རྒྱལ་སྤྱི།

པེ་ཅིང་ནང་དུ་ཞི་ཅིན་ཕིང་གི་སྲིད་དབང་ལ་ངོ་རྒོལ་གྱིས་འཕྲེད་དར་འཕྱར་བའི་ལས་འགུལ་སྤེལ་བ་ལྟར་ Free Tibet ཞེས་བོད་དོན་རྒྱབ་སྐྱོར་ཚོགས་པའི་སྣེ་ཁྲིད་འོག་དབྱིན་ཡུལ་ནང་དུ་དེ་མཚུངས་ལས་འགུལ་སྤེལ་འདུག དེ་རིང་དབྱིན་ཡུལ་ནང་དུ་རྟེན་གཞི་བྱས་པའི་ Free Tibet ཞེས་བོད་དོན་རྒྱབ་སྐྱོར་བས་གསར་འགོད་བསྒྲགས་གཏམ་ཞིག་སྤེལ་བའི་ནང་གཟའ་འཁོར་སྔོན་མའི་ནང་རྒྱ་ནག་དམར་ཤོག་ཚོགས་པའི་ཚོགས་ཆེན་གྱི་སྔ་རོལ་དང་བསྟུན་ཟླ་བ་འདིའི་ཚེས་ ༡༣ ཉིན་པེ་ཅིང་གྲོང་ཁྱེར་གྱི་ཟམ་ཆེན་ལ་རྒྱ་རིགས་གཅིག་གིས་ཞི་ཅིན་ཕིང་གི་སྲིད་དབང་ལ་ངོ་རྒོལ་གྱི་ལས་འགུལ་སྤེལ་ཡོད་སྟབས། རྒྱ་གཞུང་ཉེན་རྟོག་མི་སྣས་ཁོང་འཛིན་བཟུང་བྱས་རྗེས་གར་ཡོད་ཤེས་རྟོགས་མེད་པར་གྱུར་ཡོད་པར་གདུང་སེམས་མཉམ་བསྐྱེད་མཚོན་ཕྱིར་ལས་འགུལ་བ་ཁག་ཅིག་གིས་པེ་ཅིང་ནང་འཕྱར་བའི་འཕྲེད་དར་དེ་དང་གཅིག་མཚུངས་ཁུལ་དེར་རྟེན་གཞི་བྱས་པའི་ཟམ་ཆེན་དུ་འཕྱར་ཏེ་ཞི་ཅིན་ཕིང་གི་ཏོག་དབྱིབས་གཉན་རིམས་ཀྱི་སྲིད་བྱུས་དང་མི་གཅིག་དབང་སྒྱུར་རིང་ལུགས་ལ་ངོ་རྒོལ་གྱི་ལས་འགུལ་སྤེལ་འདུག དབྱིན་ཡུལ་གྱི Westminster ཟམ་ཆེན་དུ་ངོ་རྒོལ་གྱི་ལས་འགུལ་སྤེལ་མཁན་ཁོངས་སུ་ཡོད་པ་བསྟན་འཛིན་ཀུན་དགའ་ལགས་ཀྱིས་ང་ཚོ་བོད་རིགས་ཤིག་ཡིན་པའི་ཆ་ནས་ཉེ་ཆར་པེ་ཅིང་ནང་ངོ་རྒོལ་གྱི་འཕྲེད་དར་འཕྱར་མཁན་རྒྱ་རིགས་མི་སྣ་དེས་སེམས་ངལ་དང་སུན་གཙེར་ཚོར་ཐུབ་ཀྱི་ཡོད་པ་དང་དེའི་ནང་ནས་དམིགས་བསལ་ཞི་ཅིན་ཕིང་གི་གཉན་རིམས་ཀླད་ཀོར་གྱི་སྲིད་བྱུས་འོག་བོད་ནང་གི་བོད་མི་མང་དག་ཅིག་གི་ཚེ་སྲོག་ཤོར་བ་དང་ཤིན་ཅང་ནང་གི་ཁ་ཆེ་གྲངས་ཉུང་མི་རིགས་ཚོར་བཟོད་དཀའ་བའི་ཆེས་ངལ་བ་བཟོ་བཞིན་པ་མ་ཟད། ཧོང་ཀོང་གི་རང་དབང་ལ་བརྡལ་བཤིག་ཚབས་ཆེ་གཏོང་བཞིན་ཡོད་པ་བཅས་འགྲེལ་བརྗོད་གནང་སྟེ་ང་ཚོ་དེ་རིང་ཟམ་ཆེན་འདིར་འདུ་འཛོམས་ཀྱིས་རྒྱ་ནག་དམར་ཤོག་ཚོགས་པ་དེ་རང་དབང་དང་དྲང་བདེན་མང་གཙོ་བཅས་ལ་ཉེན་ཁ་ཆེན་པོ་ཆགས་ཡོད་པའི་བརྡ་ལན་གནང་ཆེད་ཡིན་པ་གསུངས་ཡོད། Free Tibet ཚོགས་པའི་ངོས་ནས་ད་རེས་དབྱིན་ཡུལ་ནང་འཕྱར་བའི་འཕྲེད་དར་དེ་མཚུངས་གཞན་ཁག་ཅིག་རྒྱལ་ཁབ་གཞན་ནང་གི་ལས་འགུལ་བར་བསྐུར་ནས་དེ་འབྲེལ་ལས་འགུལ་སྤེལ་བའི་ཐོག་ནས་རྒྱ་གཞུང་གིས་རྒྱལ་སྤྱིའི་ཁྲོད་སྦས་བསྐུངས་བྱེད་བཞིན་པའི་དངོས་ཡོད་གནས་ཚུལ་ཁག་མངོན་གསལ་གནང་དགོས་པའི་གཞེན་སྐུལ་གནང་འདུག

ཨ་རིའི་གྲོས་ཚོགས་འཐུས་མི་གཉིས་ཀྱིས་རྒྱ་ནག་གཞུང་གིས་འདས་པའི་ལོ་མང་རིང་ནས་བོད་ཀྱི་ལོ་རྒྱུས་ལ་འཁྱོག་བཤད་བྱེད་བཞིན་ཡོད་པར་སྐྱོན་བརྗོད་དང་འབྲེལ། ཨ་རི་གཞུང་ནས་རྒྱ་ནག་གི་བྱ་སྤྱོད་དེར་གདོང་ལེན་བྱ་དགོས་པའི་ཞུ་སྐུལ་གནང་འདུགདེ་ཡང་ཉེ་སྔོན་ཟླ་ ༧ ཚེས་ ༡༣ ཉིན་ཨ་རིའི་གྲོས་ཚོགས་འོག་མར་ཡུན་རིང་ནས་བོད་དོན་རྒྱབ་སྐྱོར་གནང་མཁན་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ། ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ JimMcgovern ལགས་དང་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་སྤྱི་མཐུན་ཚོགས་པའི་སྣེ་ཁྲིད་པ་གྲོས་ཚོགས་འཐུས་མི་སྐུ་ཞབས་ Michael McCaul ལགས་རྣམ་གཉིས་ཀྱིས་ Promoting a Resolution to the Tibet-China Conflict Act ཞེས་གྲོས་ཚོགས་ཀྱི་ཆབ་སྲིད་ཚོགས་པ་དབྱེར་མེད་ཀྱིས་རྒྱབ་སྐྱོར་ཡོད་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཞེས་པ་ཞིག་འདོན་སྤེལ་གནང་ཡོད་པ་ལྟར། ཟླ་བ་འདིའི་ཕྱི་ཚེས་ ༡༤ ཉིན་གྲོས་ཚོགས་འཐུས་མི་དེ་དག་གཉིས་ཀྱིས་ The Diplomat ཞེས་པའི་གསར་ཤོག་ཐོག་དཔྱད་བརྗོད་ཅིག་སྤེལ་བའི་བརྒྱུད། ཨ་རི་གཞུང་གི་ངོས་ནས་བོད་ཐོག་འཛིན་པའི་སྲིད་བྱུས་དེ་ད་ཆ་ཉམས་དམས་སུ་འགྲོ་བཞིན་པར་བློ་འཚབ་ཀྱི་རྣམ་པ་མངོན་གསལ་དང་སྦྲགས། རྒྱ་ནག་ངོས་ནས་བོད་ཀྱི་ལོ་རྒྱུས་ལ་འཁྱོག་བཤད་བྱེད་བཞིན་པ་དེར་ཨ་རིས་ངེས་པར་དུ་གདོང་ལེན་གནང་དགོས་པ་གསུངས་འདུག རྩ་བའི་ཁྲིམས་འཆར་དེའི་ནང་རྒྱལ་སྤྱིའི་ཁྲིམས་འོག་ནས་བོད་ཀྱི་གནད་དོན་དེ་དུས་ད་ལྟའང་ཐག་གཅོད་མ་ཟིན་པར་ལུས་ཡོད་པ་དང་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་ངོས་འཛིན། དེ་བཞིན་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་འབྲེལ་མོལ་བསྐྱར་གསོ་མ་གནང་བ་དེ་རྒྱ་ནག་གི་ནོར་འཁྲུལ་ཞིག་ཡིན་པ་དང་། རྒྱ་ནག་གི་ལོ་རྒྱུས་ཁྲོད་བོད་ཐོག་བདག་དབང་ཡོད་སྐོར་བརྗོད་བཞིན་པ་དེ་འཁྱོག་བཤད་འབའ་ཞིག་ཡིན་པ་སོགས་འཁོད་ཡོད། གྲོས་ཚོགས་འཐུས་མི་རྣམས་གཉིས་ཀྱིས་ཐེངས་འདིའི་དཔྱད་བརྗོད་ནང་། ཨ་རི་གཞུང་གིས་བོད་དོན་ཐོག་འཛིན་པའི་སྲིད་བྱུས་དེ་ཉིད་ཉམས་དམས་སུ་འགྲོ་གི་ཡོད་པར་བརྟེན། ཁོང་རྣམ་པས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་ཉིད་གདོན་སྤེལ་གནང་བ་ཞིག་ཡིན་པ་དང་། ཁྲིམས་འཆར་དེའི་བརྒྱུད་ནས་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་དང་། བོད་འདི་ཉིད་རྒྱ་ནག་རྒྱལ་ནང་གི་གནད་དོན་ལ་ངོས་འཛིན་མ་བྱས་པའི་ཐོག་གྲོས་ཚོགས་ཀྱི་ཆབ་སྲིད་ཚོགས་པ་དབྱེར་མེད་ཀྱིས་རྒྱབ་སྐྱོར་ཡོད་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཞིག་ཡིན་པ་བསྐྱར་ནན་གནང་འདུག