རྒྱལ་སྤྱི།

ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་གཞུང་གི་ཁུང་རྩི་སློབ་གླིང་སྒོ་འབྱེད་གཉེར་བའི་ཉིན་མོར་ཕ་རན་སི་བོད་རང་བཙན་སློབ་ཕྲུག་ཚོགས་པ་དང་བོད་དོན་རྒྱབ་སྐྱོར་བས་ཁུལ་དེའི་གྲོང་ཁྱེར་སྤྱི་ཁྱབ་དང་ཆེས་སྡུག་རྩུབ་ཆེ་བའི་དབང་ཆ་གཅིག་བསྡུས་རིང་ལུགས་རྒྱ་ནག་གཉིས་དབར་གྱི་ལག་འབྲེལ་གྱིས་བྱ་སྤྱོད་སྤེལ་བར་ངོ་རྒོལ་གྱི་ལས་འགུལ་ཤུགས་ཆེ་གནང་འདུག ཁ་སང་ཕྱི་ཚེས་ ༢༨ ཉིན་གྱི་ཕྱི་དྲོ་ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་ནག་གཞུང་ཚབ་པ་ Lu Shaye དང་ Pau གྲོང་ཁྱེར་སྤྱི་ཁྱབ་པ་ Francois Bayrou ལྷན་འཛོམས་ཐོག་གྲོང་ཁྱེར་དེར་རྟེན་གཞི་བྱས་པའི་ Pau གཙུག་ལག་སློབ་གཉེར་ཁང་དུ་ཁུང་རྩི་སློབ་གཉེར་སྒོ་འབྱེད་གཉེར་འདུག་པ་དང། སྐབས་དེར་བོད་རང་བཙན་སློབ་ཕྲུག་ཚོགས་པ་དང། France Tibet ཞེས་པའི་བོད་དོན་རྒྱབ་སྐྱོར་ཚོགས་པ། དེ་བཞིན་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་པ་བཅས་ཀྱིས་བོད་ཀྱི་རྒྱལ་དར་དང། རྒྱ་གཞུང་གི་བྱ་སྤྱོད་ལ་སྐྱོན་བརྗོད་ཀྱི་ཕྲེད་དར་སོགས་བསྣམས་ཏེ་ཁུང་རྩི་སློབ་གླིང་ནི་རྒྱ་ནག་བཙན་རྒྱལ་རིང་ལུགས་ཀྱི་ལག་ཆ་གཙོ་བོ་རེད་ཅེས་ངོ་རྒོལ་གནང་འདུག སྐབས་དེར་འདི་ག་རླུང་འཕྲིན་ཁང་ནས་ཕ་རན་སི་བོད་རང་ཙན་སློབ་ཕྲུག་ཚོགས་པའི་ལས་འགུལ་བ་བསྟན་རྣམ་ལགས་ལ་གནས་འདྲི་ཞུས་པར་ཉེ་བའི་ལོ་ཤས་ནང་དུ་ཨ་མི་རི་ཀ་གཙོས་མང་གཙོའི་རྒྱལ་ཁབ་ཆེས་གྲས་ཁག་ཏུ་ཁུང་རྩི་སློབ་གླིང་དོག་ཟོན་གྱི་སྒོ་རྒྱག་བཞིན་པའི་གནས་སྟངས་འབྱུང་བཞིན་ཡོད་པ་དེ་ལྟར་ཡང། ཕ་རན་སི་ནང་དུ་ཆ་མཚོན་ན་ཉེ་བའི་ལོ་ཤས་ནང་ཁུང་རྩི་སློབ་གླིང་ལྟེ་གནས་ཁང་མང་དུ་འགྲོ་བཞིན་འདུག་ཅེས་ངོ་སྤྲོད་གནང་སོང་། རྩ་བའི་རྒྱ་ནག་གཞུང་འབྲེལ་གྱི་ཁུང་རྩི་སློབ་གླིང་ཞེས་པ་དེ་ནི་ཕྱིའི་རྒྱལ་ཁབ་ཁག་གི་མཐོ་སློབ་ཁག་ཏུ་རྒྱ་སྐད་དང་རྒྱ་ཡིག་སློབ་ཁྲིད་བྱེད་ཚུལ་གྱི་མིང་ཐོག་ནས་མཐོ་སློབ་ཁག་གི་ཤེས་ཡོན་སློབ་གསོའི་རང་དབང་ལ་ཐེ་གཏོགས་དང་འབྲེལ་རྒྱ་ནག་དམར་ཤོག་གི་ལྟ་སྤྱོད་དར་སྤེལ་དང་རྒྱལ་སྤྱིའི་ཁྲོད་རྒྱ་ནག་ལ་ལྟ་ཕྱོགས་འགྱུར་བ་གཏོང་ཐབས་བྱེད་བཞིན་པའི་རྒྱ་ནག་གི་འཇམ་པོའི་སྟོབས་ཤུགས་ལག་ཆ་གཙོ་བོ་ཞིག་ཆགས་ཀྱི་ཡོད་པ་རེད། བརྒྱུད་ལམ་ཁག་ཏུ་ཐོན་པར་གཞིགས་ན་ཁ་སང་སྒོ་འབྱེད་བྱས་པའི་ཁུང་རྩི་སློབ་གླིང་ཁང་དེ་ཕ་རན་ནང་དུ་ཁུང་རྩི་སློབ་གླིང་ ༢༠ པ་དེ་ཆགས་ཀྱི་ཡོད་པ་རེད་འདུག ད་རེས་གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་ཀྱི་ཉིིན་གཉིས་ཀྱི་སྔ་རོལ་དུ་ལས་འགུལ་སྤེལ་མཁན་འབྲེལ་ཡོད་ཚོགས་པ་ཁག་ནས་མཉམ་འབྲེལ་གྱིས་ཐེངས་དེའི་ཤེས་ཡོན་མཉམ་འབྲེལ་གྱི་ལས་དོན་ལ་ངོ་རྒོལ་ཀྱིས་གསར་འགོད་གསལ་བསྒྲགས་ཤིག་ཀྱང་སྤེལ་འདུག གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་བྱས་པའི་ཉིན་མོ་དེ་ནས་ཁུལ་དེའི་ནང་གི་ཤེས་ཡོན་གྱི་རང་དབང་ལ་དོ་ཕོག་འགྲོ་ཉེན་ཡོད་པ་དང། ལྷག་པར་དུ་ལན་ཁུང་རྩི་སློབ་ཁང་དང་ལག་འབྲེལ་བྱས་པ་འདིས་རྒྱ་ནག་གི་བཙན་གནོན་འོག་ཡོད་པའི་བོད་དང་ཡུ་གུར་སོགས་ཀྱི་མང་ཚོགས་ཀྱི་རང་དབང་དང་ཐོབ་ཐང་ལ་ཁྱད་གསོད་བྱས་པ་ཞིག་ཡིན་སྐོར་འགྲེལ་བརྗོད་གནང་འདུག གཞི་རྩའི་ཁུང་རྩི་སློབ་གླིང་ཞེས་པའི་ལས་འཆར་འདི་ནི་རྒྱ་ནག་གཞུང་འབྲེལ་ཤེས་ཡོན་ལྷན་ཁང་འོག་ཕྱི་ལོ་༢༠༠༤ ལོར་དངོས་སུ་ཆེད་བཙུགས་བྱས་ནས་ད་ལྟའི་ཆར་ལྷོ་བྱང་ཨ་མི་རི་ཀ་དང་ཡོ་རོབ། ཨ་ཕི་རི་ཀ། དེ་བཞིན་ཨོ་སི་ཊོ་ལི་ཡ་བཅས་འཛམ་གླིང་གི་གླིང་ཆེན་དྲུག་ནང་དུ་ =ཁུང་རྩི་སློབ་གླིང་ལྟེ་གནས་ཁང་ ༥༣༠ ལྷག་ཆེད་བཙུགས་བྱས་ཟིན་འདུག་པ་དང། རྒྱ་ནག་གཞུང་གི་འཆར་གཞི་ལྷར་ཕྱི་ལོ་ ༢༠༢༠ ནང་ཚུད་ལ་འཛམ་གླིང་ནང་དུ་ཁུང་རྩི་སློབ་གླིང་ལྟེ་གནས་ཁང་ ༡༠༠༠ ཆེད་འཛུགས་བྱ་འཆར་ཡོད་པ་རེད་འདུག འོན་ཀྱང་འདས་པའི་ལོ་ཤས་ནང་དུ་ཨ་རི་དང་ཁེ་ན་ཌ་སོགས་ཀྱི་མཐོ་སློབ་ཁག་ནས་རྒྱ་ནག་གི་ཁུང་རྩི་སློབ་གླིང་ལས་དོན་ལ་དོག་ཟོན་གྱིས་སྒོ་བརྒྱབ་པའི་གནས་ཚུལ་བྱུང་ཡོད་པ་རེད། དེ་བཞིན་ཨ་རིའི་ནང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འདི་ལོའི་ཕྱི་ཟླ་གསུམ་པའི་ནང་རྒྱ་ནག་གིས་ཐབས་བརྒྱ་བྱུས་སྟོང་གིས་ཁུང་རྩི་ཤེས་ཡོན་ལྟེ་གནས་ཆེད་འཛུགས་ཀྱིས་ཕྱི་ཕྱོགས་སུ་རྒྱ་ནག་གི་གནོད་ཤུགས་ཁྱབ་སྤེལ་དང་ཤེས་ཡོན་གྱི་རང་དབང་ཉམ་དམས་སུ་གཏོང་བཞིན་ཡོད་པ་གསལ་འདོན་དང་སྦྲགས། ཕྱི་ཕྱོགས་ཀྱི་མཐོ་སློབ་དང་གཙུག་ལག་སློབ་ཆེན་སོགས་ཀྱིས་ལག་བསྟར་བྱེད་དགོས་པའི་སྒྲིག་ཡིག་དོན་ཚན་བཅུ་གཉིས་ཅན་ཞིག་ཁྱབ་བསྒྲགས་ཀྱིས་རྒྱ་ནག་གི་གནོད་ཤུགས་ལ་བཀག་འགོག་བྱེད་དགོས་པ་ཡང་གསུངས་ཡོད་པ་རེད།

བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༠ འཁོར་བ་དང་བསྟུན་དུས་ཆེན་སྲུང་བརྩིའི་ཆ་ཤས་སུ་དེ་རིང་ཕྱི་ཟླ་ ༡༠ ཚེས་ ༢༨ ཉིན་གྱི་སྔ་དྲོ་ཚོུད་ ༡༠ པ་ཡོལ་ཙམ་ལ་བོད་ཀྱི་ཟློས་གར་ཚོགས་པའི་ཚོགས་ཁང་གསར་པར་བོད་ཀྱི་སྲིད་བྱུས་ཉམས་ཞིབ་ཁང་དང་ ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་ལོ་རྒྱུས་སྨྲ་བ་མཁས་དབང་བཀྲིས་ཚེ་རིང་ལགས་ཀྱིས་གོ་སྒྲིག་གནང་ཐོག་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོའི་དབུ་འབྱེ་མཛད་སྒོ་ཞིག་བསྐོང་ཚོགས་གནང་སོང་བ་དང་། སྐབས་དེར་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོས་པའི་སྲིད་སྐྱོང་མཆོག་དང་ཕྱག་སྦྲེལ་བཀའ་བློན་རྣམ་པ། བོད་ཀྱི་ཟློས་གར་ཚོགས་པའི་སློབ་ཟུར་བཅས་ཁྱོན་མི་གྲངས་བརྒྱ་ཕྲག་ཁ་ཤས་ཤིག་འདུ་འཛོམས་གནང་སོང་། སྐབས་དེར་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་ཐེངས་འདིའི་མཛད་སྒོའི་སྐུ་མགྲོན་གཙོ་བོ་དང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་སྐལ་བཟང་གོ་སྐབས་བྱུང་ཞེས་གསུངས་ཏེ་སྐབས་དེར་༸གོང་ས་མཆོག་གིས་བྱམས་པ་དང་བརྩེ་བ། དྲང་བདེན་གྱི་ཐོག་ནས་སྤྱི་ཚོགས་ནང་གི་སེམས་ཅན་རྣམས་ཕན་ཚུན་གཅིག་ལ་གཅིག་བརྟེན་ཐོག་ནས་གནས་དགོས་གལ་གྱི་བཀའ་བསྩལ་སྐོར་གསུངས་པ་དང་འབྲེལ། མགོན་པོ་མཆོག་ནི་འཛམ་གླིང་སྤྱིར་མིག་ལྟོས་བཟང་ཤོས་ཤིག་དང་འཛམ་གླིང་འདིའི་ནང་༸གོང་ས་མཆོག་ལས་སྙིང་སྟོབས་ཆེ་བ་སུ་གང་ཡང་མེད་པ་མ་ཟད་བོད་ཀྱི་གནད་དོན་དང་འབྲེལ་བའི་མ་འོངས་བོད་ཀྱི་མདུན་ལམ་ཐད་ལའང་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པའི་དབུ་ཁྲིད་གཞན་མེད་པ་གསུངས་སོང་། ཁོང་གིས་བོད་ཀྱི་ཆོས་དང་རིག་གཞུང་། སྐད་ཡིག་བཅས་ནི་དམིགས་བསལ་ཞིག་ཡིན་པ་དང་བོད་ཀྱི་རིག་གཞུང་ལ་རྒྱ་ནག་གཞུང་ནས་དོ་ཕོག་ཤུགས་ཆེར་གཏོང་བཞིན་པར་ཨ་རིའི་གཞུང་ནས་གདུང་སེམས་མཉམ་བསྐྱེད་དང་འབྲེལ་ཏེ་རྒྱ་ནག་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩིས་རང་ཉིད་ཀྱི་ཁྲིམས་ལ་བརྩི་སྲུང་བྱས་ནས་ཆོས་དད་རང་དབང་ལ་སྲུང་སྐྱོབ་བྱེད་དགོས་པ་དང་། ༸ཀུན་གཟིགས་པཎ་ཆེན་དགེན་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པ། རིན་པོ་ཆེ་མཆོག་གི་ད་ལྟའི་གནས་བབས་རྣམས་ཇི་ལྟར་ཡིན་པ་ཁ་གསལ་འགྲེལ་བརྗོད་དགོས་པ་གསུངས་སོང་བ་མ་ཟད་རྒྱལ་སྤྱིའི་ཁྲོད་ཀྱི་ནང་པའི་ཡུལ་ལུང་སྟེ་ཐེ་ཝན་དང་ཝི་ཏི་ནམ། ཤྲི་ལངྒ་དང་སོག་པོ་བཅས་ནས་བོད་ནང་གི་ཆོས་དད་རང་དབང་ལ་དམ་དྲག་ཤུགས་ཆེར་བྱེད་བཞིན་པ་དང་དེའི་རྐྱེན་པས་གཞིས་བཞུགས་བོད་རིགས་ཚོར་དཀའ་ངལ་ཤུགས་ཆེར་འཕྲད་བཞིན་པ་ལ་གཟིགས་རྟོག་གནང་དགོས་པའི་སྐུལ་མ་གནང་སོང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོས་པའི་ཕྱག་སྦྲེལ་རྣམས་བོད་ཀྱི་ཟློས་སྒར་ཚོགས་པར་ཕེབས་མཁན་གྱི་སྐུ་མགྲོན་ཆེས་ཐོག་མ་ཙམ་མ་ཟད་དྷ་རྨ་ས་ལར་ཨ་རིའི་གཞུང་འབྲེལ་གྱི་ཆེས་མཐོ་མི་སྣ་དང་པོ་གྲས་སུ་ཕེབས་མཁན་ཞིག་ཡིན་པར་དགའ་བསུའི་འཚམས་འདྲི་ཞུས་པ་དང་འབྲེལ། ༸གོང་ས་མཆོག་གི་བཀའ་དགོངས་ལམ་སྟོན་འོག་བོད་ཀྱི་ཟློས་གར་ཚོགས་པ་ཐོག་མར་དབུ་བརྙེས་སྟངས་དང་རིམ་བཞིན་རྒྱལ་སྤྱིའི་ཁྲོད་ཁྱབ་སྤེལ་ཆེན་པོ་ཕྱིན་ཚུལ་སོགས་རྒྱབ་ལྗོངས་ཀྱི་ལོ་རྒྱུས་ཁག་ངོ་སྤྲོད་གནང་ཡོད། སྲིད་སྐྱོང་མཆོག་གིས་ཐེངས་འདིའི་དབུ་འབྱེད་མཛད་སྒོའི་ཐོག་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ཆེད་དུ་ཕེབ་ས་པ་ནི་ཆོས་དད་རང་དབང་ཞེས་པ་ནི་རྒྱལ་སྤྱིའི་རང་བཞིན་ཞིག་མཚོན་གྱི་ཡོད་པ་དང་། ལྷག་པར་དུ་རྒྱ་ནག་གཞུང་ལ་ཨ་རིའི་གཞུང་དེ་བོད་དང་མཉམ་དུ་ཡོད་པའི་བརྡ་ལན་ཞིག་སྤྲོད་ཀྱི་ཡོད་པ་རེད། བོད་ནང་གི་བོད་མི་ཚོས་དུས་རྟག་ཏུ་གཏམ་བཟང་ལ་ངང་སྒུག་གནང་དང་གནང་བཞིན་པར་རེ་བ་སྐྲུན་མཁན་ཞིག་དང་། བོད་མིར་གདུང་སེམས་མཉམ་བསྐྱེད་ཀྱི་མཚོན་དོན་ནམ་བརྡ་ལན་རླབས་པོ་ཆེ་ཞིག་ཡིན་སྐོར་གསུངས་སོང་། རྩ་བའི་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་དེ་ཉིན་གསུམ་གྱི་རིང་ གནང་གི་ཡོད་པ་དང་། སྐབས་དེར་བརྗོད་གཞི་མི་འདྲ་བ་དགུའི་ཐོག་དུ་མཁས་དབང་མི་སྣ་ ༢༣ ཙམ་ནས་གཏམ་བཤད་གནང་རྒྱུ་ཡིན་པ་དང་། སང་ཉིན་༸གོང་ས་སྐྱབསམགོན་ཆེན་པོ་མཆོག་ཆིབས་བསྒྱུར་གྱིས་བོད་ཀྱི་ཟློས་གར་ཚོགས་པའི་ཚོགས་ཁང་གསར་པ་དབུ་འབྱེད་རབ་གནས་མཛད་ཀྱི་ཡོད་པ་རེད།

