ཧོང་ཀོང་།

འདི་ལོའི་རྒྱ་ནག་གི་མང་གཙོའི་ཚད་གཞི་དེ་རྒྱལ་སྤྱའི་ཁྲོད་ནས་ཚད་དམའ་ཤོས་བཅུ་བཞི་པའི་ཁོངས་སུ་ལྷུང་འདུག  དབྱིན་ཡུལ་རྒྱལ་ས་ལོན་ཊོན་དུ་རྟེན་གཞི་བྱས་པའི་ The Economist intelligence unit ཚོགས་པས་ཕྱི་ལོ་ ༢༠༡༩ ལོའི་རྒྱལ་ཁབ་༡༦༧ གྱི་ལོ་འཁོར་གྱི་མང་གཙོའི་ཚད་གཞི་མཚུངས་བསྡུར་བྱས་ཏེ་གཙོ་བོ་འོས་བསྡུའི་རིམ་པ་དང་སྲིད་གཞུང་གི་བྱེད་ལས། ཆབ་སྲིད་ཀྱི་ལས་དོན་ནང་མང་ཚོགས་འཛུལ་ཞུགས། ཆབ་སྲིད་ཀྱི་རིག་གཞུང་དང་སྤྱི་དམངས་ཀྱི་རང་དབང་སོགས་ཀྱི་རྨང་གཞིའི་ཐོག་ནས་ཞིབ་འཇུག་བྱས་པའི་ཁྲོད་ལོ་འདིའི་ནང་རྒྱལ་སྤྱིའི་སྤྱི་ཡོངས་ཀྱི་མང་གཙོའི་ཚད་གཞི་དེ་ཉམས་དམས་སུ་སོང་ཡོད་པར་ཡོངས་གྲགས་གནང་འདུག དེ་ཡང་ཚོགས་པ་དེས་འདོན་སྤེལ་གནང་བའི་ལོ་འཁོར་སྙན་ཐོར་གཞིགས་ན། རྒྱལ་ཁབ་༡༦༧ ཁྲོད་ནས་རྒྱ་ནག་ནང་གི་དམངས་གཙོའི་གནས་བབ་ཀྱི་ཚད་གཞི་དེ་ནི། བརྒྱ་ཆ་བཅུ་ནས་བརྒྱ་ཆ་ ༢.༢༦ མ་གཏོགས་ཐོབ་མེད་པ་བཅས་ཚད་གཞི་དམའ་ཤོས་ ༡༥༣ བར་ལྷུང་ཡོད་པ་དང་། དེ་ནི་སྔ་ལོའི་ཚད་གཞི་ལས་མར་ཉམས་སྨད་དུ་སོང་ཡོད་པར་ཡོངས་གྲགས་གནང་ཡོད་པ་རེད། སྙན་ཐོའི་ནང་གསལ་བའི་རྒྱ་ནག་གི་ཚན་པའི་ནང་རྒྱ་ནག་ནང་དུ་མང་གཙོ་ཉམས་སྨད་དུ་ཕྱིན་པའི་རྒྱུ་རྐྱེན་གཙོ་བོའི་གྲོས་སུ་གཙོ་བོ་ཡུ་གུར་མི་རིགས་ཀྱིས་མཚོན་པའི་གྲངས་ཉུང་མི་རིགས་རྣམས་ལ་དབྱེ་འབྱེད་ཀྱི་སྲིད་བྱུས་སྤེལ་བ་དང་འཕྲུལ་རིགས་བེད་སྤྱོད་ཀྱིས་མི་མང་ལ་བཀག་སྡོམ་བྱས་ཏེ་སྤྱི་དམངས་ཀྱི་ཁྲིམས་སྲོལ་ལ་རྩིས་མེད་བཏང་བ། དེ་བཞིན་ཧོང་ཀོང་ནང་གི་གནས་སྟངས་བཅས་ལུང་འདྲེན་གནང་བ་མ་ཟད། སྤྱིར་རྒྱ་ནག་གི་མང་ཚོགས་ཁྲོད་མང་གཙོའི་སྐོར་ལ་གོ་རྟོགས་མེད་པའི་རྐྱེན་གྱིས་མང་གཙོའི་རིན་ཐང་ལ་རྒྱབ་སྐྱོར་དེ་ཙམ་མེད་པར་འགྲེལ་བརྗོད་ཀྱང་གནང་འདུག རྩ་བའི་དབྱིན་ཡུལ་ནང་གི་ཚོགས་པ་དེས་ཕྱི་ལོ་ ༢༠༠༦ ལོ་ནས་བཟུང་ལོ་ལྟར་རྒྱལ་སྤྱིའི་མང་གཙོའི་ཚད་གཞི་མཐོ་ཤོས་དེ་བརྒྱ་ཆ་བཅུ་ནས་ཀླད་ཀོར་བར་དུ་གཏན་འབེབས་ཀྱིས་ཞིབ་འཇུག་བྱས་པའི་ཁྲོད་འདི་ལོའི་སྤྱི་ཡོངས་ཀྱི་རྒྱལ་སྤྱིའི་མང་གཙོའི་ཆ་སྙོམས་ཀྱི་བརྒྱ་ཆ་ ༥.༤༤% ཆགས་ནས་ཚད་གཞི་དམའ་ཤོས་སུ་ལྷུང་ཡོད་པར་ཡོངས་གྲགས་གནང་བ་མ་ཟད། འཛམ་གླིང་གི་བརྒྱ་ཆ་གསུམ་ལས་གཅིག་ལྷག་ད་དུང་སྲིད་དབང་སྒེར་གཅོད་ཀྱི་འོག་ཏུ་གནས་མུས་ཡིན་པའང་ཡོངས་གྲགས་གནང་ཡོད་པ་རེད། འདི་ལོའི་མང་གཙོའི་ཚད་གཞི་མཐོ་ཤོས་དེ་ནོར་ཝེ་རྒྱལ་ཁབ་དང་དམའ་ཤོས་ཏེ་བྱང་ཀོ་རི་ཡ་རེད་འདུག

ཧོང་ཀོང་ནང་བདུན་ཕྲག་སྔོན་མའི་རེས་གཟའ་ཉི་མ་ཉིན་མུ་མཐུད་ནས་ངོ་རྒོལ་གྱི་ལས་འགུལ་སྤེལ་ཡོད་པ་དང་བསྟུན་རྒྱལ་སྤྱིའི་ཁྱོན་དུ་གནས་པའི་མང་ཚོགས་འདུ་འཛོམས་ཀྱིས་རང་སོ་སོའི་རྒྱལ་ཁབ་ཀྱི་གཞུང་འཛིན་དབུ་ཁྲིད་རྣམས་ཀྱིས་རྒྱ་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་དོན་འཁྱོལ་ལག་བསྟར་བྱེད་རྒྱུར་ནུས་ལྡན་གནོན་ཤུགས་སྤྲོད་དགོས་པའི་རེ་སྐུལ་འོག་གཞི་རྒྱ་ཆེ་བའི་རྔམ་སྟོན་ལས་འགུལ་སྤེལ་འདུག ལས་འགུལ་དེ་ཟླ་ ༡ ཚེས་ ༡༨ དང་ ༡༩ བཅས་ཉིན་གཉིས་ཀྱི་རིང་ཨ་རི་དང་ཁེ་ན་ཌ། ཨོ་སི་ཊོ་ལི་ཡ་སོགས་གཙོ་གྱུར་ནུབ་ཕྱོགས་རྒྱལ་ཁབ་ ༡༢ ནང་གི་གྲོང་ཁྱེར་མི་དྲ་བ་ ༢༣ ནང་ཉིན་བརྒྱ་དུས་གཅིག་ཏུ་སྤེལ་འདུག་པ་དང་གཞི་རྒྱ་ཆེའི་ལས་འགུལ་དེ་བརྒྱུད་ནས་འཛམ་གླིང་རྒྱལ་ཁབ་ཁག་གི་དབུ་ཁྲིད་རྣམས་ནས་ཡུལ་སོ་སོའི་ནང་ཨ་རི་ལྟར་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་མང་གཙོའི་ཐོག་ཁྲིམས་འཆར་གཏན་འབེབས་གནང་སྐྱོང་ཡོང་བའི་ཞུ་སྐུལ་གནང་འདུག རྒྱལ་སྤྱིའི་ཁྱོན་ནས་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་སྐྱོན་བརྗོད་ཀྱི་གཞི་རྒྱ་ཆེའི་རྔམ་སྟོན་ལས་འགུལ་སྤེལ་བའི་ཁྲོད་དུ་འཇར་མ་ནིའི་རྔམ་སྟོན་ལས་འགུལ་ནང་མཉམ་ཞུགས་གནང་མཁན་སྐུ་ཞབས་ Mehmet Kizilkaya ལགས་ཀྱིས་རྒྱ་གཞུང་གིས་ད་ཆ་བོད་མི་དང་ཡུ་གུར་བ། དེ་བཞིན་ཧོང་ཀོང་མང་ཚོགས་ཐོག་དྲག་གནོན་མུ་མཐུད་བྱེད་བཞིན་པ་དེ་དྲང་བདེན་ཞིག་ཆགས་ཀྱི་མེད་སྟབས། ཁོང་ནས་ཀྱང་རྒྱ་ནག་གཞུང་ལ་ངོ་རྒོལ་གནང་ཕྱིར་མཉམ་ཞུགས་གནང་བ་ཞིག་ཡིན་སྐོར་གསུངས་པ་མ་ཟད། རྒྱ་གཞུང་ནས་དྲག་གནོན་གང་བྱེད་ལ་སེམས་ཤུགས་མ་ཆག་པར་མང་ཚོགས་ཕོན་ཆེ་ཞིག་ཁྲོམ་གཞུང་དུ་ཕེབས་ཏེ་སྐད་འབོད་གནང་བཞིན་པ་དེ་ནི་ངོ་མཚར་ཅན་ཞིག་ཡིན་པས་ཁོང་གིས་དེར་བསྔགས་བརྗོད་ཡོད་ཅེས་གསུངས་འདུག དེ་བཞིན་ཨ་རི་ནིའུ་ཡོག་གི་ Manhattan གྲོང་ཁྱེར་ནང་མང་ཚོགས་བརྒྱ་སྐོར་བརྒལ་བ་འདུ་འཛོམས་གནང་བ་ལྟར་ལས་འགུལ་བ་ Colin Smith ལགས་ཀྱིས་ཁོང་ནས་ཧོང་ཀོང་གི་ལས་འགུལ་བ་རྣམས་དང་དེ་དག་གི་རང་ཚུགས་བརྟན་པའི་ཆོད་སེམས་ལ་གུས་བརྩི་ཞུ་བཞིན་ཡོད་པ་དང་། ད་ཆ་ལས་འགུལ་དེ་རྐྱེན་ཧོང་ཀོང་ནང་གོད་ཆག་རིམ་པའི་མཐོང་ཆོས་སུ་འགྱུར་བཞིན་ཡོད་སྟབས། ཧོང་མང་ཚོགས་ནས་རང་ཉིད་ཀྱི་ལས་འགུལ་དེ་མུ་མཐུད་ནས་སྤེལ་དགོས་གལ་དུ་གཟིགས་ཀྱི་ཡོད་པ་གསུངས་པ་མ་ཟད། ཁོང་རྣམས་ཀྱིས་ཀྱང་ཨ་རི་གཞུང་འཛིན་དབུ་ཁྲིད་ཁག་ལ་རྒྱ་གཞུང་ལ་གནད་དོན་དེ་འབྲེལ་ཐོག་ཤུགས་གནོན་སྤྲོད་ཐབས་བྱ་རྒྱུ་ཡིན་པ་གསུངས་འདུག ལས་འགུལ་མཉམ་ཞུགས་པ་ལྕམ་ Laura Sauriat