བོད་མི་མང་སྤྱི་འཐུས་ལྷན་ཚོགས་སུ་འདེམས་ཐོན་བྱུང་བའི་འཐུས་མི་རྣམ་པ་སྤྱི་འཐུས་ཀྱི་ལས་ཁུར་དམ་འབུལ་ཞུས་རྗེས་བོད་མི་གནས་ཡུལ་གྱི་ས་གནས་ཁག་ས་འགོས་གནང་སྟེ་གཞུང་འབྲེལ་འཚམས་སུ་ཕེབས་སྲོལ་ཡོད་པ་སྟར་སྐབས་ ༡༧ པའི་བོད་མི་མང་སྤྱི་འཐུས་རྣམ་པའི་གཞུང་འབྲེལ་འཚམས་གཟིགས་ཆེས་ཐོག་མ་དབུ་འཛུགས་གནང་འདུག 
འདི་ལོའི་ཕྱི་ཟླ་ ༡༠ ནང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོའི་མཚན་ཐོག་ནས་སྤྱི་བསྒྲགས་ཤིག་སྤེལ་བར་སྐབས་ ༡༧ པའི་བོད་མི་མང་སྤྱི་འཐུས་རྣམ་པའི་གཞུང་འབྲེལ་འཚམས་གཟིགས་དང་འབྲེལ་བའི་ལམ་སྟོན་ནང་ཐེངས་འདིའི་གཞུང་འབྲེལ་འཚམས་གཟིགས་འདི་ཕྱི་ ༡༡ ཚེས་ཤར་ནས་ཕྱི་ཟླ་ ༣ བདུན་ཕྲག་དང་པོའི་ནང་ཚུད་དུ་མཇུག་སྒྲིལ་ཐུབ་དགོས་ཞེས་གསལ་དོན་ལྟར། ཁ་སང་ཕྱི་ཚེས་ ༢༧ ཉིན་བོད་མི་མང་སྤྱི་འཐུས་སྤྱི་འཐུས་དོན་གྲུབ་བཀྲ་ཤིས་ལགས་དང་སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་རྣམ་གཉིས་བཞུགས་སྒར་དྷརྨ་སཱ་ལཱ་ནས་ཕེབས་ཐོན་གྱིས་ཟླ་བ་རྗེས་མའི་ཕྱི་ཚེས་ ༡༡ བར་ཁྱོན་ཉིན་གྲངས་ ༡༥ རིང་རྒྱ་གར་བྱང་ཤར་ཁུལ་གྱི་བོད་མི་གནས་ཡུལ་གྱི་ས་གནས་ཏི་ཛུ་དར་རྒྱས་གླིང་དང་། ཀྲུ་ཀྲིང་། མེའོ་ཆོས་འཕེལ་གླིང་། ཨི་ཊཱ་ན་གྷར་བཅས་སུ་གཞུང་འབྲེལ་འཚམས་གཟིགས་གནང་གི་འདུག
གཞི་རྩའི་ཐེངས་འདིའི་སྤྱི་འཐུས་རྣམ་པའི་གཞུང་འབྲེལ་འཚམས་གཟིགས་ནི་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་བདམས་ཐོན་བྱུང་བའི་སྤྱི་འཐུས་གསར་པ་ཚོའི་གཞུང་འབྲེལ་འཚམས་གཟིགས་ཆེས་ཐོག་མ་དེ་ཆགས་ཀྱི་ཡོད་སྟབས། ཁོང་རྣམ་པ་ཕེབས་སའི་ས་གནས་ཁག་ཏུ་སྤྱི་འཐུས་རྙིང་པ་རེ་ལྷན་དུ་ཕེབས་ཀྱི་ཡོད་པ་དང་འཚམས་གཟིགས་དང་འབྲེལ་བའི་ལམ་སྟོན་ཡིག་ཆའི་ནང་གསལ་ལྟར་བྱས་ན། སྤྱི་འཐུས་རྣམ་པས་ས་གནས་ས་ཐོག་ཏུ་ཡོད་པའི་བོད་མི་དང་གཞིས་ཆགས་ཀྱི་གནས་སྟངས་རྒྱུས་ལོན་གནང་རྒྱུ་ཙམ་མ་ཟད། ས་གནས་མང་ཚོགས་རྣམས་ལ་རྐང་༸གོང་ས་མཆོག་གི་མཛད་འཕྲིན་དང་བོད་ནང་གི་ཛ་དྲག་གནས་སྟངས་སྐོར། དེ་བཞིན་བོད་དོན་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབས། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ལས་རིམ་སོགས་ཀྱི་ཐོག་གསུངས་བཤད། མང་ཚོགས་ཀྱི་དྲི་བ་ཁག་ལ་ལན་འདེབས་གསལ་བཤད་སོགས་གནང་འཆར་ཡོད་པ་རེད།
