Day8

༸སྐུའི་ཡང་སྲིད་དང་འབྲེལ་བའི་གནད་དོན་ཐག་གཅོད་ཀྱི་དབང་ཚད་ཆ་ཚང་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཉིད་མཆོག་ལ་ཡོད་པ་ལས་ཆོས་མེད་སྨྲ་བའི་རྒྱ་ནག་དམར་གཞུང་གི་དབང་འཛིན་པ་ཚོར་མེད་པར་ནན་བརྗོད་དང་བཅས་དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པ་དབུ་འཛུགས་གནང་སོང་། དེ་རིང་སྔ་དྲོ་ཕྱག་ཚོད་ ༩༌༣༠ ཐོག་ཚོགས་གཙོ་པདྨ་འབྱུང་གནས་མཆོག་དབུ་བཞུགས་ཐོག་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པ་དབུ་འཛུགས་གནང་སྟེ་དེ་རིང་ཉིན་དང་པོའི་ལས་རིམ་ཐོག་གཙོ་བོ་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཁག་ ༩ ཙམ་གཏན་འབེབས་དང་། དེའི་རྗེས་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་བཏོན་ཐོག་ཉིན་རྒྱབ་ཀྱི་ཚོགས་དུས་བར་དུ་དེའི་ཐོག་བགྲོ་གླེང་ལྷུག་པོ་གནང་རྗེས་མཐར་སྤྱི་མོས་ཐོག་དོན་ཚན་ ༥ ཅན་གྱི་གྲོས་ཆོད་ཅིག་བཞག་གནང་སོང་། གྲོས་ཆོད་དེའི་ནང་གཙོ་བོ་མ་འོངས་པར་༸གོང་ས་མཆོག་གི་༸སྐུའི་ཡང་སྲིད་དང་འབྲེལ་བའི་གནད་དོན་ཐག་གཅོད་ཀྱི་དབང་ཚད་ཆ་ཚང་༸གོང་ས་མཆོག་༸སྐུ་སྒེར་ལ་ཡོད་པ་ལས་ཆོས་མེད་སྨྲ་བའི་རྒྱ་ནག་དམར་གཞུང་གི་དབང་འཛིན་པ་ཚོར་མེད་པར་ནན་བརྗོད་དང་བཅས་བོད་མིའི་སྒྲིག་འཛུགས་ཀྱིས་དབུ་མའི་ལམ་བརྒྱུད་ཞི་མོལ་ཡོང་ཐབས་ལ་འབད་བརྩོན་ཡོད་རྒུ་གནང་བཞིན་པ་ལྟར་རྒྱ་གཞུང་གི་ངོས་ནས་ཀྱང་ཁ་ཞེ་གཉིས་མེད་ཀྱིས་བོད་རྒྱ་ཞི་མོལ་འཕྲལ་དུ་འགོ་འཛུགས་དགོས་རྒྱུ་གསལ་པོར་འཁོད་འདུག གཞུང་འབྲེལ་གྱི་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དེའི་ཐོག་དེ་རིང་ཉིན་གང་ལ་བགྲོ་གླེང་གནང་བའི་ཁྲོད་ཁྱོན་སྤྱི་འཐུས་ ༡༩ ཙམ་དང་སྲིད་སྐྱོང་བཅས་གྱིས་མཉམ་ཞུགས་གནང་ཡོད་པ་དང་། སྐབས་དེར་སྤྱི་འཐུས་རྣམས་ཀྱིས་༸སྐུའི་ཡང་སྲིད་ཀྱི་གནད་དོན་ཐད་གཞུང་འབྲེལ་གྲོས་ཆོད་གྲོས་འཆར་ལ་རྒྱབ་སྐྱོར་ཞུས་པ་དང་འབྲེལ། རྒྱ་ནག་ལ་༸སྐུའི་ཡང་སྲིད་ཐད་ཐེ་བྱུས་བྱེད་རྒྱུ་ཕར་ཞོག ཐ་ན་དེའི་སྐོར་སྐད་ཆ་ཙམ་ཡང་བཤད་རྒྱུའི་ཐོབ་ཐང་མེད་པ་དང་། གནད་དོན་དེའི་ཐོག་བོད་པའི་སྤྱི་ཚོགས་ནང་གི་ཤེས་ཡོན་ལྡན་པའི་མི་སྣ་ཡོངས་རྫོགས་ཀྱིས་འགན་ཁུར་བླངས་ཏེ་རྒྱ་ནག་ལ་ཡ་ལན་ཁ་གཏད་གཅོག་དགོས་པ་སོགས་ཀྱི་དགོངས་ཚུལ་གསུངས་སོང་བ་མ་ཟད་བོད་རྒྱ་འབྲེལ་མོལ་གྱི་གནད་དོན་དང་དམིགས་བསལ་སྐུ་ཚབ་བསྐོ་གཞག་དང་འབྲེལ་བའི་གནད་དོན་ཐོག་ལ་ཡང་བགྲོ་གླེང་ལྷུག་པོ་གནང་ཡོད་པ་རེད། གཞི་རྩའི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་དབུ་འཛུགས་སྐབས་ཚོགས་གཙོ་པདྨ་འབྱུང་གནས་མཆོག་གིས་དབུ་འབྱེད་གཏམ་བཤད་ནང་ཐེངས་འདིའི་གྲོས་ཚོགས་ཀྱི་ལས་འཆར་ཁག་ངོ་སྤྲོད