གསར་འགྱུར།

བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་གིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ལས་ཁུར་དང་གསང་རྒྱའི་དམ་བཅའ་འབུལ་བཞེས་དང་སྦྲགས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོར་ཟུར་པ་མཆོག་ལ་ཐུགས་རྗེ་ཆེ་ཞེས་དང་བདམས་ཐོན་སྲིད་སྐྱོང་མཆོག་ལ་འཚམས་འདྲི་མཛད་སོང་།  དེ་རིང་སྔ་དྲོ་ཆུ་ཚོད་ ༩་༥༥ ཐོག་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་བདམས་ཐོན་སྲིད་སྐྱོང་གསར་པའི་དམ་འབུལ་གྱི་མཛད་སྒོ་ཚོགས་སོང་བ་དང་མཛད་སྒོའི་ཐོག་མར་གནས་ཆུང་སྒྲ་དབྱངས་གླིང་གི་དགེ་འདུན་པས་དྲྭ་ཐོག་བརྒྱུད་ཤིས་བརྗོད་གསུང་འདོན་དང་། ཁྲིམས་ཞིབ་པ་ཆེ་བ་མཆོག་དང་བདམས་ཐོན་སྲིད་སྐྱོག་མཆོག་ནས༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེར་མནྚ་རྟེན་གསུམ་འདེགས་འབུལ་བཅས་གནང་གྲུབ་མཚམས་སུ་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་གིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ལས་ཁུར་དང་གསང་རྒྱའི་དམ་བཅའ་འབུལ་བཞེས་གནང་ཡོད།  དམ་འབུལ་གྲུབ་མཚམས་སུ་སྲིད་སྐྱོང་གསར་རྙིང་དབར་ལ་བཀའ་ཐམ་སྲིད་ཞི་བདེ་སྐྱིད་རྩིས་སྤྲོད་ལེན་དང་སྦྲགས་ཏེ། སྲིད་སྐྱོང་ཟུར་པ་བློ་བཟང་སེང་གེ་མཆོག་ནས་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་རྟེན་འབྱུང་མཇལ་དར་དང་སྦྲགས་འཚམས་འདྲི་ཞུས་སོང་བ་དང་། ལྷག་པར་དུ་སྐབས་དེའི་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ཐོག་བརྒྱུད་དབུས་བཞུགས་མཛད་དེ་བོད་འདི་ལོ་རྒྱུས་རང་བཞིན་ལྡན་པའི་མི་རིགས་ཤིག་ཡིན་པ་མ་ཟད། སྔ་མོ་ཆོས་རྒྱལ་གྱི་སྐུ་དུས་ནས་བཟུང་སྟེ་བོད་ལ་སྒྲིག་འཛུགས་ཤིག་ཀྱང་ཡོད་པ་དང་། རིམ་བཞིན་རྒྱ་གར་དུ་བཙན་བྱོལ་ལ་འབྱོར་ཏེ་ལོ་གཅིག་གཉིས་ཀྱི་མཚམས་སུ་སྤྱི་འཐུས་བསྐོ་གཞག་གནང་རྒྱུ་སོགས་དབུ་འཛུགས་གནང་སྟེ་བོད་པའི་སྒྲིག་འཛུགས་དེ་ཁ་ཞེ་གཉིས་མེད་ཀྱི་མང་གཙོའི་ལམ་ལུགས་ཤིག་གི་ཐོག་སྐྱོད་བཞིན་ཡོད་པ་དང་། ལྷག་པར་དུ་རྒྱ་ནག་གི་འགོ་ཁྲིད་མགོ་མཁྲེགས་ཚོས་ང་ཚོར་ཞིང་བྲན་ལམ་ལུགས་སོགས་བརྗོད་དེ་སྐྱོན་བརྗོད་བྱེད་ཀྱི་ཡོད་ཀྱང་། དངོས་ཡོད་གནས་ཚུལ་ལ་བོད་ནང་ལ་རང་དབང་མེད་པ་དང་བཙན་བྱོལ་ནང་བོད་མི་ཚོར་རང་དབང་ཡོད་པའི་ཐོག་ནས་བོད་པའི་སྒྲིག་འཛུགས་འདི་ཡང་མང་གཙོའི་ལམ་ལུགས་མཐར་ཕྱིན་པ་ཞིག་གི་ཐོག་ཏུ་བསྐྱོད་དེ་ད་རེས་མི་མང་ནས་བདམས་ཐོན་བྱུང་བའི་སྲིད་སྐྱོང་དང་སྲིད་སྐྱོང་ཟུར་པ་གཉིས་ཀར་ཐུགས་རྗེ་ཆེ་ཞེས་དང་འཚམས་འདྲི་ཡོད་ཅེས་བཀའ་སྩལ་སོང་། མགོན་པོ་༸གང་ཉིད་མཆོག་ནས་ཆབ་སྲིད་ཀྱི་༸སྐུ་དབང་རྩིས་སྤྲོད་གནང་བ་ནས་བཟུང་ཆབ་སྲིད་ཀྱི་འགན་རྣམས་མི་མང་གིས་འོས་བསྡུའི་ལམ་ནས་བདམས་པའི་འགོ་ཁྲིད་ཚོས་འགན་བཞེས་ཏེ་ད་བར་ཚང་མས་ཡག་ཐག་ཆོད་གནང་བར་ཐུགས་རྗེ་ཆེ་ཞེས་བཀའ་སྩལ་དང་ཆབས་ཅིག ད་ཆ་དུས་ཀྱི་ཆ་ནས་འགྱུར་བ་ཆེན་པོ་འགྲོ་བཞིན་པའི་ཁྲོད་དུ་རྒྱ་ནག་ནང་ལའང་འགྱུར་བ་འགྲོ་བཞིན་ཡོད་པ་དང་། ང་ཚོས་བོད་ཀྱི་གནད་དོན་འདི་གཉིས་ཀར་ཕན་པའི་དབུ་མའི་ལམ་གྱི་ཐོག་ནས་འགྲོ་བཞིན་ཡོད་པ་མ་ཟད་བོད་མིའི་སྒྲིག་འཛུགས་དེ་ཡང་མང་གཙོ་ཡང་དག་པ་ཞིག་གི་ཐོག་ཏུ་བསྐྱོད་དེ་ད་བར་བོད་མིས་རང་གི་གཅེས་ནོར་སྲུང་སྐྱོབ་རྒྱུན་འཛིན་སོགས་ཚང་མས་ཧུར་ཐག་འབད་ཐག་གནང་ཡོད་པར་བཀའ་སྩལ་ཡོད།    དམ་འབུལ་གྱི་མཛད་རིམ་ཁག་གྲུབ་མཚམས་སུ་སྲིད་སྐྱོང་སྤེན་པ་ཚེ་རིང་མཆོག་ནས་ཕྱི་ནང་གི་གསར་འགོད་པའི་བཀའ་འདྲི་དང་ལེན་དང་སྦྲགས་ཏེ། ཐེངས་འདིའི་དམ་འབུལ་མཛད་སྒོའི་ཐོག་ཇི་ལྟར་གསོལ་བ་བཏགས་པ་བཞིན་༸གོང་མཆོག་གིས་བཀའ་སློབ་བཀའ་དྲིན་ཆེ་བ་སྩལ་བ་དེ་ནི་སྐལ་བ་བཟང་པོ་ཞིག་ཡིན་པ་དང་མགོན་པོ་༸གང་ཉིད་མཆོག་གི་གསུང་འཕྲིན་གྱི་དགོངས་དོན་ལྟར་ལས་དོན་ཁག་གནང་རྒྱུའི་དམ་བཅའ་གཏན་པོ་ཡོད་ཅེས་གསུངས་སོང་།གཞི་རྩའི་ཐེངས་འདིའི་སྲིད་སྐྱོང་གི་དམ་འབུལ་མཛད་སྒོ་དེ་ཏོག་དབྱིབས་རིམས་ནད་ཀྱི་ཛ་དྲག་ཁྲོད་དུ་འཁེལ་ཡོད་སྟབས་ས་གནས་མངའ་སྡེ་གཞུང་གི་བཀའ་ཁྱབ་ལམ་སྟོན་ཁག་ལ་གཞིགས་ཏེ་དམ་འབུལ་མཛད་སྒོའི་ཐོག་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་། སྲིད་སྐྱོང་ལས་ཐོག་བློ་བཟང་སེང་གེ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་བཅས་དངོས་སུ་ལྷན་ཞུགས་གནང་གཏན་འཁེལ་ཡོད་ཀྱང་། དེ་རིང་མཛད་སྒོའི་ཐོག་ཉེ་ལམ་ཆེས་མཐོའི་ཁྲིམས་ཞིབ་ཁང་དང་སྐབས་༡༦ བོད་མི་མང་སྤྱི་འཐུས་རྒྱུན་ལས་དབར་བྱུང་བའི་གནད་དོན་ལས་འཕྲོས་ཏེ་ཚོགས་གཞོན་མཆོག་དམ་འབུལ་མཛད་སྒོར་ལྷན་ཞུགས་གནང་མི་འདུག ཤེས་རྟོགས་བྱུང་བར་གཞིགས་ན་ཁ་སང་གི་རྒྱུན་ལས་ཚོགས་འདུའི་ཐོག་གནད་དོན་དེ་འབྲེལ་ཐག་གནང་སྐབས་རྒྱུན་ལས་དོན་གྲུབ་བཀྲིས་ལགས་དང་དགེ་བཤེས་རྔ་བ་གངས་རི་ལགས། བསྟན་འཛིན་འཇམ་དབྱངས་ལགས་བཅས་གསུམ་བློ་ཕམ་དང་བཅས་ཕྱིར་ཐོན་གནང་བ་དང་། དེ་བཞིན་ཚོགས་གཞོན་མཆོག་དེ་རིང་ཚོགས་གཞོན་གྱི་ལས་གནས་ནས་དགོངས་པ་ཞུས་ཟིན་པ་མ་ཟད། དེའི་རྗེས་སུ་སྤྱི་འཐུས་རྒྱུན་ལས་གསེར་རྟ་ཚུལ་ཁྲིམས་ལགས་དང་བསྟན་པ་ཡར་འཕེལ་ལགས། དགེ་བཤེས་སྨོན་ལམ་མཐར་ཕྱིན་ལགས། དགེ་བཤེས་གོ་བོ་བློ་བཟང་ཕན་བདེ་ལགས་སོགས་རྒྱུན་ལས་ནས་དགོངས་པ་ཞུས་འདུག