Tibetan Royal Year of 2151 | Year of the Wood Dragon

Day3

རྒྱའི་གཞུང་ཚབ་མི་སྣ་དང་སྤྱི་འཐུས་ཤིག་དབར་ལ་འབྲེལ་བ་བྱུང་ཡོད་མེད་ཀྱི་གནད་དོན་ཐོག་ཉིན་འཁྱོངས་བགྲོ་གླེང་།

རྒྱའི་གཞུང་ཚབ་མི་སྣ་དང་སྤྱི་འཐུས་ཤིག་དབར་ལ་འབྲེལ་བ་བྱུང་ཡོད་མེད་ཀྱི་གནད་དོན་ཐོག་ཉིན་འཁྱོངས་བགྲོ་གླེང་།

མི་འབོར་གྲངས་བཤེར་གྱི་དམིགས་ཡུལ་ནི་བཙན་བྱོལ་བོད་མིའི་གྲངས་ཐོ་ཚད་ལྡན་ཞིག་ཡོང་ཆེད་ཡིན་པར་གསུངས་སོང་།

དེ་རིང་སྔ་དྲོ་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ཆོས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༡་༢༢ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་བ་དང་འབྲེལ་ཏེ་སྤྱི་འཐུས་རྣམས་ནས་བཀའ་འདྲི་ཞུས་ཁག་ལ་བཀའ་ལན་གནང་ཟིན་རྗེས་མུ་མཐུད་ནས། སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༡༌༢༢ ལོའི་ལོ་འཁོར་ལས་སྡོམ་སྙན་སྒྲོན་དང་སྤྱི་འཐུས་རྒྱུན་ལས་ཀྱིས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་མ་ལག་དང་བཅས་པའི་ལོ་འཁོར་ལས་སྡོམ་རྒྱས་པར་ཞིབ་འཇུག་གནང་བའི་སྙན་ཐོ་སྙན་སྒྲོན་ཞུས་གྲུབ་བསྟུན་བོད་མི་མང་སྤྱི་འཐུས་ཁག་གཅིག་གིས་དེ་འབྲེལ་བཀའ་འདྲི་དགོངས་སྐོར་དང་གཞེན་སྐུལ་སོགས་ཀྱི་ཆ་ཤས་བཞེས་ཡོད།བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་སྐབས་བཅུ་དྲུག་པའི་བཀའ་ཤག་ནས་བཙན་བྱོལ་བོད་མིའི་མི་འབོར་གྲངས་བཤེར་གྱི་ལས་དོན་སྤེལ་བའི་དགོས་དམིགས་གང་ཡིན་སྐོར་བཀའ་འདྲི་ཞུས་པར། སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ད་ལྟ་ང་ཚོར་འཕྲད་བཞིན་པའི་དཀའ་ངལ་ཞིག་ནི་བཙན་བྱོལ་བོད་མིའི་གྲངས་ཐོ་ཚད་ལྡན་ཞིག་མེད་པ་དེ་ཡིན། དེས་ན་བཙན་བྱོལ་ནང་གི་བོད་མིའི་གྲངས་འབོར་ཇི་ཡོད་ཚད་ལྡན་ཤེས་ཐབས་སུ་ཆེད་དམིགས་ཀྱིས་མི་འབོར་གྲངས་བཤེར་གྱི་འགེངས་ཤོག་བཟོས་ཡོད་ལ། བོད་མི་ཚོའི་ངོས་ནས་འགེངས་ཤོག་དེ་དགང་དགོས་པའི་གལ་གནད་བཅས་གསུངས་སོང་། སླད་མར་འོས་བསྡུའི་ལས་རིམ་ནང་ཆ་ཤས་བཞེས་པར་མི་འབོར་གྲངས་བཤེར་ནང་ཞུགས་ཡོད་ཚེ་གཞུང་མང་གཉིས་ཀར་ཕན་ཐོགས་ཡོད་སྐོར་སོགས་གསལ་བཤད་གནང་བ་དང་ཆབས་ཅིག ད་ལྟ་བར་རྒྱ་བལ་འབྲུག་གསུམ་ནང་གི་བཙན་བྱོལ་བོད་མིའི་ཁྲོད་ནས་མི་འབོར་གྲངས་བཤེར་བཀང་ཟིན་པའི་གྲངས་ཐོ་དེ་སྟོང་ཕྲག་བདུན་ཅུ་དོན་གསུམ་ལྷག་དང་འགེངས་ཤོག་མ་དགང་བ་ལྔ་སྟོང་ལྷག་ཆགས་ཡོད་པ་སོགས་ཞིབ་རྒྱས་བཀའ་ལན་གནང་ཡོད།བོད་མི་མང་སྤྱི་འཐུས་བསྟན་པ་ཡར་འཕེལ་ལགས་ཀྱིས་ང་ཚོའི་བཙན་བྱོལ་སྤྱི་ཚོགས་ཁྲོད་དུ་ཉམ་ཐག་ཉུང་དུ་གཏོང་ཐབས་སུ་གང་ཡོད་པ་དང་ཉམས་ཞིབ་མཐིལ་ཕྱིན་པ་ཞིག་གནང་གལ་གྱི་གཞེལ་སྐུལ་ཞུས་སྐབས་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ཉམ་ཐག་དང་འབྲེལ་བའི་གནས་སྟངས་ལ་རྒྱུས་ལོན་གང་ཐུབ་ཅི་ཐུབ་ཞུ་རྒྱུ་ཡིན་ཞེས་གསུངས་སོང་།སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས་དང་སྤྱི་འཐུས་དཀོན་མཆོག་ཡར་འཕེལ་ལགས་ཀྱིས་མོན་གྷོར་གསར་དུ་འབྱོར་བའི་བོད་མི་གྲངས་ ༤༠ ལྷག་གི་སྡོད་ཁང་གསར་རྒྱག་གི་ལས་གཞི་ཁག་མུ་མཐུད་མཇུག་སྐྱོང་གནང་བཞིན་པར་ཡི་རང་བསྔགས་བརྗོད་ཞུས་པ་དང་སྦྲགས་ཏེ། བཞུགས་སྒར་དང་དེའི་ཉེ་འཁྲིས་སུ་ཡོད་པའི་ནོར་གླིང་ཁུལ་དུ་གནས་སྡོད་བོད་ནས་ཕྱིས་སུ་གསར་དུ་འབྱོར་བ་ཚོར་སྡོད་ཁང་མེད་པའི་ངལ་བ་འཕྲད་ནས་བོད་མིའི་སྒྲིག་འཛུགས་ལ་སྡོད་ཁང་གསར་རྒྱག་གི་ཞུ་སྙན་ཕུལ་ཡོད་པར་མ་ཟད་གྲོས་ཚོགས་སུའང་དེ་ལྟར་དགོངས་བཞེས་གནང་བའི་འབོད་སྐུལ་ཞུས་དོན་ལྟར་ཐུགས་འཇགས་དགོས་པའི་གཞེན་སྐུལ་ཞུས་སོང་བར་ནང་སྲིད་བཀའ་བློན་མཆོག་གིས་དེ་འབྲེལ་ལས་འཆར་སྤེལ་སྐབས་འཆར་ལྡན་གནང་གནད་ཡིན་སྟབས་དུས་ཚོད་ཏོག་ཙམ་འགོར་ངེས་ཡིན་སྐོར་གསུངས་པ་དང་སྦྲགས། དེ་འབྲེལ་དགོས་ངེས་ཀྱི་མཐུན་འགྱུར་དང་ལག་བསྟར་དགོས་རིགས་གང་ཐུབ་ཅི་ཐུབ་གནང་ངེས་ཡིན་པའི་བཀའ་ལན་གནང་སོང་།དེ་མཚུངས་སུ་སྤྱི་འཐུས་ཁག་གཅིག་གི་བོད་ནས་གསར་དུ་འབྱོར་བའི་བོད་རྣམས་བདག་སྐྱོང་གནང་དགོས་པའི་འབོད་སྐུལ་ཞུ་མཁན་དང་གསར་འབྱོར་བའི་སྡོད་ཁང་དང་འབྲེལ་བའི་ལས་གཞི་དེ་དག་གང་མགྱོགས་སྤེལ་གནང་ཡོང་བའི་གཞེན་སྐུལ་གསོལ་འདེབས་ཞུ་མཁན་བྱུང་ཡོད་པ་རེད། པར་ཁག བོད་མིའི་སྒྲིག་འཛུགས། བོད་མི་མང་སྤྱི་འཐུས་ལྷན་ཚོགས།

