གསར་འགྱུར།

བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་སྤྱི་ཟླ་ ༨ པའི་ཚེས་༦ གྱི་ཉིན་ནས་བཟུང་། མཚོ་སྔོན་མཚོ་ལྷོ་བོད་རིགས་རང་ལྗོངས་ཁུལ། མང་ར་རྫོང་ཁོངས་སུ་ཆར་ཞོད་དྲག་པོ་དང་སེར་ར་བབས་པ་སོགས་ཀྱི་རྐྱེན་བྱས་ཏེ། ཆུ་ལོག་རྒྱུགས་པ་དང་ས་ཉིལ་བྱུང་སྟེ་མང་ཚོགས་ཀྱི་ཞིང་ཁ་དང་སྒོ་ཕྱུག དེ་བཞིན་སྡོད་ཁྱིམ་སོགས་ལ་གཏོར་བཅོམ་ཐེབས་ཡོད་ནའང་། རྒྱ་ནག་གཞུང་གིས་ས་གནས་ཀྱི་བོད་རིགས་གནོད་ཐེབས་ཀྱི་ཡུལ་མི་རྣམས་ལ་རོགས་སྐྱོར་གྱི་རྣམ་གྲངས་གང་ཡག་གནང་མི་འདུག

དེ་རིང་དབྱིན་ཡུལ་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། སྤྱི་ལོ ་༢༠༢༢ ལོའི་དགུན་དུས་ཀྱི་ཨོ་རྩལ་འགྲན་ཚོགས་དེ་རྒྱ་ནག་གི་རྒྱལ་ས་པེ་ཅིན་དུ་བསྡུ་རྒྱུར་གཏན་འཁེལ་བྱུང་ཡོད་ནའང་། ད་ཆ་རྒྱ་ནག་གི་ཏོག་དབྱིབས་གཉན་རིམས་ཁྱབ་རྡལ་དང་ཧོང་ཀོང་གི་བཙན་འཛུལ། དེ་བཞིན་ཝཱ་བཱེ་བཟོ་ཚོང་ཁང་གི་འཕྲུལ་ལས་ཀྱི་གསང་བ་རྐུ་འཁྱེར་སོགས་ཀྱི་གནད་དོན་དང་འབྲེལ་ནས། དབྱིན་གཞུང་གིས་རྒྱ་ནག་གི་དགུན་དུས་ཀྱི་ཨོ་རྩལ་འགྲན་བསྡུར་ལས་ཕྱིར་འཐེན་བྱེད་སྲིད་པར་འཁོད་འདུག

ཉེ་ལམ་རྒྱ་གར་གྱི་ཁྲལ་བསྡུ་ལས་ཁུངས་ཀྱིས་རྒྱ་གར་གྱི་ནང་དུ་དངུལ་ཚོང་གཉེར་ཞོར་དུ་༸གོང་ས་མཆོག་གི་མཛད་འཕྲིན་དང་འབྲེལ་བའི་གསང་གནས་འཚོལ་བསྡུ་བྱེད་མཁན་རྒྱ་ནག་གི་གསང་མྱུལ་བ་ཅིག་འཛིན་བཟུང་བྱས་པ་དང་འབྲེལ། ༸རྒྱལ་བའི་༸སྐུ་ཕྱྭའི་གནད་དོན་སྐོར་ལ་བློ་འཚབ་ཆེན་པོ་གནང་བཞིན་པའི་ཁྲོད་འདིར་ཧི་མཱ་ཅལ་མངའ་སྡེ་བློན་ཆེན་སྐུ་ཞབས་ཇེརཱམ་ཋཱཀུར་མཆོག་གིས་གསར་ལམ་ཁག་ཏུ་༸གོང་ས་མཆོག་གི་༸སྐུ་ཕྱྭའི་གནད་དོན་ལ་སྔོན་ནས་ལྟ་སྲུང་ནན་པོ་གནང་གི་ཡོད་པ་མ་ཟད་ད་དུང་ལྟ་སྲུང་གི་གཞོགས་འདེགས་རྒྱ་བསྐྱེད་གང་ཐུབ་གནང་རྒྱུ་ཡིན་པར་གསུངས་འདུག

