ཡུ་གུར།

ཉེ་ལམ་ཕྱི་ཚེས་ ༡༨ ཉིན་ International Tibet Network འམ་རྒྱལ་སྤྱི་བོད་དོན་འབྲེལ་མཐུད་ལས་ཁང་གིས་གསར་འགོད་བསྒྲགས་གཏམ་ཞིག་སྤེལ་བའི་ནང་ཉེ་ལམ་ཕྱི་ཟླ་ ༨ པའི་ནང་ཀུ་ཤུ་རྟགས་ཅན་གྱི་བཟོ་ཚོང་ཁང་གིས་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་སྲིད་བྱུས་གསར་པ་ཞིག་ཡོངས་གྲགས་གནང་སྟེ། རང་དབང་གི་གནས་ཚུལ་འཁོར་རྒྱུག་དང་སྨྲ་བརྗོད་རང་དབང་ལ་བརྩི་བཀུར་ཞུ་རྒྱུ་ཡིན་སྐོར་བརྗོད་ཡོད་ཀྱང་ཚོང་ལས་ཁང་དེས་ངོས་ནས་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་མུ་མཐུད་བཏང་བའི་སྒོ་ནས་སྲིད་བྱུས་དེ་ལག་བསྟར་བྱེད་ཀྱི་མེད་པ་མ་ཟད། ཚོང་ལས་ཁང་དེའི་ཤེར་བདག་རྣམས་ཀྱིས་གཞི་རྩའི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་གྲོས་འཆར་ཞིག་ཕུལ་ཡང་དེར་ཡ་ལེན་བྱེད་ཀྱི་མེད་པའི་ཁར། ཞུ་གཏུག་བྱེད་མཁན་དེ་དག་ལ་བཀག་སྡོམ་བྱེད་ཐབས་བྱེད་ཀྱི་ཡོད་པ་བརྗོད་འདུག དེ་ཡང་ཚོང་ལས་ཁང་དེས་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་སྲིད་བྱུས་གསར་པ་དང་འབྲེལ་ནས་ཤེར་བདག་རྣམས་ཀྱིས་སྲིད་བྱུས་གསར་པ་དེ་ལག་བསྟར་ཇི་ལྟར་བྱེད་ཀྱི་ཡོད་མིན་གྱི་སྙན་ཐོ་འདོན་སྤེལ་གནང་དགོས་པའི་དགོས་འདུན་བཏོན་ཀྱང་ཚོང་ལས་ཁང་དེའི་ངོས་ནས་ཤེར་བདག་རྣམས་ཀྱིས་འོས་འཕེན་པའི་སྒོ་ནས་གྲོས་བསྡུར་བྱེད་རྒྱུའི་ཚོགས་འདུ་སྐོང་ཚོགས་མ་གནང་བར་ཚོང་ལས་ཁང་དེའི་ཁྲིམས་རྩོད་པས་གནད་དོན་དེ་གླེང་སློང་མི་ཡོང་བའི་ཐབས་ལ་གཞོལ་གྱི་ཡོད་སྟབས། འཛམ་གླིང་རྒྱལ་སྤྱིའི་ཁྲོད་ཀྱི་མི་ས་ཡ་ ༡༨ ལྷག་གི་སྐུ་ཚབ་མཚོན་པའི་གཞུང་འབྲེལ་མིན་པའི་ཚོགས་པ་ ༡༥༠ ནས་ཀུ་ཤུ་བཟོ་ཚོང་ཁང་གི་གཙོ་འཛིན་ལ་ཚོང་ལས་ཁང་དེའི་ངོས་ནས་གཞི་རྩའི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་ཕྱོགས་ཀྱི་ཐད་ལ་ལན་འདེབས་དགོས་པའི་ཞུ་གཏུགས་བྱས་ཡོད་པ་རེད་འདུག