བཙན་བྱོལ་ནང་བོད་རིགས་གྲྭ་བཙུན་གྱི་གྲངས་འབོར་ཉུང་དུ་ཕྱིན་ཡོད་ཅེས་གསུངས་སོང་།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༤ པའི་ལས་ཉིན་ ༣ ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༡ ཟླ་ ༤ ཚེས་ ༡ ནས་ ༢༠༢༢ ཟླ་ ༣ ཚེས་ ༣༡ བར་གྱི་ལོ་འཁོར་སྙན་ཐོ་འགོད་འབུལ་ཞུས་ཡོད་པའི་ཐོག་ཕེབས་ཏེ་སྤྱི་འཐུས་རྣམས་ཀྱིས་བགྲོ་གླེང་ལྷུག་པོ་གནང་སོང་། ཁ་སང་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གྲོས་ཚོགས་སུ་ཆོས་རིག་ལས་ཁུངས་ཀྱི་ལོ་འཁོར་སྙན་ཐོ་འགོད་འབུལ་ཞུས་ཟིན་པའི་རྗེས་སུ་ཁ་སང་ཚོགས་དུས་གཅིག་དང་དེ་རིང་སྔ་དྲོའི་ཚོགས་དུས་གཉིས་ཆོས་རིག་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གནང་བའི་ཁྲོད། དེང་སྐབས་བཙན་བྱོལ་བོད་མིའི་སྤྱི་ཚོགས་ནང་གྲྭ་བཙུན་གྱི་རྒྱུན་ཆད་ཀྱི་ཆད་ཀྱི་ཡོད་སྐོར་དང་འབྲེལ་ཏེ་སྲིད་སྐྱོང་མཆོག་གིས་དེང་སྐབས་བོད་པའི་སྤྱི་ཚོགས་ཁྲོད་དུ་སྤྱིར་གྲྭ་བཙུན་གྱི་གྲངས་འབོར་དེ་དམིགས་བསལ་ཉུང་དུ་ཕྱིན་མེད་ཀྱང་། བོད་པའི་གྲངས་འབོར་དེ་དེ་སྔ་དང་བསྡུར་ཚེ་ཉུང་དུ་ཕྱིར་ཡོད་པ་དང་། དེའང་ད་ལྟའི་གྲངས་ཐོར་གཞིགས་ན་བོད་པའི་གྲྭ་བཙུན་གྱི་གྲངས་འབོར་དེ་བརྒྱ་ཆ་ ༣༣ ཆགས་ཡོད་པ་གསུངས་ཡོད།དེ་འབྲེལ་སྲིད་སྐྱོང་མཆོག་གིས་ཐེངས་འདིའི་གྲོས་ཚོགས་ཐོག་རྒྱ་བལ་འབྲུག་གསུམ་ནང་དེ་སྔ་དེབ་བསྐྱེལ་ཡོད་པའི་དགོན་སྡེ་ཁག་ ༢༦༩ ཡོད་པའི་ཐོག་དགོན་སྡེ་ཁག་ ༢༠ གསར་དུ་དེབ་བསྐྱེལ་གནང་ཡོད་པ་གསུངས་སོང་།ལྷག་པར་དུ་སྤྱི་འཐུས་ཁག་གཅིག་གིས་༸དཔལ་རྒྱལ་དབང་ཀརྨ་པ་མཆོག་གི་སློབ་མ་དང་གདུལ་བྱ་རྣམས་དང་ཞལ་བྲལ་ཏེ་བཞུགས་དགོས་པའི་གནས་སྟངས་དང་འབྲེལ་ནས་རིན་པོ་ཆེ་༸གང་ཉིད་མཆོག་རྒྱ་གར་དུ་ཆིབས་བསྒྱུར་མཛད་ཐབས་ཐད་བཀའ་ཤག་གི་ངོས་ནས་ཐུགས་འགན་ཇི་བཞེས་སོགས་དང་འབྲེལ་བའི་བཀའ་འདྲིར་སྲིད་སྐྱོང་མཆོག་གིས་འཛིན་སྐྱོང་གིས་འབད་བཙོན་ཞུ་མུས་ཡིན་པ་དང་། ལྷག་དོན་གནས་ཡུལ་རྒྱ་གར་གཞུང་གི་ངོས་ནས་ཀྱང་རིན་པོ་ཆེ་མཆོག་ཚུར་གནད་འདྲེན་ཞུ་རྒྱུའི་དགོངས་པ་ཡོད་པ་སོགས་གསུངས་ཡོད།སྤྱིར་ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་བགྲོ་གླེང་གནང་སྐབས་གྲྭ་བཙུན་རྣམས་ལ་བཞུགས་ཤག་དང་སློབ་ཡོན། དེ་བཞིན་ཧི་མཱ་ལ་ཡའི་རིགས་རྒྱུད་ཀྱི་གྲྭ་བཙུན་ཁག་ལ་མཐུན་རྐྱེན་སྦྱོར་སྤྲོད། ༸གོང་ས་མཆོག་གི་དགོངས་པ་བཞིན་ཆོས་ལུགས་མཐུན་སྒྲིལ་གྱི་ལས་འགུལ་སྤེལ་ཕྱོགས། དགོན་སྡེ་ཁག་ཏུ་རྒྱ་ཡིག་དགེ་རྒན་གྱི་མཐུན་རྐྱེན། ཆོས་རིག་བཀའ་བློན་དང་དྲུང་ཆེ་བཅས་ཀྱི་དགོན་སྡེ་ཁག་ལ་ཕྱོགས་སྐྱོད་དང་མཐུན་རྐྱེན་སྦྱོར་སྤྲོད། རིག་གཞུང་དང་སྒྱུ་རྩལ་གྱི་སློབ་ཡོན་གནང་ཕྱོགས། དགོན་སྡེ་ཁག་ཏུ་གཞུང་ཆེན་རིགས་གཅིག་རྐང་འཛིན་གྱི་ལས་གཞི་སོགས་ཆོས་རིག་ལས་ཁུངས་ཀྱི་ལས་དོན་སྣ་མང་ཐོག་དྲི་བ་དྲིས་ལན་ལྷུག་པོ་གནང་སོང་།གྲོས་ཚོགས་ཀྱི་ལས་རིམ་ལྟར། ཁ་སང་དང་དེ་རིང་བཅས་ཚོགས་ཐེངས་གསུམ་གྱི་ཐོག་ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་བགྲོ་གླེང་མཇུག་སྒྲིག་གནང་རྗེས། དེ་རིང་ཉིན་རྒྱབ་ནང་སྲིད་ལས་ཁུངས་ཀྱི་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༡་༢༢ ལོའི་ལོ་འཁོར་ལས་བསྡོམས་ཐོག་བགྲོ་གླེང་གནང་ཡོད།

གྲོས་ཆོད་ཨང་ ༣༩ པའི་ཐོག་བཞུགས་མོལ་ཚོགས་འདུ་ཞིག་འཚོགས་གཏན་ཁེལ་འདུག

དེ་རིང་གྲོས་ཚོགས་སུ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྐུ་ཞབས་སྤེན་པ་ཚེ་རིང་མཆོག་དང་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དངོས་གྲུབ་རྡོ

རྒྱ་ནག་གིས་རྒྱལ་སྤྱིའི་སྟེང་བོད་ཀྱི་ལོ་རྒྱུས་འགྲེལ་བཤད་རྒྱག་སྟངས་ལ་བསྒྱུར་བཅོས་དང་ཁ་གཏད་གཅོག་རྒྱུ་ཡིན།

