༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་གིས་དེ་རིང་ཉི་ཧོང་ནང་གནས་བཞུགས་བོད་མི་དང་འབྲུག་པ། དེ་བཞིན་ཧི་མཱ་ལ་ཡའི་མི་རིགས་ཁག་གཅིག་ལ་མཇལ་ཁ་བསྩལ་བ་དང་འབྲེལ་བཀའ་འགྱུར་བསྟན་འགྱུར་ཐད་བསླབ་པ་སློབ་གཉེར་གནང་དགོས་གལ་ཡིན་པར་ལམ་སྟོན་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་ནང་གནས་བཞུགས་བོད་མི་དང་འབྲུག་པ།  དེ་བཞིན་ཧི་མཱ་ལ་ཡའི་མི་རིགས་རྣམས་ལ་བོད་ནང་ནང་པའི་ཆོས་དར་ཚུལ་བཀའ་བསྩལ་བ་དང་འབྲེལ།  ནཱལེནྡཱའི་ཆོས་བརྒྱུད་ཀྱི་རིན་ཐང་སྐོར་བཀའ་སློབ་བསྩལ་བ་མ་ཟད་དེ་སྔ་དུས་རབས་བརྒྱད་པའི་ནང་མཁན་ཆེན་ཞི་བ་འཚོ་བོད་དུ་གདན་འདྲེན་ཞུས་ནས་ནང་པའི་ཆོས་བརྒྱུད་དར་ཁྱབ་བྱུང་བ་ནས་བཟུང་བོད་ཀྱི་དགོན་སྡེ་ཆེ་ཁག་ནས་ཐོས་བསམ་སྒོམ་གསུམ་ཡ་མ་བྲལ་བའི་ཐོག་ནས་ལུང་རྟོགས་ཀྱི་བསྟན་པ་ཁ་ཡོད་ལག་ཡོད་འཛིན་སྐྱོང་སྤེལ་གསུམ་གནང་ཡོད་པ་དང་།  ངེས་པ་དོན་གྱི་ཐོག་ནས་ནཱ་ལེནྡཱའི་མཁས་པའི་དབང་པོ་རྣམས་ཀྱི་ལེགས་བཤད་རྨད་དུ་བྱུང་བ་རྣམས་ལས་རྩ་བ་བློ་འཛིན་དང་། འགྲེལ་པ་དག་ཚིག་རེ་རེ་བཞིན་གནང་ཐོག་ཚད་མ་རིག་པ་དང་འབྲེལ་ནས་རྟགས་གསལ་གནང་ཐོག་ནཱ་ལེནྡཱའི་ཆོས་བརྒྱུད་དངོས་སུ་ལག་ལེན་དུ་འཁྱོལ་ཡོད་སྐོར་བཀའ་བསྩལ་འདུག ལྷག་དོན་ད་ཆ་འཛམ་བུ་གླིང་ཐོག་དེ་འབྲེལ་ལམ་སྟོན་དེ་ལྟར་གནང་མཁན་བོད་ལས་མེད་སྟབས་དེ་ནི་བོད་མི་རིགས་ཀྱི་གཟི་བརྫིད་ཞིག་ཡིན་པར་བཀའ་བསྩལ་བ་དང་ཕྱོགས་མཚུངས་བོད་མི་དང་འབྲུག་པ། དེ་བཞིན་ཧི་མཱ་ལ་ཡའི་མི་རིགས་ཁག་གཅིག་ལ་མཇལ་ཁ་བསྩལ་བ་དང་འབྲེལ་བཀའ་འགྱུར་བསྟན་འགྱུར་ཐད་བསླབ་པ་སློབ་གཉེར་གནང་དགོས་གལ་ཡིན་པར་ལམ་སྟོན་ནན་པོ་མཛད་འདུག དེ་བཞིན་༸གང་ཉིད་མཆོག་ནས་ནང་པ་ཚོས་དུས་རབས་ཉི་ཤུ་རྩ་གཅིག་པའི་ནང་པ་བྱེད་དགོས་པ་དང་།  དེ་སྔ་ཡིན་ན་བོད་མི་རྣམས་ནས་གཟུངས་སྔགས་འདོན་ཐོག་སྐྱབས་སུ་མཆི་ཟེར་ནས་འགྲོ་བ་མ་གཏོགས་ཕྱག་དཔེ་གཟིགས་མཁན་དཀོན་པ་དང་།  བར་སྐབས་ཤིག་ནས་༸གང་ཉིད་མཆོག་གིས་བཙུན་མ་དང་སྐྱ་བོ་ཚོས་ཕྱག་དཔེ་གཟིགས་གལ་ཡིན་པར་འབོད་སྐུལ་མཛད་དོན་ལྟར། ད་ཆ་བཙུན་མའི་ནང་ནས་དགེ་བཤེས་མ་ཐོན་མཁན་མང་པོ་བྱུང་ཡོད་སྐོར་དང་།    སངས་རྒྱས་པའི་ཆོས་ཟེར་དུས་རྒྱུ་མཚན་ཤེས་པའི་ཐོག་ནས་དད་པ་ཐོབ་པ་བྱེད་གལ་ཡིན་པ་དང་།  དུས་རབས་ཉེར་གཅིག་པའི་ནང་པ་ཆགས་པར་ཕྱག་དཔེར་སློབ་གཉེར་བྱེད་དགོས་པར་ལམ་སྟོན་རྒྱ་ཆེ་བསྩལ་འདུག གཞན་ཡང་༸གོང་ས་མཆོག་ནས་ཁུལ་དེའི་གྲོས་ཚོགས་ཚོགས་ཁང་དུ་ཉི་ཧོང་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆུང་དང་མཇལ་འཕྲད་གནང་ཡོད་པ་དང་།  གྲོས་ཚོགས་འཐུས་མི་རྣམས་ནས་བོད་ནང་ཆོས་དད་རང་དབང་དང་འགྲོ་བ་མིའི་ཐོབ་ཐང་རྩ་བ་ནས་མེད་པར་རྒྱ་གཞུང་ལ་མཐའ་གཅིག་ཏུ་ངོ་རྒོལ་ཡོད་སྐོར་ཞུས་པ་མ་ཟད་རྒྱལ་སྤྱིའི་སྡིངས་ཆ་འདྲ་མིན་ཐོག་བོད་ཀྱི་གནད་དོན་གླེང་རྒྱུ་དང་།   དེ་བཞིན་ཨ་རི་ནས་བོད་དོན་དང་འབྲེལ་ནས་གྲོས་ཆོད་འཇོག་བཞིན་པ་ལྟར། ཉི་ཧོང་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ངོས་ནས་ཀྱང་བོད་དོན་གྱི་གནད་དོན་དང་འབྲེལ་ནས་གྲོས་ཆོད་བཞག་ཐོག་ཉི་ཧོང་གཞུང་ལ་འབོད་སྐུལ་དང་།  བོད་དོན་ཐད་དུས་དང་རྣམ་པ་ཀུན་ཏུ་རྒྱབ་སྐྱོར་གནང་རྒྱུའི་སྙན་གསེང་ཞུས་ཡོད་པ་རེད། མཛད་འཆར་ལྟར་ན།  སང་ཕྱི་ཚེས་ ༢༡ ཉིན་༸མགོན་པོ་གང་ཉིད་མཆོག་ Tokyo  ནས་ཆིབས་ཞལ་བསྒྱུར་ཏེ་ཉི་ཧོང་གི་ལྷོ་ཕྱོགས་སུ་དེ་སྔ་ས་འགུལ་འོག་འདས་གྲོངས་སུ་ཕྱིན་པ་རྣམས་ཀྱི་སླད་མཆོད་འབུལ་སྨོན་ལམ་ཐོག་དབུ་བཞུགས་མཛད་ཀྱི་འདུག