དཔྱད་བརྗོད་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་ངོ་བཅུ་ཕྲག་མང་པོའི་རིང་དབུ་མའི་ལམ་གྱི་སྲིད་བྱུས་ཀྱི་ཐོག་བོད་རྒྱ་གཉིས་ཀྱི་དཀའ་རྙོག་སེལ་ཐབས་སླད་ཐུགས་བརྩོན་ཆེན་པོ་མཛད་ཀྱང་། རྒྱ་ནག་གིས་བོད་ཀྱི་གནས་བབ་དང་ལོ་རྒྱུས་ལ་འཁྱོག་བཤད་བྱས་པའི་སྒོ་ནས་གང་ཉིད་ཀྱི་དབུ་མའི་ལམ་གྱི་སྲིད་བྱུས་ལ་སྣང་མེད་སྐྱུར་འཇོག་བྱས་པ་མ་ཟད། རྒྱལ་སྤྱིའི་སྤྱི་ཚོགས་ནས་ཀྱང་དེའི་ཐད་རྒྱ་ནག་ལ་གདོང་ལེན་རྩ་བ་ནས་མ་བྱས་པའི་ཁྲོད་རྒྱ་ནག་གིས་བོད་འདི་བཞིན་རྒྱ་ནག་རྒྱལ་ནང་གི་གནད་དོན་ཡིན་པ་དང་། ཕྱི་ཕྱོགས་ནས་དེར་ཐེ་ཇུས་བྱ་དགོས་དོན་མེད་པའི་བསྐྱར་བཤད་ཡང་བཤད་བྱས་ཡོད་ཅེས་བཀོད་འདུགམ་ཟད་ཕྱི་ལོ་ ༡༩༩༠ ཡས་མས་སུ་ཨ་རིའི་ཆབ་སྲིད་ཚོགས་པ་དབྱེར་མེད་ཀྱིས་རྒྱ་ནག་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་གྲོས་མོལ་གནང་དགོས་པའི་སྐུལ་མ་གནང་བ་དང་འབྲེལ། སྐབས་དེར་ཨ་རིས་རྒྱ་ནག་འདི་བཞིན་གྲོས་མོལ་ནང་མཉམ་ཞུགས་ཐུབ་ཐབས་སུ་བོད་འདི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་ཚུལ་འགྲེལ་བརྗོད་བྱེད་འགོ་བཙུགས་ཏེ་བོད་རྒྱ་གཉིས་ཀྱི་བར་འབྲེལ་མོལ་འགོ་བཙུགས་ཐུབ་པ་བྱུང་ཡོད། དེ་ལྟར་ཡང་། ཕྱི་ལོ་ ༢༠༡༠ ལོར་འདི་ཉིད་ཡོངས་སུ་མཚམས་ཆད་པ་བཅས། རྒྱ་ནག་དམར་ཤོག་གཞུང་གིས་གྲོས་མོལ་ལས་དྲག་གནོན་ཤུགས་ཆེར་བྱས་ཡོད། ཨ་རི་གཞུང་ནས་དུས་ད་ལྟའང་བོད་འདི་རྒྱ་ནག་གི་ཆ་ཤས་ཡིན་ཚུལ་གྱི་ལངས་ཕྱོགས་ཐོག་རང་སོར་གནས་ཡོད་པ་གསུངས་འདུག གྲོས་ཚོགས་འཐུས་མི་རྣམས་གཉིས་ཀྱིས་དེ་ལྟར་ན་ཨ་རིའི་གནད་ཡོད་མི་སྣ་རྣམས་ཀྱིས་བོད་འདི་རྒྱ་ནག་གི་ཆ་ཤས་རེད་ཅེས་མུ་མཐུད་བཤད་དོགས་དོན་གང་ཡིན་ཞེས་སྐྱོན་བརྗོད་དང་འབྲེལ། དེ་ལྟ་བུའི་གཏམ་གྱིས་ཨ་རིའི་ལངས་ཕྱོགས་དང་། བོད་མིའི་རང་དབང་ལ་སྣང་ཆུང་བྱེད་ཀྱི་ཡོད་སྐོར་གསལ་བཏོན་དང་སྦྲགས། རྒྱ་ནག་གིས་རྒྱུ་མཚན་དེ་དག་བརྟེན་ནས་བོད་འདི་རྒྱ་ནག་གི་ཆ་ཤས་ཡིན་པ་རྒྱབ་རྟེན་ལུང་འདྲེན་བྱེད་ཀྱི་ཡོད་པ་དེ་ལྟར་ཡང་། ཨ་རིའི་སྲིད་གཞུང་ནས་རྒྱ་ནག་གི་འཐབ་བྱུས་དེ་རྒྱུན་སྲིང་བ་མ་གཏོགས་དེར་དགག་པ་རྒྱག་ཐུབ་ཀྱིས་མེད་པས། ད་ཆ་ཨ་རི་གཞུང་ནང་གསར་དུ་ཞུགས་མཁན་གྱི་སྲི་ཞུ་བ་ཞིག་ལ་མཚོན་ན། ཐོག་མ་ཉིད་ནས་བོད་དེ་རྒྱ་ནག་གི་ནང་སྲིད་ཀྱི་གནད་དོན་ཞིག་ཡིན་པར་ངོས་འཛིན་ཐོག་འཛུལ་ཞུགས་བྱེད་ཀྱི་ཡོད་པ་དང་། དེ་ནི་རྒྱ་ནག་གི་འདོད་དོན་གྲུབ་པ་ཞིག་ཆགས་ཀྱི་ཡོད་པའི་སྐྱོན་བརྗོད་གནང་འདུག དཔྱད་བརྗོད་ཀྱི་མཐའ་སྡོམ་དུ་རྒྱ་ནག་གིས་བོད་དེ་གནའ་རབས་ནས་ཡུལ་དེའི་ཆ་ཤས་ཡིན་ཚུལ་བརྗོད་བཞིན་པ་དེ་ནི་རྒྱ་ནག་དམར་ཤོག་ཀྱི་དབང་འགྱུར་རྒྱ་སྐྱེད་དང་། མང་ཚོགས་ཀྱི་གཞི་རྩའི་རད་དབང་། རང་ཐག་རང་གཅོད་ཀྱི་ཐོབ་ཐང། དེ་བཞིན་རང་སྐྱོང་ཀྱི་ཁེ་དབང་བཙན་འཕྲོག་བྱ་ཐབས་ཀྱིས་རྒྱལ་ཁམས་རིང་ལུགས་གསར་མ་ལྟ་བུ་ཞིག་ཡིན་པ་དང་། དེ་ནི་ཐའེ་ཝན་དང་ཤིན་ཅང། ཧོང་ཀོང་། དེ་བཞིན་བོད་བཅས་ཀྱི་ནང་ཁྱབ་བཞིན་པར་འགྲེལ་བརྗོད་དང་འབྲེལ། ཨ་རིའི་གཞུང་ངོས་ནས་བོད་མིའི་རང་ཐག་རང་གཅོད་ཀྱི་འཐབ་རྩོད་ལ་རྒྱབ་སྐྱོར་གནང་དགོས་པ་མ་ཟད། རྒྱ་ནག་གིས་བོད་ཀྱི་ལོ་རྒྱུས་ལ་འཁྱོག་བཤད་བྱེད་བཞིན་པ་དེར་བརྒྱུད་སྐུལ་བྱ་རྒྱུ་མཚམས་འཇོག་གིས་དེར་གདོང་ལེན་དགོས་པའི་ཞུ་འབོད་གནང་བ་དང་ཆབས་གཅིག དེ་ལྟར་ཡོང་བར་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་དགོས་གལ་སྐོར་གསུངས་འདུག

དབྱིན་ཡུལ་གྱི་ Manchester ས་ཁུལ་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་ལས་མི་ཁག་ཅིག་གིས་ཧོང་ཀོང་མང་གཙོ་དོན་གཉེར་བའི་ལས་འགུལ་བ་ཞིག་གཞུང་ཚབ་ལས་ཁང་གི་ར་བར་དྲུད་དེ་ཉེས་རྡུང་བཏང་ཡོད་སྟབས་བོད་རང་བཙན་དང་དབྱིན་ཡུལ་བོད་རིགས་ཚོགས་པས་སྐྱོན་བརྗོད་གནང་སྟེ་དབྱིན་ཡུལ་གཞུང་གིས་དོན་རྐྱེན་དེ་སྣང་མེད་དུ་འཇོག་རྒྱུ་མེད་ཅེས་གསུངས་འདུག ཁ་སྔོན་རེས་གཟའ་ཉི་མའི་ཉིན་རྒྱ་ནག་དམར་ཤོག་ཚོགས་ཆེན་ཐེངས་ ༢༠ པ་འགོ་བཙུགས་དང་བསྟུན་ཧོང་ཀོང་གི་ལས་འགུལ་བ་ཁག་ཅིག་གིས་མེན་ཅེས་ཊར་དུ་ཡོད་པའི་རྒྱ་ནག་གཞུང་ཚབ་ལས་ཁང་མདུན་དུ་ཞི་ཅིན་ཕིང་གི་པར་རིས་ཆེན་པོ་ཞིག་འགྲེམས་སྟོན་གྱིས་ངོ་རྒོལ་འབོད་ཚིག་འཁོད་པའི་འཕྲེད་དར་འཕྱར་ཏེ་ལས་འགུལ་སྤེལ་སྐབས་རྒྱ་ནག་གཞུང་ཚབ་ལས་ཁང་གི་ལས་མི་ཁག་ཅིག་གིས་ལས་འགུལ་བ་ཞིག་གཞུང་ཚབ་ལས་ཁང་གི་ར་བ་ནང་དུ་དྲུད་དེ་ཉེས་བརྡུང་བཏང་བའི་གནས་ཚུལ་ཐོན་ཡོད། ལས་འགུལ་བ་དེས་བྷི་བྷི་སི་གསར་ཁང་ལ་ང་ཚོས་ལས་འགུལ་སྤེལ་སྐབས་སུ་རྒྱ་ནག་གཞུང་ཚབ་ལས་ཁང་ནས་མི་ཁག་ཅིག་ཐོན་ཏེ་ངོ་རྒོལ་དང་འབྲེལ་བའི་པར་རིས་རྣམས་གཏོར་བཅོམ་བཏང་བར་བཀག་ཐབས་བྱེད་སྐབས་ཁོ་ཚོས་ང་ནང་ལོག་ལ་དྲུད་དེ་ཉེས་བརྡུང་བཏང་སོང་ཞེས་འགྲེལ་བརྗོད་གནང་འདུག