དེ་རིང་གྲོས་ཚོགས་ཀྱི་སྔ་དྲོའི་ཚོགས་ཐུན་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བཀའ་བཤག་སྐབས་ ༡༦ པའི་སྔོན་རྩིས་གཏམ་བཤད་དང་འབྲེལ་ནས་གྲོས་ཚོགས་སུ་ཕེབས་པའི་དོགས་འདྲི་ཁག་ལ་མུ་མཐུད་བཀའ་ལན་གནང་བའི་ཁྲོད་རྒྱ་ནག་གིས་རྒྱལ་སྤྱིའི་སྟེང་བོད་དང་འབྲེལ་བའི་ལོ་རྒྱུས་འགྲེལ་བཤད་རྒྱག་སྟངས་ལ་བསྒྱུར་བཅོས་དང་ཁ་གཏད་གཅོག་རྒྱུ་ཡིན་པ་དང་། དེའི་ཕྱིར་རྒྱལ་སྤྱིའི་གཞུང་དང་གྲོས་ཚོགས་འཐུས་མི་བཅས་ལ་བོད་དེ་རང་དབང་གཙང་མའི་རྒྱལ་ཁབ་ཅིག་ཡིན་ཞེས་འཁོད་པའི་ཕྱི་མི་གཉིས་ཀྱིས་བརྩམས་པའི་ཕྱག་དེབ་གཉིས་སྤྱན་འབུལ་ཞུ་ཐབས་གནང་རྒྱུ་ཡིན་ཞེས་གསུངས་སོང་།ཁ་སང་གི་གྲོས་ཚོགས་སུ་སྔོན་རྩིས་རྒྱབ་གཉེར་ཞུ་ཕྱོགས་དང་འབྲེལ་ནས་སྤྱི་འཐུས་གཅིག་གིས་དོན་ཁང་ཁག་གི་སྣེ་ལེན་ནང་ཕྱག་དེབ་བླུ་ཡོན་ཞུས་ཏེ་ཕྱག་རྟགས་ཚུལ་དུ་འབུལ་ལམ་ཞུ་རྒྱུ་ཞེས་པའི་སྐོར་ལ་དོགས་འདྲི་ཞུས་དོན་བཞིན་དཔལ་འབྱོར་བཀའ་བློན་མཆོག་གིས་རྒྱ་ནག་གིས་རྒྱལ་སྤྱིའི་སྟེང་བོད་དང་འབྲེལ་བའི་ལོ་རྒྱུས་འགྲེལ་བཤད་རྒྱག་སྟངས་དེ་ཤུགས་ཆེ་དྲག་པའི་རྐྱེན་གྱིས་ཤེས་ཡོན་ཅན་གྱི་ནང་དུའང་གནད་དོན་ངོ་མ་གང་ཡིན་མ་མཁྱེན་པའི་གནས་སྟངས་འབྱུང་བཞིན་ཡོད་སྟབས། དེ་སྔ་བོད་དེ་རང་དབང་གཙང་མའི་རྒྱལ་ཁབ་ཅིག་ཡིན་པའི་གནས་བབ་དང་། ལྷག་པར་དུ་རྒྱ་ནག་གིས་འགྲེལ་བཤད་རྒྱག་སྟངས་ལ་བསྒྱུར་བཅོས་གཏོང་རྒྱུ་དང་ཁ་གཏད་གཅོག་ཕྱིར་སྐུ་ཞབས་ Michael van Walt ལགས་ཀྱིས་རྒྱ་ནག་གི་མཁས་པ་ཙམ་མ་ཟད་ཨེ་ཤ་ཡའི་ནང་ཁུལ་གྱི་རྒྱལ་ཁབ་མང་པོའི་ལོ་རྒྱུས་ལ་གཞི་བཅོལ་ནས་བརྩམས་པའི་ཕྱག་དེབ Tibet 2020 དང་། དེ་བཞིན་སྐུ་ཞབས་ Lao ལགས་ཀྱིས་མན་ཇུའི་སྐབས་སུ་རྒྱ་ནག་གོང་མ་ཚོས་ཉར་ཚགས་བྱས་པའི་ཡིག་ཚགས་ལ་ཞིབ་འཇུག་གནང་ནས་མན་ཇུའི་དུས་སྐབས་སུའང་བོད་དེ་དུས་ནམ་ཡང་རྒྱ་ནག་གི་ཁོངས་སུ་ཚུད་མྱོང་མེད་པ་སོགས་བཀོད་པའི་ཕྱག་དེ་གཉིས་ཕྱིའི་སྐུ་མགྲོན་རྣམ་པར་ཕུལ་ཐུབ་ཚེ་དགོངས་པ་བཞེས་རྒྱུར་ཕན་ཐོགས་ཡོང་རྒྱུ་མ་ཚད་པར་བོད་དེ་རང་བཙན་གཙང་མའི་རྒྱལ་ཁབ་ཅིག་གི་གནས་བབ་དེ་བསྒྲུབ་ཀྱི་ཡོད་སྟབས་དབུ་མའི་ལམ་གྱི་སྲིད་བྱུས་ལའང་གདེང་འཇོག་ཐུབ་ངེས་ཡིན་པ་གསུངས་ཡོད།དེ་བཞིན་བོད་དོན་ཞུ་གཏུག་དང་ཆབ་སྲིད་ཀྱི་ལས་གཞི་རྒྱ་ཆེ་རུ་གཏོང་ཐབས་སུ་བྱང་ཨ་རི་དང་ཡོ་རོབ་ཁུལ་དུ་ཟུང་དྲུང་གནས་རིམ་གྱི་ལས་བྱེད་འཕར་མ་རེ་བསྐོ་གཞག་གནང་རྒྱུ་ཞེས་པའི་གནད་དོན་དང་འབྲེལ་གྲོས་ཚོགས་འཐུས་མི་མང་དག་ཅིག་གིས་དོན་གཅོད་ཁག་ཏུ་ཕྱག་ལས་གནང་བར་ཡིག་རྒྱུགས་ཀྱི་ལམ་ནས་གནང་དགོས་པ་ལྟར་ལམ་ལུགས་དེ་སོར་གནས་ཡོད་མེད་དང་། བསྐོ་གཞག་གནང་འཆར་དེ་དམིགས་བསལ་ ༡༨ ཀྱི་ཁོངས་སུ་ཡིན་མིན་སོགས་བཀའ་འདྲི་ཞུས་པར་དཔལ་འབྱོར་བཀའ་བློན་མཆོག་གིས་བཀའ་ཤག་སྐབས་ ༡༦ པས་ཆབ་སྲིད་ཀྱི་ལས་དོན་བྱེད་ཕྱོགས་ཀྱི་སྒྲོམ་གཞི་དང་གནས་ཚུལ་སྟངས་འཛིན་ལ་འགྱུར་བ་ཕྲན་བུ་ཞིག་བཏང་ཡོད་པའི་ཁྲོད་དོན་གཅོད་རྣམ་པ་ས་གནས་བོད་རིགས་ཀྱི་གནད་དོན་དང་འབྲེལ་ནས་ལས་དོན་ཆེད་གང་སར་ལན་མང་བཅར་རྒྱུའི་ལས་འགན་དེ་ཟུང་དྲུང་གི་ངོས་ནས་གནང་རྒྱུ་དང་། དོན་གཅོད་རྣམ་པས་གནས་ཡུལ་གཞུང་དང་གྲོས་ཚོགས་སོགས་ལ་ཐབས་བྱུས་དང་ལྡན་པའི་སྒོ་ནས་འབྲེལ་ལམ་ཞིག་གནང་ཐུབ་ཚེ་འགྲོ་གྲོན་འཕར་མ་ཞིག་འགྲོ་སྲིད་ཀྱང་ལས་དོན་ལ་ཚགས་ཚུད་ཡོང་བར་ཕན་ཐོགས་ཡོད་པ་དང་། ད་ལྟའི་ཆར་ལས་བྱེད་དེ་གཉིས་དམིགས་བསལ་ ༡༨ ཀྱི་ཁོངས་སུ་བསྐོ་གཞག་གནང་འཆར་མེད་ཅེས་གསུངས་སོང་།དེ་རིང་གི་གྲོས་ཚོགས་སུ་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ན་གཞོན་ལས་མེད་ཀྱི་གནད་དོན་དང་འབྲེལ་ནས་ནང་སྲིད་ལས་ཁུངས་བརྒྱུད་ནས་ན་གཞོན་ལས་མེད་ ༢༧༤ གྲངས་ཐོ་དང་ཁོང་རྣམ་པའི་གནང་བློ་ཡོད་པའི་ལས་རིགས་མི་འདྲ་བ་ ༣༣ ཙམ་གྱི་ཐོ་གཞུང་ཞིག་འབྱོར་ཡོད་པ་ལྟར་གྲོས་ཚོགས་ཀྱི་ལས་རིམ་སོགས་དང་འབྲེལ་ཏེ། དཔྱད་པ་གནང་རྒྱུའི་དུས་ཚོད་བྱུང་མེད་ཀྱང་ན་གཞོན་ལས་མེད་ཚོར་རོགས་སྐྱོར་བྱ་རྒྱུའི་ལས་གཞི་རྣམས་བང་སྒྲིག་རྒྱུ་དང་། ས་གནས་སོ་སོའི་མཉམ་སྦྲེལ་གྱི་ངོས་ནས་ཕྱི་ནང་གཉིས་ཀྱི་སྲིད་བྱུས་ལ་འགྱུར་བ་གང་ཕྱིན་ལ་གཞིགས་ཏེ་འགན་བཞེས་པའི་སྒོ་ནས་ན་གཞོན་ལས་མེད་ཚོའི་ལག་ཤེས་ཀྱི་སློབ་སྦྱོང་ཟིན་པའི་རྗེས་སུ་མ་ཤེར་འཛུགས་ནས་ཚོང་ལས་བྱ་ཐུབ་མཁན་ཞིག་འབྱུང་ཚེ་སླད་མར་གཞིས་ཆགས་སུ་གཞོན་སྐྱེས་ཚོ་རྒྱུན་གནས་ཐུབ་པའི་རེ་བ་ཡོད་ཅེས་གསུངས་སོང་།ཁ་སང་གི་གྲོས་ཚོགས་སུ་གླེང་སློང་བྱུང་བའི་དང་བླངས་དཔྱ་དངུལ་སྤར་ཆ་གནང་རྒྱུའི་གནད་དོན་དང་འབྲེལ་དཔལ་འབྱོར་བཀའ་བློན་མཆོག་གིས་གྲོས་ཚོགས་ཚོགས་ཟིན་པའི་རྗེས་སུ་མང་ཚོགས་དང་ལྷན་དུ་དངུལ་འབོར་ག་ཚོད་སྤར་དགོས་མིན་སོགས་ཀྱི་ཐོག་བསམ་ཚུལ་བརྗེ་ལེན་དང་། གཞུང་དངུལ་འདུ་འགོད་ཀྱི་སྒྲིག་གཞི་ལ་བསྒྱུར་བཅོས་དགོས་མིན་ལ་གཞིགས་ཏེ་ལོ་རྗེས་མའི་སྔོན་རྩིས་ནང་བསྣམ་རྒྱུ་ལས་འདི་ལོར་སྤར་ཆ་དཀའ་སྐོར་གསུངས་ཡོད། དེ་བཞིན་ཁ་སང་གི་གྲོས་ཚོགས་སུ་བཀའ་ཤག་སྐབས་གོང་མིའི་ད་ལྟའི་བཀའ་ཤག་གི་ལས་གཞིའི་ཆེད་བཞག་པའི་སྒོར་ས་ཡ་ ༥༠ དེ་སྔོན་རྩིས་གཏམ་བཤད་དང་ཚོད་དཔག་འཆར་རྩིས་ཚོགས་ཚུང་གི་སྙན་ཐོ་བཅས་གང་གི་ནང་དུའང་གསལ་མེད་སྟབས། དངུལ་འབོར་དེ་གང་དུ་བཞག་ཡོད་མེད་བཀའ་འདྲི་ཞུས་དོན་ལྟར་ས་ཡ་ ༥༠ བཞག་ཡོད་ཟེར་བ་ལས་འགྲོ་གྲོན་གང་དུ་གཏོང་རྒྱུ་ཡིན་མིན་གསལ་མེད་པ་དང་། དངུལ་འབོར་དེ་དཔལ་འབྱོར་ལས་ཁུངས་སུ་ཡོད་པར་གསལ་བཤད་བཅས་གནང་ཡོད།