ཁ་སང་ཕྱི་ཚེས་ ༢༣ ཉིན་ནས་བཞུགས་སྒར་༸རྒྱལ་བའི་ཕོ་བྲང་ནང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱལ་སྤྱིའི་རྒྱལ་ཁབ་འདྲ་མིན་ནང་ཞི་བདེ་དང་སྤྱི་ཚོགས་ལ་ཕན་པའི་ལས་འཆར་འགན་ཁུར་བ་ཁག་གཅིག་དང་ལྷན་དུ་དམིགས་བསལ་མཇལ་མོལ་གྱི་ལྷན་ཚོགས་ཐེངས་བཞི་པ་དེ་གནང་བཞིན་ཡོད་པ་ལྟར་དེ་རིང་ལྷན་ཚོགས་ཚོགས་ཀྱི་ཉིན་མཐའ་མའི་ཐོག་མགོན་པོ་༸གང་ཉིད་མཆོག་གིས་གཞོན་སྐྱེས་འགན་འཁུར་བ་རྣམས་ཀྱི་བཀའ་འདྲིར་བཀའ་ལན་བསྩལ་བར་ཆོས་ལུགས་ཕན་ཚུན་མཐུན་འབྲེལ་གནང་དགོས་པ་སོགས་ཀྱི་སློབ་གསོ་རིགས་སྤེལ་སྐབས་སུ་མི་གཞན་ལ་མི་གཞན་ལ་རང་ཉིད་ཆོས་དད་གང་ལ་ཡོད་པ་དེ་བྱེད་དགོས་པའི་སྐུལ་མ་གནང་རྒྱུ་མེད་ཅེས་ལམ་སྟོན་བསྩལ་སོང་། ལྷན་ཚོགས་ཐོག་ཕེབས་པའི་བྷར་མའི་གཞོན་སྐྱེས་མ་ཞིག་ནས་བྷར་མའི་ཤེས་ཡོན་སློབ་གསོའི་ཁྲོད་ལ་ཆོས་ལུགས་མཐུན་འབྲེལ་སྐོར་སློབ་ཁྲིད་གནང་གི་ཡོད་ཀྱང་རིམ་པས་སློབ་མཐར་སོན་པའི་གཞོན་སྐྱེས་མི་ཉུང་བ་ཞིག་དྲག་སྤྱོད་པའི་ལས་ཀར་ཞུགས་ཀྱི་ཡོད་སྐོར་འགྲེལ་བརྗོད་དང་སྦྲགས། གཞོན་སྐྱེས་ཁྲོད་དུ་དཀའ་ངལ་དེ་དག་སེལ་བར་གང་གནང་དགོས་སམ་ཞེས་བཀའ་འདྲི་ཞུས་པས་༸གོང་ས་མཆོག་གིས་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་ནང་པའི་ཆོས་འཁོར་ཁག་སྐོར་སྐབས་གདུལ་བྱའི་ཁམས་དང་མོས་པ་ལ་གཞིས་ཏེ་ཆོས་གསུངས་ཡོད་པ་ལྟར་གཞོན་སྐྱེས་ཚོར་ཆོས་ལུགས་མཐུན་འབྲེལ་སོགས་ཀྱི་ཐོག་སློབ་ཁྲིད་གནང་སྐབས་ཕ་རོལ་པའི་ཆོས་དད་གང་ལ་ཡོད་པ་དང་། མོས་པ་ཡོད་མེད་སོགས་ལ་དཔྱད་ནས་སློབ་ཁྲིད་གནང་དགོས་པ་ལས་མི་གཞན་ལ་རང་ཉིད་ཆོས་དད་གང་ལ་ཡོད་པ་དེ་བྱེད་དགོས་པའི་སྐུལ་མ་གནང་རྒྱུ་མེད་ཅེས་ལམ་སྟོན་བསྩལ་སོང་། མགོན་པོ་༸གང་ཉིད་མཆོག་གིས་གཞོན་སྐྱེས་འགན་འཁུར་བ་རྣམས་ནས་རྩོད་རྙོག་ཅན་གྱི་སོ་སོ་སྤྱི་ཚོགས་ནང་ཕྱག་ལས་གནང་སྐབས་བློ་མ་ཞུམ་པར་རྩོད་རྙོག་དང་དཀའ་ངལ་དེ་དག་གི་གཞི་རྩའི་རྒྱུ་རྐྱེན་གང་ཡིན་ཤེས་པའི་ཐོག་ནས་གཉེན་པོ་བསྟན་དགོས་པ་དང་ལྷག་པར་དུ་རྩོད་རྙོག་དང་ཟིང་འཁྲུག་རྐྱེན་པས་གནོད་སྐྱོན་དང་སེམས་ནད་རིགས་ཕོག་པའི་གཞོན་སྐྱེས་ཚོར་སློབ་གསོ་གནང་གནད་ཡིན་པའི་བཀའ་བསྩལ་ཡོད། དེ་བཞིན་སྐབས་དེར་གཞོན་སྐྱེས་ཁག་གཅིག་ནས་འཁྲུག་རྩོད་ཅན་གྱི་སྤྱི་ཚོགས་ནང་ཕྱག་ལས་གནང་སྐབས་སོ་སོའི་སེམས་ཀྱི་ཞི་བདེ་རྒྱུན་འཛིན་གནང་སྟངས་དང་། སྤྱི་ཚོགས་ཁྲོད་ཀྱི་ཞི་བའི་ལས་འགུལ་རྣམས་དྲག་པོའི་ལམ་དུ་མི་འགྲོ་བ་གནང་ཐབས་གང་ཡོད་དམ་ཞེས་སོགས་ཀྱི་ བཀའ་འདྲི་ཁག་གཅིག་ཞུས་ཡོད་པ་ལྟར། ༸གོང་ས་མཆོག་༸སྐུ་ཉིད་མཆོག་ནས་ཉིན་ལྟར་ཇི་སྲིད་ནམ་མཁའ་གནས་པ་དང༌། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་གསུངས་པ་བཞིན་ཐུགས་སྨོན་མཛད་བཞིན་པ་དེས་༸སྐུ་ཉིད་མཆོག་ལ་དགེ་མཚན་ཆེན་པོ་འབྱུང་བཞིན་པ་བཀའ་བསྩལ་དང་སྦྲགས། གཞོན་སྐྱེས་འགན་འཁུར་ཚོས་ལས་དོན་ཁྲོད་གཞན་ཕན་གྱི་བསམ་བློ་གཏང་ཐུབ་ཚེ་སོ་སོར་སེམས་ཤུགས་འཕར་མ་བསྐྱེད་པར་ཕན་ཐོགས་ཡོད་པ་དང་། སྤྱི་ཚོགས་ཁྲོད་ཞི་བའི་ལས་འགུལ་སྤེལ་སྐབས་བཟོད་བསྲན་ངང་རྒྱུད་རིང་པོ་ཐུབ་ན་ལས་འགུལ་དེ་དག་དྲག་པོར་མི་གྱུར་བའི་དགེ་མཚན་ལྡན་ངེས་ཡིན་ཞེས་ལམ་སྟོན་མཛད་ཡོད། དེ་བཞིན་ལྷོ་སུ་དཱན་ནས་ཡིན་པའི་བུ་མེད་ཅིག་གིས་༸གོང་ས་མཆོག་ལ་༸རྒྱལ་ཡུམ་ཆེན་མོ་མཆོག་གི་དྲུང་ནས་ཤུགས་རྐྱེན་གང་ཐེབས་ཡོད་དམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གི་༸སྐུ་ཚེའི་ནང་བྱམས་བརྩེའི་བསླབ་བྱ་གནང་མཁན་གྱི་དགེ་རྒན་དང་པོ་དེ་༸རྒྱལ་ཡུམ་ཆེན་མོ་མཆོག་ཞེས་བཀའ་བསྩལ་ཏེ་བེུད་མེད་རྣམས་རྒྱུན་དུ་སོ་སོའི་ནང་ཙམ་མ་ཟད་ཆེ་ས་ནས་སྤྱི་ཚོགས་ཀྱི་ལས་དོན་ནང་ཞུགས་ཏེ་འགྲོ་བ་མིའི་ལྷན་སྐྱེས་སུ་ཡོད་པའི་བྱམས་སྙིང་རྗེའི་རང་བཞིན་བཟང་པོ་དེ་དག་གོང་འཕེལ་ཐུབ་ཐབས་སུ་ཐུགས་འགན་ཆེ་ཙམ་བཞེས་དགོས་པའི་ལམ་སྟོན་བསྩལ་སོང་། ༸གོང་ས་མཆོག་གིས་ཐེངས་འདིའི་ལྷན་ཚོགས་ཐོག་ཕེབས་པའི་གཞོན་སྐྱེས་རྣམས་ནས་སྤྱི་ཚོགས་ཀྱི་རྩོད་རྙོག་དང་དཀའ་ངལ་མང་ཆེ་བ་མིས་བཟོས་པ་ཞིག་ཡིན་སྟབས་དཀའ་ངལ་དེ་དག་སེལ་བའི་ནུས་པ་མི་ཚོར་ཡོད་སྟབས་རྣམ་ཀུན་ནས་གོ་ལ་ཁྱོན་ལ་ཕན་པའི་བསམ་བློ་གཏང་དགོས། ལྷག་པར་དུ་འདས་ཟིན་པའི་དུས་ཚོད་ལ་ང་ཚོས་འགྱུར་བ་གཏང་ཐབས་མེད་ཀྱང་། མ་འོངས་པ་གང་འདྲ་ཞིག་ཆགས་མིན་ང་ཚོའི་ལག་ཏུ་ཡོད་པས་བཟང་ཕྱོགས་ཀྱི་འགྱུར་བ་ཞིག་གཏང་དགོས་པར་བཀའ་བསྩལ་ཡོད། ༸སྐུ་པར་ཁག་༸དཔལ་ལྡན་དགའ་ལྡན་ཕོ་བྲང་ཡིག་ཚང་།    