དེ་རིང་ཚོགས་ཟུར་དང་དོན་ཟུར་སྤེན་པ་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ལས་ཁུར་དམ་འབུལ་ཞུས་ཏེ་ལས་ཉིན་དང་པོའི་ཐོག་གཞུང་འབྲེལ་བརྙན་འཕྲིན་བརྒྱུད་དེ་བོད་མི་མང་ཚོགས་ལ་གསུང་བཤད་ཐོག་མ་དེ་གནང་སོང་། སྐབས་དེར་ཁོང་གིས་ད་བར་བར་གྱི་བཙན་བྱོལ་བོད་མིའི་མང་གཙོའི་བརྒྱུད་རིམ་འདིའི་གྲུབ་འབྲས་ཡོངས་སུ་རྫོགས་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་པ་དང་། ཐེངས་དའིའི་འོས་བསྡུའི་ལས་རིམ་ཞི་འཇམ་གྲ་འགྲིག་གང་ལེགས་བྱུང་བ་དེ་ནི་བཙན་བྱོལ་བོད་མིའི་མང་གཙོའི་ལམ་ལུགས་ཀྱི་རྒྱལ་ཁའི་གོམ་སྟབས་ཆེན་པོ་ཞིག་ཏུ་ངོས་འཛིན་གནང་བཞིན་ཡོད་པ་སོགས་གསུངས་ཡོད། འབྱུང་འགྱུར་བོད་དོན་བདེན་མཐའ་གསལ་ཐབས་དང་འབྲེལ་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པའི་དབུ་མའི་ལམ་ལ་བརྟེན་ནས་རྒྱ་ནག་གཞུང་དང་མཉམ་དུ་བོད་རྒྱ་གཉིས་སྨན་དང་། འབྲེལ་གཏུག་གྲོས་མོལ། འཚེ་མེད་ཞི་བ་བཅས་ཀྱི་རྩ་དོན་གཞི་རྩར་བཞག་སྟེ་བོད་རྒྱའི་དཀའ་རྙོག་སེལ་ཐབས་གནང་རྒྱུ་དང་། གཞིས་ལུས་བོད་མིའི་མགྲིན་ཚབ་པ་བྱས་ཏེ། རྒྱལ་སྤྱིའི་ནང་བོད་དོན་ཞུ་གཏུག་གི་ལས་འགུལ་རྒྱ་ཆེར་སྤེལ་རྒྱུ། དེ་བཞིན་གཞིས་བྱེས་དབར་འབྲེལ་གཏུག་དང་། ༸གོང་ས་༸སྐྱབས་མགོན་ཆེན་པོ་མཆོག་རྒྱ་ནག་ཏུ་ཆིབས་བསྒྱུར་གྱི་ཐུགས་རེ་འགྲུབ་ཐབས་ལ་རམ་འདེགས་ཞུ་སླད་རྒྱ་གཞུང་ལ་འབྲེལ་མཐུད་ཞུ་སྒོ་གང་ཡོང་བྱ་རྒྱུ་སོགས་དེ་འབྲེལ་དོན་ཚན་ལྔ་གསུངས་ཡོད། མང་གཙོའི་ལམ་ལུགས་ཚགས་ཚུད་དང་སྲ་བརྟན་དང་འབྲེལ། བཀའ་ཤག་གི་ངོས་ནས་ཆེས་མཐོའི་ཁྲིམས་ཞིབ་ཁང་ལ་ཆེ་མཐོང་དང་བརྩི་བཀུར་ཞུས་ཏེ། ཁྲིམས་ལུགས་དབང་འཛིན་གྱི་ལས་དོན་ནུས་ལྡན་ལམ་ལྷོང་འབྱུང་བར་མཐུན་འགྱུར་གང་ཡོང་ཞུ་རྒྱུ་དང་། བོད་མི་མང་སྤྱི་འཐུས་ལྷན་ཚོགས་ལ་འགན་ཁུར་བའི་ཐོག་ནས་གྲོས་ཚོགས་ཀྱི་ལས་དོན་ཁག་ལ་མཐུན་འགྱུར་གང་ཡོད་ཞུ་རྒྱུ། རང་དབང་ཅན་གྱི་སྡེ་ཚན་ཁག་གི་རང་དབང་ལ་དོ་ཕོག་མ་སོང་བའི་སྒོ་ནས་ལས་དོན་ཡར་རྒྱས་ཚགས་ཚུད་ཀྱི་ཕྱོགས་སུ་འགྲོ་བར་མཐུན་འགྱུར་སྦྱར་རྒྱུ། གསར་འགྱུར་བརྒྱུད་ལམ་ཁག་མིང་དོན་མཚུངས་པའི་མང་གཙོའི་ཀ་བ་བཞི་པ་ཆགས་ཐབས་སུ་འཛིན་སྐྱོང་གི་ངོས་ནས་རང་དབང་དང་ཆེ་མཐོང་ཕུལ་བའི་ཐོག་ནས་སྒྲིག་འཛུགས་ཀྱི་མཐུན་རྐྱེན་གང་ཡོད་སྦྱར་རྒྱུ། དེ་བཞིན་གཞུང་ཁོངས་མ་ཡིན་པའི་ཚོགས་སྡེ་ཁག་ལ་ལུང་ཚན་དང་ཆོས་བརྒྱུད། ལྟ་བ་ལངས་ཕྱོགས་ཀྱི་དབྱེ་བ་མེད་པར་ནུས་པ་མཉམ་སྤུངས་བྱེད་ཕྱོགས་གོ་བསྡུར་བྱ་རྒྱུ་དང་། ས་གནས་སྒྲིག་འཛུགས་ཁག་དང་། མང་ཚོགས་ལ་འཛིན་སྐྱོང་གི་ལས་དོན་ཁག་ཕྱི་གསལ་ནང་གསལ་བྱས་ནས་འཛིན་སྐྱོང་གི་ངོས་ནས་བྱེད་སྒོ་མཐའ་དག་རྒྱ་ཆེའི་མང་ཚོགས་ལ་འགན་ཁུར་དང་། ལན་འདེབས། རྩིས་རྒྱག་ཞུ་ཡི་ཡིན་ཞེས་གསུངས་སོང་། དེ་བཞིན་འཛིན་སྐྱོང་གི་ལས་དོན་བྱེད་ཕྱོགས་དང་འབྲེལ་བའི་དོན་ཚན་ ༡༡ གསུངས་པར་བཀའ་བློན་རྣམ་པ་དང་ལས་བྱེད་རྣམ་པ་མང་ཚོགས་ལ་སྲི་ཞུ་ཞབས་འདེབས་སྒྲུབ་མཁན་ཡིན་པའི་ངོས་འཛིན་གསལ་པོ་བཟོ་རྒྱུ་དང་། བཀའ་ཤག་གི་ལས་འཆར་ལག་བསྟར་བྱེད་སྐབས་ལས་བྱེད་པའི་ཉམས་མྱོང་དང་བསྒྲིལ་ནས་ནུས་པ་མཉམ་སྤུངས་བྱ་རྒྱུ། སྤྱི་ནོར་༸གོང་ས་༸སྐྱབས་མགོན་པོ་མཆོག་གིས་དབུས་པའི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པའི་བཀའ་སློབ་ལམ་སྟོན་གཞིར་བཟུང་རིས་སུ་མ་ཆད་པའི་དགོན་སྡེ་ཁག་གི་བོད་ཀྱི་ཆོས་རིག་རྒྱུན་འཛིན་དར་སྤེལ་གྱི་ལས་དོན་ཁག་ལ་རམ་འདེགས་དང་མཐུན་འགྱུར་གང་འོས་ཞུ་རྒྱུ། དེ་བཞིན་སློབ་ཕྲུག་གི་ཁེ་ཕན་གཙོ་བོར་བཞག་སྟེ་སློབ་གྲྭ་ཁག་ཟླ་བསྒྲིལ་དང་། སློབ་གཉེར་གྱི་མཐུན་རྐྱེན་ཡར་རྒྱས་གང་ཐུབ་གཏོང་རྒྱུ་སོགས་ཚུད་ཡོད། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་ནས་འཛིན་སྐྱོང་གི་ངོས་ནས་རྒྱུ་མཚན་དང་ལྡན་པའི་བསམ་ཚུལ་དང་སྐྱོན་བརྗོད་ཀྱི་སྨྲ་བརྗོད་རང་དབང་ལ་བརྩི་བཀུར་བྱས་ཏེ་དེར་བདག་སྤྲོད་དང་ཉན་འཇོག་བྱེད་ངེས་ཡིན་པས། རྒྱ་ཆེ་མང་ཚོགས་ཀྱི་ངོས་ནས་ཀྱང་མཉམ་རུབ་དང་མཉམ་ལས་ཀྱི་འགན་ཁུར་སྔར་ལྷག་གནང་དགོས་པ་དང་། སྤྱི་སྙོམས་དྲང་བདེན་དང་། ནུས་པ་མཉམ་སྤུངས། དེ་བཞིན་གོམ་པ་མདུན་སྤོ་བཅས་སྲོག་སྙིང་དུ་བཟུང་བའི་བསྒྲགས་ཚིག་ཐོག་དེ་རིང་ནས་བཟུང་སྟེ་ང་ཚོ་ཚང་མ་ལེའུ་གསར་པ་ཞིག་འབྱེད་པའི་གོམ་ཁ་གསར་པ་ཞིག་སྒྱུར་འགོ་འཛུགས་དགོས་པར་མང་ཚོགས་ནས་མཉམ་རུབ་གནང་སྐྱོང་ཡོང་བ་སོགས་ཀྱི་གཞེན་སྐུལ་དང་རེ་འདུན་ཁག་ཅིག་གནང་ཡོད།གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་དེ་རིང་ལས་ཁུར་དང་གསང་རྒྱའི་དམ་འབུལ་མ་ཞུས་པའི་གོང་དུ་གནས་ཆུང་དང་དགའ་གདོང་གྲྭ་ཚང་གཉིས་སུ་མཆོད་མཇལ་དུ་ཕེབས་སོང་བ་དང་། ལས་ཉིན་དང་པོའི་ཉིན་རྒྱབ་ནས་ད་ལྟའི་ཛ་དྲག་རང་བཞིན་བཞིན་ཏོག་དབྱིབས་རིམས་ནད་སྔོན་འགོག་ལས་དོན་དང་འབྲེལ་བའི་ཚོགས་ཚུང་ཁག་དང་མཇལ་འཕྲད་ཀྱིས་མ་འོངས་ལས་དོན་གནང་ཕྱོགས་སྐོར་བཀའ་བསྡུར་སོགས་གནང་སྟེ། སང་ཉིན་ལས་ཉིན་གཉིས་པའི་དགོང་དྲོ་དེ་འབྲེལ་འཛིན་སྐྱོང་གི་ལས་འཆར་ཁག་ཅིག་ཡོངས་གྲགས་གནང་རྒྱུ་རེད་འདུག པར་ཁག་ཅིག་གི་བདག་དབང་། བོད་མིའི་སྒྲིག་འཛུགས།