བོད་ནང་དུ་རང་བྱུང་གི་གནོད་འཚེ་ཅི་བྱུང་ཐད་ཕྱི་གསལ་ནང་གསལ་བཟོ་དགོས།

དེ་རིང་སྐབས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༣ པའི་ལས་ཉིན་ ༢ པའི་སྔ་དྲོའི་ཚོགས་དུས་ཐོག་ཁ་སང་གྲོས་ཚོགས་སུ་སྙན་སྒྲོན་དང

གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ལ་བལྟས་ན་མ་འོངས་གཡང་མ་གཏོགས་མཐོང་གི་མེད།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་གསུམ་པའི་ཚོགས་དུས་གསུམ་པ་དང་བཞི་པའི་ཐོག་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཕྱི་ལོ་ ༢༠༢༠ ཟླ་ ༤ ཚེས་ ༡ ནས་ཕྱི་ལོ་ ༢༠༢༡ ཟླ་ ༣ ཚེས་ ༣༡ བར་གྱི་ལོ་འཁོར་ལས་བསྡོམས་སྙིང་བསྡུས་དང་། ལས་བསྡོམས་རྒྱས་པར་སྤྱི་འཐུས་རྒྱུན་ལས་ནས་བལྟ་ཞིབ་གནང་བའི་སྙན་ཐོའི་ཐོག་བགྲོ་གླེང་གནང་བའི་ཁྲོད། བཀའ་ཤག་གོང་མའི་སྐབས་སུ་ཆེད་བཙུགས་གནང་བའི་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ཐད་དྲི་རྩད་ནན་པོ་ཕེབས་པ་ལྟར། སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གི་དཔལ་འབྱོར་གྱི་གནས་སྟངས་ལ་བལྟས་ན་གཡང་མ་གཏོགས་མཐོང་གི་མེད་པ་བཅས་མ་འོངས་པར་ཁུངས་འཁྱོལ་རྒྱུ་ཁག་པོ་ཞིག་གཟིགས་ཀྱི་ཡོད་པར་འགྲེལ་བརྗོད་དང་འབྲེལ། ལས་གཞི་དེ་མུ་མཐུད་མཇུག་སྐྱོང་གནང་རྒྱུར་གྲོས་ཚོགས་ནས་ཚོགས་ཆུང་ཞིག་ཆེད་འཛུགས་ཀྱིས་ཞིབ་འཇུག་མཐིལ་ཕྱིན་པ་གནང་ནས་ལམ་སྟོན་ཞིག་གནང་ཚེ་ལས་གཞི་མཇུག་སྐྱོང་གནང་རྒྱུ་ཡིན་ཞེས་གསུངས་སོང་།དེའང་དཔལ་འབྱོར་ལས་ཁུངས་ཀྱི་༢༠༢༠ དང་ ༢༡ ལོའི་ལོ་འཁོར་ལས་བསྡོམ་རྒྱས་པར་སྤྱི་འཐུས་རྒྱུན་ལས་ནས་བལྟ་ཞིབ་གནང་བའི་ཁོངས་སུ་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་གཞི་ཁག་མཇུག་སྐྱོང་གི་གནས་སྟངས་ལ་བགྲོ་གླེང་དགོས་པའི་གྲོས་འཆར་ལྟར། སྤྱི་འཐུས་གསུམ་གྱིས་ལས་གཞི་དེ་ནི་བོད་མིའི་སྤྱི་ཚོགས་སུ་འཕྲལ་ཕུགས་རྒྱང་གསུམ་ལ་ཕན་ཐོགས་ཡོད་ཅིང་ལོ་གསུམ་ལ་གསོ་སྐྱོང་གནང་བ་ཞིག་ཡིན་ཡང་བཀའ་ཤག་སྐབས་གསར་པའི་ངོས་ནས་སྒོ་རྒྱག་རྒྱུའི་སྐོར་གནད་དོན་ཞིག་བྱུང་བཞིན་པའི་རྒྱབ་ལྗོངས་དང་ད་ལྟའི་བཀའ་ཤག་ནས་ལས་གཞི་མཇུག་སྐྱོང་གནང་འདོད་མེད་པ་ཞིག་ཡིན་ནམ་ཞེས་དང་མ་འོངས་གནང་ཐབས་སོགས་ཀྱིས་སྐོར་ལ་དྲི་རྩད་བྱས་་ཡོད།སྐབས་དེར་དཔལ་འབྱོར་བཀའ་བློ་སྤེན་པ་ཚེ་རིང་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་སྟངས་སྐོར་ལ་གནས་ཚུལ་ཞིབ་ཁྲ་ངོ་སྤྲོད་ཁྲོད། ཞབས་ཞུ་ཁང་དེ་ཐོག་མར་ ༢༠༡༣ ལོའི་ནང་དངུལ་ཁང་ཆུང་ཆུང་ཞིག་འཆར་གཞིའི་འོག་ནས་༢༠༡༧ ལོར་འབུམ་གཅིག་དང་ཁྲི་གཉིས་མ་འཛུགས་གནང་ནས་ཚོང་ལས་ཀྱི་ངོ་བོའི་ཐོག་དེབ་སྐྱེས་ཞུས་པ་ཞིག་དང་། དེ་ལྟ་བུའི་ཚོང་ལས་གཉེར་བར་ཉུང་མཐུར་མ་རྩ་འབུམ་ཉིས་སྟོང་དགོས་ཀྱི་ཡོད་སྟབས། སྐུ་ཚབ་དོན་གཅོད་ཁག་གསུམ་གྱི་གཙོས་བོད་མིའི་ཁྱིམ་ཚང་ ༢༥ ནས་མ་འཛུགས་གནང་ནས་ཁྱོན་འབུམ་ ༧༦༠ ཡས་མས་ཤིག་ཡོད་པ་དང་། ཨ་རིའི་གཞུང་གིས་བུན་གཏོང་གི་ལས་གཞི་དེའི་ཆེད་ལོ་རེ་འཆར་འགོད་ཀྱིས་འབུམ་༢༥༠༠ སླེབས་ཡོད་ཀྱང་། དངུལ་འབོར་དེ་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་ནང་སླེབས་ཡོད་དུས་དངུལ་འབོར་དེ་ཚོང་ལས་ཀྱི་ངོ་བོའི་ཐོག་ཁྲིམས་མཐུན་གྱི་སྒོ་ནས་དངུལ་ཁང་ལ་གཏང་མ་ཐུབ་པ་མ་ཟད། དེར་ཕན་ཆེད་སྒྲིག་འཛུགས་གཞན་ཞིག་ཀྱང་བཙུགས་ཡོད་ཀྱང་། གང་ལྟར་ཁྲིམས་ཐོག་ནས་དེ་ལྟར་གནང་མ་ཐུབ་པ་དང་། གངས་ལྗོངས་དཔལ་འབྱོར་ཞབས་ཞུ་ཁང་གི་ངོ་བོ་བཅས་ཀྱི་རྒྱུ་མཚན་བཅས་ལ་བརྟེན། གངས་ལྗོངས་དཔལ་འབྱོར་ཞབས་ཞུ་ཁང་གི་དཔལ་འབྱོར་གྱི་གནས་སྟངས་ལ་བལྟས་ན་མ་འོངས་གཡང་མ་གཏོགས་མཐོང་གི་མེད་པ་གསུང་སོང་།དཔལ་འབྱོར་བཀའ་བློན་མཆོག་གིས་ད་དུང་ད་ལྟའི་ཆར་གངས་ལྗོངས་དཔལ་འབྱོར་ཞབས་ཞུ་ཁང་རང་གི་ནང་དུ་འབུམ་ ༧༦༠ ཙམ་ཡོད་ཀྱང་། ད་བར་འགྲོ་འགྲོན་འབུམ་༤༨༠ ལྷག་སོང་བ་དང་། དཔལ་འབྱོར་ལས་ཁུངས་ངོས་ནས་ཕྱིས་སུ་མ་རྩ་འཛུགས་མཁན་གྱི་ཁྱིམ་ཚང་དེ་དག་དང་ལྷན་དུ་ཐེངས་གསུམ་ཙམ་གྲོས་བསྡུར་རིམ་པར་གནང་བའི་ཁྲོད་ཁྱིམ་ཚང་བཅོ་ལྔས་མ་འཛུགས་ཕྱིར་འཐེན་གནང་རྒྱུ་སོགས་ཀྱི་བཀའ་མོལ་བྱུང་བ་ངོ་སྤྲོད་དང་འབྲེལ། གངས་ལྗོངས་དཔལ་འབྱོར་ཞབས་ཞུ་ཁང་དེ་བཞིན་མ་འོངས་པར་ཁུངས་འཁྱོལ་རྒྱུ་ཁག་པོ་ཞིག་གཟིགས་ཀྱི་ཡོད་ཀྱང་། གལ་ཏེ་གྲོས་ཚོགས་ནས་མུ་མཐུད་མཇུག་སྐྱོང་གནང་དགོས་ཞེས་གསུང་གི་ཡོད་ན་གྲོས་ཚོགས་ནས་ཚོགས་ཆུང་ཞིག་ཆེད་འཛུགས་ཀྱིས་ཞིབ་འཇུག་མཐིལ་ཕྱིན་པ་གནང་ནས་མ་འོངས་ལམ་སྟོན་ཞིག་གནང་ཚེ་ལས་གཞི་མཇུག་སྐྱོང་གནང་རྒྱུ་ལས། བཀའ་ཤག་སྐབས་ ༡༦ ནས་གངས་ལྗོངས་དཔལ་འབྱོར་ཞབས་ཞུ་ཁང་དེ་སྒོ་རྒྱག་རྒྱུ་ཡིན་པ་གསུངས་མེད་ཅེས་གསལ་བཤད་གནང་སོང་། ལར་ནས་བཀའ་བློན་མཆོག་གིས་ཨ་རིའི་གཞུང་གིས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་ནང་བཏང་བའི་རོགས་དངུལ་འབུམ་ ༣༠༠༠ ཙམ་ཡོད་པ་དེ་ད་ལྟ་གནང་བ་བཞིན་མུ་མཐུད་མང་ཚོགས་ལ་བུན་གཡར་སླད་མུ་མཐུད་བེད་སྤྱོད་གནང་རྒྱུ་དང་ཡང་ན་བྱེད་སྟངས་བྱེད་ཕྱོགས་ལ་འགྱུར་བ་བཏང་བའི་ཐོག་མུ་མཐུད་གནང་རྒྱུར་དགོངས་པ་བཞེས་བཞིན་ཡོད་པར་གསུང་ཡོད།གཞན་ཡང་དེ་རིང་གི་གྲོས་ཚོགས་སུ་བོད་མིའི་ཁྱད་ལས་དྭངས་བླངས་ཞབས་ཞུའི་གནད་དོན་དང་འབྲེལ། སྤྱི་འཐུས་ཁག་ཅིག་གིས་དཔལ་འབྱོར་བཀའ་བློན་མཆོག་ནས་རོགས་དངུལ་རྒྱུ་མཚན་དུ་བྱས་ཏེ་ལས་གཞི་དེ་སྒོ་བརྒྱབ་པ་ཡིན་ཞེས་པ་ཙམ་མིན་པར་ལས་གཞི་དེ་སྒྲིག་འཛུགས་དང་མི་རབས་གསར་པའི་དབར་གྱི་འབྲེལ་བ་མཐུད་ས་ཞིག་ཡིན་སྟབས། ལས་གཞི་དེ་མུ་མཐུད་གནས་རྒྱུའི་དགོངས་པ་བཞེས་རོགས་གསུངས་པ་ལྟར། དཔལ་འབྱོར་བཀའ་བློན་མཆོག་གིས་ལས་གཞི་འདི་ཐོག་མར་ཕྱི་རྒྱལ་ལ་བཞུགས་པའི་བོད་རིགས་གཞོན་སྐྱེས་ལ་དམིགས་པ་ཞིག་ཡིན་རུང་འདི་ལོའི་ལོ་མགོར་ཕྱི་རྒྱལ་ནས་བུ་མོ་གཅིག་གིས་ཟླ་ཤས་རིང་ཕྱག་ལས་གནང་ཡང་མང་ཆེ་བ་རྒྱ་གར་ནས་ཡིན་པ་ངོ་སྤྲོད་དང་སྦྲགས། ཁོང་རྣམ་པར་ཁང་དོད་དང་ཟླ་རེར་ལག་དངུལ་སོགས་སྤྲོད་ཀྱི་ཡོད་སྟབས་རོགས་ཚོགས་ནས་ཐོག་མའི་དམིགས་ཡུལ་ལྟར་འགྲོ་ཐུབ་ཀྱི་མེད་པ་ཞིག་ལས་མ་འོངས་ལས་གཞི་དེ་དང་འབྲེལ་ནས་གཞི་རྒྱ་ཆེ་རུ་ཇི་ལྟར་གཏོང་དགོས་མིན་གྱི་ཐད་ལ་དགོངས་པ་བཞེས་བཞིན་ཡོད་པ་གསུངས་སོང་།