ཨ་རི་རྒྱལ་ས་ཝ་ཤིང་ཊོན་ནང་རྟེན་གཞི་བྱས་པའི་ White River High School ཞེས་པའི་གཞི་རིམ་སློབ་གྲྭའི་སློབ་ཕྲུག་དང་བྱམས་བརྩེ་ལྡན་པའི་སྤྱི་ཚོགས་སྐྲུན་སླད་ཐད་ལ་ཐུགས་སྣང་ཡོད་པ་བོུ་ན་ཆུང་ Natalie Gomez ལགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་དམིགས་བསལ་མཇལ་འཕྲད་ཞུ་སླད་འདེམས་སྒྲུག་བྱུང་འདུག ཁ་སང་ཨ་རིའི་ The Courier Herald ཞེས་པའི་གསར་ཁང་གིས་གནས་ཚུལ་སྤེལ་བར་ Natalie Gomez ལགས་ཝ་ཤིང་ཊོན་གྱི་སློབ་ཕྲུག་བཞི་དང་ལྷན་ཕྱི་ལོ་ ༢༠༢༠ ལོའི་བྱམས་བརྩེ་སྐུ་ཚབ་ཞེས་སྤྱི་ཚོགས་ནང་བྱམས་བརྩེའི་བརྒྱུད་མ་འོངས་འགོ་ཁྲིད་སྐྱེད་སྲིང་གནང་ཐབས་ལ་དམིགས་པའི་མངའ་སྡེའི་ལས་རིམ་ཁོངས་སུ་འདེམས་སྒྲུག་བྱུང་འདུག་པ་དང་། ཁོང་གིས་ད་རེས་༸གོང་ས་མཆོག་དང་ལྷན་མི་རབས་རྗེས་མ་ཚོར་བྱམས་བརྩེའི་སྐོར་སློབ་ཁྲིད་གནང་རྒྱུའི་ཐོག་ལམ་སྟོན་ཞུ་རྒྱུ་ཡིན་པས་གོ་སྐབས་འདི་ལྟར་བྱུང་བ་ནི་ཆེས་དགའ་ཚོར་ཡོད་པ་དང་སྒོས་ད་རེས་༸གོང་ས་མཆོག་གི་མཇལ་འཕྲད་བརྒྱུད་གཞན་ལ་བྱམས་བརྩེ་གོང་འཕེལ་སླད་རོགས་འདེགས་ཞུ་བློ་ཡོད་པ་དང་ལྷག་པར་དུ་རང་ངོས་ནས་བྱམས་བརྩེ་ལྡན་པའི་སྤྱི་ཚོགས་ཀྱི་རི་རབ་ཡང་འགུལ་བསྐྱོད་གཏང་ཐུབ་ངེས་ཡིན་པར་ཡིད་ཆེས་གནང་གི་ཡོད་པ་གསུངས་འདུག དེ་བཞིན་ཁོང་གིས་མགོན་པོ་༸གང་ཉིད་མཆོག་དང་མཇལ་འཕྲད་སྐབས་སེམས་འགུལ་ཐེབས་འདོད་མེད་པའི་གང་ཟག་དག་ལ་སེམས་འགུལ་ཇི་ལྟར་གཏང་དགོས་པའི་ཐད་བཀའ་འདྲི་ཞུ་འདོད་ཡོད་པ་དང་། རང་ཉིད་སློབ་གྲྭ་འགྲོ་སའི་སློབ་ཕྲུག་མཚོན་པ་ཡིན་ན་ཕལ་མོ་ཆེ་བྱམས་བརྩེ་དང་། གཞན་ལ་སེམས་འགུལ་གནང་རྒྱུའི་ཐད་ལ་དོ་སྣང་ཞན་པ་དེ་ལྟར་ཡང་། སློབ་ཕྲུག་ཚོའི་དེ་ལྟར་གནང་དགོས་པའི་རྒྱུ་མཚན་ནི་ཁོང་ཚོའི་བྱམས་བརྩེ་ལག་བསྟར་གནང་རྒྱུ་དང་། བྱམས་བརྩེ་བརྒྱུད་ནས་སྤྱི་ཚོགས་ནང་སེམས་འགུལ་ཐེབས་པའི་ལས་དོན་གནང་ཕྱོགས་ལ་འཚེར་སྣང་གནང་གི་ཡོད་པ་དགོངས་ཀྱི་ཡོད་པ་གསུངས་འདུག Natalie ལགས་རང་ཉིད་སླད་མར་ཕྱི་མི་གཞིས་སྤོས་ཀྱི་ཁྲིམས་རྩོད་པ་དང་སྲིད་དོན་པ་བརྒྱུད་མུ་མཐུད་གཞན་གྱི་རྒྱུད་ལ་བྱམས་བརྩེ་གོང་འཕེལ་སླད་སེམས་འགུལ་གནང་རྒྱུ་ཡིན་པ་བརྗོད་འདུག་པ་དང་ཁོང་གིས་དུས་རྒྱུན་རང་ཉིད་སློབ་གྲྭ་ཡོད་པའི་སྐབས་བརྒྱ་ཆ་ཡག་པོ་ཐོབ་ཐབས་དང་། མདུན་ལམ་ཡག་པོ་ཞིག་བཟོ་ཐབས་སོགས་ལ་དམིགས་ཀྱི་ཡོད་ཀྱང་། མི་ཚེ་ནང་མང་ཚོགས་ཀྱིས་ཁྱེད་རང་ལ་སློབ་ཡོན་འདི་དང་ཕ་གི་ཐོབ་ཡོད་པ་སོགས་དྲན་རྒྱུ་མིན་པ་དང་སྒོས་ཁྱེད་ཀྱིས་མི་གཞན་གྱི་མི་ཚེར་སེམས་འགུལ་ཇི་ལྟར་གཏང་ཡོད་པ་དྲན་དགོས་གལ་ཡིན་པ་གསུངས་འདུག སྤྱིར་ Natalie ལྟ་བུར་མཚོན་ན་སྤུན་སྲིང་ལྔ་ཡོད་པའི་ཁོངས་ནས་ཁོ་མོ་ཆེ་ཤོས་ཆགས་ཀྱི་འདུག་པ་དང་ཁོང་གིས་རང་ཉིད་སྤུན་སྲིང་ལྔ་ལས་ཆེ་ཤོས་ཤིག་ཡིན་རྐྱེན་བྱམས་བརྩེ་དེ་སོ་སོ་ངོས་ནས་ལག་བསྟར་ཐུབ་ཐབས་ཡོང་གི་མེད་སྟབས། དེ་འབྲེལ་ལག་བསྟར་སླད་དེའི་ཐབས་ལམ་སོགས་ངེས་པར་དུ་ཤེས་དགོས་པ་དང་སྦྱང་དགོས་པ་གསུངས་འདུག གཞི་རྩའི་བྱམས་བརྩེའི་སྐུ་ཚབ་རྣམ་པ་ཟླ་བ་ ༡༡ ཚེས་ ༦ ནས་ ༡༢ བར་༸གོང་ས་མཆོག་མཇལ་འཕྲད་དང་།  བོད་ཕྲུག་ཁྱིམ་སྡེ། སྒྲོལ་མ་གླིང་བཙུན་དགོན། སྙིང་སྟོབས་གླིང་། བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཚོགས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། སྨན་རྩིས་ཁང་སོགས་སུ་སྐོར་བསྐྱོད་གནང་རྒྱུ་ཡིན་པ་དང་། Natalie ལགས་ཀྱིས་རང་ཉིད་ནས་སྐོར་བསྐྱོད་དེ་བརྒྱུད་བོད་མིའི་སྒྲིག་འཛུགས་ཀྱི་ལམ་ལུགས་འགྲོ་སྟངས་སོགས་ལ་ཤེས་འདོད་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་འཐུས་རྣམ་པར་བྱམས་བརྩེ་གཙོ་བཟུང་གིས་ལས་དོན་ཇི་ལྟར་གནང་གི་ཡོད་མེད་ཐད་ལ་བཀའ་འདྲི་ཞུ་འདོད་ཡོད་པ་གསུངས་འདུག རྩ་བའི་ད་རེས་༸གོང་ས་མཆོག་དང་བྱམས་བརྩེ་སྐུ་ཚབ་དབར་མཇལ་འཕྲད་དེ་ཁུལ་དེའི་མངའ་སྡེ་སྲིད་སྐྱོང་གཞོན་པའི་ལས་ཁུངས་དང་། Association of Washington Generals ཞེས་པའོ་ཚོགས་པ་ནས་གོ་སྒྲིག་ཞུས་པ་དང་། ༸གོང་ས་མཆོག་གི་མཇལ་འཕྲད་རྗེས་སྐུ་ཚབ་རྣམ་པ་ཕྱིར་རང་ཡུལ་དུ་ཕེབས་རྗེས་ Association of Washington Generals ཚོགས་པ་ནས་སྐུ་ཚབ་རྣམ་པར་སོ་སོའི་སྤྱི་ཚོགས་ནང་བྱམས་བརྩེ་དང་འབྲེལ་ལས་འཆར་གོ་སྒྲིག་ཞུ་རྒྱུ་ཐད་ལ་རོགས་རམ་གནང་རྒྱུ་ཡིན་པ་རེད་འདུག

༸གོང་ས་མཆོག་དབུ་བཞུགས་ཐོག་ཞི་བདེ་དང་སྤྱི་ཚོགས་ལ་ཕན་པའི་ལས་འཆར་འགན་ཁུར་བ་ཁག་གིས་དམིགས་བསལ་མཇལ་མོལ་ལྷན་ཚོགས་ཐེངས་བཞི་པ་དབུ་འཛུགས་གནང་སོང་། དེ་རིང་ཟླ་ ༡༠ ཚེས་ ༢༣ ཉིན་གྱི་སྔ་དྲོ་ཚོུད་ ༩ སྟེང་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱལ་སྤྱིའི་རྒྱལ་ཁབ་འདྲ་མིན་ནང་ཞི་བདེ་དང་སྤྱི་ཚོགས་ལ་ཕན་པའི་ལས་འཆར་འགན་ཁུར་བ་ཁག་ཅིག་དང་ལྷན་དུ་དམིགས་བསལ་མཇལ་མོལ་གྱི་ལྷན་ཚོགས་ཐེངས་བཞི་པ་དབུ་འཛུགས་གནང་བ་དང་འབྲེལ། མགོན་པོ་༸གང་ཉིད་མཆོག་གིས་འཛམ་གླིང་གི་ཐོག་འཕྲད་བཞིན་པའི་དཀའ་ངལ་རྣམས་ཤེས་ཡོན་གྱི་ཐོག་ནས་སེལ་ཐབས་གནང་དགོས་པའི་ལམ་སྟོན་བཀའ་དྲིན་སྩལ་སོང་། དེ་ཡང་ཨ་རིའི་ནང་རྟེན་གཞི་བྱས་པའི་ United States Institute of Peace ཞེས་པའི་ཞི་བདེའི་ལྟེ་གནས་ཁང་གིས་ཕྱི་ལོ་ ༢༠༡༦ ལོ་ནས་དེང་སྐབས་དམག་འཁྲུག་དང་མི་གསོད་ཁྲག་སྦྱོར་སོགས་ཆེས་ཛ་དྲག་གི་དཀའ་ངལ་འཕྲད་བཞིན་པའི་ཡུལ་གྲུ་ཁག་ཅིག་གི་གཞོན་སྐྱེས་འགོ་ཁྲིད་མི་ཉུང་བ་ཞིག་བསྡུ་སྐོང་ཐོག་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་མཆོག་དང་ལྷན་དུ་མཇལ་མོལ་གྱི་ལྷན་ཚོགས་ཤིག་གོ་སྒྲིག་ཞུ་བཞིན་ཡོད་པ་དང་། ཐེངས་འདིའི་ལྷན་ཚོགས་ཐོག་ Afghanistan དང་ Tunisia དེ་བཞིན་འབར་མ། སོ་མཱ་ལི་ཡ། སིརྱ། Vanezuela དང་ Nigeria Libya Iraq Colombia ལྷོ་སུ་དཱན་སོགས་རྒྱལ་ཁབ་མི་འདྲ་བ་ ༡༢ ལྷག་གི་གཞོན་སྐྱེས་གྲངས་ ༢༦ ལྷན་ཞུགས་གནང་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་གཞོན་སྐྱེས་ཚོགས་བཅར་བ་དང་འབྲེལ་ཡོད་ཡོངས་ལ་འཚམས་འདྲི་དང་འབྲེལ། འཛམ་བུ་གླིང་འདིའི་ཐོག་ཡོད་པའི་འགྲོ་བ་མི་རྣམས་གཅིག་ལ་གཅིག་རྟེན་ཐོག་འཚོ་སྡོད་བྱེད་བཞིན་པའི་སྤྱི་ཚོགས་གཅིག་གི་མི་ཡིན་པ་གཅིག་མཚུངས་ཡིན་ཡང་། མི་རྣམས་རིམ་པའི་འཚར་ལོང་བྱུང་སྐབས་ང་དང་ཁོ། ངའི་རྒྱལ་ཁབ་དང་ཁོའི་རྒྱལ་ཁབ་སོགས་དབྱེ་འབྱེད་ཀྱི་བསམ་བློ་ཆེ་རུ་ཕྱིན་ཏེ་འཛམ་བུ་འདིའི་ཐོག་ལ་དཀའ་ངལ་འདྲ་མིན་བཟོ་བཞིན་ཡོད་པ་འགྲེལ་བརྗོད་དང་སྦྲགས། དཀའ་ངལ་དེ་དག་གཙོ་བོ་ང་ཚོར་འགྲོ་བ་མི་གཅིག་གྱུར་གྱི་བསམ་བློ་ཆུང་དྲགས་་པའི་དབང་གིས་ཡོང་གི་ཡོང་གི་ཡོད་པ་བཀའ་སྩལ་སོང་། ལྷག་པར་དུ་མགོན་པོ་གང་ཉིད་མཆོག་ནས། དཀའ་ངལ་དེ་དག་སེལ་ཐབས་ཀྱི་ཐབས་ལམ་བཟང་ཤོས་དེ་ནི་དེང་གི་ཤེས་ཡོན་སློབ་གསོའི་ལམ་ལུགས་ལ་བསྒྱུར་བཅོས་ཤིག་བཏང་སྟེ། འཚར་ལོང་བྱུང་བཞིན་པའི་མི་རབས་ཚོར་འགྲོ་བ་མིའི་གཅིག་གྱུར་གྱི་བསམ་བློ་དང་། མིའི་ཐུན་མོང་མ་ཡིན་པའི་རིན་ཐང་ཐོག་སློབ་ཁྲིད་ཤུགས་ཆེར་གནང་དགོས་པའི་ལམ་སྟོན་གནང་ཡོད། དེ་བཞིན་སྐབས་དེར་གཞོན་སྐྱེས་ཚོགས་བཅར་ཁག་ཅིག་ནས་སོ་སོའི་རྒྱལ་ཁབ་ནང་བྱུང་པའི་དམག་འཁྲུག་ཁྲོད་ཕ་མ་སྤུན་མཆེད་བསད་ པའི་གནས་སྟངས་དང་། མི་རིགས་དབྱེ་འབྱེད་ཀྱི་དཀའ་ངལ་སོགས་ལས་འཕྲོས་ཏེ་༸གོང་ས་མཆོག་ལ་བཀའ་འདྲི་ཁག་ཅིག་ཞུས་སོང་བ་དང་། སྐབས་དེར་མགོན་པོ་གང་ཉིད་མཆོག་ནས། སོ་སོའི་ཕ་མ་སྤུན་མཆེད་བཤད་མཁན་ཞིག་ཡིན་ཡང་། དེ་ལ་དྲགས་པོའི་ཐོག་ནས་དགྲ་ལན་སློག་པ་ཡིན་ན་དཀའ་ངལ་སེལ་ཐབས་མེད་པ་མ་ཟད་རིམ་པའི་དགྲ་བོ་མང་དུ་འགྲོ་རྒྱུའི་རྒྱུ་ཞིག་ཡིན་སྟབས། དུས་རྟག་ཏུ་སོ་སོའི་དགྲ་བོ་ལ་སྙིང་རྗེ་དང་བཟོད་པ་སྒོམ་པའི་ཐོག་འཚེ་བ་མེད་པའི་གྲོས་མོལ་གྱི་ལམ་ནས་དཀའ་ངལ་ཞི་སྒྲིག་ཡོང་ཐབས་གནང་རྒྱུ་གལ་ཆེན་པོ་ཡིན་པ་དང་། དེ་ལྟར་གནང་ཚེ་དེ་རིང་གི་དགྲ་བོ་དེ་རིམ་བཞིན་རང་ཉིད་ཀྱི་གྲོགས་པོ་ཡག་ཤོས་ཤིག་ཏུ་འགྱུར་ཐུབ་པའི་དགེ་མཚན་ཡང་ཡོད་ཅེས་བཀའ་འགྲེལ་གནང་སོང་། མ་ཟད་༸གོང་ས་སྐྱབས་མགོན་ཆེན་པོ་མཆོག་ནས། འཛམ་བུ་གླིང་འདིའི་ཐོག་ཡོད་པའི་ཆོས་ལུགས་འདྲ་མིན་ཁག་ལ་ལྟ་གྲུབ་མི་འདྲ་བ་ཡོད་ཀྱང་གཞི་རྩའི་བསླབ་བྱ་གཙོ་བོ་དེ་ནི་བྱམས་རྩེ་གོང་འཕེལ་གཏོང་རྒྱུ་གཅིག་མཚུངས་ཡིན་སྟབས་ཆོས་ལུགས་མི་འདྲ་བའི་དབར་ཕན་ཚུན་དབྱེ་འབྱེད་གནང་རྒྱུ་མེད་པ་དང་། ཕྱི་དངོས་པོ་ཡར་རྒྱས་ཚད་མཐོན་པོར་འགྲོ་བཞིན་པའི་སྐབས་འདིར་མིའི་སྤྱི་ཚོགས་ནང་འཕྲད་བཞིན་པའི་དཀའ་ངལ་དེ་དག་མིས་བཟོས་པ་ཞིག་ཡིན་སྟབས། དཀོན་མཆོག་དང་ལྷ་སོགས་ལ་དཀའ་ངལ་སེལ་རོགས་ཞེས་སྨོན་ལམ་ཁོ་ན་བཏབས་ཏེ་བཞུགས་ན་གྲུབ་འབྲས་སོན་རྒྱུ་མེད་པས། ང་ཚོ་མིས་བཟོས་པའི་དཀའ་ངལ་དེ་དག་ང་ཚོ་མི་རྣམས་ཀྱིས་སེལ་ཐབས་གནང་དགོས་པ་དང་། དེ་ཡང་གཞོན་སྐྱེས་ཚོས་ཤེས་ཡོན་དང་བསམ་བློ་གུ་ཡངས་ཀྱི་ཐོག་ནས་མིས་བཟོས་པའི་དཀའ་ངལ་དེ་ཚོའི་ཐོག་དོ་སྣང་ཆེ་ཙམ་གནང་ཐུབ་ན། ལོ་ངོ་ཉི་ཤུ་དང་སུམ་ཅུའི་མཚམས་སུ་འཛམ་བུ་གླིང་འདི་མི་འདྲ་བ་ཞིག་བཟོ་ཐུབ་ངེས་རེད་སོགས་ཀྱི་བཀའ་སློབ་ལམ་སྟོན་རྒྱ་ཆེར་གནང་ཡོད། གཞི་རྩའི་ཐེངས་འདིའི་ལྷན་ཚོགས་ཐོག་ཕེབས་པའི་གཞོན་སྐྱེས་རྣམས་ཀྱི་ལུང་པའི་ནང་དམག་འཁྲུག་དང་རྩོད་རྙོག་འདྲ་མིན་བྱུང་ཡོད་སྟབས། ༸གོང་ས་སྐྱབས་མགོན་ཆེན་པོ་མཆོག་ནས་འཁྲུག་རྩོད་སོགས་ཀྱི་དཀའ་ངལ་ཆེན་པོ་འཕྲད་བཞིན་པའི་དུས་སྐབས་སུ་གཞོན་སྐྱེས་རྣམས་སེམས་ཤུགས་མ་ཆགས་པར་གནད་དོན་གང་འདྲ་ཞིག་ཡིན་ཡང་དྲང་པོ་དང་ལྷག་བསམ་ལྡན་པའི་གདོང་ལེན་གནང་ན་ཉིན་ཞིག་རྒྱལ་ཁ་ཐོབ་ངེས་ཡིན་པའི་ལམ་སྟོན་སོགས་ཀྱང་གནང་སོང་། གཞི་རྩའི་ ༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱལ་སྤྱིའི་རྒྱལ་ཁབ་འདྲ་མིན་ནང་ཞི་བདེ་དང་སྤྱི་ཚོགས་ལ་ཕན་པའི་ལས་འཆར་འགན་ཁུར་བ་ཁག་ཅིག་དང་ལྷན་དུ་གནང་བཞིན་པའི་དམིགས་བསལ་མཇལ་མོལ་གྱི་ལྷན་ཚོགས་ཐེངས་བཞི་པ་འདི་དེ་རིང་དང་སང་ཉིན་བཅས་ཉིན་གྲངས་གཉིས་རིང་བཞུགས་སྒར་༸རྒྱལ་བའི་ཕོ་བྲང་དུ་འཚོགས་ཀྱི་ཡོད་པ་རེད།

