དེ་རིང་སྔ་དྲོ་ཕྱག་ཚོད་བཅུ་བའི་ཐོག་བཞུགས་སྒར་དུ་རྟེན་གཞི་བྱས་པའི་དབུས་གཞོན་ནུ་ལྷན་ཚོགས་ཀྱིས། རྡ་སའི་མེག་གྷན་ཁྲོམ་གཞུང་གི་བཞི་མདོ་རུ། རྒྱ་ནག་གི་ཅ་དངོས་ཉོ་ཚོང་མཚམས་འཇོག་དགོས་བའི་ཉིན་བརྒྱ་དུས་གཅིག་གི་གཞི་རྒྱ་ཆེ་བའི་ལས་འགུལ་ཞིག་སྤེལ་ཏེ། བོད་ཧིན་དབྱིན་གསུམ་གྱི་ཐོག་ནས་མི་མང་གིས་གཅིག་སྒྲིལ་གྱི་ཐོག་ནས་རྒྱ་ནག་གི་ཅ་དོངས་ཉོ་ཚོང་མཚམས་འཇོག་དགོས་བའི་གཏམ་བཤད་གནང་སོང་།
དེ་རིང་གི་ལས་འགུལ་དེའི་ཐོག ཧིན་བོད་མཛའ་འབྲེལ་ཚོགས་པའི་སྐུ་ཚབ་དང་། རྒྱ་གར་གྱི་ཚོང་པ་ཚོགས་པའི་སྐུ་ཚབ། དེ་བཞིན་བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་སྐྱིད་ཁག་གི་ཚོགས་མི་དང་ཧིན་བོད་གཉིས་ཀྱི་གསར་འགོད་པ་རྣམས་དང་མི་མང་སོགས་འདུ་འཛོམས་ཀྱིས། རྒྱ་ནག་གི་ཇ་དེམ་དང་རྩིས་འཁོར་སོགས་ཀྱི་མཚོན་པའི་ཅ་དངོས་མང་པོ་དང་ལྷན་དུ། རྒྱ་ནག་གི་སྲིད་འཛིན་ཞི་ཅིན་ཕིང་གི་འདྲ་གཟུགས་དང་དང་རྒྱ་ནག་གི་རྒྱལ་དར་བཅས་མེར་བསྲེགས་བཏང་བའི་ཐོག བོད་ཀྱི་རང་དབང་ནི་རྒྱ་གར་གྱི་བདེ་འཇགས་ཡིན། ཏོག་དབྱིབས་ནད་དུག་ནི་རྒྱ་ནད་རེད། དེ་བཞིན་༸གོང་ས་མཆོག་སྐུ་ཚེ་ཁྲི་ལོ་བརྟན་པར་ཤོག་སོགས་ཀྱི་སྐད་འབོད་འདྲ་མིན་གྱི་ཁྲོད་མེག་གྷན་ཁྲོམ་གཞུང་དུ་རྒྱ་ནག་དམར་པོའི་སྲིད་གཞུང་ལ་རྔམ་སྟོན་ཁྲོམ་སྐོར་གྱི་ལས་འགུལ་ཞིག་སྤེལ་སོང་།
སྐབས་དེར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས་བོད་སྐད་ཐོག་ནས་རྒྱ་ནག་གི་ཅ་དངོས་ཉོ་ཚོང་མཚམས་འཇོག་དགོས་བའི་དོན་ཚན་གསུམ་གྱི་ཐོག་ནས་མི་མང་ལ་གཏམ་བཤད་གནང་སྟེ། འདི་ལོ་རྒྱ་ནག་གིས་འཛམ་གླིང་གང་སར་ཏོག་དབྱིབས་རིམས་ནད་ཁྱབ་བརྡལ་གྱིས་རྒྱལ་སྤྱི་མང་ཚོགས་ཁྲི་སྟོང་མང་པོའི་ཚེ་སྲོག་འཕྲོག་བཞིན་པའི་དུས་སྐབས་འདིར། རྒྱལ་སྤྱིའི་མི་མང་གིས་ཕྱོགས་གང་ས་ནས་རྒྱ་ནག་གི་རྒྱ་བསྐྱེད་རིང་ལུགས་ཀྱི་སྲིད་བྱུས་ལ་ངོ་རྒོལ་གནང་རྒྱུ་གལ་ཆེན་པོ་ཡིན་པར་གསུངས་སོང་། 
གཞི་རྩའི་དེ་རིང་གི་རྒྱ་ནག་གི་ཅ་དངོས་ཉོ་ཚོང་མཚམས་འཇོག་དགོས་བའི་ལས་འགུལ་འདི་ནི། དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་ཏེ། རྒྱལ་སྤྱིའི་ཁྲོད་ཀྱི་གཞོན་ནུ་ལྷན་ཚོགས་ཀྱི་ས་གནས་ཡན་ལག་ཚོགས་པ་ཁག་ཐུན་མོང་གིས་ཉིན་བརྒྱ་དུས་གཅིག་གི་ལས་གཅིག་ལས་འགུལ་ཞིག་ཆགས་ཀྱི་ཡོད་སྟབས། རྒྱ་གར་གཙོ་བྱས་པའི་རྒྱལ་སྤྱིའི་སྤྱི་ཚོགས་གང་སར་དུས་གཅིག་ལ་ལས་འགུལ་འདི་སྤེལ་བཞིན་པ་ཞིག་རེད་འདུག