ལགས་ཀྱིས་ཧོང་ཀོང་གི་མང་ཚོགས་ངོས་ནས་ཨ་རི་དེ་བཞིན་མང་གཙོའི་མངོན་རྟགས་ཀྱི་རྒྱལ་ཁབ་ཅིག་ལ་ངོས་འཛིན་གནང་ཐོག་ཧོང་ཀོང་མི་མང་ལ་རྒྱབ་སྐྱོར་གྱིས་རང་སོར་གནས་པའི་རེ་བ་གནང་བཞིན་ཡོད་པ་ལྟར། ཧོང་ཀོང་མང་ཚོགས་ནས་ཀྱང་དེ་ལྟར་གནང་ཆོག་པ་དང་ཧོང་ཀོང་ལ་ཉིན་གཅིག་རང་དབང་ཐོབ་པའི་ཡིད་ཆེས་ཡོད་ཅེས་གསུངས་འདུགནིའུ་ཡོག་ནང་གི་རྔམ་སྟོན་ལས་འགུལ་གོ་སྒྲིག་གནང་མཁན་ཁོངས་སུ་ཡོད་པ་ Ken ལགས་ཀྱིས་ང་ཚོ་ཧོང་ཀོང་ལས་འགུལ་བ་ཁྱེད་ཚོ་དང་མཉམ་དུ་ཡོད་ཅེས་བརྡ་ལན་གནང་འདུག་པ་མ་ཟད་ལས་འགུལ་བ་ཁག་ཅིག་གིས་རྒྱ་གཞུང་ལ་ངོ་རྒོལ་གྱི་གཞི་རྒྱ་ཆེ་བའི་རྔམ་སྟོན་ལས་འགུལ་དེས་ཧོང་ཀོང་གི་གནད་དོན་ཁོ་ན་མིན་པར་རྒྱ་ནག་དམར་ཤོག་ཚོགས་པའི་དྲག་གནོན་སྲིད་བྱུས་འོག་མྱོང་བཞིན་པའི་གྲངས་ཉུང་མི་རིགས་ཡོངས་ཀྱི་གནད་དོན་ཁག་ཆེས་མངོན་གསལ་གནང་ཡོད་པ་གསུངས་འདུག ལྷག་དོན་གཟའ་འཁོར་སྔོན་མའི་རེ་གཟའ་ཉི་མ་ཉིན་དབྱིན་ཡུལ་བོད་རིགས་ཚོགས་པ་དང་ཧོང་ཀོང་། ཡུ་གུར་བཅས་ཀྱི་གོ་སྒྲིག་འོག་ཁུལ་དེར་རྟེན་གཞི་བྱས་པའིརྒྱ་ནག་གཞུང་ཚབ་ཁང་གི་ཕྱི་ཕྱོགས་སུ་རྒྱའི་དྲག་གནོན་འོག་ཡོད་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ལ་གདུང་སེམས་མཉམ་བསྐྱེད་ཀྱིས་ལས་འགུལ་སྤེལ་ཡོད་པ་རེད། ལས་འགུལ་ཐོག་ཆོས་ལུགས་འདྲ་མིན་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གི་སྐུ་ཚབ་འཐུས་མི་བཅས་ནས་མཉམ་ཞུགས་གནང་ཡོད་པ་མ་ཟད། བོད་མིའི་ཕྱོགས་ནས་དབྱིན་ཡུལ་བོད་རིགས་ཚོགས་པའི་ཚོགས་གཙོ་དགྲ་ལྷ་ཚེ་རིང་ལགས་མཉམ་ཞུགས་གནང་སྟེ་རྒྱ་གཞུང་གིས་ཉེ་དུས་ཧོང་ཀོང་མང་ཚོགས་ཐོག་ཆེས་དྲག་གནོན་བྱེད་བཞིན་པ་དང་ལྷག་དོན་བོད་མི་དང་ཡུ་གུར་མི་རིགས་ཐོག་མུ་མཐུད་དྲག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་ཁག་ཐོག་སེམས་འཚབ་ཀྱི་རྣམ་པ་བསྟན་པ་དང་སྦྲགས་ཏེ་དབྱིན་ཡུལ་གཞུང་ནས་རྒྱ་གཞུང་གིས་ནག་ཉེས་ཁག་ཐེར་འདོན་གྱིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏང་མཁན་རྣམས་ལ་ཉེས་ཆད་གཏོང་དགོས་པའི་འབོད་སྐུལ་ཞུས་འདུག

དེ་རིང་བོད་མིའི་སྒྲིག་འཛུགས་ཀྱི་དྲ་གནས་སུ་གནས་ཚུལ་སྤེལ་བ་ལྟར་ན། ཨ་རིའི་བོད་ཀྱི་དོན་གཅོད་ཁང་གི་གོ་སྒྲིག་གིས། སྤྱི་ལོ་༢༠༡༩ ལོའི་བོད་རྒྱ་ཞི་མོལ་ཞེས་པའི་བརྗོད་གཞིའི་འོག རྒྱ་རིགས་ཤེས་ལྡན་མི་སྣ་དང་མང་གཙོ་དོན་གཉེར་བ་སོགས་ཀྱི་གཙོ་བྱས་པའི་རྒྱ་རིགས་འཐུས་ཚབ་པ་སུམ་བཅུ་ཙམ་མཉམ་འཛོམས་ཀྱི་ཐོག་ནས་གསར་འགོད་གསལ་བསྒྲགས་ཤིག་སྤེལ་དེ། རྒྱ་ནག་གིས་༸གོང་ས་ཏཱ་ལའི་བླ་མིའི་ཡང་སྲིད་ཀྱི་ཐད་ལ་ཐེ་ཇུས་བྱེད་བཞིན་པ་དེར་ངོས་ལེན་མེད་པའི་དོན་ཚན་བཞི་ཕྱིར་བསྒྲགས་བྱས་འདུག ཨ་རིའི་གྲོང་ཁྱེར་ནིའུ་ཡོག་ཏུ་འཚོགས་པའི་ལས་རིམ་དེའི་སྐབས། རྒྱ་ནག་གི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཟུར་བ་སྐུ་ཞབས་ཧཱོ་ཕཱེན་ 胡平དང་། རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空སོགས་ཀྱི་གཙོ་བྱས་པའི་རྒྱ་རིགས་ཀྱི་ཤེས་ལྡན་མི་སྣ་སུམ་བཅུ་ཙམ་ལྷན་འཛོམས་ཀྱི་ཐོག ༸གོང་ས་ཏ་ལའི་བླ་མིའི་སྐུའི་ཡང་སྲིད་ཀྱི་གནད་དོན་དེ་ནི་ཆོས་ལུགས་ཀྱི་བྱེད་སྒོ་དང་འབྲེལ་བ་ཡོད་པ་ཞིག་ཡིན་པར་བརྟེན། གནད་དོན་དེ་ནི་༸གོང་ས་མཆོག་དང་བོད་མི་མང་གི་ཕྱག་ན་ཡོད་པ་ལས་རྒྱ་ནག་དམར་ཤོག་སྲིད་གཞུང་ལ་དེར་ཐེ་བྱུས་བྱེད་རྒྱུའི་དབང་ཆ་གཅིག་ཀྱང་མེད་པ་ཡོངས་གྲགས་གནང་འདུག དེ་ཡང་ཐེངས་འདིའི་ཚོགས་ཐོག་ཏུ་སྐུའི་ཡང་སྲིད་དང་འབྲེལ་བའི་དོན་ཚན་བཞི་ཅན་གྱི་བསྒྲགས་གཏམ་ཞིག་ཕྱིར་བསྒྲགས་བྱས་ཡོད་པ་རྣམས་ནི། ལོ་རྒྱུས་ཀྱི་ཐོག་ནས་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་དེ་ནི་བོད་མི་ཁོ་ནས་རང་ཆས་སུ་མངའ་བའི་ཆོས་ཕྱོགས་ཀྱི་ལམ་ལུགས་ཤིག་ཡིན་པར་བརྟེན། རྒྱ་ནག་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་གཏོགས་བྱེད་ཐབས་མེད་པ་དང་། དམིགས་བསལ་གྱིས་དུས་རྒྱུན་ནས་༸གོང་ས་མཆོག་གིས་བཀའ་གནང་བ་ལྟར། རྒྱ་ནག་དམར་ཤོག་སྲིད་གཞུང་གིས་ནང་བསྟན་ཆོས་ལུགས་འདི་རྨོངས་དད་དང་རྗེས་ལུས་སུ་བརྩི་མཁན་ཞིག་ཡིན་པ་མ་ཟད། མགོན་པོ་གང་ཉིད་གདོན་འདྲེར་བལྟ་མཁན་ཞིག་ཡིན་པར་བརྟེན། མགོན་པོ་གང་ཉིད་མཆོག་གི་ཡང་སྲིད་འཚོལ་ཞིབ་ལ་ཐེ་གཏོགས་བྱེད་བཞིན་པ་དེ་ནི་རྒྱུ་མཚན་དང་བྲལ་ཞིང་དགོད་བྲོ་བའི་བྱ་སྤྱོད་ཅིག་ཡིན་པ་དང་། ལྷག་པར་དུ་རྒྱ་ནག་གིས་སྐུའི་ཡང་སྲིད་ལ་ཐེ་བྱུས་བྱས་པ་འདི་ཡིས་འཛམ་གླིང་གི་ཤར་ནུབ་གང་སར་ཡོད་པའི་བོད་མི་རྣམས་ཀྱི་རྩ་བའི་ཐོབ་ཐང་ལ་རྡོག་རོལ་བྱས་པ་ཞིག་ཡིན་པར་བརྟེན། རྒྱ་ནག་གིས་སྐུའི་ཡང་སྲིད་ཀྱི་གནད་དོན་དེར་ཐེ་གཏོགས་བྱས་པ་ནི་དུས་ནམ་ཡང་ཁྲིམས་འགལ་གྱི་བྱ་སྤྱོད་ཅིག་ཡིན་པར་གསུངས་འདུག གཞན་ཡང་། ཐེངས་འདིའི་ཚོགས་ཞུགས་ཀྱི་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་བོད་མི་རྣམས་ཀྱི་རྩ་བའི་འགྲོ་བ་མིའི་ཐོབ་དང་རིག་གཞུང་སྲུང་སྐྱོབ། གཞན་ཡང་ཆོས་ལུགས་དད་མོས་དང་རང་བྱུང་སྐྱེད་ཁམས་ཁོར་ཡུག་སྲུང་སྐྱོབ་བཅས་ཀྱི་ཐོབ་ཐང་ལ་རྒྱབ་སྐྱོར་བྱེད་ཀྱི་ཡོད་པ། དེ་བཞིན་མགོན་པོ་གང་ཉིད་ཀྱིས་ལམ་སྟོན་མཛད་པའི་བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་ལ་ཡང་རྒྱབ་སྐྱོར་བྱེད་ཀྱི་ཡོད་པར་གསལ་བོར་འཁོད་འདུག