཀྱི་འགྲེལ་བརྗོད་གནང་ཡོད་པ་ལུང་འདྲེན་གྱིས་བཅའ་ཁྲིམས་ལ་བརྩི་འཇོག་མི་བྱེད་མཁན་སྤྱི་འཐུས་རྣམས་ནས་ཁྲིམས་བཟོའི་ཚོགས་འདུ་ཚོགས་པ་ཡིན་ན་ཏག་ཏག་བསྡད་མིན་གྱི་ལས་རིམ་རྣམ་གཞག་ཕེབས་ཡོད་སྟབས། ཚོགས་གཙོ་མཆོག་གིས་གནད་དོན་དེའི་ཐད་ཉེ་ཆར་བཀའ་ཤག་ནས་དེ་སྔའི་ཡིག་འབྲེལ་རྣམས་ཕྱིར་བསྡུ་ཞུ་རྒྱུའི་ཕྱག་བྲིས་འབྱོར་དོན་ལྟར་གནད་དོན་དེའི་ཐད་ལ་གྲོས་བསྡུར་འཕར་མ་གནང་མི་དགོས་པ་གསུངས་པ་བཞིན་ལས་རིམ་མུ་མཐུད་ཕེབས་ཡོད་པ་རེད། དེ་དོན་སྤྱི་འཐུས་རྣམས་ནས་ཉེ་ལམ་དགོངས་པ་རྫོགས་པའི་བོད་མི་མང་སྤྱི་ཟུར་ཚེ་རིང་སྒྲོལ་མ་ལགས་དང། ཕྱི་ཟླ་ ༣ ཚོགས་དུས་རྗེས་ནས་བོད་དོན་ཆེད་རང་སྲེག་གནང་མཁན་བོད་ནང་གི་བོད་མི་བཞི་ད ང་རྒྱ་གར་ནང་གི་བོད་མི་གཉིས། ལྷག་དོན་ལོའི་ཟླ་ ༤ ཚེས་ ༢༡ ཉིན་དགོངས་པ་ཆོས་དབྱིངས་སུ་ཐིམ་པའི་འཇམ་དགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༣ རྗེ་བཙུན་བློ་བཟང་བསྟན་འཛིན་མཆོག་དང་ཟླ་བ་འདིའི་ཚེས་ ༡༤ ཉིན་གཡུང་དྲུང་བོན་གྱི་མངའ་བདག་༸སྐྱབས་རྗེ་སྨན་རི་ཁྲི་འཛིན་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་རྣམ་གཉིས་བཅས་ལ་སྤྱི་མོས་ཀྱི་ཐོག་ནས་གཞུང་འབྲེལ་གྱི་རྗེས་དྲན་དང་མྱ་ངན་གུས་འདུད་ཀྱི་གྲོས་ཆོད་གཏན་འབེབས་གནང་ཡོད་པ་རེད། སྐབས་དེར་ཆོས་རིག་བཀའ་བློན་མཆོག་ནས་དགའ་ལྡན་ཁྲི་ཐོག་ ༡༠༣ པ་དང་༸སྐྱབས་རྗེ་སྨན་རི་ཁྲི་འཛིན་ཞིང་གཤེགས་དམ་པ་རྣམ་གཉིས་ཀྱི་མཛད་རྗེས་ལ་ཡི་རངས་བསྔགས་བརྗོད་དང་བཀའ་དྲིན་རྗེས་དྲན་ཞུས་གནང་སོང། དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དབུ་འཛུགས་དང་བསྟུན། སྤྱི་འཐུས་ལྷན་ཚོགས་ཀྱི་རྒྱལ་སྒོའི་མདུན་དུ་ཞུ་གཏུགས་གནང་མཁན་ཁག་མི་འདྲ་བ་གསུམ་བྱུང་ཡོད་པ་དང། དེའང་ཇོ་ནང་འགྲོ་ཕན་ལྷན་ཚོགས་ཀྱིས་ཇོ་ནང་པར་ཆོས་བརྒྱུད་སྤྱི་མཚུངས་ཀྱི་ཐོབ་ཐང་དགོས་པའི་ཞུ་འབོད་དང། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་བཙན་བྱོལ་བོད་མིའི་སྤྱི་ཚོགས་ཁྲོད་བཀའ་སྤྱི་གཉིས་ཀྱི་འོས་བསྡུ་དང་འབྲེལ་བའི་ཐོག་བསམ་ཚུལ་བསྡུ་ལེན་བྱས་པའི་སྙན་ཐོའི་ནང་འཁོད་དོན་ལྟར། མི་མང་བརྒྱ་ཆ་ ༧༤ ཡིས་སྲིད་སྐྱོང་དང་སྤྱི་འཐུས་ཀྱི་འོས་བསྡུ་ཐེངས་གཉིས་ཀྱི་གནང་ལམ་སྔར་མུས་བཞིན་གནང་དགོས་པ་སོགས་ཀྱི་གནད་དོན་ཁག་ཅིག་འཁོད་ཡོད་པ་རྣམས་གསལ་བཏོན་གྱིས་གྲོས་ཚོགས་འཐུས་མི་རྣམ་པས་མི་མང་གི་མངོན་འདོད་དང་བཙན་བྱོལ་བོད་མིའི་གནས་བབས་དང་འཚམ་པའི་ཕྱག་ལེན་སྔར་ལྷག་གནང་སྐྱོང་ཡོང་བའི་ཞུ་འབོད་ཞུས་པ་མ་ཟད། དེ་བཞིན་བོད་མིའི་ཆིག་སྒྲིལ་ཚོགས་པས་ཡོངས་གླིང་སློབ་གྲྭའི་བདག་དབང་སྐོར་ལ་སྙན་ཞུ་ཕུལ་ཡོད་པའི་ནང་ཆེས་མཐོའི་ཁྲིམས་ཞིབ་ཁང་ནས་བཅད་ཁྲ་བཏང་བའི་དྷ་ས་མི་མང་ཡོངས་གླིང་སློབ་གྲྭ་སྤྱི་རྒྱུ་སྒེར་བདག་པ་སྤྱི་འཐུས་ཟླ་བ་ཚེ་རིང་གི་རྙོག་གླེང་གཙང་སེལ་ཞུ་རྒྱུ་ཐད། ཚོགས་པའི་ཚོགས་མི་ ༢༦༦༠ ལྷག་གི་མཚན་རྟགས་ཡོད་པའི་ཞུ་ཡིག་བཅས་གྲོས་ཚོགས་འཐུས་མི་རྣམས་ལ་ཕུལ་ཡོད་པ་རེད།

དེ་རིང་གྲོགས་ཚོགས་ཀྱི་ལས་ཉིན་དང་པོ་ཉིན་འཁྱོངས་ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ་དོན་ཚན་ ༧ ཅན་གྱི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་ལ་བགྲོ་གླེང་གནང་པའི་ཁྲོད། བཀའ་སྤྱི་གཉིས་ནས་གཞིས་བྱེས་བོད་མི་རྣམས་དང་ལྷག་པར་དུ་བཙན་བྱོལ་ནང་གི་བོད་རིགས་གཞོན་སྐྱེས་ཚོར་རང་ལུས་མེར་སྲེག་གནང་རྒྱུ་མེད་པར་འབོད་སྐུལ་གནང་སོང་། གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དེའི་ནང་བོད་མི་རང་སྲེག་གནང་མཁན་ཚོ་གཙོས་པའི་བོད་མི་བློས་གཏོང་བ་ཡོངས་ཀྱི་བློས་བཏང་ལ་རྗེས་སུ་ཡི་རངས་དང་༸ཀུན་གཟིགས་པཎ་ཆེན་རིན་པོ་ཆེ་མཆོག་གིས་དབུས་པའི་བཙན་འོག་ཏུ་མནར་གཅོད་མྱོང་བཞིན་པའི་བོད་མི་ཆབ་སྲིད་བཙོན་པ་རྣམས་གློད་བཀྲོལ་དང་རྒྱ་གཞུང་གི