དེ་རིང་ཟླ་ ༡༡ ཚེས་ ༡༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་གི་རྒྱལ་ས་ Tokyo ཉེ་འཁྲིས་སུ་ཆགས་པའི་ཆི་བའི་ཁུལ་དུ་རྟེན་གཞི་བྱས་པའི་ Reitaku university ཞེས་པའི་མཐོ་སློབ་ནང་གདན་ཞུས་ཀྱིས་མཁས་དབང་གི་ཕྱག་འཁྱེར་ཞིག་འབུལ་བཞེས་མཛད་ཡོད་པ་དང་། སྐབས་དེར་དགེ་ལས་སློབ་ཕྲུག་དང་ཕ་མ་བཅས་ཁྱོན་མི་གྲངས་ ༡༧༠༠ ལྷག་ཙམ་འདུ་འཛོམས་གནང་འདུགམགོན་པོ་༸གང་ཉིད་མཆོག་ནས་ཉི་ཧོང་འདི་ནང་པའི་ལྟེ་གནས་ཤིག་ཡིན་སྟབས་ནང་པའི་ཆོས་ལ་རྒྱུས་མངའ་ཡོད་པའི་ཐོག་ནས་སློབ་གཉེར་གནང་གལ་དང་། ཁོང་ཁྲོའི་རྐྱེན་པས་ཕན་ཚུན་དབར་དབྱེ་འབྱེད་མེད་པར་བྱམས་དང་བརྩེ་བའི་སྒོ་ནས་ཕན་ཚུན་མཉམ་གནས་དང་འབྲེལ་ཏེ་བྱམས་བརྩེ་གོང་འཕེལ་གཏོང་ཐབས་ལ་འབད་དགོས་པར་ལམ་སྟོན་མཛད་འདུག རྩ་བའི་༸གོང་ས་མཆོག་ནས་ཕྱི་ཚེས་ ༡༧ ཉིན་ཤེས་རབ་སྐྱེད་ཚལ་གླིང་སློབ་གཉེར་ཁང་དང་སྐུ་ཚབ་དོན་ཁང་།  ཉི་ཧོང་བོད་ཁང་། སོག་པོའི་རིག་གཞུང་ལྟེ་གནས་ཁང་བཅས་ནས་ཇི་ལྟར་གསོལ་འདེབས་ཞུས་དོན་ལྟར། ཉི་ཧོང་གི་གྲོང་ཁྱེར་ Tokyo ནང་མི་མང་ ༢༠༠༠ ཙམ་ལ་ང་ཚོ་ཚང་མ་ཁྱིམ་ཚང་གཅིག་ཅེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་པ་རེད།སྐབས་དེར་༸གང་ཉིད་མཆོག་ས་གནས་གང་དུ་ཆིབས་བསྒྱུར་དང་བཀའ་སློབ་སྩལ་བའི་སྐབས་འཛམ་གླིང་ནང་གི་མི་ཐེར་འབུམ་ ༧ ཡོད་པ་དེ་དག་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་རེད་ཅེས་བཀའ་ནན་སྩོལ་བཞིན་ཡོད་ཅེས་བཀའ་བསྩལ་བ་དང་འབྲེལ། ང་ཚོ་མ་མི་ཡིན་པའི་ཆ་ནས་སྲོག་ཆགས་གཞན་ལས་ལྷག་པའི་ཤེས་རབ་འམ་བསམ་བློ་གཏོང་རྒྱུའི་དམིགས་བསལ་ཁྱད་ཆོས་ཡོད་ཀྱང་། སྐབས་རེ་འཚེ་བའི་ལས་ལ་རྣམ་དཔྱོད་དེ་དག་སྤྱོད་ནས་སེམས་ཅན་གཞན་གྱི་བདེ་སྐྱིད་བཅོམ་གྱི་ཡོད་སྟབས་མི་ལ་ལྡན་པའི་ཤེས་རབ་དེ་བདེ་སྤྱོད་ལེགས་ས་ནས་སྤྱོད་དེ་འཛམ་གླིང་ནང་གི་དམག་འཁྲུག་དང་རྡུལ་ཕྲན་གྱི་གཏོར་རྒོལ་སོགས་འགོག་ཐབས་གནང་གནད་ཡིན་པར་ལམ་སྟོན་མཛད་འདུག དེ་བཞིན་ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་ཤེས་རབ་སྐྱིད་ཚལ་གླིང་སློབ་གཉེར་ཁང་གི་ཚོགས་ཁང་གསར་པ་དབུ་འབྱེད་རབ་གནས་མཛད་པ་དང་འབྲེལ། དགེ་བཤེས་གླང་རི་ཐར་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་མཛད་འདུག མཛད་འཆར་ལྟར་ན། སང་ཚེས་ ༡༩ ཉིན་ཉི་ཧོང་དུ་ཡོད་པའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་ཚོགས་ཁང་དུ་བོད་དོན་རྒྱབ་སྐྱོར་བ་རྣམས་ལ་ལམ་སྟོན་བཀའ་སློབ་མཛད་རྒྱུ་ཡིན་པ་རེད།  

དེ་རིང་༸གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་དང་པོ་སྐོང་ཚོགས་གནང་འདུག དེ་ཡང་༸གོང་ས་སྐྱབས་མགོན་ཆེན་པ་མཆོག་གིས་དེ་རིང་སྔ་ཐོག་ཉི་ཧོང་གི་གྲོང་ཁྱེར་ཡོ་ཀོ་ཧ་མ་ནང་གི་ཚོགས་ཁང་ཆེན་མོའི་ནང་དུ་ཡུལ་དེའི་ཚད་དངུལ་དངོས་ཁམས་རིག་པའི་ཚན་རིག་པ་དང་ཉམས་ཞིབ་པ། དེ་བཞིན་མཁས་དབང་ཁག་ཅིག་སོགས་ཆེད་ཕེབས་ཐོག་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ལྷན་ཚོགས་དབུ་འབྱེད་བཀྲིན་མཛད་པ་དང་ཆབས་ཅིག ༸གོང་ས་མཆོག་གིས་༸གང་ཉིད་མཆོག་༸སྐུ་ན་ཕྲ་བའི་དུས་ནས་ཚན་རིག་ལ་དོ་སྣང་ཡོད་པ་ཙམ་དུ་མ་ཟད། ལྷག་དོན་བཙན་བྱོལ་དུ་ཞབས་སོར་འཁོད་རྗེས་དེང་དུས་ཚན་རིག་པ་དང་མཇལ་འཕྲད་ཀྱིས་རིམ་བཞིན་སེམས་དང་སྲོག་གི་ཚན་རིག་ཐོག་བགྲོ་གླེང་གནང་ནས་དུས་ལྟ་བར་བྱུང་རིམ་ཁག་ཞིབ་རྒྱས་ངོ་སྤྲོད་མཛད་པ་དང་སྦྲགས། དེང་གི་དུས་སྐབས་འདིར་ཕྱི་དངོས་པོའི་ཆ་ནས་ཡར་རྒྱས་ཀྱི་ཚད་གཞི་མཐོ་པོར་སླེབས་ཡོད་ཀྱང་། འགྲོ་བ་མིའི་སྤྱི་ཚོགས་ཁྲོད་སེམས་ཚོར་དང་འབྲེལ་བའི་དཀའ་ངལ་མང་དག་ཞིག་འཕྲད་བཞིན་ཡོད་སྟབས། ཚན་རིག་པ་ཚོས་ད་ཆ་ཕྱིའི་དངོས་པོ་ཁོ་ནའི་རྣམ་གཞག་ཐོག་དཔྱད་པ་བྱས་པ་ལས་ནང་སེམས་ཀྱི་རྣམ་གཞག་ཐད་ཐུགས་སྣང་གནང་རྒྱུ་ཧ་ཅང་གལ་ཆེ་ཡིན་པར་ལམ་སྟོན་བསྩལ་འདུག