༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ནང་གི་ཆོས་ཞུ་བ་ཚོར་སེམས་པ་བཟང་པོ་བྱས་ནས་གཞན་ཕན་བསྒྲུབ་དགོས་པའི་བཀའ་སྩལ་པ་དང་སྦྲགས་ཏེ་ཉིན་གྲངས་བཞིའི་ཆོས་འབྲེལ་མཇུག་སྒྲིལ་གནང་སོང་། མགོན་པོ་༸གང་ཉིད་མཆོག་ལ་ལྷོ་ཤར་ཨེ་ཤེ་ཡའི་ནང་པའི་དད་ལྡན་པ་ཚོས་ཇི་ལྟར་གསོལ་འདེབས་ཞུས་པ་བཞིན། ༸གོང་ས་མཆོག་ནས་ཟླ་འདིའི་ཕྱི་ཚེས་ ༧ ནས་དབུ་འཛུགས་ཀྱིས་དེ་རིང་བར་ཉིན་གྲངས་བཞི་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཤར་ཨེ་ཤེ་ཡའི་དད་ལྡན་པ་ ༨༠༠ གཙོས་པའི། ཕྱི་ནང་གི་ཆོས་ཞུ་བ་༦༠༠༠ བརྒལ་བར་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་བཅུ་པ་ནས་འཕྲོ་སྐྱོང་གི་ཆོས་འབྲེལ་དང་། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ། དབུ་མའི་ཤིང་རྟ་གསོལ་བྱེད་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་བཅས་ཀྱི་ཆོས་འབྲེལ་བསྩལ་བ་མཇུག་སྒྲིལ་གནང་བ་དང་། དེ་རིང་ཆོས་འབྲེལ་གྱི་ཉིན་མཐའ་མའི་ཐོག་ཆོས་ཞུ་བ་ཚོར་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་སྤྱོད་འཇུག་གི་བསྔོ་བའི་ལེའུ་ནས་ཆོས་འབྲེལ་གྲུབ་རྗེས་བྱང་ཆུབ་སེམས་བསྐྱེད་ཀྱི་སྡོམ་པ་འབོགས་ཆོག་སྩལ་སོང་། ལྷག་དོན་དེ་རིང་སྔ་ཐོག་མགོན་པོ་མཆོག་གིས་ཨ་རིའི་ནང་དེ་སྔོན་བྱུང་བའི་དགུ་བཅིུག་གི་དོན་རྐྱེན་དཔེ་རུ་བླངས་ཏེ་ད་ཆ་འཛམ་གླིང་ཁྱོན་ཡོངས་ལ་མི་གསོད་ཁྲག་སྦྱོར་དང་དམག་འཁྲུག་བཅས་ཀྱི་འཚེ་བའི་གནས་དོན་མང་དག་བྱུང་བཞིན་པའི་ཁར། མང་ཚོགས་ནས་རྣམ་ཀུན་སེམས་པ་བཟང་པོ་དང་གཞན་ཕན་བསྒྲུབ་ རྒྱུ་དེ་ནི་ང་ཚོའི་རྩ་དོན་ཞིག་ཡིན་སྟབས། ཚང་མས་གཉིས་ཕན་གྱི་བསམ་བློའི་ཐོག་ནས་མིའི་སྤྱི་ཚོགས་དེའི་ངལ་བ་སེལ་ཕྱིར་འབད་དགོས་པའི་གཞེན་སྐུལ་གནང་སོང། ད་དུང་མགོན་པོ་མཆོག་གིས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གཞུང་ལས། དགེ་བའི་བཤེས་གཉེན་བསྟེན་ཚུལ་དང་འབྲེལ། མང་ཚོགས་ཀྱི་ངོས་ནས་རང་གི་བླ་མར་དད་པ་གཅིག་པོ་ཙམ་མ་ཡིན་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་རང་གི་སྐྱབས་ཡུལ་བླ་མ་དེ་བླ་མའི་མཚན་ཉིད་ལྡན་མིན་ཞིབ་དཔྱད་མཐིལ་ཕྱིན་པ་བྱ་གལ་ཆེ་བའི་བཀའ་སྩལ་སོང། ལར་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