བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱ་གར་དབུས་གཞུང་ནས་རྒྱ་གར་ལྷོ་ཕྱོགས་ཀ་ན་ཊ་ཀའི་མངའ་སྡེ་ནང་རྟེན་གཞི་བྱས་པའི་མོན་གྷོ་འདོད་དགུ་གླིང་བོད་མིའི་གཞིས་ཆགས་བོགས་གཏོང་གནང་རྒྱུའི་ཁྲིམས་མཐུན་གྱི་གན་རྒྱར་མཚན་རྟགས་བཀོད་འདུག
ཟླ་ ༡༢ ཚེས་ ༢༡ ཉིན་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་
རྟེན་གཞི་བྱས་པའི་གདན་ས་ཆེན་པོ་དཔལ་ལྡན་འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འཁོར་བའི་རྗེས་དྲན་མཛད་སྒོའི་མགྲོན་གྱི་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་པ་དང་བསྟུན། རྒྱ་གར་དབུ་གཞུང་གི་སྐུ་ཚབ་ཀ་ན་ཊ་ཀ་མངའ་སྡེའི་ཀར་ཝར་རྫོང་གི་རྫོང་དཔོན་སྐུ་ཞབས་ S S Nukul མཆོག་དང་དབུས་བོད་མིའི་ངལ་སེལ་ཚོགས་པའི་ངོ་ཚབ་མོན་གྷོ་ས་གནས་འགོ་འཛིན་ཀརྨ་ལགས་གཉིས་ཀྱིས་མོན་གྷོ་འདོད་རྒུ་གླིང་སྐྱབས་བཅོལ་བོད་མི་རྣམས་ལ་རྒྱ་གར་གཞུང་གིས་ས་ཞིང་བོགས་གཏོང་གནང་བའི་ཁྲིམས་མཐུན་གན་རྒྱར་མཚན་རྟགས་བཀོད་འདུག
གཞི་རྩའི་མོན་གྷོ་འདོད་རྒྱུ་གླིང་བོད་མིའི་གཞིས་ཆགས་དེའི་ངོས་ནས་རྒྱ་གར་གཞུང་གི་ཁྲིམས་ལུགས་གཞིར་བཟུང་བོགས་གཏོང་གི་གན་རྒྱ་བཞག་ཐུབ་པ་དེ་ནི་རྒྱ་གར་ནང་ཡོད་པའི་བོད་མིའི་གཞིས་ཆགས་ཁྲོད་ནས་ཆེས་ཐོག་མ་དེ་ཆགས་ཀྱི་ཡོད་པ་རེད། བོགས་གཏོང་གི་གན་རྒྱ་བཞག་རྒྱུ་དེའང་ཕྱི་ལོ་ ༢༠༡༤ ལོར་རྒྱ་གར་དབུས་གཞུང་ནང་སྲིད་ལས་ཁུངས་ནས་གཏན་འབེབས་གནང་པའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་གནང་ཕྱོགས་ཀྱི་སྲིད་བྱུས་ ༢༠༡༤ ཞེས་པའི་དགོངས་དོན་འོག་གཏན་འབེབས་གནང་པ་ཞིག་ཆགས་ཡོད་པ་རེད།
དེ་བཞིན་ཟླ་བ་འདིའི་ཚེས་ ༢༡ ཉིན་རྒྱ་གར་དབུས་གཞུང་ནས་མོན་གྷོ་འདོད་དགུ་གླིང་བོད་མིའི་གཞིས་ཆགས་བོགས་གཏོང་གནང་རྒྱུའི་ཁྲིམས་མཐུན་གྱི་གན་རྒྱར་མཚན་རྟགས་བཀོད་ཟིན་རྗེས་ཉིན་རྒྱབ་ཏུ་བོད་མི
