Weiquanwang ཞེས་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པས་གསང་བའི་འདྲ་པར་ཁག་གཅིག་ཕྱི་གྱར་གནང་བའི་བརྒྱུད། བོད་དཀར་མཛེས་ཁུལ་གྱི་ཡར་ཀླུང་གཙང་པོའི་ཆུ་རྒྱུན་ཐོག་རྒྱ་ནག་གི་ཆུ་ཤུགས་གློག་ཁང་གསར་རྒྱག་གི་ལས་གཞི་དེ་དག་གིས་ཁོར་ཡུག་གཏོར་བཤིག་གཏོང་གིན་ཡོད་པ་ར་སྤྲོད་གནང་འདུག
དེ་ཡང་ཁ་ཉིན་ཚེས་ ༡༨ ཉིན་ཚོགས་པའི་དྲ་གནས་ཐོག་རྒྱ་གཞུང་གིས་དབྱེ་བའི་བོད་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཉག་ཆུ་རྫོང་ཁུལ་དུ། ཡར་ཀླུང་གཙང་པོའི་ཆུ་རྒྱུན་ཐོག་རྒྱ་ནག་གིས་གཞི་རྒྱ་ཆེ་བའི་ཆུ་ཤུགས་གློག་ཁང་གསར་རྒྱག་གི་ལས་གཞི་སྤེལ་བཞིན་པའི་ཉེ་བའི་འདྲ་པར་ཁག་གཅིག་ཕྱི་གྱར་གནང་འདུག དེའི་ནང་ཆུ་ཤུགས་གློག་ཁང་གི་ལས་གཞི་འགོ་འཛུགས་མ་བྱས་པའི་གོང་ལ་ས་ཁུལ་དེའི་རི་དང་ཆུ་རྒྱུན་ཐོག་གཏོར་བཤིག་ཤུགས་ཆེ་བཏང་སྟེ། རིའི་ཐོག་བཟོ་བསྐྲུན་བྱས་པའི་རྒྱ་ལམ་ཐོག་ནས་རྡོ་རྣམས་འོར་འགྲེན་བྱེད་བཞིན་པ་དང་། ཆུ་ཤུགས་གློག་ཁང་གི་ལས་གཞི་འགོ་བཙུགས་བྱས་རྗེས་འཕྲུལ་རིགས་ཧ་ཅང་ཆེ་བ་འགྲེམས་འཇོག་བྱས་པ་སོགས་མངོན་རྒྱུ་འདུག དེ་དག་གིས་རྒྱ་ནག་དམར་ཤོག་གཞུང་གིས་ཐབས་བྱུས་ལྡན་པའི་ཐོག་ནས་བོད་ཀྱི་ཁོར་ཡུག་གཏོར་བཤིག་ཇི་ལྟར་གཏོང་བཞིན་པ་མངོན་རྒྱུ་ཡོད་པ་གསུངས་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཁོར་ཡུག་ཉམས་ཞིབ་པ་འཛམ་ལྷ་བསྟན་པ་རྒྱལ་མཚན་ལགས་སུ་དེ་འབྲེལ་བཀའ་འདྲི་ཞུས་སྐབས་ཁོང་གིས། རྒྱ་ནག་གཞུང་གིས་ཐོག་མར་ཕྱི་ལོ་ ༢༠༠༥ ཙམ་ནས་ས་ཁུལ་དེར་རྟོག་ཞིབ་འགོ་བཙུགས་རྗེས་ ༢༠༡༤ ཙམ་ནས་ཆུ་མཛོད་གསར་རྒྱག་གི་ལས་གཞི་དངོས་སུ་འགོ་བཙུགས་ཀྱིས། ཕྱི་ལོ་ ༢༠༢༢ བར་དུ་ཆུ་མཛོད་དེ་དངོས་སུ་བེད་སྤྱོད་གཏོང་འགོ་བཙུགས་ཡོད་ཅིང་། ལས་གཞི་འདིའི་ཆེད་དུ་དེ་སྔ་ས་གནས་བོད་མིའི་གྲོང་སྡེ་དང་འབྲོག་པ་མང་པོ་གནས་སྤོ་བཏང་བ་སོགས་ས་གནས་མང་ཚོགས་ཀྱི་འཚོ་བ་དང་། ཁོར་ཡུག་ལ་དོ་ཕོག་བཏང་བའི་སྐོར་གླེང་སློང་ཤུགས་ཆེ་བྱུང་ཡོད་པ་མ་ཟད། ད་རེས་ཀྱི་འདྲ་པར་གསར་པ་དེ་དག་གིས་དེ་སྔ་ཆུ་མཛོད་ལས་གཞི་འདི་དང་འབྲེལ་བའི་ཁོར་ཡུག་གཏོར་བཤིག་ཀྱི་གནད་དོན་རྣམས་དངོས་ཡོད་ཡིན་པ་ར་སྤྲོད་འབྱུང་བཞིན་ཡོད་པ་ཐེར་འདོན་གནང་སོང་།