ད་ལན་གྱི་ཆོས་འབྲེལ་དེའི་ཐོག་ལྷོ་ཤར་ཨེ་ཤེ་ཡའི་ཡུལ་གྲུ་འདྲ་མིན་ནས་ཆེད་བཅར་ཞུས་པའི་དད་ལྡན་པ་ཚོ་དུས་གཅིག་ལ་མཉམ་འཛོམས་ཐོག་གསུང་ཆོས་ཞུཔ་པར་བསྔགས་བརྗོད་དང་འབྲེལ། ད་ཆ་མགོན་པོ་མཆོག་དགུང་ལོ་བགྲེས་པོར་ཕེབས་མཚམས་འདིར། གཞོན་སྐྱེས་ཚོའི་ངོས་ནས་རྟག་ཏུ་སོ་སོར་འཁྲིད་པའི་སྐབས་བབ་ཀྱི་ལས་འགན་རྣམས་ལྷག་བསམ་རྣམ་དག་དང་དྲང་བདེན་གྱི་ཐོག་ནས་གནང་དགོས་སྐོར་བཀའ་བསྩལ་བ་མ་ཟད། རང་གི་ཉིན་རེའི་འཚོ་བའི་ནང་བྱང་ཆུབ་སེམས་སྒོམ་པའི་ཐོག་ནས་གཞན་ལ་ཕན་བཏགས་པ་ལས་གནོད་པ་མི་བྱེད་པའི་ལམ་སྟོན་སྩལ་སོང་། གཞན་ཡང་དེ་རིང་ཆོས་འབྲེལ་མཇུག་སྒྲིལ་དང་བསྟུན། ཝི་ཏི་ནམ་ནང་པའི་དད་ལྡན་པ་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༠ ཕེབས་པའི་རྟེན་འབྲེལ་མཚོན་ཆེད་འཁྲུངས་སྐར་གྱི་མངར་ཟས་འདེགས་འབུལ་ཞུས་པར་མགོན་པོ་༸གང་ཉིད་མཆོག་ཐུགས་དགྱེས་ཚོར་ཆེན་པོས་མངར་ཟས་ཀྱི་དུམ་བུ་ཅུང་ཙམ་ཞིག་མཆོད་སྟེ་ཐེངས་འདིའི་ཆོས་འབྲེལ་ལེགས་པར་མཇུག་སྒྲིལ་གནང་སོང་།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མི་ལ་རང་ཆས་སུ་ཡོད་པའི་བྱམས་བརྩེའི་ཡོན་ཏན་གོང་འཕེལ་གཏོང་དགོས་གལ་ཡིན་པ་ལམ་སྟོན་བསྩལ་སོང་། དེ་རིང་ཟླ་ ༩ ཕྱི་ཚེས་ ༨ ཉིན་༧གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨེ་ཤི་ཡའི་ནང་པའི་དད་ལྡན་ཆོས་ཞུ་བ་ཚོར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་འཕྲོ་སྐྱོང་མཛད་པ་དང་ཆབས་ཅིག སྔ་དྲོའི་ཆོས་ཐུན་སྐབས་༧གང་ཉིད་མཆོག་གིས་འགྲོ་བ་མི་ཚང་མ་མའི་བྱམས་སྐྱོང་འོག་འཚར་ལོང་བྱུང་བ་གཅིག་མཚུངས་ཡིན་སྟབས། ང་ཚོ་དང་ཁོང་ཚོ་ཞེས་དབྱེ་འབྱེད་ཀྱི་བློ་དེ་དོར་ནས་འགྲོ་བ་མིའི་ལྷན་སྐྱེས་སུ་ཡོད་པའི་འགྲོ་མི་གཅིག་གྱུར་གྱི་འདུ་ཤེས་ལྡན་པའི་སྤྱི་ཚོགས་ཤིག་བསྐྲུན་དགོས་གལ་ཡིན་པ་བཀའ་གནང་སོང་བ་མ་ཟད། གཞན་ཡང་སྐབས་དེར་དབུ་མ་རིན་ཆེན་ཕྲེང་བའི་གཞུང་ལས་འཕྲོས་ནས་བདེན་བཞི་དང་རྒྱུ་འབྲས་སོགས་ཀྱི་སྐོར་ལ་བཀའ་ཁྲིད་བསྩལ་གནང་ཡོད། ཁ་སང་དང་དེ་རིང་བཅས་སུ་མགོན་པོ་མཆོག་གིས་སྒོམ་རིམ་བར་པ་དང་དབུ་མ་རིན་ཆེན་ཕྲེང་བའི་བཀའ་ཆོས་བསྩལ་ཡོད་པ་དང་། གཞུང་དེ་དག་གྲུབ་རྗེས་༸གང་ཉིད་མཆོག་གིས་ལག་ལེན་སོ་བདུན་མ་དང་སྤྱོད་འཇུག་གི་བསྔོ་བའི་ལེའུ་ནས་ཆོས་འབྲེལ་མུ་མཐུད་བསྐྱང་གི་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་ཐོག་ཆོས་ཞུ་བ་ཚོར་ཆོས་དད་ཡོད་མིན་ལ་མ་ལྟོས་པར་ཀུན་ལ་འགྲོ་བ་མི་གཅིག་གྱུར་གྱི་འདུ་ཤེས་འཛིན་ཏེ་བྱམས་བརྩེའི་ཐོག་ནས་སྐྱོང་དགོས་པ་བཀའ་སྩལ་ཡོད་པ་རེད། དེ་རིང་ཟླ་ ༩ ཕྱི་ཚེས་ ༧ཉིན་སྔ་ཐོག་ཚོུད་ ༨།༠༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དྷ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆེད་དུ་བྱ་བའི་འདུལ་བྱ་ཨེ་ཤ་ཡའི་ནང་པའི་དད་ལྡན་ ༨༠༠ གཙོས་པའི་ཕྱི་ནང་གི་ཆོས་ཞུ་བ་ ༦༠༠༠ ལྷག་ལ་ཆོས་འབྲེལ་དབུ་འཛུགས་བསྐྱངས་སོང། ༸གོང་ས་༸སྐྱབས་མགོན་པོ་མཆོག་ནས་ཐེངས་འདིའི་བཀའ་ཆོས་སྐབས་ལྷོ་ཤར་ཨེ་ཤེ་ཡའི་ནང་པའི་དད་ལྡན་པ་ཚོས་༸གང་ཉིད་མཆོག་ལ་ཇི་ལྟར་གསོལ་འདེབས་ཞུ་དོན་ལྟར། མགོན་པོ་མཆོག་ནས་དད་ལྡན་ཆོས་ཞུ་བ་མང་ཚོགས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་བཅུ་པ་ནས་འཕྲོ་སྐྱོང་གི་ཆོས་འབྲེལ་དང་། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ། དབུ་མའི་ཤིང་རྟ་སྲོལ་འབྱེད་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ། དེ་བཞིན་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་བཀའ་ཆོས་མཛད་རྒྱུ་ཡིན་འདུག དེ་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ནས་ཆེས་ཐོག་མར་ཆོས་ཞུ་བ་ཚོར་སྔོན་འགྲོའི་ཆོས་བཤད་སྩལ་སྐབས་ད་ལན་གྱི་ཆོས་འབྲེལ་འདིར་ཡུལ་གྲུ་འདྲ་མིན་གྱི་ནང་པའི་དད་ལྡན་པ་ཁག་ཅིག་ལྷན་འཛོམས་ཀྱིས་དུས་གཅིག་ལ་གསུང་ཆོས་ཞུ་ཆེད་བཅར་བར་མགོན་པོ་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་སྐོར་བཀའ་གནང་བ་དང་སྦྲགས། ཆོས་ཞུ་བའི་ངོས་ནས་ཆོས་འབྲེལ་འདི་གཙོ་བོ་སློབ་སྦྱོང་གནང་སླད་ཡོང་བར་དགོངས་ནས་དམིགས་བསལ་གྱི་ཐུགས་སྣང་གནང་དགོས་གལ་ཆེ་བའི་སྐོར་ལ་བཀའ་སློབ་སྩལ་བ་མ་ཟད། འཛམ་གླིང་འདིའི་སྟེང་ཡོད་པའི་སྲོག་ཆགས་རིགས་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་ཡིན་ཀྱང། སྲོག་ཆགས་དེ་ཚོར་འགྲོ་བ་མི་ལྟ་བུའི་བླང་དོར་འབྱེད་པའི་ཤེས་རབ་ཀྱི་རྣམ་དཔྱོད་མེད་སྟབས། ང་ཚོ་འགྲོ་བ་མིས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཔྱད་ནས་བདེ་སྡུག་གཉིས་ཀྱི་རྒྱུ་རྐྱེན་གང་ཡིན་ངོས་འཛིན་པའི་ཐོག་སྡུག་བསྔལ་གྱི་རྩ་བ་སེལ་ཐབས་སུ་འབད་པ་གང་ཆེ་གནང་དགོས་པའི་བཀའ་སློབ་ཕེབས་དང། ལྷག་དོན་མགོན་པོ་མཆོག་གིས་ད་ཆ་འཛམ་གླིང་འདིིའི་སྟེང་འགྲོ་བ་མི་དུང་ཕྱུར་ ༧༠ ལྷག་ཡོད་པའི་ནང་ནས་དུང་ཕྱུར་ ༡༠ ལྷག་ཆོས་དད་མེད་མཁན་གྱི་གྲངས་འབོར་ཆགས་ཡོད། འོན་ཀྱང་ཆོས་ཁས་བླངས་མིན་ལ་མ་ལྟོས་པར་ཚང་མ་བྱམས་བརྩེ་འདོད་པ་འབའ་ཞིག་ཡིན་པས་ཆོས་དང་མ་འབྲེལ་བའི་ཡ་རབས་བཟང་སྤྱོད་ཐོག་ནས་མིའི་སྤྱི་ཚོགས་དེ་བྱམས་བརྩེ་ལྡན་པའི་སྤྱི་ཚོགས་ཤིག་ཏུ་བསྐྲུན་དགོས་པའི་སྐུལ་ལྕག་སོགས་གནང་སོང། གཞན་ཡང་༸གང་ཉིད་མཆོག་གིས་འཛམ་གླིང་འདིའི་སྟེང་ཡོད་པའི་ཆོས་ལུགས་ཚང་མའི་ནང་ལ་བྱམས་བརྩེ་སྐོར་གསུངས་ཡོད་པས་སྤྱི་ཚོགས་ལ་ཕན་པ་གཅིག་མཚུངས་སྒྲུབ་བཞིན་ཡོད་པར་ཤེས་པའི་ཐོག་ནས་ཆོས་ལུགས་ཕན་ཚུན་དབར་མཐུན་སྒྲིལ་དང་ཚང་མར་གུས་བརྩི་དགོས་པའི་སྐོར་ལའང་བཀའ་སློབ་ཟབ་མོ་ཕེབས་སོང། སྔོན་འགྲོའི་ཆོས་བཤད་གྲུབ་ཟིན་རྗེས་༸གང་ཉིད་ཀྱིས་ཆོས་ཞུ་བ་ཚོར་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་དང། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་གཉིས་ཟུང་འབྲེལ་ཐོག་ནས་བཀའ་ཆོས་མཛད་སོང་། རྩ་བའི་ད་ལན་གྱི་ཆོས་འབྲེལ་སྐབས་ཀོ་རི་ཡ། ཝི་ཏི་ནམ། ཨིན་དྷོ་ནེ་ཤི་ཡ། མ་ལ་ཤི་ཡ། ཐའེ་ལན་ཌི་དང་དེ་བཞིན་སིངྒ་པུར་སོགས་ལྷོ་ཤར་ཨེ་ཤེ་ཡའི་ཆོས་ཞུ་བ་ ༨༠༠ གཙོས་པའི་རྒྱལ་ཁབ་ ༧༠ ནས་ཆོས་ཞུ་བ་ཁྱོན་མི་གྲངས་ ༦༠༠༠ ལྷག་བཅར་ཡོད་པ་མ་ཟད། ཐེངས་འདིའི་ཆོས་འབྲེལ་སྐབས་དམིགས་བསལ་དེ་སྔ་དང་མི་འདྲ་བར་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཆོས་སྩལ་བའི་ཐོག་ལ་དོགས་འདྲི་དང་ཉིན་རྒྱབ་ཆོས་རྭའི་ནང་དུ་ནང་པའི་དགེ་བཤེས་ཁག་ཅིག་བཀོད་སྒྲིག་འོག་ཆོས་ཞུ་བ་རྣམས་ནས་སྦྱང་བཤད་གནང་གི་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དྷ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆེད་དུ་བྱ་བའི་འདུལ་བྱ་ཨི་ཤ་ཡའི་ནང་པའི་དད་ལྡན་ཚོ་གཙོས་པའི་ཕྱི་ནང་གི་ཆོས་ཞུ་བ་ཚོར། ཟླ་འདིའི་ཕྱི་ཚེས་ ༧ ནས་ ༡༠ བཅས་ཉིན་བཞིའི་རིང་གསུང་ཆོས་བཀྲིན་བསྩལ་རྒྱུ་རེད་འདུག