རྒྱ་ནག་གཞུང་ཚབ་ལས་ཁང་གི་ལས་མི་ཚོས་བྱེད་སྟངས་དེ་ཐབས་སྡུག་དང་དབྱིན་ཡུལ་ནང་སོ་སོས་གང་བཤད་རང་དབང་ཡོད་ཅེས་གསུངས་འདུག དབྱིན་ཡུལ་གཞུང་ནས་གནད་དོན་དེར་ཐུགས་འཚབ་ཀྱི་རྣམ་པ་ཆེད་བཏོན་གནང་ཡོད་པ་དང་ས་གནས་ཉེན་རྟོག་པས་ཀྱང་ཞིབ་འཇུག་དབུ་འཛུགས་གནང་ཟིན་སྐོར་གསལ་འདུག དབྱིན་ཡུལ་རྙིང་ཞེན་ཚོགས་པའི་འགོ་ཁྲིད་ཟུར་པ་གྲོས་ཚོགས་འཐུས་མི་སྐུ་ཞབས་ Iain Duncan Smith  ལགས་ཀྱིས་འཕྲུལ་སྒྲ་ཐོག་དབྱིན་ཡུལ་གཞུང་གིས་རྒྱ་ནག་གི་གཞུང་ཚབ་ཆེན་མོ་ནས་ངེས་པར་དུ་དགོངས་སེལ་ཞུ་བཅུག་དགོས་པ་དང་དོན་རྐྱེན་དེར་མཉམ་ཞུགས་བྱེད་མཁན་ཚོ་རྒྱ་ནག་ལ་ཕྱིར་ལོག་དགོས་པ་གསུངས་འདུག དེ་བཞིན་ Manchester Gorton ས་ཁུལ་ནས་འོས་འདེམས་བྱུང་བ་གྲོས་ཚོགས་འཐུས་མི་སྐུ་ཞབས་ Afzal khan ལགས་ཀྱིས་དབྱིན་ཡུལ་གྱི་ཕྱི་འབྲེལ་དྲུང་ཆེ་ James Cleverley མཆོག་གི་མཚན་ཐོག་ཏུ་ཕྱག་བྲིས་ཕུལ་ཏེ་དབྱིན་ཡུལ་ནི་རང་དབང་དང་ཁྲིམས་ཀྱི་དབང་བསྒྱུར། མང་གཙོ་བཅས་མཚོན་གྱི་ཡོད་པས་རྒྱ་ནག་གཞུང་ཚབ་ལས་ཁང་གི་ལས་མི་ཚོའི་བྱེད་སྟངས་དེ་བཟོད་ཐབས་མེད་པ་དང་། རྒྱ་ནག་གཞུང་ཚབ་ཆེན་མོར་གནད་དོན་དེའི་ཐོག་གསལ་བཤད་སླད་གང་མགྱོགས་འབོད་འགུགས་གནང་སྐྱོང་དང་དབྱིན་ཡུལ་གཞུང་གིས་དེ་འབྲེལ་ལན་འདེབས་གནང་དགོས་པ་གསུངས་འདུག འོན་ཀྱང་རྒྱ་ནག་གཞུང་ཚབ་ལས་ཁང་གི་མགྲིན་ཚབ་པས་ལས་འགུལ་བ་ཚོས་གཞུང་ཚབ་ལས་ཁང་གི་རྒྱལ་སྒོར་ཁྱད་གསོད་ཀྱི་རྣམ་པའི་ཐོག་ནས་ཞི་ཅིན་ཕིང་གི་པར་རིས་འགྲེམས་སྟོན་བྱས་ཡོད་སྟབས་བྱ་སྤྱོད་དེ་རིགས་ལ་མོས་མཐུན་རྩ་བ་ནས་མེད་ཅེས་བཤད་འདུག Free Tibet ཚོགས་པའི་སྤྱི་ཁྱབ་འགན་འཛིན་ Sam Walton ལགས་ཀྱིས་ད་ཆ་རྒྱ་ནག་གཞུང་ཚབ་ལས་ཁང་གི་ལས་མི་ཚོས་ཉེས་རྡུང་བཏང་ས་རྣམས་དབྱིན་ཡུལ་ནང་ཁྲིམས་མཐུན་ཐོག་བཞུགས་མཁན་དང་དབྱིན་ཡུལ་གྱི་མི་སེར་ཆགས་ཀྱི་ཡོད་པས་དབྱིན་ཡུལ་གཞུང་གིས་རྒྱལ་ཁབ་གཞན་ཞིག་གིས་རང་ཉིད་ཀྱི་མི་སེར་ཐོག་ཏུ་དྲག་གནོན་གྱི་བྱ་སྤྱོད་སྤེལ་བར་དམ་བསྒྲགས་གནང་དགོས་པ་དང་དབྱིན་ཡུལ་གྱི་ནང་སྲིད་དྲུང་ཆེ་ Suella Braverman ལགས་ཀྱིས་ཡོངས་གྲགས་ཐོག་ནས་གནད་དོན་དེར་སྐྱོན་བརྗོད་དང་སྦྲགས།  དོན་རྐྱེན་དེའི་ཐོག་མཉམ་ཞུགས་བྱེད་མཁན་གྱི་རྒྱ་ནག་གཞུང་ཚབ་ཀྱི་ལས་མི་རྣམས་ཕྱིར་ཕུད་གཏོང་དགོས་པ་གསུངས་འདུག དབྱིན་ཡུལ་བོད་རིགས་ཚོགས་པའི་ཚོགས་གཙོ་བསྟན་འཛིན་ཀུན་དགའ་ལགས་ཀྱིས་རྒྱ་ནག་གིས་དབང་བསྒྱུར་འོག་ཡོད་པའི་བོད་མི་དང་ཡུ་གུར་བ། ཧོང་ཀོང་བ་རྣམས་ལ་སྨྲ་བརྗོད་ཀྱི་རང་དབང་མེད་པ་དང་སྒོས་རྒྱ་ནག་གི་ཕྱི་ཕྱོགས་སུའང་ཞི་ཅིན་ཕིང་དང་རྒྱ་ནག་སྲིད་གཞུང་ལ་སྐྱོན་བརྗོད་སོགས་བྱས་ཚེ་དེར་འཁོན་ལན་ལོག་པའི་ཞེད་སྣང་འོག་བསྡད་ཀྱི་ཡོད་སྟབས་དབྱིན་ཡུལ་གཞུང་གིས་དབྱིན་ཡུལ་ནང་གནས་སྡོད་གནང་མཁན་ཚོ་རྒྱ་ནག་དམར་ཤོག་ཚོགས་པ་ལས་སྲུང་སྐྱོབ་གནང་དགོས་པ་མ་ཚད་པར་རྒྱ་ནག་དམར་ཤོག་ཚོགས་པས་དབྱིན་ཡུལ་ནང་བཙན་གནོན་ཅན་གྱི་བྱ་སྤྱོད་སྤེལ་བར་དམ་བསྒྲགས་གནང་དགོས་པ་སོགས་གསུངས་འདུག

རིང་མིན་ཟླ་འདིའི་ཚེས་ ༡༦ ཉིན་རྒྱ་ནག་དམར་ཤོག་ཚོགས་ཆེན་ཐེངས་ ༢༠ པ་ཚོགས་ཀྱི་ཡོད་པ་ལྟར་དམར་ཤོག་ཚོགས་ཆེན་གྱི་སྔ་རོལ་དུ་ཁ་སང་པེ་ཅིན་གྱི་གྲོང་ཁྱེར་གྱི་ཟམ་ཆེན་ལ་རྒྱ་རིགས་གཅིག་གིས་ཞི་ཅིན་ཕིང་གི་སྲིད་དབང་ལ་ངོ་རྒོལ་གྱི་ལས་འགུལ་སྤེལ་འདུག བརྒྱུད་ལམ་ཁག་ཏུ་དེ་འབྲེལ་གནས་ཚུལ་ཆེས་ཆེར་ཁྱབ་སྤེལ་བྱུང་བའི་ནང་རྒྱ་རིགས་ཤིག་གིས་པེ་ཅིན་གྱི་ཧཡ་ཌིཡན་གྱི་སི་ཏོང་ཟམ་ཆེན་དུ་འཕྲེད་དར་དཀར་པོ་གཉིས་འཕྱར་ཏེ་དེར་མཚོན་དམར་པོའི་ཐོག་ཞི་ཅིན་ཕིང་གི་ཏོག་དབྱིབས་གཉན་རིམས་ཀྱི་སྲིད་བྱུས་དང་མི་གཅིག་དབང་བསྒྱུར་རིང་ལུགས་ལ་ངོ་རྒོལ་དང་སྦྲགས་ཏེ། གཉན་རིམས་ཀྱི་བརྟག་དཔྱད་མི་དགོས། ཟས་དགོས། རང་དབང་དགོས། རྫུན་མི་དགོས། ཆེ་མཐོང་དགོས། རིག་གནས་གསར་བརྗེ་མི་དགོས། བཅོས་བསྒྱུར་དགོས།  འགོ་ཁྲིད་ཆེན་པོ་མི་དགོས། འོས་ཀྱི་ཐོབ་ཐང་དགོས། བྲན་གཡོག་མི་དགོས་ཞེས་སོགས་དང་དེ་བཞིན་འཕྲེད་དར་གཞན་གྱི་ཐོག་ཏུ་ལས་མཚམས་འཇོག་དགོས། སྲིད་དབང་སྒེར་འཛིན་པ་དང་རྒྱལ་ཚོང་པ་ཞི་ཅིན་ཕིང་གནས་དབྱུང་གཏོང་དགོས་ཞེས་ཆེད་བཀོད་བྱས་འདུག བརྙན་པར་དང་བརྙན་འཕྲིན་ཁག་ཏུ་ཟམ་ཆེན་དེ་ནས་དུ་བ་འཕྱུར་བ་དང་འཕྲེད་དར་ཐོག་འཁོད་པའི་འབོད་ཚིག་རྣམས་སྒྲ་འཇུག་གིས་རྒྱང་གྲགས་བརྒྱུད་བཏང་ཡོད་པ་མཐོང་རྒྱུ་འདུག བརྒྱུད་ལམ་ཁག་ནང་ངོ་རྒོལ་དང་འབྲེལ་མི་གཅིག་འཛིན་བཟུང་བྱས་པར་བཤད་འདུག་པ་མ་ཟད། China Change ཡིས་གནས་ཚུལ་སྤེལ་བར་གཞིགས་ཚེ་ངོ་རྒོལ་ལས་འགུལ་སྤེལ་མཁན་གྱི་མིང་ལ། Peng Lifa ཟེར་གྱི་ཡོད་པ་དང་། ཁོང་ནི་རྒྱ་ནག་གི་ཉམས་ཞིབ་པ་དང་དངོས་ཁམས་རིག་པའི་རྒྱབ་ལྗོངས་ཡོད་མཁན་ཞིག་ཡིན་པ་གསལ་འདུག