སྐབས་དེར་བོད་རང་བཙན་སློབ་ཕྲུག་ཚོགས་པའི་རྒྱལ་སྤྱིའི་དྲིལ་བསྒྲགས་འགན་འཛིན་པདྨ་སྒྲོལ་མ་ལགས་ཀྱིས་བཟོ་ཚོང་ཁང་གིས་ཚོང་ལས་ཁང་དེའི་ཤེར་བདག་ཀྱི་ཐོབ་ཐང་བཀག་འགོག་བྱས་པ་ནི་རྒྱ་ནག་གཞུང་ལ་མགོའདོགས་བྱ་རྒྱུའི་ཐབས་ཤེས་ཤིག་དང་། ལྷག་པར་དུ་བྱེད་བབ་དེ་ནི་བོད་མི་གཙོ་ཡུ་གུར་དང་ཧོང་ཀོང་གི་ལས་འགུལ་བ་རྣམས་ཁ་བཙུམ་ནས་འཇོག་ཐབས་ཞིག་ཡིན་པ་མ་ཟད། འགྲོ་བ་མིའི་ཐོབ་ཐང་དང་འབྲེལ་བའི་སྲིད་བྱུས་གསར་པ་ཞིག་གཏན་འབེབ་བྱས་པ་ཡོངས་གྲགས་གནང་ནས་ལག་བསྟར་མ་བྱས་པ་ནི་མགོ་གཉིས་ཀྱི་ལས་ཞིག་ཡིན་པ་བརྗོད་འདུག ད་དུང་ཤེར་བདག་ཚོགས་པའི་ཉམས་ཞིག་པ་ Sarah ཞུས་བ་ཞིག་གིས་རང་ཉིད་ཚོང་ལས་ཁང་དེའི་ཤེར་བདག་རྒྱུན་རིང་ཤོས་ཀྱི་གྲས་ཤིག་ཡིན་པའི་ཆ་ནས་ཚོང་ལས་ཁང་གི་སྲིད་བྱུས་གསར་པ་དེར་ཤུགས་སྣོན་མང་ཙམ་རྒྱག་རྒྱུའི་རེ་བ་ཡོད་པ་དང་། ཚོང་ལས་ཁང་གི་ངོས་ནས་མི་མང་གི་རེ་བ་དང་མངོན་འདོན་ལ་གཞིགས་ཏེ་ཁྲིམས་ལ་བརྩི་སྲུང་ཞུས་བའི་སྒོ་ནས་ལས་དོན་གཉེར་རྒྱུ་མང་པོ་ཡོད་པ་བརྗོད་འདུག གཞན་ཡང་ Vicky Wyatt ཞུས་བ་ཞིག་གིས་ཀུ་ཤུ་རྟགས་ཅན་གྱི་ཚོང་ལས་ཁང་གིས་དང་ཐོག་སྲིད་བྱུས་གསར་པ་དེ་ཡོངས་བསྒྲགས་གནང་སྐབས་དགའ་བསུ་ཞུས་པ་ཡིན་ཡང་ད་ལྟ་ཚོང་ལས་ཁང་གི་བྱེད་བབ་ལ་བལྟས་དུས་སྲིད་བྱུས་དེ་སྟོང་པ་ཞིག་ཡིན་པ་མ་ཟད། སྐབས་དེར་ཚོང་ལས་ཁང་གིས་སྨྲ་བརྗོད་རང་དབང་ལ་བརྩི་བཀུར་ཞུ་རྒྱུ་ཡིན་འདོག་བྱས་ཀྱང་ད་ཆ་ལྡབ་གཉིས་ཙམ་གསང་མྱུལ་བྱེད་ཀྱི་ཡོད་དང་། ལྷག་པར་དུ་ཤེར་བདག་པ་རྣམས་ཀྱི་ཐོབ་ཐང་བཀག་སྐྱིལ་བྱ་རྒྱུ་བཅས་ནི་ཆེས་ངོ་ཚ་དགོས་པའི་གནད་དོན་ཞིག་ཡིན་པ་བརྗོད་འདུག གཞི་རྩའི་ཀུ་ཤུ་བཟོ་ཚོང་ཁང་གིས་བཟོ་ཚོང་ཁང་གཞན་ལྟར་མ་ཡིན་པར། རྒྱ་ནག་གི་ནང་དུ་ཀུ་ཤུའི་ཁ་པར་བེད་སྤྱོད་གཏོང་ཕྱོགས་དང་འབྲེལ་ནས། རྒྱ་ནག་གི་མངོན་འདོད་ལྟར་གནས་ཚུལ་མང་པོ་བཀག་སྡོམ་བྱེད་རྒྱུ་དང་ལྷག་པར་དུ་ཉེ་བའི་ལོ་ཤས་ནང་རྒྱ་ནག་གཞུང་གི་རེ་སྐུལ་ལྟར་རྒྱ་ནག་གི་V