བཞུགས་སྒར་གྱི་ཉེ་འདབས་སུ་རྟེན་གཞི་བྱས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཏོག་དབྱིབས་གཉན་རིམས་ཁྱབ་བརྡལ་གྱི་གནས་སྟངས་ཛ་དྲག་ཏུ་གྱུར་སྟབས། དབུས་སྣེ་ལེན་ཁང་གི་སྨན་པ་དང་སྨན་ཞབས་པ། དེ་བཞིན་ཛ་དྲག་གི་ཡོ་ཆས་རྣམས་མཐོ་སློབ་ཏུ་གནས་སྐབས་རིང་གནས་སྤོས་ཀྱིས་ནད་པར་སྨན་བཅོས་གནང་མུས་རེད་འདུག
རླུང་འཕྲིན་ཁང་ནས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ལགས་སུ་ཞལ་པར་བརྒྱུད་མཐོ་སློབ་ཀྱི་གནས་སྟངས་སྐོར་བཀའ་འདྲི་ཞུས་པར་ཁོང་གིས་ཐོག་མར་ཟླ་བ་འདིའི་ཚེས་ ༡༦ ཉིན་སློབ་ཕྲུག་ལྔ་ལ་ནད་རྟགས་ཐོན་པ་དང་། རིམ་བཞིན་མཐོ་སློབ་ཀྱི་དགེ་སློབ་རྣམས་ལ་བརྟག་དཔྱད་གནང་འབྲས་ད་ལྟའི་ཆར་དགེ་སློབ་ ༨༦ ལ་ནད་དུག་ཕོག་ཡོད་པ་དང་། དེ་དག་གི་ཁོངས་སུ་དགེ་རྒན་གཅིག་དང་སློབ་ཕྲུག་གཉིས་ཀྱི་གནས་སྟངས་ཛ་དྲག་ཏུ་གྱུར་ནས་རྒྱ་གར་གཞུང་གི་སྨན་ཁང་ Tanta དུ་ཕེབས་དགོས་བྱུང་ཡོད་སྐོར་སོགས་གསུངས་སོང་།
དེ་བཞིན་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་། སྣེ་ལེན་ཁང་གི་མཐུན་འགྱུར་འོག་སྣེ་ལེན་ཁང་གི་སྨན་པ་དང་སྨན་ཞབས་པ། ཛ་དྲག་གི་ཡོ་ཆས་རྣམས་མཐོ་སློབ་ཏུ་འོར་འདྲེན་གནང་སྟེ་སྨན་བཅོས་གནང་མུས་ཡིན་པ་གསུངས་ཡོད།
ས་རཱ་མཐོ་སློབ་ཏུ་ཛ་དྲག་གནས་སྟངས་བྱུང་བར་བརྟེན་བོད་མིའི་སྒྲིག་འཛུགས་ཀྱི་ངོས་ནས་ཨ་རི་དང་ཁེ་ན་ཌ་ནས་ཕེབས་པའི་སྨན་ཞབས་པ་གཅིག་དང་མོན་གྷོ་འདོད་རྒུ་གླིང་ནས་ཕེབས་པའི་སྨན་ཞབས་པ་གཅིག་བཅས་སྨན་བཅོས་ཀྱི་རོགས་སྐྱོར་སླད་བཏང་ཡོད་པ་མ་ཟད། ཨ་རི་དང་རྒྱ་གར་ནས་ཕེབས་པའི་དང་བླངས་སྨན་ཞབས་པ་གཞན་རྣམས་བོད་ཁྱིམ་དང་། མོན་གྷོ་འདོད་རྒུ་གླིང་། བདེ་སྐྱིད་གླིང་བོད་མིའི་གཞིས་ཆགས། དེ་བཞིན་གཟིགས་ཞིབ་དང་སྦྱོང་བརྡལ་སྤྲོད་ཆེད་སྨན་ཞབས་པ་གཉིས་བཅས་སོ་སོར་ལས་བགོས་གནང་སྐོར་བོད་མིའི་སྒྲིག་འཛུགས་ཀྱི་ COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༥ པའི་ཐོག་གསལ་བསྒྲགས་གནང་ཡོད་པ་རེད།