མ་ཟད།  བརྒྱུད་ལམ་གཞན་ཁག་ནང་ཁོང་གིས་ ResearchGate ཞེས་པའི་དྲ་གནས་ཐོག་ཤོག་ངོས་ ༢༣ ཅན་གྱི་བསྒྲགས་གཏམ་ཞིག་སྤེལ་འདུག་པའི་ནང་མང་ཚོགས་རྣམ་པས་ལས་མཚམས་བཞག་སྟེ་ངོ་རྒོལ་གནང་དགོས་པ་དང་།  ཏོག་དབྱིབས་བརྟག་དཔྱད་བྱེད་ས་རྣམས་གཏོར་དགོས་སྐོར་བཤད་པའི་བྱ་སྤྱོད་དེ་དག་གཙོ་བོ་ཞི་ཅིན་ཕིང་གིས་ཁྲིམས་འགལ་ཐོག་ནས་མུ་མཐུད་སྲིད་དབང་འཛིན་རྒྱུར་བཀག་འགོག་དང་རྒྱ་ནག་དེ་བཞིན་མང་གཙོ་དང་རང་དབང་གི་ཁ་ཕྱོགས་ལ་བསྐྱོད་ཐུབ་པའི་ཆེད་ཡིན་པར་བཀོད་ཡོད་འདུག རྒྱ་ནག་གིས་དམར་ཤོག་ཚོགས་པའི་ཚོགས་ཆེན་འཚོགས་རན་པ་དང་བསྟུན་རྒྱ་ནག་ནང་དམ་བསྒྲགས་དང་ལྟ་སྲུང་ཤུགས་ཆེར་བྱེད་བཞིན་ཡོད་པ་དང་། དམ་བསྒྲགས་དེའི་ཁྲོད་ལས་འགུལ་འདི་ལྟ་བུ་སྤེལ་བར་སྤྱི་ཚོགས་དྲ་ལམ་ཐོག་ཕྱི་ནང་གཉིས་སུ་ཡོད་པའི་བོད་མི་དང་རྒྱ་རིགས། རྒྱལ་སྤྱིའི་ཁྲོད་དོ་སྣང་ཆེན་པོ་གནང་ཡུལ་དུ་གྱུར་ཡོད་ལ། མང་ཚོགས་མང་དག་ཅིག་གིས་ངོ་རྒོལ་ལས་འགུལ་སྤེལ་མཁན་དེར་བསྔགས་བརྗོད་དང་རྒྱབ་སྐྱོར་གྱི་རྣམ་པ་ཤུགས་ཆེར་ཆེད་བཏོན་གནང་ཡོད། རྒྱ་ནག་གིས་ཝི་བྷོ་དྲ་ལམ་ཐོག་སི་ཏོང་ཟམ་ཆེན་དང་། པེ་ཅིན། དེ་བཞིན་ངོ་རྒོལ་དང་འབྲེལ་ཐ་སྙད་རྣམས་འཚོལ་པར་དམ་བསྒྲགས་བྱས་ཡོད་པ་མ་ཟད། ངོ་རྒོལགྱི་ལས་འགུལ་དེར་མཆན་བཀོད་མཁན་རྣམས་ Weibo དང་ WeChat ནས་བཀག་སྡོམ་བྱས་ཡོད་པ་སོགས་གསལ་འདུག གཞི་རྩའི་རྒྱ་ནག་དམར་ཤོག་ཚོགས་ཆེན་ཐེངས་ ༢༠ སྐབས་ཞི་ཅིན་ཕིང་སྲིད་འཛིན་ལ་བསྐྱར་དུ་བསྐོ་གཞག་འབྱུང་རྒྱུར་ཚོད་དཔག་ཤུགས་ཆེ་བྱེད་བཞིན་ཡོད་པ་རེད།བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཐེངས་འདིའི་པེ་ཅིན་ནང་གི་ངོ་རྒོལ་དེའང་བོད་ནང་ད་བར་བོད་མི་གཅིག་རྗེས་གཉིས་མཐུད་ཀྱིས་རང་ལུས་མེར་བསྲེགས་གནང་བ་དེ་ལྟར་ནའང་། གནས་སྟངས་ཡར་རྒྱས་འགྲོ་རྒྱུ་ལས་ལྡོག་སྟེ་དམ་དུ་ཕྱིན་པ་དང་གཅིག་མཚུངས་ལྟར་ཡིན་པར་འགྲེལ་བརྗོད་དང་འབྲེལ། སྤྱིར་རྒྱ་ནག་གི་སྲིད་འཛིན་ཞི་ཅིན་ཕིང་གི་དབང་བསྒྱུར་འོག་མང་ཚོགས་ཁྲོད་གཞུང་ལ་འདོད་བློ་མ་ཁེངས་པ་དང་། མི་དགའ་བའི་རྣམ་པ་ཤུགས་ཆེ་ཡོད་ཀྱང་ད་ལྟའི་གནས་སྟངས་འོག་གཞུང་ལ་གྱེན་ལོག་ལྟ་བུ་ཡོང་རྒྱུ་ཁག་པོ་རེད་ཅེས་གསུངས་པ་དང་ཆབས་ཅིག དམར་ཤོག་ཚོགས་ཆེན་ཐེངས་ཉི་ཤུ་པ་བརྒྱུད་ཞི་ཅིན་ཕིང་གི་དབང་ཆ་དེ་བས་སྲ་བརྟན་དུ་འགྲོ་ངེས་ཡིན་སྟབས། གཙོ་བོ་རྒྱལ་སྤྱིའི་གནས་སྟངས་དང་དེས་རྒྱ་ནག་གཞུང་མང་ཐོག་ཤུགས་རྐྱེན་ཇི་ཡོད་ལ་རག་ལས་ཀྱི་ཡོད་སྐོར་གསུངས་སོང་།

རྒྱལ་སྤྱིའི་བོད་དོན་ལས་འགུལ་ཁང་གི་ Snow Lion human rights prize ཞེས་གངས་སེང་འགྲོ་བ་མིའི་ཐོབ་ཐང་གི་གཟེངས་རྟགས་ཆེས་ཐོག་མ་འདི་མི་རྒྱུད་དཔྱད་རིག་པ་དང་རྒྱ་ནག་ཐོག་གི་ཉམས་ཞིབ་པ་སྐུ་ཞབས་ Adrian Zenz ལགས་དང་བོད་ཀྱི་གློག་བརྙན་དུས་སྟོན་གོ་སྒྲིག་པ་གཉིས་ལ་འབུལ་ལམ་ཞུ་རྒྱུ་རེད་འདུག རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བར་གཞིགས་ན། ལས་འགུལ་ཁང་གི་འཇར་མ་ནིའི་ཡན་ལག་གིས་གངས་སེང་འགྲོ་བ་མིའི་ཐོབ་ཐང་གི་གཟེངས་རྟགས་འབུལ་བཞེས་ཀྱི་མཛད་སྟོན་དེ་སང་ཚེས་ ༡༥ ཉིན་རྒྱལ་ས་ Berlin ཁོར་ཡུག་གླེང་སྟེགས་བརྒྱུད་འབུལ་ལམ་ཞུ་རྒྱུ་དང་མཛད་སྟོན་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་སྐུ་མགྲོན་མི་སྣ་བརྒྱ་སྐོར་ཞིག་ལྷན་ཞུགས་གནང་གི་ཡོད་པ་དང་། འཇར་མ་ནིའི་གསར་འགོད་པ་གྲགས་ཅན་ལྕམ་ Gisela Steinhauer ལགས་ཀྱི་ངོས་ནས་མཛད་རིམ་གཙོ་སྐྱོང་གནང་གི་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གིས་གངས་སེང་གཟེངས་རྟགས་བརྒྱུད་བོད་དང་ཤིན་ཅང་། རྒྱ་ནག ནང་སོག ཧོང་ཀོང་། ཐེ་ཝན་བཅས་ཀྱི་འགྲོ་བ་མིའི་ཐོབ་ཐང་གཙོ་བོར་གྱུར་པའི་སྤྱི་ཚོགས་དང་ཆབ་སྲིད། རིག་གཞུང་སྲུང་སྐྱོབ་ཐད་སྐུ་ངལ་འཛེམས་མེད་ཀྱིས་སྐུ་ལས་བསྐྱོན་མཁན་གྱི་ཚོགས་སྒེར་ཁག་གི་ཆོད་སེམས་ལ་ཡིད་རང་བསྔགས་བརྗོད་ཞུ་ཕྱིར་གནང་གི་ཡོད་པ་དང་། གཟེངས་རྟོགས་བཞེས་མཁན་ལ་ཡོ་རོབ་སྒོར་མོ་ སྟོང་གསུམ་གནང་གཏན་ཁེལ་འདུག རྒྱ་ནག་ཐོག་ཉམས་ཞིབ་གནང་མཁན་སྐུ་ཞབས་ Adrian Zenz ལགས་ཀྱིས་ད་བར་ཤིན་ཅང་ནང་རྒྱ་གཞུང་གིས་ཡུ་གུར་མི་རིགས་ཚོའི་འགྲོ་བ་མིའི་ཐོབ་ཐང་ལ་གདལ་བཤིག་བཏང་བའི་ཛ་དྲག་གི་གནས་ཚུལ་ཁག་སྤེལ་ཡོད་པ་མ་ཚད་པར་འདས་པའི་ལོ་མང་རིང་རྒྱ་ནག་གི་གཞུང་འབྲེལ་དྲྭ་རྒྱ་སོགས་ཀྱི་ཐོག་ཉམས་ཞིབ་གནང་བ་བརྒྱུད་རྒྱ་གཞུང་གིས་ཤིན་ཅང་ནང་ངལ་རྩོལ་གྱི་ལས་གཞི་ལག་བསྟར་བྱས་པའི་ཁོངས་སུ་ཡུ་གུར་མི་མང་སྟོང་ཕྲག་མང་པོ་རྒྱ་ནག་གིས་བཀག་བསྐྱིལ་ཁང་དུ་བཅུག་ནས་ངལ་རྩོལ་བྱེད་དུ་བཅུག་པ་དང་དེ་བཞིན་བཙན་དབང་གིས་སྲིང་བལ་གྱི་ཞིང་ལས་བྱེད་བཅུག་ཡོད་པ་བཅས་ཐེར་འདོན་གནང་མཁན་ཉམས་ཞིབ་པ་ཆེས་ཐོག་མ་ཆགས་ཡོད། ལྷག་དོན་སྐུ་ཞབས་ Adrian