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་གི་དབུས་པའི་རྒྱལ་སྤྱིའི་གྲོས་ཚོགས་འཐུས་མི་དང་དབུ་འཁྲིད་ཁག་ཅིག་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་དགའ་བསུའི་འཚམས་འདྲི་གནང་འདུགདེའང་ལྕམ་སྐུ་པེ་ལོ་སི་མཆོག་གིས་ཕྱི་ཚེས་ ༢༥ ཉིན་ཕུལ་བའི་འཚམས་འཕྲིན་ནང་སྐུ་ཞབས་སྤེན་པ་ཚེ་རིང་མཆོག་གིས་་ཡུན་རིང་པོར་བོད་ཀྱི་སྤྱི་ཚོགས་ལ་ཁྱད་འཕགས་རང་བཞིན་གྱི་ཞབས་འདེགས་བསྒྲུབས་པའི་ཉམས་མྱོང་གཞིར་བཞག་ཐོག་བོད་མི་རྣམས་ལ་སྲི་ཞུ་བསྒྲུབ་རྒྱུ་ཡིན་ཞིང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བཙན་དབང་འོག་བཙན་བྱོལ་དུ་ཆིབས་སྒྱུར་བསྐྱངས་རྗེས་འདས་པའི་ལོ་ངོ་ ༦༠ ལྷག་རིང་བོད་རྒྱ་ཆེ་མི་མང་གི་ཞུམ་པ་མེད་པའི་སྙིང་སྟོབས་ཀྱིས་མུ་མཐུད་འཛམ་གླིང་ཡོངས་ལ་སེམས་ཤུགས་སྐྱེད་བཅུག་ཡོད་པར་གསུངས་འདུག མ་ཟད་བོད་མིའི་སྒྲིག་འཛུགས་ཀྱི་ཞུམ་པ་མེད་པའི་སྙིང་སྟོབས་ཀྱིས་པེ་ཅིང་གི་དྲག་གནོན་ལ་ཁ་གཏད་བཅགས་ཏེ་བོད་མིའི་མཛེས་སྡུག་ལྡན་པའི་རིག་གཞུང་དང་སྐད་ཡིག་གི་འཚོ་གནས། དེ་བཞིན་ཆོས་ལུགས་མཐུན་སྒྲིལ་བཅས་སྲ་བརྟན་བཟོས་ཡོད་པར་ལུང་འདྲེན་གྱིས། སྲིད་སྐྱོང་སྤེན་པ་ཚེ་རིང་མཆོག་གི་ཆོད་སེམས་བརྟན་པོའི་འབོད་སྒྲ་དང་སྐུ་ངལ་འཛེམས་མེད་ཀྱི་དབུ་ཁྲིད་ཀྱི་འོག་ཏུ་གནད་འགག་ཆེ་བའི་སྲོལ་རྒྱུན་འདི་སྔར་ལྷག་རྒྱུན་སྐྱོང་དང་ཞི་བདེར་གཞོལ་དགོས་བར་སྐུལ་མ་གནང་འདུག གཞན་ཡང་ཁོང་གིས་ཨ་རིས་སྔར་དང་དུས་རྟག་ཏུ་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་ལ་རྒྱབ་སྐྱོར་བྱེད་རྒྱུར་སྤོབས་པ་ཡོད་པར་བསྒྲགས་ཏེ་འཚམས་འདྲི་དང་། ཁོང་གིས་ཐུགས་འགན་གསར་པ་བཞེས་ཡོད་པའི་ཆ་ནས་མ་འོངས་པའི་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་གནང་འདུག གནས་ཚུལ་ཐོན་ཁག་ལ་གཞིགས་ན་གཞན་ཡང་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཊིམ་ལུབ་ཊོན་ (Rt. Hon Tim Loughton) མཆོག་གིས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚབ་ཞུས་ཏེ་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་དང་འབྲེལ། བོད་མི་དང་ལྷན་མཛའ་མཐུན་མུ་མཐུད་ཉར་ཏེ་བོད་ནང་ལ་བཙན་གནོན་མཚམས་འཇོག་ཡོང་བར་རྒྱབ་སྐྱོར་ཞུ་རྒྱུ་ཡིན་སྐོར་གསུངས་ཡོད། སྐུ་ཞབས་ཊིམ་ལུབ་ཊོན་མཆོག་གིས་གསུང་དོན། ངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་དཔོན་རིགས་དང་ཚོགས་མི་རྣམས་དང་ལྷན་མཉམ་རུབ་ཀྱིས་བོད་དང་བོད་མིའི་རང་དབང་དང་ཐོབ་ཐང་གི་ཆེད་མུ་མཐུད་ཨིན་ཇིའི་གཞུང་ལ་གནོན་ཤུགས་སྤྲད་དེ་རྒྱ་ནག་གཞུང་ལ་བཀག་འགོག་བྱེད་རྒྱུ་ཡིན་ཞེས་དང་། དེ་བཞིན་ཁོང་གིས་ཏོག་དབྱིབས་གཉན་རིམས་ཀྱི་གནས་སྟངས་ཡར་རྒྱས་ཕྱིན་པའི་རྗེས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་མཆོག་འཚམས་འདྲིར་ཕེབས་རྒྱུར་སྒུག་ནས་ཡོད་ཅེས་གསུངས་འདུག དེ་བཞིན་ཁ་སང་བྷལ་ཊིག་མངའ་ཁུལ་གྱི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ། དེ་བཞིན་ཨི་ཌ་ལིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ། ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཅས་ཀྱིས་ཀྱང་སྲིད་སྐྱོང་སྤེན་པ་ཚེ་རིང་མཆོག་ལ་འཚམས་འདྲི་ཞུས་པ་དང་འབྲེལ་མུ་མཐུད་བོད་མིའི་སྒྲིག་འཛུགས་དང་། བོད་ཀྱི་གནད་དོན་ལ་རྒྱབ་སྐྱོར་གནང་རྒྱུ་ཡིན་སྐོར་གསུངས་འདུག

དེ་རིང་སྐབས་ ༡༥ པའི་བཀའ་ཤག་གི་ལས་ཉིན་མཐའ་མ་དང་བསྟུན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་ལས་འཁྱུར་གསུང་བཤད་གནང་བར་སྲིད་སྐྱོང་མཆོག་གིས་ང་ཚོས་བོད་ཀྱི་རྩ་དོན་ཐོག་རྡོག་རྩ་ཆིག་སྒྲིལ་དང་ནུས་པ་མཉམ་སྤུངས་གནང་དགོས་པ་གསུངས་འདུག དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་འདོན་སྤེལ་གནང་བའི་གནས་ཚུལ་ལ་གཞིགས་ན། དེ་རིང་སྔ་དྲོ་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་སྲིད་སྐྱོང་མཆོག་གིས་དབུས་བཀའ་བློན་རྣམ་པ་བཅས་ལྷན་བཞུགས་ཀྱིས་བཀའ་ཤག་གི་ལས་འཁྱུར་གསུང་བཤད་གནང་འདུག་པའི་ནང་ད་རེས་སྐབས་ ༡༥ པའི་བཀའ་ཤག་གི་ལས་ཉིན་མཐའ་མ་ཡིན་པ་དང་འདས་པའི་ལོ་ངོ་བཅུའི་ནང་བོད་ཕྱི་ནང་གཉིས་ཀྱི་བོད་མི་དང་བོད་ཀྱི་གྲོགས་པོ་གསར་རྙིང་མང་པོས་རྒྱབ་སྐྱོར་གྲངས་མེད་གནང་བར་ཐུགས་རྗེ་ཆ་ཞུས་པ་དང་ལྷག་པར་སྲིད་སྐྱོང་མཆོག་གི་ལོ་བཅུའི་ལས་ཡུན་སྐབས་མང་ཚོགས་ལ་ཞབས་ཞུ་བསྒྲུབ་རྒྱུ་གོ་སྐབས་བྱུང་བ་ནི་སྐུ་ཉིད་ཀྱི་མི་ཚེའི་ནང་དགའ་སྤོབས་ཆེ་ཤོས་བྱ་ཡུལ་དེ་ཡིན་པར་གསུངས་འདུག དེ་བཞིན་སྲིད་སྐྱོང་མཆོག་གིས་ངོས་རང་བོད་མིའི་སྲིད་སྐྱོང་གི་མིང་གནས་འཛིན་མཁན་དང་པོ་གྱུར་སྲིད་པ་དེ་འདྲ་ནི་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཞིག་ཡིན་པ་ཚོར་གྱི་ཡོད་སྟབས་མགོན་པོ་༸གང་ཉིད་མཆོག་ལ་བཀའ་དྲིན་བླ་མེད་དུ་ཆེ་ཞེས་ཞུས་འདུག སྲིད་སྐྱོང་མཆོག་གིས་འདས་པའི་ལོ་བཅུའི་ལས་ཡུན་ཁྲོད་རྒྱལ་སྤྱིའི་ནང་བོད་མིའི་སྒྲིག་འཛུགས་དེ་བཞིན་ཁྲིམས་མཐུན་གྱི་བཙན་བྱོལ་བོད་མིའི་ངོ་ཚབ་ཅིག་ཡིན་པར་ངོས་འཛིན་ཐོབ་པ་དང་ལྷག་པར་ཨ་རིའི་གྲོས་ཚོགས་ཀྱི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་ཡིག་ལ་བརྟེན་ནས་ཨ་རི་གཞུང་དང་བོད་མིའི་སྒྲིག་འཛུགས་གཉིས་དབར་འབྲེལ་ལམ་གསར་པ་མངོན་གསལ་ཅན་ཞིག་གཏོད་ཐུབ་ཡོད་སྐོར་གསུངས་འདུག ལྷག་པར་ལེའུ་གསར་པ་འདིའི་འོག་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་སྲིད་སྐྱོང་གི་འགན་དབང་རྩིས་སྤྲོད་ཚུལ་བཞིན་བྱུང་བར་དགའ་ཚོར་དང་ཁོང་གི་བོད་དང་བོད་མིའི་ཆེད་དུ་རྒྱལ་སྤྱིའི་ཞུ་གཏུག་ཁག་ལ་རྒྱབ་སྐྱོར་ཞུ་དགོས་པ་བོད་མི་ཡོངས་ཀྱི་ལས་འགན་ཆགས་ཀྱི་ཡོད་པས་ཚང་མས་ཕྱར་གྲུ་མཉམ་འདེགས་ངེས་པར་དུ་གནང་དགོས་ཤིང་། བདམས་ཐོན་སྲིད་སྐྱོང་མཆོག་དང་ཁོང་གི་བཀའ་ཤག་གི་མཛད་དོན་རྣམས་གེགས་མེད་ལམ་ལྷོང་ཡོང་བའི་རེ་སྨོན་ཞུས་འདུག