དེ་བཞིན་དོན་ཚན་ཕྱི་མའི་ནང་དུ། ཚོགས་ཞུགས་པ་རྣམས་ཀྱིས་མགོན་པོ་གང་ཉིད་མཆོག་གིས་དགོངས་བཞེས་མཛད་པའི་བོད་རྒྱ་མཛའ་འབྲེལ་དེར་རྒྱབ་སྐྱོར་དང་གུས་བརྩི་ཡོད་པར་བརྗོད་དེ། བོད་རྒྱ་མཛའ་འབྲེལ་དེ་ནི་ལོ་རྒྱུས་རང་བཞིན་ལྡན་པ་ཞིག་ཡིན་ཕྱིར་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་མཛའ་འབྲེལ་དེ་རྒྱུན་སྲིང་བྱེད་རྒྱུར་ཤུགས་སྣོན་བྱེད་རྒྱུ་ཡིན་པ་སོགས་ཀྱི་དོན་ཚན་བཞི་འཁོད་པའི་ཐོག རྒྱ་ནག་ལ་ནམ་ཡང་མགོན་པོ་གང་གི་སྐུའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་བྱུས་བྱེད་རྒྱུའི་ཐོབ་ཐང་མེད་པ་མངོན་གསལ་གནང་འདུག གཞན་ཡང་སྐབས་དེར་རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空 ཀྱིས། དེང་གི་ཆར་རྒྱ་ནག་གི་ནང་དུ་དཔལ་འབྱོར་དང་ཕྱི་འབྲེལ་གྱི་ཐད་ནས་ཉམས་དམས་ཆེན་པོ་བྱུང་བཞིན་པའི་གཏམ་བཤད་སྤེལ་བ་མ་ཟད། ཧོང་ཀོང་གཙོ་བྱས་པའི་རྒྱ་ནག་གི་ས་ཁུལ་གང་སར་སྤྱི་ཚོགས་བརྟན་བརླིང་དང་ལྷིང་འཇགས་མེད་སྐོར་བརྗོད་ཡོད་པ་ལྟར། ཧོང་ཀོང་གི་སྐུ་ཚབ་ཞིག་གིས་ཀྱང་ཧོང་མི་མང་གི་མངོན་འདོད་དང་ཕུགས་བསམ་སོགས་ཀྱི་ཐད་ནས་གཏམ་བཤད་གནང་འདུག སྐབས་དེར་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་ཤོག་གི་རྩུབ་སྤྱོད་འོག་ཏུ་མནར་གཅོད་ཐེབས་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ཀྱིས་མཉམ་མཐུན་གྱི་སྒོ་ནས་ལས་འགུལ་སྤེལ་ཤུགས་ཆེ་རུ་བཏང་སྟེ། རྒྱལ་སྤྱིའི་སྤྱིི་ཚོགས་ཀྱི་ཁྲོད་དུ་རྒྱ་ནག་གི་དབང་བསྒྱུར་ལ་ཁ་གཏད་གཅོག་དགོས་གལ་ཡིན་པ་དང་། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་མི་ལོ་བཞི་བཅུའི་རིང་ལ་དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་དཀའ་རྙོག་སེལ་ཐབས་མཛད་ཡོད་ནའང་རྒྱ་ནག་དམར་ཤོག་སྲིད་གཞུང་གིས་དེར་ངོས་ལེན་གནང་མེད་ཚུལ་དང་འབྲེལ་ནས་ད་ཆ་བོད་རྒྱ་མཛའ་འབྲེལ་ཀྱི་ཚོགས་པ་དེ་ཤུགས་ཆེ་རུ་གཏོང་དགོས་བའི་ཞུ་སྐུལ་གནང་འདུག གཞན་ཡང་ཁོང་གིས། རྒྱ་ནག་སྲིད་གཞུང་གིས་ཉེ་བའི་ཆར་ཧྥོ་ཊན་གཙུལ་ལག་མཐོ་སློབ་ཀྱི་སྒྲིག་ཡིག་གི་ཁོངས་ནས་བསམ་བློའི་རང་དབང་སོགས་ཀྱི་ཚིག་བརྗོད་ཁག་ཕྱིར་འཐེན་བྱས་ཏེ་ཞི་ཅིན་ཕིང་གི་ལྟ་བ་གསར་འཇུག་བྱས་ཡོད་པ་སོགས་ཀྱི་གནས་ཚུལ་དེ་ཡང་ལུང་འདྲེན་གནང་སྟེ་ད་ལྟའི་སྤྱི་ཡོངས་ཀྱི་རྒྱ་ནག་གི་གནས་བབ་ཐད་ནས་གཏམ་བཤད་གནང་འདུག རྩ་བའི་ཐེངས་འདིའི་བོད་རྒྱ་མཛའ་འབྲེལ་གྱི་བསྒྲགས་གཏམ་གྱི་ཚོགས་ཐོག་ཏུ། རྒྱ་རིགས་མང་གཙོ་དོན་གཉེར་བ་དང་ཤེས་ལྡན་མི་སྣ་སུམ་བཅུ་ལྷག་གི་གཙོ་བྱས་པའི་ཨ་རིའི་དོན་གཅོད་པ་དང་ད་ཡོད་ཀྱི་ཨ་རིའི་དོན་གཅོད་ཁང་གི་བོད་རྒྱ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་འབྲེལ་མཐུད་པ་ཟུར་བ་ཀུན་དགའ་བཀྲ་ཤིས་ལགས། གཞན་ཡང་ཨ་རིའི་ནིའུ་ཡོག་དང་ནིའུ་ཇིར་སཱི་ཁུལ་གྱི་བོད་རིགས་སྤྱི་དོན་ཚོགས་པའི་ཚོགས་གཙོ་དང་ཚོགས་མི་རྣམས། དེ་བཞིན་ཨ་རིའི་ཁུལ་གྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་ཀྱིས་མཉམ་ཞུགས་མཛད་ཡོད་པ་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་རིགས་རྣམས་ལ་སྣེ་ལེན་བྱས་པའི་ཐོག དོན་གཅོད་ཁང་གི་རྒྱ་རིགས་འབྲེལ་མཐུད་ཀྱི་ལས་རིམ་ངོ་སྤྲོད་དང་བོད་རྒྱ་གཉིས་ཀྱི་སྤྱི་ཚོགས་ཀྱི་ཁྲོད་དུ་མཛའ་འབྲེལ་མཐོར་འདེགས་གཏོང་ཕྱོགས་སོགས་ཀྱི་ཐད་ནས་གསུངས་བཤད་གནང་འདུག

ཁ་ན་ཊར་རྟེན་གཞི་བྱས་པའི་Chauncey Jung ཞུ་བའི་རྒྱ་ནག་གི་དྲ་རྒྱ་ཞིབ་འཇུག་པ་ཞིག་གིས་ལྷོ་རྒྱ་ནག་གི་སྔ་དྲོའི་ཆ་འཕྲིན་གྱི་སྟེང་ལ་གནས་ཚུལ་སྤེལ་བར་གཞིགས་ན། སྲིད་འཛིན་ཞི་ཅིན་ཕིང་གི་ལམ་སྟོན་ལྟར་རྒྱ་ནག་སྲིད་གཞུང་གིས་འགྲོ་སོང་ཕོན་ཆེར་བཏང་སྟེ་ཕྱི་ཕྱོགས་སུ་ཧོང་ཀོང་དང་ཞིན་ཅང་། དེ་བཞིན་ཧཱོ་བཱེ་བཟོ་ཚོང་ཁང་། གཞན་ཡང་ཨ་རི་དང་རྒྱ་ནག་གཉིས་དབར་གྱི་ཚོང་དམག་སོགས་དང་འབྲེལ་བའི་འཁྱོགས་བཤད་དྲིལ་བསྒྲགས་སྣ་མང་གི་ལས་གཞི་རྒྱ་ཆེར་སྤེལ་བཞིན་ཡོད་ནའང་། འདི་ལོའི་ནང་དུ་རྒྱ་ནག་གི་དྲིལ་བསྒྲགས་ཀྱི་ལས་གཞི་དེར་གྲུབ་འབྲས་མ་སྨིན་པ་མ་ཟད། ཕྱོགས་ཡོངས་ནས་ཕམ་ཉེས་ཆེན་པོ་བྱུང་ཡོད་པར་མངོན་གསལ་གནང་འདུག དེ་ཡང་ཁ་ཉིན་ཕྱི་ཚེས་ ༡༦ ཉིན་ལྷོ་རྒྱ་ནག་སྔ་དྲོའི་ཆ་འཕྲིན་གྱི་དྲ་གནས་ཐོག Chauncey Jung ལགས་ཀྱིས་བྲིས་གནང་བའི་དཔྱད་རྩོམ་ཞིག་འདོན་སྤེལ་གནང་བའི་ནང་དུ། རྒྱ་ནག་གི་ནང་དུ་ཕྱི་ཕྱོགས་ཀྱི་བརྒྱུད་ལམ་ཡོངས་སུ་བཀག་སྡོམ་གྱིས་རྒྱ་ནག་གིའཁྱོགས་བཤད་དྲིལ་བསྒྲགས་མ་གཏོགས་སྤེལ་མེད་སྟབས། རྒྱ་ནག་ནང་ཁུལ་དུ་དྲིལ་བསྒྲགས་དེའི་རིགས་གང་འཚམས་ལམ་ལྷོངས་བྱུང་ཡོད་ནའང་། ཕྱོགས་གཞན་ཞིག་ནས། རྒྱ་ནག་གཞུང་འབྲེལ་དང་གཞུང་འབྲེལ་མིན་པའི་བརྒྱུད་ལམ་སྣ་མང་ནས་རྒྱལ་སྤྱིའི་སྤྱི་ཚོགས་ཁྲོད་དྲིལ་བསྒྲགས་ཤུགས་ཆེར་སྤེལ་ཐབས་བྱས་ཡོད་པ་རྣམས་ལམ་ལྷོངས་མ་བྱུང་བར་ཕམ་ཉེས་ཆེན་པོ་བྱུང་ཡོད་པ་མ་ཟད། རྒྱལ་སྤྱིའི་ཁྲོད་ཀྱི་རྒྱ་ནག་གི་ཆེ་མཐོང་ཡང་རང་བཞིན་གྱིས་བརླགས་འགོ་ཚུགས་ཡོད་པར་བརྟེན། སྲིད་གཞུང་གི་དགོས་འདོད་ཐམས་ཅད་ལ་གྲུབ་འབྲས་གཅིག་ཀྱང་ཐོན་མེད་པར་གསུངས་འདུག Chauncey ལགས་ཀྱིས་ད་དུང་། རྒྱ་ནག་གི་གསར་འགོད་པ་ཟུར་བ་ Jasper Jia ལགས་ཀྱིས་རང་གི་ Twitter དྲ་གནས་བརྒྱུད་རྒྱ་ནག་སྲིད་གཞུང་གི་ལྷན་ཁང་མང་དག་ཅིག་གིས་ལོ་ངོ་བཅུ་ཕྲག་གཅིག་ཙམ་གི་རིང་ལ་འགྲོ་གྲོན་འབོར་ཆེན་བཏང་ནས་དྲིལ་བསྒྲགས་ཀྱི་ལས་གཞི་བརྩམས་ཡོད་ནའང་རྒྱ་ནག་དབུས་དམར་ཤོག་གཞུང་གི་བརྙན་འཕྲིན་ཁང་གི་ཡུག་ཊིབ་ ( Youtube) དྲ་རྒྱར་ལྟ་ཀློག་བྱེད་མཁན་གྱི་མི་གྲངས་ས་ཡ་གཅིག་ལས་བྱུང་མེད་ནའང་། དེང་སྐབས་རྒྱ་ནག་གི་དྲ་རྒྱའི་སྟེང་གི་སྙན་གྲགས་ཆེ་བའི་བུ་མོ་ལཱི་ཙི་ཆི་ཡི་དྲ་རྒྱར་མི་གྲངས་ས་ཡ་བདུན་དང་ཕྱེད་ཙམ་ལྟ་མཁན་བྱུང་ཡོད་སྟབས། རྒྱ་ནག་གཞུང་གི་དྲ་རྒྱ་ལས་བུ་མོ་ཆུང་ཆུང་ཞིག་གིས་དྲ་རྒྱར་བལྟ་མཁན་མང་བ་ཡོད་པ་ཐེར་འདོན་བྱས་ཡོད་པ་ལུང་འདྲེན་གྱིས། སྤྱིར་སྒེར་གྱི་དྲ་རྒྱའི་ཐོག་དམ་དྲགས་ཤུགས་ཆེར་བྱེད་མཁན་གྱི་རྒྱ་ནག་སྲིད་གཞུང་གིས་བུ་མོ་དེའི་དྲ་ལམ་ཐོག་ Virtual Private Network ཞེས་རྒྱ་ནག་གི་དམ་དྲག་བྱེད་བཞིན་པའི་བརྒྱུད་ལམ་བེད་སྤྱོད་ཐོག་ནས་གནས་ཚུལ་བརྒྱུད་བསྒྲགས་བྱེད་རྒྱུའི་ཆོག་མཆན་ཐོབ་ཡོད་པའི་གནད་དོན་དེ་ཡང་དོགས་གཞིའི་གནད་དོན་ཞིག་ཡིན་པ་གསུངས་འདུག དེ་བཞིན་དེང་སྐབས་ཕྱི་ཕྱོགས་སུ་ཡོད་པའི་རྒྱ་ནག་གི་གཞུང་ཚབ་ལས་ཁུངས་ཀྱི་ལས་བྱེད་དང་གཞུང་འབྲེལ་མི་སྣ་མང་པོ་ཞིག་གིས་ཆེད་དུ་ཊྲེ་ཊྲར་( Twitter) སྤྱི་ཚོགས་དྲ་རྒྱ་གསར་འབྱེད་བྱས་ཏེ་རྒྱ་ནག་གཞུང་འབྲེལ་གྱི་དྲིལ་བསྒྲགས་ཁྱབ་སྤེལ་བྱེད་འགོ་ཚུགས་ཡོད་ནའང་། ཕྱི་ཕྱོགས་ཀྱི་རང་དབང་གི་སྤྱི་ཚོགས་ཁྲོད་ཁོང་ཅག་གི་འཁྱོགས་བཤད་ཀྱི་བྱེད་ལས་དེར་སྣང་མེད་བཏང་སྟེ་དགའ་བསུ་ཞུ་མཁན་མེད་པ་ཤེས་སྟེ་ཅི་བྱ་གཏོལ་མེད་དུ་གྱུར་ཡོད་པར་འགྲེལ་བརྗོད་ཀྱིས། ཧོང་ཀོང་ནང་གི་དབྱེ་འབྱེད་ཀྱི་ཆབ་སྲིད་ཀྱི་ལས་གཞི་དང་ཞིན་ཅང་ནང་གི་རིག་གནས་བསྐྱར་སྤེལ་གི་བྱེད་ལས་སོགས་མིང་འདོན་གནང་སྟེ། རྒྱ་ནག་གི་དབྱེ་འབྱེད་རང་བཞིན་གྱི་སྲིད་བྱུས་ཀྱི་ཐག་གཅོད་དེ་དག་ནི་རྒྱ་ནག་གི་ཆེ་མཐོང་བརླགས་བྱེད་ཀྱི་རྒྱུ་རྐྱེན་ཞིག་ཡིན་པ་མ་ཟད། རྒྱ་ནག་གིས་རང་དབང་དང་འདྲ་མཉམ་ལ་སྐྱོད་པའི་རྨང་གཞིའི་ལམ་ཁ་ཡོད་ཚད་བཀག་འགོག་བྱས་ཡོད་པའི་སྐྱོན་བརྗོད་གནང་འདུག མ་ཟད་རྒྱ་ནག་གི་ནང་དུ་གསར་འགྱུར་རང་དབང་ལ་དམ་དྲག་དང་། ཕྱི་ལོག་གི་གསར་ཁང་དང་འབྲེལ་བའི་གསར་འགོད་པ་དང་ཉམས་ཞིབ་པ་རྣམས་ལ་དུས་བསྟུན་གྱིས་བཤུ་གཞོག་བྱེད་བཞིན་ཡོད་པ་མངོན་གསལ་གནང་འདུག དབྱིན་ཡུལ་ཁུལ་གྱི་རྒྱ་ནག་གི་གཞུང་ཚབ་པ། ལུག་ཞཱོ་མིང་གིས་རྒྱ་ནག་གི་ནང་དུ་ཆབ་སྲིད་ཀྱི་བཙོན་པ་མེད་པར་ཕྱི་ལ་བསྒྲགས་བྱས་ཡོད་ནའང་། Freedom House ཞེས་པའི་འགྲོ་བ་མིའི་ཐོབ་ཐང་གི་ཚོགས་པའི་སྙན་ཐོའི་འགོ་བརྗོད་དུ། བློ་སྤོབས་ཆེན་པོའི་ངང་། རྒྱ་ནག་ནི་ཆབ་སྲིད་ཀྱི་བཙོན་པ་མང་ཤོས་ཀྱི་རྒྱལ་ཁབ་ཅིག་ཡིན་པར་འཁོད་དེ། རྒྱ་ནག་ནང་གི་ནོ་སྦེལ་ཞི་བདེ་གཟེངས་རྟགས་བཞེས་མཁན་གྱི་སྐུ་ཞབས་ལུག་ཞཱོ་པཱོ་དང་། ཡུ་གུར་ས་ཁུལ་གྱི་བཀག་སྐྱིལ་ཁང་གི་མི་དེ་དག་ཆབ་སྲིད་བཙོན་མ་མིན་ན་ཅི་རེད་ཅེས་དགག་གཞག་གནང་སྟེ། རྒྱ་ནག་གི་སྐྱག་རྫུན་དེ་དག་གིས་རྒྱལ་སྤྱིའི་སྟེང་ཁོང་ཚོར་ཆ་འཇོག་བྱེད་སྟངས་ལ་དྲི་བ་གཏོང་གི་ཡོད་པར་གསུངས་འདུག དེ་དང་མཉམ་དུ། ད་ཆ་རྒྱ་ནག་གི་འགོ་ཁྲིད་རྒན་གྲོས་རྣམས་ཀྱི་ནང་དུ་མང་གཙོའི་རྒྱལ་ཁབ་ཀྱི་ཕྱག་ལས་གནང་སྟངས་ལ་གོ་བ་ཏོག་ཙམ་རྙེད་ཀྱི་ཡོད་པ་དེ་རྣམས། རྒྱ་ནག་གི་ཕྱི་ལོག་གི་དྲིལ་བསྒྲགས་དེ་དག་ལམ་ལྷོངས་བྱུང་བར་བཀག་རྡོ་ལྟ་བུར་གྱུར་པ་དང་། རྒྱ་ནག་གིས་དཔལ་འབྱོར་སྒོ་འབྱེད་བྱས་ཏེ་མི་ལོ་བཞི་བཅུ་ལྷག་གི་ཉམས་མྱོང་ཡོད་པ་ལྟར། མང་གཙོའི་སྤྱི་ཚོགས་ཀྱི་ཕྱག་ལས་གནང་སྟངས་ལ་གོ་བ་ཏོག་ཙམ་ཞིག་རྙེད་དགོས་བ་ཞིག་ཡིན་ནའང་། རྒྱ་ནག་ནི་ད་དུང་དེ་ལས་རིང་དུ་འགོངས་ཏེ། དོན་དངོས་ཀྱི་ཐོག་མང་གཙོའི་ལྡོག་ཕྱོགས་ཀྱི་གནས་བབ་ཅིག་ཏུ་ལྷག་ཡོད་པར་འགྲེལ་བརྗོད་གནང་འདུག གཞན་ཡང་། ཁོང་གིས། རྒྱ་ནག་གི་འགོ་ཁྲིད་ཚོས་སྟོབས་ཤུགས་ངོམ་རྒྱུ་མ་གཏོགས་མང་གཙོའི་སྤྱི་ཚོགས་ཀྱི་ནང་དུ་ཐག་གཅོད་ལེན་སྟངས་སོགས་ཀྱི་མཚོན་པའི་འབྲེལ་ལམ་གྱི་རིགས་ལ་རྒྱུས་མངའ་མེད་པ་རེད། ཕྱི་ལོག་གི་མི་སེར་བཀག་སྐྱིལ་བྱས་ཏེ་གཏའ་མར་ཉར་བའི་ཐོག་ནས་ཁྲིམས་སྒྲིག་ལ་འགྱུར་བ་གཏོང་རྒྱུར་རེ་བ་རྒྱག་གི་ཡོད་པ་དེ་ནི་དུས་རབས་བཅུ་དགུ་བའི་རྒྱལ་ཁབ་བར་གྱི་འབྲེལ་ལམ་འཛུགས་སྟངས་ཤིག་ཡིན་པར་བརྗོད་དེ། ཉེ་ཆར་རྒྱ་ནག་གིས་ཁ་ན་ཊའི་མི་སེར་གཉིས་འཛིན་བཟུང་བཀག་ཉར་བྱས་ཏེ། ཁ་ན་ཊའི་གཞུང་གིས་ཨ་རི་མཉམ་དུ་ཁྲིམས་མཐུན་གྱི་ཆངས་ཡིག་བཞག་པ་རྣམས་འགྱུར་བ་གཏོང་རྒྱུར་རེ་བ་བྱེད་ཀྱི་ཡོད་པ་ལུང་འདྲེན་གནང་འདུག དེ་བཞིན། ད་ཆ་ཨ་རིའི་གྲོས་ཚོགས་ཀྱི་ནང་དུ་ཡང་། མང་གཙོ་ཚོགས་པའི་སྟོབས་ཤུགས་ལ་རྒྱལ་ཁ་ཆེན་པོ་ཐོབ་ཀྱི་ཡོད་པ་ལྟར། མང་གཙོ་ཚོགས་པའི་ངོས་ནས་སྤྱི་མཐུན་ཚོགས་པ་ལྟར་མ་ཡིན་པར། རྒྱ་ནག་བཙན་རྒྱལ་ལ་བཟོད་བསྲན་གཅིག་ཀྱང་བྱེད་ཀྱི་མིན་པའི་རྣམ་པ་ཕྱིར་མངོན་ཡོང་གི་ཡོད་པར་བརྗོད་འདུག ཇི་སྲིད་རྒྱ་ནག་སྲིད་གཞུང་གིས་འདྲ་མཉམ་དང་རང་དབང་གི་ལྟ་བར་གུས་བརྩི་མ་ཞུས་བར་དུ། མང་གཙོ་དང་འབྲེལ་ལམ་ཡོང་ཐབས་མེད་པ་ཞིག་ཡིན་པར་འབྲེལ་བརྗོད་ཀྱིས། ད་ལྟའི་ཆར་རྒྱ་ནག་གིས་དམ་དྲག་གི་འོག་ནས་གནས་ཚུལ་འཁོར་རྒྱུགས་ལ་བཀག་སྡོམ་བྱེད་ཀྱི་ཡོད་པའི་དམག་འཐབ་འདིས། ཕྱི་ལོག་གི་རྒྱལ་ཁབ་རྣམས་ཀྱི་མང་གཙོ་ལ་ཉེན་ཁ་འཕྲད་ངེས་བར་བརྟེན། མང་གཙོའི་རིན་ཐང་དང་ཆིག་སྒྲིལ་སྲུང་སྐྱོབ་ལ་འཐབ་རྩོད་བྱེད་བཞིན་པ་རྣམས་ཀྱིས་ལས་འགུལ་མང་པོ་སྤེལ་རྒྱུ་ལྷག་ཡོད་པར་འཁོད་འདུག

