སྤེན་པ་ཚེ་རིང་།

སྲིད་སྐྱོང་མཆོག་གིས་ཨ་རིའི་གནད་ཡོད་དཔོན་རིགས་རྣམས་ལ་བོད་དོན་ཁྲིམས་འཆར་ལ་རྒྱབ་སྐྱོར་དགོས་པའི་ཞུ་སྐུལ།

སྲིད་སྐྱོང་མཆོག་གིས་ཀོ་ལམ་བི་ཡར་འཚམས་གཟིགས་གྲུབ་ནས་མེ་སི་ཀོར་འཚམས་གཟིགས་གནང་བཞིན་པ།

སྲིད་སྐྱོང་མཆོག་གིས་རྒྱ་ནག་གཞུང་ནས་༸རྒྱལ་བའི་ཡང་སྲིད་ཐད་རྙོག་གླེང་བཟོ་རྒྱུ་མེད་པ་གསུངས་འདུག

སྲིད་སྐྱོང་སྤེན་པ་ཚེ་རིང་མཆོག་ནིའུ་ཛི་ལེནྜ་ནང་གཞུང་འབྲེལ་འཚམས་གཟིགས་ཐེངས་དང་པོ་གནང་བཞིན་པ།

སྲིད་སྐྱོང་མཆོག་ནིའུ་ཛི་ལེནྚ་དང་ཨོསྟྲེ་ལི་ཡཱར་གཞུང་འབྲེལ་འཚམས་གཟིགས་སུ་ཕེབས་ཐོན།

བོད་རྒྱའི་དཀའ་རྙོག་ཞི་འགྲིག་ཐུབ་ཚེ་རྒྱ་དཀར་ནག་དབར་གྱི་མཐའ་མཚམས་དང་འབྲེལ་བའི་དཀའ་རྙོག་རྣམས་སེལ་ངེས་རེད།