་མཁྲེགས་འཛིན་གྱི་སྲིད་བྱུས་མཚམས་འཇོག་སྐོར་སོགས་འཁོད་པ། སྤྱི་འཐུས་རྣམས་ནས་དོན་ཚན་དེ་དག་རེ་རེའི་ཐོག་ཚོར་ཤུགས་ཆེན་པོས་རྒྱབ་སྐྱོར་དང་སྦྲགས་བགྲོ་གླེང་གནང་སྐབས་སྤྱི་འཐུས་མང་ཆེ་བས་བཙན་བྱོལ་ནང་གི་བོད་པའི་ན་གཞོན་ཚོས་རང་ལུས་མེར་སྲེག་མི་གནང་པར་ཐབས་ལམ་གཞན་གྱི་ཐོག་ནས་བོད་ཀྱི་རྩ་དོན་རྩོད་དགོས་གལ་ཡིན་པའི་འབོད་སྐུལ་ནན་པོ་གནང་སོང་། འོན་ཀྱང་སྤྱི་འཐུས་གཞན་ཞིག་ནས་གྲོས་ཚོགས་རྭ་བ་འདིའི་ནང་རྒྱལ་གཅེས་དཔའ་བོ་དཔའ་མོ་ཚོས་སྐུ་ལུས་མེ་མཆོད་ཕུལ་བ་དེ་འགྲིག་མིན་དང་དེ་མ་འོངས་མུ་མཐུད་ཕུལ་དགོས་མིན་ཐོག་གླེང་སློང་གནང་པ་ལས་རྒྱལ་གཅེས་པ་དེ་དག་གིས་མེ་མཆོད་ཕུལ་དགོས་པའི་རྒྱུ་མཚན་གང་ཡིན་དང་རེ་འདོད་ཇི་ལྟར་བསྒྲུབ་མིན་ཐད་ཐུགས་བསམ་བཞེས་ནས་བགྲོ་གླེང་གནང་ན་དགེ་མཚན་ཆེ་བར་གཟིགས་ཀྱི་ཡོད་པ་གསུངས་སོང་བ་དང་། འཛིན་སྐྱོང་བཀའ་ཤག་ལ་རང་ལུས་མེར་སྲེག་གི་གནད་དོན་ཐད་ལ་ལངས་ཕྱོགས་གསལ་པོ་དགོས་སྐོར་གསུངས་ཡོད། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་བའི་ཁྲོད་བོད་རྒྱ་འབྲེལ་མོལ་གྱི་གནད་དོན་སྐོར་ལས་འཕྲོས་ཏེ། འདས་པའི་ལོ་རྒྱུས་དང་ཉམས་མྱོང་ལ་གཞིར་བཅོལ་ཐོག་ གལ་ཏེ་རྒྱ་ནག་ནང་འགྱུར་བ་ཕྱིན་པའི་དབང་དུ་བཏང་ན་དེའི་ཐད་བཀའ་ཤག་གིས་ད་ལྟ་ནས་གྲ་སྒྲིག་གང་ཡོད་མེད་བཅས་ཀྱི་དྲི་བ་གནང་པ་མ་ཟད། རྒྱལ་སྤྱིའི་ཚོགས་ཁག་ལ་ཞུ་གཏུགས་གནང་པ་ཙམ་མིན་པར་བཀའ་སྤྱི་གཉིས་ནས་མཉམ་འབྲེལ་ཐོག་གཞི་རྒྱ་ཆེ་བའི་ལས་འགུལ་སྤེལ་རྒྱུའི་དུས་ལ་སླེབས་ཡོད་སྐོར་སོགས་གསུང་མཁན་བྱུང་སོང། གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་མཚམས་སུ་སྲིད་སྐྱོང་བློ་བཟང་སེང་གེ་མཆོག་གིས་སྤྱི་འཐུས་རྣམ་པའི་དྲི་བ་ཁག་ལ་ལན་འདེབས་གསལ་བཤད་གནང་སྐབས་ཐོག་མར་བཀའ་ཤག་གི་རང་ལུས་མེར་སྲེག་ཐོག་འཛིན་པའི་སྲིད་བྱུས་དེ་གསལ་པོ་ཡིན་ཞེས་འགྲེལ་བརྗོད་དང་འབྲེལ། གཞིས་བྱེས་བོད་མི་རྣམས་དང་ལྷག་པར་དུ་བཙན་བྱོལ་ནང་གི་བོད་མི་གཞོན་སྐྱེས་ཚོར་རང་ལུས་མེར་སྲེག་གནང་རྒྱུ་མེད་པར་འབོད་སྐུལ་གནང་སོང་། སྲིད་སྐྱོང་མཆོག་གིས་དབུ་མའི་ལམ་གྱི་གནད་དོན་དང་འབྲེལ་ཏེ་༸གོང་ས་༸སྐྱབས་མགོན་ཆེན་པོ་མཆོག་མཆོག་ནས་ཐུགས་སྣང་གནང་མུས་བར་དུ་བོད་མིའི་སྒྲིག་འཛུགས་བཀའ་ཤག་ནས་ཀྱང་དབུ་མའི་ལམ་གྱི་སྲིད་བྱུས་དེ་གལ་ཆེ་དོན་ཆེར་བརྩི་ཐོག་སྲིད་བྱུས་དེའི་ཐོག་ནས་བོད་རྒྱ་འབྲེལ་མོལ་སླར་གསོ་བརྒྱུད་བོད་མིར་མིང་དོན་མཚུངས་པའི་རང་སྲིད་རང་སྐྱོང་ཐོབ་ཕྱིར་ད་བར་འབད་བརྩོན་གནང་མུས་ཡིན་པ་དང་མ་འོངས་པའང་མུ་མཐུད་གནང་རྒྱུའི་ཆོད་སེམས་གཏན་པོ་ཡོད་པ་གསུངས་སོང་།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་༢༠༠༩ནས་བོད་དོན་ཆེད་རང་ལུས་མེར་སྲེག་གནང་མཁན་རྒྱལ་གཅེས་པ་རྣམས་ཀྱིས་གཙོས་ད་བར་བོད་དོན་ཆེད་སྐུ་སྲོག་བློས་གཏོང་གནང་མཁན་ལ་མྱ་ངན་རྗེས་དྲན་དང་ད་ལྟའི་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་བསྐྱེད་ཞུས་ཏེ་སྔོན་རྩིས་གྲོས་ཚོགས་དབུ་འཛུགས་གནང་སོང་། དེ་རིང་སྔ་འདྲོ་ཚོུད་༩།༣༠ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་བསྐྱངས་པ་དང་སྦྲགས། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་ལས་ཉིན་དང་པོ་ཚོགས་ཡོད། དབུ་འབྱེད་གསུངས་བཤད་སྐབས་ཚོགས་གཙོ་མཆོག་གིས་འདས་པའི་ལོ་ཤས་ནང་དུ་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་བཟང་ཕྱོགས་ཀྱི་རྣམ་པ་ལས་ལྡོག་སྟེ། བོད་མིའི་ཆོས་དད་རང་དབང་རྡོག་རོལ་དང་ཁོར་ཡུག་གཏོར་བཤིག་མཚོན། དམྱལ་བ་མི་ཡུལ་ལྟ་བུར་འགྱུར་བའི་གནས་སྟངས་ཆགས་ཡོད་པ་འགྲེལ་བརྗོད་གནང་སོང་། ལྷག་པར་སྲིད་འཛིན་ཞི་ཅིང་ཕིང་གིས་ལས་ཡུན་གཉིས་པའི་ནང་བོད་རྒྱ་འབྲེལ་མོལ་ཡོང་རྒྱུའི་རེ་བ་ཡོད་པ་ལྟ་བུ་མཐོང་གི་ཡོད་ཅེས་གསུང་སྟེ་རྒྱ་ནག་གི་འགོ་ཁྲིད་ཚོས་ཀྱང་མཁྲེགས་བཟུང་གི་སྲིད་བྱུས་དོར་བའི་ཐོག་ནས་དེའི་ཐོག་བསམ་ཤེས་གནང་དགོས་པའི་བོད་འབོད་སྐུལ་ནན་པོ་ཞུས་སོང། ད་དུང་དེ་རིང་གྲོས་ཚོགས་ཚོགས་དུས་གསུམ་པའི་ཉིན་དང་པོའི་ཐོག