དེ་རིང་གསར་ལམ་ཁག་ཏུ་གསར་འགྱུར་ཐོན་པ་ལྟར་ན།   FIFA  ཞེས་པའི་རྒྱལ་སྤྱིའི་རྐང་སྤོལ་འགྲན་ཚོགས་ཆེ་ཤོས་ཀྱི་འཛིན་སྐྱོང་སྡེ་ཚན་གྱིས་བདུན་ཕྲག་སྔོན་མའི་རེས་གཟའ་ཕུར་བུའི་ཉིན་སྤྱི་ལོ་  ༢༠༢༡ ལོར།  FIFA club world cup ཞེས་པའི་གླིང་ཕྲན་སོ་སོའི་རྐང་སྤོལ་རུ་ཁག་རྩེ་ཕུད་ཀྱི་འགྲན་ཚོགས་དེ་རྒྱ་ནག་ཏུ་འཚོགས་རྒྱུ་ཡིན་སྐོར་གསལ་བསྒྲགས་བསྐྱངས་བ་ལྟར།   ཁ་སང་རྒྱལ་སྤྱིའི་ཉེས་ཡང་ཚོགས་པའི་ངོས་ནས་རྒྱ་ནག་དུ་རྐང་སྤོལ་འགྲན་བསྡུར་དེ་འཚོགས་ན་འོས་བབ་མེད་པར་བརྟེན་ཐག་གཅོད་དེ་ཕྱིར་འཐེན་བྱེད་དགོས་བའི་ཞུ་སྐུལ་གནང་འདུག རྒྱལ་སྤྱིའི་ཉེས་ཡང་ཚོགས་པའི་དབྱིན་ཡུལ་གྱི་སྲིད་བྱུས་དང་འཛིན་སྐྱོང་གི་འགན་འཛིན།  སྐུ་ཞབས་ Allan Hogarth ལགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་དེ་ཡ་ང་བའི་གནས་སྟངས་ཀྱི་འོག་ཏུ་ཡོད་པར་བརྟེན།  སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏེ་རྒྱ་ནག་ཏུ་འཚོགས་གཏན་འཁེལ་ཚེ། རྒྱ་ནག་གིས་གོ་སྐབས་དེ་འཇུས་བའི་ཐོག་རྒྱལ་སྤྱིའི་ཐོག་ནས་རྒྱ་ནག་ལ་གཟིགས་ཕྱོགས་ཡག་པོ་མེད་པ་དེར་འགྱུར་བ་གཏོང་རྒྱུ་ཡིན་སྐོར་འགྲེལ་བརྗོད་བྱས་ཏེ།  རྒྱ་ནག་ལ་རྒྱལ་སྤྱིའི་རྐང་སྤོལ་འགྲན་ཚོགས་གོ་སྒྲིག་ཞུ་རྒྱུའི་ཆ་རྐྱེན་ཚང་མེད་སྐོར་ཡོངས་གྲགས་གནང་འདུག ཁོང་གིས་ད་དུང་།  རྩ་བའི་རྒྱ་ནག་ནང་གི་དངོས་ཡོད་གནས་སྟངས་ནི་མུན་ནག་རང་བཞིན་ཀྱི་བཀག་སྡོམ་དང་། སྲིད་གཞུང་གི་ལྟ་བ་དང་མི་མཐུན་པ་རྣམས་འཛིན་བཟུང་།  དེ་བཞིན་ཡུ་གུར་བ་སྟོང་ཕྲག་མང་པོ་བཀག་སྐྱིལ་བྱས་ཡོད་ནའང་། ཐེངས་འདིའི་རྐང་སྤོལ་རྩེད་འགྲན་གྱི་གོ་སྐབས་དེ་བརྒྱུད་ནས་རྒྱ་ནག་གི་དཔོན་རིགས་རྣམས་ཀྱིས་རྒྱ་ནག་གི་རྒྱལ་ཁབ་ནི་བཟོད་བསྲན་དང་གུ་ཡངས་ཀྱི་སྤྱི་ཚོགས་ཤིག་ཡིན་པའི་རྣམ་པ་ཕྱིར་སྟོན་རྒྱུ་ཡིན་སྐོར་ཡང་འགྲེལ་བརྗོད་བྱས་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་ཟིན་ཐོ་ནི་ཡ་ང་བའི་གནས་བབ་ཀྱི་འོག་ཏུ་ཡོད་པར་བརྟེན།  FIFA རྐང་སྤོལ་རྩེད་འགྲན་གྱི་འཛིན་སྐྱོང་གིས་ངེས་བར་དུ་རྒྱ་ནག་ལ་གནོད་ཤུགས་སྤྲད་པའི་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གོང་འཕེལ་དུ་གཏོང་དགོས་བར་བརྗོད་འདུག དེ་བཞིན་ཨ་རིའི་གྲོས་ཚོགས་གོང་མའི་འཐུས་མི།   སྐུ་ཞབས་ Rick Scott  ལགས་ཀྱིས་ཀྱང་ཐེངས་འདིའི་རྐང་སྤོལ་འགྲན་ཚོགས་རྒྱ་ནག་ཏུ་སྐོང་རྒྱུ་ཡིན་པའི་གནས་ཚུལ་དང་འབྲེལ་ནས། FIFA ཚོགས་པ་ལ་སྐྱོན་བརྗོད་བྱས་པ་མ་ཟད།  རྒྱལ་སྤྱའི་ཨོ་རྩལ་འགྲན་ཚོགས་ཀྱི་ཚོགས་གཙོའི་མཚན་ཐོག་ཏུའང་ཞུ་ཡིག་ཅིག་ཕུལ་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཉམ་ང་བའི་གནས་བབ་ཅིག་ཏུ་ཡོད་པ་མ་ཟད།  རྒྱ་ནག་གིས་ཉེ་སྔོན་ NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྤོལ་མཐུན་ཚོགས་ཀྱི་ཚོགས་མི་ཡིན་པ་Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱི་ཚིག་བརྗོད་དང་འབྲེལ་བའི་རྙོག་གླེང་བསླངས་ཡོད་པར་བསྒྲགས་ཏེ།  རྒྱ་ནག་གིས་ཁྲིམས་མཐུན་གྱི་ཐོག་ནས་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་རྒྱུའི་ཆ་རྐྱེན་མ་ཚང་བར་དུ།  སྤྱི་ལོ་ ༢༠༢༢ ལོའི་དགུན་དུས་ཀྱི་ ཨོ་རྩལ་འགྲན་ཚོགས་དེ་རྒྱ་ནག་ཏུ་འཚོགས་པར་འོས་བབ་མེད་སྐོར་འགྲེལ་བརྗོད་གནང་འདུག གསར་ཁང་གི་ངོས་ནས་ཀྱང་། རྒྱལ་སྤྱིའི་རྐང་སྤོལ་རྩེད་འགྲན་དེ་རྒྱ་ནག་ཏུ་སྐོང་འཚོགས་བྱེད་རྒྱུའི་ཁྱབ་བསྒྲགས་དང་ལྷན་དུ།  རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་སྤྱི་དང་། སྒོས་སུ་རྒྱ་ནག་གིས་ཡུ་གུར་བ་བཀག་སྡོམ་དང་ཧོང་ཀོང་གི་མང་གཙོའི་ལས་འགུལ་བར་དམ་དྲག་སོགས་ཀྱི་ཐད་ནས་རྒྱ་ནག་ལ་སྐྱོན་བརྗོད་བྱེད་མཁན་མང་པོ་བྱུང་ཡོད་པར་འཁོད་འདུག རྩ་བའི་སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏུ་རུ་ཁག་ ༢༤ ཞུགས་རྩིས་ཡོད་པ་དང་།  དེ་དག་ལས་རུ་ཁག་བརྒྱད་ནི་སྔོན་ཆད་རྐང་སྤོལ་འགྲན་བསྡུར་ལས་རྣམ་པར་རྒྱལ་བའི་རུ་ཁག་རྐྱང་ཡིན་པ་མ་ཟད།   ཡོ་རོབ་ནང་གི་རྐང་སྤོལ་རུ་ཁག་གྲགས་ཅན། Liverpool དང་Chelsea གཉིས་ཀྱང་ཐེངས་འདིའི་རྒྱལ་སྤྱིའི་རྐང་རྩེད་འགྲན་བསྡུར་ལ་ཞུགས་རྩིས་ཡོད་པ་རེད་འདུག