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་དེ་རིང་ཉིན་རྒྱབ་གསར་འགོད་གསལ་བསྒྲགས་སྤེལ་བར་གཟའ་འཁོར་འདིའི་ནང་རྒྱ་གར་ནང་གི་བཙན་བྱོལ་བོད་མིའི་སྤྱི་ཚོགས་ཁྲོད་བོད་མི་དྲུག་ལ་ Covid-19 གཉན་རིམས་ཕོག་ཡོད་པ་དང་། དེའི་ཁོངས་ནས་གཅིག་འདས་གྲོངས་སུ་གྱུར་བའི་གནས་ཚུལ་ཡོངས་གྲགས་གནང་སོང་།

རྩ་བའི་ད་ལྟའི་ཆར་ཨ་རི་དང་རྒྱ་ནག་དབར་ཆབ་སྲིད་དང་དཔལ་འབྱོར། དེ་བཞིན་ཏོག་དབྱིབས་གཉན་རིམས་ལ་སོགས་པའི་གནད་དོན་མང་དག་ཅིག་གི་ཐོག་ནས་དངོས་སུ་གདོང་ཐུག་གི་ངལ་བ་དུ་མ་འཕྲད་བཞིན་ཡོད་པའི་དུས་སྐབས་འདིར་ཁ་སང་དེ་སྔ་ཧོང་ཀོང་དང་ལྷན་དུ་བཞག་པའི་ཉེས་ཅན་རྩིས་སྤྲོད་ཀྱི་གྲོས་མཐུན་ཕྱིར་འཐེན་གནང་འདུག

བོད་མིའི་སྒྲིག་འཛུགས་འཛིན་སྐྱོང་བཀའ་ཤག་ནས་འདི་ལོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པ་དང་བསྟུན་ཕྱི་ལོ་ ༢༠༢༠ ཕྱི་ཟླ་ ༧ ཚེས་ ༡ ནས་ཕྱི་ལོ་ ༢༠༢༡ ཟླ་ ༦ ཚེས་ ༣༠ བར་ལོ་འཁོར་མོ་རིང་ལ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་སུ་དྲན་པའི་ཐོག་༸རྒྱལ་བའི་བཀའ་དྲིན་རྗེས་དྲན་གྱི་ལོ་ཞེས་སྲུང་བརྩི་ཞུ་རྒྱུར་གསལ་བསྒྲགས་སྔོན་སོང་ལྟར། བོད་མིའི་གཞིས་སྒར་ཁག་ཏུ་ཤིང་སྣ་འདེབས་འཛུགས་ཀྱི་ལས་གཞི་རྒྱ་ཆེར་སྤེལ་བཞིན་འདུག

ཉེ་ལམ་ཕ་རན་སིའི་རྒྱལ་ས་པེ་རིས་ནས་སུད་སིའི་གྲོང་ཁྱེར་ཇི་ནི་ཝར་ཡོད་པའི་རྒྱལ་ཚོགས་ལས་ཁུངས་བར་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་མཁན་བོད་མི་ངག་དབང་ཚེ་འཕེལ་ལགས་ཀྱིས་དེ་རིང་ལས་འགུལ་མཇུག་སྒྲིལ་དང་འབྲེལ། བོད་རིགས་གཞོན་སྐྱེས་ཚོས་སྤྱི་ཚོགས་དྲྭ་རྒྱ་སྤྱོད་ནས་ལས་འགུལ་གང་མང་སྤེལ་དགོས་པའི་རེ་སྐུལ་གནང་སོང་།