ཨ་རིའི་ནང་དུ་རྟེན་གཞི་བྱས་པའི་Committee to Project Journalist ཞེས་པའི་རྒྱལ་སྤྱིའི་གསར་འགོད་པ་སྲུང་སྐྱོབ་ཚོགས་པས་ཕྱི་ལོ་ ༢༠༡༩ ལོའི་ནང་རྒྱལ་སྤྱིའི་རྒྱལ་ཁབ་ཁག་གི་ཁྲོད་གསར་འགོད་པ་བཙོན་འཇུག་བྱས་པའི་གནད་དོན་ཐད་ཉམས་ཞིབ་སྙན་མཐོ་ཞིག་འདོན་སྤེལ་གནང་འདུག་པའི་ནང་དུ། ལོ་འདིའི་ནང་རྒྱ་ནག་གིས་ཉུང་མཐར་གསར་འགོད་པ་ ༤༨ ཙམ་འཛིན་བཟུང་བྱས་ཡོད་སྐོར་དང་འབྲེལ། རྒྱ་ནག་དེ་འཛམ་གླིང་ནང་གསར་འགོད་པ་མང་ཤོས་བཙོན་འཇུག་བྱེད་མཁན་གྱི་རྒྱལ་ཁབ་ཆེས་སྡུག་ཤོས་ཡིན་པ་གསལ་འདོན་གནང་འདུག དེ་ཡང་ཁ་སང་ཕྱི་ཚེས་ ༡༡ ཉིན་རྒྱལ་སྤྱིའི་གསར་འགོད་པ་སྲུང་སྐྱོབ་ཚོགས་པའི་དྲ་གནས་ཐོག་སྙན་ཐོ་དེ་འདོན་སྤེལ་གནང་འདུག་པ་ལྟར།  ༢༠༡༩ ལོ་འདིའི་ནང་འཛམ་གླིང་ཁྱོན་ཡོངས་སུ་གསར་འགོད་པ་ཁྱོན་ ༢༥༠ ཙམ་འཛིན་བཟུང་བྱས་ཡོད་པ་ཤེས་རྟོགས་བྱུང་ཡོད་པ་དང་། དེང་སྐབས་རྒྱ་ནག་གི་སྲིད་འཛིན་ཞི་ཅིན་ཕིང་་གིས་གསར་གྱུར་བརྒྱུད་ལམ་ཐོག་དམིགས་བསལ་གྱི་དམ་དྲགས་ཤུགས་ཆེར་བྱེད་བཞིན་པ་དང་འབྲེལ། འདི་ལོ་རྒྱ་ནག་གཅིག་པོའི་ནང་དུ་གསར་འགོད་པ་ ༤༨ འཛིན་བཟུང་བྱས་ཡོད་པ་དང་འབྲེལ། འཛམ་གླིང་ནང་གསར་འགོད་པ་མང་ཤོས་འཛིན་བཟུང་བྱེད་མཁན་གྱི་རྒྱལ་ཁབ་ཏུ་མིང་འདོན་གནང་འདུག དེའང་སྔར་ལོ་རྒྱ་གཞུང་གི་གསར་འགོད་པ་ ༤༧ འཛིན་བཟུང་བྱས་པ་ལས་གྲངས་ཁ་གཅིག་གིས་མང་བ་ཡིན་པ་ཡོངས་གྲགས་གནང་འདུག སྙན་ཐོར་གཞིགས་ན། འདས་པའི་ལོ་གསུམ་དང་བསྡུར་ན་འདི་ལོ་འཛམ་གླིང་ཁྲོད་གསར་འགོད་པ་མང་ཤོས་འཛིན་བཟུང་བྱས་ཡོད་སྟབས་གནས་སྟངས་ཛ་དྲགས་ཡིན་པ་དང་། འཛིན་བཟུང་བྱས་པའི་ཁོངས་ནས་བརྒྱ་ཆ་ ༦༦ རྒྱལ་ཁབ་ཀྱི་གཞུང་ལ་སྐྱོན་བརྗོད་བྱས་པའམ་གཞུང་གི་བྱ་སྤྱོད་ངན་པའི་སྐོར་ལ་གནས་ཚུལ་སྤེལ་མཁན་ཤ་སྟག་ཡིན་པ་དང། བརྒྱ་ཆ་ ༡༣ ཙམ་ཞིག་གདོང་ལེན་བྱས་པའི་ཉེས་མིང་འོག་ཚུད་ཡོད་པ་དང་་བརྒྱ་ཆ་ ༡༢ ཙམ་ཞིག་གནས་ཚུལ་རྫུན་མ་སྤེལ་བའི་ཉེས་མིང་འོག་འཛིན་བཟུང་བྱས་ཡོད་པ་དང་། བརྒྱ་ཆ་ ༢༣ ཙམ་ཞིག་ཉེས་མིང་གང་ཡང་མེད་པར་དོན་མེད་འཛིན་བཟུང་བྱས་བ་ཡིན་པར་གསལ་འདོན་གནང་བ་མ་ཟད། འཛིན་བཟུང་བྱས་པའི་ཁོངས་ནས་བརྒྱ་ཆ་ ༢༧ ཙམ་ཞིག་བཙོན་འཇུག་འོག་འཕྲོད་བསྟེན་གྱི་དཀའ་ངལ་འཕྲད་བཞིན་པ་སོགས་མངོན་གསལ་གནང་འདུག དེའང་གྲངས་ཐོ་འདིའི་ཁོངས་སུ་གསར་འགོད་པ་འཛིན་བཟུང་བྱས་པའི་གནད་དོན་གསལ་པོ་ཤེས་པ་མ་གཏོགས་གར་སོང་ཆ་མེད་དུ་གྱུར་བ་སོགས་བརྩིས་མེད་པ་རེད། སྔ་ལོ་ Turkey ནང་དུ་གསར་འགོད་པ་ ༦༨ ཙམ་འཛིན་བཟུང་བྱས་པ་ནས་འདི་ལོའི་གྲངས་འབོར་དེ་༤༧ ཆགས་ཡོད་སྟབས། རྒྱ་ནག་གི་སྔར་ལོ་འཛིན་བཟུང་གི་གྲངས་འབོར་ ༤༧ ནས་འདི་ལོའི་གྲངས་འབོར་ ༤༨ ལ་འཕར་ཡོད་པ་དང་སྦྲགས། འདི་ལོ་རྒྱལ་ཁབ་ཅིག་ནང་གསར་འགོད་པ་འཛིན་བཟུང་མང་ཤོས་བྱེད་མཁན་དེ་རྒྱ་ནག་ཆགས་ཡོད་པ་དང་། དེའང་འདས་པའི་ལོ་ཁ་ཤས་ནང་གི་གྲངས་འབོར་མཐོ་ཤོས་དེ་ཡིན་པ་མངོན་གསལ་གནང་འདུག ཡིན་ནའང་རྒྱ་ནག་གཞུང་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་གསར་འགོད་པར་འགྲེལ་བརྗོད་བྱས་པའི་ནང་དུ། རྒྱ་ནག་ནི་ཁྲིམས་ཀྱི་དབང་བསྒྱུར་ལ་གུས་བརྩི་ཞུ་མཁན་གྱི་རྒྱལ་ཁབ་ཅིག་ཡིན་སྐོར་དང་འབྲེལ། འཛིན་བཟུང་བྱས་པའི་གསར་འགོད་པ་རྣམས་ཀྱིས་ཁྲིམས་འགལ་གྱི་བྱ་བ་ག་རེ་སྤེལ་ཡོད་པ་དེར་བསམ་བློ་གཏོང་དགོས་པར་བརྗོད་འདུག ཚོགས་པའི་ངོས་ནས་ད་དུང་། འདི་ལོ་ Turkey ནང་དུ་གསར་འགོད་པ་འཛིན་བཟུང་བྱས་པའི་གྲངས་འབོར་ཉུང་དུ་ཕྱིན་ཡོད་ཀྱང། ཕྱོགས་གཞན་ཞིག་ནས་གནས་སྟངས་ཡར་རྒྱས་ཕྱིན་པ་ལས་ཟློག་སྟེ་ཡུལ་དེའི་སྲིད་འཛིན་གྱི་ངོས་ནས་གསར་འགྱུར་བརྒྱུད་ལམ་ཐོག་དམ་དྲགས་ཤུགས་ཆེ་རུ་བཏང་བ་དང་འབྲེལ། གསར་ཁང་ ༡༠༠ ལྷག་ཙམ་བཙན་དབང་ཐོག་སྒོ་རྒྱག་ཏུ་བཅུག་སྟེ། དེ་དག་གི་གསར་འགོད་པ་རྣམས་ལ་འཇིགས་སྐུལ་བའི་ཉེས་མིང་བཙུགས་པ་དང། མང་པོ་ཞིག་ལས་ཀ་མེད་པ་བཟོས་པ་སོགས་ཀྱི་འགལ་རྐྱེན་མང་པོ་བྱུང་ཡོད་པ་གསུངས་འདུག གསར་འགོད་པ་སྲུང་སྐྱོབ་ཚོགས་པས་འདི་ལོ་རྒྱ་ནག་ནང་དུ་སྒེར་གྱི་གསར་འགྱུར་སྤེལ་མཁན་གསར་འགོད་པ་ Sophia Huang Xueqin ལགས་ཀྱིས་ཧོང་ཀོང་ནང་གི་དམངས་གཙོའི་ལས་འགུལ་བའི་སྐོར་གནས་ཚུལ་སྤེལ་བ་དང་འབྲེལ་ནས་ཁོང་མོ་འདི་ལོའི་ཕྱི་ཟླ་ ༡༠ བའི་ནང་འཛིན་བཟུང་བྱས་པ་དང་། དེ་བཞིན་ Iran ནང་གི་གསར་འགོད་པ་ Mohammad Mossaed ལགས་ཀྱིས་རང་རྒྱལ་གྱི་ནང་དུ་རྡོ་སྣུམ་གྱི་གོང་ཚད་འཕར་བཞིན་པའི་སྐོར་ལ་Twitter དྲ་གནས་ཐོག་གནས་ཚུལ་སྤེལ་བར་འཛིན་བཟུང་བྱས་པ་སོགས་ཀྱི་གནད་དོན་ལུང་འདྲེན་དང་འབྲེལ། གསར་འགོད་པ་རྣམས་ནས་རང་་ལ་འཁྲི་བའི་ལས་འགན་ཁུར་བར་འཛིན་བཟུང་བྱེད་རྒྱུ་མེད་པར་གསུངས་འདུག རྩ་བའི་གསར་འགོད་པ་སྲུང་སྐྱོབ་ཚོགས་པའི་ངོས་ནས་ལོ་ལྟར་འཛམ་གླིང་ཁྲོད་གསར་འགོད་པའི་གནས་སྟངས་ཐོག་ལ་ཉམས་ཞིབ་དང་། འཛིན་བཟུང་བྱས་པའི་གསར་འགོད་པ་རྣམས་གློད་བཀྲོལ་ཡོངས་བའི་ལས་འགུལ་འདྲ་མིན་སྤེལ་བཞིན་པའི་ཁྲོད། འདས་པའི་ལོ་འདིའི་ནང་གསར་འགོད་པ་ ༨༠ ཙམ་གློད་བཀྲོལ་ཐུབ་པ་བྱུང་ཡོད་པ་རེད།

རྒྱ་ནག་གི་སྲིད་འཛིན་ཞི་ཅིན་ཕིང་དང་ཧོང་ཀོང་སྤྱི་ཁྱབ་ཀེ་རི་ལེམ་གཉིས་ཐུག་འཕྲད་ཀྱིས་འདས་པའི་རིང་ཧོང་ཀོང་ནང་དུ་མང་ཚོགས་ཀྱིས་བསྟུད་མར་ངོ་རྒོལ་བྱེད་བཞིན་པའི་གནད་དོན་གླེང་སློང་དང་སྦྲགས། སྤྱི་ཁྱབ་ཀེ་རི་ལེམ་གྱི་ངོས་ནས་ཧོང་ཀོང་གི་ཟིང་འཁྲུག་ཞི་འཇམ་བཟོ་ཐབས་སུ་གཞུང་གི་ལས་དོན་གནང་ཕྱོགས་ལ་རྒྱབ་སྐྱོར་ཡོད་ཅེས་གསུངས་འདུག  དེ་རིང་བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ན་ཞི་ཅིན་ཕིང་དང་ཀེ་རི་ལེམ་གཉིས་ཀྱི་ཐུག་འཕྲད་དེ་ ཧོང་ཀོང་ནང་ཞི་རྒོལ་བྱུང་ནས་ཕན་ཚུན་དངོས་སུ་ཡོངས་བསྒྲགས་ཐོག་ནས་ཐུག་འཕྲད་བྱས་པ་ཐེངས་དང་པོ་ཆགས་ཀྱི་ཡོད་པ་དང་། ཐུག་འཕྲད་དེའང་ཁ་སང་རེས་གཟའ་ཟླ་བའི་ཉིན་རྒྱ་ནག་གི་གྲོང་ཁྱེར་ Shanghai ནང་བྱུང་འདུག སྐབས་དེར་ཞི་ཅིན་ཕིང་གིས་ཀེ་རི་ལེམ་གྱི་ལས་དོན་བྱེད་ཕྱོགས་ལ་རྒྱབ་སྐྱོར་ཡོད་པ་བཤད་པ་དང་འབྲེལ་ཏེ་གཞུང་ནས་མང་ཚོགས་ཀྱི་འཚོ་ཐབས་ཡར་རྒྱས་སླད་སྤྱི་ཚོགས་ཁྱོན་དང་གྲོས་བསྡུར་ལྷུག་པོ་བྱེད་དགོས་སྐོར་དང་སྒོས་ཧོང་ཀོང་གི་མང་ཚོགས་ནས་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ལག་བསྟར་འཚམས་པོ་བྱེད་པའི་རེ་བ་དང་། ལྷག་པར་དུ་ཡུལ་དེའི་གཞི་རྩའི་ཁྲིམས་ལག་བསྟར་གྱིས་ཧོང་ཀོང་སྲུང་སྐྱོབ་སླད་མཉམ་རུབ་ཀྱིས་ལས་དོན་བྱེད་དགོས་པ་བརྗོད་འདུག ཚོགས་འདུའི་ཐོག་རྒྱ་ནག་གི་ཕྱི་སྲིད་བློན་ཆེན་ Wang Yi དང་རྒྱལ་ཁབ་བདེ་འཇགས་ལས་ཁུངས་ཀྱི་བློན་ཆེན་ Zhao Kezhi གཞུང་འབྲེལ་སྲིད་དོན་པ་ཁག་གཅིག་ཀྱང་ཡོད་པ་རེད་འདུག   གཞི་རྩའི་ཧོང་ཀོང་ནང་འདི་ལོའི་ཟླ་བ་དྲུག་པ་ནས་མང་ཚོགས་ཀྱི་གཞུང་ལ་ཉེས་ཅན་རྩིས་སྤྲོད་ཀྱི་ཁྲིམས་གཞི་གཙོས་པའི་ཀེ་རི་ལེམ་ལས་གནས་ནས་ཕྱིར་འཐེན་དང་། ཡུལ་དེའི་འགོ་ཁྲིད་མང་གཙོའི་སྒོ་ནས་འདེམས་སྒྲུག་དགོས་པ་དང་། ལས་འགུལ་ཁྲོད་འཛིན་བཟུང་བྱས་པ་རྣམས་གློད་བཀྲོལ་དགོས་པ་སོགས་དགོས་འདུན་ལྔ་པོ་བསྒྲུབ་དགོས་པ་བརྗོད་ཡོད་པ་མ་ཟད། ཉེས་ཅན་རྩིས་སྤྲོད་ཀྱི་ཁྲིམས་གཞི་དེ་དེ་སྔ་ཕྱིར་འཐེན་བྱས་ཡོད་ཀྱང་ཧོང་ཀོང་མང་ཚོགས་ནས་དགོས་འདུན་ལྔ་པོ་ཡོངས་རཛོགས་བསྒྲུབ་དགོས་པར་ངོ་རྒོལ་བསྟུད་མར་གནང་བཞིན་པའི་གནས་སྟངས་བྱུང་བ་རེད། ཉེ་ལམ་རེས་གཟའ་སྤེན་པའི་ཉིན་ཧོང་ཀོང་མང་ཚོགས་ ༣༠༠༠ ལྷག་འདུ་འཛོམས་ཀྱིས་གཞུང་ལ་དེ་འབྲེལ་ངོ་རྒོལ་བྱས་པ་དང་ངོ་རྒོལ་དེའང་རྒྱ་གཞུང་གིས་ཡུལ་དེའི་ནང་དམ་དྲག་སྔར་ལྷག་བྱ་འཆར་ཡོད་པར་ཐུགས་འཚབ་ཀྱིས་ངོ་རྒོལ་གནང་བ་ཞིག་ཡིན་པ་རེད། གཞི་རྩའི་རེས་གཟའ་པ་སངས་ཉིན་རྒྱ་གཞུང་གིས་ཧོང་ཀོང་གཞུང་གི་ལམ་ལུགས་ལ་ཁ་གཏད་གཅོག་མཁན་ཚོར་བཟོད་བསྲན་བྱེད་རྒྱུ་མེད་པ་ཕྱིར་བསྒྲགས་ཀྱིས་ཉེན་བརྡ་བཏང་བ་དང་སྦྲགས། མང་ཚོགས་ནས་ཅ་དངོས་ཉོས་སའི་ཁྲོམ་རའི་ནང་ངོ་རྒོལ་དང་ཉེན་རྟོག་པས་བསྐྱར་དུ་མིག་ཆུ་དུག་རླངས་གཏོར་བ། དེ་བཞིན་གཅིག་གིས་ས་གནས་ཀྱི་སྲིད་དོན་པ་ཞིག་གི་ཨམ་ཆོག་ལ་སོ་བརྒྱབ་པ་དང་ཁག་གཅིག་གིས་ཁུལ་དེར་ཡོད་པའི་རྒྱ་གཞུང་གི་གསར་ཁང་ལ་བཙན་རྒོལ་བྱས་པ་སོགས་གནས་ཚུལ་བྱུང་འདུག གནད་དོན་དེའི་ཐོག་རྒྱ་གཞུང་གིས་ཧོང་ཀོང་གཞུང་ནས་ངོ་རྒོལ་བ་ཚོར་དམ་དྲག་སྔར་ལྷག་བྱེད་དགོས་པའི་འབོད་སྐུལ་ཞུས་འདུག

NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ Houston ནང་རྟེན་གཞི་བྱས་པའི་Rockets སིལ་སྤོལ་རུ་ཁག་གི་འགན་འཛིན་ངོས་ནས་ཧོང་ཀོང་གི་ངོ་རྒོལ་ལས་འགུལ་ལ་རྒྱབ་སྐྱོར་བྱས་པའི་གནད་དོན་དེ་ནི་ཁོང་གི་སྨྲ་བརྗོད་རང་དབང་ཞིག་ཡིང་པར་འགྲེལ་བརྗོད་གནང་རྗེས། རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་ནས་ NBA  འི་སྔོན་འགྲོའི་རྩེད་འགྲན་ཆ་ཚང་རྒྱ་ནག་ནང་རྒྱང་བསྲིང་བྱ་རྒྱུ་ཕྱིར་འཐེན་བྱས་འདུག དེའང་NBA འི་ཚོགས་མི་ཡིན་པའི་ Houston Rockets རུ་ཁག་གི་འགན་འཛིན་ Daryl Morey ལགས་ཀྱིས་བདུན་ཕྲག་སྔོན་མའི་རེས་གཟའ་པ་སངས་ཉིན་རང་ཉིད་ཀྱི་ Twitter དྲ་གནས་ཐོག་ཧོང་ཀོང་ལ་རྒྱབ་སྐྱོར་གྱི་མཚོན་རྟགས་ཤིག་བརྒྱུད་སྤེལ་གནང་རྗེས།  རྒྱ་རིགས་མི་སེར་མང་པོས་དེར་ངོ་རྒོལ་གནང་པའི་རྐྱེན་གྱིས། སྐུ་ཞབས་ Morey ལགས་ཀྱིས་ལམ་སང་མཚོན་རྟགས་དེ་ཕྱིར་འཐེན་བྱས་ཏེ་དེ་ནི་ཁོང་སྒེར་གྱི་ལངས་ཕྱོགས་ཤིག་ཡིན་པའི་གསལ་བཤད་གནང་བ་མ་ཟད། NBA མཐུན་ཚོགས་ནས་དེའི་རྗེས་སུ་སྐུ་ཞབས་ Morey ལགས་ཀྱི་གནང་སྟངས་དེས་རྒྱ་ནག་གི་མང་ཚོགས་ལ་ཕོག་ཐུག་ཆེན་པོ་བཏང་ཡོད་སྟབས་དེའི་ཐོག་བློ་འགྱོད་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་རེས་གཟའ་ཟླ་བའི་ཉིན་ NBA མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ཉི་ཧོང་གི་ Kyodo གསར་ཁང་གི་བཅར་འདྲིར་དྭངས་ལེན་གནང་སྐབས། མཐུན་ཚོགས་དེའི་ངོས་ནས་Daryl Morey ལགས་ཀྱི་སྨྲ་བརྗོད་རང་དབང་ལ་གུས་བརྩི་ཞུ་བཞིན་ཡོད་པར་འགྲེལ་བརྗོད་གནང་བ་མ་ཟད། རེས་གཟའ་མིག་དམར་ཉིན་སླར་ཡང་སྤྱི་སྒྲགས་ཤིག་སྤེལ་བའི་ནང། NBA མཐུན་ཚོགས་ངོས་ནས་དེ་གའི་ཚོགས་མི་རྣམ་པའི་ཆབ་སྲིད་ཀྱི་ལངས་ཕྱོགས་ལ་གུས་བརྩི་ཞུ་བཞིན་པ་དང་། སྤྱིར་ཨ་རི་དང་རྒྱ་ནག་གཙོས་པའི་རྒྱལ་སྤྱིའི་མང་ཚོགས་སུ་འདྲ་ཞིག་ཡིན་རུང་གནད་དོན་འདྲ་མིན་ཐོག་བསམ་ཚུལ་འདྲ་མིན་ཡོད་པ་དེ་ཆོས་ཉིད་ཡིན་པ་བཞིན། མཐུན་ཚོགས་ངོས་ནས་དེ་གའི་རྩེད་འགྲན་པ་དང་ལས་བྱེད། དེ་བཞིན་རུ་ཁག་གི་སྦྱིན་བདག་སོགས་ཀྱི་སྨྲ་བརྗོད་རང་དབང་ལ་སྟངས་འཛིན་བྱེད་ཐུབ་ཐབས་མེད་སྐོར་འགྲེལ་བརྗོད་གནང་འདུག སྐུ་ཞབས་ Silver ལགས་ཀྱིས་བཀའ་མོལ་དེ་ལྟར་གནང་མ་ཐག    རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་དང་ tencent sports