ཕྱི་ལོ་༢༠༠༩ནས་བོད་དོན་ཆེད་རང་ལུས་མེར་སྲེག་གནང་མཁན་རྒྱལ་གཅེས་པ་རྣམས་ཀྱི་གཙོས་པས་ད་བར་བོད་དོན་ཆེད་སྐུ་སྲོག་བློས་གཏོང་གནང་མཁན་ཡོངས་ལ་མྱ་ངན་གུས་འདུས་ཀྱི་རྗེས་དྲན་དང་། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་ཡོད་པ་མ་ཟད། ཉིན་རྒྱབ་ཏུ་བོད་མིའི་སྒྲིག་འཛུགས་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་བོད་མིའི་སྒྲིག་འཛུགས་ཀྱི་རྩིས་ལོ་༢༠༡༧དང་༢༠༡༨ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་སྔོན་རྩིས་འཆར་འབུལ་ཞུས་གནང་ཡོད་པ་རེད། འདི་ལོའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་འཆར་འབུལ་ཞུས་ཡོད་པ་དེ། ཧིན་སྒོར་ས་ཡ་༤༣༨༧ལྷག་ཙམ་ཆགས་ཀྱི་འདུག་པ་དང། འདི་ནི་སྔ་ལོའི་སྔོན་རྩིས་གཏན་འབེབས་གནང་པ་ལས། ཧིན་སྒོར་ས་ཡ་༡༡༣ལྷག་ཙམ་གྱི་མང་བ་ཆགས་འདུག་པ་དང། ད་རེས་འཛིན་སྐྱོང་བཀའ་ཤག་ངོས་ནས་ལས་དོན་འཆར་སྒྲིག་དང་དགོས་དངུལ་རྒྱབ་གཉེར་དངུལ་འབོར་ཆེས་ཤོས་དེ་ཤེས་ཡོན་ཐོག་ལ་ཞུས་འདུག དེ་བཞིན་དཔལ་འབྱོར་བཀའ་བློན་མཆོག་གིས་རྩིས་ལོ་༢༠༡༧དང་༢༠༡༨ལོའི་ལས་ཁུངས་མ་ལག་དང་བཅས་པའི་ཕྱོགས་བསྡོམས་ཚོད་དཔག་འགྲོ་གྲོན་སྔོན་རྩིས་འཆར་འབུལ་ཞུས་གྲུབ་རྗེས་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་ཡང་ཞུས་ཡོད་པ་རེད། གཞི་རྩའི་དེ་རིང་སྔ་དྲོ་གྲོས་ཚོགས་ལས་ཉིན་དང་པོའི་ཐོག སྤྱི་ཟུར་དམ་པ་ཨ་འབྱུང་རྡོ་རྗེ་ཚེ་རིང་ལགས་དང། དགའ་ལྡན་ཕོ་བྲང་གི་གཞུང་ཞབས་ཟུར་པ་སྣར་སྐྱིད་ངག་དབང་དོན་འགྲུབ་ལགས་དམ་པ་དེ་ཉིད། དེ་བཞིན་ཚེ་འདས་སྤྱི་ཟུར་རྣམ་རྒྱལ་དབང་འདུས་ལགས་བཅས་ཀྱིས་ད་བར་སྐུ་ཚེ་ཧྲིལ་པོ་བོད་བསྟན་སྲིད་མི་རིགས་དང་བཅས་པར་སྲི་ཞུ་ཞབས་འདེགས་ཞུས་པར་ཆེ་བསྟོད་ཀྱིས་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་འཇོག་ཡོད་པ་མ་ཟད་། ཤུལ་ལུས་ནང་མི་ཚོར་གདུང་སེམས་མཉམ་བསྐྱེད་སོགས་ཞུས་ཡོད་པ་རེད།