ད་ལན་གྱི་བཀའ་ཆོས་དེ་ལྷོ་ཤར་ཨེ་ཤེ་ཡའི་ནང་གི་ནང་པའི་དད་ལྡན་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་ནས་དད་ལྡན་ཆོས་ཞུ་བ་མང་ཚོགས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ལེའུ་བཅུ་པ་ནས་འཕྲོ་སྐྱོང་གི་ཆོས་འབྲེལ་དང་། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པ། དབུ་མའི་ཤིང་རྟ་གསོལ་བྱེད་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ། དེ་བཞིན་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་གསུང་ཆོས་བཀའ་དྲིན་ཆེ་བ་བསྩལ་གནང་མཛད་རྒྱུ་ཡིན་འདུག    

 བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནཱ་སིག་ནང་གི་མཛད་འཕྲིན་ཁག་ལེགས་པར་གྲུབ་བསྟུན། བཞུགས་སྒར་དུ་ཞབས་སོར་བདེ་བར་འཁོད་པ་མཛད་སོང། དེ་རིང་ཟླ་ ༩ ཕྱི་ཚེས་ ༡ ཉིན་དགུང་ཚོུད་ ༡༢།༣༠ ཐོག་མགོན་པོ་༸གང་ཉིད་མཆོག་ཆིབས་སྒྱུར་སྐབས་བཞུགས་སྒར་ཕེབས་ལམ་གྱི་གཡས་གཡོན་དུ་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་དང་དྲི་ཞིམ་གྱི་དུག་སྤོས་དང་བཅས་དགའ་དད་སྤྲོ་གསུམ་གྱི་ངང་ནས་མགོན་པོ་མཆོག་ལ་ཕེབས་བསུ་ཞུས་སོང། གཞི་རྩའི་༸གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་མ་ཧཱརཱཤྚ་མངའ་སྡེའི་ནཱ་སིག་ཀུཾབྷ་དུས་ཆེན་ཐོག་ཆིབས་བསྒྱུར་བསྐྱང་སླད་ཟླ་ ༨ ཕྱི་ཚེས་ ༢༩ ཉིན་བཞུགས་སྒར་ནས་ཕེབས་ཐོན་གནང་སྟེ་ཕྱི་ཚེས་ ༣༠ ཉིན་ནཱ་སིག་ཁུལ་གྱི་རྩ་ཆེན་གྲོང་སྡེ་ Trimbakeshwar ནང་དུ་ཞབས་སོར་འཁོད་ཡོད་པ་རེད།  ༸གང་ཉིད་ནས་ཁུལ་དེར་རྟེན་གཞི་བྱས་པའི་ནག་པོའི་བུའི་བསྟི་གནས་ (Karshni Ashram) ནང་དུ་ཆིབས་སྒྱུར་མཛད་ནས་ནཱ་སིག་ (Nashik)  ཀུཾབྷ་དུས་སྟོན་ཐོག་ཆེད་ཕེབས་གནང་བའི་ཆོས་ལུགས་ཁག་གི་བླ་ཆེན་རྣམས་དང་ལྷན་མཇལ་གྱིས་ནང་པའི་ལྟ་གྲུབ་དང་ཧིན་དུའི་ལྟ་གྲུབ་དབར་བཀའ་བསྡུར་མཛད་པ་དང།  གསར་འགོད་ལྷན་ཚོགས་ཐོག་བཀའ་འདྲི་ཞུས་པར་བཀའ་ལན་དུ་མགོན་པོ་༸གང་ཉིད་མཆོག་དེ་རིང་ནཱ་སིག་ཀུམ་བྷ་དུས་སྟོན་ཐོག་ཕེབས་དོན་གཙོ་བོ་ནི་ཆོས་ལུགས་ཁག་གི་བླ་ཆེན་རྣམ་པ་དང་མཇལ་འཕྲད་གནང་སྟེ་འཛམ་བུ་གླིང་འདིའི་ཐོག་ཞི་བདེ་རྒྱ་ཁྱབ་གནང་སླད་ཆེད་ཕེབས་གནང་སྐོར་གསུངས་འདུག ཉིན་དེའི་ཕྱི་དྲོ་མགོན་པ་༸གང་ཉིད་མཆོག་ནས་ཁུལ་དེར་རྟེན་གཞི་བྱས་པའི་ལོ་ངོ་ ༣༥༠ ལྷག་གི་སྔོན་ནས་ཡོད་པའི་ཧིན་དུའི་བསྟི་གནས་ཤིག་ཏུ་ཆིབས་སྒྱུར་གྱིས་མཆོད་ཡོན་གྱི་ཆོས་འབྲེལ་ཐོག་དབུ་བཞུགས་མཛད་ཡོད་པ་རེད། ཁ་སང་ཟླ་ ༨ ཚེས་ ༣༡ ཉིན་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་ཀུམ་བྷ་དུས་སྟོན་ཐོག་དབུ་བཞུགས་མཛད་པ་དང་། དེ་རྗེས་ཚོུད་ ༡༠།༠༠ ནས་ ༡།༠༠ ཧིན་དུའི་ཆོས་དཔོན་གྲགས་ཅན་ཁག་ཅིག་དང་རྒྱ་གར་ལྷོ་ཕྱོགས་ནས་ཕེབས་པའི་བོད་བརྒྱུད་ནང་བསྟན་དགེ་འདུན་པ་ ༥༠ སྐོར་ཞིག་ལྷན་དུ་ཆོས་ལུགས་ཕན་ཚུན་མཐུན་སྒྲིལ་གྱི་བགྲོ་གླེང་ཐོག་དབུ་བཞུགས་གནང་སྟེ་བཀའ་སློབ་སྩལ་བ་བཅས་མཛད་འཕྲིན་ཁག་ལེགས་པར་གྲུབ་ནས་དེ་རིང་དྷ་སར་བཞུགས་སྒར་དུ་ཚུར་ཆིབས་སྒྱུར་བསྐྱངས་སོང།ཤེས་རྟོགས་བྱུང་བར་གཞིགས་ན། ཟླ་ ༩ ཕྱི་ཚེས་ ༧ ནས་ ༡༠ བཅས་ཉིན་བཞི་རིང་༸གོང་ས་༸སྐྱབས་མགོན་ཆེན་པོ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ཁང་དུ་ཨེ་ཤེ་ཡའི་ནང་པའི་དད་ལྡན་ཚོས་ཇི་ལྟར་གསོལ་འདེབས་ཞུ་དོན་ལྟར།  མང་ཚོགས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་དང་། སློབ་དཔོན་ཀ་མ ལ་ཤི་ལས་མཛད་པའི་སྒོམ་རིམ་བར་པ། དཔོལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ། དེ་བཞིན་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་གསུང་ཆོས་བཀའ་དྲིན་སྩལ་གནང་མཛད་རྒྱུ་ཡིན་འདུག

ཟླ་ ༨ ཕྱི་ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ Maharashtra མངའ་སྡེའི་ན་སིག་རྫོང་གི་རྩ་ཆེ་གྲོང་སྡེ་ Trimbakeshwar ནང་ཞབས་སོར་བདེ་བར་འཁོད་པ་དང་འབྲེལ་ཁུལ་དེའི་ནང་རྟེན་གཞི་བྱས་པའི་ Karshni Ashram ནང་ཆེད་ཕེབས་གནང་ཡོད་པ་རེད། དེ་རིང་ཟླ་ ༨ ཚེས་ ༣༡ ཉིན་ Swami .K.G. Maharaj མཆོག་གཙོས་ཀུཾབྷ་དུས་སྟོན་ཐོག་ཆེད་ཕེབས་གནང་བའི་ཆོས་ལུགས་ཁག་གི་བླ་ཆེན་རྣམས་དང་ལྷན་མཇལ་གནང་འདུག སྐབས་དེར་མགོན་པོ་མཆོག་ནས་རྒྱ་གར་གྱི་ཡང་དག་པའི་མང་གཙོའི་ལམ་ལུགས་ལ་ཆེ་བསྟོད་མཛད་འདུག་པ་དང། ༸གང་ཉིད་ཆོག་ནས་རྒྱ་གར་ནང་ཞི་བདེ་ལྷིང་འཇགས་ཡོད་པའི་རྒྱུ་མཚན་གཙོ་བོ་ནི་རྒྱལ་ཁྱབ་དེའི་མང་གཙོའི་ལམ་ལུགས་དང་དེའི་རིན་ཐང་ཁག་ལ་བརྟེན་ནས་བྱུང་བ་ཞིག་ཡིན་པ་དང་།ལྷག་དོན་ཁྱིམ་མཚེས་རྒྱལ་ཁབ་ཁག་དང་བསྡུར་ན་རྒྱ་གར་ནང་ཆོས་ལུགས་དང་རིགས་རུས་མི་གཅིག་པའི་མི་མང་རྣམས་ཞི་བདེ་དང་མཐུན་འགྲིག་ལྡན་པའི་ངང་གནས་ཐུབ་པ་དེ་མང་གཙོའི་དགེ་མཚན་ཞིག་ཡིན་པར་གསུངས་འདུག ༸གོང་ས་མཆོག་ནས་ Guru Sharananand དང། Swami Parmanand དེ་བཞིན་ Swami Gyananand རྣམ་པ་ཚོ་དབུས་པའི་བླ་ཆེན་ཁག་གི་ལྷན་དུ་ཧིན་དུ་དང་ནང་པའི་ཆོས་ལུགས་ཀྱི་ལྟ་གྲུབ་ཐོག་བཀའ་བསྡུར་མཛད་འདུག་པ་དང་། ཕྱི་དྲོ་ཁུལ་དེར་རྟེན་གཞི་བྱས་པའི་ལོ་ངོ་ ༣༥༠ ལྷག་གི་སྔོན་ནས་ཡོད་པའི་ཧིན་དུའི་བསྟ་གནས་ཤིག་ཏུ་ཆིབས་སྒྱུར་གྱིས་མཆོད་ཡོན་གྱི་ཆོས་འབྲེལ་ཐོག་དབུ་བཞུགས་མཛད་འདུག དེ་བཞིན་མགོན་པོ་༸གང་ཉིད་མཆོག་དེ་རིང་ན་སིག་ཀུམ་བྷ་དུས་སྟོན་ཐོག་ཕེབས་དོན་གཙོ་བོ་ནི་ཆོས་ལུགས་ཁག་གི་བླ་ཆེན་རྣམ་པ་དང་མཇལ་འཕྲད་གནང་སྟེ་འཛམ་བུ་གླིང་འདིའི་ཐོག་ཞི་བདེ་རྒྱ་ཁྱབ་གནང་སླད་ཆེད་ཕེབས་གནང་སྐོར་གསུངས་པ་དང། ལྷན་ཅིག་མགོན་པོ་མཆོག་ནས་རྣམ་ཀུན་རྒྱ་གར་དེ་བཞིན་ཆོས་ལུགས་རིས་མེད་ཀྱི་རྒྱལ་ཁབ་ཡང་དག་ཞིག་ཡིན་པར་ཆེ་བསྟོད་གནང་གི་ཡོད་པའི་བཀའ་སྩལ་འདུག དེ་རིང་ཟླ་ ༨ ཚེས་ ༣༡ ཉིན་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་ཀུམ་བྷ་དུས་སྟོན་ཐོག་དབུ་བཞུགས་མཛད་པ་དང་། དེ་རྗེས་ཚོུད་ ༡༠།༠༠ ནས་ ༡།༠༠ ཧིན་དུའི་ཆོས་དཔོན་གྲགས་ཅན་ཁག་ཅིག་དང་རྒྱ་གར་ལྷོ་ཕྱོགས་ནས་ཕེབས་པའི་བོད་བརྒྱུད་ནང་བསྟན་དགེ་འདུན་པ་ ༥༠ སྐོར་ཞིག་ལྷན་དུ་ཆོས་ལུགས་ཕན་ཚུན་མཐུན་སྒྲིལ་གྱི་བགྲོ་གླེང་ཐོག་དབུ་བཞུགས་གནང་སྟེ་བཀའ་སློབ་བཀའ་དྲིན་ཆེ་བ་སྩལ་འདུག མཛད་འཆར་ལྷར་ན་དེ་རིང་ཕྱི་དྲོ་མགོན་པོ་༸གང་ཉིད་མཆོག་ Mumbai ནས་མཁའ་ལམ་བརྒྱུད་བཞུགས་སྒར་དྷ་སར་ཆེབས་ཁ་བསྒྱུར་གནང་རྒྱུ་རེད་འདུག རྩ་བའི་༸གོང་ས་མཆོག་ནས་ཀུམ་བྷ་དུས་ཆེན་ཐོག་ལ་ཆིབས་སྒྱུར་གནང་བ་དེ་ཐེངས་གསུམ་པ་དེ་ཆགས་ཡོད་པ་དང། འདི་ལོ་ན་སིག་ནང་གྱི་ཀུམ་བྷ་དུས་ཆེན་ཐོག་ཆིབས་སྒྱུར་བསྐྱངས་པ་ཆེས་ཐོག་མ་དེ་ཆགས་ཡོད་རེད་འདུག