་དང་། འཛིན་སྐྱོང་བཀའ་ཤག་ནས་སྤྱི་འཐུས་ལྷན་ཚོགས་ལ་ལས་བསྡོམས་འབུལ་དགོས་ཀྱི་ཡོད་པ་ལྟར། ང་ཚོ་སྤྱི་འཐུས་རྣམས་མི་མང་གི་བདམས་པ་ཡིན་པའི་ཆ་ནས་མི་མང་ལ་ལས་བསྡོམས་འབུལ་དགོས་གལ་ཡིན་པའི་གསུང་བཤད་གནང་བ་དང་འབྲེལ། སྐབས་རེར་མང་ཚོགས་ཁྲོད་སྤྱི་ཚོགས་ནང་མ་མཐུན་པ་དང་མ་འགྲིག་པ་མང་དག་ཅིག་གྲོས་ཚོགས་ནས་འགོ་འཛུགས་ཀྱི་ཡོད་པར་གསུང་མཁན་ཡོད་པ་དེ་ཐབས་སྐྱོ་བོ་ཡིན་པར་གསུངས་པ་དང་ཆབ་ཅིག་ཏུ་ད་ནས་བཟུང་ང་ཚོའི་སྤྱི་ཚོགས་ནང་མ་འགྲིག་པ་དང་མ་མཐུན་པའི་གནད་དོན་གང་ཡོད་པ་རྣམས་མཐུན་པ་བཟོ་དགོས་པ་དེ་གྲོས་ཚོགས་ནས་འགོ་འཛུགས་དགོས་པའི་རེ་སྐུལ་ཞུས་སོང་། རྩ་བའི་ཐེངས་འདིའི་གྲོས་ཚོགས་ཀྱི་ཚོགས་དུས་བརྒྱད་པའི་ཐོག་གཙོ་བོ་འཛིན་སྐྱོང་བཀའ་ཤག་གི་ལས་ཁུངས་མ་ལག་དང་བཅས་པའི་ལྷན་ཁང་ཁག་གི་ལས་བསྡོམས་སྙན་ཐོ་འགོ་འབུལ་དང་དེའི་ཐོག་བགྲོ་གླེང་སོགས་གནང་གི་ཡོད་པ་ལྟར། དེ་རིང་ཉིན་རྒྱབ་ཀྱི་ཚོགས་དུས་ནས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་སྙན་སྒྲོན་གྱིས་དེའི་ཐོག་བགྲོ་གླེང་གནང་ཡོད་པ་རེད།  

སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བརྒྱད་པའི་ཉིན་རྒྱབ་ཚོགས་དུས་ཐོག་བོད་མིའི་སྒྲིག་འཛུགས་བཀའ་ཤག་ནས་ལྔ་དང་ལྔ་བཅུའི་བྱུང་རིམ་དང་། ད་བར་ཚོགས་པའི་ལྔ་དང་ལྔ་བཅུའི་ཚོགས་འདུའི་དགོས་དམིགས་སོགས་ཀྱི་ཐད་ལ་དམིགས་བསལ་གསལ་བཤད་ཀྱི་གོ་སྐབས་བླངས་ཐོག་ལྔ་དང་ལྔ་བཅུ་ཞེས་པ་དེ་ནི་༸གོང་ས་མཆོག་གི་གཟིམ་ཆུང་མཇལ་ཁ་རིམ་པའི་ཐོག་སྩལ་བའི་བཀའ་སློབ་ཀྱི་དགོངས་དོན་གཞི་རྩར་བཟུང་ནས་ལྔ་དང་ལྔ་བཅུ་ཞེས་པ་དེ་བྱུང་ཡོད་པ་གསུངས་སོང་།བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁོང་དེ་སྔ་སྲིད་སྐྱོང་གི་དམ་འབུལ་ཐོག་མར་ཕུལ་བའི་རྗེས་སུ་༸གོང་ས་མཆོག་གི་གཟིམ་ཆུང་མཇལ་ཁར་ཡང་ཡང་བཅར་སྐབས་མགོན་པོ་༸གང་ཉིད་མཆོག་ནས་ད་ཁྱེད་རང་ཆབ་སྲིད་ཀྱི་འགན་འཁྱེར་དགོས། ངོས་མེད་པ་ནང་བཞིན་བྱས་ནས་འཆར་གཞི་སྒྲིགས་ཤིག་ཞེས་བཀའ་ཡང་ཡང་ཕེབས་ཡོད་སྟབས། སེམས་ལྗིད་ཏིག་ཏིག་དང་སྐྱོང་ལྷང་ལྷང་ཡོང་མིན་ལ་ལྟོས་མེད། ༸གོང་ས་མཆོག་གི་བཀའ་སྒྲུབ་རྒྱུའི་འགན་དེ་བཀའ་ཤག་ལ་ཡོད་བསམ་པའི་ཐོག་ནས་བཀའ་ཤག་ལྷན་རྒྱས་དང་མང་ཚོགས་ཁྲོད་ལ་༸གོང་ས་མཆོག་ཡོད་པའི་སྐབས་ཀྱི་འཆར་གཞི་དང་མེད་པའི་སྐབས་ཀྱི་འཆར་གཞི་ཞེས་གསུང་ཕོད་པ་ཞིག་མེད་སྟབས། ལྔ་དང་ལྔ་བཅུ་ཞེས་ཕྱོགས་གཅིག་ནས་ལོ་ལྔ་དང་ལྔ་བཅུ། ཕྱོགས་གཉིས་ནས་འཕྲལ་དང་ཕུགས། ད་ལྟ་དང་མ་འོངས་བཅས་ལྔ་དང་ལྔ་བཅུའི་འཆར་སྣང་དང་། འཆར་གཞི། སྲིད་བྱུས་དང་ལག་བསྟར་བཅས་བྱུང་ཡོད་པ་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་བཞིན་རིམ་པས་བཟང་དུ་དང་ཡག་