སྲིད་སྐྱོང་མཆོག་གིས་ཌེན་མག་གྲོས་ཚོགས་འཐུས་མི་དང་གནད་ཡོད་མི་སྣར་མཇལ་འཕྲད་གནང་བ།

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་གསུམ་བརྒྱད་ཀྱི་གཞུང་འབྲེལ་མཆོད་འབུལ་ཐོག་བོད་ཀྱི་རྒྱལ་གཅེས་དཔའ་བོ་ཕོ་མི་རྣམས་ལ་བཀའ་དྲིན་རྗེས་ཞུས་པ་དང་ཆབས་ཅིག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་ཕྱག་མོ་སྐྱོན་པའི་སྐབས་རྟགས་དང་མཚན་མ་ཧ་ཅང་ཡག་པོ་བྱུང་ཡོད་པ་ལྟར་མགོན་པོ་༸གང་ཉིད་མཆོག་གིས་བོད་དང་རྒྱ་ནག་ཏུ་ཆིབས་བསྒྱུར་མཛད་རྒྱུར་ཐུགས་རེ་མཛད་བཞིན་འདུག་སྟབས་བོད་མི་ཀུན་གྱིས་ཐུགས་འགན་ཆེས་བཞེས་ཀྱིས་ཧུར་ཐག་གནང་ཚེ་དེར་དོན་འབྲས་ངེས་ཅན་ཞིག་སོན་ཐུབ་པའི་རེ་བ་ཡོད་སྐོར་འགྲེལ་བརྗོད་གནང་འདུག ཁ་སང་ཕྱི་ལོ་ ༢༠༢༣ ཟླ་ ༣ ཚེས་ ༨ ཉིན་མོ་འདི་ནི་རྒྱ་ནག་གཞུང་གིས་ཕྱི་ལོ་ ༡༩༨༩ ལོར་བོད་མིའི་ཐོག་དྲག་གནོན་གྱི་ཁྲིམས་གཞི་བསྡམས་ནས་མནར་གཅོད་དང་གཉའ་གནོན། བཤུ་གཞོག་འོག་བོད་རིགས་རྒྱལ་གཅེས་སེར་སྐྱ་ཕོ་མོ་གྲངས་ལས་འདས་པ་ཞིག་ཚེ་སྲོག་ཤོར་བ་དང་། ཉེས་མེད་ཁྲི་ཚོ་མང་པོ་འཛིན་བཟུང་གིས་མི་སྤྱོད་ལས་འདས་བའི་དྲག་གནོན་བྱས་ནས་ལོ་ ༣༤ འཁོར་བའི་ཉིན་མོ་ཡིན་པ་ལྟར། བོད་མི་སྒྲིག་འཛུགས་ཀྱིས་དུས་ཚིགས་འདི་དང་བསྟུན་བོད་ནང་གི་རྒྱལ་གཅེས་པ་རྣམས་ལ་བཀའ་དྲིན་རྗེས་དྲན་དང། ཁོང་རྣམ་པའི་རྗེས་ཤུལ་ནང་མི་སྤུན་ཉེ་རྣམས་ལ་སྐྱིད་སྡུག་མཉམ་མྱོང་གིས་གདུང་སེམས་མཉམ་བསྐྱེད་དང་། ཁོང་རྣམ་པའི་མཛད་རྗེས་ལ་བཀའ་དྲིན་རྗེས་དྲན་ཞུ་ཕྱིར་གཞུང་འབྲེལ་མཆོད་འབུལ་སྨོན་ལམ་ཞིག་ཚོགས་ཡོད། ཁ་སང་ཕྱི་ཚེས་ ༨ ཉིན་གྱི་ཕྱེད་ཡོལ་ཆུ་ཚོད་ ༡༢ སྟེང་གངས་སྐྱིད་སྲིད་སྐྱོང་ཚོགས་ཁང་དུ་གོ་སྒྲིག་ཞུས་པའི་སྨོན་ལམ་དེའི་ཐོག་གནས་ཆུང་སྒྲ་དབྱངས་གླིང་གི་དགེ་འདུན་པ་ཁག་གཅིག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་པའི་བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། སྲི་ཞུ་ལས་བྱེད་བཅས་ཚང་འཛོམས་གནང་ཡོད་པ་དང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས་གསུམ་བརྒྱད་ཀྱི་དུས་ཚིགས་ངོ་སྤྲོད་དང་། དུས་ད་ལྟའང་བོད་ནང་རྒྱ་ནག་གཞུང་གི་སྲིད་བྱུས་དང་འབྲེལ་ནས་བོད་མི་རྣམས་ལ་གནོད་འཚེ་དུ་མ་ཕོག་ཡོད་པར་འགྲེལ་བརྗོད་དང་འབྲེལ། བོད་མི་ཚེ་ལས་འདས་པ་ཡོངས་ལ་བསྔོ་སྨོན་དང་མནར་གཅོད་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་ཞུས་པ་དང་ཆབས་ཅིག