ཉམ་ཐག་དང་གསར་འབྱོར་ལ་སྡོད་ཁང་ཐད་ནང་སྲིད་བཀའ་བློན་མཆོག་ལ་དྲི་རྩད་ནན་པོ་གནང་སོང་། 

ཁ་སང་ཉིན་རྒྱབ་ཀྱི་གྲོས་ཚོགས་ཚོགས་དུས་ཐོག་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ནང་སྲིད་བཀའ་བློན་གཅིག་ལྕོག་སྐུ་ཞབས་སྤེན་པ་ཚེ་རིང་མཆོག་གིས་བཀའ་ཤག་གོང་མའི་ཕྱི་ལོ་ ༢༠༢༠ ནས་ ༢༠༢༡ བར་གྱི་ལས་བསྡོམས་སྙན་སྒྲོན་དང་དེ་འབྲེལ་སྤྱི་འཐུས་རྒྱུན་ལས་ཀྱིས་དྲི་བ་ཕེབས་ཁག་ལ་ལན་འདེབས་གསལ་བཤད་གནང་བ་དང་སྦྲགས།  དེ་རྗེས་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་འཐུས་རྣམ་པས་བགྲོ་གླེང་གི་ཆ་ཤས་བླངས་ཡོད་པ་དང་།   བགྲོ་གླེང་ལས་རིམ་ཐོག་སྤྱི་འཐུས་རྣམ་པས་ཉམ་ཐག་དང་གསར་འབྱོར་ལ་སྡོད་ཁང་སོགས་ཀྱི་ཐད་ནང་སྲིད་བཀའ་བློན་མཆོག་ལ་དྲི་རྩད་ནན་པོ་གནང་སོང་།དེ་ཡང་ཁ་སང་གྲོས་ཚོགས་ཚོགས་དུས་གཉིས་པའི་ལས་ཉིན་གཉིས་པའི་ཉིན་རྒྱབ་དང་དེ་རིང་ལས་ཉིན་གསུམ་པའི་སྔ་དྲོའི་དུས་ཡུན་རིང་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་འཐུས་ ༡༤ ཙམ་ནས་བགྲོ་གླེང་གི་ཆ་ཤས་བླངས་ཏེ་བགྲོ་གླེང་ལྷུག་པོ་གནང་ཡོད།  སྤྱི་འཐུས་ཁག་ཅིག་གིས་བོད་མིའི་སྤྱི་ཚོགས་ཁྲོད་ཉམ་ཐག་ཞིབ་འཇུག་ཚད་ལྡན་ཞིག་གནང་དགོས་པའི་སྐོར་དགོངས་ཚུལ་དང་།  དེ་བཞིན་སྒྲིག་འཛུགས་ནས་ཉམ་ཐག་གི་ཚད་འཛིན་ས་དེ་ག་རེ་ཆགས་མིན་གྱི་དྲི་བ་སོགས་ཕུལ སོང་བ་དང་།  སྐབས་དེར་ནང་སྲིད་བཀའ་བློན་མཆོག་གིས་ཉམ་ཐག་ཞིབ་འཇུག་སླད་སྒྲིག་འཛུགས་ནས་ནང་འཕྲོད་ཤེས་གསུམ་གྱི་གནས་རིམ་མཐོ་བའི་ལས་བྱེད་རེར་ས་གནས་ནང་ཕེབས་ནས་ཞིབ་འཇུག་གནང་དགོས་པར་མངགས་པ་ལྟར།  ད་བར་ལྷོ་ཕྱོགས་གཞིས་ཆགས་ལྔ་དང་ཧི་མ་ཅལ་ཁུལ་དུ་ཕེབས་ཟིན་པ་དང་། རིང་མིན་བྱང་ཤར་ཁུལ་དུ་ཕེབས་རྒྱུ་ཡིན་པས།   རིམ་བཞིན་དེར་འབྲེལ་ཐད་ཞིབ་འཇུག་ཟིན་པའི་རྗེས་ཉམ་ཐག་ཞིབ་འཇུག་གི་སྙན་ཐོ་གྲོས་ཚོགས་ལ་འབུལ་ཐུབ་པ་གནང་གི་ཡིན་ཞེས་གསུངས་སོང་།དེ་བཞིན་གསར་འབྱོར་ཚོར་སྡོད་ཁང་དང་འབྲེལ་བགྲོ་གླེང་ཁག་ཅིག་བྱུང་བ་དང་སྐབས་དེར་སྤྱི་འཐུས་རྣམ་པས་ལྡེ་ར་ལྡུན་དུ་ཆོལ་གསུམ་གསར་འབྱོར་སྐྱིད་སྡུག་ཚོགས་པའི་མཚན་གཞུང་ནང་ཡོད་པའི་མི་གྲངས་ ༡༠༨ ལ་སྡོད་ཁང་གི་སྐུ་ངལ་འཕྲད་པ་དེར་དགོངས་པ་བཞེས་སྐྱོང་ཡོང་བ་དང་།  ཕྱོགས་མཚུངས་ནོར་བུ་གླིང་ཁའི་ཆོལ་གསུམ་གསར་འབྱོར་ཚོའི་བདེ་སྡུག་སྙན་གསེང་དང་། ལྷག་པར་འཛིན་སྐྱོང་ནས་རྗེས་འབྱོར་ཚོར་དམིགས་སུ་བཀར་ནས་སྡོད་ཁང་གནང་རོགས་ཞེས་གསུངས་སོང་།  སྐབས་དེར་ནང་སྲིད་བཀའ་བློན་མཆོག་གིས་སྡོད་ཁང་དང་འབྲེལ་ལས་དོན་གནང་ཟིན་པ་ཁག་འགྲེལ་བརྗོད་དང་སྦྲགས།  སྐབས་ ༡༦ ནས་སྡོད་ཁང་དང་འབྲེལ་རྒྱ་ཆེ་ས་ནས་འཆར་གཞི་ལྡན་པའི་ཐོག་ནས་ལས་གཞི་སྒྲིག་རྒྱུ་ཡིན་པ་མ་ཟད།   འདི་ལོའི་སྔོན་རྩིས་ནང་སྡོད་ཁང་སྤྲོད་ས་དང་སྤྲོད་ཡུལ་གྱི་ས་ཆ་མཁོ་སྒྲུབ་བྱེད་ཆེད་དུ་སྔོན་རྩིས་བཀའ་ཁྲོལ་ཞུས་ཡོད་སྐོར་གསུངས་སོང་།གཞན་ཡང་སྤྱི་འཐུས་ཁག་ཅིག་གིས་བལ་ཡུལ་ནང་གི་བོད་མི་ཚོར་གནས་སྡོད་ཆོག་པའི་ཡིག་ཆ་མེད་པའི་དཀའ་ངལ་སྐོར་གླེང་བ་དང་སྦྲགས་དེའི་ཐད་དགོངས་པ་ག་རེ་བཞེས་ཡོད་མིན་དང་།  དེ་བཞིན་བཀའ་ཤག་ངོས་ནས་བལ་ཡུལ་གཞུང་དང་འབྲེལ་བ་གནང་དགོས་གལ་སོགས་ཀྱི་སྐོར་དགོངས་ཚུལ་བཏོན་པར།  ནང་སྲིད་བཀའ་བློན་མཆོག་གིས་བལ་ཡུལ་གཞུང་ལ་བཀའ་ཤག་ངོས་ནས་འབྲེལ་བ་གནང་འདོད་ཡོད་སྐོར་དང་།  ལྷག་པར་ཁ་ཚ་དགོས་གཏུགས་ཀྱིས་ ཁྱིམ་མཚེས་རྒྱལ་ཁབ་ཚོར་འབྲེལ་བ་གནང་འགོ་བཙུགས་ཟིན་པ་དང་།  དེ་བཞིན་ཡིག་ཆ་དང་འབྲེལ་བའི་གནད་དོན་ཐད།  བོད་མིའི་སྒྲིག་འཛུགས་ཁོ་ན་མིན་པར་ས་གནས་ནས་ཀྱང་འགན་བཞེས་ཀྱི་ཡོད་པ་དང་།  དེ་མིན་རྒྱལ་ཁབ་གཞན་ཚོས་ཐབས་ཤེས་གནང་གི་ཡོད་པའི་ལན་བྱུང་གི་ཡོད་པ་དང་བལ་ཡུལ་ནང་དཀའ་ངལ་སེལ་རྒྱུའི་རེ་བ་ཡོད་ཅེས་གསུངས་མཁན་ཡོང་གི་འདུག་སྐོར་གསུངས་སོང་།ད་དུང་བགྲོ་གླེང་ཁྲོད་སྤྱི་འཐུས་ཁག་ཅིག་གིས་ཉེ་སྔོན་ཨམ་བྷ་ལའི་བོད་མིའི་སུད་ཚོང་ལ་མེ་སྐྱོན་བྱུང་སྐབས།  དེའི་ཐོག་ནང་སྲིད་ལས་ཁུངས་ནས་ཞིབ་འཇུག་མཐིལ་ཕྱིན་པ་གནང་དགོས་ཀྱང་དེ་ལྟར་གནང་ཐུབ་མེད་པའི་ཚོར་སྣང་བྱུང་བ་མ་ཟད།  ནང་སྲིད་ནས་དེའི་ཐོག་ཞིབ་འཇུག་མཐིལ་ཕྱིན་པ་གནང་ཐུབ་མེད་པ་དེ་འཐུས་ཤོར་ཆེན་པོ་ཞིག་ལ་གཟིགས་ཀྱི་ཡོད་སྟབས།  སླད་མར་འཛིན་སྐྱོང་ནས་དེའི་ཐད་ངེས་པར་དུ་ཞིབ་འཇུག་མཐིལ་ཕྱིན་པ་གནང་དགོས་སྐོར་གྱི་དགོངས་ཚུལ་གསུངས་མཁན་བྱུང་བ་ལྟར།    ནང་སྲིད་བཀའ་བློན་མཆོག་ནས་གནད་དོན་དེའི་ཐོག་ནང་སྲིད་ལས་ཁུངས་ནས་ཐུགས་འགན་བཞེས་ཡོད་པ་དང་མ་འོངས་པར་རོགས་རམ་གྱི་བརྒྱུད་རིམ་ཚད་ལྡན་བཟོ་དགོས་གལ་དང་སྒྲིག་འཛུགས་ནས་ཀྱང་དེ་འབྲེལ་འགྲོ་ལུགས་འགྲོ་སྟངས་ཚད་ལྡན་ཞིག་བཟོ་བར་འབད་བརྩོན་ཞུ་རྒྱུ་ཡིན་སྐོར་གསུངས་ཡོད།ད་རེས་ཀྱི་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཐོག་བསྐྱར་ཞིབ་སླད་རྒྱ་གར་གཞུང་ལ་ཞུ་དགོས་གལ་དང་།  རིས་མེད་གྲྭ་བཙུན་རྣམས་ལ་སྐད་ཡིག་གཞན་སྦྱོང་རྒྱུའི་མཐུན་རྐྱེན་སྦྱོར་ཐབས།  དྭང་ཟུར་ཉམ་ཐག་རོགས་སྐྱོར་ལས་གཞི།  བུན་གཏོང་ལས་འཆར་སོགས་ཀྱི་སྐོར་གླེང་སློང་བྱུང་སོང་།      