ཏུ་འགྲོ་རྒྱུའི་གདེང་ཚོད་ཆེན་པོ་ཡོད་པ་གསུངས་སོང་། སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མི་ལོ་བདུན་ཅུ་ཙམ་གྱི་ནང་གནང་བའི་བོད་མིའི་ཆེད་མཐོང་དང་། བོད་མིའི་སྒྲིག་འཛུགས་ཀྱི་གནས་བབས། དེ་བཞིན་བོད་ནང་གི་བོད་མི་ཚོའི་སྙིང་སྟོབས་བཅས་མི་ཉམས་གོང་འཕེལ་གནང་རྒྱུ་གལ་ཆེན་པོ་ཡིན་པ། མགོན་པོ་༸གང་ཉིད་མཆོག་དགུང་ལོའོ་བབས་ལ་གཞིགས་པའི་ཕྱིའི་རྒྱལ་ཁབ་ཁག་ཏུ་ཕེབས་རྒྱུ་ཁག་པོ་ཡིན་པ་སོགས་ཀྱི་བཀའ་སློབ་ཕེབས་ཁག་ལུང་འདྲེན་དང་སྦྲགས། ལྔ་དང་ལྔ་བཅུའི་འཆར་སྣང་འདིའི་ཐོག་ནས་བོད་པའི་རྩ་དོན་གྱི་འགན་དེ་བོད་མི་མང་ཚོགས་ནས་འཁྱེར་ཐུབ་དགོས་གལ་ཡིན་པ་གསུངས་ཡོད།  ལྷག་པར་དུ་སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་གཙོ་གྱུར་མང་གཙོ་དར་སྤེལ་དང་ཁོར་ཡུག འགྲོ་བ་མིའི་ཐོབ་ཐང་སོགས་ཀྱི་ཐད་ལ་མཛད་འཕྲིན་རླབས་ཆེན་བསྐྱངས་པ་རྣམས་མུ་མཐུད་རྒྱུན་སྐྱོང་ཞུ་རྒྱུའི་འགན་དེ་ང་ཚོ་བོད་པ་ཚོར་ཡོད་སྟབས། ང་ཚོས་ག་ཚོད་སྒྲུབ་ཐུབ་ཀྱི་ཡོད་མེད་ལ་དགོངས་པ་བཞེས་གལ་ཡིན་པ་དང་། ༸གོང་ས་མཆོག་གི་བཀའ་དྲིན་ཐོག་ད་བར་རྒྱལ་སྤྱིའི་ཁྲོད་དབུ་མའི་ལམ་ལ་རྒྱབ་སྐྱོར་ཐོབ་པ་ཁག་གཙོ་གྱུར་བོད་ཀྱི་ཆབ་སྲིད་གནད་དོན་ཁག་རྒྱུན་སྐྱོང་ཞུ་རྒྱུའི་བོད་མི་ཚོར་འགན་ཡོད་སྟབས། གནད་དོན་དེ་དག་སྒྲུབ་ཐབས་སུ་ཐོག་མར་ཆབ་སྲིད་ཀྱི་ལྔ་དང་ལྔ་བཅུ་ཞེས་འགོ་འཛུགས་གནང་ཡོད་པ་གསུངས་སོང་།  སྐབས་དེར་སྲིད་སྐྱོང་མཆོག་ནས་ཆབ་སྲིད་ཀྱི་ལྔ་དང་ལྔ་བཅུའི་རྗེས་སུ་གཞོན་སྐྱེས་ལྔ་དང་ལྔ་བཅུ་དང་བཙན་བྱོལ་བོད་མིའི་སྤྱི་ཚོགས་སྲ་བརྟན་རྒྱུན་སྐྱོང་ལ་དམིགས་པའི་ལྔ་དང་ལྔ་བཅུ་བཅས་ཀྱི་ཚོགས་འདུ་རིམ་པ་ཚོགས་པ་ཁག་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་ད་རེས་ཀྱི་བཀའ་ཤག་ནས་མཚམས་འཇོག་རྒྱུ་ཞིག་མིན་པར་མུ་མཐུད་གནང་དགོས་གལ་ཡིན་པ་གསུངས་ཡོད།  བཀའ་ཤག་གི་གསལ་བཤད་དེའི་ཁྲོད་སྲིད་སྐྱོང་མཆོག་ནས་ལྔ་དང་ལྔ་བཅུའི་འཕྲལ་ཕུགས་ཀྱི་ལས་དོན་སོགས་དང་འབྲེལ། ད་བར་འཛིན་སྐྱོང་ནས་ཆོས་རིག་དང་འབྲེལ་བའི་ཐོག་ལ་མཐའ་མཚམས་ཁག་ཏུ་ཡོད་པའི་དགོན་ཁག་རྣམས་ཉམས་གསོ་དང་དཔེ་ཁྲིད་དགེ་རྒན་བསྐོ་གཞག དེ་བཞིན་ནང་སྲིད་དང་འབྲེལ་བོད་པའི་གཞིས་ཁག་རྒྱ་གར་གཞུང་གྱི་ཁྲིམས་མཐུན་ངོས་ལེན་དང་སྲིད་བྱུས་ལྡན་པ། དེ་བཞིན་དཔལ་འབྱོར་དང་འབྲེལ་བའི་དངུལ་ཁང་དང་བུན་གཡར་ལས་གཞི་བརྒྱུད་སྒྲིག་འཛུགས་དང་མང་ཚོགས་གཉིས་ཀར་ཕན་པའི་ལས་གཞི། གཞན་ཡང་བདེ་སྲུང་གི་ལས་དོན་དང་འབྲེལ་༸གོངས་མཆོག་གི་༸སྐུ་ཕྱྭའི་སྲུང་སྐྱོབ་ཐོག་སྔར་ལྷག་ཚགས་ཚུད་དང་། ཤེས་ཡོན་དང་འབྲེལ། ཤེས་ཡོན་ལྷན་ཚོགས་གསར་འཛུགས་དང་ཤེས་ཡོན་སྲིད་བྱུས་ལག་བསྟར་གཙོས་དགེ་རྒན་གསོ་སྐྱོང་དང་ཟབ་སྦྱོང་རྒྱ་ཆེ་གནང་བ། འཕྲོད་བསྟེན་དང་འབྲེལ་ནས་སྨན་བཅོས་ལྟ་སྐྱོང་ལས་གཞི་སོགས་འཆར་གཞི་དང་ལྡན་པའི་ཐོག་ནས་གནང་ཐུབ་ཡོད་པ་སོགས་ཀྱང་གསུངས་ཡོད།

ཁ་སང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ཉིན་རྒྱབ་ཀྱི་ཚོགས་དུས་དང་དེ་རིང་ལས་ཉིན་བརྒྱད་པའི་སྔ་དྲོའི་ཚོགས་དུས་ཐོག་ཤེས་རིག་ལས་ཁུངས་ཀྱི་རྒྱུན་གྲོན་མ་དངུལ་གཏན་འབེབས་དང་ལས་དོན་བཅས་ཀྱི་ཐོག་བགྲོ་གླེང་གནང་སྐབས་སྤྱི་འཐུས་མང་དག་ཅིག་གིས་བློ་འཚབ་ཆེན་པོས་ཉེ་ལམ་དྷ་སྟེང་བོད་ཁྱིམ་ནང་དུ་སློབ་གྲྭའི་དགེ་རྒན་ཞིག་དང་སློབ་ཕྲུག་དབར་ལ་ཚུལ་མིན་བྱ་སྤྱོད་ཀྱི་གླེང་གཞི་བྱུང་བ་དེ་དངོས་འབྲེལ་ཡིན་ནམ་ཞེས་དང་། ཅི་སྟེ་དེ་ལྟར་ཡིན་ཚེ་ཤེས་རིག་ལས་ཁུངས་དང་འབྲེལ་ཡོད་སློབ་གྲྭ་ནས་ཐག་གཅོད་གང་གནང་ཡོད་མེད་ཐོག་ལ་བཀའ་འདྲི་གནང་ཡོད།ཤེས་རིག་བཀའ་བློན་པདྨ་དབྱངས་ཅན་མཆོག་གིས་རྙོག་གླེང་དེའི་བྱུང་རབས་དང་། འབྲེལ་ཡོད་སློབ་གྲྭ་ནས་ཐག་གཅོད་གང་གནང་ཡོད་པ་འགྲེལ་བརྗོད་གནང་བ་དང་སྦྲགས། སློབ་མ་དེ་རང་ལོ་ ༡༨ སོན་ཡོད་པ་དང་དགེ་སློབ་གཉིས་ཀྱི་དབར་ལ་ཕན་ཚུན་མོས་མཐུན་ཡོད་པ་ལས་དགེ་རྒན་གྱིས་བཙན་གཡེམ་བྱས་པར་ངོས་འཛིན་གནང་མེད་སྐོར་འགྲེལ་བརྗོད་གནང་བ་དེ་ལྟར་ཡང་འབྲེལ་ཡོད་སློབ་གྲྭས་དགེ་རྒན་དེ་ཕྱིར་ཕུད་བཏང་ཡོད་སྐོར་གསུངས་སོང་།རྩ་བའི་བོད་མིའི་སྒྲིགས་འཛུགས་ནས་ཕྱི་ལོ་ ༢༠༡༧ ལོའི་ནང་བཀའ་ཤག་གོང་མའི་སྐབས་གཏན་འབེབས་གནང་བའི་བོད་ཀྱི་བེུད་ནུས་སྟོབས་སྤེལ་བའི་སྲིད་བྱུས་ལ་བསྐྱར་ཞིབ་ཀྱིས་དོན་ཚན་ ༧ ཅན་གྱི་སྲིད་བྱུས་གསར་པ་ཞིག་ཡོངས་ཁྱབ་དང་འབྲེལ་བེུད་ལ་བཙན་དབང་དང་རྩུབ་སྤྱོད་རིགས་ལ་བཟོད་སྲན་རྩ་བ་ནས་གནང་རྒྱུ་མིན་པ་མངོན་གསལ་གནང་ཡོད་པ་ལྟར། དེ་རིང་གྲོས་ཚོགས་སུ་སྤྱི་འཐུས་ཤིག་གིས་གནད་དོན་དེ་ལུང་འདྲེན་དང་འབྲེལ། ཐེངས་འདིའི་གནད་དོན་ཁྲོད་འབྲེལ་ཡོད་སློབ་གྲྭ་ནས་དགེ་སློབ་ཕན་ཚུན་དབར་མོས་མཐུན་བྱུང་བ་ལས་དགེ་རྒན་གྱིས་བཙན་གཡེམ་བྱས་མེད་སྐོར་གསུངས་པར་ངོས་ལེན་མེད་ཅེས་ནན་གསུངས་གནང་བ་མ་ཟད། གནད་དོན་དེ་ནི་དགེ་རྒན་ཞིག་གི་བཟང་སྤྱོད་དང་ཚུལ་ཁྲིམས་གཉིས་ཀའི་ཐོག་ནས་འགལ་ཡོད་སྐོར་གསུངས་ཡོད།བཀའ་བློན་མཆོག་གིས་གང་ལྟར་གནད་དོན་དེའི་ཐོག་ཤེས་རིག་ལས་ཁུངས་ཀྱིས་རོགས་འདེགས་གང་ཐུབ་ཞུ་རྒྱུའི་ཞལ་བཞེས་དང་འབྲེལ། སྤྱིར་སློབ་ཁག་ཚང་མའི་ནང་དུ་བཙན་གཡེམ་དང་འབྲེལ་བའི་གནད་དོན་དེ་རིགས་སླད་མར་མི་ཡོང་བར་ཚང་མས་ཚུལ་ཁྲིམས་སྲུང་དགོས་གལ་ཡིན་པའི་འབོད་སྐུལ་གནང་སོང་།བོད་མིའི་སྒྲིགས་འཛུགས་ཤེས་རིག་ལས་ཁུངས་ཀྱི་སྔོན་རྩིས་དང་འབྲེལ་བའི་དེ་རིང་གྲོས་ཚོགས་སུ་གཞན་ཡང་སྤྱི་འཐུས་ཁག་གཅིག་ནས་ད་ལྟའི་ཆར་བོད་སློབ་འཛིན་ཚོགས་ཀྱི་ནང་སློབ་ཁག་ག་ཚོད་བླངས་ཟིན་ཡོད་མེད་དང་། གལ་སྲིད་དེ་ལྟར་གནང་ཐུབ་མེད་ཚེ་རྒྱུ་རྐྱེན་གང་ལ་ཐུག་ཡོད་མེད། དེ་བཞིན་ ༢༠༡༠ ནས་ ༢༠༡༩ བར་སློབ་ཁག་ཇི་ཙམ་ཟླ་སྒྲིལ་དང་སྒོ་བརྒྱབ་ཡོད་སྐོར་བཀའ་འདྲི་ཞུས་པར་ཤེས་རིག་བཀའ་བློན་མཆོག་གིས་སྔ་ལོར་སློབ་ཁག་བརྒྱད་རྩིས་བླངས་པའི་རྗེས་སུ་ད་ཆ་འཛིན་རིམ་བཅིུས་ཅན་གྱི་མ་སུ་རི་སློབ་གྲྭ་དང་། སིམ་ལ། ཌལ་ཧོ་སི། ཀ་སྦུག རྡོ་རྗེ་གླིང་། ཧར་པཱ་པུར་བཅས་སློབ་ཁག་དྲུག་རྩིས་བླང་རྒྱུ་ཡིན་པ་དང་། ཕྱི་ལོ་ ༢༠༡༠ ནས་ ༢༠༡༩ བར་སཾ་བྷོ་ཊའི་ཁྱབ་ཁོངས་སུ་སློབ་ཁག་བཞི་དང་། བོད་ཁྱིམ་གྱི་ཁྱབ་ཁོངས་སུ་ཡན་ལག་སློབ་གྲྭ་གཉིས། བ་ཡུལ་ནང་སློབ་ཁག་གཉིས་བཅས་ཁྱོན་སློབ་ཁག་བརྒྱད་སྒོ་བརྒྱབ་དགོས་བྱུང་ཡོད་པ་གསུངས་སོང་།ཕྱི་རྒྱལ་ཡུལ་གྲུ་ཁག་ཏུ་ཡོད་པའི་གཟའ་མཇུག་སློབ་གྲྭའི་གནད་དོན་སྐོར་ལ་དྲི་བ་ཁག་ཅིག་ཕེབས་པར་བཀའ་བློན་མཆོག་གིས་རིང་མིན་ཨ་རིའི་ནང་གཟའ་མཇུག་སློབ་གྲྭ་ཁག་གི་བསླབ་གཞི་རྩ་འཛིན་གཏན་འབེབས་དང་འབྲེལ་བའི་ཚོགས་འདུ་ཞིག་འཚོགས་འཆར་ཡོད་པ་དང་། སྐབས་དེར་སྤྱི་འཐུས་ཁག་གཅིག་ནས་རྒྱ་གར་འབྲས་ལྗོངས་དང་ཨོ་སི་ཊོ་ལི་ཡ་སོགས་ཀྱི་གཟའ་མཇུག་སློབ་གྲྭ་ཁག་ཅིག་ནས་བོད་ཀྱི་སྐད་ཡིག་དེ་ཕྱི་རྒྱལ་སློབ་ཁག་གི་ནང་དུ་སྐད་ཡིག་གཉིས་པའི་ཁོངས་སུ་ཚུད་ཐབས་གནང་བཞིན་ཡོད་པ་ལྟར་ཤེས་རིག་ལས་ཁུངས་ཀྱི་ངོས་ནས་ཀྱང་འབད་བརྩོན་གནང་དགོས་པའི་གསོལ་འདེབས་ཞུས་ཡོད་པ་རེད།དེ་བཞིན་སྤྱི་འཐུས་ཤིག་ནས་ད་ཆ་ཕྲུ་གུ་དང་ན་གཞོན་མང་དག་ཅིག་དྲྭ་ལམ་བརྒྱུད་ PUBG ཞེས་པའི་རྩེད་རིགས་ཤིག་ཁྱབ་ཆེན་པོས་རྩེད་བཞིན་ཡོད་པ་མ་ཟད། རྩེད་མོ་དེ་རྩེད་དྲག་རྐྱེན་མ་འོངས་པར་འཕྲོད་བསྟེན་ལས་ཁུངས་ལ་དཀའ་ངལ་ཆེ་བ་ཡོང་ངེས་སུ་མཐོང་ནས་ད་ཆ་རྒྱ་གར་གྱི་མངའ་སྡེ་ཁག་གཅིག་ནང་རྩེད་མོ་དེ་བཀག་འགོག་གནང་བཞིན་ཡོད་པ་ལྟར། གང་མགྱོགས་བཀག་འགོག་གནང་ཐབས་གནང་དགོས་གལ་ཡིན་སྐོར་སོགས་གསུངས་པ་བཞིན་ཤེས་རིག་བཀའ་བློན་མཆོག་གིས་དྲྭ་རྒྱ་དང་འཕྲུལ་ཆས་བརྒྱུད་རྣམ་དཔྱོད་འཕེལ་རྒྱུའི་རྩེད་རིགས་མང་དག་ཅིག་ཡོད་ཀྱང་། ད་ཆ་རྩེད་མོ་དེར་རོལ་རྐྱེན་བོད་ཕྲུག་ཚོའི་དུས་ཚོད་འཕྲོ་བརླག་གཏོང་བཞིན་ཡོད་སྟབས་ཕ་མ་ཚོས་ཐུགས་འགན་བཞེས་དགོས་པ་གསུངས་སོང་། གཞན་ཡང་ཤེས་རིག་ལས་ཁུངས་ཀྱི་རྒྱུན་གྲོན་དང་ལས་དོན་གྱི་སྐོར་ལ་བགྲོ་གླེང་གནང་སྐབས་སློབ་གྲྭ་ཁག་གི་དགེ་རྒན་ལ་ལྷག་བསམ་དང་སེམས་ཤུགས་ཡོད་ནའང་ཐུན་རྐྱེན་སྦྱོར་རྒྱུ་གལ་ཆེན་པོ་ཡིན་སྟབས་གསོལ་ཕོགས་སྐོར་ལ་དགོངས་བཞེས་གནང་དགོས་པ་དང་བོད་སློབ་ཁག་ཏུ་ཆོས་ལུགས་ལ་མ་བརྟེན་པའི་བཟང་སྤྱོད་སློབ་ཁྲིད་དང་འབྲེལ་བའི་དྲི་བ་ཁག་གཅིག་ཀྱང་ཕེབས་ཡོད་པ་རེད།