ལགས་ཀྱིས་བོད་རང་སྐྱོང་ལྗོངས་ཟེར་བའི་ནང་དུའང་བོད་ཀྱི་ཞིང་འབྲོག་མང་ཚོགས་འབུམ་ལྔ་ཙམ་རྒྱ་ནག་གཞུང་གི་དམག་གི་རང་བཞིན་ལྡན་པའི་སྦྱོང་བརྡར་ལྟེ་གནས་ཁང་དུ་ཁྲིད་ནས་སྦྱོང་བརྡར་སྤྲད་ཡོད་པ་དང་། དེའི་ཁོངས་ནས་བོད་མི་ཁྲི་ལྔ་ཙམ་བོད་ནང་ངལ་རྩོལ་ཆེད་བགོ་འགྲེམས་དང་། གཞན་སྟོང་ཕྲག་ཁ་ཤས་ཤིག་རྒྱ་ནག་གི་རས་ཀྱི་བཟོ་གྲྭ་ལ་སོགས་པའི་ས་ཞིང་འདེབས་ལས་ཀྱི་བཟོ་གྲྭ་དང་རྒྱ་ནག་གི་ས་གནས་གཞན་ཁག་ལ་ཆེད་གཏོང་བྱས་ཡོད་སྐོར་མངོན་གསལ་གནང་ཡོད།སུད་སི་ནང་ཚོགས་སྲོལ་ཡོད་པའི་བོད་ཀྱི་གློག་བརྙན་དུས་སྟོན་དེ་ནི་ཐོག་མར་ཕྱི་ལོ་ ༢༠༠༨ པེ་ཅིང་ཨོ་རྩལ་འགྲན་ཚོགས་སྐབས་ལོ་དེར་བོད་ནང་ཆེད་སྐྱོད་ཀྱིས་འཇིགས་བྲལ་གློག་བརྙན་ཞེས་པ་བཟོ་སྐྲུན་གནང་རྗེས་དོན་གྲུབ་དབང་ཆེན་ལགས་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་སྟབས། སུད་སི་གནས་སྡོད་ཁོང་གི་སྤུན་ཆེད་འཇམ་དབྱངས་ཚུལ་ཁྲིམས་ལགས་ཀྱིས་དོན་གྲུབ་དབང་ཆེན་ལགས་ཀྱི་ཕུགས་བསམ་དང་བོད་ནང་གི་བོད་མིའི་མངོན་འདོད་རྣམས་རྒྱལ་སྤྱིའི་ཐོག་གློག་བརྙན་ལམ་ནས་དྲིལ་བསྒྲགས་ཀྱི་གོ་རྟོགས་སྤེལ་ཆེད་ དབུ་འཛུགས་གནང་བ་ཞིག་ཡིན་པ་རེད། རྩ་བའི་རྒྱལ་སྤྱིའི་བོད་དོན་ལས་འགུལ་ཁང་གི་འཇར་མ་ནིའི་ཡན་ལག་གིས་ Snow Lion འམ་གངས་སེང་གཟེངས་རྟགས་དེ་བོད་དོན་དང་སྒོས་བོད་ནང་གི་གནས་སྟངས་སྐོར་རང་དབང་ཐོག་ནས་གནས་ཚུལ་ལེགས་ཤོས་སྤེལ་མཁན་གསར་འགོད་པ་རྣམས་ལ་ཆེ་བསྟོད་ཀྱི་ཚུལ་དུ་འབུལ་ལམ་ཞུ་སྲོལ་ཡོད་པ་དང་། འདི་ལོའི་གཟེངས་རྟགས་ཀྱི་མཚན་བྱང་ལ་གངས་སེང་འགྲོ་བ་མིའི་ཐོབ་ཐང་གི་གཟེངས་རྟགས་ཞེས་བཅོས་འདུག པར་ཁག་སྤྱི་ཚོགས་དྲ་རྒྱ།

དབྱིན་ཡུལ་གྱིས་རྒྱ་ནག་དེ་དཔལ་འབྱོར་དང་འཕྲུལ་ལས་རིག་པའི་ཐོག་ནས་རྒྱལ་སྤྱིའི་བདེ་འཇགས་དང་། ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁ་སང་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། GCHQ Government Communications Headquarters ཞེས་དབྱིན་ཡུལ་གྱི་གསང་བ་ལས་ཁུངས་ཀྱི་གཙོ་འཛིན་སྐུ་ཞབས་ Jeremy Fleming ལགས་ཀྱིས་རྒྱ་ནག་གི་སྟོབས་ཤུགས་དང་རྒྱལ་སྤྱིའི་སྤྱི་ཚོགས་ལ་ཞེད་སྣང་ཁྲོད་ནས་དེ་འབྲེལ་ལས་དོན་མང་པོ་ཞིག་སྤེལ་བཞིན་ཡོད་པར་བརྟེན་ང་ཚོར་ཉེན་ཁ་ཆེན་པོ་ཆགས་ཡོད་པ་དང་། རྒྱ་ནག་དམར་པོའི་གཞུང་གིས་རྒྱལ་སྤྱིའི་ཁྲོད་འཕྲུལ་རིག་ཁོར་ཡུག་གི་ཐབས་བྱུས་ཐོག་ཁེ་ཕན་རྩོད་རྒྱུའི་འདོད་པ་ཡོད་སྐོར་འགྲེལ་བརྗོད་དང་འབྲེལ། འཕྲུལ་རིག་ཐོག་ནས་རྒྱལ་སྤྱིའི་བདེ་འཇགས་དང་ལྷག་པར་དུ་ཁུལ་དེའི་བདེ་འཇགས་སོགས་ཀྱི་ཐད་ལ་ཉེན་ཁ་ཆེན་པོ་ཞིག་ཏུ་ངོས་འཛིན་གྱིས་སྐྱོན་བརྗོད་དང་བློ་འཚབ་ཀྱི་རྣམ་པ་ཤུགས་ཆེར་མངོན་གསལ་གནང་འདུག ཁོང་གིས་དབྱིན་ཡུལ་གྱི་ཕ་མ་རྣམས་ཀྱིས་རང་ཉིད་ཀྱི་ཕྲུ་གུ་རྣམས་ནས་རྒྱ་ནག་གིས་བཟོས་པའི་ Tiktok བརྙན་ཆས་སྤྱོད་རྒྱུ་ཐད་ལ་དགོངས་བཞེས་གནང་དགོས་སྐོར་དང་། དེ་བཞིན་རྒྱ་ནག་གི་ངོས་ནས་འཇིགས་སྐུལ་དང་བཙན་ཤུགས་ཁྲོད་རྒྱལ་ཁབ་གཞན་རྣམས་རྩོད་ཟླའི་ངོ་བོ་དང་། ཡང་ན་ཚོང་རོགས་ཀྱི་ངོ་བོར་ལྟ་ཡི་ཡོད་པར་འགྲེལ་བརྗོད་དང་སྦྲགས། རྒྱ་ནག་གིས་རྒྱལ་སྤྱིའི་ཁྲིམས་ལུགས་དང་རང་དབང་མང་གཙོའི་ལམ་ལུགས་ཀྱི་སྤྱི་ཚོགས་ལ་འཕྲུལ་རིག་བརྒྱུད་ནས་བཙན་ཤུགས་སྤེལ་བཞིན་པར་སྐྱོན་བརྗོད་ནན་པོ་གནང་ཡོད། དེ་བཞིན་ཁུལ་དེའི་རྙིང་ཞེན་ཚོགས་པའི་འཐུས་མི་སྐུ་ཞབས་ Iain Duncan Smith ལགས་ཀྱིས་དབྱིན་ཡུལ་ནས་རྒྱ་ནག་ཐོག་འཛིན་པའི་སྲིད་བྱུས་དམ་པོ་དེ་དུས་ཐོག་ལ་ལག་བསྟར་གནང་ཐུབ་མེད་སྐོར་འགྲེལ་བརྗོད་གནང་སྟེ། ང་ཚོའི་འཚོ་བའི་ཁྲོད་ལ་རྒྱ་ནག་དེ་ཇི་ཙམ་ཉེན་ཁ་ཆེན་པོ་ཞིག་ཏུ་གྱུར་ཡོད་པ་ངོས་འཛིན་ཐུབ་དགོས་གལ་དང་། ཨུ་རུ་སུས་ཡུཀ་རེན་ལ་བཙན་འཛུལ་བྱེད་བཞིན་སྐབས་ཡུཀ་རེན་གྱིས་དེར་གདོང་ལེན་གང་འདྲ་གནང་བ་ལྟར་ང་ཚོས་ཀྱང་རྒྱ་ནག་ལ་དེ་ལྟ་བུའི་གདོང་ལེན་གནང་བའི་དུས་ལ་བབས་ཡོད་སྐོར་གསུངས་འདུག དབྱིན་ཡུལ་དུ་རྟེན་གཞི་བྱས་པའི་རྒྱ་ནག་ནག་གི་འགྲོ་བ་མིའི་ཐོབ་ཐང་འཐབ་རྩོད་པ་སྐུ་ཞབས་ Luke de Pulford ལགས་ཀྱིས་ཀྱང་རྒྱ་ནག་དེ་འཛམ་གླིང་ཞི་བདེ་དང་བརྟན་ལྷིང་ཆེད་ཉེན་ཁ་ཆེན་པོ་ཆགས་ཡོད་པ་ལྟར་ད་བར་འདི་ཕྱོགས་ནས་རྒྱ་ནག་ལ་གདོང་ལེན་གནང་མེད་པ་དེ་ལྟར་ཡང་ད་ཆ་རིམ་བཞིན་གཉིད་སད་པ་ཞིག་ཡིན་སྐོར་འགྲེལ་བརྗོད་གནང་འདུག The Sun ཞེས་པའི་བརྒྱུད་ལམ་གྱིས་གནས་ཚུལ་སྤེལ་བར་དབྱིན་ཡུལ་གྱི་སྲིད་བློན་ལྕམ་སྐུ་ Liz Truss མཆོག་གིས་ཟླ་བ་སྔོན་མར་རྒྱ་ནག་ཐོག་གི་བཞེངས་ཕྱོགས་ལ་བསྐྱར་ཞིབ་ཀྱིས་དེ་ལས་དམ་པ་གནང་རྒྱུའི་གྲ་སྒྲིག་གནང་བཞིན་ཡོད་སྐོར་དང་། རིང་མིན་བསྐྱར་ཞིབ་རྗེས་མའི་ནང་རྒྱ་ནག་དེ་དབྱིན་ཡུལ་ལ་ཉེན་ཚབས་གང་འདྲ་ཆགས་ཡོད་པ་གསལ་བཟོ་གནང་གི་ཡོད་སྐོར་བཀོད་འདུག