PNs ཞེས་པའི་གནས་ཚུལ་འཚོལ་བྱེད་ལས་མཉེན་ཆས་ ༡༠༠༠ ཙམ་ནག་གསུབ་བཏང་ཡོད་པ་མ་ཟད། བོད་མི་དང་ཡུ་གུར་། དེ་བཞིན་ཧོང་ཀོང་གི་ལས་འགུལ་བ་རྣམས་རང་ཉིད་སྲུང་སྐྱོབ་བྱ་རྒྱུའི་སླད་དུ་ཀུ་ཤུ་རྟགས་ཅན་གྱི་ཐོན་སྐྱེད་སྤྱོད་རྒྱུ་ཉེ་ཁ་ཆེ་རུ་སོང་ཡོད་པ་དང་། ཧོང་ཀོང་གི་ཁྲིམས་གཞི་གསར་པའི་གནང་དོན་དང་འབྲེལ་ནས་ངོ་དེབ་དང་། Google Twitter སོགས་ནས་གནས་སྐབས་རིང་ཕྱིར་འཐེན་གནང་ཡང་སྐབས་དེར་ཁུ་ཤུ་རྟགས་ཅན་ནས་ཕྱིར་འཐེན་གནང་མེད་ཀྱང་རྒྱ་ནག་གཞུང་གི་གནོན་ཤུགས་འོག་ HKmap.live ཞེས་པའི་མཉེན་ཆས་ཤིག་ཕྱིར་འཐེན་བྱས་པའི་རྐྱེན་གྱིས་ཧོང་ཀོང་གི་མང་གཙོའི་ལས་འགུལ་བ་ཚོར་ཉེན་ཚབས་ཆེན་པོར་བྱུང་ཡོད་པ་རེད།

ཡུ་རོབ་གྲོས་ཚོགས་ཀྱིས་ཁ་སང་རྒྱ་ནག་གིས་ཤིན་ཅང་གི་ཁུལ་དུ་མི་མང་བཀག་སྐྱིལ་གྱིས་ངལ་རྩོལ་བསྒྱུར་བཀོད་བྱེད་བཞིན་ཡོད་པར་སྐྱོན་བརྗོད་ཀྱིས།  ཁུལ་དེའི་མི་མང་བཀག་སྐྱིལ་དང་འབྲེལ་བའི་རྒྱ་ནག་གི་དཔོན་རིགས་རྣམས་ཡུ་རོབ་ཀྱི་ནང་དུ་ཡོང་རྒྱུར་བཀག་སྡོམ་བྱེད་རྒྱུའི་གྲོས་ཆོད་གསར་བ་ཞིག་ཚད་མཐོའི་མང་མོས་ཀྱིས་གཏན་འབེབས་གནང་འདུག

ཨོ་གླིང་གི་གསར་ཁང་དང་ཨ་རིའི་ Wall Street Journal ཞེས་པའི་གསར་ཁང་སོགས་ཀྱིས་རྒྱ་ནག་ལ་ལག་འབྲེལ་གྱིས་ད་བར་རྒྱ་ནག་གི་དྲིལ་བསྒྲགས་ཁྱབ་སྤེལ་བྱེད་བཞིན་པའི་འབྲེལ་ལམ་དེ་ཡོངས་སུ་མཚམས་འཇོག་བྱས་འདུག

ཟླ་བ་འདིའི་ཚེས་ ༡༠ སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སླེབས་ལ་ཉེ་བ་དང་བསྟུན། ཁ་ཉིན་རེས་གཟའ་སྤེན་པའི་ཉིན་ཉི་ཧོང་གི་རྒྱལ་ས་ Tokyo ལ་ཁུལ་དེར་རྟེན་གཞི་བྱས་པའི་རྒྱ་གཞུང་གིས་དྲག་གནོན་བྱས་མྱོང་ཡོད་པའི་མི་རིགས་ཁག་ཅིག་གི་གཞུང་འབྲེལ་མིན་པའི་ཚོགས་པ་སྟེ་བོད་རང་བཙན་སློབ་ཕྲུག་ཚོགས་པ་དང་ལྷོ་སོག