ལྷག་དོན་༸གོང་ས་མཆོག་ནས་ད་བར་ནུབ་ཕྱོགས་པའི་ཚན་རིག་མཁས་པ་མང་དག་ཞིག་དང་མཇལ་མོལ་གྱིས་ཨ་རི་དང་ཡུ་རོབ། དེ་བཞིན་རྒྱ་གར་བཅས་རྒྱལ་ཁབ་ཁག་ཅིག་ནང་ནང་པའི་ཚན་རིག་དང་དེང་རབས་དབར་བགྲོ་གླེང་ལྷན་ཚོགས་གང་འཚམ་གནང་ཡོད་ཀྱང་། ཉི་ཧོང་ནང་གི་འདི་བུའི་བགྲོ་གླེང་ཐོག་དབུ་བཞུགས་མཛད་པ་ཆེས་ཐོག་མ་ཆགས་ཀྱི་ཡོད་པར་གོ་སྒྲིག་ཚོགས་ཆུང་ལ་དགའ་བསུ་ཞུས་ཡོད་པ་རེད། དེ་བཞིན་༸གོང་ས་མཆོག་གིས་ང་ཚོ་འགྲོ་བ་མི་རྣམས་ཐོག་མར་ཨ་མའི་བྱམས་སྐྱོང་དང་བརྩེ་བའི་འོག་ནས་འགོ་འཛུགས་ཀྱིས་འཚར་ལོངས་བྱུང་བ་ཞིག་ཡིན་ཡང་། རིམ་བཞིན་བྱིས་པ་དེ་དག་སྤྱི་ཚོགས་ནང་འཚར་ལོངས་བྱུང་སྐབས་སྤྱི་ཚོགས་དང་ཆབ་སྲིད་ཀྱི་གནས་སྟངས། ལྷག་དོན་ཁོང་རྣམ་པའི་འཚར་ལོངས་ཐོག་དངོས་སུ་ལག་བསྟར་གནང་བཞིན་པའི་ཤེས་ཡོན་སློབ་གསོ་ཁྲོད་མཐོང་ཆོས་སུ་ཡོད་པའི་ཕྱིའི་དངོས་པོ་གནད་དོན་ཙམ་ལས་འགྲོ་བ་མིའི་རང་བཞིན་ངོ་མ་བྱམས་སྙིང་རྗེ་དང་དེ་འབྲེལ་བཟང་སྤྱོད་ཐོག་ལ་རིན་ཐང་མ་གནང་བ་དེ་དེང་གི་ཤེས་ཡོན་སློབ་གསོའི་ཞན་ཆ་ཞིག་ཡིན་སྟབས། ང་ཚོས་ཤེས་ཡོན་སློབ་གསོ་ཁྲོད་འགྲོ་བ་མིའི་རིན་ཐང་དང་བཟང་སྤྱོད་སྐོར་སློབ་ཁྲིད་གནང་གལ་ཡིན་པར་ལམ་སྟོན་རྒྱ་ཆེ་བསྩལ་འདུག ༸གང་ཉིད་མཆོག་ནས་ད་དུང་དེང་གི་འཛམ་གླིང་ཐོག་འཕྲད་བཞིན་པའི་དཀའ་ངལ་མང་པོ་གཅིག་ནི་བཟང་སྤྱོ་ཀྱི་ལྟ་གྲུབ་མ་འདང་བའི་དབང་གིས་ཡིན་སྐོར་བཀའ་གནང་སྟེ། གང་ཟག་མི་རེ་ངོ་རེ་ནས་འགྲོ་བ་མི་གཅིག་འགྱུར་གི་འདུ་ཤེས་གཞི་རྩར་བཟུང་ཐོག་འཛམ་གླིང་འདི་བདེ་སྐྱིད་ལྡན་པ་ཞིག་ཡོང་བར་འགན་བསྒྲུབ་དགོས་གལ་ཡིན་པར་བཀའ་བསྩལ་ཡོད་པ་རེད། མཛད་འཆར་ལྟར་ན། སང་ཉིན་སྔ་ཐོག་༸གོང་ས་མཆོག་ཡོ་ཀོ་ཧ་མ་ནས་Tokyo ཕྱོགས་སུ་ཆིབས་ཐོན་གནང་གི་འདུག

༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཉི་ཧོང་གི་གྲོང་ཁྱེར་ཡོ་ཀོ་ཧཱ་མ་ནང་ཆེད་དུ་བྱ་བའི་དད་ལྡན་འདུལ་བྱ་ཉི་ཧོང་ས་གནས་མི་མང་གཙོ་གྱུར་ཕྱི་ནང་གི་ཆོས་ཞུ་བ་རྣམས་ལ་འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀྲིན་སྩལ་ཏེ་ཆོས་འབྲེལ་རེ་ཞིག་ལེགས་གྲུབ་མཛད་འདུག མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་སྤྱན་རས་གཟིགས་ཀྱི་བཀའ་དབང་གི་སྔོན་འགྲོའི་སྤྱི་བཤད་དང་འབྲེལ། ནང་པ་སངས་རྒྱས་པའི་ཆོས་ཀྱི་ནང་ཚན་ནས་གསང་སྔགས་ཀྱི་ཉམས་ལེན་ཡང་དག་ཡོང་བར་གཙོ་བོ་བསྟན་པ་སྤྱི་མཚན་གྱི་ཐབས་བྱང་ཆུབ་ཀྱི་སེམས་དང་ཤེས་རབ་སྟོད་པ་ཉིད་རྟོགས་པའི་ལྟ་བ་གཉིས་ལ་བློ་སྦྱོང་དགོས་པ་དང་དེ་བཞིན་ཐོས་བསམ་སྒོམ་གསུམ་གནང་ཐོག་གསང་སྔགས་ཀྱི་ཆོས་ཉམས་ལེན་འཕར་མ་ཞིག་གནང་ཚེ་ཉམས་ལེན་ཡང་དག་པ་ཞིག་ཡོང་ངེས་ཡིན་པར་ལམ་སྟོན་བསྩལ་འདུག༸གོང་ས་མཆོག་གིས་ཐུགས་རྗེ་ཆེན་པོའི་བཀའ་དབང་དངོས་གཞི་དབུ་འཛུགས་མ་མཛད་གོང་དུ་ཆོས་ཞུ་བ་ཚོར་དགེ་བསྙེན་དང་བྱང་ཆུབ་སེམས་བསྐྱེད། དེ་བཞིན་བྱང་ཆུབ་སེམས་པའི་སྡོམ་པ་འབོག་ཆོག་དང་འབྲེལ། ༸གང་ཉིད་མཆོག་ནས་ཐུགས་རྗེ་ཆེན་པོའི་དབང་འདི་སྟག་བྲག་རིན་པོ་ཆེའི་སྐུ་མདུན་ནས་ཞུས་སྐོར་བཀའ་བསྩལ་འདུག དེ་བཞིན་༸གོང་ས་མཆོག་གིས་ཆོས་འབྲེལ་མཇུག་ཏུ་ཁྱེད་རང་ཚོས་དབང་ཞུས་ནས་སེམས་པ་བཟང་པོ་དང་དྲང་པོ། དེ་བཞིན་མིས་མི་ལ་རོགས་བྱ་རྒྱུ་གལ་ཆེ་བའི་སྐུལ་ལྕག་མཛད་པ་མ་ཟད་སོ་སོའི་ངོ་ཤེས་རྣམས་ལའང་དེ་ལྟར་གནང་དགོས་པའི་ལམ་སྟོན་རྒྱ་ཆེ་མཛད་ཡོད།མཛད་འཆར་ལྟར་ན། སང་ཚེས་ ༡༦ ཉིན་སྔ་ཐོག་༸གོང་ས་མཆོག་ནས་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ལྷན་ཚོགས་ཐོག་དབུ་བཞུགས་མཛད་རྒྱུ་དང་དེ་རྗེ་ཚེས་ ༡༧ ཉིན་ཉི་ཧོང་གི་གྲོང་ཁྱེར་ Tokyo ཕྱོགས་སུ་ཆིབས་ཞལ་བསྒྱུར་གནང་མཛད་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༡༡ ཚེས་ ༡༤ ཉིན་ཉི་ཧོང་གི་གྲོང་ཁྲེར་ Yokohama དུ་ཆོས་འབྲེལ་དབུ་འཛུགས་མཛད་སྐབས་འཛམ་གླིང་འདིའི་སྟེང་དཀའ་ངལ་མང་དག་ཅིག་འཕྲད་བཞིན་པ་ནི་བྱམས་བརྩེའི་བསམ་བློ་མ་འདང་བར་བརྟེན་ནས་ཡིན་སྟབས། འཛམ་གླིང་འདིའི་ཐོག་བྱམས་བརྩེའི་བསླབ་བྱ་གནང་མཁན་གྱི་ཆོས་ལུགས་ཁག་དགོས་མཁོ་ཡོད་པ་ཞིག་རེད་ཅེས་བཀའ་ནན་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་ལ་ཉི་ཧོང་བོད་ཀྱི་སྐུ་ཚབ་དོན་གཅོད་ཁང་གིས་ཇི་ལྟར་གསོལ་འདེབས་ཞུས་པ་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ། ༸གོང་ས་མཆོག་གིས་དེ་རིང་ཚེས་ ༡༤ ནས་དབུ་འཛུགས་ཀྱིས་ཉི་ཧོང་གྲོང་ཁྱེར་ Yokohama ནང་དུ་རྟེན་གཞི་བྱས་པའི་ National Convention Centre ཞེས་པའི་ཚོགས་ཁང་ཆེན་མོར་ཉི་ཧོང་གི་དད་ལྡན་གཙོ་གྱུར་རྒྱ་ནག་སྐམ་ས་ཆེན་པོ་ནས་ཆེད་བཅར་ཞུས་པའི་རྒྱ་རིགས་བཅས་ལྔ་སྟོང་བརྒལ་བར་ཤེས་རབ་སྙིང་པོ་དང་༸རྗེ་རྩོང་པ་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་དབུ་འཛུགས་བསྐྱངས་ཡོད།སྐབས་དེར་༸གོང་ས་མཆོག་གིས་གཞུང་དངོས་གཞི་དབུ་འཛུགས་མ་མཛད་གོང་དུ་རྣམ་ཀུན་ལྟར་ཐོག་མར་ཆོས་ཞུ་བ་ཀུན་ལ་ནང་ཆོས་ངོ་སྤྲོད་ཀྱི་སྤྱི་བཤད་གནང་སྐབས་འགྲོ་བ་མིའི་གཞི་རྩའི་རང་བཞིན་དེ་བྱམས་བརྩེ་ལྡན་པ་གཅིག་མཚུངས་ཡིན་ཀྱང་། འཛམ་གླིང་འདིའི་ཐོག་འགྲོ་བ་མི་རྣམས་ནས་རང་གཅེས་འཛིན་གྱི་བསམ་བློ་ཁོ་ནའི་དབང་དུ་སོང་རྐྱེན་དཀའ་རྙོག་རིགས་མུ་མཐུད་བཟོ་བཞིན་ཡོད་པ་དང་ལྷག་དོན་ཆོས་ལུགས་དང་འབྲེལ་བའི་ཐོག་ནས་མི་ཕན་ཚུན་གསོད་རེས་བྱས་པ་སོགས་དཀའ་ངལ་མང་དག་ཅིག་འཕྲད་དང་འཕྲད་མུས་ཡིན་པ་ནི་གཙོ་བོ་བྱམས་བརྩེའི་བསམ་བློ་མ་འདང་བར་བརྟེན་ནས་ཡིན་སྟབས་འཛམ་གླིང་འདིའི་ཐོག་བྱམས་བརྩེའི་བསླབ་བྱ་གནང་མཁན་གྱི་ཆོས་ལུགས་ཁག་དགོས་ངེས་ཅན་དུ་གཟིགས་ཀྱི་ཡོད་པར་ལམ་སྟོན་མཛད་ཡོད་པ་རེད།ལྷག་དོན་༸གང་ཉིད་མཆོག་གིས་རྒྱུན་དུ་ཉམས་བཞེས་གནང་བཞིན་པའི་ཐུགས་བསྐྱེད་དམ་བཅའ་རྣམས་ངོ་སྤྲོད་མཛད་པ་དང་འབྲེལ། དེ་དག་ལས་བོད་ཀྱི་སྐད་ཡིག་དང་བཅས་པའི་རིག་གཞུང་སྲུང་སྐྱོབ་གནང་རྒྱུ་ནི་གལ་ཆེ་ནང་གི་དོན་ཆེ་ཡིན་པར་བཀའ་བསྩལ་བ་མ་ཟད། དེང་གི་ཆར་དཔལ་ན་ལེནྡཱའི་གཞུང་ལུགས་མདོ་སྔགས་གཉིས་ལ་སློབ་གཉེར་མཐིལ་ཕྱིན་པ་ཞིག་གནང་དགོས་ཚེ་བོད་པའི་སྐད་ཡིག་ལས་ལྷག་པའི་སྐད་ཡིག་གཞན་མེད་སྟབས། བོད་མི་རྣམས་ཀྱིས་རང་ཉིད་ལ་ཡོད་པའི་འཛམ་གླིང་གི་གཅེས་ནོར་དེའི་བརྒྱུད་འཇིག་རྟེན་ཀུན་ལ་ཕན་པ་ཇི་ལྟར་བསྒྲུབ་དགོས་མིན་ཐད་དགོངས་པ་རྒྱ་གང་ཆེ་བཞེས་གནད་ཡིན་པར་ལམ་སྟོན་བཀྲིན་ཆེ་བ་བསྩལ་འདུགམགོན་པོ་མཆོག་གིས་འཛམ་གླིང་ཧྲིལ་པོ་འདི་གཅིག་ལ་གཅིག་རྟེན་ཆགས་པ་དང་མི་ཞིག་ཡིན་ཕྱིན་ཆད་མི་ཚེ་བདེ་སྐྱིད་ལྡན་པ་ཞིག་འདོད་མཁན་ཤ་སྟག་ཆགས་ཀྱི་ཡོད་པས།སེམས་ཀྱི་ཞི་བདེ་སྐྲུན་རྒྱུའི་ཐབས་ལམ་ལེགས་ཤོས་ནི་རང་རྒྱལ་གཞན་ཕམ་གྱི་རྗེས་ལུས་ཀྱི་བསམ་བློ་དེ་དོར་ནས་དུས་རྟག་ཏུ་སེམས་བཟང་པོ་དང་འགྲོ་བ་མིའི་རང་བཞིན་ལ་ཡོད་པའི་བྱམས་བརྩེའི་བསམ་པ་དེ་གོང་འཕེལ་གནང་གལ་ཡིན་པ་བཀའ་བསྩལ་འདུག ༸སྐུ་པར་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་ཉི་ཧོང་གི་རྒྱལ་ཡོངས་གཟུགས་མཐོང་རླུང་འཕྲིན་གི་བཀའ་འདྲིར་དང་ལེན་མཛད་པའི་ཁྲོད། མགོན་པོ་༸གང་ཉིད་མཆོག་གིས་རིང་མིན་འཚོགས་ལ་ཉེ་བའི་ཆོས་བརྒྱུད་ཁག་གི་བླ་ཆེན་རྣམ་པའི་ཚོགས་འདུ་ཐོག་༸སྐུའི་ཡང་སྲིད་གནད་དོན་ཐོག་གླེང་སློང་གནང་ངེས་ཡིན་པར་བཀའ་ནན་བསྩལ་འདུག༸གོང་ས་༸སྐྱབས་མགོན་ཆེན་པོ་མཆོག་ནས་ཉི་ཧོང་ནང་གི་མཛད་འཆར་དངོས་གཞི་སང་ཉིན་ཕྱི་ཚེས་ ༡༤ ནས་དབུ་འཛུགས་གནང་གི་ཡོད་ཀྱང་། དེ་རིང་སྔ་ཐོག་མགོན་པོ་༸གང་ཉིད་མཆོག་ནས་ཡུལ་དེའི་ནང་རྟེན་གཞི་བྱས་པའི་རྒྱ་གར་གྱི་གཞུང་ཚབ་པ་སྐུ་ཞབས་ Sujan R. Chinoy ལགས་མཇལ་འཕྲད་གནང་བ་དང་དེ་རྗེས་ཉི་ཧོང་གི་རྒྱལ་སྤྱིའི་གཟུགས་མཐོང་རླུང་འཕྲིན་གྲགས་ཅན་ NHK དང་དེ་བཞིན་ཡུན་རིང་ནས་བོད་དོན་རྒྱབ་སྐྱོར་གནང་མཁན་དང་ཉི་ཧོང་གི་སྲིད་བྱུས་ཉམས་ཞིབ་ཁང་གི་ཚོགས་གཙོ་ལྕམ་ yoshiko Sakurai ལགས་རྣམ་གཉིས་ཀྱི་དམིགས་བསལ་བཀའ་འདྲིར་དང་ལེན་མཛད་ཡོད་པ་རེད།སྐབས་དེར་ NHK གསར་ཁང་གིས་གསར་འགོད་པས་མགོན་པོ་༸གང་ཉིད་མཆོག་ལ་༸སྐུའི་ཡང་སྲིད་ཀྱི་གནད་དོན་དང་འབྲེལ་མ་འོངས་པར་རྒྱལ་དབང་༸སྐུ་ཕྲེང་བཅོ་ལྔ་པ་ཕེབས་ཀྱི་རེད་དམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་སྤྱན་ཤེལ་ཕུད་ནས་༸གང་ཉིད་མཆོག་གི་ཞལ་རས་ལ་གཟིགས་ན་ད་ཆ་༸སྐུའི་ཡང་སྲིད་ཀྱི་གནད་དོན་དེ་གློང་དགོས་པའི་ཛ་དྲག་ཞིག་རེད་འདུག་གམ་ཞེས་ཞལ་ཤོབ་གནང་བ་མ་ཟད་༸གང་ཉིད་མཆོག་གི་༸སྐུའི་ཡང་སྲིད་ཕེབས་དགོས་མིན་ནི་བོད་མི་མང་ཚོགས་ནས་ཐག་གཅོད་གནང་རྒྱུ་ཞིག་རེད་ཅེས་བཀའ་ལན་མཛད་པ་དང་ཆབས་ཅིག འཚོགས་ལ་ཉེ་བའི་ཆོས་བརྒྱུད་ཁག་གི་བླ་ཆེན་རྣམ་པའི་ཚོགས་འདུ་ཐོག་དེ་འབྲེལ་གླེང་སློང་གནང་ངེས་ཡིན་པར་བཀའ་བསྩལ་འདུགདེ་རྗེས་༸གོང་ས་༸སྐྱབས་མགོན་ཆེན་པོ་མཆོག་དང་ཉི་ཧོང་གི་སྲིད་བྱུས་ཉམས་ཞིབ་ཁང་གི་ཚོགས་གཙོ་ལྕམ་ yoshiko Sakurai ལགས་རྣམ་གཉིས་དབར་ཚོུད་གཅིག་ལྷག་ཙམ་རིང་མཇལ་མོལ་གནང་སྐབས་ལྕམ་སྐུ་མཆོག་ནས་ཉི་ཧོང་གི་ད་ལྟའི་གནས་སྟངས་སྤྱི་དང་ལྷག་དོན་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་པོས་འཛམ་གླིང་ནང་ཞི་བདེ་དང་འཚེ་བ་མེད་པ་སྐྲུན་རྒྱུར་ནུས་པ་དམིགས་བསལ་བ་ཞིག་འཐོན་བཞིན་པར་ཡི་རང་བསྔགས་བརྗོད་ཞུས་འདུགམཛད་འཆར་ལྟར་ན། སང་ཉིན་ཚེས་ ༡༤ ཉིན་༸གོང་ས་མཆོག་ནས་ཁུལ་དེའི་གྲོང་ཁྱེར་ Yokohama ནང་དད་ལྡན་མང་ཚོགས་ལ་ཤེས་རབ་སྙིང་པོ་དང་རྗེ་རྩོང་པ་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། དེ་བཞིན་སྒོམ་རིམ་བར་པ་བཅས་ཀྱི་བཀའ་ཆོས་དང་ཚེས་ ༡༥ ཉིན་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་མཛད་རྒྱུ་མ་ཟད། ཚེས་ ༡༦ ནས་ ༢༣ བར་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ལྷན་ཚོགས་ཐོག་དབུ་བཞུགས་མཛད་རྒྱུ་དང་དེ་བཞིན་ Tokyo ནང་གི་གཞོན་སྐྱེས་ཚོར་བཀའ་སློབ་སོགས་ཀྱི་མཛད་འཕྲིན་ཁག་གཅིག་བསྐྱང་གཏན་ཁེལ་ཡོད་པ་རེད། ༸སྐུ་པར་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སང་རྒྱལ་ས་ལྡི་ལི་ནས་མཁའ་ལམ་བརྒྱུད་ཉི་ཧོང་དུ་ཕེབས་ཐོན་མཛད་ཡོད་པ་ལྟར། མགོན་པོ་༸གང་ཉིད་མཆོག་དེ་རིང་ཉིན་རྒྱབ་ཏུ་ཉི་ཧོང་ནང་༸ཞབས་སོར་བདེ་བར་འཁོད་གནང་འདུག༸གོང་ས་༸སྐྱབས་མགོན་ཆེན་པོ་མཆོག་ནས་ཉིན་གྲངས་བཅུ་ལྷག་གི་རིང་ཉི་ཧོང་གི་རྒྱལ་ས་ Yokohama དང་ Tokyo གཙོས་པའི་ Chiba ས་གནས་སུ་མང་ཚོགས་ལ་བཀའ་སློབ་དང་བཀའ་ཆོས་སྩལ་རྒྱུ་སོགས་ཀྱི་མཛད་འཆར་ཁག་ཅིག་ཐུགས་གཏན་ཁེལ་དོན་ལྟར། དེ་རིང་ཉིན་རྒྱབ་ཚོུད་ ༤ ཡོལ་ཙམ་ལ་མགོན་པོ་༸གང་ཉིད་མཆོག་ཉི་ཧོང་གི་ haneda རྒྱལ་སྤྱིའི་གནམ་ཐང་དུ་༸ཞབས་སོར་བདེ་འཁོད་སྐབས་ཐེངས་འདིའི་ཆིབས་བསྒྱུར་གསོལ་འདེབས་ཞུ་མཁན་ཉི་ཧོང་བོད་ཀྱི་སྐུ་ཚབ་དོན་གཅོད་ལུང་རྟོགས་ལགས་ཀྱིས་གཙོས་པའི་ཁུལ་དེའི་བོད་མི་དང་ཧི་མཱ་ལ་ཡའི་མང་ཚོགས་ཚོས་བོད་ལུགས་ལྟར་ཕྱག་ཏུ་དཀར་གཙང་གི་མཇལ་དར་དང་གྲོ་སོ་ཕྱེ་མར་འདེགས་འབུལ་གྱིས་༸གོང་ས་མཆོག་ལ་དགའ་དད་སྤྲོ་གསུམ་ངང་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།མཛད་འཆར་ལྟར་ན། སང་ཚེས་ ༡༣ ཉིན་སྔ་དྲོ་ཚོུད་ ༡༠༌༠༠ ཐོག་༸གོང་ས་མཆོག་ནས་ཉི་ཧོང་གི་རྒྱལ་སྤྱིའི་གཟུགས་མཐོང་རླུང་འཕྲིན་ཁང་དང་དེ་བཞིན་ཁུལ་དེའི་ནང་གི་ Think-tank འམ་བསམ་བློ་བའི་བཅར་འདྲི་ཁག་ཅིག་དང་ལེན་མཛད་རྒྱུ་དང་། དེ་རྗེས་ཕྱི་ཚེས་ ༡༤ ཉིན་ཁུལ་དེའི་གྲོང་ཁྱེར་ Yokohama ནང་དད་ལྡན་མང་ཚོགས་ལ་ཤེས་རབ་སྙིང་པོ་དང་རྗེ་རྩོང་པ་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། དེ་བཞིན་སྒོམ་རིམ་བར་པ་བཅས་ཀྱི་བཀའ་ཆོས་དང་ཚེས་ ༡༥ ཉིན་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་མཛད་རྒྱུ་མ་ཟད། ཚེས་ ༡༦ ཉིན་ཚན་རིག་པ་གསུམ་དང་ལྷན་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ལྷན་ཚོགས་སུ་བཀའ་སློབ་བསྩལ་གནང་མཛད་རྒྱུ། ཚེས་ ༡༧ ཉིན་ཉི་ཧོང་གི་རྒྱལ་ས་ Tokyo ནང་ཆིབས་བསྒྱུར་གྱིས་གཞོན་སྐྱེས་ཚོར་ང་ཚོ་ཁྱིིམ་ཚང་གཅིག་ཞེས་པའི་བརྗོད་གཞིའི་ཐོག་བཀའ་སློབ་དང་། ཚེས་ ༡༩ ཉིན་ཆཱི་སྦ་ཞེས་པའི་གྲོང་ཁྱེར་དུ་ཡོད་པའི་ཤེས་རབ་སྐྱེས་ཚལ་གླིང་ལྟེ་གནས་ཁང་གི་ཚོགས་ཁང་དབུ་འབྱེད་མཛད་སྒོར་ཆིབས་བསྒྱུར་བསྐྱང་རྒྱུ་རེད་འདུགརྩ་བའི་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ཉི་ཧོང་ནང་ཐོག་མར་ཕྱི་ལོ་ ༡༩༦༧ ལོར་ཆིབས་སྒྱུར་མཛད་ཡོད་པ་དང་། ཐེངས་འདིའི་ཆིབས་བསྒྱུར་འདི་ཐེངས་ ༢༥ པ་ཆགས་ཀྱི་ཡོད་པ་རེད། མགོན་པོ་༸གང་ཉིད་མཆོག་ནས་ཉི་ཧོང་དུ་ཟླ་ ༡༡ ཚེས་ ༡༤ ཉིན་ནས་དབུ་འཛུགས་ཀྱིས་ཚེས་ ༢༣ བར་མཛད་འཆར་བསྐྱང་གནང་གི་ཡོད་པ་རེད། ༸སྐུ་པར་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

དེ་རིང་རྒྱ་གར་གྱི་རྒྱལ་ས་ལྡི་ལིའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སིག་ཆོས་ལུགས་ཀྱི་སྲོལ་གཏོད་པ་པོ་ Guru Nanak Dev དམ་པ་མཆོག་གི་ལོ་ངོ་ ༥༥༠ འཁོར་བའི་རྗེས་དྲན་མཛད་སྒོར་དབུ་བཞུགས་མཛད་ཡོད་པ་མ་ཟད། རྒྱ་གར་གྱི་སྲིད་བློན་ཟུར་པ་ Dr. Manmohan Singh མཆོག་དང་ལྷན་མགོན་པོ་༸གང་ཉིད་མཆོག་ནས་ Guru Nanak མཆོག་གི་མཛད་རྣམ་དང་འབྲེལ་བའི་འགྲེམས་སྟོན་ཞིག་ཀྱང་དབུ་འབྱེད་བཀྲིན་བསྩལ་གནང་ཡོད་པ་རེད། དེ་རིང་སྔ་དྲོའི་ཆུ་ཚོད་ ༡༡ ཙམ་ལ་རྒྱལ་ས་ལྡི་ལིའི་ Bai Vir Singh Sahita Sadan ཞེས་པའི་ཚོགས་ཁང་ནང་། སྲིད་བློན་ཟུར་པ་ Dr. Manmohan Singh མཆོག་གི་དབུས་པའི་ཆོས་ལུགས་འདྲ་མིན་གྱི་དབུ་ཁྲིད་དང་། གཞན་ཡང་གལ་ཆེའི་གནད་ཡོད་ཀྱི་མི་སྣ་བཅས་མི་གྲངས་ ༣༠༠ ལྷག་ཙམ་ཞིག་འདུ་འཛོམས་ཡོད་པ་རེད། སྐབས་དེར་༸གང་ཉིད་མཆོག་ནས་དེ་རིང་ངོས་རང་ Guru Nanak མཆོག་གི་ལོ་ ༥༥༠ རྗེས་དྲན་མཛད་སྒོ་དེའི་ཐོག་ཞུགས་རྒྱུའི་གོ་སྐབས་བྱུང་བ་དེ་དངོས་གནས་གཟི་བརྗིད་ཞིག་ཏུ་ངོས་འཛིན་བྱེད་ཀྱི་ཡོད། ཁོང་གི་ལོ་རྒྱུས་ཞིབ་ཁྲ་དེ་ཙམ་ངོས་ཀྱི་ཤེས་ཀྱི་མེད། འོན་ཀྱང་ཁོང་ཧིན་རྡུའི་ཁྱིམ་ཚང་ཞིག་ལ་འཁྲུངས་ཏེ་ཁ་ཆེའི་མཆོག་ཏུ་འཛིན་པའི་ Mecca