ཨ་རིའི་གྲོས་ཚོགས་གོང་མའི་འཐུས་མི་ John Cornyn དང་ Mark Warner ལགས་གཉིས་ཀྱིས་ཡུལ་དེའི་གྲོས་ཚོགས་ནང་དུ། རྒྱ་ནག་གིས་རྒྱ་གར་གྱི་ས་མཚམས་སུ་སིམ་འཛུལ་བྱས་ཏེ་རྒྱ་གར་གྱི་ས་སྲུང་དམག་མིར་བརྙས་བཅོས་དང་། མཐའ་མཚམས་ཁག་ཏུ་དམག་མི་འགྲེམས་འཇོག དེ་བཞིན་འཛུགས་སྐྲུན་གྱི་ལས་གཞི་རྒྱ་སྐྱེད་བྱེད་བཞིན་པར་སྐྱོན་བརྗོད་ཀྱིས་གྲོས་ཆོད་ཅིག་ངོ་སྤྲོད་གནང་འདུག དེའང་ཨ་རིའི་ Texas མངའ་སྡེའི་གྲོས་ཚོགས་གོང་མའི་འཐུས་མི་སྐུ་ཞབས་ John Cornynལགས་ཀྱིས་བདུན་ཕྲག་སྔོན་མའི་ནང་དུ་རང་ཉིད་ཀྱི་དྲྭ་གནས་ཐོག་གནས་ཚུལ་དེ་བཀོད་པ་དང་འབྲེལ། ཁོང་ཉིད་ཨ་རིའི་གྲོས་ཚོགས་གོང་མའི་རྒྱ་གར་ལྷན་ཚོགས་གསར་འཛུགས་བྱེད་མཁན་ཞིག་ཡིན་པའི་ཆ་ནས་ཨ་རི་དང་རྒྱ་གར་གཉིས་ཀྱི་སྲ་བརྟན་གྱི་འབྲེལ་ལམ་དེ་གལ་ཆེན་ཡིན་པར་རྟོགས་ཡོད་ལུགས་ངོ་སྤྲོད་ཀྱིས།  རྒྱ་གར་གྱིས་ཆོད་སེམས་བརྟན་པོའི་ངང་ནས་རྒྱ་ནག་ལ་ཁ་གཏད་གཅོག་བཞིན་པ་དང་ལྷག་པར་རྒྱ་གར་དང་ཞི་བདེ་རྒྱ་མཚོ་ཁུལ་དུ་རང་དབང་དང་གུ་ཡངས་རྒྱུན་སྐྱོང་བྱེད་བཞིན་པ་བཅས་ལ་བསྔགས་བརྗོད་གནང་བ་མ་ཟད། རྒྱ་གར་གྱིས་རྒྱ་ནག་གི་སིམ་འཛུལ་ལ་ཁ་གཏད་གཅོག་བཞིན་པའི་གཉན་འཕྲང་གི་དུས་སྐབས་སུ་ཨ་རིའི་ངོས་ནས་རྒྱ་གར་ལ་རྒྱབ་སྐྱོར་བྱ་རྒྱུ་དེ་ཧ་ཅང་གལ་ཆེན་ཡིན་པ་མངོན་གསལ་གནང་འདུག ཁོང་གིས་ད་དུང་། ཉེ་སྔོན་ཟླ་བ་དྲུག་པའི་ནང་གི་རྒྱ་དཀར་ནག་གི་མཐའ་མཚམས་སྲུང་བའི་གདོང་ཐུག་གི་ཁྲོད་ནས། རྒྱ་གར་གྱི་དམག་མི་༢༠ ལྷག་རྐྱེན་ལམ་དུ་ཕྱིན་ཡོད་པར་དྲན་སྐུལ་གྱིས། རྒྱ་གར་གྱིས་རྙོག་འཛིན་ཆེ་བའི་མཐའ་མཚམས་སུ་རྒྱ་ནག་གི་གདོང་མཆོང་གི་བྱེད་བབ་དེ་གཞན་ལ་ཉེན་བརྡ་བཏང་བ་ཞིག་ཆགས་ཡོད་པར་གསུངས་འདུག  དེ་བཞིན་སྐུ་ཞབས་ Warner