ཉེ་ལམ་སྤྱི་ཚོགས་དྲྭ་རྒྱའི་ཐོག་རྒྱ་རིགས་བེུད་ཅིག་གིས་བོད་ནང་གི་བོད་མི་རྣམས་རྩ་མེད་གཏོང་དགོས་པའི་སྐད་ཆ་བཤད་པར་བོད་མི་རྣམས་ཀྱིས་ཚོར་ཤུགས་ཆེན་པོས་སྐྱོན་བརྗོད་ཁྲོད་ལ་ཁོ་མོས་དེར་དགོངས་སེལ་ཞུས་དགོས་བྱུང་ཡོད་ནའང་། རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་རིགས་བེུད་དེས་རྒྱ་གཞུང་དང་སྤྱི་དམངས་ལ་དགོངས་སེལ་ཞུས་པ་མ་གཏོགས་བོད་མིར་ཐད་ཀར་དགོངས་སེལ་ཞུས་མེད་པ་འགྲེལ་བརྗོད་དང་སྦྲགས།  རྒྱ་གཞུང་གིས་བོད་མིར་དབྱེ་འབྱེད་བྱ་རྒྱུ་ལས་ལྡོག་སྟེ་རང་མི་རིགས་ཀྱི་སྤྱི་ཚོགས་རང་གི་སྐྱོང་ཆོག་པའི་ཐོབ་ཐང་ཆ་ཚང་སྤྲོད་དགོས་པའི་འབོད་སྐུལ་ཞུས་འདུག དེ་ཡང་རྒྱལ་ས་ལྷ་ས་གཙོས་བོད་ཀྱི་ས་ཁུལ་གང་སར་ཏོག་དབྱིབས་ནད་ཡམས་འགོས་ཁྱབ་ཀྱི་གྲངས་འབོར་མུ་མཐུད་དུ་འཕར་བཞིན་པའི་ཁྲོད་འདིར་ཟླ་བ་འདིའི་ཚེས་ ༨ ཉིན་རྒྱ་རིགས་བེུད་ཅིག་གིས་རང་གི་སྐད་འཕྲིན་ཐོག་རྒྱ་ནག་གཞུང་ངོས་ནས་ལྷ་ས་ནང་གི་བོད་རིགས་ཡོངས་རྫོགས་ངེས་པར་རྩ་མེད་བཏང་ནས་ལྷ་ས་དེ་བཞིན་རྒྱ་ནག་ཧན་མི་རིགས་ལ་བཙན་བཟུང་བྱེད་བཅུག་དགོས་པའི་སྐད་ཆ་བཤད་པ་ཞིག་སྤྱི་ཚོགས་དྲྭ་ལམ་ཐོག་ཁྱབ་གདལ་ཤུགས་ཆེ་འགྲོ་བར་བརྟེན་བོད་ནང་གི་བོད་མི་རྣམས་ཀྱིས་དེར་ཚོར་ཤུགས་དྲག་པོས་སྐྱོན་བརྗོད་དང་ཁོང་ཁྲོའི་རྣམ་པ་ཤུགས་ཆེ་བཏོན་ཡོད་པ་དང་དེའི་ཁོངས་ནས་བོད་མི་ཞིག་གིས་ད་རེས་རྒྱ་རིགས་བེུད་ཅིག་གིས་བོད་མིར་མི་རིགས་དབྱེ་འབྱེད་ཐོག་ནས་རྩ་མེད་གཏོང་དགོས་པའི་སྐད་ཆ་བཤད་ཡོད་པར་བརྟེན་ནས་ཁོང་གིས་གནད་དོན་དེའི་སྐོར་མ་བཤད་ཀ་མེད་བྱུང་སོང་ཞེས་དང་ཁོ་མོས་སྐད་ཆ་དེས་ནི་ཁོང་གི་སྙིང་ལ་གྲི་སྣུན་པ་ལྟ་བུའི་ཚོར་བ་ཞིག་སྤྲད་ཡོད་པ་འགྲེལ་བརྗོད་དང་སྦྲགས། ཁོང་གིས་རེ་འདུན་ལ་བོད་མི་གཞན་ཚང་མས་གནད་དོན་འདིའི་ཐུགས་སྣང་གནང་སྟེ་རྒྱ་ནག་གི་གོང་རིམ་སྲིད་གཞུང་ལ་རྒྱ་རིགས་བེུད་དེའི་བྱ་སྤྱོད་ཐོག་དོ་དན་གྱིས་ཁྲིམས་གཅོད་བྱ་དགོས་པའི་ཐད་ལ་སྐུལ་མ་གནང་དགོས་པའི་འབོད་སྐུལ་ཞུས་འདུག གོང་ཞུས་གནད་དོན་དེ་དང་འབྲེལ་ནས་ཟླ་བ་འདིའི་ཚེས་ ༨ ཉིན་ལྷ་ས་སྤྱི་བདེ་ལས་ཁུངས་ཀྱིས་གོང་ཞུས་རྒྱ་རིགས་བེུད་དེའི་མིང་ལ་Liu ཞུས་ཀྱི་ཡོད་པ་གསལ་བཏོན་གནང་བ་དང་འབྲེལ་ཏེ་ཡོངས་གྲགས་ཀྱི་གསལ་བསྒྲགས་ཤིག་སྤེལ་བའི་ནང་དུ། ཉེ་ཆར་ལྷ་ས་ནང་གི་རྒྱ་རིགས་བེུད་ Liu ཞུས་མཁན་ཞིག་གིས་སྤྱི་ཚོགས་དྲྭ་ལམ་ཐོག་ཚུལ་མིན་གྱི་སྐད་ཆ་བཤད་ཡོད་པ་དེས་རྒྱལ་ཁབ་ཀྱི་ཆིག་སྒྲིལ་ལ་ཁྱད་གསོད་བྱེད་པ་མཚོན་གྱི་ཡོད་པས་ཁོང་གི་ཐོག་ལ་རྟོག་ཞིབ་བྱས་བཞིན་པ་ཆབས་ཅིག  གནད་དོན་འདིའི་ཐད་ཁོང་རང་ཉིད་ཀྱིས་འགན་ཁུར་ཐབས་ཤིག་བཟོ་རྒྱུ་ཡིན་ཚུལ་བཤད་པའི་རྗེས་སུ་ཉིན་དེའི་ཉིན་རྒྱབ་ཚོུད་ ༣ ཙམ་ལ་རྒྱ་རིགས་བེུད་དེས་བསྐྱར་དུ་རང་ཉིད་ཀྱི་སྐད་འཕྲིན་ཐོག་ཁོ་མོས་རྒྱལ་ཁབ་ཀྱི་ཆིག་སྒྲིལ་ལ་གནོད་པའི་སྐད་ཆ་བཤད་པ་དེས་སྤྱི་ཚོགས་ལ་ཤུགས་རྐྱེན་ཆེན་པོ་སྤྲད་ཡོད་པ་འགྲེལ་བརྗོད་དང་འབྲེལ་ནས་རྒྱ་ནག་གཞུང་དང་མང་མང་ཡོངས་ལ་དགོངས་སེལ་ཞུས་ཀྱི་ཡོད་ཅེས་བརྗོད་དེ་མ་འོངས་པར་དེ་ལྟ་བུའི་བྱ་སྤྱོད་སྤེལ་རྒྱུ་མིན་ཞེས་བཤད་འདུག ད་རེས་རྒྱ་རིགས་བེུད་ Liu ཡིས་བོད་མིར་མི་རིགས་དབྱེ་འབྱེད་ཀྱིས་རྩ་མེད་གཏོང་དགོས་པའི་སྐད་ཆ་བཤད་ཡོད་པ་དེར་བོད་ཕྱི་ནང་གཉིས་སུ་སྐྱོན་བརྗོད་ཤུགས་ཆེ་གནང་བཞིན་པའི་ཁྲོད་འདིར། རྒྱལ་སྤྱིའི་བོད་དོན་ལས་འགུལ་ཁང་གིས་ཀྱང་གོང་ཞུས་གནད་དོན་དེར་ལྷ་ས་སྤྱི་བདེ་ལས་ཁུངས་ཀྱིས་མི་རིགས་དབྱེ་འབྱེད་ཀྱི་འགྲེལ་བརྗོད་དེ་ཚུལ་མིན་གྱི་འགྲེལ་བརྗོད་ཙམ་ཞིག་དང་དེས་རྒྱ་ནག་ཆིག་སྒྲིལ་གྱི་སྲིད་བྱུས་ལ་གནོད་ཀྱི་ཡོད་པའི་ཡོངས་གྲགས་གསལ་བསྒྲགས་ཤིག་སྤེལ་བ་ཙམ་མ་གཏོགས་དོན་དངོས་ཐོག་རྒྱ་མི་རིགས་ཀྱི་བོད་མིར་མི་རིགས་དབྱེ་འབྱེད་བྱས་བཞིན་པའི་གནད་དོན་ལ་གླེང་སློང་བྱས་མེད་པར་རྒྱ་གཞུང་ལ་སྐྱོན་བརྗོད་གནང་བ་མ་ཟད། རྒྱ་རིགས་བེུད་དེས་དགོངས་སེལ་ཞུས་པ་དེའང་འཁྲབ་སྟོན་གྱི་ངོ་བོ་ཙམ་ཞིག་དང་དགོངས་སེལ་ཞུས་ཡུལ་དེའང་རྒྱ་གཞུང་དང་སྤྱི་མང་ལ་ཞུས་པ་མ་གཏོགས་བོད་མིར་ཐད་ཀར་ཞུས་མེད་པ་དང་ཆབས་ཅིག དགོངས་སེལ་གྱི་བསྒྲགས་གཏམ་དེ་བཞིན་བོད་ཡིག་ནང་བསྒྱུར་མེད་སྐོར་མངོན་གསལ་གནང་འདུག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་བོད་ནང་གི་མི་རིགས་དབྱེ་འབྱེད་ཀྱི་གནད་དོན་དང་འབྲེལ་ཏེ་བོད་དེ་བཞིན་ད་ལྟའི་འཛམ་གླིང་ནང་ལ་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་ཤུགས་ཆེ་བྱས་ཡུལ་གྱི་རྒྱལ་ཁབ་མངོན་གསལ་ཆེ་ཤོས་ཤིག་ཆགས་ཀྱི་ཡོད་ནའང་། རྒྱ་གཞུང་གིས་བོད་དེ་བཞིན་དེ་སྔ་ཞིང་བྲན་ལམ་ལུགས་ཀྱི་སྤྱི་ཚོགས་ཤིག་ཡིན་པས་ད་ཆ་རྒྱ་ནག་གི་དབང་བསྒྱུར་གྱི་འོག་ཏུ་སྤྱི་ཚོགས་རིང་ལུགས་དང་ཡར་རྒྱས་ཕྱོགས་སུ་བསྐྱོད་ཡོད་ཚུལ་བརྗོད་དེ་བོད་ནང་འབྲོག་པ་གཞིས་སྤོས་སོགས་ཀྱི་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བརྒྱུད་བོད་མི་རྣམས་རང་རྒྱལ་ཁབ་ནང་མི་སེར་གཉིས་པའི་ངོ་བོའི་ཐོག་ནས་འཚོ་བཞིན་པ་མ་ཟད། ཁོང་རྣམས་ཀྱི་ཉིན་རེའི་ལས་དོན་ཐོག་ལྟ་སྲུང་དང་སུན་གཙེར་སོགས་བྱས་ཏེ་གཞི་རྩའི་འགྲོ་བ་མིའི་ཐོབ་ཐང་ཁག་ལོངས་སུ་སྤྱོད་རྒྱུར་འགོག་རྐྱེན་སྣ་ཚོགས་བཟོ་བཞིན་ཡོད་པ་སོགས་ཐེར་འདོན་གནང་འདུག