ཁུལ་དུ་གནས་མཇལ་ཕེབས་པ་དེ་དངོས་གནས་མངགས་བརྗོད་ཞུ་འོས་པ་ཞིག་རེད། དེ་ནི་རྒྱ་གར་ཕྱོགས་ནས་ཆོས་ལུགས་ཕན་ཚུན་དབར་གུས་རྩི་གང་འདྲ་ཡོད་མེད་ཀྱི་དཔེ་མཚོན་ཞིག་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་རྒྱ་གར་ནི་འཛམ་གླིང་ཆོས་ལུགས་ཚང་མ་མཉམ་གནས་བྱེད་ཐུབ་སའི་རྒྱལ་ཁབ་ཞིག་ཡིན་སྐོར་བཀའ་བསྩལ་གནང་བ་མ་ཟད། ལོ་ངོ་སྟོང་ཕྲག་གསུམ་བཞིའི་སྔོན་ནས་རྒྱ་གར་ནང་སྨོན་ལམ་དང་ཆོ་ག་ཙམ་ལ་མ་བརྟེན་པར་སེམས་དང་འབྲེལ་་བ་ཡོད་པའི་ལྟ་ཚུལ་ཞིག་གོང་འཕེལ་བྱུང་ཡོད་པ་དང་། ལྷག་པར་དུ་ལྷག་མཐོང་དང་ཞི་གནས་བཅས་ཀྱི་སྒོམ་ཉམས་ལེན་བརྒྱུད་མིའི་སེམས་དང་ཚོར་བའི་ཤེས་བྱ་གོང་འཕེལ་ལམ་ནས་སེམས་ཀྱི་ཞི་བདེ་ལ་འགྱུར་ལྡོག་གཏོང་ཐུབ་པའི་ཐབས་ལམ་དེ་ཡང་རྒྱ་གར་ནས་ཐོག་མར་དར་ཁྱབ་བྱུང་བ་ཞིག་རེད་ཅེས་བཀའ་བསྩལ་གནང་པ་དང་། ༸གང་ཉིད་མཆོག་གིས་ད་དུང་རྩ་བའི་སྲིད་པའི་དཔལ་ཡོན་གྱི་ཆ་ནས་རྒྱ་ནག་དང་ཨི་ཇིབ་གཉིས་རྒྱ་གར་ལས་ཆེས་རྙིང་བ་ཞིག་ཡིན་ཡང་། གུ་རུ་ན་ནག་དང་། སྟོན་པ་བཅོམ་ལྡན་འདས། ཇེན་ཆོས་ལུགས་ཀྱི་མྷ་སྦི་ར་བཅས་ནི་རྒྱ་གར་ཐོན་སྐྱེད་ཡིན་པ་དང་། རྒྱ་གར་ནི་ཆོས་ལུགས་ཚང་མ་ཞི་མཐུན་མཉམ་གནས་བྱེད་ཐུབ་སའི་རྒྱལ་ཁབ་ཞིག་ཡིན་པ་བཀའ་བསྩལ་གནང་པ་དང་སྦྲགས། ད་ལྟའི་དུས་རབས་ ༢༡ འདི་ཕྱིའི་དངོས་པོ་དང་དེང་དུས་ཀྱི་ཤེས་ཡོན་ཤིན་ཏུ་ནས་ཡར་རྒྱས་ཆེན་པོ་ཕྱིན་པའི་དུས་རབས་ཤིག་ཆགས་ཡོད། འོན་ཀྱང་དེ་དང་བསྟུན་དཀའ་ངལ་ཡང་ཤིན་ཏུ་ནས་ཆེན་པོ་ཡོད་པ་ཞིག་ཆགས་ཡོད། དཀའ་ངལ་དེ་དག་ནི་ཤེས་ཡོན་ལམ་ལུགས་ནང་ཕྱིའི་དངོས་པོ་ཡར་རྒྱས་སྐོར་ཙམ་ལས་ནང་སེམས་ཀྱི་ཤེས་ཡོན་སྐོར་གང་ཡང་ཤོད་ཀྱི་མེད་སྟབས་དཀའ་ངལ་དེ་དག་འཕྲད་ཀྱི་ཡོད་པ་བཀའ་བསྩལ་གནང་སྟེ། རྒྱུན་དུ་ཆོས་ཁས་ལེན་བྱེད་མཁན་ཚོར་གཞན་ཕན་གྱི་བསམ་བློ་དེ་ངེས་པར་དུ་དགོས་པའི་ལམ་སྟོན་ཡང་བཀའ་བསྩལ་གནང་སོང་། ད་ལྟ་ང་ཚོ་འདིར་ཞི་བདེ་ལྷིང་འཇགས་ངང་གནས་ཡོད་པ་ཡིན་ནའང་། གོ་ལ་འདིར་ Syria དང་ Afghanistan སོགས་ཀྱི་ནང་མི་གསོད་ཁྲག་སྦྱོར་ཡོང་གི་ཡོད་པ་རེད། དེ་ཡང་རྙོག་གྲ་མང་པོ་ཞིག་ཆོས་ཕྱོགས་ཀྱི་ཐོག་ནས་ཡོང་གི་ཡོད་དང་། མཐའ་མའི་དཀའ་ངལ་འཕྲད་མཁན་དེ་དབུལ་ཕྱུག་གི་ཁྱད་པར་ཆེན་པོ་ཡོད་པ་བཅས་ལ་བརྟེན། དཀའ་ངལ་ཤུགས་ཆེ་བ་དེ་ཉམ་ཐག་དེ་ཚོར་འཕྲད་ཀྱི་ཡོད་པ་དང་། ལྷག་པར་ yemen ནང་ཕྲུག་གུ་སྟོང་ཕྲག་མང་པོ་ལྟོག་ཤི་དང་སྨན་བཅོས་ཀྱི་མཐུན་རྐྱེན་མ་ཐོབ་པ་སོགས་ཡོང་གི་ཡོད་སྟབས། སེམས་ཅན་དུད་འགྲོ་ཡིན་ཡང་གཅིག་ཕན་གཅིག་གྲོགས་ཀྱི་བསམ་བློ་དེ་ཡོད་པ་ཡིན་དུས་ང་ཚོ་འགྲོ་བ་མི་ཡིན་པའི་ཆ་ནས་གཅིག་ལ་དཀའ་ངལ་འཕྲད་སྐབས་གཞན་ཚོས་སྣང་མེད་དུ་སྡོད་མི་རུང་བར། བྱམས་པ་དང་སྙིང་རྗེ་ཡོད་པའི་ཐོག་ནས་ངེས་པར་དུ་དཀའ་ངལ་འོག་གནས་པའི་མི་མང་ཚོར་རོགས་ཕན་བྱེད་དགོས་པ་སོགས་ཀྱི་ལམ་སྟོན་བཀའ་སྩལ་གནང་སོང་། མགོན་པོ་༸གང་ཉིད་མཆོག་གིས་ད་དུང་། ལྟ་གྲུབ་གང་ཡིན་ལ་མ་ལྟོས་པའི་ཆོས་ལུགས་ཚང་མ་ཕན་ཚུན་འཆམ་མཐུན་མཉམ་གནས་ཡོང་ཐབས་བྱེད་དགོས་པ་དང་། དང་པོ་ཆོས་ཁས་ལན་བྱེད་མཁན་ཚོས་ཀུན་སློང་རྣམ་པར་དག་པའི་སྒོ་ནས་བྱམས་པ་དང་སྙིང་རྗེ་བཅས་ཆོས་ལུགས་ཚང་མས་དངོས་སུ་ཉམས་ལེན་བྱེད་ཐུབ་ཐབས་གནང་དགོས་པའི་ལམ་སྟོན་བསྩལ་གནང་པ་དང་སྦྲགས། ད་ལྟ་ང་ཚོའི་དེང་དུས་ཀྱི་ཤེས་ཡོན་ལམ་ལུགས་དེ་ཆ་ཚང་བ་ཞིག་མེད་པ་དང་ཕྱིའི་དངོས་པོའི་ཡར་རྒྱས་ཀྱི་ཐོག་ནས་གལ་ཆེན་པོ་རེད། འོན་ཀྱང་ནང་སེམས་ཀྱི་ཞི་བདེ་དང་འབྲེལ་བའི་ཐོག་དེང་དུས་ཤེས་ཡོན་དེ་འདང་ངེས་ཆ་ཚང་ཞིག་མེད་པ་དང་། འཛམ་གླིང་ནང་རྒྱལ་ཁབ་ཁག་ ༢༠༠ ལྷག་ཡོད་པའི་ནང་ནས་རྒྱ་གར་ནི་ཕྱི་དངོས་པོ་དང་ནང་སེམས་གཉིས་ཀ་ཟུང་འབྲེལ་གྱི་ཐོག་ནས་འགྲོ་ཐུབ་མཁན་གྱི་རྒྱལ་ཁབ་གཅིག་པོ་དེ་རེད། ལྷག་པར་རྒྱ་གར་ལ་གནའ་བོའི་རིག་གཞུང་དང་འབྲེལ་བའི་ལྟ་གྲུབ་ཕྱུག་པོ་དེ་ཡོད་པ་མ་ཟད་དེ་དག་ལག་ལྟར་ཐུབ་པའི་ནུས་པ་དང་གོ་སྐབས་དེ་ཡང་ཡོད་སྟབས། རྒྱ་གར་མང་ཚོགས་ཀྱི་ངོས་ནས་རིས་མེད་ཀྱི་ཐོག་ནས་ཆོས་ལུགས་མཐུན་འབྲེལ་དང་སེམས་ཀྱི་ཞི་བདེའི་ཐོག་ཐུགས་འགན་ཆེ་ཙམ་བཞེས་དགོས་པ་དང་། རིག་གཞུང་རྩ་ཆེན་དེ་དག་བསྐྱར་གསོ་ཡོང་ཐབས་གནང་དགོས་པ་སོགས་ཀྱི་ལམ་སྟོན་ཡང་བཀའ་སྩལ་གནང་སོང་། སྐབས་དེར་ད་དུང་རྒྱ་གར་གྱི་སྲིད་བློན་ཟུར་པ་ Dr. Manmohan Singh མཆོག་གིས་དེ་རིང་༸གོང་ས་༸ སྐྱབས་མགོན་ཆེན་པོ་མཆོག་ལ་གསོལ་འདེབས་ཞུས་པ་བཞིན་ཞབས་སོར་བཀྲིན་བསྐྱངས་གནང་མཛད་པར་ཐུགས་རྗེ་ཆེ་ཞུས་པ་མ་ཟད། མགོན་པོ་༸གང་ཉིད་མཆོག་གི་རླབས་ཆེའི་མཛད་འཕྲིན་ཁག་ལ་ཡིད་རང་མངགས་བརྗོད་ཀྱང་ཆེན་པོ་གནང་སོང་། མཛད་སྒོ་དེ་སྒྲུབ་བསྟུན་༸གོང་ས་༸སྐྱབས་མགོན་ཆེན་པོ་མཆོག་ནས་ད་དུང་། Guru Nanak མཆོག་གི་སྐུ་ཚེའི་མཛད་རྣམ་དང་དམིགས་བསལ་མཛད་རྗེས་ཀྱི་འགྲེམས་སྟོན་ཞིག་ཀྱང་དབུ་འབྱེད་གནང་ཡོད་པ་མ་ཟད། སྲིད་བློན་ཟུར་པ་ Dr. Manmohan Singh ལྷན་རྒྱས་གཉིས་ནས་དྲན་རྟེན་ལྗོན་ཤིང་ཞིག་ཀྱང་འདེབས་འཛུགས་བཀྲིན་བསྐྱངས་གནང་བཅས་མཛད་ཡོད་པ་རེད། མཛད་འཆར་གཞི་ཟུང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སང་ཉིན་ཕྱི་ཚེས་ ༡༡ ཉིན་སིང་ག་སྤུར་བརྒྱུད་ Japan ནང་ཆིབས་བསྒྱུར་བཀྲིན་སྩལ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སང་ཉིན་ཕྱི་ཚེས་༡༠ཉིན་རྒྱ་གར་གྱི་རྒྱལ་ས་ལྡི་ལིའི་ནང་དུ་འཚོགས་གཏན་འཁེལ་བའི་ Sikh ཆོས་ལུགས་ཀྱི་སྲོལ་གཏོད་པ་པོ་ Guru Nanak དམ་པ་ལོ་ངོ་ ༥༥༠ འཁོར་བའི་རྗེས་དྲན་མཛད་སྒོའི་ཐོག་དབུ་བཞུགས་མཛད་ཆེད། དེ་རིང་ཉིན་རྒྱབ་ཆུ་ཚོད་དང་པོ་མ་ཟིན་ཙམ་དུ་བཞུགས་སྒར་རྒྱལ་བའི་ཕོ་བྲང་ནས་ཕེབས་ཐོན་མཛད་སོང་།སང་ཉིན་༸གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་ཚོགས་གཏན་འཁེལ་བའི་Guru Nanak དམ་པའི་རྗེས་དྲན་མཛད་སྒོའི་ཐོག་རྒྱ་གར་གྱི་སྲིད་བློན་ཟུར་པ་ Dr. Manmohan Singh མཆོག་གཙོས་པའི་གནད་ཡོད་མི་སྣ་དང་ཆོས་ཕྱོགས་ཀྱི་དབུ་ཁྲིད།  དེ་བཞིན་ས་གནས་མི་མང་སོགས་ནས་ལྷན་ཞུགས་གནང་གི་ཡོད་པ་རེད་འདུག གཞི་རྩའི་༸གོང་ས་སྐྱབས་མགོན་ཆེན་པོ་མཆོག་སང་ཉིན་རྒྱལ་ས་ལྡི་ལི་ནང་གི་མཛད་འཆར་གྲུབ་རྗེས།  གནངས་ཉིན་ཕྱི་ཚེས་ ༡༡ ཉིན་མཁའ་ལམ་རྒྱུད་ཉི་ཧོང་ཕྱོགས་སུ་ཆིབས་བསྒྱུར་བཀའ་དྲིན་བསྐྱང་སྟེ།  ཕྱི་ཚེས་ ༡༤ དང་ ༡༦ ཉིན་ཁུལ་དེའི་གྲོང་ཁྱེར་ Yokohama ནང་དུ་དད་ལྡན་མང་ཚོགས་རྣམས་ལ་ཤེས་རབ་སྙིང་པོ་དང་རྟེན་འབྲེལ་བསྟོད་པ།  དེ་བཞིན་སྒོམ་རིམ་བར་མ་བཅས་ཀྱི་བཀའ་ཆོས་དང་།  འཕགས་པ་སྤྱན་རས་གཟིགས་ཀྱི་བཀའ་དབང་བཀའ་དྲིན་བསྩལ་གནང་གི་ཡོད་པ་མ་ཟད།   ཕྱི་ཚེས་ ༡༦ ཉིན་ཁུལ་དེར་ནང་པའི་ཚན་རིག་དང་དེང་དུས་ཚན་རིག་དབར་གྱི་བགྲོ་གླེང་ཚོགས་འདུའི་ཐོག་ཚོགས་མགོན་དུ་དབུ་བཞུགས་མཛད་ཀྱི་ཡོད་པ་རེད། ཕྱི་ཚེས་ ༡༧ ཉིན་མགོན་པོ་༸གང་ཉིད་མཆོག་གིས་ཉི་ཧོང་གི་རྒྱལ་ས་ Tokyo ནང་དུ་གནས་བཞུགས་གཞོན་སྐྱེས་ཚོ་ལ་ We Are One Family འམ་ང་ཚོ་ཚང་མ་ཁྱིམ་ཚང་གཅིག་རེད་ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༡༨ ཉིན་ཉི་ཧོང་གི་ Chiba ས་གནས་སུ་ཤེས་རབ་སྐྱེད་ཚལ་གླིང་ལྟེ་གནས་ཁང་དབུ་འབྱེད་མཛད་རྒྱུ་སོགས་ཀྱི་མཛད་ཕྲིན་རྒྱ་ཆེ་བསྐྱང་གི་ཡོད་པ་རེད།