བདུན་ཕྲག་སྔོན་མའི་རེས་གཟའ་ལྷག་པའི་ཉིན་ཨ་མི་རི་ཀའི་སྲིད་འཛིན་སྐུ་ཞབས་ Donald Trump མཆོག་གིས་སྣེ་ཁྲིད་པའི་ཨ་རིའི་སྲིད་གཞུང་གི་ངོས་ནས་ཨ་རི་ནང་ཡོད་པའི་རྒྱ་ནག་གཞུང་གི་གཞུང་འབྲེལ་སྐུ་ཚབ་གཙོས་པའི་ཕྱི་འབྲེལ་མི་སྣ་རྣམས་ནས་ཨ་རིའི་དབུས་དང་ས་གནས་། དེ་བཞིན་མངའ་སྡེ་བཅས་ཀྱི་གཞུང་འབྲེལ་མི་དང་ཨ་རིའི་ས་ཐོག་ཏུ་ཡོད་པའི་ཤེས་ཡོན་དང་ཉམས་ཞིབ་ལྟེ་གནས་ཁག་གི་ལས་བྱེད་སོགས་དང་འབྲེལ་བ་རིགས་མ་གནང་བའི་གོང་དུ་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཞུ་དགོས་པའི་སྒྲིག་ཁྲིམས་གསར་པ་ཞིག་ཡོངས་ཁྱབ་གནང་ཡོད་པ་རེད།  ཨ་རི་སྲིད་གཞུང་གི་སྒྲིག་གཞི་གསར་པ་དེ་ཡོངས་ཁྱབ་གནང་མཚམས་སུ་ཨ་རིའི་རྒྱལ་ས་ Washington DC ནང་ཡོད་པའི་རྒྱ་ནག་གཞུང་ཚབ་པ་ Cui Tiankai ཡིས་ཨ་རིའི་སྒྲིག་གཞི་དེ་ནི་ཝྭི་ཡ་ནའི་རྒྱལ་སྤྱིའི་ཆིངས་ཡིག་གི་དགོངས་དོན་དང་འགལ་ཟླ་ཆགས་ཀྱི་ཡོད་པ་སོགས་སྐྱོན་བརྗོད་རིམ་པ་བྱས་ཡོད་ཀྱང་ཁ་སང་རྒྱ་ནག་ནང་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱིས་ཨ་རིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་ཚུལ་དང་མཐུན་པ་ཞིག་ཡིན་པ་དང་། སྒྲིག་ཁྲིམས་དེ་ནི་གཙོ་བོ་རྒྱ་ནག་གཞུང་གི་དམ་དྲག་ལམ་ལུགས་འོག་ཕྱག་ལས་གནང་བཞིན་པའི་ཨ་རིའི་གཞུང་ཚབ་པ་དང་ཕྱི་འབྲེལ་མི་སྣ་ཚོར་ཅུང་གུ་ཡུངས་ཐོབ་རྒྱུར་དམིགས་པ་ཞིག་ཡིན་སྟབས་རྒྱ་གཞུང་ནས་ཨ་རིའི་ཕྱི་འབྲེལ་མི་སྣར་དམ་དྲག་བྱེད་བཞིན་པ་དག་ལྷོད་དུ་གཏང་རྒྱུར་རེ་བ་ཡོད་ཅེས་གསུངས་འདུག སྐུ་ཞབས་ Terry Branstad ལགས་ཀྱིས་ད་དུང་དེ་སྔ་རྒྱ་ནག་གཞུང་ནས་ཁོང་བོད་ནང་བསྐྱོད་རྒྱུར་ཆོག་མཆན་མ་སྤྲད་པའི་གནས་སྟངས་ཐེངས་གཉིས་བྱུང་ཡོད་པ་དང་ཕྱི་ལོ་ ༢༠༡༨ ལོར་བོད་ནང་བསྐྱོད་རྒྱུའི་ཆོག་མཆན་སྤྲད་ཡོད་ཀྱང་བོད་མཚོ་སྔོན་དུ་འབྱོར་སྐབས་རྒྱ་ནག་གཞུང་འབྲེལ་མི་སྣ་ཚོས་ས་གནས་ཀྱི་ཇ་ཁང་དང་མི་མང་རྣམས་ལ་སྔོན་ཚུད་ནས་ཨ་རིའི་གཞུང་འབྲེལ་མི་སྣ་དང་གླེང་སློང་བྱ་མི་ཆོག་པའི་དམ་དྲག་བྱས་ཡོད་པ་དང་། ཉེ་ཆར་ཁོང་རྒྱ་ནག་ནང་ཡོད་པའི་ཨ་རིའི་ཤེས་ཡོན་དང་ཉམས་ཞིག་ལྟེ་ཁང་དུ་བསྐྱོད་རྒྱུའི་ཆོག་མཆན་ཡང་སྤྲོད་མེད་པ་སོགས་འགྲེལ་བརྗོད་དང་སྦྲགས། རྒྱ་ནག་གི་གཞུང་ཚབ་དང་ཕྱི་འབྲེལ་མི་སྣ་རྣམས་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཙམ་ཡང་ཞུ་དགོས་ཀྱི་མེད་ཀྱང་ཨ་རིའི་ཕྱི་འབྲེལ་མི་སྣ་ཚོ་རྒྱ་ནག་གཞུང་འབྲེལ་ལས་ཁུངས་ལ་སྙན་སེང་ཞུ་དགོས་པ་མ་ཟད་ལས་དོན་ཐོག་ཞུགས་ཆོག་པའི་ཆོག་མཆན་ཀྱང་ཞུ་དགོས་ཀྱི་ཡོད་སྟབས། ཨ་རི་ནང་ཡོད་པའི་རྒྱ་ནག་གཞུང་ཚབ་དང་ཕྱི་འབྲེལ་མི་སྣ་ཚོ་ལས་རྒྱ་ནག་ནང་ཡོད་པའི་ཨ་རིའི་གཞུང་ཚབ་དང་ཕྱི་འབྲེལ་མི་སྣ་ཚོར་དམ་དྲག་ཆེ་བ་ཡོད་པ་མངོན་གསལ་གྱིས་གསུངས་འདུག ལྷག་པར་དུ་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ནས་ཨ་རིར་ཡོད་པའི་རྒྱ་ནག་གི་གཞུང་ཚ་བ་ Cui Tiankai ཡིས་ Tweeter དྲྭ་གནས་ཐོག་ཨ་རིའི་ཁྲིམས་སྒྲིག་གསར་པར་སྐྱོན་བརྗོད་བྱས་པ་དེ་ནི་ཆེས་མི་འོས་པའི་བྱེད་སྟངས་ཤིག་ཡིན་པ་དང་ཁོང་ཨ་རི་རང་དབང་ལུང་པའི་ནང་ཡོད་སྟབས་ Tweeter སྤྱོད་ཐུབ་པ་ལས་རྒྱ་ནག་ནང་གཞུང་གིས་དམ་དྲམ་རྐྱེན་པས་ Tweeter གཙོས་པའི་ངོ་དེབ་དང་ Youtube སོགས་བཀག་བསྡོམ་བྱེད་བཞིན་ཡོད་པ་གསུངས་འདུག གཞི་རྩའི་ཉེ་དུས་སུ་ཨ་རི་གཞུང་གིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་འདས་པའི་ལོ་དུས་མང་པོའི་རིང་ལ་རྒྱ་ནག་གཞུང་གིས་ཡུལ་དེའི་ནང་ཡོད་པའི་ཨ་མི་རི་ཀའི་གཞུང་ཚབ་དང་ཕྱི་འབྲེལ་མི་སྣའི་ལས་དོན་ཐོག་དམ་དྲག་བྱེད་བཞིན་པར་ཡར་ལན་ཞིག་ཆགས་ཀྱི་ཡོད་པ་དང་། ཁ་སང་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱི་འགྲེལ་བརྗོད་གནང་བར་ཨ་རི་གཞུང་ནས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་འདི་ཙམ་མ་ཟད་ད་ལྟའི་ཆར་ཨ་རི་ནང་ལ་རྒྱ་ནག་གཞུང་གི་བདག་དབང་འོག་ཡོད་པའི་ལྟེ་གནས་ཁག་དང་། ཚོང་ལས་སྡེ་ཚན། དེ་བཞིན་རྒྱ་ནག་གཞུང་འབྲེལ་གྱི་གསར་ཁང་བཅས་པ་སྲིད་གཞུང་གི་གསང་བའི་ལས་དོན་མི་སྣའི་ཁོངས་སུ་བཅུག་རྒྱུའི་ཁྲིམས་སྒྲིག་གསར་པ་ཞིག་ཀྱང་གཏན་འབེབས་གནང་འཆར་ཡོད་པ་རེད་འདུག རྩ་བའི་ཨ་རི་ཙམ་མ་ཟད་སྔར་ལོའི་ཕྱི་ཟླ་ ༡༢ ནང་ལ་ Australia སྲིད་གཞུང་ནས་རྒྱ་ནག་གཞུང་གི་གསང་བའི་ལས་གཞི་རྣམས་ཡུལ་དེར་དར་ཁྱབ་མི་ཡོང་བའི་སླད་དུ་ Australia ནང་ཡོད་པའི་རྒྱ་ནག་གཞུང་འབྲེལ་གྱི་མི་སྣ་དང་ཚོང་གི་ལྟེ་གནས་ཁག་ཐོ་འགོད་དང་དེབ་སྐྱེལ་བྱེད་དགོས་པའི་སྒྲིག་ཁྲིམས་གསར་བཟོ་གནང་ཡོད་པ་རེད།