ལྷག་དོན་རྒྱ་གཞུང་གིས་དབང་བསྒྱུར་འོག་བོད་ནང་གི་བོད་མི་རྣམས་ལ་ལས་ཀ་དང་ཁང་ལས། དེ་བཞིན་འགྲུལ་བཞུད་སོགས་ཀྱི་ཐད་ནས་དབྱེ་འབྱེད་ཀྱི་ངལ་བ་མང་དག་ཞིག་འཕྲད་བཞིན་པའི་ཁོངས་སུ། མང་པོ་ཞིག་བོད་སྐད་ཡིག་སྲུང་སྐྱོབ་གོང་སྤེལ་དང་འབྲེལ་ནས་འཛིན་བཟུང་བཙོན་འཇུག་བྱས་པ་དང་ཆོས་ཕྱོགས་ཀྱི་གནང་སྒོ་ཁག་ལ་དམ་དྲག འབྲོག་པ་རྣམས་བཙན་དབང་གིས་གཞི་སྤོས་བཅུག་བཞིན་པའི་གནས་སྟངས་ཁག་ལ་བརྟེན་ནས་བོད་མི་རང་ལུས་མེར་བསྲེགས་ཀྱི་གནད་དོན་བྱུང་གི་ཡོད་པ་འགྲེལ་བརྗོད་གནང་སྟེ་རྒྱ་གཞུང་གིས་བོད་མིར་དབྱེ་འབྱེད་བྱ་རྒྱུ་ལས་ལྡོག་སྟེ་རང་མི་རིགས་ཀྱི་སྤྱི་ཚོགས་དེ་རང་ཉིད་ཀྱི་སྐྱོང་ཆོག་པའི་ཐོབ་ཐང་ཆ་ཚང་སྤྲོད་དགོས་པ་དང་ཆབས་ཅིག རྒྱལ་སྤྱིའི་སྤྱི་ཚོགས་ངོས་ནས་ཀྱང་རྒྱ་གཞུང་གིས་བོད་མིའི་ཐོག་མི་རིགས་དབྱེ་འབྱེད་བྱས་བཞིན་པ་མཚམས་འཇོག་ཡོང་སླད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུག

རིང་མིན་ཟླ་བ་རྗེས་མའི་ཚེས་ ༣ དང་ ༤ བཅས་གཉིས་རིང་འཇར་མི་ནིར་འཛམ་གླིང་ཁྲོད་སྟོབས་ཆེན་རྒྱལ་ཁབ་ ༧ དང་ཡུ་རོབ་མཐུན་ཚོགས་ལས་གྲུབ་པའི་ G7 ལྷན་ཚོགས་ཀྱི་ཕྱི་སྲིད་བློན་ཆེན་རིམ་པའི་ཚོགས་འདུ་འཚོགས་གཏན་ཁེལ་བ་དང་བསྟུན། དེ་རིང་བཞུགས་སྒར་དུ་ G7 འགོ་ཁྲིད་རྣམས་ལ་བོད་ནང་རྒྱ་ནག་གཞུང་གིས་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭ་མང་དག་ཅིག་གསར་རྒྱག་བརྒྱུད་བོད་མི་རིགས་རྩ་མེད་བཟོ་རྒྱུའི་བྱ་སྤྱོད་སྤེལ་བཞིན་པ་དེ་འཕྲལ་མར་མཚམས་འཇོག་ཐད་ལ་གནོན་ཤུགས་སྤྲོད་དགོས་ཞེས་དང་དེ་འབྲེལ་མཚན་རྟགས་བསྡུ་རུབ་ཀྱི་ལས་འགུལ་ཞིག་དབུ་འཛུགས་གནང་སོང་། བཞུགས་སྒར་དྷརྨ་སཱ་ལཱར་རྟེན་གཞི་བྱས་པའི་བོད་རྒྱལ་ཡོངས་མང་གཙོ་ཚོགས་པ་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཉིས་མཉམ་འབྲེལ་ཐོག་དེ་རིང་སྔ་དྲོ་ཚོུད་  ༡༠ སྟེང་མེག་གྷན་བཞི་མདོར་ G7 འགོ་ཁྲིད་རྣམས་ལ་བོད་དོན་ཞུ་གཏུག་ཐོག་མཚན་རྟགས་བསྡུ་རུབ་གནང་རྒྱུའི་བདུན་ཕྲག་གསུམ་གྱི་ལས་འགུལ་དབུ་འཛུགས་གནང་སོང་།ལས་འགུལ་འདིའི་ཁྲོད་ G7 འགོ་ཁྲིད་རྣམས་ལ་འབུལ་ལམ་ཞུ་རྒྱུའི་ཞུ་ཡིག་ནང་ད་ལྟའི་ཆར་བོད་ནང་བོད་ཕྲུག་ས་ཡ་གཅིག་ལ་ཉེ་བ་རྣམས་རང་ཉིད་ཀྱི་ནང་མི་དང་སྤྱི་ཚོགས་སོགས་དང་ཁ་བྲལ་གཏོང་བཞིན་པ་དེས་རྒྱ་ནག་གི་གཞི་རྒྱ་ཆེ་བའི་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭ་དང་སྔོན་འགྲོའི་སློབ་གྲྭ་ཁག་གི་ནང་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པ་མི་རིགས་ཀྱི་ངོ་བོ་རྩ་མེད་བཟོས་ཏེ་རྒྱ་སྒྱུར་སློབ་གསོའི་སྲིད་བྱུས་ལག་བསྟར་བྱེད་བཞིན་པ་དང་། ཕྱོགས་གཞན་ཞིག་ནས་བོད་ནང་བོད་ཡིག་སློབ་ཁྲིད་གཙོ་བོ་བྱེད་མཁན་གྱི་སློབ་གྲྭ་མང་དག་ཅིག་བཙན་དབང་གིས་སྒོ་བརྒྱབ་པ་སོགས་བོད་ནང་གི་བོད་མི་དང་དམིགས་བསལ་བོད་པའི་བུ་ཕྲུག་ཚོར་ལུས་སེམས་གཉིས་ཀར་མནར་གཅོད་ཆེས་ཆེར་གཏོང་བཞིན་ཡོད་པ། རྒྱ་ནག་གི་ཤེས་ཡོན་སྲིད་བྱུས་དེ་དག་གིས་མ་འོངས་པར་སོ་སོའི་སྐད་ཡིག་དང་རིག་གནས། སྤྱི་ཚོགས་སོགས་གང་ལའང་ཆ་རྒྱུས་མེད་པའི་བོད་པའི་མི་རབས་གསར་པ་ཞིག་སྐྱེད་སྲིང་ཐོག་ནས་མཐར་བོད་མི་རིགས་ཀྱི་ངོ་བོ་རྩ་བརླག་གཏང་རྒྱུ་དང་། བོད་ནང་རྒྱ་གཞུང་གི་དབང་བསྒྱུར་སྲ་བརྟན་བཟོ་ཐབས་སོགས་ཀྱི་སྲིད་བྱུས་སྤེལ་དང་སྤེལ་བཞིན་པ་བཅས་མངོན་གསལ་གནང་ཡོད། རྒྱ་ནག་གཞུང་ལ་བོད་ཁུལ་དུ་མི་སེར་སྤེལ་ཡུལ་གྱི་བྱ་སྤྱོད་དང་སྲིད་བྱུས་དེ་དག་མཚམས་འཇོག་དགོས་པའི་གནོན་ཤུགས་སྤྲོད་དགོས་ཞེས་འབོད་སྐུལ་བསྐྱར་ནན་གནང་འདུགརྩ་བའི་འདི་ལོའི་ཕྱི་ཟླ་ ༥ ཚེས་ ༣ ནས་ ༥ བར་ཨིན་ཡུལ་གྱི་རྒྱལ་ས་ལོན་ཌོན་དུ་ཚོགས་པའི་ G7 ལྷན་ཚོགས་ཐོག་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་ཤིན་ཅང་ཡུ་གུར་དང་བོད་མི་བཅས་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་སྐྱོན་བརྗོད་ཤུགས་ཆེ་གནང་ཡོད། G7 ལྷན་ཚོགས་ཀྱི་ཕྱི་སྲིད་བློན་ཆེན་རྣམ་པས་རྒྱ་ནག་གཞུང་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་གཙོས་རང་དབང་ཅན་གྱི་རྟོག་ཞིབ་པ་རྣམས་འཕྲལ་མར་ཁུལ་དེ་དག་ཏུ་བཀག་སྡོམ་གང་ཡང་མེད་པར་ཕེབས་འཐུས་ཆོག་མཆན་སྤྲོད་དགོས་པའི་རེ་སྐུལ་གནང་མྱོང་ཡོད་པ་ལྟར་སྐབས་དེར་རྒྱ་ནག་གཞུང་གིས་སྐྱོན་བརྗོད་དེ་དག་ལ་ངོས་ལེན་མེད་སྐོར་དང་སྦྲགས་ཏེ་ G7 ལྷན་ཚོགས་ལ་རྒྱ་ནག་གི་ནང་སྲིད་གནད་དོན་ལ་ཐེ་བྱུས་གནང་རྒྱུ་མེད་པའི་ཉེན་བརྡ་བཏང་ཡོད།