ལགས་ཀྱིས་ཀྱང་། ཐེངས་འདིའི་གྲོས་འཆར་རྒྱུད། རྒྱ་ནག་གིས་ཕྱོགས་གཉིས་དབར་གྱི་མཐའ་མཚམས་ཀྱི་ས་ཐིག་ལ་རྩིས་མེད་རྡོག་རོལ་བྱས་པ་དེར་སྐྱོན་བརྗོད་བྱས་པ་དང་འབྲེལ། རྒྱལ་ཁབ་གཉིས་ཀྱི་ངོས་ནས་དོན་ཕན་ལྡན་པའི་ཕྱི་འབྲེལ་གྱི་འཐབ་བྱུས་བརྒྱུད་ས་མཚམས་ཐད་དེ་སྔའི་གནས་བབ་བསྐྱར་གསོ་དགོས་པའི་རེ་སྐུལ་ཞུས་པ་མ་ཟད། ཨ་རི་དང་རྒྱ་གར་གཉིས་ཀྱིས་དུས་ཡུན་རིང་པོ་ནས་མང་གཙོའི་རིན་ཐང་གཞི་ལ་བཞག་པའི་འབྲེལ་ལམ་ལེགས་པོ་རྒྱུན་སྐྱོང་གནང་ཡོད་པ་དང་།  རྒྱ་གར་གྱིས་རྒྱ་གར་གྱི་རྒྱ་མཚོ་ཁུལ་དུ་རང་དབང་དང་གུ་ཡངས་ཡོང་ཐབས་སུ་ཕྱག་ལས་གནང་བ་བརྒྱུད་ནས། ཕྱོགས་གཉིས་ཀྱི་འབྲེལ་ལམ་དེ་སྔ་ལས་ཀྱང་ཇེ་ལེགས་སུ་འགྲོ་ངེས་ཡིན་པར་གསུངས་འདུག གཞི་རྩའི་ཉེ་བའི་ཆར་རྒྱ་དཀར་ནག་དབར་ས་མཚམས་དང་འབྲེལ་རྩོད་རྙོག་ཆེ་རུ་ཕྱིན་ཏེ་མཐའ་སྲུང་དམག་མིའི་དབར་དངོས་སུ་ལག་འཛིང་ཤོར་བའི་རྐྱེན་གྱིས་ཕན་ཚུན་གྱི་དམག་མི་གསོད་རེས་ཀྱིས་གྱོད་དོན་རྣོ་ངར་ཅན་དུ་གྱུར་བར་བརྟེན་རྒྱ་གར་དབུས་གཞུང་གི་བརྡ་འཕྲིན་འཕྲུལ་ལས་སྡེ་ཁག་གིས་ཕྱི་ཟླ་ ༧ ཟླ་སྟོད་དུ་རྒྱ་ནག་གིས་བཟོས་བའི་མཉེན་ཆས་ Wechat འམ་སྐད་འཕྲིན་གཙོས་པའི་མཉེན་ཆས་ ༥༩ རྒྱ་གར་གྱི་བདེ་འཇགས་སྲུང་སྐྱོབ་ཀྱི་མིང་ཐོག་ནས་བཀག་སྡོམ་གནང་ཡོད་པ་ལྟར། ཉེ་ཆར་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་ཀྱང་རྒྱ་ནག་གིས་བཟོས་པའི་མཉེན་ཆས་ TikTok དང་ WeChat གཉིས་ཁྱོན་ཉིན་གྲངས་ ༤༥ ནང་ཚུད་བཀག་སྡོམ་གནང་རྒྱུ་ཡིན་པའི་བཀོད་ཁྱབ་གནང་ཡོད་པ་ལྟར། རྒྱ་ནག་གི་ཏོག་དབྱིབས་རིམས་ནད་སོགས་ཀྱི་རྐྱེན་གྱིས། ད་ཆ་རྒྱལ་སྤྱིའི་སྟེང་རྒྱ་ནག་ལ་ཁ་གཏད་གཅོག་མཁན་གྱི་རྒྱལ་ཁབ་ཇེ་མང་དུ་འགྲོ་བཞིན་པ་རེད།

ཁེ་ན་ཌ་ཝེན་ཀུ་ཝར་ནས་ཡིན་པའི་བོད་པའི་བུ་མོ་ཀུན་བཟང་སྐྱིད་རོང་ལགས་ཀྱིས་བཟོ་སྐྲུན་གནང་བའི་ཡར་ཀླུངས་གཙང་པོ་ཞེས་པའི་འགུལ་རིས་གློག་བརྙན་ཐུང་ངུ་དེ་བྱང་ཨ་མི་རི་ཀའི་འགུལ་རིས་གློག་བརྙན་དུས་སྟོན་ཆེ་ཤོས་གྲས་ཨོ་ཊ་ཝའི་རྒྱལ་སྤྱིའི་གློག་བརྙན་དུས་སྟོན་དུ་འདེམས་ཐོན་བྱུང་འདུག