རྒྱ་ནག་ལ་རེ་བའི་ཐོག་ནས་བསྟུན་མཁས་གནང་དྲགས་ཚེ་ནམ་ཞིག་རེ་བས་ཕུང་གི་རེད།

བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་གསུམ་པའི་ཐོག་ཉེ་ལམ་བོད་མིའི་གསུམ་བཅུའི་དུས་དྲན་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དབུ་བཞུགས་ཐོག་གཞུང་འབྲེལ་གྱི་མཛད་སྒོའི་སྐབས་མི་མང་ལངས་གླུ་བླངས་པའི་གནད་དོན་དང་འབྲེལ་ནས་འཛིན་སྐྱོང་བཀའ་ཤག་ལ་དེ་ནི་དབུ་མའི་ལམ་གྱི་སྲིད་བྱུས་དང་འགལ་ཟླ་ཆགས་མིན་གྱི་བཀའ་འདྲི་ཞིག་ཕུལ་བར་གླེང་སློང་ཆེས་ཆེར་གནང་སོང་། ཁ་སང་སྤྱི་འཐུས་སྒྲོལ་མ་ཚེ་རིང་ལགས་ཀྱིས་ཁ་སང་བཀའ་དྲུང་ཡིག་ཚང་གི་སྔོན་རྩིས་དང་ལས་དོན་སྐོར་བགྲོ་གླེང་གནང་སྐབས་མི་མང་ལངས་གླུའི་ནང་འཁོད་པའི་ཐ་སྙད་བོད་རྒྱལ་ལོ་དང་རྒྱ་དམར་བོད་ནས་མཐར་སྐྲོལ་གཏོང་གི་ཡིན་ཞེས་པའི་ཐ་སྙད་དེ་དག་སྤྱད་པར་བརྟེན་དབུ་མའི་ལམ་གྱི་སྲིད་བྱུས་དང་འགལ་ཟླ་ཆགས་མིན་གྱི་བཀའ་འདྲི་ཞུས་པ་ལས་འཕྲོས་ཏེ། ཁ་སང་དང་དེ་རིང་གཉིས་ཀྱི་གྲོས་ཚོགས་ཚོགས་དུས་ཐོག་བོད་མི་མང་སྤྱི་འཐུས་ཁག་ཅིག་གིས་དབུ་མའི་ལམ་གྱི་སྲིད་བྱུས་ནི་དད་པ་བྱེད་ས་ཞིག་མིན་པ་དང་། གྲོས་ཚོགས་ནང་བཀའ་མོལ་གནང་སྐབས་ཡིད་གཟབ་གནང་དགོས་གལ་ཡིན་པ་སོགས་གསུངས་པར་མ་ཟད། དོ་བདག་སོ་སོའི་གསུང་བཤད་ཀྱི་མཇུག་ཏུ་བོད་རྒྱལ་ལོ་ཞེས་པའི་འབོད་ཚིག་བསྒྲགས་ཏེ་རྣམ་འགྱུར་སྟོན་གནང་མཁན་ཡང་བྱུང་སོང་བར་མ་ཟད། མང་ཚོགས་ཀྱི་ཁྲོད་བོད་རྒྱལ་ལོ་ཞེས་པའི་ཐ་སྙད་སྤྱད་པ་དང་སྦྲགས་སེམས་ཚོར་གྱི་རྣམ་པ་འདྲ་མིན་སྟོན་མཁན་ཡང་བྱུང་ཡོད་པ་རེད།སྤྱི་འཐུས་ཁག་གཅིག་ནས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་དེའི་གྲུབ་འབྲས་ཁག་ལུང་འདྲེན་གནང་བ་དང་། བཀའ་མོལ་གནང་སྐབས་ཚོར་བའི་རྗེས་སུ་འབྲང་རྒྱུ་མེད་པ་དང་འཛིན་སྐྱོང་གི་ངོས་ནས་ཐག་གཅོད་དེ་རིགས་གནང་སྐབས་དང་པོ་གྲོས་ཚོགས་ལ་བསྣམས་ཏེ་འོས་བསྡུའི་ལམ་ནས་ཐག་གཅོད་གནང་ན་དགེ་མཚན་ཡོད་པ་སོགས་གསུང་མཁན་ཡང་བྱུང་ཡོད།    སྲིད་སྐྱོང་མཆོག་གིས་དེ་འབྲེལ་ཐོག་བཀའ་ཤག་གི་གསལ་བཤད་གནང་བར་དབུ་མའི་ལམ་ནི་སྲིད་བྱུས་དང་། མི་མང་ལངས་གླུང་ནི་གླུ་ཞིག་ཡིན་སྟབས་ཚོར་བ་དང་ཁྲིམས། གླུ་དང་སྲིད་བྱུས་བཅས་ལ་དབྱེ་བ་གནང་དགོས་གལ་ཡིན་པར་འགྲེལ་བརྗོད་དང་སྦྲགས། ང་ཚོའི་ངོས་ནས་རྒྱ་ནག་ལ་ Anticipatory Compliance འམ་རེ་བ་ཞིག་གི་ཐོག་ནས་བསྟུན་མཁས་གནང་དྲགས་ཚེ་ནམ་ཞིག་རེ་བས་ཕུང་གི་རེད་ཅེས་གསུངས་ཡོད། སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དང་འབྲེལ་ཏེ་རྒྱ་ནག་ལ་ཁོར་ཡུག་སྐྲུན་རྒྱུའི་སྲིད་བྱུས་དེ་དེ་སྔ་ ༢༠༠༨ ལོར་ཕྱིར་འཐེན་གནང་ཟིན་ཡོད་པ་སོགས་གསུངས་ཡོད།གཞན་ཡང་དེ་རིང་གི་གྲོས་ཚོགས་སྐབས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་བར་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གྱི་དོན་ཚན་གསུམ་པའི་ནང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་དགོངས་དོན་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ལ་འབད་བརྩོན་བར་མ་ཆད་པར་གནང་བཞིན་པ་ལྟར། རྒྱ་གཞུང་གི་འགོ་ཁྲིད་རྣམས་གུ་དོག་མཁྲེགས་འཛིན་གྱི་ལྟ་བ་དོར་ནས་གཉིས་ཕན་མཉམ་གནས་གུ་ཡངས་བཅས་ཀྱི་ཐབས་ལམ་ལ་བརྟེན་ནས་བོད་རྒྱ་འབྲེལ་མོལ་མྱུར་དུ་དབུ་འཛུགས་གནང་ཐུབ་དགོས་ཞེས་འཁོད་པ་དེར་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ནས་ད་ལྟའི་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་ལོ་བཅུ་ཚང་ལ་ཉེ་ཡང་རྒྱ་ནག་གཞུང་ནས་བརྡ་ལན་གང་ཡང་མ་སྤྲད་པའི་སྐབས་འདིར་ང་ཚོས་མུ་མཐུད་རྒྱ་ནག་ལ་འབོད་སྐུལ་གནང་ནས་བཞུགས་ན་འགྲིག་མིན་དང་། ལྷག་པར་དུ་ད་ལྟའི་རྒྱལ་སྤྱིའི་ཐོག་རྒྱ་ནག་གི་བྱེད་བབ་དང་༸གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་ནས་ད་ལྟའི་རྒྱ་ནག་སྲིད་གཞུང་དང་ལྷན་དོན་ཕན་ལྡན་པའི་གྲོས་མོལ་ཡོང་ཐབས་མི་འདུག་ཅེས་ཚིག་ཐག་ཆོད་པོས་གསུངས་ཡོད་པ་སོགས་གནད་དོན་ཁག་ཅིག་འགྲེལ་བརྗོད་དང་སྦྲགས། གྲོས་ཆོད་གྲོས་འཆར་གྱི་དོན་ཚན་གསུམ་པ་དེར་བསྐྱར་བཅོས་ཀྱི་དོན་ཚན་ཞིག་གྲོས་ཚོགས་སུ་ངོ་སྤྲོད་གནང་ཡོད།  བསྐྱར་བཅོས་གྲོས་ཆོད་དེའི་ཐོག་བོད་མི་མང་སྤྱི་འཐུས་དགེ་བཤེས་ཨ་དཀྲུག་ཚེ་བརྟན་ལགས་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཁོངས་སུ་དེ་ལྟ་བུའི་གྲོས་ཆོད་བསྣམས་པ་དེ་ནི་ཧར་དྲགས་པ་ཙམ་མ་ཟད་དེ་ནི་གཞི་རྩའི་ལྟ་གྲུབ་ལ་བསྒྱུར་བཅོས་གཏོང་རྒྱུའི་བཀའ་མོལ་དང་འབྲེལ་བ་ཡོད་སྟབས་བསྐྱར་བཅོས་ཀྱི་གྲོས་ཆོད་དེར་མཐའ་གཅིག་ཏུ་དགག་པ་ཡོད་ཅེས་གསུངས་སོང་།བསྐྱར་བཅོས་ཀྱི་གྲོས་ཆོད་དེར་དགག་པ་བྱུང་སྟབས་སྤྱི་འཐུས་སྤྱི་ཡོངས་ནས་དེའི་ཐོག་བགྲོ་གླེང་གི་ཆ་ཤས་བཞེས་པ་མ་ཟད། ཁག་ཅིག་གིས་བསྐྱར་བཅོས་གྲོས་ཆོད་ཀྱི་ནང་དོན་རྣམས་ཐད་ཀར་དབུ་མའི་ལམ་གྱི་སྲིད་བྱུས་དང་འབྲེལ་བ་ཡོད་སྟབས་བཀའ་ཤག་ནས་དགོངས་ཚུལ་གནང་གལ་ཡིན་པར་གསུངས་པ་དང་འབྲེལ། སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གི་དགོངས་གཞི་ལྟར་ང་ཚོའི་ངོས་ནས་རྒྱ་ནག་དང་ལྷན་དུ་བཀའ་མོལ་གནང་གི་ཡིན་ཟེར་གྱི་ཡོད་པར་བརྟེན་བསྐྱར་བཅོས་ཀྱི་གྲོས་ཆོད་ནང་ལ་ང་ཚོས་རྒྱ་ནག་གཞུང་ལ་ཡིད་ཆེས་རྩ་ནས་མེད་ཅེས་བཀོད་ཚེ་སྐད་ཆ་བཤད་ཀྱི་མིན་ཞེས་པའི་གོ་ནོར་ཐེབས་ཉེན་ཡོད་པར་གསུངས་ཡོད།  གཞི་རྩའི་དེ་རིང་གྲོས་ཚོགས་དུས་གཙོས་གྲོས་ཚོགས་ཀྱི་ལས་ཉིན་དང་པོ་དང་གཉིས་པ་གཉིས་ཀྱི་སྔ་དྲོའི་ཚོགས་དུས་བཅས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་སྤྱི་འཐུས་རྣམ་པས་བགྲོ་གླེང་གནང་ཡོད་ཀྱང་ད་ལྟའི་ཆར་གྲོས་ཆོད་གྲོས་འཆར་དེར་མཐའ་མའི་གཏན་འབེབས་ཤིག་མ་བྱུང་བར་སང་ཉིན་སྔ་དྲོའི་ཚོགས་དུས་ཐོག་མུ་མཐུད་བགྲོ་གླེང་དང་གཏན་འབེབས་ཀྱི་ལས་རིམ་ཐོག་ཕེབས་རྒྱུ་ཡིན་པ་རེད།

Latest news