འི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ས་གནས་བོད་མི་མང་ཚོགས་རྣམས་ལ་གཏམ་བཤད་གནང་པར་རྒྱ་གར་ནང་བོད་མིའི་གཞིས་ཆགས་བཙུགས་ཏེ་ལོ་ངོ་བཅུ་ཕྲག་བཞི་ལྷག་འགྲོ་བཞིན་ཡོད་ཀྱང་། ས་ཞིང་གི་བདག་དབང་སོགས་དང་འབྲེལ་བའི་ཁྲིམས་མཐུན་གྱི་ཡིག་ཆ་གང་ཡང་གཏན་འབེབས་གནང་ཐུབ་མེད་སྟབས། གཞིས་ཆགས་ཁག་ཅིག་ཏུ་ས་ཆའི་བདག་དབང་དང་འབྲེལ་བའི་དཀའ་རྙོག་མི་ཉུང་བ་ཞིག་འཕྲད་བཞིན་ཡོད་སྐོར་འགྲེལ་བརྗོད་གནང་པ་དང་སྦྲགས། ད་རེས་རྒྱ་གར་དབུས་གཞུང་དང་ཀ་ན་ཊ་ཀ་ཀར་ཝར་རྫོང་གི་རྫོང་དཔོན་སྐུ་ཞབས་ S S Nukul མཆོག་ནས་ད་བར་གནད་དོན་དེའི་ཐོག་ཕྱག་ལས་རབས་དང་རིམ་པ་གནང་སྟེ་ཁྲིམས་མཐུན་གྱི་གན་རྒྱ་བཞག་ཐུབ་པར་བཀའ་དྲིན་ཆེ་ཞེས་ཞུས་པ་མ་ཟད། རྒྱ་གར་གྱི་མངའ་སྡེ་གཞན་རྣམས་ནས་ཀྱང་དེ་ལྟར་ལག་བསྟར་གནང་སྐྱོང་ཡོང་བར་འབོད་སྐུལ་ཡང་ཞུས་འདུག
ཀར་ཝར་རྫོང་གི་རྫོང་དཔོན་སྐུ་ཞབས་ S S Nukul མཆོག་ནས་ཀྱང་ཐེསངས་དེའི་ས་ཞི
ང་བོགས་མའི་ཁྲིམས་མཐུན་གྱི་གན་རྒྱ་བཞག་པ་དེའི་བརྒྱུད། ས་གནས་བོད་མི་རྣམས་ལ་རྒྱ་གར་གཞུང་གི་ཁང་པ་དང་ས་ཞིང་འདེབས་ལས་སོགས་དང་འབྲེལ་བའི་ལས་འཆར་གྱི་ཐོབ་ཐང་ཁག་ཅིག་ཀྱང་རིམ་པའི་ཐོབ་ངེས་ཡིན་པ་གསུངས་འདུག
རྩ་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཉི་སྟོང་བཅུ་བཞི་ཞེས་པའི་དགོངས་དོན་འོག་བོགས་མའི་གན་རྒྱ་དང་འབྲེལ་བའི་རྩ་འཛིན་ལ་གཞིགས་ན། ད་རེས་ཕྱོགས་གཉིས་དབར་ལ་ས་ཞིང་བོགས་མའི་ཁྲིམས་མཐུན་གྱི་གན་རྒྱ་བཞག་ཐུབ་པ་དེས། མ་འོངས་པར་བོད་མི་སྐྱབས་བཅོལ་བའི་བེད་སྤྱོད་བྱེད་བཞིན་པའི་ས་ཆ་ལ་འགོག་རྐྱེན་བྱེད་མི་ཆོག་པ་མ་ཟད། གལ་སྲིད་རྒྱ་གར་གཞུང་གི་ཁྲིམས་ཁང་ཞིག་ནས་དགོས་དབང་གི་བཀའ་རྒྱ་ལ་བརྟེན་ནས་ས་ཆའི་བདག་དབང་འཕྲོག་པའི་གནས་སྟངས་ཆགས་ཚེ་མངའ་སྡེ་གཞུང་ནས་བོད་མི་སྐྱབས་བཅོལ་བ་རྣམས་ལ་ས་ཆ་གསར་པ་ཚད་གཞི་མཉམ་པའམ། དེ་ལས་ཆེ་བ་སྤྲོད་ནས་གནས་སྤོ་བྱེད་བཅུག་པ་སོགས་ཀྱི་གནས་ཚུལ་མི་ཡོང་བ་དང་དེ་བཞིན་ས་གནས་ཡུལ་མི་དང་བོད་མི་སྐྱབས་བཅོལ་བའི་དབར་འཁྲུག་རྩོད་རིགས་མི་བྱུང་སླད་དུ་དེ་ལྟར་གཏན་འབེབས་གནང་པ་ཞིག་ཆགས་ཡོད་པ་རེད།