རྒྱ་གཞུང་གི་ངོས་ནས་ཡ་ལན་ཚད་ལྡན་ཞིག་བྱུང་ཚེ་ང་ཚོས་ད་ལྟའང་རྒྱ་ནག་ལ་འབྲེལ་བ་གནང་རྒྱུ་དང་བོད་རྒྱ་དཀའ་རྙོག་སེལ་ཐུབ་པའི་རེ་བ་བྱེད་ཡོད་ཅེས་སོགས་གསུངས་འདུག དེ་བཞིན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་དང་དེ་སྔོན་ཚེས་བཅུ་གཟབ་གསོལ། མཇལ་ཁའི་སྐབས་སུའང་སྩལ་བའི་བཀའ་སློབ་ལམ་སྟོན་ཇི་ཕེབས་ལུང་འདྲེན་གྱིས། ༸གོང་ས་མཆོག་གིས་རྣམ་ཀུན་ནས་ལོ་གསར་ཚེས་གསུམ་ཉིན་ཟན་རིལ་བསྒྲིལ་གནང་མཛད་ཀྱི་ཡོད་པ་དེ་ན་ནིང་ནས་མཚམས་བཞག་སྟེ་ཕྱག་མོ་སྐྱོན་བཞིན་པ་ལྟར། འདི་ལོ་ཕྱག་མོ་སྐྱོན་པའི་སྐབས་སུ་རྟགས་དང་མཚན་མ་ཧ་ཅང་ཡག་པོ་བྱུང་སྟེ་མགོན་པོ་༸གང་ཉིད་མཆོག་མགྱོག་མྱུར་བོད་དང་རྒྱ་ནག་ཏུ་ཆིབས་བསྒྱུར་མཛད་ཐུབ་པར་ཐུགས་རེ་ཆེན་པོ་མཛད་བཞིན་ཡོད་པར་མ་ཟད། དེ་བཞིན་རྒྱ་ནག་དང་རྒྱལ་སྤྱིའི་ནང་དུའང་འགྱུར་ལྡོག་ཆེས་ཆེར་འགྲོ་བཞིན་ཡོད་སྟབས། འདིར་ཕྱག་ལས་གནང་མཁན་ཀུན་གྱིས་ཐུགས་འགན་ཆེས་བཞེས་ཀྱིས་ཧུར་ཐག་གནང་ཚེ་དེར་དོན་འབྲས་ངེས་ཅན་ཞིག་སོན་ཐུབ་པའི་རེ་བ་ཡོད་ལ། རེ་བ་དེ་མ་བརླག་པར་མུ་མཐུད་གནས་དགོས་གལ་ཆེ་བས་ཚང་མས་རྒྱ་ཆེ་སར་དགོངས་བཞེད་ཀྱིས་ཐུགས་སྨོན་གནང་རོགས་ཞེས་གསུངས་ཡོད། གཞི་རྩའི་ཕྱི་ཟླ་ ༣ ཚེས་ ༨ ཉིན་མོ་དེ་ནི།  ༡༩༨༩ ལོར་བོད་ཀྱི་རྒྱལ་ས་ལྷ་སར་བོད་མི་ཚོས་རྒྱ་གཞུང་གི་དྲག་པོའི་དབང་སྒྱུར་སྲིད་བྱུས་ལ་མ་བཟོད་པར་ཞི་བའི་རྔམ་སྟོན་གནང་བར་བརྟེན་རྒྱ་གཞུང་གིས་རྒྱལ་ས་ལྷ་སའི་ཕྱོགས་བཞི་མཚམས་བརྒྱད་ལ་དྲག་པོའི་བཀའ་རྒྱ་བསྡམས་ཏེ་བོད་མི་ཚོར་མི་སྤྱོད་ལས་འདས་པའི་དྲག་གནོན་ཅན་གྱི་སྲིད་བྱུས་ལག་བསྟར་བྱས་པའི་དབང་གིས་བོད་མི་མང་པོ་རྐྱེན་འདས་སུ་གྱུར་བའི་ཉིན་མོ་ཞིག་ཡིན་པ་རེད། འབྲེལ་ཡོད་པར་གྱི་བདག་དབང་བོད་མིའི་སྒྲིག་འཛུགས།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་ཞུས་སོང་། དེ་རིང་ཕྱི་ཟླ་ ༣ ཚེས་ ༦ ཉིན་གྱི་སྔ་དྲོ་ཚོུད་ ༧་༤༠ ཡོལ་ཙམ་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་ཞུས་ཡོད་པ་དང་། སྐབས་དེར་སྲིད་སྐྱོང་མཆོག་གིས་ཉེ་ཆར་དབྱིན་ཡུལ་དང་ཨ་རི། ཁེ་ན་ཌ་བཅས་སུ་གཞུང་འབྲེལ་འཚམས་གཟིགས་ཕེབས་སྐབས་ཀྱི་གནས་ཚུལ་གཙོ་གནད་ཆེ་ཁག་སྙན་གསན་ཞུས་པ་དང་སྦྲགས་ཏེ། དེ་དག་ཐོག་བཀའ་སློབ་ལམ་སྟོན་ཞུས་ཡོད་པ་རེད་འདུག   གསར་འགོད་པས་སྲིད་སྐྱོང་སྤེན་པ་ཚེ་རིང་མཆོག་ལ་དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་ཞུ་བའི་གལ་གནད་དང་འབྲེལ་ཏེ་བཀའ་འདྲི་ཞུས་པར་སྲིད་སྐྱོང་མཆོག་གིས་རྒྱུན་ལྡན་ལྟར་མགོན་པོ་༸གང་ཉིད་མཆོག་ལ་ཕྱི་རྒྱལ་ཁག་ལ་གཞུང་འབྲེལ་ཕྱོགས་སྐྱོད་གནང་སྐབས་ཀྱི་གནས་ཚུལ་གཙོ་ཆེ་ཁག་སྙན་གསན་ཞུ་སྲོལ་ཡོད་པ་ལྟར་དེ་དེ་བཞིན་ཞུས་ཡོད་པ་མ་ཟད། དེ་དག་ཐོག་བཀའ་སློབ་ལམ་སྟོན་ངེས་ཞུ་དགོས་རིགས་ལ་ལམ་སྟོན་ཞུས་ཡོད་ཅེས་གསུངས་སོང་། གཞི་རྩའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕྱི་ཟླ་ ༡ ཚེས་ ༢༩ ཉིན་རྒྱབ་ནས་ཕྱི་ཟླ་ ༢ ཚེས་ ༡༧ བར་གཞུང་འབྲེལ་ཕྱོགས་ཕེབས་གནང་སྟེ་ཐོག་མར་ཨིན་ཡུལ་རྒྱལ་ས་ London དང་ཨ་རིའི་རྒྱལ་ས་གཙོས་པའི་གྲོང་ཁྱེར་ཆེ་ཁག་ལྔ་དང་། དེ་བཞིན་ཁེ་ན་ཌའི་གྲོང་ཁྱེར་ཆེ་ཁག་གསུམ་ནང་གཞུང་འབྲེལ་ཕྱོགས་སྐྱོད་གནང་ཡོད། སྲིད་སྐྱོང་མཆོག་གིས་ཐེངས་དེའི་ཕྱོགས་སྐྱོད་སྐབས་དབྱིན་ཡུལ་དུ་གྲགས་ཆེ་བའི་ Oxford Union དུ་བོད་དོན་དང་འབྲེལ་བའི་གསུང་བཤད་དང་མི་སྣ་མཇལ་འཕྲད་སོགས་གནང་བ་དང་། དེ་རྗེས་ཨ་རིའི་རྒྱལ་ས་ Washington DC ནང་ལ་ཕེབས་ནས་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་དང་གྲོས་ཚོགས་འཐུས་མི་ཁག་གཅིག དེ་བཞིན་ཨ་རིའི་གཞུང་གི་རོགས་ཚོགས་སོགས་དང་ལྷན་བོད་དོན་ཞུག་གཏུགས་གནང་ཡོད་ལ། ཕྱོགས་བསྐྱོད་དེའི་སྐབས་ཨ་རིའི་གྲོས་ཚོགས་གོང་འོག་གཉིས་ཀའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སླར་ཡང་འདོན་འཇོག་གནང་ཡོད་པ་རེད། སྲིད་སྐྱོང་མཆོག་དེ་རྗེས་ཨ་རིའི་ཀོ་ལ་རེ་ཌོ་དང་ཡུ་ཊཱ། སྤོཊ་ལེནཌ་དང་སི་ཡ་ཊལ། དེ་བཞིན་ཁེ་ན་ཌའི་ཝེན་ཁུའུ་ཝར་དང་ཝི་ཊོ་རི་ཡ་ཨ་ཡིས་ལན་ཌི། ཨལ་བར་ཊ་བཅས་སུ་ཕེབས་ཏེ་བོད་རིགས་མང་ཚོགས་དང་ལྷག་པར་གཞོན་སྐྱེས། ས་གནས་གཟའ་མཇུག་སློབ་གྲྭའི་སློབ་ཕྲུག་བཅས་ལ་ཐུག་འཕྲད་སོགས་གནང་ཡོད་པ་རེད།