ཁ་སང་ཕྱི་ཟླ་ ༡༠ ཚེས་ ༦ ཉིན་འདི་ག་ཇི་ནི་ཝ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ སྟེང་ཨ་རི་དང་དབྱིན་ཡུལ། ནོར་ཝེ། ཁེ་ན་ཌ། དེ་བཞིན་ཨོ་སི་ཊི་ལི་ཡ་སོགས་ནུབ་ཕྱོགས་མང་གཙོའི་རྒྱལ་ཁབ་མང་ཆེ་བས་རྒྱ་ནག་གཞུང་གིས་ཤིན་ཅང་ནང་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེ་བཏང་བའི་སྙན་ཐོ་དང་འབྲེལ་ཏེ་རྗེས་མའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༢ སྐབས་རྒྱ་ནག་ཐོག་བགྲོ་གླེང་དགོས་པའི་གྲོས་འཆར་ཞིག་གནང་ཡོད་པ་རེད།ལྷན་ཚོགས་ཀྱི་ཚོགས་མི་རྒྱལ་ཁབ་ཁག་གིས་གྲོས་འཆར་ལ་དེར་རྒྱབ་སྐྱོར་དང་དགག་པ་ཡོད་པའི་རྒྱུ་མཚན་འགྲེལ་བརྗོད་གནང་རྗེས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་རྒྱལ་ཁབ་ ༤༧ ཡོད་པ་ལས་ལྷན་ཁང་གི་ཚོགས་མི་རྒྱལ་ཁབ་ ༡༧ གྱིས་གྲོས་འཆར་འདིར་རྒྱབ་སྐྱོར་གནང་བ་དང་ཚོགས་མི་རྒྱལ་ཁབ་ ༡༩ ཡིས་དགག་པ་གནང་བ། དེ་བཞིན་རྒྱ་གར་གཙོས་ཚོགས་མི་རྒྱལ་ཁབ་ ༡༡ བར་གནས་བཞུགས་ཏེ་ཤིན་ཅང་ནང་གི་འགྲོ་བ་མིའི་ཐོབ་ཐང་གི་སྙན་ཐོ་དང་འབྲེལ་ནས་རྒྱ་ནག་ཐོག་བགྲོ་གླེང་དགོས་པའི་གྲོས་འཆར་ལ་མང་མོས་ཀྱི་རྒྱབ་སྐྱོར་ཐོབ་མེད་པ་རེད། གྲོས་འཆར་ཐོག་འཛམ་གླིང་ནང་ཁ་ཆེའི་རྒྱལ་ཁབ་ཆེ་ཁག་ཨིན་ཌོ་ནེ་ཤ་ཡ་དང་ཁཱ་ཏར། དེ་བཞིན་པ་ཀིས་ཏན་སོགས་ཀྱིས་གྲོས་འཆར་འདིར་དགག་པ་བྱས་འདུག ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱ་ནག་གི་འགྲོ་བ་མིའི་ཐོབ་ཐང་གནད་དོན་རང་གི་ཐོག་ལ་དམིགས་ནས་བགྲོ་གླེང་དགོས་པའི་གྲོས་འཆར་འདོན་པ་འདི་ནི་ཕྱི་ལོ་ ༢༠༠༦ རྗེས་ཀྱི་ཐེངས་དང་པོ་ཆགས་ཀྱི་ཡོད་པ་རེད། ཤིན་ཅང་ནང་གི་འགྲོ་བ་མིའ་ཐོབ་ཐང་དང་འབྲེལ་བའི་སྙན་ཐོ་འདི་ནི། དེ་སྔོན་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་ལྕམ་སྐུ་ Michelle Bachelet མཆོག་གིས་ཁོ་མོ་ལས་གནས་ནས་འཁྱུར་བར་དུས་ཡུན་སྐར་མ་ཁ་ཤས་ལས་མེད་པའི་མཚམས་འདི་ལོའི་ཕྱི་ཚེས་ ༨ ཚེས་ ༣༡ ཉིན་འདོན་སྤེལ་གནང་ཡོད་པ་དང། སྙན་ཐོ་ནང་གཙོ་བོ་རྒྱ་ནག་གཞུང་གི་ངོས་ནས་ཤིན་ཅང་ནང་ཡུ་གུར་གཙོ་བོར་གྱུར་པའི་ཏུར་ཀི་ཁ་ཆེའི་མི་རིགས་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེ་བཏང་ཡོད་པ་ར་སྤྲོད་གནང་བ་དང་འབྲེལ། ཡུ་གུར་མི་རིགས་རྣམས་ཁྲིམས་མེད་ལུང་མེད་སྒོ་ནས་འཇིན་བཟུང་བཀག་ཉར་དང་ཁོང་ཚོའི་ཐོག་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་ནི་ཁྲིམས་འགལ་ཡིན་པར་ར་སྤྲོད་གནང་ཡོད། ལྷན་ཚོགས་སྟེང་གོང་གསལ་སྙན་ཐོ་དེ་དང་འབྲེལ་ནས་ཨ་རི་གཙོས་མང་གཙོའི་རྒྱལ་ཁབ་ཁག་ནས་རྒྱ་ནག་དེ་ལྷན་ཚོགས་ཐོག་འགན་འཁུར་ལན་འདེབས་བྱེད་དུ་བཅུག་རྒྱུའི་གྲོས་འཆར་ཞིག་འདོན་ཡོད་ཀྱང་སྐབས་དེར་ལྷན་ཚོགས་ནང་གྲོས་འཆར་ཐོག་ཚོགས་མི་རྒྱལ་ཁབ་ཀྱི་མང་མོས་རྒྱབ་སྐྱོར་ཐོབ་མེད་པ་རེད། ཕྱི་དྲོར་འཛམ་གླིང་ཡུ་གུར་མཐུན་ཚོགས་ཀྱིས་གསར་འགོད་སྤྱིར་བསྒྲགས་ཤིག་སྤེལ་ཏེ་ལྷན་ཚོགས་ཐོག་ལོ་རྒྱུས་ཀྱི་རང་བཞིན་ལྡན་པའི་གྲོས་འཆར་ལ་དགག་པ་གནང་མཁན་གྱི་ཚོགས་མི་རྒྱལ་ཁབ་ཁག་ནི། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགྲོ་བ་མིའི་ཐོབ་ཐང་དང་མི་རིགས་དབྱེ་འབྱེད། འགན་འཁུར་ལན་འདེབས་ཞེས་པའི་གཞི་རྩའི་ལྟ་གྲུབ་ལ་རྒྱབ་གཏོད་བྱས་པ་ཞིག་རེད་ཅེས་སྐྱོན་བརྗོད་བྱས་པར་མ་ཟད། ལྷན་ཚོགས་ཐོག་གྲོས་འཆར་དེ་ལམ་ལྷོང་བྱུང་མེད་པར་ལྟོས་མེད་ང་ཚོ་ཡུ་གུར་མང་ཚོགས་དང་འགྲོ་བ་མིའི་ཐོབ་ཐང་རྩོད་ལེན་པ་ཚོས་སེམས་ཤུགས་མ་ཆག་པར་མུ་མཐུད་དྲང་བདེན་ཐོག་འབད་རྩོན་བྱས་ཏེ་རྒྱ་ནག་གཞུང་དེ་རྒྱལ་ཚོགས་ཀྱི་ལྷན་ཚོགས་ཐོག་འགན་འཁུར་ལན་འདེབས་བྱེད་དགོས་པ་ཞིག་བཟོ་རྒྱུ་ཡིན་ཞེས་བཤད་འདུག དེ་བཞིན་འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་ Dolkun Isa ལགས་ཀྱིས་འདི་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་རྒྱལ་ཁབ་ཁག་ནས་རྒྱལ་ཚོགས་ལ་རྒྱ་ནག་གི་ངོས་ནས་འགན་འཁུར་ལན་འདེབས་བྱེད་དུ་བཅུག་རྒྱུའི་གོ་སྐབས་ཆེན་པོ་ཞིག་ཤོར་བ་རེད་ཅེས་དང་། རྒྱལ་སྤྱིའི་ཚོགས་སྡེ་ཁག་ནས་ཉེས་མེད་གནོད་འཚེ་ཕོག་པའི་ཡུ་གུར་མང་ཚོགས་རྣམས་ཕམ་ཉེས་གཏོང་ཐུབ་ཀྱི་མ་རེད་ཅེས་བརྗོད་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་མཚན་པའི་འགན་འཛིན་ Sophie Richardson ལགས་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རང་ཉིད་ཀྱི་འགན་འཁུར་དོར་ནས་ཉེས་མེད་གནོད་འཚེ་ཕོག་པའི་ཡུ་གུར་མང་ཚོགས་ལ་རྒྱབ་གཏོད་བྱས་པ་ཞིག་པ་དང། རྒྱ་ནག་གཞུང་གིས་འགྲོ་བ་མིའི་རིགས་ལ་ཁྲིམས་འགལ་ཐོག་ནས་ནག་ཉེས་ཇི་བསགས་སུབ་ཐུབ་ཀྱི་མ་རེད་ཅེས་བརྒྱུད་ལམ་ལ་འགྲེལ་བརྗོད་གནང་འདུག ཁ་སང་འཛམ་གླིང་རྒྱལ་ཁབ་ཉི་ཤུ་ལྷག་ནང་གནས་པའི་ཡུ་གུར་ཚོགས་སྐྱིད་ཁག་ ༦༦ ནས་ད་རེས་རྒྱལ་ཚོགས་ཀྱི་ལྷན་ཚོགས་སྟེང་ཤིན་ཅང་ནང་གི་འགྲོ་བ་མིའི་ཐོབ་ཐང་སྙན་ཐོ་དང་འབྲེལ་ནས་རྒྱ་ནག་ཐོག་བགྲོ་གླེང་དགོས་པའི་གྲོས་འཆར་ལ་དོན་འབྲས་མ་སོན་པའི་གནད་དོན་དང་འབྲེལ་ཏེ་རྒྱལ་ཚོགས་ཀྱི་འབྲེལ་ཡོད་སྡེ་ཚན་ཁག་དང་དམིགས་བསལ་ཁེ་ལས་རྟོག་ཞིབ་སྡེ་ཁག་གིས་དགོས་ངེས་དང་མཐུན་པའི་བྱ་སྤྱོད་ཅིག་ངེས་པར་དུ་སྤེལ་རོགས་ཞེས་ཞུ་སྙན་ཞིག་ཀྱང་ཕུལ་འདུག