League of Legends ཞེས་དྲྭ་ཐོག་གི་རྩེད་འགྲན་ཞིག་གི་ནང་རྩེད་འགྲན་པ་ཚོས་གླེང་མོལ་བྱེད་སྐབས་ཡུ་གུར་ཞེས་པའི་ཐ་སྙད་ལ་བཀག་བསྡོམ་བྱེད་ཀྱི་ཡོད་པ་མངོན་གསལ་གནང་འདུག BBC གསར་ཁང་གིས་གནས་ཚུལ་སྤེལ་བར་ League of Legends ཞེས་ཧ་ཅང་གྲགས་ཆེ་བའི་དྲྭ་ཐོག་གི་རྩེད་འགྲན་ནང་ཡུ་གུར་ཞེས་པའི་ཐ་སྙད་བཀག་བསྡོམ་བྱེད་བཞིན་པ་མངོན་གསལ་བྱུང་བ་དང་འབྲེལ། མཉེན་ཆས་བཀོལ་སྤྱོད་གནང་མཁན་ཁག་གཅིག་གིས་དེར་ཞུ་གཏུགས་བྱས་ཀྱང་རྩེད་འགྲན་གྱི་སྒྲིག་གཞི་ནང་དུ་མི་རིགས་ཀྱི་གནད་དོན་དང་འབྲེལ་བའི་གླེང་སློང་བྱ་རྒྱུར་བཀག་བསྡོམ་གནང་ངེས་ཡིན་པ་གསལ་ཡོད་སྟབས་མཉེན་ཆས་དེ་བཟོ་མཁན་ riot games ཚོང་ལས་ཁང་ནས་ཐོག་མའི་འཆར་རྩེད་འགྲན་པ་ཚོའི་ཞུ་གཏུགས་དེ་དག་སྣང་མེད་དུ་འཇོག་ཡོད་པ་མ་ཟད་ཞུ་གཏུག་དེ་དག་མཉེན་ཆས་དེ་ནས་ཕྱིར་འཐེན་བྱས་འདུག འོན་ཀྱང་མཉེན་ཆས་བཀོལ་སྤྱོད་གནང་མཁན་ཚོས་རྗེས་སུ་ Reddit  ཞེས་པའི་དྲྭ་གནས་ཐོག་གནས་ཚུལ་དེའི་སྐོར་ཡང་བསྐྱར་བཀོད་རྗེས་ Riot Games ཚོང་ལས་ཁང་གི་འབྲེལ་ཡོད་ལས་བྱེད་ Ryan Rigney ལགས་ཀྱིས་ twitter བརྒྱུད་གནས་ཚུལ་དེར་ངོས་ལེན་ཞུས་པ་དང་འབྲེལ་ཏེ་དྲྭ་ཐོག་གི་རྩེད་འགྲན་ནང་དུ་མི་རིགས་བྱེ་བྲག་པ་ཞིག་གི་མིང་བཀག་བསྡོམ་བྱས་པ་དེ་ནི་བྱབ་ཆུང་གི་ལས་ཀ་ཞིག་ཡིན་པར་འགྲེལ་བརྗོད་གནང་བ་དང་ཆབས་ཅིག ཚོང་ལས་ཁང་གི་ངོས་ནས་གནད་དོན་དེར་ཞིབ་གཅོད་དང་ཁ་སྐོང་ཇི་དགོས་ཞུ་ངེས་ཡིན་པར་བརྗོད་འདུག གཞི་རྩའི་རྒྱ་ནག་ནང་དྲྭ་ཐོག་གྱི་རྩེད་འགྲན་དང་འབྲེལ་བའི་མཉེན་ཆས་བཀོལ་སྤྱོད་བྱེད་སྐབས་བོད་རང་བཙན་དང་ཐེ་ཝན། གནམ་སྡེ་སྒོར་མོ་ཆེའི་དོན་རྐྱེན། ༸གོང་ས་མཆོག་གི་མཚན་སོགས་ཐ་སྙད་མང་དག་ཅིག་ལ་དམ་དྲག་བྱས་དང་བྱེད་བཞིན་པ་དེ་ནི་རྒྱུན་ལྡན་གྱི་བྱེད་སྟངས་ཤིག་ཡིན་ཀྱང་། དེང་སྐབས་ Tencent ལྟ་བུ་དྲྭ་ཐོག་གི་རྩེད་འགྲན་བཟོ་མཁན་རྒྱ་ནག་གི་ཚོང་ལས་ཁང་ཆེ་གྲས་དེའི་ཤུགས་རྐྱེན་ལ་བརྟེན་རྒྱ་ནག་གཞུང་གི་དབང་ཤུགས་དེ་རྒྱ་ནག་རྒྱལ་ནང་ཙམ་མ་ཟད་རང་དབང་ལྡན་པའི་རྒྱལ་ཁབ་གཞན་ནང་ལའང་ཁྱབ་བརྡལ་ཆེན་པོ་འགྲོ་བཞིན་ཡོད་པ་རེད། ཉེ་ལམ་ NBA ཞེས་ཨ་མི་རི་ཀའི་རྒྱལ་ཡོངས་སིལ་སྦོལ་ལྷན་ཚོགས་ཀྱི་ཚོགས་མི་ཡིན་པའི་ houston rockets  རུ་ཁག་གི་འགན་འཛིན་སྐུ་ཞབས་ Morey ལགས་ཀྱིས་ཧོང་ཀོང་ནང་གི་ལས་འགུལ་ལ་རྒྱབ་སྐྱོར་གྱི་བཀའ་མོལ་གནང་རྗེས་རྒྱ་ནག་དབུས་བརྙན་འཕྲིན་ལས་ཁང་དང་ Tencent ཚོང་ལས་ཁང་ནས་ NBA སིས་སྦོལ་རྩེད་འགྲན་རྒྱ་ནག་ནང་ཐད་ཀར་རྒྱང་སྲིང་གནང་བར་བཀག་བསྡོམ་བྱས་ཡོད་པ་རེད། བི་བི་སི་བརྙན་འཕྲིན་ལས་ཁང་གིས་ཐེངས་འདིའི་གནད་དོན་དང་འབྲེལ་ཏེ་ Tencent ཚོང་ལས་ཁང་དང་དེ་བཞིན་ཨ་རིའི་ནང་རྟེན་གཞི་བྱས་པའི་ Riot Games ཚོང་ལས་ཁང་གཉིས་ལ་འབྲེལ་བ་ཞུས་ཀྱང་ད་ལྟའི་ཆར་ཚོང་ལས་ཁང་དེ་དག་ནས་འགྲེལ་བརྗོད་གང་ཡང་གནང་མི་འདུག

འདི་ལོ་ ༢༠༡༩ དེ་བཞིན་འཇམ་མགོན་བླ་མ་ཙོང་པ་ཆེན་པོ་མཆོག་ཟུང་འཇུག་མངོན་དུ་མཛད་ནས་ལོ་ངོ་ ༦༠༠ འཁོར་བའི་དུས་ཁྱད་དང་སྟབས་བསྟུན་རི་བོ་དགེ་ལྡན་པ་ཚོའི་ངོས་ནས་༸རྗེ་བདག་ཉིད་ཆེན་པོ་མཆོག་གི་བཀའ་དྲིན་རྗེས་དྲན་དང་འབྲེལ་ཕྱི་ལོ་ ༢༠༡༩ འདི་བཞིན་རྒྱལ་སྤྱིའི་༸རྗེ་ཙོང་ཁ་པའི་ལོ་ཞེས་རྒྱ་གར་གཙོ་བོར་གྱུར་པའི་འཛམ་གླིང་ས་ཕྱོགས་གང་སར་ཆོས་ཕྱོགས་ཀྱི་གནང་སྒོ་འདྲ་མིན་བརྒྱུད་ནས་སྲུང་བརྩི་ཞུ་བཞིན་ཡོད་པ་ལྟར། ཁ་ཉིན་ཕྱི་ཚེས་༢༠ ཉིན་ཡོ་རོབ་རྒྱལ་ཁབ་ཨོ་སེ་ཏྲེ་ཡའི་ལྷོ་ནུབ་མངའ་སྡེ་ Carinthia ནང་རྟེན་གཞི་བྱས་པའི་བོད་ཀྱི་ཆེས་མཐོའི་སློབ་གཉེར་ཁང་དུ་འཇམ་དགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་མཆོག་དབུ་བཞུགས་ཐོག་སུད་སི་སྐུ་ཚབ་དོན་གཅོད་འཆི་མེད་རིན་འཛིན་ལགས། ཕྱི་ནང་གི་དད་ལྡན་ཆོས་ཞུ་བ་རྣམས་འདུ་འཛོམས་ཐོག་ལ་འཇམ་མགོན་བླ་མ་ཙོང་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ནས་ལོ་ངོ་ ༦༠༠ འཁོར་བའི་རྗེས་དྲན་སྲུང་བརྩི་ཞུས་འདུག སྤྱིར་དགའ་ལྡན་ཁྲི་རིན་པོ་ཆེ་མཆོག་གིས་ཟླ་ ༡༠ ཚེས་ ༡༤ ཉིན་ཨོ་སི་ཏྲེ་ཡའི་བོད་ཀྱི་ཆེས་མཐོའི་སློབ་གཉེར་ཁང་དུ་༸ཞབས་སོར་འཁོད་ནས་ཉིན་གྲངས་དྲུག་གི་རིང་ཆོས་འབྲེལ་མཛད་བཞིན་ཡོད་པ་དང་། ཕྱི་ཚེས་ ༡༨ དང་ ༡༩ དེ་བཞིན་ ༢༠ བཅས་སུ་ས་གནས་སུ་ཡོད་པའི་དད་ལྡན་ཆོས་ཞུ་བ་ཚོར་༸དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་བཀའ་དབང་དང་༸དཔལ་རྡོ་རྗེ་སེམས་པའི་རྗེས་སྣང་བསྩལ་བ། ཁ་སང་ཕྱི་ཚེས་ ༢༡ ནས་ ༢༣ བར་ཉིན་གྲངས་གསུམ་གྱི་རིང་༸དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་བདག་བསྐྱེད་ལུང་ཁྲིད་བཅས་གནང་བཞིན་ཡོད་པ་རེད། རྩ་བའི་ཨོ་སི་ཏྲི་ཡའི་ནང་རྟེན་གཞི་བྱས་པའི་བོད་ཀྱི་ཆེས་མཐོའི་སློབ་གཉེར་ཁང་དེ་ Carinthia མངའ་སྡེས་གསོལ་འདེབས་ཞུས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལམ་སྟོན་མཛད་པའི་འོག་ནས་ས་གནས་ཡུལ་མི་ཚོར་བོད་ཀྱི་ཆོས་དང་རིག་གཞུང་སློབ་གཉེར་བྱ་ཡུལ་ལྟེ་གནས་ཤིག་ལ་དམིགས་ཏེ་ཕྱི་ལོ་ ༢༠༠༨ ལོར་དངོས་སུ་དབུ་འབྱེད་གནང་བ་ཞིག་ཡིན་འདུག་ཅིང་། ལྟེ་གནས་ཁང་དེས་ཆོས་དད་ཡོད་མེད་དང་ཆོས་ལུགས་རིས་མེད་ཀྱི་སྐྱེ་བོ་ཀུན་ལ་ནང་ཆོས་ནང་ཡོད་པའི་སེམས་ཁམས་རིག་པ་དང་ལྟ་འགྲུབ། གསོ་བ་རིགས་པ་སོགས་སློབ་ཁྲིད་གནང་བཞིན་ཡོད་པ་རེད།