ཡུ་གུར་བ། ཧོང་ཀོང་། དེ་བཞིན་ཐེ་ཝན་ཚོགས་པ་བཅས་ཟུང་འབྲེལ་གྱིས་རྒྱ་ནག་དམར་ཤོག་ཚོགས་པས་འགྲོ་བ་མིའི་ཐོབ་ཐང་ལ་དྲག་གནོན་གྱི་སྲིད་བྱུས་ལག་བསྟར་བྱས་ཁག་ལ་འགོག་རྒོལ་གྱི་ལས་འགུལ་སྤེལ་བའི་ཐོག་ནས་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྔ་སྣུར་གྱིས་སྲུང་བརྩི་ཞུས་འདུག

ཨ་རིའི་གཞུང་གིས་རྒྱ་ནག་དམར་ཤོག་ཚོགས་པའི་འཐུས་མི་དང་ཁོང་ཚོའི་གཉེན་འབྲེལ་རྣམས་ཨ་རིར་སྐྱོད་སྐབས་ཟླ་བ་གཅིག་གི་རིང་ལས་མཐོང་མཆན་སྤྲོད་རྒྱུ་མིན་པའི་ཁྲིམས་སྒྲིག་གསར་བ་ཞིག་བཟོས་འདུག

དེ་རིང་སྔ་དྲོ། བཞུགས་སྒར་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་གི་ཚོགས་ཁང་དུ། བློ་བཟང་དབང་རྒྱལ་ལགས་ཀྱིས་གཙོ་སྒྲུབ་གནང་བཞིན་པའི་སེམས་གུ་ཡངས་ཀྱི་གཟེངས་རྟགས་དེ་ཨ་རིའི་གྲོས་ཚོགས་འོག་མའི་ཚོགས་གཙོ། བོད་དོན་རྒྱབ་སྐྱོར་བ་ལྕམ་སྐུ་ Nancy Pelosi ལགས་ལ་ཕུལ་སོང་།དེ་ཡང་བོད་ཀྱི་མཛངས་མ་དང་། སེམས་གུ་ཡངས་ཀྱི་དུས་སྟོན། དེ་བཞིན་བོད་ཀྱི་རོལ་དབྱངས་གཟེངས་རྟགས་སོགས་རྐང་གོ་སྒྲིག་གནང་མཁན་སྐུ་ཞབས་བློ་བཟང་དབང་རྒྱལ་ལགས་ཀྱིས་དེ་རིང་བཞུགས་སྒར་ཁུལ་གྱི་གསར་འགོད་པ་དང་། དེ་བཞིན་རྒྱ་གར་གྱི་གསར་འགོད་པ་སོགས་ཚང་འཛོམས་ཀྱི་ཐོག་འདི་ལོའི་སེམས་གུ་ཡངས་ཀྱི་གཟེངས་རྟགས་འབུལ་བཞེས་ཀྱི་གསར་འགོད་གསལ་བསྒྲགས་བསྐྱངས་ཏེ། དྲྭ་ཐོག་བརྒྱུད་ནས་ལྕམ་སྐུ་ Nancy Pelosi ལགས་སུ་གཟེངས་རྟགས་ཀྱི་ཕྱག་འཁྱེར་འབུལ་རྒྱུ་ཡིན་པར་གསུངས་སོང་། སྐབས་དེར་བློ་བཟང་དབང་རྒྱལ་ལགས་ཀྱིས།  ལྕམ་སྐུ་ Nancy Pelosi ལགས་ཀྱིས་འདས་བའི་མི་ལོ་མང་པོའི་ནང་བོད་དོན་ལ་རྒྱབ་སྐྱོར་ཤུགས་ཆེར་གནང་བ་མ་ཟད། ཆེད་དུ་ཨ་རི་ནས་གྲོས་ཚོགས་གོང་འོག་གི་གྲོས་ཚོགས་འཐུས་མི་ཁྲིད་དེ་ཐེངས་གཉིས་ལ་བཞུགས་སྒར་དུ་ཆེད་ཕེབས་གནང་ཡོད་པ་ཡོངས་གྲགས་གནང་བ་དང་སྦྲགས། ཁོང་ནི་དུས་རྒྱུན་ནས་བོད་དོན་ཙམ་མིན་པར་འཛམ་གླིང་གི་ས་ཕྱོགས་གང་དུ་འགྲོ་བ་མིའི་ཐོབ་ཐང་རྡོག་རོལ་དང་ཁོར་ཡུག་སོགས་ཀྱི་གནད་དོན་འབྲེལ་བཀའ་མོལ་ཤུགས་ཆེར་གནང་མཁན་ཞིག་ཡིན་པར་ངོ་སྤྲོད་ཀྱིས། བོད་མི་རྣམས་ཀྱིས་ལྕམ་སྐུ་མཆོག་གིས་ལོ་མང་གི་རིང་ལ་བོད་དོན་ལ་རླབས་ཆེན་གྱི་རྒྱབ་སྐྱོར་གནང་བར་ངོས་འཛིན་གྱི་རྣམ་འགྱུར་ཞིག་སྟོན་དགོས་པ་དེ་གལ་ཆེན་པོ་ཡིན་པར་གསུངས་སོང་།དེ་བཞིན་གསར་འགོད་པས་དྲི་བ་དྲིས་ལན་གྱི་སྐབས་སུ་ཁོང་གིས་འདི་ལོའི་སེམས་གུ་ཡངས་ཀྱི་གཟེངས་རྟགས་ཀྱི་མིང་གཞུང་གི་ནང་དུ་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ། གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་ཀྱིས་ཀྱང་བོད་དོན་ལ་རྒྱབ་སྐྱོར་ཤུགས་ཆེན་གནང་སྟེ། གྲོས་ཚོགས་ཀྱི་དབུས་སུ་རིའི་བོད་དོན་རྒྱབ་སྐྱོར་གྱིས་བོད་ནང་དུ་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་ཐུབ་པ་བྱུང་ཡོད་སྐོར་དང་། དེ་བཞིན་འདི་ལོར་རྒྱལ་སྤྱིའི་ནང་ཁོར་ཡུག་གི་གནད་དོན་དང་འབྲེལ་ནས་ལས་འགུལ་ཤུགས་ཆེར་སྤེལ་མཁན་གྱི་སིད་ཝི་ཊན་གྱི་ན་གཞོན་ལས་འགུལ་བ། Greta Thunberg ལགས་ཀྱང་འོས་མིའི་ཁོངས་སུ་ཡོད་ཡོད་པར་ངོ་སྤྲོད་གནང་སོང་། གཞི་རྩའི་བློ་བཟང་དབང་རྒྱལ་ལགས་ཀྱིས་གཙོ་གཉེར་གནང་བཞིན་པའི་སེམས་གུ་ཡངས་ཀྱི་གཟེངས་རྟགས་ཞེས་པ་དེ་ནི་སྤྱི་ལོ་ ༢༠༠༣ ལོ་ནས་འགོ་འཛུགས་ཀྱིས། ལོ་རེར་དུས་རྒྱུན་ནས་སྤྱི་ཚོགས་ཀྱི་ནང་དུ་གཞན་ཕན་གྱི་ཕྱག་ལས་རྒྱ་ཆེར་གནང་མཁན་གཅིག་ལ་འབུལ་བཞིན་ཡོད་པ་རེད།

ཉི་ཧོང་གྲོས་ཚོགས་སུ་ The Asian Solidarity Council for Democracy and Freedom ཞེས་ཨེ་ཤ་ཡའི་ཁུལ་གྱི་མང་གཙོ་དང་རང་དབང་ཆིག་སྒྲིལ་ཚོགས་པའི་གོ་སྒྲིག་འོག་གྲོས་ཚོགས་འཐུས་མི་ཁག་ཅིག་གི་དབུས་ཕྱི་ནང་སྐུ་མགྲོན་ ༦༠ མཉམ་ཞུགས་གནང་སྟེ་རྒྱ་ནག་གཞུང་གི་དྲག་པོའི་སྲིད་བྱུས་དང་འགྲོ་བ་མིའི་ཐོབ་ཐང་གི་གནས་བབ་སྐོར་བགྲོ་གླེང་གནང་འདུག

རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིའི་ཁོངས་སུ་སླར་འདེམས་ཐོན་བྱུང་ཡོད་ཀྱང་། དེ་སྔའི་འོས་གྲངས་དང་བསྡུར་ན་ཐེངས་འདིར་འོས་ཐོབ་ཀྱི་གྲངས་འབོར་དེ་བརྒྱ་ཆ་ ༢༥ ཙམ་ཞིག་ཆགས་འདུགདེ་ཡང་བརྒྱུད་ལམ་ཁག་ནས་སྤེལ་བའི་གནས་ཚུལ་ལ་གཞིགས་ན། ཉེ་ལམ་ཨ་རི་ནིའུ་ཡོག་ཏུ་རྟེན་གཞི་བྱས་པའི་རྒྱལ་ཚོགས་སུ་ཚོགས་པའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༧༣ ཐོག་རྒྱ་ནག་སླར་ཡང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིའི་ཁོངས་སུ་འདེམས་ཐོན་བྱུང་ཀྱང་ཐེངས་འདིའི་འོས་ཐོབ་ཀྱི་གྲངས་འབོར་དེ་ ༡༣༠ ལས་བྱུང་མེད་པ་རེད། དེ་སྔ་ཕྱི་ལོ་ ༢༠༡༦ ལོའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་འོས་འཕེན་སྐབས་རྒྱ་ནག་ལ་ཁྱོན་འོས་གྲངས་ ༡༨༠ བྱུང་ཡོད་སྟབས་ད་ལན་དེ་སྔ་དང་བསྡུར་ན་འོས་གྲངས་ཀྱི་བརྒྱ་ཆ་ ༢༥ ཆགས་པའི་ཐོག་ནས་རྒྱ་ནག་དེ་པ་ཀིས་ཏན་དང་། བལ་ཡུལ། Uzbekistan བཅས་ཀྱི་རྒྱལ་ཁབ་ལས་འོས་གྲངས་ཉུང་བ་བྱུང་ཡོད་སྐོར་བཀོད་འདུག རྒྱ་ནག་ལ་འོས་གྲངས་དེ་ཙམ་མཐོ་པོ་རག་མེད་པ་ནི་རྒྱལ་སྤྱིའི་གཙོས་རྒྱལ་ཚོགས་ཁྲོད་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཐད་སྐྱོན་བརྗོད་གནང་མཁན་རིམ་པ་བྱུང་རྐྱེན་དང་སྒོས་འདི་ལོའི་ཟླ་བ་ ༦ པའི་ནང་རྒྱལ་ཚོགས་ཀྱི་རྒྱ་ནག་ཐོག་གི་རང་དབང་གི་ཆེད་ལས་པ་ ༥༠ ལྷག་གིས་རྒྱ་ནག་གིས་བོད་གཙོས་ཤིན་ཅང་། ཧོང་ཀོང་ནང་གི་འགྲོ་བ་མིའི་ཐོབ་ཐང་གདལ་བཤིག་གཏོང་བར་འགྲོ་བ་མིའི་ཐོབ་ཐང་གི་ལྷན་ཁང་གིས་རྒྱ་ནག་གི་བྱེད་ཕྱོགས་དག་ལ་རྟོག་ཞིབ་ཀྱིས་ལྷན་ཚོགས་ཚོགས་དགོས་པ་གསུངས་ཡོད་པ་རེད། རྩ་བའི་རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚད་འཛིན་ལ་འགྲེལ་བརྗོད་གསར་པ་བྱེད་ཐབས་ཀྱི་ཀུན་སློང་ཡོད་པའི་ཐོག་ཆེད་མངགས་བོད་ནང་ཡར་རྒྱས་ཀྱི་ལས་གཞི་ལ་ཁ་གཡར་ནས་རྒྱ་གཞུང་གིས་འབྲོག་པ་དག་བཙན་དབང་གིས་གནས་སྤོར་བྱེད་བཅུག་རྒྱུ་དང་དེ་བཞིན་ཉེ་ལམ་བོད་མི་ཞིང་འབྲོག་འབུམ་ལྔ་ལྷག་ཙམ་ངལ་རྩོལ་བསྒྱུར་བཀོད་ཁང་དུ་བཙན་དབང་གིས་བཅུག་གི་ཡོད་སྟབས་རྒྱ་གཞུང་གི་སྲིད་བྱུས་དེས་འགྲོ་བ་མིའི་ཐོབ་ཐང་དོན་གཉེར་བ་དང་ལས་འགུལ་བ་ཚོར་སེམས་ཁྲལ་བྱ་གཞི་ཞིག་ཏུ་གྱུར་གྱི་ཡོད་པར་བཀོད་འདུག རྒྱ་ནག་ལ་འོས་གྲངས་དེ་ཙམ་ཕོན་ཆེ་བྱུང་མེད་པའི་ཐོག་རྒྱལ་སྤྱིའི་བོད་དོན་ལས་འགུལ་ཁང་གིས་ཐེངས་འདིར་རྒྱ་ནག་སླར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་དུ་འདེམས་ཐོན་བྱུང་བར་བློ་འགྱོད་ཡོད་པ་མ་ཟད། ད་ལན་འོས་གྲངས་ཆག་པ་དེས་རྒྱ་གཞུང་གིས་བོད་གཙོས་ཤིན་ཅང་དང་། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་དག་གོ་རིམ་ལྡན་པ་དང་ཚབས་ཆེན་ངང་ནས་རྡོག་རོལ་གཏོང་བཞིན་པས་རྒྱལ་སྤྱིའི་རྒྱལ་ཁབ་ཁག་ནས་དེར་མོས་མཐུན་མེད་པ་མངོན་གྱི་ཡོད་པ་དང་ཆབས་ཅིག རྒྱལ་སྤྱིའི་རྒྱལ་ཁབ་ནས་རྒྱ་ནག་གི་བྱེད་ཕྱོགས་དེ་རྒྱ་ནག་རང་ཉིད་ཀྱིས་འགན་ཁུར་ཐབས་ཤིག་བཟོ་དགོས་པ་གསུངས་འདུགརྒྱལ་སྤྱིའི་ཡུ་གུར་མཐུན་ཚོགས་ཀྱི་ཚོགས་གཙོ་ Dolkun Isa ལགས་ཀྱིས་ཡུ་གུར་གཙོས་བོད་དང་ཧོང་ཀོང་། ལྷོ་སོག་བཅས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་དངོས་སུ་གནང་མཁན་རྣམས་ནས་ད་ལན་རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་སླར་འདེམས་ཐོན་བྱུང་བར་བློ་ཕམ་ཡོད་པར་མ་ཟད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་ཀྱང་འགྲོ་བ་མིའི་ཐོབ་ཐང་གདལ་བཤིག་གཏོང་མཁན་རྒྱ་ནག་ལྟ་བུ་བསྐྱར་དུ་འདེམས་ཐོན་གནང་བ་ནི་རྒྱལ་ཚོགས་ཀྱི་ལོ་རྒྱུས་ཁྲོད་ནོར་འཁྲུལ་ཆེན་པོ་བཟོས་ཡོད་པ་གསུངས་འདུག