སྲིད་སྐྱོང་མཆོག་གིས་མང་ཚོགས་ཁྲོད་འོས་བསྡུ་དང་བགྲོ་གླེང་སོགས་ཀྱི་སྐབས་སུ་མི་མང་མཉམ་ཞུགས་ཀྱི་ཚད་གཞི་ཇེ་མཐོར་སོང་བ་དངོས་སུ་གཟིགས་ནས་དགའ་སྤོབས་ཆེན་པོ་བྱུང་བ་དང་། འོས་འདེམས་བྱས་པའི་སྲིད་སྐྱོང་རང་ཉིད་ལའང་སྐྱོན་བརྗོད་བྱེད་མཁན་ཡོད་པ་དང་ཡང་དག་པའི་མང་གཙོའི་རྨང་གཞི་ལྡན་པའི་སྒོ་ནས་སོ་སོའི་ཁེ་དབང་ལོངས་སུ་སྤྱད་ནས་སྐྱོན་བརྗོད་བྱས་པ་རྣམས་ལ་ངས་དགའ་བསུ་ཞུ་ཡི་ཡོད། འོན་ཀྱང་དེ་ལྟར་བྱེད་སྐབས་སོ་སོ་སྒེར་དང་ཤོག་ཁག་དང་ལུང་ཚན་གྱི་ཆེད་དུ་མ་ཡིན་པར་གཞི་རྒྱ་ཆེ་ས་བོད་མི་སྤྱིའི་བདེ་ཐབས་ལ་དམིགས་པ་ཞིག་ངེས་པར་དུ་དགོས་སྐོར་གསུངས་པ་དང་ཆབས་ཅིག ང་ཚོས་བོད་ཀྱི་རྩ་དོན་ཐོག་རྡོག་རྩ་ཆིག་སྒྲིལ་དང་ནུས་པ་མཉམ་སྤུངས་གནང་དགོས་པ་གསུངས་འདུག ཁོང་གིས་ང་ཚོས་དུས་ཀུན་ཏུ་བོད་ནང་བོད་མི་ཚོས་མྱོང་བཞིན་པའི་དཀའ་སྡུག་སྤྱི་དང་ལྷག་པར་དུ་བོད་མི་ ༡༥༥ ཡིས་རང་ལུས་མེར་སྲེག་བཏང་སྟེ་བོད་མི་ ༡༣༣ འདས་གྲོངས་སོང་ཡོད་པ་དེ་དག་ང་ཚོས་ནམ་ཡང་བརྗེད་རྒྱུ་མེད་སྐོར་གསུངས་འདུག གཞི་རྩའི་དེ་རིང་བཀའ་ཤག་སྐབས་ ༡༥ པའི་ལས་ཉིན་མཐའ་མ་ཆགས་ཀྱི་ཡོད་པ་དང་སང་ཉིན་བདམས་ཐོན་སྲིད་སྐྱོང་གསར་པ་སྤེན་པ་ཚེ་རིང་མཆོག་ནས་ལས་ཁུར་དང་གསང་རྒྱའི་དམ་འབུལ་བཞེས་གནང་རྒྱུ་ཡིན་པ་དང་། མཛད་སྒོ་དེ་བཞིན་ས་གནས་ནང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་རྐྱེན་དྲྭ་ཐོག་ནས་འཚོགས་གཏན་འཁེལ་ཡོད་པ་རེད། ད་ཆ་རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་དཀའ་ངལ་དུ་མ་འཕྲད་བཞིན་པའི་ཁྲོད་ད་རེས་སྲིད་སྐྱོང་མཆོག་གིས་ལས་འཁྱུར་གསུང་བཤད་ཐོག་མི་ལོ་ ༦༠ ལྷག་གི་རིང་རྒྱ་གར་གཞུང་དང་མི་མང་ནས་བོད་མིར་རོགས་རམ་དང་རྒྱབ་སྐྱོར་གནང་བར་བཀའ་དྲིན་ཤིན་ཏུ་ཆེ་ཞུས་པ་དང་། ལྷག་པར་ད་ཆ་རྒྱ་གར་དང་འཛམ་གླིང་ཡུལ་གྲུ་གང་སར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ ལ་བརྟེན་ནས་ཚེ་སྲོག་ཤོར་བ་དང་ནད་མནར་གྱི་སྡུག་བསྔལ་ཚབས་ཆེན་མྱོང་བཞིན་ཡོད་པར་བོད་མི་ཡོངས་ཀྱི་ཚབ་ཞུས་ཏེ་ཚང་མར་ཐུགས་གསོ་དང་གདུང་སེམས་མཉམ་བསྐྱེད་ཡོད་པ་སོགས་གསུངས་འདུག

དེ་རིང་བོད་ཟླ་བཞི་པ་ས་ག་ཟླ་བའི་ཚེས་པ་ ༡༥ ཉིན་བོད་མིའི་བླ་ན་མེད་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ལམ་གཙོ་རྣམ་གསུམ་དང་སེམས་བསྐྱེད་ཀྱི་བཀའ་ཆོས་བཀའ་དྲིན་སྩལ་བ་དང་སྦྲགས། སྟོན་པ་སངས་རྒྱས་བཅོམ་ལྡན་འདས་ཀྱི་རྗེས་འབྲང་པ་རྣམ་པས་ གཞུང་ཆེན་ཁག་ལ་སློབ་གཉེར་གནང་རྒྱུ་ནི་སྟོན་པའི་རྗེས་དྲན་ཡག་ཤོས་དེ་རེད་ཅེས་ལམ་སྟོན་མཛད་སོང་།རྒྱལ་སྤྱིའི་དགེ་ལྡན་ལྷན་ཚོགས་དང་འབྲས་སྤུང་བློ་གསལ་གླིང་སྤྲུལ་སྐུ་ལྷན་ཚོགས་གཉིས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་ནས་དེ་རིང་སྔ་ཐོག་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ཐོག་བརྒྱུད་དད་ལྡན་མང་ཚོགས་རྣམས་ལ་༸རྗེ་རིན་པོ་ཆེ་མཆོག་གིས་མཛད་པའི་ལམ་གཙོ་རྣམ་གསུམ་གྱི་ཆོས་འགྲེལ་བཀའ་དྲིན་བསྐྱངས་སོང་བ་དང་སྐབས་དེར་༸གོང་ས་མཆོག་ནས་བཀའ་ཆོས་ཀྱི་སྔོན་འགྲོའི་བཀའ་སློབ་ཁྲོད་ལམ་གཙོ་རྣམ་གསུམ་གྱི་བཀའ་ཆོས་འདི་གཙོ་བོ་ལམ་རིམ་གྱི་སྙིང་པོ་བསྡུས་པ་ཞིག་ཆགས་ཀྱི་ཡོད་པ་དང་། དེའི་ནང་ངེས་བྱུང་དང་བྱང་སེམས། ཡང་དག་པའི་ལྟ་བ་གསུམ་གྱི་སྐོར་ཤིན་ཏུ་ཟབ་མོ་གསུངས་ཡོད་པ་སོགས་བཀའ་སྩལ་དང་སྦྲགས་ཏེ། མང་ཚོགས་རྣམས་ནས་དཔེ་ཆའི་ནང་གསུངས་པའི་བསླབ་བྱ་དེ་ཚོར་བསམ་བློ་ཟབ་མོ་བཏང་ནས་སེམས་ལ་བསྒྱུར་བཅོས་ཐེབས་པ་ཞིག་གནང་དགོས་པ་དང་། དེ་ཡང་དད་པ་རྐྱང་པའི་ཐོག་ནས་མིན་པར་རིགས་པས་དཔྱད་དེ་སེམས་ལ་འགྱུར་བ་ཐེབས་པ་ཞིག་གནང་དགོས་པའི་ལམ་སྟོན་མཛད་ཡོད། མགོན་པོ་༸གང་ཉིད་མཆོག་ནས་༸རྗེ་རིན་པོ་ཆེ་མཆོག་གིས་མཛད་པའི་ལེགས་བཤད་རྩ་མཇུག་གི་རྣམ་བཤད་གཉིས་དང་ལྷག་མཐོང་ཆེ་ཆུང་གཉིས། དེ་བཞིན་གྲངས་ངེས་ལེགས་བཤད་སྙིང་པོ་བཅས་ནི་སྲོག་རྩ་ལྟ་བུ་ཞིག་ཡིས་པས་གདན་ས་ཁག་ཏུ་ཡོད་པ་རྣམས་ནས་དེ་དག་ཐོག་སློབ་གཉེར་གནང་སྟེ་འཇམ་མགོན་བླ་མའི་བསྟན་པ་དང་མཇལ་གོ་ཆོད་པ་ཞིག་གནང་དགོས་པའི་ལམ་སྟོན་སྩལ་བ་དང་ཆབས་ཅིག ལམ་གཙོ་རྣམ་གསུམ་གྱི་བཀའ་ཆོས་དབུ་འཛུགས་བཀའ་དྲིན་བསྐྱངས་ཡོད།ལམ་གཙོ་རྣམ་གསུམ་གྱི་ཆོས་འགྲེལ་ལེགས་པར་གྲུབ་མཚམས་སུ་༸གོང་ས་༸སྐྱབས་མགོན་ཆེན་པོ་མཆོག་ནས་དད་ལྡན་མང་ཚོགས་རྣམས་ནས་ཆོ་ག་ཕྱག་ལེན་ཁོ་ནའི་ཐོག་མ་ཕྱིན་པར་གཞུང་ཆེན་ཁག་གི་ཐོག་སློབ་གཉེར་གནང་རྒྱུ་དེ་གལ་ཆེན་པོ་ཡིན་པ་དང་། ལྷག་པར་དུ་དེ་རིང་ས་ག་ཟླ་བའི་དུས་ཆེན་ལ་སྟོན་པ་བཅོམ་ལྡན་འདས་ཀྱི་ཐུགས་རྗེ་བཀའ་དྲིན་རྗེས་སུ་དྲན་དགོས་པ་དང་དེ་ཡང་གཙོ་བོ་སངས་རྒྱས་གང་ཉིད་མཆོག་གིས་བཀའ་སྩལ་བའི་བཀའ་དག་ལ་བརྟག་དཔྱད་བྱེད་དགོས་ཞེས་གསུངས་པ་ལྟར། སངས་རྒྱས་ཀྱི་རྗེས་འབྲང་པ་ཚོས་གཞུང་ཆེན་ཁག་ལ་སློབ་གཉེར་གནང་རྒྱུ་ནི་སྟོན་པའི་རྗེས་དྲན་ཡག་ཤོས་དེ་རེད་ཅེས་བཀའ་སློབ་ལམ་སྟོན་མཛད་སོང་།དེ་རིང་དུས་ཚིགས་ཁྱད་པར་ཅན་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་ནས་དད་ལྡན་མང་ཚོགས་ཡོངས་ལ་ཐུགས་རྩེ་ཆེན་པོས་སེམས་བསྐྱེད་ཀྱི་ཆོས་འགྲེལ་དང་སྦྲགས་བྱང་ཆུབ་སེམས་ཉམས་ལེན་གནང་ཐུབ་ཚེ་ཚེ་འདི་དང་ཕྱི་མ། དེ་བཞིན་རང་གཞན་གཉིས་ཀར་ཕན་པའི་དགེ་མཚན་དུ་མ་ལྡན་ཡོད་པ་སོགས་ཀྱི་ལམ་སྟོན་བཀའ་དྲིན་ཆེན་བ་སྩལ་སོང་བ་མ་ཟད་མགོན་པོ་༸གང་ཉིད་མཆོག་གིས་ད་ལྟའི་ཆར་རྒྱ་གར་སྤྱི་དང་། ལྷག་པར་དུ་མོན་དང་ལ་དྭགས། བལ་ཡུལ་སོགས་སུ་རིམས་ནད་ཀྱི་དཀའ་ངལ་ཆེན་པོ་འཕྲད་བཞིན་པར་ཐུགས་གསོ་དང་སྦྲགས་ཏེ་རིམས་ནད་འདི་རིམ་པས་ཞི་བའི་སླད་དུ་༸རྗེ་བཙུན་སྒྲོལ་མའི་གཟུངས་སྔགས་འདོན་ན་ཕན་ངེས་ཡིན་པའི་ལམ་སྟོན་མཛད་ཡོད།གཞི་རྩའི་དེ་རིང་༸གོང་ས་༸སྐྱབས་མགོན་ཆེན་པོ་མཆོག་ནས་ལམ་གཙོ་རྣམ་གསུམ་དང་སེམས་བསྐྱེད་ཀྱི་ཆོས་འགྲེལ་མ་མཛད་པའི་གོང་དུ་སོག་ཡུལ་དགའ་ལྡན་ཐེག་ཆེན་གླིང་དགོན་པས་སྔོན་ནས་ཇི་ལྟར་གསོལ་བ་བཏབ་པ་ལྟར་སོག་ཡུལ་རྒྱལ་ཡོངས་སུ་ས་ག་ཟླ་བའི་དུས་ཆེན་སྲུང་བརྩི་ཞུས་པའི་མཛད་སྒོར་དྲྭ་ཐོག་ནས་ལྷན་ཞུགས་མཛད་དེ་བོད་སོག་གཉིས་ཀྱི་ཐུན་མོང་མ་ཡིན་པའི་འབྲེལ་བའི་སྐོར་སོགས་ངོ་སྤྲོད་མཛད་པ་དང་ཆབས་ཅིག