ཁ་སང་གི་གསར་འགོད་གསལ་བསྒྲགས་དེའི་ཐོག་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས་གཞུང་དང་སྒེར། དགོན་སྡེ་དང་བླ་བྲང་། དེ་བཞིན་ཚོགས་སྐྱིད་བཅས་ཀྱི་མཐུན་འགྱུར་ལ་བརྟེན་ནས་བཙན་བྱོལ་བོད་མིར་སྔོན་ཁབ་རྒྱག་རྒྱུར་འབད་བརྩོན་གནང་བ་བཞིན་རྒྱ་བལ་གཉིས་སུ་སྔོན་ཁབ་དང་པོ་ཐོབ་པ་བརྒྱ་ཆ་བདུན་ཅུ་དང་། སྔོན་ཁབ་གཉིས་པ་ཐོབ་པ་བརྒྱ་ཆ་གསུམ་ཅུ་མ་ཟིན་ཙམ་ཆགས་ཀྱི་ཡོད་པ་གསུངས་སོང་།
གསར་འགོད་ལྷན་ཚོགས་དེའི་ཐོག་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་ནང་རྒྱ་བལ་གཉིས་སུ་བཙན་བྱོལ་བོད་མིའི་ཁྲོད་གཟའ་འཁོར་སྔོན་མའི་ནང་བོད་མི་ ༡༣༣ ལ་ནད་རྟགས་ཐོན་ཡོད་པ་དང་། བོད་མི་ལྔ་འདས་གྲོངས་སུ་གྱུར་ཡོད་པར་སྙན་སེང་དང་སྦྲགས། བཙན་བྱོལ་བོད་མིའི་འདུས་སྡོད་ཁྲོད་ནད་དུག་དེས་མནར་བཞིན་པ་བོད་མི་ ༤༢༣ ཆགས་ཀྱི་ཡོད་པ་དང་། ལྷག་པར་དུ་བདེ་སྐྱིད་གླིང་དང་མོན་གྷོ་འདོད་རྒུ་གླིང་། སྦེལ་ཀོབ་བོད་མིའི་གཞིས་ཆགས། དེ་བཞིན་བཞུགས་སྒར་དྷ་རམ་ས་ལ་བཅས་ནི་ཉེན་འཚབ་ཆེ་བའི་ས་གནས་ཆགས་ཀྱི་ཡོད་པ་གསུངས་ཡོད།
བོད་མིའི་སྒྲིག་འཛུགས་ COVID19 ལས་དོན་ཚོགས་ཆུང་གིས་གསར་འགོད་གསལ་བསྒྲགས་གནང་གསལ་ད་བར་རྒྱ་གར་ནང་མི་གྲངས་ས་ཡ་གསུམ་ཅུ་ལ་ནད་དུག་དེ་ཕོག་ཡོད་པ་དང་། ད་ལྟའི་ཆར་ནད་དུག་དེས་མནར་བཞིན་པའི་མི་གྲངས་འབུམ་དྲུག་ལྷག་ཆགས་ཀྱི་ཡོད་པ་མ་ཟད། རྒྱ་བལ་གཉིས་སུ་གནས་སྡོད་བོད་མིའི་སྤྱི་ཚོགས་ཁྲོད་ད་བར་བོད་མི་ ༥༠༨༤ ལ་ནད་དུག་ཕོག་ཡོད་པ་དང་བོད་མི་ ༤༥༣༠ དྲག་སྐྱེད་བྱུང་བ། དེ་བཞིན་བོད་མི་ ༡༣༡ འདས་གྲོངས་སུ་གྱུར་བ་དང་ད་ལྟའི་ཆར་ནད་ཀྱིས་མནར་བཞིན་པ་བོད་མི་ ༤༢༣ ཆགས་ཀྱི་ཡོད་པ་རེད།