དེ་རིང་ཟླ་ ༩ ཚེས་ ༢༠ ཉིན་བོད་མི་མང་སྤྱི་འཐུས་རྣམ་པས་གྲོས་ཚོགས་ཀྱི་ལས་ཉིན་དང་པོ་དེ་གཙོ་ཆེ་བོད་ནང་གི་ཛ་དྲག་གནས་སྟངས་ཐོག་ལ་བགྲོ་གླེང་གནང་པ་མ་ཟད། ལྷག་པར་དུ་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་ནང་གི་གནས་སྟངས་དེ་ཉེན་ཁ་ཆེ་རུ་འགྲོ་ཉེན་ལ་གཞིགས་ཏེ་རྒྱ་གཞུང་ནས་འབྲེལ་མོལ་བསྐྱར་མཐུད་གནང་གལ་ཡིན་པ་གསུངས་གནང་སོང་། དེའང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་གཙོས་སྤྱི་འཐུས་རྣམ་པ་དང། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་ལྷན་བཞུགས་ཐོག་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་དབུ་འཛུགས་གནང་ཡོད་པ་རེད། ད་ལན་ཚོགས་རྒྱུའི་ཕྱི་ཟླ་དགུ་པའི་གྲོགས་ཚོགས་ལ་ལས་བསྡོམས་གྲོས་ཚོགས་ཞེས་གསུངས་སྲོལ་ཡོད་པ་ལྟར། ཉིན་གྲངས་དགུའི་རིང་གི་གྲོས་ཚོགས་སྐབས་གཙོ་བོ་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ཕྱི་ལོ་ ༢༠༡༥་༡༦ ལོའི་ལོ་འཁོར་ལས་བསྡོམས་ཐོག་ལ་གྲོས་ཚོགས་འཐུས་མི་རྣམ་པས་བགྲོ་གླེང་བཀའ་བསྡུར་དང་གསལ་བཤད་བཅས་ཡོང་གི་ཡོད་པ་རེད། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དེ་རིང་སྔ་དྲོ་གྲོས་ཚོགས་འཐུས་མི་རྣམ་པར་འཚམས་འདྲི་དང་སྦྲགས་ཚོགས་འདུ་དབུ་འཛུགས་ཀྱི་གསུང་བཤད་གནང་སོང་བ་དང་། སྐབས་དེར་ཁོང་གིས་འདས་པའི་ཟླ་བ་གཉིས་ཙམ་གྱི་ནང་སྤྱི་འཐུས་རྣམ་པ་བོད་མིའི་གནས་སྡོད་ཁག་ཏུ་འཚམས་གཟིགས་དང་པོ་གྲུབ་མ་ཐག་པ་ཆགས་སྐོར་དང་། སྤྱི་ཡོངས་འཚམས་གཟིགས་གང་ལེགས་བྱུང་ཡོད་པ་བསྔགས་བརྗོད་གནང་སོང་བ་དང་སྦྲགས།  