ཞེས་དྲ་རྒྱ་བརྒྱུད་རྩེད་འགྲན་ཐད་གཏོང་བྱེད་མཁན་ཚོང་ལས་ཁང་གིས་རྒྱ་ནག་ནང་ནས་རྩེད་འགྲན་དེ་རྒྱང་བསྲིངས་བྱ་རྒྱུ་ཕྱིར་འཐེན་བྱེད་རྒྱུ་གཏན་འཁེལ་ཡོད་སྐོར་བརྗོད་པ་མ་ཟད། CCTV བརྙན་འཕྲིན་ལས་ཁང་གིས། རྒྱལ་ཁབ་ཅིག་གི་ས་ཁོངས་བདག་དབང་དང་སྤྱི་ཚོགས་བརྟན་བརླིང་ལ་ཁ་གཏད་གདོང་ལེན་བྱས་པའི་གཏམ་བཤད་འདི་ལྟ་བུ་ནི་སྨྲ་བརྗོད་རང་དབང་གི་ཁྱབ་ཁོངས་སུ་རྩ་བ་ནས་གཏོགས་ཀྱི་མེད་པར་བརྗོད་དེ་སྐུ་ཞབས་ Silver ལགས་ཀྱི་བཀའ་མོལ་ལ་མཐའ་གཅིག་ཏུ་ངོ་རྒོལ་བྱས་འདུག གཞི་རྩའི་རྒྱ་ནག་ནང་དུ་སིལ་སྤོལ་རྩེད་འགྲན་ལ་དོ་དབྱིངས་ཧ་ཅང་ཆེན་པོ་ཡོད་པ་མ་ཟད། སྔར་ལོ་གཅིག་པོའི་ནང་ tencent བརྒྱུད་ NBA འི་རྩེད་འགྲན་ལྟ་མཁན་ས་ཡ་ ༥༠༠་ ལྷག་བྱུང་ཡོད་པ་དང་། NBAམཐུན་ཚོགས་ངོས་ནས་འདི་ལོའི་ཕྱི་ཟླ་ ༦ པའི་ནང་ tencent ཚོང་ལས་ཁང་དང་ལྷན་དུས་ཡུན་ལོ་ལྔ་ཅན་དང་ཨ་སྒོར་ཐེར་འབུམ་གཅིག་དང་ཕྱེད་ཀ་ལྷག་གི་ཚོང་གི་གྲོས་མཐུན་བཞག་ཡོད་པ་རེད་འདུག ད་ལྟའི་ཆར་ NBAམཐུན་ཚོགས་ཀྱི་ངོས་ ནས་ CCTV བརྙན་འཕྲིན་ལས་ཁང་གི་ཐག་གཅོད་ཐོག་འགྲེལ་བརྗོད་གང་ཡང་གནང་མི་འདུག  

ཧོང་ཀོང་ས་གནས་གཞུང་གིས་ཁུལ་དེའི་ནང་འདས་པའི་ལོ་ངོ་ ༥༠ ནང་རྩ་བ་ནས་ལག་བསྟར་བྱས་མྱོང་མེད་པའི་ཛ་དྲག་གི་ཁྲིམས་གཞི་བསྡམས་ཏེ་ཁུལ་དེའི་ནང་གི་ངོ་རྒོལ་ལས་འགུལ་ནང་མཉམ་ཞུགས་བྱེད་མཁན་ཚོས་གདོང་འབག་གྱོན་མི་ཆོག་པའི་བཀའ་རྒྱ་བཏང་མ་ཐག་ཏུ་ས་གནས་སུ་སྔར་ལྷག་ཞི་རྒོལ་ཁྲོད་ཉེན་རྟོག་པས་སླར་ཡང་མང་ཚོགས་ཐོག་མེ་འདའ་བརྒྱབ་པའི་གནས་ཚུལ་ཐོན་པ་མ་ཟད་རྒྱལ་སྤྱིའི་ཚོགས་སྡེ་ཁག་ནས་ཧོང་ཀོང་གཞུང་གི་ཛྲ་དྲག་ཁྲིམས་གཞི་དེར་སྐྱོན་བརྗོད་ཤུགས་ཆེ་གནང་བཞིན་འདུག ཧོང་ཀོང་གི་སྤྱི་ཁྱབ་ཀེ་རི་ལེམ་གྱིས་ཁ་སང་རེས་གཟའ་པ་སངས་ཉིན་གསར་འགོད་གསལ་བསྒྲགས་ཤིག་བརྒྱུད་དྲག་པོའི་ཁྲིམས་གཞི་དེ་གསལ་བསྒྲགས་བྱས་པ་དང་དེར་རྩིས་འཇོག་མ་བྱེད་པར་གདོང་འབག་གྱོན་མཁན་རྣམས་ཁྲིམས་འགལ་དུ་ངོས་འཛིན་གྱིས་དོ་བདག་འཛིན་བཟུང་བྱ་རྒྱུ་ཡིན་སྐོར་གསུངས་པ་མ་ཟད་ཁུལ་དེར་ཟིང་འཁྲུག་ལ་ཞོད་འཇགས་མ་བྱུང་བ་ཡིན་ན། ས་གནས་གཞུང་གི་ངོས་ནས་དེའི་ཁྲིམས་གཞི་ཅི་འདྲ་ཞིག་ལག་བསྟར་བྱེད་དགོས་བྱུང་ཚེ་དེ་བྱ་ངེས་ཡིན་པའི་ཉེན་བརྡ་བཏང་ཡོད་པ་རེད། ཧོང་ཀོང་ནང་གི་ཛ་དྲག་གི་ཁྲིམས་གཞི་དེ་ཁྱབ་བསྒྲགས་བྱས་མ་ཐག་ཏུ་རྒྱལ་སྤྱིའི་ཚོགས་སྡེ་ཁག་ནས་དེ་ནི་དེ་སྔ་རྒྱལ་ཁབ་ཅིག་གིས་སྤྱི་ཚོགས་སམ་རྒྱལ་ཁབ་གཞན་ཞིག་ལ་དབང་སྒྱུར་བྱེད་པའི་ལམ་ལུགས་ཁྲོད་ལག་བསྟར་བྱ་རྒྱུ་ཁྲིམས་གཞི་ཞིག་ཡིན་པར་སྐྱོན་བརྗོད་དང་འབྲེལ། ཧོང་ཀོང་གི་སྤྱི་ཁྱབ་ལ་ཁྲིམས་གཞི་དེ་ཁྲིམས་མཐུན་རང་གི་ཐོག་ནས་ཆ་སྙོམས་པ་ཞིག་དགོས་པ་དང་། ཁུལ་དེའི་ནང་གི་དཀའ་ངལ་དག་གྲོས་མོལ་གྱི་ལམ་ནས་སེལ་དགོས་པའི་སྐུལ་མ་གནང་འདུག དེ་ཡང་ south china morning post ཞེས་པའི་དྲྭ་རྒྱའི་ཐོག་གནས་ཚུལ་སྤེལ་བའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་མགྲིན་ཚབ་པ་ Marta Hurtadoལགས་ཀྱིས་རྒྱལ་ཚོགས་ནས་ཧོང་ཀོང་གི་གནད་དོན་ལ་ཞིབ་ཕྲ་བརྡར་ཤ་གཅོད་ཐོག་དམ་དྲག་བྱ་རྒྱུ་དེ་དག་ཁྲིམས་མཐུན་ཞིག་དགོས་ངེས་དང་ཞི་བའི་སྒོ་ནས་ངོ་རྒོལ་བྱ་རྒྱུ་ནི་འགྲོ་བ་མིའི་ཐོབ་ཐང་ཞིག་ཡིན་པ་མ་ཟད་དེར་བཀག་འགོག་མེད་པར་ལས་འགུལ་སྤེལ་བཅུག་དགོས་པ་བརྗོད་འདུག དེ་བཞིན་ཨིན་ཡུལ་གྱི་ཕྱི་འབྲེལ་དྲུང་ཆེ་ Dominic Raab ལགས་ཀྱིས་ཧོང་ཀོང་གཞུང་གིས་མི་མང་གི་བདེ་འཇགས་དང་ངལ་སེལ་སླད་དུ་ཐུགས་འགན་བཞེས་དགོས་པ་མ་ཟད། དཀའ་ངལ་ཛ་དྲག་ཏུ་གཏོང་རྒྱུ་ལས་ལྡོག་སྟེ་མང་ཚོགས་ཀྱི་དངངས་འཚབ་སེལ་ཐབས་ལ་འབད་དགོས་པ་དང་། ཧོང་ཀོང་གི་གནད་དོན་དང་འབྲེལ་ནས་དཀའ་ངལ་སེལ་ཐབས་གཙོ་བོ་ནི་གྲོས་མོལ་གནང་རྒྱུ་དེ་ཡིན་པ་བརྗོད་འདུག ཕྱོགས་མཚུངས་ཨ་རི་གྲོས་ཚོགས་ཀྱི་ཚོགས་གཙོ་ལྕམ་ Nancy Pelosi ལགས་ཀྱིས་ཁྲིམས་གཞི་དེས་མང་ཚོགས་ཀྱི་མངོན་འདོད་སེལ་རྒྱུ་ལས་ལྡོག་སྟེ་མང་ཚོགས་དང་ཉེན་རྟོག་པའི་དབར་གདོང་ཐུག་ཆེ་རུ་གཏོང་ངེས་ཙམ་མ་ཟད་སྨྲ་བརྗོད་རང་དབང་གི་གནད་དོན་ཐོག་ཐུགས་འཚབ་ཀྱི་གཞི་ཞིག་ཆགས་ཡོད་པ་གསུངས་འདུག ཡོ་རོབ་མཐུན་ཚོགས་ཀྱི་མགྲིན་ཚབ་པས་ས་གནས་གཞུང་དང་མི་མང་གི་དབར་ངེས་པར་གྲོས་མོལ་གནང་དགོས་གལ་དང་། Germany ཕྱི་འབྲེལ་བློན་ཆེན་གྱི་མགྲིན་ཚབ་པ་ Christofer Burger ལགས་ཀྱིས་ས་གནས་ཀྱི་ཁྲིམས་གཞི་གསར་པ་དང་འབྲེལ་ནས་ཞིབ་ཕྲ་ཞིག་བརྗོད་རྒྱུ་མེད་ཀྱང་མང་ཚོགས་ལ་དྲག་ཤུགས་ཐོག་ནས་མཚམས་འཇོག་བྱེད་དགོས་ཞེས་བཀའ་རྒྱ་བསྒྲགས་ན་མི་འགྲིག་པ་དང་གནད་དེ་ཞི་འགྲིག་ཡོང་ཐབས་སུ་ཕྱོགས་གཉིས་ནས་ཐུགས་འགན་བཞེས་དགོས་པ་བརྗོད་འདུག གཞི་རྩའི་ཁ་ས་ཧོང་ཀོང་གི་སྤྱི་ཁྱབ་ནས་དྲག་པོའི་ཁྲིམས་གཞི་བསྡམས་རྗེས་ཧོང་ཀོང་ནང་ཕྱི་དྲོ་སླར་ཡང་ངོ་རྒོལ་གྱི་ལས་འགུལ་ཤུགས་ཆེ་སྤེལ་བའི་ཁྲོད་ས་གནས་ཉེན་རྟོག་པས་མང་ཚོགས་ཐོག་མེ་མདའ་བརྒྱབ་པའི་གནས་ཚུལ་ཐོན་པ་དང་དཔྱད་ཞིབ་པ་རྣམས་ཀྱིས་ཧོང་ཀོང་སྤྱི་ཁྱབ་ཀྱི་ཛ་དྲག་གི་ཁྲིམས་གཞི་བསྡམས་པ་བརྒྱུད་ཁོང་གི་དབང་ཚད་ཆེ་རུ་ཕྱིན་མེད་པ་དང། ད་ལྟའི་ཛ་དྲག་གི་ཁྲིམས་གཞི་དང་རིང་མིན་དྲག་པོའི་བཀའ་རྒྱ་བསྡམས་པའི་དུས་ལ་བབ་མི་སྲིད་པའི་སེམས་འཚབ་བྱེད་བཞིན་ཡོད་པ་རེད།