སོག་པོའི་ཆོས་གྲོགས་ཚོས་རང་ཉིད་ཀྱི་སེམས་མ་ཞི་བ་རྣམས་ཞི་བ་དང་མ་འདུལ་བ་རྣམས་བཏུལ་བར་སྨོན་ལམ་ཁོ་ནས་ཕན་ཐབས་མེད་སྟབས་རིགས་པས་དཔྱད་དགོད་གལ་ཡིན་པར་ལམ་སྟོན་མཛད་ཡོད།མགོན་པོ་༸གང་ཉིད་མཆོག་ནས་ང་ཚོ་སྤྱི་ཚོགས་ཀྱི་སེམས་ཅན་ཞིག་ཡིན་པའི་ཆ་ནས་གཞན་ཕན་གྱི་བསམ་བློ་གོང་འཕེལ་བཏང་ནས་ཆགས་སྡང་གི་འདུ་ཤེས་དེ་དག་ཉུང་འཕྲི་གནང་དགོས་གལ་ཡིན་པའི་ལམ་སྟོན་སྩལ་བ་མ་ཟད། སོག་པོའི་ཆོས་གྲོགས་ཚོས་བོད་པ་རྣམས་བཙན་བྱོལ་དུ་ཐོག་མར་འབྱོར་དུས་སློབ་གྲྭ་ལོགས་སུ་བཙུགས་ཏེ་སློབ་གྲྭའི་ནང་དུ་མཚན་ཉིད་སློབ་ཁྲིད་བྱས་ཡོད་པ་བཞིན་སོག་པོ་ནང་དུ་ཡང་མི་སྐྱ་ཕོ་མོ་རྣམས་ནས་མཚན་ཉིད་ལ་སློབ་སྦྱོང་བྱས་ཏེ་ཆོས་ལ་རྨོངས་དད་བྱ་རྒྱུ་མིན་པར་བདག་ཅག་གི་སྟོན་པ་བཅོམ་ལྡན་འདས་ཀྱི་བཀའ་ལའང་དྲང་དོན་དང་ངེས་དོན་ཡོད་པ་རྣམས་ལ་མཚན་ཉིད་རིགས་པས་བརྟག་དཔྱད་རིམ་པ་གནང་ཐབས་ལ་འབད་བརྩོན་གནང་དགོས་པར་ལམ་སྟོན་མཛད་ཡོད།གཞན་ཡང་དེ་རིང་ས་ག་ཟླ་བའི་ཚེས་པ་ ༡༥ དང་བསྟུན་མགོན་པོ་༸གང་ཉིད་མཆོག་ནས་རྒྱལ་སྤྱིའི་ས་གནས་གང་སར་ཡོད་པའི་སྟོན་པའི་རྗེས་འབྲང་པ་ཡོངས་ལ་འཚམས་འདྲི་དང་སྦྲགས་ཏེ་སྟོན་པ་སངས་རྒྱས་བཅོམ་ལྡན་འདས་ཀྱི་མཛད་རྣམ་ཁག་ཅིག་དྲན་གསོ་མཛད་པ་མ་ཟད་སངས་རྒྱས་ཀྱི་ཆོས་དེ་ནི་རྒྱུ་མཚན་དང་ལག་བསྟར་ལྡན་པའི་ཆོས་ཤིག་ཡིན་པ་དང་ཆོས་དེ་ཡང་ཚོགས་སྡེ་དང་རྒྱལ་ཁབ་བྱེ་བྲག་པ་ཞིག་ལ་གསུངས་པ་ཞིག་མིན་པར་འགྲོ་བ་སྤྱི་ལ་གསུངས་པའི་ཆོས་ཤིག་ཡིན་སྟབས་མང་ཚོགས་རྣམས་ནས་སོ་སོའི་རིག་སྟོབས་དང་ནུས་ཚད་ལ་གཞིགས་ཏེ་སློབ་གཉེར་གནང་རྒྱུ་ཡོད་པ་ཞིག་རེད་ཅེས་སོགས་ལམ་སྟོན་བཀའ་སྩལ་འདུགདེ་རིང་གི་ཉིན་མོར་ནང་པ་ཚོས་ས་གནས་གང་སར་ཆོས་ཕྱོགས་ཀྱི་བྱ་བ་སྤེལ་བཞིན་པ་དང་བསྟུན་ཚང་མས་དེང་གི་འཛམས་གླིང་ཐོག་འཕྲད་བཞིན་པའི་ཏོག་དབྱིབས་རིམས་ནད་གཙོས་པའི་གོད་ཆག་དང་འཇིགས་པའི་རང་བཞིན་ཁག་ལས་རྒྱལ་ཐུབ་སླད་དུ་ནུས་པ་མཉམ་སྤུངས་གནང་གལ་སོགས་ཀྱི་བཀའ་སློབ་སྩལ་ཡོད།

བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་ལས་ཁུར་དང་གསང་རྒྱའི་དམ་འབུལ་བཞེས་གནང་རྒྱུ་རེད་འདུགཁ་སང་ཆེས་མཐོའི་ཁྲིམས་ཞིབ་ཁང་ནས་བདམས་ཐོན་སྲིད་སྐྱོང་གསར་པའི་དམ་འབུལ་མཛད་རིམ་ཞིག་ཡོངས་ཁྱབ་གནང་འདུག་པར་གཞིགས་ན། སང་ཉིན་ཕྱི་ཚེས་ ༢༧ ཉིན་གྱི་སྔ་དྲོའི་ཆུ་ཚོད་ ༩།༥༥ ཐོག་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་། སྲིད་སྐྱོང་ལས་ཐོག་བློ་བཟང་སེང་གེ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་བཅས་ལྷན་བཞུགས་སར་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ལས་ཁུར་དང་གསང་རྒྱའི་དམ་འབུལ་བཞེས་གནང་རྒྱུ་ཡིན་པ་དང་། དམ་འབུལ་མཛད་སྒོ་དེའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་བརྒྱུད་བཀའ་སློབ་བཀའ་དྲིན་སྩལ་གནང་མཛད་རྒྱུ་རེད་འདུགཐེངས་འདིའི་དམ་འབུལ་གྱི་མཛད་རིམ་འདི་བཞིན་ཏོག་དབྱིབས་རིམས་ནད་ཀྱི་ཛ་དྲགས་ཁྲོད་དུ་འཁེལ་ཡོད་སྟབས་ས་གནས་མངའ་གཞུང་གི་བཀའ་རྒྱ་ལམ་སྟོན་ཁག་ལ་གཞིགས་ཏེ། དམ་འབུལ་མཛད་སྒོའི་ཐོག་ཁྲིམས་ཞིབ་པ་ཆེ་བ་མཆོག་དང་སྲིད་སྐྱོང་མཆོག དེ་བཞིན་ཚོགས་གཞོན་མཆོག་བཅས་ལས་དེ་མིན་མཛད་གཙོ་རྣམ་པ་དང་། དམིགས་བསལ་སྐུ་མགྲོན་སོགས་དངོས་སུ་ཆེད་བཅར་མི་དགོས་པ་མ་ཟད། དམ་འབུལ་དང་འབྲེལ་བའི་ཤིས་བརྗོད་ཀྱི་ཆོ་ག་ཁག་ཀྱང་དྲྭ་ཐོག་བརྒྱུད་གནང་གཏན་ཁེལ་འདུག དེ་བཞིན་དེ་སྔ་དབུས་འོས་བསྡུ་ལས་ཁང་ནས་ཡོངས་གྲགས་གནང་ཟིན་པའི་ ༢༠༢༡ སྲིད་སྤྱི་གཉིས་ཀྱི་འོས་བསྡུའི་མཛད་རིམ་ལ་གཞིགས་ཚེ་བདུན་ཕྲག་འདིའི་རེས་གཟའ་ཉི་མ་སྟེ་ཕྱི་ཚེས་ ༣༠ ཉིན་བདམས་ཐོན་སྐབས་ ༡༧ པའི་བོད་མི་མང་སྤྱི་འཐུས་རྣམ་པའི་དམ་འབུལ་གྱི་མཛད་རིམ་ཁག་གནང་གཏན་འཁེལ་ཡོད་པ་རེད།

ཁ་སང་ཁ་ན་ཊའི་ནང་གི་ The Globe and Mail ཞེས་པའི་གསར་ཤོག་ཐོག་གནས་ཚུལ་འཁོད་པའི་ནང་དུ། ཡུལ་དེའི་ Alberta མངའ་སྡེའི་གཞུང་གི་ངོས་ནས་ Edmonton ཁུལ་དུ་ཆགས་པའི་ Alberta གཙུག་ལག་སློབ་ཆེན་གྱི་དབུས་པའི་གཙུག་ལག་སློབ་ཆེན་བཞི་ལ་ཆེད་དུ་བཀའ་རྒྱ་བཏང་སྟེ། གཙུག་ལག་སློབ་ཆེན་དེ་དག་གིས་རྒྱ་ནག་གི་སྲིད་གཞུང་དང་འབྲེལ་བའི་ཡུལ་མི་བྱེ་བྲག་པའམ། ཡང་ན་ཚོགས་སྡེ་སུ་ལ་ཡང་འབྲེལ་བ་བྱེད་མཚམས་འཇོག་དགོས་བ་དང་།  གནད་དོན་དེ་ནི་རྒྱལ་ཁབ་ཀྱི་བདེ་འཇགས་དང་འགྲོ་བ་མིའི་ཐོབ་ཐང་རྡོག་རོལ་ལ་འབྲེལ་བ་ཡོད་པ་ཞིག་ཡིན་སྐོར་ཡོངས་གྲགས་གནང་འདུགཁ་སང་གི་བཀའ་རྒྱ་དེའི་ཁྱབ་ཁོངས་སུ་མངའ་སྡེ་དེའི་ནང་རྟེན་གཞི་བྱས་པའི་ Alberta དང་། Calgary,lethbridge དེ་བཞིན་ Athabasca བཅས་གཙུག་ལག་སློབ་ཁང་བཞི་ཚུད་ཡོད་པ་དང་། ད་ཆ་ Alberta ནང་གི་གཙུག་ལག་སློབ་ཆེན་ཁག་གི་ནང་དུ་རྒྱ་ནག་དང་འབྲེལ་བ་ཡོད་མེད་ལ་ཞིབ་འཇུག་ཞིབ་ཚགས་བྱེད་བཞིན་ཡོད་སྐོར་འཁོད་འདུག གསར་གནས་དེར་འཁོད་པའི་གནས་ཚུལ་ལྟར་ན། མངའ་སྡེའི་མཐོ་རིམ་གྱི་ཤེས་ཡོན་བློན་ཆེན་སྐུ་ཞབས་ Demestrios Nicolaides ལགས་ཀྱིས་ཟླ་བ་འདིའི་ཚེས་ ༢༠ ཉིན་གཙུག་ལག་སློབ་ཆེན་དེ་དག་གི་འགན་འཛིན་ལྷན་ཚོགས་ལ་གློག་འཕྲིན་ཞིག་བཏང་སྟེ། ཉིན་གྲངས་ ༩༠ ནང་ཚུད་དུ་གཙུག་ལག་སློབ་ཆེན་ཁག་གིས་རྒྱ་ནག་དང་ལྷན་དུ་བཞག་པའི་གྲོས་མཐུན་ཅི་ཡོད་དང་། དེ་བཞིན་ཞིབ་འཇུག་ཐད་ཀྱི་འབྲེལ་ལམ། གཞན་ཡང་རྒྱ་ནག་དམར་ཤོག་སྲིད་གཞུང་དང་འབྲེལ་བའི་ དངོས་ཡོད་གནས་ཚུལ་ཅི་ཡོད་ཡོངས་རྫོགས་ཞིབ་ཚགས་ཀྱིས་སྙན་ཐོར་ཕབ་འབྲི་བྱས་ཏེ་གོང་རིམ་ལ་འབུལ་དགོས་བར་སྐུལ་ཡོད་པ་མ་ཟད། ཁོང་གིས་ཁུལ་དེའི་གཙུག་ལག་སློབ་ཆེན་ཁག་དང་རྒྱ་ནག་གི་བཟོ་ཚོང་ཁང་དང་སྲིད་གཞུང་དང་འབྲེལ་བའི་སྡེ་ཚན་སོགས་ཀྱི་བར་དུ་འབྲེལ་འདྲིས་ཀྱི་ཁྱབ་ཁོངས་དང་ཁྱབ་རྒྱ་ཅི་ཡོད་སོགས་ཀྱང་ཞིབ་ཚགས་ཀྱིས་འདྲི་གཅོད་བྱས་ཡོད་པར་གསལ་འདུག ཁོང་གིས་ད་དུང་གཙུག་ལག་སློབ་ཁང་དེ་དག་ནས་སྙན་ཐོའི་ནང་རང་ཉིད་དང་རྒྱ་ནག་གི་འབྲེལ་ལམ་སྐོར་གྱི་གནས་ཚུལ་ཞིབ་ཕྲ་ཙམ་མ་ཟད། རྒྱ་ནག་དང་ལྷན་དུ་འབྲེལ་ཐག་བཅད་ཟིན་པའི་རྗེས་ཤུགས་རྐྱེན་ཅི་བྱུང་སོགས་ཀྱང་བཀོད་དགོས་པར་བཀོད་ཁྱབ་གནང་འདུག གཞི་རྩའི་ཟླ་བ་འདིའི་ཟླ་འགོར། The Globe and Mail གསར་ཁང་གིས་ Alberta གཙུག་ལག་སློབ་ཁང་ཁག་གིས་ཁུལ་དེར་འཐབ་བྱུས་ཀྱི་གལ་གནད་ལྡན་པའི་འཕྲུལ་ལས་གསར་གཏོད་ཀྱི་རིགས་དང་སྐྱེ་ཁམས་འཕྲུལ་ལས། གཞན་ཡང་རྩོལ་ཤུགས་འཕྲུལ་ལས་སོགས་དང་འབྲེལ་བའི་མཉམ་ལས་ཀྱི་ལས་གཞི་མང་དག་ཅིག་གཉེར་བཞིན་ཡོད་པའི་ཐད་ནས་གནས་ཚུལ་བསྡུ་སྒྲིག་བྱས་པར་བརྟེན་ནས། ད་ཆ་གཙུག་ལག་སློབ་ཁང་དེ་དག་དང་རྒྱ་ནག་གི་འབྲེལ་ལམ་གྱི་ཐད་ནས་འདྲི་རྩལ་བྱེད་འགོ་ཚུགས་པ་ཞིག་རེད་འདུག སྤྱིར་རྒྱ་ནག་གིས་འདས་བའི་ལོ་འགའི་རིང་ནས། རྒྱལ་མཚམས་རྒྱ་བསྐྱེད་ཀྱི་སྲིད་བྱུས་ལག་བསྟར་ཤུགས་ཆེན་བྱེད་འགོ་ཚུགས་པའི་ཁྲོད།  རྒྱ་ནག་དང་ས་འབྲེལ་ཡོད་པའི་མཐའ་མཚམས་ཁག་ཏུ་འཛུགས་སྐྲུན་གྱི་ལས་གཞི་རྒྱ་བསྐྱེད་བྱེད་ཀྱི་ཡོད་པ་མ་ཟད། ནུབ་ཕྱོགས་ཀྱི་རྒྱལ་ཁབ་ཁག་ཏུ་ཡང་ཚོང་ལས་དང་འཕྲུལ་ལས་མཉམ་འབྲེལ་གྱི་འབྲེལ་ལམ་རྒྱ་ཆེར་གཏོང་བཞིན་པ་དང་། ལྷག་པར་ཁུང་ཙི་སློབ་གླིང་བརྒྱུད་ནས་རྒྱལ་སྤྱིའི་སྤྱི་ཚོགས་ཁྲོད་རྒྱ་ནག་གི་ཆབ་སྲིད་དྲིལ་བསྒྲགས་ཀྱི་དགོས་མཁོ་སྐོང་ཐབས་བྱེད་པ་དང་། བོད་དང་ཤིན་ཅང་སོགས་དང་འབྲེལ་བའི་འཁྱོགས་བརྗོད་ཀྱི་ལོ་རྒྱུས་སྣང་བརྙན་སྐྲུན་ཐབས་བྱེད་ཀྱི་ཡོད་པར་བརྟེན། བོད་རང་བཙན་སློབ་ཕྲུག་ཚོགས་པ་གཙོ་བོར་གྱུར་བའི་ཚོགས་པ་ཁག་གི་འགོ་ཁྲིད་འོག འདས་བའི་ལོ་གཅིག་གཉིས་ཤིག་གི་ནང་དུ། ནུབ་གླིང་ཁུལ་དུ་རྒྱ་ནག་གི་ཁུང་ཙི་སློབ་གླིང་བརྒྱ་ཕྲག་སྒོ་བརྒྱབ་སྟེ། ད་ལྟའི་ཆར་རྒྱ་ནག་གི་ཁུང་ཙི་སློབ་གླིང་གི་སྣང་བརྙན་དངོས་དེ་རྒྱལ་སྤྱིའི་སྤྱི་ཚོགས་སྟེང་དམར་རྗེན་དུ་ཐོན་བཞིན་པ་རེད་འདུག

གཏོང་ཕོད་ཅན་གྱི་བོད་མི་ཚེ་དབང་སྟོབས་རྒྱལ་ལགས་ཀྱིས་ཁོང་གི་ཚ་མོ་བརྒྱུད་ནས་བྱང་ཨ་རིའི་སྐུ་ཚབ་དོན་གཅོད་ཁང་གི་ཁེ་མེད་སྤྱི་ཚོགས་ཞབས་ཞུ་ཐེབས་རྩ་ཁང་གི་མིང་ཐོག་དུ་ཨ་སྒོར་༨༨༠༠༠༠ ལྷག་ཙམ་ཞལ་འདེབས་གནང་ནས་མི་རིགས་ཀྱི་དུང་ཞེན་དང་བརྩེ་བ་མཚོན་པར་གནང་འདུགབོད་མིའི་སྒྲིགས་འཛུགས་ཀྱི་དྲ་གནས་ཐོག་འཁོད་པར་གཞིགས་ན། སྐུ་ཞབས་ཚེ་དབང་སྟོབས་རྒྱལ་ལགས་ཕྱི་ལོ་ ༢༠༡༩ ལོར་རང་ཤག་ཏུ་ནང་མི་གཉེན་འབྲེལ་གྱི་དྲུང་དུ་དགོངས་པ་རྫོགས་ཡོད་པ་དང་། བྱང་ཨ་རིའི་སྐུ་ཚབ་དོན་གཅོད་ཁང་གི་ལས་བྱེད་ཡོངས་དང་དེབ་སྐྱེལ་ཚོགས་པའི་འགན་ལྷན་ཐུན་མོང་གིས་ཚེ་འདས་ཁོང་གིས་གཏོང་ཕོད་ཀྱི་ཞལ་འདེབས་ཕོན་ཆེན་གནང་བར་ཐུགས་རྗེ་གྲངས་མེད་ཞུས་འདུག སྐུ་ཞབས་ཚེ་དབང་སྟོབས་རྒྱལ་དམ་པ་དེ་ཉིད་ནི་ཕྱི་ལོ་ ༡༩༤༩ ལོར་བོད་དུ་འཁྲུངས་ཤིང་ཕྱིས་སུ་རྒྱ་གར་དུ་སློབ་སྦྱོང་གང་འཚམས་ཤིག་གནང་རྗེས། ཕྱི་ལོ་༡༩༦༦ ལོར་ཤེས་རིག་བཀྲ་བའི་སློབ་མ་ཁག་ཅིག་དང་མཉམ་ཨ་རིའི་ལྷོ་ཀེ་ལི་ཕོར་ཎི་ཡའི་རེདྲ་ལེནདྲ་གཙུག་ལག་སློབ་ཆེན་གྱི་ནང་དུ་བདམས་གསེས་ཀྱིས་ཁུལ་དེར་སློབ་སྦྱོང་གནང་བ་བརྒྱུད་ནས་ཕྱི་ལོ་ ༡༩༩༡ ལོར་ཀོ་ལོ་རེ་ཌོ་མངའ་སྡེའི་ས་གནས་ཌན་ཝར་ཕེབས་ཏེ་ EVEREST IMPORT ཞེས་པའི་ཚོང་འཁོས་སྡེ་ཚན་ཞིག་གསར་འཛུགས་མཛད་དེ་རྒྱ་གར་དུ་སོ་སོའི་ཕ་མ་སྤུན་མཆེད་ལ་རོགས་ཕན་གཟིགས་རྟོགས་གནང་བ་དང། ༢༠༡༣ ལོ་ནས་རྒས་ཡོལ་གནང་སྟེ་ལྷོ་ཀེ་ལི་ཕོར་ཎི་ཡར་གནས་སྤོས་གནང་འདུག གཞི་རྩའི་དམ་པ་ཁོང་ཉིད་སྐུ་ཚེ་འཕེན་པ་མ་རྫོགས་ཀྱི་སྔོན་དུ། ཕྱི་ལོ་ ༢༠༡༩ ལོར་བྱང་ཨ་རིའི་སྐུ་ཚབ་གཅོད་ལ་ཞལ་པར་ཐོག་ཇི་དགེའི་བརྩད་གཅོད་གནང་ཞིང་། ཁྲིམས་རྩོད་ལས་ཁང་བརྒྱུད་ཁྲིམས་མཐུན་ཞལ་ཆེམས་གན་ཡིག་འཇོག་གནང་མཛད་པའི་ནང་ཁོང་གི་སྡོད་ཁང་དང་དངུལ་ཁང་ནང་དངུལ་འབབ་ཡོད་པ་རྣམས་དམ་པ་ཁོང་གི་དྲིན་ཆེན་ཕ་མ་གཉིས་ཀྱི་མིང་ཐོག་ནས་བོད་མི་ཉམས་ཐག་རྒན་གཅོང་རིགས་ཀྱི་ངལ་སེལ་སླད་དང་ཕྱོགས་མཚུངས་བོད་མིའི་སྐད་ཡིག་གཙོ་གྱུར་ཆོས་དང་། རིག་གཞུང་བཅས་སྲུང་སྐྱོབ་བཅས་སླད་སྨིན་གཏོང་ཡོང་ཐབས་གྲོན་གཏོང་དགོས་པའི་དགོངས་བཞེས་འོག  བྱང་ཨ་རིའི་ཐེབས་རྩར་ཞལ་འདེབས་འབུལ་ཕྱོགས་འཐུས་གཙང་ཡོང་ཐབས་ཀྱིས། ཁོང་གི་ཚ་མོ་བསྟན་འཛིན་སྒྲོལ་དཀར་སྒོ་རབ་ལགས་སུ་འགན་ཁུར་དགོས་པའི་མངགས་ཆ་བྱས་གནང་ཡོད་པ་ལྟར། ཚ་མོ་བསྟན་འཛིན་ས་སྒོ་རབ་ལགས་ནས་ཞང་པོའི་བཀའ་མངགས་ལྟར་ཁྲིམས་ལས་ཁང་དང་ལྷན་དུ་སྡོད་ཁང་ཚོང་བསྒྱུར་དང་དངུལ་འབབ་ལྷག་འཕྲོས་ཇི་ཡོད་བྱང་ཨ་རིའི་སྐུ་ཚབ་དོན་གཅོད་ཁང་དུ་རྩིས་འབུལ་བྱུང་བར་སྐུ་ཚབ་དོན་ཁང་གིས་ཐུགས་རྗེ་ཆེ་ཞུས་ཀྱིས་ཞལ་འདེབས་ཀྱི་གནང་སྒོ་དང་འབྲེལ་བའི་གནས་ཚུལ་མཐའ་ཐག་བོད་མིའི་སྒྲིག་འཛུགས་ལ་སྙན་གསེང་ཞུས་ཡོད་པར་འཁོད་འདུག དེ་བཞིན་སྐུ་ཚབ་དོན་ཁང་གིས་བཏང་བའི་གནས་ཚུལ་གྱི་ནང་དུ། དམ་པ་ཁོང་གིས་གཏོང་ཕོད་ཆེན་པོའི་གནང་ཕྱོགས་དེ་ནི་རང་མི་རིགས་ལ་ལར་ཞེན་ཆེ་ཞིང་། བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་སྲུང་སྐྱོབ་གལ་ཆེ་ངོས་འཛིན་གནང་མཁན་རྒྱལ་གཅེས་པ་ཞིག་ལ་ངོས་འཛིན་དང་སྦྲགས་དམ་པ་ཁོང་དལ་འབྱོར་རྟེན་བཟང་ཐོབ་པའི་སྨོན་འདུན་ཞུ་རྒྱུ་ཡིན་ལུགས་གསལ་འདུག