འཛིན་སྐྱོང་དང་འབྲེལ་བའི་གནད་དོན་ཁག་ལྷན་ཁང་ཁག་ཏུ་ཕུལ་ཡོད་པ་རྣམས་ལ་ཞིབ་འཇུག་དང་ལས་འཆར་ཚགས་ཚུད་ཡོང་བའི་ཡིད་ཆེས་ཡོད་པ་གསུངས་ཡོད། བོད་ནང་གི་གནས་སྟངས་སྐོར་ལ་དང་འབྲེལ་ཚོགས་གཙོ་མཆོག་གིས་རྒྱ་གཞུང་གིས་ལོ་ལྔ་ཚན་གྱི་འཆར་གཞི་སྔ་རྗེས་དང་། དེ་བཞིན་ད་ཆ་རྒྱ་ནག་གི་གྲོང་ཁྱེར་ཁྲེན་ཏུའུ་ནས་ལྷ་ས་བར་དང་། གཞིས་ཀ་རྩེ་ནས་གྲོ་མོ་བར། སྐྱིད་གྲོང་ནས་བལ་ཡུལ་ས་མཚམས་བར་སོགས་བོད་ནང་དུ་མེ་འཁོར་ལྕགས་ལམ་རྒྱ་བསྐྱེད་གཏོང་བཞིན་པ་སོགས་ལས་བོད་ཀྱི་ཐོུང་མ་ཡིན་པའི་ཆོས་རིག་དང་སྐད་ཡིག ཁོར་ཡུག་ཐོག་ལ་ཛ་དྲག་ཆེ་བ་དང་ཉེན་ཁ་ཆེ་རུ་འགྲོ་ཉེན་ཆགས་ཡོད་པ་གསུངས་པ་དང་ཆབས་ཅིག རྒྱ་ནག་གཞུང་གིས་ད་བར་བོད་ཐོག་འཛིན་སྲིད་བྱུས་ལ་བསྐྱར་ཞིབ་བྱེད་ནས་༸གོང་ས་མཆོག་གི་༸སྐུ་ཚབ་དང་ལྷན་འབྲེལ་མོལ་བསྐྱར་མཐུད་ཡོང་རྒྱུའི་དགོངས་བཞེས་གནང་གལ་ཡིན་པ་གསུངས་ཡོད། ལྷག་པར་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འདས་མ་ཐག་པའི་འོས་བསྡུའི་ལས་རིམ་ལས་བོད་མི་ནང་ཁུལ་ལུང་ཚན་དང་ཆོལ་ཁའི་འཐེན་འཁྱེར་གྱི་རྣམ་པ་ཐོན་ཡོད་པ་དང་། དེ་བཞིན་༸གོང་ས་མཆོག་ཐུགས་ཕམ་བྱུང་ཡོད་སྐོར་གསུངས་སྟེ། མ་འོངས་ན་དེ་ལྟར་མི་ཡོང་བའི་སླད་ཉེ་ཆར་༸གོང་ས་མཆོག་གིས་ཨ་རིར་ཆིབས་སྒྱུར་མཛད་སྐབས་ད་ཆ་ནམ་མཁའ་གཡའ་དག་དང་ས་གཞི་རྡུལ་དག་ཡིན་པ་བཀའ་གནང་ཡོད་པ་ལུང་འདྲེན་གནང་སྟེ་བཙན་བྱོལ་སྒྲིག་འཛུགས་དང་བོད་མིའི་སྤྱི་ཚོགས་ཧྲིལ་པོས་བོད་ཀྱི་ཆོས་རིག་རྒྱུན་འཛིན་འཐུས་ཚང་གནང་ནས་བོད་ཆོལ་གསུམ་ཆིག་སྒྲིལ་ཐོག་འགན་འཁུར་བླངས་རྒྱུ་ནི་གལ་ཆེ་ནང་གི་དོན་ཆེན་ཡིན་ཞེས་གསུངས་གནང་སོང་། ཚོགས་གཙོའི་གསུང་བཤད་གྲུབ་བསྟུན་སྔ་དྲོ་ཚོུད་ ༡༠།༣༠ ནས་དེ་རིང་གྲོགས་ཚོགས་ཀྱི་ལས་ཉིན་དང་པོ་ཉིན་འཁྱོངས་ད་ལྟའི་བར་བོད་ནང་གི་ཛ་དྲག་གནས་སྟངས་དང་འབྲེལ་དོན་ཚན་ ༧ ཅན་གྱི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཐོག་ལ་བགྲོ་གླེང་གནང་ཡོད་པ་རེད། དེ་བཞིན་ཉེ་ཆར་འདས་གྲོངས་སུ་གྱུར་བའི་བོད་མི་མང་སྤྱི་ཟུར་བསྟན་འཛིན་དགོན་པོ་ལགས་དམ་པ་དེ་ཉིད་ལ་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ཀྱང་བཞག་ཡོད་པ་མ་ཟད། ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ་བའི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཁག་ཅིག་གི་ཐོག་སྤྱི་འཐུས་རྣམ་པས་བགྲོ་གླེང་ལྷུག་པོ་གནང་ཡོད་པ་རེད། རྩ་བའི་གཞུང་འབྲེལ་གྲོས་ཆོད་གྲོས་འཆར་དེའི་གྲོས་ཆོད་དུ་དོན་ཚན་ ༧ ཅན་ཞིག་ཡོད་པ་དེའང།  གཙོ་བོ་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་སྲེག་གནང་མཁན་གཙོས་པའི་བོད་མི་བློས་གཏོང་བ་ཀུན་ལ་གདུང་སེམས་མཉམ་སྐྱེད་དང་། རྒྱའི་བཙོན་འོག་ཏུ་མྱོང་བཞིན་པ་རྣམས་མགྱོགས་མྱུར་གློད་བཀྲོལ་ཡོང་རྒྱུ།  བོད་དོན་རྒྱབ་སྐྱོར་བ་དང་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་སྡེ་ཁག རྒྱ་རིགས་མང་གཙོ་ལས་འགུལ་གྱི་ཚོགས་པ་ཁག་ཡོངས་ནས་ད་བར་བོད་དོན་ཐོག་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་པ་དང་། དེ་མཚུངས་སུ་མུ་མཐུད་བོད་དོན་དཀའ་རྙོག་སེལ་སླད་རྒྱབ་སྐྱོར་གནང་དགོས་རྒྱུ། དེ་བཞིན་མཉམ་འབྲེལ་རྒྱལ་ཚོགས་ནས་བོད་ནང་གི་ཛ་དྲག་གནས་སྟངས་རྟོག་ཞིབ་ཆེད་འཕྲལ་དུ་སྐུ་ཚབ་བསྐོ་གཏོང་དགོས་པ་སོགས་རེད་འདུག སང་ཉིན་ནས་ཐེངས་འདིའི་གྲོས་ཚོགས་ཀྱི་ལས་ཡུན་དེའི་རིང་ལ་རྐང་བཀའ་ཤག་ནས་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ཕྱི་ལོ་ ༢༠༡༥་༡༦ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་པའི་ཐོག་ལ་གྲོས་ཚོགས་འཐུས་མི་རྣམས་ནས་བགྲོ་གླེང་དང་གསལ་བཤད་བཅས་གནང་གི་ཡོད་པ་རེད།  གཞན་ཡང་སྐར་རྟགས་ཅན་གྱི་དྲི་བ་ཁག་ཅིག་དང་ཐུགས་སྣང་གཞེན་སྐུལ། ཁྲིམས་བཟོའི་ལས་དོན་དང་བསྐྱར་བཅོས། བཀའ་ཤག་གི་གསལ་བཤད་བཅས་ཕེབས་ཀྱི་འདུག