ཨ་རིའི་ New York ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཁ་སང་ཚེས་ ༣ ཉིན་གསར་འགོད་གསལ་བསྒྲགས་ཤིག་འདོན་སྤེལ་དང་སྦྲགས། རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་ཧོང་ཀོང་གི་ཞི་རྒོལ་བ་རྣམས་འཕྲལ་དུ་གློད་བཀྲོལ་དགོས་པ་དང་ཧོང་ཀོང་གི་ལས་འགུལ་བ་དང་དེ་དག་གི་ནང་མི། སློབ་ཕྲུག་རྣམས་ནས་ཞི་བའི་ངོ་རྒོལ་དང་འབྲེལ་བའི་གནས་ཚུལ་རྣམས་སྤྱི་ཚོགས་དྲྭ་ལམ་བརྒྱུད་མཁོ་གཏོང་བྱེད་རྒྱུར་སུན་གཙེར་མི་བཟོ་བ་ཙམ་དུ་མ་ཟད་རྒྱ་ནག་སྐམ་ས་ཆེན་པོའི་རྒྱ་རིགས་རྣམས་ཧོང་ཀོང་གི་ཞི་བའི་ལས་འགུལ་ཁྲོད་མཉམ་ཞུགས་གནང་བཅུག་དགོས་པ་བརྗོད་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་ངེས་སྟོན་པ་ལྕམ་ Sophie Richardson ལགས་ཀྱིས་རྒྱ་ནག་གཞུང་གི་དཔོན་རིགས་ཚོས་ཧོང་ཀོང་ནང་གི་ཞི་རྒོལ་རྐྱེན་པས་རྒྱ་ནག་སྐམ་སའི་མང་ཚོགས་ལ་སེམས་འགུལ་ཐེབས་སྲིད་པའི་བློ་འཚབ་ཆེན་པོ་ཡོད་པར་བརྟེན་ཧོང་ཀོང་གི་ཞི་རྒོལ་ལ་རྒྱབ་སྐྱོར་གྱི་རྣམ་པ་སྤྱི་འདྲ་ཞིག་ལའང་དྲག་གནོན་བྱས་དང་བྱེད་མུས་ཡིན་པ་དེ་ལྟར་ཡང། དོན་དངོས་སུ་རྒྱ་ནག་སྐམ་ས་ཆེན་པོའི་རྒྱ་རིགས་ཚོས་ཧོང་ཀོང་གི་མང་གཙོའི་ལས་འགུལ་ལ་རྒྱབ་སྐྱོར་བྱས་པ་ནི་ཕྱོགས་གཉིས་ཀའི་མང་ཚོགས་ནས་མང་གཙོའི་རིན་ཐང་ལ་གཅིག་གྱུར་གྱི་ཆེ་མཐོང་ཡོད་པ་ཞིག་མཚོན་གྱི་ཡོད་སྐོར་གསུངས་འདུག འགྲོ་བ་མིའི་ཐོབ་ཐང་བལྟ་ཞིབ་ཚོགས་པས་གསར་འགོད་གསལ་བསྒྲགས་དེའི་ནང་འདི་ལོའི་ཕྱི་ཟླ་ ༦ པའི་ཟླ་སྟོད་ནས་འགོ་འཛུགས་བྱས་པའི་ཧོང་ཀོང་ནང་གི་གཞི་རྒྱ་ཆེ་བའི་ཞི་རྒོལ་དང་འབྲེལ་ཏེ་ད་ཆ་རྒྱ་ནག་གཞུང་ནས་སྐམ་ས་ཆེན་མོའི་ནང་ཧོང་ཀོང་གི་ཞི་རྒོལ་དང་འབྲེལ་བའི་གནས་ཚུལ་རིགས་ལ་དམ་དྲག་ཤུགས་ཆེ་བྱེད་བཞིན་པ་མ་ཟད་ཧོང་ཀོང་ནང་གི་ཞི་རྒོལ་དེ་དག་ཕྱིའི་སྟོབས་ཤུགས་ཀྱིས་ངལ་སྐུལ་བྱས་པའི་ཁ་བྲལ་བའི་འཚེ་བ་ཅན་གྱི་ལས་འགུལ་ཞིག་ཡིན་པར་འཁྱོག་བཤད་དྲིལ་སྒྲགས་རྒྱ་གང་ཆེ་སྤེལ་བཞིན་ཡོད་པ་རེད། ཚོགས་པ་དེས་རྒྱ་ནག་སྐམ་སའི་གཞུང་གིས་འདི་ལོའི་ཕྱི་ཟླ་ ༦ པ་ནས་བཟུང་ཧོང་ཀོང་གི་ཞི་རྒོལ་བ་དང་མང་གཙོའི་ལས་འགུལ་ལ་རྒྱབ་སྐྱོར་བྱེད་མཁན་དེ་བཞིན་དྲྭ་རྒྱའི་བརྒྱུད་ལས་འགུལ་ལ་རྒྱབ་སྐྱོར་གྱི་རྣམ་པ་བསྟན་མཁན་མང་པོ་ཞིག་འཛིན་བཟུང་དང་། སློབ་མ་རྣམས་ལ་དེའི་ནང་མཉམ་ཞུགས་གནང་ཆོག་གི་མེད་པའི་ཉེན་བརྡ་བཏང་ཡོད་སྐོར་འགྲེལ་བརྗོད་ཀྱིས་ད་ལྟ་རྒྱ་ནག་གཞུང་གི་འཛིན་བཟུང་བཀག་ཉར་འོག་ཡོད་པའི་རྒྱ་རིགས་སྐམ་སའི་མི་སྣ་ཁག་གཅིག་མངོན་གསལ་གནང་འདུག   དེའང་ཕྱི་ཟླ་ ༧ པའི་ནང་རང་ཉིད་ཀྱི་ Twitter བརྒྱུད་རྒྱ་ནག་གཞུང་ལ་སྐྱོན་བརྗོད་དང་ཧོོང་ཀོང་ནང་གི་ལས་འགུལ་ལ་རྒྱབ་སྐྱོར་གནང་རྐྱེན་འཛིན་བཟུང་བྱས་པ་ Quan Shixin དང་ཕྱི་ཟླ་ ༨ པའི་ནང་wechat སྐད་འཕྲིན་བརྒྱུད་ཧོང་ཀོང་གི་ལས་འགུལ་ལ་རྒྱབ་སྐྱོར་གྱི་འཕྲིན་ཐུང་སྤེལ་བས་འཛིན་བཟུང་བྱས་པ་ Ba Luning དེ་བཞིན་ཕྱི་ཟླ་ ༩ པའི་ནང་སྐད་འཕྲིན་དང་ངོ་དེབ་བརྒྱུད་ཧོང་ཀོང་གི་མང་གཙོའི་ལས་འགུལ་ལ་རྒྱབ་སྐྱོར་གྱི་གླུ་གཞས་བརྒྱུད་སྤེལ་བྱས་རྐྱེན་འཛིན་བཟུང་བྱས་པ་ Lai Rifu གཞན་ཡང་ཕྱི་རྒྱལ་གྱི་བརྒྱུད་ལམ་ལ་ཧོང་ཀོང་ནང་གི་གནད་དོན་སྐོར་སྐད་ཆ་བཤད་པ་དང་ Twitter བརྒྱུད་གནས་ཚུལ་སྤེལ་མཁན་ Chen Yunfei བཅས་ད་ལྟའང་བཙོན་ཁང་ནང་ཡོད་པ་མ་ཟད། ཁོང་རྣམ་པ་མང་ཆེ་བ་གཙོ་བོ་འཁྲུག་རྩོད་སློང་བའི་ནག་ཉེས་འོག་འཛིན་བཟུང་ཡོད་པ་དེ་ནི་རྒྱ་ནག་གཞུང་གིས་རྒྱུན་དུ་དེ་གཞུང་ལ་དྲྭ་རྒྱའི་བརྒྱུད་ཞི་བའི་སྒོ་ནས་སྐྱོན་བརྗོད་བྱེད་མཁན་རྣམ་པར་ཡང་ཡང་སྤྱོད་པའི་ཐ་སྙད་ཅིག་ཡིན་པ་དང་། ནག་ཉེས་དེ་ཐེངས་དང་པོ་ཕོག་རྣམས་བཙོན་ཁང་དུ་ལོ་ལྔ་བར་བཅུག་སྲིད་པའི་ཉེན་ཁ་ཡོད་སྐོར་བརྗོད་འདུག འགྲོ་བ་མིའི་ཐོབ་ཐང་བལྟ་ཞིབ་ཚོགས་པས་རྒྱ་ནག་གི་ཉེན་རྟོག་པས་ཧོང་ཀོང་གི་གནད་དོན་དང་འབྲེལ་ཡུལ་དེའི་ནང་གི་ལས་འགུལ་བ་དང་། ཤེས་ཡོན་མི་སྣ། ཁྲིམས་རྩོད་པ། སྤྱི་ཚོགས་དྲྭ་ལམ་བཀོལ་སྤྱོད་བྱེད་མཁན་སོགས་མི་སྣ་མང་དག་ཅིག་ཁྲིམས་སར་བཀུག་ཏེ་འདྲི་རྩད་སྣ་ཚོགས་དང་། དུས་རྟག་ཏུ་ཁ་པར་གཏོང་ནས་རྒྱུས་ལོན་བྱས་པ་མ་ཟད། ཧོང་ཀོང་ནང་སློབ་སྦྱོང་བྱེད་བཞིན་པའི་རྒྱ་ནག་སྐམ་སའི་སློབ་མ་རྣམས་ལ་ཧོང་ཀོང་གི་ལས་འགུལ་ཁྲོད་ཞུགས་མི་ཆོག་པའི་ཉེན་བརྡ་བཏང་བ་མ་ཟད། དབྱར་ཁའི་དགུང་གསེང་སྐབས་རྒྱ་ནག་སྐམ་སར་འབྱོར་སྐབས་ཧོང་ཀོང་ལ་ཕྱིར་ལོག་རྗེས་ལས་འགུལ་ཁྲོད་ཞུགས་ཀྱི་མིན་ཞེས་པའི་མཚན་རྟགས་འགོད་དུ་བཅུག་འདུག ཨོ་སི་ཊོ་ལི་ཡའི་ནང་སློབ་སྦྱོང་བྱེད་མཁན་རྒྱ་རིགས་ཚོའི་ཕ་མར་རྡིག་ར་སྐུལ་ནས་རང་ཉིད་ཀྱི་བུ་ཕྲུག་རྣམས་ཨོ་གླིང་ནང་གི་འབྲེལ་ཡོད་ལས་འགུལ་ནང་ཞུགས་ཆོག་གི་མེད་པའི་གནོན་ཤུགས་སྤྲད་པ་ཡང་བྱུང་འདུག ལྕམ་སྐུ་ Sophie Richardson ལགས་ཀྱིས་རྒྱ་ནག་སྐམ་སའི་ལས་འགུལ་བ་རྣམས་དང་དྲྭ་ལམ་བརྒྱུད་ཧོང་ཀོང་ལ་རྒྱབ་སྐོར་གནང་མཁན་རྣམས་ཀྱིས་སྙིང་སྟོབས་ཆེན་པོས་རྒྱལ་སྤྱིའི་འགྲོ་བ་མིའི་ཡོངས་ཁྱབ་ཐོབ་ཐང་སྲུང་སྐྱོབ་གནང་་ཡོད་པར་འགྲེལ་བརྗོད་དང་འབྲེལ། རྒྱལ་སྤྱིའི་ཁྲོད་ཀྱི་རྒྱལ་ཁབ་གཞན་ཚོས་ངེས་པར་དུ་འགྲོ་བ་མིའི་ཐོབ་ཐང་ལ་རྒྱབ་སྐྱོར་དང་འབྲེལ་ཏེ་རྒྱ་ནག་གཞུང་གི་ཆེས་སྡུག་རྩུབ་ཀྱི་བྱ་སྤྱོད་ལ་སྐྱོན་བརྗོད་བྱས་པ་བརྒྱུད་སྙིང་སྟོབས་ཅན་གྱི་རྒྱ་རིགས་དེ་གལ་རྒྱབ་སྐྱོར་གྱི་རྣམ་པ་ཆེད་བཏོན་གནང་དགོས་ཀྱི་ཡོད་པ་གསུངས་འདུག