ཁ་སང་གི་གཟའ་མཇུག་སྟེ། རྒྱ་ནག་གི་བཙན་དབང་གི་འོག་ཏུ་ཕྱི་ལོ་ ༡༩༥༡ ལོའི་ཟླ་བ་ལྔ་བའི་ཚེས་ ༢༣ ཉིན་ཆིངས་ཡིག་དོན་ཚན་བཅུ་བདུན་བཞག་པའི་ཉིན་ནག་གི་ཉིན་མོ་དང་བསྟུན། ཨ་རིའི་ཧྥི་ལ་ཌ་ཧྥེ་ཡའི་ (Philadelphia)རང་བཙན་ཚོགས་ཁང་ནས་རྒྱལ་ས་Washington DC བར་རང་བཙན་གོམ་བགྲོད་ལས་འགུལ་དབུ་འཛུགས་གནང་འདུག ལས་འགུལ་གྱི་དབུ་འབྱེད་མཛད་སྒོའི་ཐོག་ཏུ། རྒྱ་ནག་གི་བཙོན་འོག་ཏུ་མི་ལོ་བཅོ་ལྔ་ལྷག་བཙོན་དུ་ཚུད་པའི་རྒྱལ་གཅེས་དཔའ་བོ་དང་། བཙན་བྱོལ་བོད་གཞུང་གི་ཁྲིམས་ཞིབ་པ་ཟུར་པ། ཞེ་བོ་བློ་བཟང་དར་རྒྱས་ལགས་དང་ཆབ་སྲིད་བཙོན་ཟུར་རྟའུ་བློ་བཟང་སྦྱིན་པ་ལགས་གཉིས་ཀྱི་གཙོ་བྱས་པའི་ཧྥི་ལ་ཌ་ཧྥེ་ཡའི་བོད་རིགས་ཚོགས་པ་དང་། ནིའུ་ཡོག་ནིའུ་ཇར་སིའི་ས་གནས་གཞོན་ནུ། བོད་རྒྱལ་ཡོངས་རང་བཙན་ལྷན་ཚོགས དེ་བཞིན་ཨ་རི་བོད་དོན་རྒྱབ་སྐྱོར་ཚོགས་པ་སོགས་ཐུན་མོང་གིས་ཉམས་ཞུགས་གནང་ཡོད་པ་དང་། ལས་འགུལ་དེ་ནི་རྒྱ་ནག་གི་བཙན་འཛུལ་ལ་ངོ་རྒོལ་དང་བོད་རང་བཙན་ལ་རྒྱབ་སྐྱོར་ཡོང་ཐབས་ཆེད་སྤེལ་བ་ཞིག་ཡིན་པ་དང་། ཉིན་གྲངས་བཅུའི་རིང་གི་ལས་འགུལ་དེ་ནི་བོད་མི་བོད་མི་དྲུག་གིས་རྩ་འཛུསག་གནང་བ་གནང་བ་ཞིག་རེད་འདུག གོམ་བགྲོད་ཀྱི་ལས་འགུལ་དང་འབྲེལ་བའི་གསར་འགོད་གསལ་བསྒྲགས་ཀྱི་བསྒྲགས་ཡིག་ནང་དུ། ལས་འགུལ་དེ་ཨ་རིའི་ཧྥི་ལ་ཌ་ཧྥེ་ཡའི་རང་བཙན་ཚོགས་པའི་མདུན་ཐང་དུ་སྤེལ་དོན་ནི། ཨ་རིའི་རང་བཙན་འཐབ་རྩོད་ཀྱི་ནང་དུ་ས་གནས་དེར་དམིགས་བསལ་གྱི་དོན་སྙིང་ལྡན་ཡོད་པ་ལྟར། ཐེངས་འདིའི་རང་བཙན་གོམ་བགྲོད་ཀྱི་ལས་འགུལ་དེར་ཡང་ཨ་རིའི་རང་བཙན་འཐབ་རྩོད་ཀྱི་ས་ཁུལ་དམིགས་བསལ་བ་དེ་ནས་སྐུལ་སློང་ཐེབས་ཐབས་སུ་བདམས་ཡོད་སྐོར་དང་འབྲེལ་ནས། རང་བཙན་གོམ་བགྲོད་ཀྱི་ལས་འགུལ་དེའི་དམིགས་འབེན་གཙོ་བོ་ནི་ཨ་རིའི་ངོས་ནས་བོད་ཀྱི་རང་བཙན་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་ཡོང་ཐབས་དང་། རྒྱ་ནག་གིས་བོད་ས་བཙན་བཟུང་བྱས་པར་སྐྱོན་བརྗོད་གནང་ཐབས་ཡིན་པར་བསྒྲགས་འདུག དེ་བཞིན་གོམ་བགྲོད་ཀྱི་ལས་འགུལ་དབུ་འཛུགས་ཀྱི་མཛད་སྒོའི་སྐབས་སུ། ལས་འགུལ་བ་དོན་འགྲུབ་ལྷ་དར་ལགས་ཀྱིས་གཏམ་བཤད་གནང་བའི་ནང་དུ། འདི་ལོ་རྒྱ་ནག་གིས་བོད་ས་ཞི་བའི་བཅིངས་གྲོལ་བཏང་ནས་མི་ལོ་བདུན་ཅུ་འཁོར་གྱི་ཡོད་པར་རྒྱལ་སྤྱིའི་སྤྱི་ཚོགས་ཀྱི་སྟེང་ལ་དྲིལ་བསྒྲགས་ཀྱིས་བོད་ཀྱི་ལོ་རྒྱུས་ལ་འཁྱོགས་བརྗོད་གནང་གི་ཡོད་པ་དེར་མཐའ་གཅིག་གི་ཏུ་ངོ་རྒོལ་ཡོད་པའི་རྣམ་འགྱུར་སྟོན་ཡ་དང་། ད་ལྟའི་ཆར་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་རིམ་ནད་ཀྱིས་རྒྱལ་སྤྱིའི་སྤྱོ་ཚོགས་ཧྲིལ་བོར་དཀའ་ངལ་འཕྲད་བཞིན་ཡོད་པ་ལྟར། ཨ་རིའི་ནང་དུ་ཆ་མཚོན་ནའང་མི་མང་འབུམ་ཕྲག་གི་ཚེ་སྲོག་ཤོར་ཡོད་པ་དེའི་འགན་ཡོངས་རྫོགས་རྒྱ་ནག་ལ་ཡོད་པར་བསྒྲགས་པ་དང་ལྷན་དུ། རྒྱལ་སྤྱིའི་ཨོ་རྩལ་འགྲན་ཚོགས་དེ་ནི་ཞི་བདེ་དང་རང་དབང་མཚོན་བྱེད་ཅིག་ཡིན་པར་བརྟེན། ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་རྩལ་དེ་རྒྱ་ནག་ཏུ་འཚོགས་རྒྱུའི་འོས་བབ་མེད་པར་རྩེད་འགྲན་དེ་ཕྱིར་འཐེན་བྱེད་དགོས་བ་སོགས་ཀྱི་གཏམ་བཤད་གནང་འདུག  དེ་བཞིན་དོན་འགྲུབ་ལྷ་དར་ལགས་ཀྱིས་ཁ་སང་གི་གོམ་བགྲོད་ཀྱི་ཡུལ་དངོས་ཀྱི་ཉམས་མྱོང་ཟིན་བྲིས་སུ་བཏང་བའི་ནང་དུ། རྒྱ་ནད་ཀྱི་དཀའ་ངལ་སོགས་ལ་བརྟེན། རྒྱལ་སྤྱིའི་ཐོག་རྒྱ་ནག་ལ་དོ་སྣང་ཆེ་བའི་གནས་ཚུལ་དེ་ང་ཚོའི་གོ་སྐབས་ཡིན་པ་ལྟར། སྔོན་མ་ནང་བཞིན་མ་ཡིན་པར། དེ་རིང་གོམ་བགྲོད་ཀྱི་ཡིག་ཆ་བཀྲམས་སྐབས། ཨ་རིའི་མི་མང་གི་ཁྲོད་ནས། དོ་སྣང་སྔར་ལས་ཆེ་ཞིང་། ཡིག་ཆ་ལེན་སྐབས། ཕར་ཐུགས་རྗེ་ཆེ་ཞུ་དུས། ཚུར་ལ་ཐུགས་རྗེ་ཆེ་ལབ་པ་སོགས། ཡིག་ཆ་ཧ་ཅང་ཕོན་ཆེ་འགྲེམས་སྤེལ་ཐུབ་པ་བྱུང་སོང་བ་ནི། དེ་རིང་ལས་འགུལ་འདིའི་རེ་བའི་ཆ་ཤས་གལ་ཆེན་པོ་ཞིག་འགྲུབ་ཀྱི་ཡོད་པའི་དགའ་ཚོར་བྱུང་ཡོད་པར་འགྲེལ་བརྗོད་གནང་འདུག སྤྱིར་ཁ་སང་གི་ལས་འགུལ་དེའི་ཐོག ཁ་ན་ཊ་ནས་བོད་མི་ལས་འགུལ་བ་ sunny sonam ལགས་ཀྱང་མཉམ་བཞུགས་གནང་གི་ཡོད་ཀྱང་ཏོག་དབྱིབས་རྐྱེན་གྱིས་ཁོང་ཨ་རིར་ཕེབས་རྒྱུར་དཀའ་ངལ་འཕྲད་པ་ལྟར། ཁོང་གིས་ཁ་སང་ ཀེ་ན་ཀྲའི་ Niagra falls གྱི་ rainbow ཟམ་ཆེན་ནས་ Toronto གྲོང་ཁྱེར་བར་དུ་དེ་མཚུངས་ཀྱི་གོམ་བགྲོད་ལས་འགུལ་ཞིག་དབུ་འཛུགས་གནང་འདུག