ཕྱི་ལོ་༢༠༡༦ལོའི་དུས་འཁོར་དབང་ཆེན་གསོལ་འདེབས་དང་གོ་སྒྲིག་ཞུ་མཁན་བོད་མིའི་སྒྲིག་འཛུགས་ནས་༸གོང་ས་༸སྐྱབས་མགོན་ཆེན་པོ་མཆོག་མཛད་བྲེལ་ཧ་ཅང་ཆེ་བ་སོགས་ལ་གཞིགས་ནས་དུས་དབང་ལོ་གཅིག་ཕར་འགྱངས་གནང་འདུག དེ་རིང་ཟླ་ ༨ ཕྱི་ཚེས་ ༣༡ ཉིན་སྔ་ཐོག་བཞུགས་སྒར་ཕྱི་དྲིལ་ལས་ཁུངས་སུ་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི། དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་ལྷན་རྒྱས་ནས་དེ་འབྲེལ་གནད་དོན་ཐད་ཡོངས་ཁྱབ་གསར་འགོད་གསལ་བསྒྲགས་ཤིག་བསྐོང་ཚོགས་གནང་ཡོད་པ་རེད། སྐབས་དེར་སྲིད་སྐྱོང་མཆོག་གིས་རྐང་དད་ལྡན་ཆོས་ཞུ་བ་ཀུན་ལ་གནས་མཆོག་རྡོ་རྗེ་གདན་དུ་འཚོག་རྒྱུའི་དུས་དབང་ཐེངས་སོ་བཞི་པའི་སྐོར་གོ་སྒྲིག་ཚོགས་ཆུང་ནས་གསལ་བསྒྲགས་སྔ་རྗེས་སྤེལ་ཟིན་ཀྱང། ད་རེས་བོད་གཞིས་གཉིས་ཀྱི་ཐུགས་ཁུར་ཅན་དང། ཁྱད་པར་དུ་འདི་ལོ་༸སྐུའི་གྱ་སྟོན་སྐབས་བོད་ཀྱི་ཆོས་བརྒྱུད་ཁག་གི་དབུ་འཁྲིད་བསྟན་བདག་བླ་ཆེན་རྣམ་པས་གསོལ་འདེབས་ཞུ་སྐུལ་ལྟར། འདི་ལོ་མགོན་པོ་མཆོག་གི་མཛད་འཆར་དེ་སྔར་དང་མི་འདྲ་བའི་ཧ་ཅང་མང་བའི་རྐྱེན། བོད་མིའི་སྒྲིག་འཛུགས་ནས་དུས་དབང་ཕར་འགྱངས་ཡོང་བའི་ལྷ་སྙན་གསོལ་འདེབས་ཞུས་རྗེས། བཀའ་བཞེས་བཟང་པོ་སྩལ་ཐོབ་སྟེ་ ༢༠༡༦ལོའི་དུས་འཁོར་དབང་ཆེན་དེ་བཞིན་ལོ་གཅིག་ཕར་འགྱངས་གནང་ཡོད་སྐོར་གསུངས་ཡོད་པ་རེད། ད་དུང་སྲིད་སྐྱོང་མཆོག་གིས་དུས་དབང་ཕར་འགྱངས་ཞུས་པ་དེས་༸གོང་ས་མཆོག་ལ་མཛད་དཀའ་མི་ཡོང་བ་དང། སྤྱི་ཡོངས་ཀྱི་དགེ་མཚན་ལ་གཞིགས་ཏེ་འགྱུར་བ་གནང་བ་ཞིག་ཡིན་ནའང། འདིའི་བར་ན་མང་པོ་ཞིག་ལ་དོ་ཕོག་ཡོང་ངེས་ཡིན་སྟབས། བཀའ་ཤག་ནས་དེ་དོན་བཟོད་གསོལ་ཡོད་པ་གསུངས་ཡོད། རྩ་བའི་གོ་སྒྲིག་ཚོགས་ནས་ད་བར་རྡོ་རྗེ་གདན་དུ་འཚོག་རྒྱུའི་དུས་འཁོར་དབང་ཆེན་དེ་དང་འབྲེལ་བའི་དྲ་རྒྱ་གསར་བཟོ་དང་དྲིལ་བསྒྲགས་གནས་ཚུལ་སོགས་སྔོན་སོང་ཟིན་ཀྱང། དེ་རིང་སྔ་ཐོག་གི་གསར་འགོད་ལྷན་ཚོགས་དེའི་ཐོག་དུས་ཡུན་ཕར་འགྱངས་གནང་དགོས་དོན་སྐོར་ཙམ་ལས་གསར་འགོད་པ་དང་དྲི་བ་དྲི་ལན་གྱི་གོ་སྐབས་བྱུང་མེད་པ་རེད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་༡༩༥༤ནས་ད་བར་ལ་དཔལ་དུས་ཀྱི་འཁོར་ལོའི་དབང་ཆེན་ཐེངས་སུམ་ཅུ་སོ་གསུམ་བཀྲིན་བསྩལ་ཡོད་པ་དང། དེའི་ཁྲོད་གནས་མཆོག་རྡོ་རྗེ་གདན་དུ་དུས་དབང་ཐེངས་བཞི་བསྩལ་འདུག

དེ་རིང་ཟླ ༨ ཕྱི་ཚེས་ ༣༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག ༢༠༡༦ ལོ འི་དུས་འཁོར་དབང་ཆེན་ལོ་གཅིག་ཕར་འགྱངས་སོང་ཡོད་པའི་གསར་འགོད་གསལ་བསྒྲགས་སྤེལ་བ།