གནད་དོན་འདིའི་ཐད་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གཞུང་ནས་བོད་ཀྱིས་གཙོས་པའི་རྒྱའི་དབང་སྒྱུར་འོག་ཡོད་པའི་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་ནི་རྒྱལ་སྤྱིའི་ཁྲོད་ར་འཕྲོད་ལན་མང་བྱུང་ཡོད་པ་དང་། བོད་ནང་ལ་མཚོན་ན་འགྲོ་བ་མིའི་ཐོབ་ཐང་གི་གནས་བབ་དེ་ལོ་ལྟར་ཇེ་ཞན་ཇེ་སྡུག་ཏུ་འགྲོ་བཞིན་པའི་ཁྲོད་འདིར་རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་འདེམས་ཐོན་བྱུང་བ་ནི་རྒྱལ་ཚོགས་ཀྱི་མཚན་གནས་ལ་སྣང་ཆུང་གནང་ཡོད་པར་གསུངས་འདུག ད་དུང་ཁོང་གིས་ད་ཆ་རྒྱ་ནག་ལ་རྒྱབ་སྐྱོར་བྱེད་མཁན་གྱི་རྒྱལ་ཁབ་ཉུང་དུ་འགྲོ་བཞིན་པས་རྒྱལ་སྤྱིའི་རྒྱལ་ཁབ་ཡོངས་ནས་བོད་མི་དང་ཡུ་གུར་བ། དེ་བཞིན་ཧོང་ཀོང་དང་རྒྱ་ནག་གི་སྲིད་བྱུས་འོག་དཀའ་སྡུག་མྱོང་བཞིན་པའི་རྒྱལ་ཁབ་དག་གི་འགྲོ་བ་མིའི་ཐོབ་ཐང་སྲུང་སྐྱོབ་སླད་མཉམ་འབྲེལ་གྱིས་རྒྱ་ནག་ལ་གདོན་ལེན་གནང་དགོས་པ་གསུངས་འདུག རྩ་བའི་ཨེ་ཤ་ཡ་དང་ཞི་བདེ་རྒྱ་མཚོ་མངའ་ཁུལ་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཁང་གི་ཚོགས་མིར་འོས་འདེམས་བྱུང་བའི་ཁོངས་སུ་པ་ཀིས་ཏན་དང་། བལ་ཡུལ། དེ་བཞིན་ Uzbekistan བཅས་ཀྱི་རྒྱལ་ཁབ་ཀྱང་ཆགས་ཀྱི་འདུག འོན་ཀྱང་རྒྱལ་ཁབ་དེ་དག་གི་འགྲོ་བ་མིའི་ཐོབ་ཐང་ཀྱི་ལོ་རྒྱུས་ནི་དེ་ཙམ་ལེགས་པོ་མེད་པས་འདས་པའི་དུས་ཡུན་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་བྱེད་ཕྱོགས་ལ་ཚོགས་མི་རྒྱལ་ཁབ་ནས་སྐྱོན་བརྗོད་དང་འདྲི་རྩད་གནང་མཁན་ཡང་བྱུང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས། ཁ་སང་ཐེ་ཝན་དད་ལྡན་མང་ཚོགས་རྣམས་ལ་དྲ་ཐོག་ཉིན་གྲངས་གསུམ་གྱི་བཀའ་ཆོས་མཇུག་སྒྲིལ་མཛད་པ་དང་འབྲེལ། རིང་མིན་ལོ་གསར་པའི་ནང་དུ་ནད་ཡམས་ཀྱི་དཀའ་ངལ་འཇམ་པ་རྗེས་སུ། ཐེགས་ཆེན་ཆོས་གླིང་གཙུག་ལག་ཁང་དུ་དུས་རྒྱུན་ལྟར་ཆོས་འབྲེལ་མཛད་རྒྱུར་གྲ་སྒྲིག་ཨང་གསར་ཡོད་པར་བཀའ་སྩལ་འདུག