སྐབས་ ༡༦ པའི་བོད་མི་མང་སྤི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དུས་གཅིག་ལ་འཕོ་འགྱུར་བཏང་བའི་གནད་དོན་ལས་འཕྲོས་པའི་འཕྲོ་སྐྱོང་གི་ལས་དོན་སླད་འཚོགས་གཏན་འཁེལ་བའི་གྲོས་ཚོགས་ཚོགས་དུས་འཕར་མ་དེ་ཕྱིར་འཐེན་དང་འབྲེལ་ཏེ་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དང་པོའི་དགོངས་དོན་འོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དྲུང་ནས་ལམ་སྟོན་བཀའ་སློབ་ཞུ་རྒྱུར་ཐག་གཅོད་གནང་འདུག ཟླ་བ་འདིའི་ཕྱི་ཚེས་ ༡༦ ཉིན་ཚོགས་དྲུང་ལས་ཁུངས་ནས་གྲོས་ཚོགས་ཚོགས་དུས་འཕར་མ་དེ་བཞིན་ཟླ་ ༥ ཚེས་ ༢༤ ཉིན་འཚོགས་གཏན་འཁེལ་ཡོད་སྟབས་སྤྱི་འཐུས་རྣམ་པ་ཕྱི་ཚེས་ ༢༢ འགྱངས་མེད་ཐོག་བཞུགས་སྒར་རྡ་རམ་ས་ལར་འབྱོར་ཏེ་ཚོགས་དྲུང་ལས་ཁུངས་སུ་འབྱོར་ཐོ་འགོད་གནང་དགོས་པའི་བཀོད་ཁྱབ་བཏང་ཡོད་པ་དང་། ཁ་སང་འབྱོར་ཐོ་འགོད་པའི་སྐབས་སུ་ཁྱོན་བོད་མི་མང་སྤྱི་འཐུས་ ༤༥ ནས་སྤྱི་འཐུས་ ༢༡ གིས་གྲོས་ཚོགས་ཚོགས་དུས་འཕར་མའི་ཐོག་ཚོགས་བཅར་ཐུབ་མིན་གྱི་དགོངས་ཞུ་ཕུལ་བ་དང་། དེ་བཞིན་སྤྱི་འཐུས་གཞན་ ༣ ནས་ཚོགས་བཅར་ཐུབ་མིན་གྱི་ལན་གསལ་མ་གནང་བ་བཅས་ཀྱི་གནས་སྟངས་ལ་གཞིགས་ནས་ཁ་སང་སྤྱི་འཐུས་རྒྱུན་ལས་རྣམ་པ་ལྷན་འཛོགས་ཐོག་བཞུགས་མོལ་ཚོགས་འདུ་ཞིག་ཚོགས་ཏེ་གྲོས་ཚོགས་ཚོགས་དུས་འཕར་མ་དེ་འཚོགས་སླད་སྤྱི་འཐུས་ཀྱི་རྩ་འབོར་གསུམ་ཆ་གཉིས་ཀྱི་གྲུབ་ཆ་ལོངས་ཀྱི་མེད་སྟབས་གྲོས་ཚོགས་ཚོགས་དུས་འཕར་མ་དེ་བསྐོང་ཚོགས་གནང་ཐབས་བྲལ་བའི་ཐག་གཅོད་གནང་འདུག གཞི་རྩའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དུས་གཅིག་ལ་འཕོ་འགྱུར་བཏང་བའི་རྐྱེན་གྱིས་བདམས་ཐོན་སྲིད་སྐྱོང་དང་སྐབས་ ༡༧ པའི་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་ལས་འཁུར་དམ་འབུལ་ཞུ་ཡུལ་མེད་པའི་གནས་སྟངས་ཆགས་ཡོད་སྟབས། ཁྲིམས་ཞིབ་པ་གསར་པ་བསྐོ་གཞག་གནང་རྒྱུ་དང་འབྲེལ་བའི་མི་སྣ་གསུམ་ལས་གྲུབ་པའི་འདེམས་སྒྲུག་ཚོགས་ཆུང་ཞིག་ཀྱང་བསྐོ་གཞག་གནང་ཡོད་ཀྱང་། ཁ་སང་དགོང་དྲོ་ཙམ་ལ་བོད་མིའི་སྒྲིག་འཛུགས་ཀྱི་བརྙན་འཕྲིན་ལས་རིམ་ཐོག་འདེམས་སྒྲུག་ཚོགས་ཆུང་གི་ཚོགས་མི་བཀའ་ཟུར་ཚེ་རིང་ཕུན་ཚོགས་ལགས་ཀྱིས་ཚོགས་ཆུང་ལ་ཁྲིམས་ཞིབ་པའི་འོས་མི་རག་མེད་པ་དང་། དེ་འབྲེལ་ཟླ་བ་འདིའི་ཚེས་ ༡༤ ཉིན་ལས་སྡོམ་སྙན་ཐོ་ཞིག་སྲིད་སྐྱོང་མཆོག་ལ་ཕུལ་ཟིན་ཡོད་པ་གསུངས་འདུག གནས་སྟངས་དེ་དག་ཁྲོད་ཁྲིམས་ཞིབ་པ་རྣམ་པ་འཕོ་འགྱུར་ལས་འཕྲོས་པའི་དཀའ་ངལ་ཁག་མུ་མཐུད་དེ་མུར་གནས་པ་དང་། རིང་མིན་བདམས་ཐོན་སྲིད་སྐྱོང་དང་སྤྱི་འཐུས་རྣམ་པ་དམ་འབུལ་ཞུ་ས་མེད་པར་འགྱུར་སྟབས། ཁ་སང་ལྷན་ཚོགས་གནང་བའི་སྤྱི་འཐུས་རྒྱུན་ལས་ཀྱི་བཞུགས་མོལ་ཚོགས་འདུའི་ཐོག་གནད་དོན་དེ་དག་སྐོར་གླེང་སློང་གང་བྱུང་ཡོད་མེད་དང་འབྲེལ་ཚོགས་གཞོན་མཆོག་ལ་ཞལ་པར་བརྒྱུད་རྒྱུས་ལོན་ཞུ་ཐབས་ཞུས་ཀྱང་འབྲེལ་བ་མཐུད་ཐུབ་པ་བྱུང་མ་སོང་བ་དེ་ལྟར་ཡང་། མཚན་མངོན་གསལ་གནང་འདོད་མེད་པའི་འབྲེལ་ཡོད་ཞིག་ནས་ཁྲིམས་ཞིབ་པ་རྣམ་པ་དུས་གཅིག་ལ་འཕོ་འགྱུར་བཏང་བ་ལས་འཕྲོས་པའི་གནད་དོན་ཁག་དང་འབྲེལ་སྤྱི་འཐུས་རྒྱུན་ལས་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་དང་པོའི་དགོངས་དོན་འོག་༧གོང་ས་༧སྐྱབས་མགོན་ཆེན་པོ་མཆོག་ལ་སྙན་སེང་དང་སྦྲགས་ལམ་སྟོན་བཀའ་སློབ་ཞུ་རྒྱུའི་མང་མོས་ཐག་གཅོད་བྱུང་ཡོད་པ་གསུངས་སོང་། རྩ་བའི་དེ་སྔ་ཕྱི་ཟླ་གསུམ་པའི་ནང་ཚོགས་པའི་གྲོས་ཚོགས་ཚོགས་དུས་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དུས་གཅིག་ལ་འཕོ་འགྱུར་བ་ཏང་བ་དང་འབྲེལ་བའི་ངལ་བ་ཁག་སེལ་ཆེད་སྐབས་དེའི་སྤྱི་འཐུས་ཚོགས་གཙོ་པདྨ་འབྱུང་གནས་ལགས་ཀྱིས་ཕྱི་ཟླ་ལྔ་པའི་ནང་གྲོས་ཚོགས་ཚོགས་དུས་འཕར་མ་ཞིག་འཚོགས་རྒྱུ་ཡིན་ཞེས་གསུངས་ཡོད་ཀྱང་། ད་ལྟའི་ཆ་ལ་རྒྱ་གར་རྒྱལ་ཡོངས་དང་ལྷག་པར་དུ་བོད་མི་སྒྲིག་འཛུགས་ཆགས་ས་ཧི་མཱ་ཅལ་མངའ་སྡེའི་ནང་ལ་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཆེས་ཆེར་སོང་བར་བརྟེན། མངའ་སྡེའི་གཞུང་ནས་ཟླ་བ་འདིའི་ཕྱི་ཚེས་ ༢༦ བར་མི་མང་རྣམས་གང་བྱུང་ཕྱིར་བསྐྱོད་གནང་རྒྱུ་དང་། མི་ལྔ་ལས་ལྷག་པ་འདུ་འཛོམས་སོགས་མི་ཆོག་པའི་བཀའ་རྒྱ་བཏང་ཡོད་སྟབས། ད་རེས་གྲོས་ཚོགས་ཚོགས་དུས་འཕར་མ་ནས་དགོངས་ཞུ་གནང་མཁན་གྱི་སྤྱི་འཐུས་ཁག་ཅིག་ནས་ཚོགས་དུས་ལ་བཅར་བ་ཡིན་ན་ས་གནས་གནས་ཡུལ་རྒྱལ་ཁབ་ཀྱི་ཁྲིམས་དང་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དྲུག་པ་རྒྱལ་སྤྱིའི་ཁྲིམས་ལུགས་དང༌། ཡུལ་ཁྲིམས་ལ་བརྩི་སྲུང༌ཞེས་པ་གཉིས་དང་འགལ་ཟླ་ཆགས་ཀྱི་ཡོད་པ་གསུང་མཁན་བྱུང་འདུག དེ་བཞིན་ཁག་ཅིག་ནས་གྲོས་ཚོགས་ཚོགས་དུས་འཕར་མ་འཚོགས་རྒྱུ་དེ་བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་གཅིག་པ། སྤྱི་འཐུས་ལྷན་ཚོགས་ཀྱི་ཚོགས་འདུ་འཕར་མ། ཞེས་པའི་དགོངས་དོན་ལྟར་བྱུང་མེད་སྟབས་ཚོགས་བཅར་ཞུས་མེད་ཅེས་གསུང་མཁན་འདུག་པ་མ་ཟད། ལ་ལ་ནི་ད་ལྟའི་རིམས་ནད་ཀྱི་ཛ་དྲག་གནས་སྟངས་དང་འབྲེལ་བའི་དམ་དྲག་འོག་ཚོགས་བཅར་ཞུ་ཐུབ་མ་སོང་ཞེས་གསུང་མཁན་འདུག ད་ལྟའི་ཆ་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དུས་གཅིག་ལ་འཕོ་འགྱུར་བཏང་བའི་གནད་དོན་ལས་འཕྲོས་པའི་དཀའ་ངལ་ཁག་གཙང་སེལ་མ་ཐུབ་པར་སྤྱི་འཐུས་རྒྱུན་ལས་ནས་༧གོང་ས་༧སྐྱབས་མགོན་ཆེན་པོ་མཆོག་ལ་སྙན་སེང་ལམ་སྟོན་ཞུ་རྒྱུའི་ཐག་གཅོད་གནང་འདུག་ཀྱང་། དཀའ་ངལ་འདི་ཐོག་མར་བྱུང་སྐབས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཟུར་པ་དང་ཁྲིམས་ཞིབ་པ་ཟུར་པ་རྣམས་ནས་ཁྲིམས་དོན་གྱི་གསལ་བཤད་དང་སྦྲགས་གྲོས་ཚོགས་སུ་བཞག་པའི་ཁྲིམས་ཞིབ་པ་འཕོ་འགྱུར་གྱི་གྲོས་ཆོད་དེ་ཕྱིར་འཐེན་གནང་དགོས་པ་སོགས་ཀྱི་ཞུ་སྐུལ་གནང་ཡོད་པ་མ་ཟད། ཉེ་བའི་ཟླ་ཤས་ཁྲོད་དུ་བཀའ་ཟུར་དང་སྲི་ཞུ་བ་ཟུར་པ། དེ་བཞིན་མང་ཚོགས་སྒེར་དང་ཚོགས་སྡེ་ཁག་མི་ཉུང་བ་ཞིག་ནས་ཀྱང་ད་ལྟའི་དཀའ་ངལ་དེ་སེལ་ཐབས་སུ་གྲོས་ཚོགས་སུ་བཞག་པའི་གྲོས་ཆོད་དེ་ཕྱིར་འཐེན་གནང་རྒྱུ་དང་། དེ་བཞིན་ཕྱིར་བཤོལ་གནང་བའི་ཆེས་མཐོའི་ཁྲིམས་ཞིབ་པ་རྣམ་པ་གསུམ་འཕྲལ་དུ་ལས་བཅར་ཞུ་དགོས་པ་སོགས་ཀྱི་ཞུ་སྐུལ་གནང་བཞིན་ཡོད་པ་རེད།