དེ་རིང་བོད་མི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གཙོས་པའི་སྤྱི་འཐུས་རྣམ་པས་ཨ་རིའི་གྲོས་ཚོགས་འོག་མའི་ནང་བོད་ནང་འདྲ་མཉམ་གྱི་འགྲུལ་བཞུད་ཆོག་པའི་ཁྲིམས་འཆར་གཏན་འབེབས་བྱུང་བར་དགའ་བསུ་ཞུས་སོང་། དེ་ཡང་སྐབས་ ༡༦ པའི་སྤྱི་འཐུས་གྲོས་ཚོགས་ཀྱི་ཚོགས་དུས་༦པའི་ལས་ཉིན་བརྒྱད་པ་དང་དགུ་པའི་ཚོགས་དུས་ཁག་ཅིག་གི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྩིས་ལོ་ ༢༠༡༧ དང ༢༠༡༨ ཀྱི་ལས་བསྡོམས་ཐོག་བགྲོ་གླེང་གནང་བའི་ཁྲོད་ཕྱི་དྲིལ་བཀའ་བློན་བློབཟང་སེང་གེ་མཆོག་གིས་ཨ་རི་གྲོས་ཚོགས་འོག་མས་རྒྱ་ནག་དང་བོད་དུ་ཡོད་པའི་མཁས་པ་དང་གསར་འགོད་པ་རྣམས་ཨ་རིར་རང་དབང་ཐོག་ཕེབས་ཆོག་གི་ཡོད་པ་ལྟར་ཨ་རིའི་མི་སེར་རྒྱ་ནག་ནང་ཕེབས་བཇུག་དགོས་པའི་གྲོས་ཆོད་བཞག་པ་དེར་གྲོས་ཚོགས་འཐུས་མི་གཙོས་པའི་རྒྱལ་སྤྱི་བོད་དོན་ལས་འགུལ་ཁང་བཅས་ལ་དགའ་བསུ་ཞུས་པའི་ཐོག་མ་འོངས་པར་སྲིད་འཛིན་གྱིས་དེར་མཚན་རྟགས་བསྐྱོན་པའི་ཁྲིམས་ཤིག་ཆགས་རྒྱུའི་རེ་བ་ཡོད་ཅེས་གསུངས་སོང་། སྐབས་དེར་སྤྱི་འཐུས་མང་དག་ཅིག་ནས་ཀྱང་ཨ་རི་གྲོས་ཚོགས་འོག་མའི་ནང་ Reciprocal Access to Tibet Act ཞེས་པའི་གྲོས་ཆོད་གཏན་འབེབས་བྱུང་བར་ཐུགས་རྗེ་ཆེ་ཞུས་པ་དང་མཉམ་ཨ་རིར་གནས་སྡོད་བོད་མི་ཚོས་ཐུགས་འགན་བཞེས་པའི་ཐོག་སོ་སོའི་གྲོས་ཚོགས་འཐུས་མི་དང་འབྲེལ་བ་གནང་ནས་གྲོས་ཚོགས་གོང་མའི་ནང་བསླེབ་ཐུབ་པ་ཙམ་དུ་མ་ཟད་ཁྲིམས་ཤིག་བཟོ་ཐུབ་རྒྱུའི་འབད་བརྩོན་གནང་དགོས་པའི་སྐུལ་མ་གནང་སོང་། རྩ་བའི་ཁ་ཉིན་ཕྱི་ཚེས་ ༢༥ ཉིན་ཨ་མི་རི་ཀའི་གྲོས་ཚོགས་འོག་མའི་ནང་དུ་གཏན་འབེབས་བྱུང་བའི་ཁྲིམས་འཆར་དེའི་ནང་དོན་གཙོ་བོ་ནི་རྒྱ་ནག་གི་དཔོན་རིགས་དང་གསར་འགོད་པ། དེ་བཞིན་མི་སེར་རྣམས་ཨ་རིའི་ས་ཕྱོགས་གང་སར་རང་དབང་ངང་འགྲུལ་བསྐྱོད་ཀྱི་ཐོབ་ཐང་ཡོད་པ་བཞིན་ Reciprocal Access ཞེས་ཨ་རིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་མི་སྣ་དང་གསར་འགོད་པ། བོད་པ་ཨ་རིའི་མི་སེར་ཡིན་པ། དེ་བཞིན་ཨ་རི་བ་བཅས་བོད་དང་རྒྱ་ནག་ནང་རང་དབང་ངང་འགྲུལ་བསྐྱོད་ཆོག་པའི་ཐོབ་ཐང་འདྲ་མཉམ་སྤྲོད་དགོས་སྐོར་དང་། རྒྱ་གཞུང་ནས་ཨ་མི་རི་ཀའི་མི་སེར་བོད་ནང་འགྲུལ་བསྐྱོད་བྱ་རྒྱུར་བཀག་སྡོམ་བྱེད་བཞིན་ཡོད་པ་ལྟར་རྒྱ་ནག་གི་འབྲེལ་ཡོད་རྣམས་ལ་བཀག་སྡོམ་གནང་རྒྱུ་ཡིན་པའི་ཁྲིམས་འཆར་ཞིག་ཡིན་པ་རེད། ཐེངས་འདིའི་ཕྱི་དྲིལ་ལས་ཁུངས་ཀྱི་ལས་བསྡོམས་བགྲོ་གླེང་ཁྲོད་ཕྱི་རྒྱལ་མི་སེར་ཡིན་པའི་བོད་རིགས་ཚོར་རྒྱ་གར་དུ་ཡོད་པའི་གཞིས་ཆགས་ཁག་ཏུ་སྤུན་མཆེད་སོགས་ཐུག་འཕྲད་ལ་འབྱོར་སྐབས་papཞེས་པ་དེ་ཞུ་རྒྱུར་་དཀའ་ངལ་འཕྲད་ཀྱི་ཡོད་སྐོར་དང་། དབུ་མའི་ལམ་གྱི་སྲིད་བྱུས་དང་འབྲེལ་ཏེ། རྒྱ་གར་གཞུང་མང་ལ་གོ་རྟོགས་ཇི་སྤེལ་དང་དེའི་ཕན་འབྲས་ཅི་བྱུང་། ཕྱིའི་རྒྱལ་ཁབ་ཁག་གི་དོན་གཅོད་ལས་བྱེད་བསྐོ་བཞག་གནང་ཕྱོགས་དང་ཕྱི་རྒྱལ་ཡུལ་གྲུ་ཁག་ཏུ་རྒྱ་རིགས་འབྲེལ་མཐུད་པའི་ལས་འགན་དང་གྲུབ་འབྲས་ཅི་སོན། དེ་བཞིན་སྐུ་ཚབ་དོན་གཅོད་ཁང་གི་ལས་ཁུངས་ཇི་ཉོས་སོགས་ཀྱི་གནད་དོན་འདྲ་མིན་ཐོག་བགྲོ་གླེང་ལྷུག་པོ་གནང་སོང་། རྩ་བའི་ཐེངས་འདིའི་སྐབས་ ༡༦ པའི་སྤྱི་འཐུས་གྲོས་ཚོགས་ཀྱི་ཚོགས་དུས་༦པའི་ལས་ཉིན་མཐའ་མ་དེ་སང་ཉིན་འཚོགས་རྒྱུ་ཡིན་པ་དང་། ད་དུང་གྲོས་ཚོགས་སུ་འཕྲོད་བསྟེན་ལས་ཁུངས་ཀྱི་ལས་བསྡོམས་ཐོག་བགྲོ་གླེང་དང་སྦྱང་བཤད་གནང་རྒྱུ་ལྷག་ཡོད་པ་རེད།

དེ་རིང་ཟླ་ ༣ ཚེས་ ༢༢ ཉིན་གྲོས་ཚོགས་ཀྱི་ལས་ཉིན་བརྒྱད་པའི་ཐོག་ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་བའི་ཁྲོད་སྤྱི་འཐུས་མང་དག་ཞིག་གིས་སློབ་གྲྭའི་དགེ་རྒན་ཚོར་གསོལ་ཕོགས་འདང་ངེས་ཤིག་ཕུལ་དགོས་གལ་ཡིན་པའི་གླེང་སློང་ཤུགས་ཆེ་གནང་སོང་། ལོ་ཤས་སྔོན་ནས་བོད་སློབ་འཛིན་སྐྱོང་ཚོགས་པའི་སློབ་གྲྭ་རྣམས་ཤེས་རིག་ལས་ཁུངས་ནས་རྩིས་བཞེས་གནང་གཏན་འཁེལ་བ་དང་བསྟུན། ད་བར་བོད་སློབ་ ༨ རྩིས་སྤྲོད་ཟིན་ཡོད་པ་དང་འདི་ལོ་ནང་ཤེས་རིག་ལས་ཁུངས་ཀྱི་ངོས་ནས་དགེ་རྒན་ ༡༥༨ གསར་འདེམས་ས་མིག་གསལ་བསྒྲགས་གནང་བའི་ཁྲོད། དགེ་རྒན་དེ་དག་ལ་དེ་སྔ་རྒྱ་གར་གཞུང་ནས་མཐུན་རྐྱེན་གནང་མུས་བཞིན་ཧིན་སྒོར་ཁྲི་གསུམ་ལྷག་གནང་རྒྱུའི་གསལ་བསྒྲགས་བསྐྱངས་ཡོད་པ་ལྟར། དེ་རིང་གྲོས་ཚོགས་སུ་སྤྱི་འཐུས་མང་དག་ཞིག་ནས་ཤེས་རིག་ལས་ཁུངས་ཀྱི་བོད་སློབ་འཛིན་ཚོགས་ཀྱི་སློབ་གྲྭ་ ༨ རྩིས་བཞེས་ཐུབ་པར་ལེགས་གསོ་ཞུས་པ་དང་ཆབས་ཅིག སྤྱིར་བཙན་བྱོལ་བོད་མིའི་ཤེས་ཡོན་སྲིད་བྱུས་ལག་བསྟར་ཐོག་དགེ་རྒན་གལ་ཆེན་པོ་ཆགས་ཡོད་སྟབས། སློབ་གྲྭའི་དགེ་རྒན་ཚོར་གསོལ་ཕོགས་གཙོ་འགྱུར་མཐུན་རྐྱེན་ཁག་སྤར་ཐབས་གནང་དགོས་གལ་ཡིན་པ་གསུངས་སོང་། ཤེས་རིག་བཀའ་བློན་མཆོག་གིས་ཤེས་རིག་ལས་ཁུངས་ཀྱི་ངོས་ནས་གནད་དོན་དེའི་ཐོག་ཐབས་ཤེས་གནང་བཞིན་ཡོད་པ་དེ་ལྟར་ཡང་། གསོལ་ཕོགས་དང་ཁེ་ཕན་གཅིག་པོར་གཟིགས་ནས་མིན་པར་ཕྱག་ལས་གནང་བར་ཕེབས་པ་ཡིན་ཚེ་གནས་སྟངས་བཟང་དུ་འགྲོ་རྒྱུར་དམིགས་གསལ་ཕན་ཐོགས་ཡོང་ཐུབ་སྐོར་དགོངས་ཚུལ་ཡང་གསུངས་སོང་། དེ་བཞིན་ཤེས་རིག་ལས་ཁུངས་ཀྱི་སྔོན་རྩིས་དང་འབྲེལ་ནས་བོད་ཀྱི་སྐད་ཡིག་མི་ཉམས་རྒྱུན་འཛིན་དང་ཉམས་པ་སླར་གསོ་གནང་གལ་ཡིན་སྐོར་དང་འབྲེལ། ཕྱིས་སུ་བོད་པའི་སློབ་གྲྭ་ཁག་གི་ནང་དུ་ཧི་མཱ་ལ་ཡའི་རི་རྒྱུད་ཀྱི་སློབ་ཕྲུག་མང་པོ་ཞིག་སློབ་ཞུགས་གནང་གི་ཡོད་སྟབས། བོད་པའི་སྐད་ཡིག་ནང་ཡུལ་སྐད་བསྲེས་ལྷད་ཡོང་བའི་ངལ་བ་འཕྲད་བཞིན་པའི་དངངས་སྐྲག་ཡོད་སྐོར་གསུང་མཁན་བྱུང་བ་དང་། ཤེས་རིག་བཀའ་བློན་མཆོག་ནས་དཀའ་ངལ་དེ་དངོས་འབྲེལ་ཡིན་པར་ངོས་བཞེས་དང་འབྲེལ། དེང་སྐབས་སློབ་གྲྭ་ཟླ་སྒྲིལ་ལ་སོགས་པའི་འགྱུར་བ་ཆེན་པོ་ཞིག་འགྲོ་བའི་ཞོར་ལ་གནད་དོན་དེའི་ཐོག་དོ་སྣང་དང་ཐབས་ལམ་འཚོལ་ཞིབ་གནང་རྒྱུ་ཡིན་ཞེས་གསུངས་ཡོད། རྩ་བའི་དེ་རིང་གྲོས་ཚོགས་ཀྱི་ལས་ཉིན་ ༨ པ་དབུ་འཛུགས་དང་བསྟུན་སྤྱི་ཁྱབ་རྩིས་ཞིབ་ལས་ཁང་དང་། ལས་བྱེད་འདེམས་བསྐོ་ལྷན་ཁང་གཉིས་དང་འབྲེལ་བའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཕེབས་ཡོད་པ་དེ་ལྟར་ཡང་། དེའི་ཁོངས་ནས་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ལ་མང་མོས་རྒྱབ་སྐྱོར་མ་ཐོབ་སྟབས་ཁྲིམས་འཆར་དེ་ཡར་འགྲོ་ཐུབ་མེད་པ་རེད། ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་བའི་ཁྲོད། སློབ་གྲྭ་ཁག་གི་ནང་ཆོས་ལུགས་ལ་མ་བརྟེན་པའི་བཟང་སྤྱོད་སློབ་ཁྲིད་གནང་ཕྱོགས་དང་། བཙན་བྱོལ་བོད་མིའི་སྤྱི་ཚོགས་ནང་དུ་ལྷག་དཀར་སྲུང་བརྩི་བརྒྱུད་བོད་ཀྱི་སྐད་ཡིག་དང་རིག་གཞུང་གོང་འཕེལ་ཐད་ལ་ཕན་ཐོགས་ཆེན་པོ་ཡོང་བཞིན་ཡོད་པ་སོགས་གནད་དོན་མང་དག་ཞིག་གི་ཐོག་བགྲོ་གླེང་ལྷུག་པོ་གནང་ཡོད། རྩ་བའི་ཐེངས་འདིའི་གྲོས་ཚོགས་ཚོགས་དུས་ ༥ པ་ཐོག་དཔལ་འབྱོར་ལས་ཁུངས་ནས་ཤེས་རིག་ལས་ཁུངས་ཀྱི་བོད་ཕྲུག་ཚོའི་ཤེས་ཡོན་གྱི་ལས་དོན་ཆེད་ཧིན་སྒོར་ས་ཡ་ ༣༠༡ ལྷག་ཙམ་ལ་རྒྱབ་གཉེར་གནང་ཡོད་པ་རེད།

ཁ་སང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་མ་ལག་དང་བཅས་པའི་ལས་བསྡོམས་ཐོག་གྲོས་ཚོགས་ནང་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་གནང་པའི་ཁྲོད། ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་ནས་ལྔ་དང་ལྔ་བཅུའི་ཐབས་བྱུས་དང་འབྲེལ་བདུན་ཕྲག་རྗེས་མའི་ནང་བཞུགས་སྒར་དུ་ནང་མོལ་ཚོགས་འདུ་འཚོགས་འཆར་ཡོད་པ་གསུངས་སོང་། དེའང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་བརྒྱད་པའི་སྐབས་སྤྱི་འཐུས་རྣམས་ནས་ཕྱི་དྲིལ་ལས་ཁུངས་ཀྱི་ལས་བསྡོམས་སྐོར་དང་འབྲེལ། རྒྱ་ནག་གི་འཁྱོག་བཤད་ལ་རྒོལ་ལན་ཐེངས་ཅི་ཙམ་གནང་ཡོད་མེད་དང་དེ་དག་གང་གི་ནང་དུ་འགྲེམས་སྤེལ་ཐུབ་མིན་སྐོར། བོད་ཀྱི་སྲིད་བྱུས་ཉམས་ཞིབ་ཁང་དང་ཐེ་ཝན་བོད་རིགས་ཚོགས་པ་ཐུན་མོང་ནས་གོ་སྒྲིག་ཞུས་པའི་ཚོགས་འདུ་དེའི་གྲུབ་འབྲས་ཇི་སོན་གྱི་གནད་དོན་སྐོར། དེ་བཞིན་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་ཀྱི་སྐུ་ཚབ་དོན་ཁང་ཁག་གི་འབྲེལ་ཡོད་ས་གནས་སོ་སོར་ཆབ་སྲིད་ཀྱི་ལས་འགུལ་གང་སྤེལ་ཡོད་མེད་སོགས་ཀྱི་གནད་དོན་མང་དག་ཐོག་དྲི་བ་དྲིས་ལན་དང་བགྲོ་གླེང་གནང་སོང་། ཁྱད་པར་དུ་ཁ་སང་ཉིན་རྒྱབ་ཀྱི་ཚོགས་ཐུན་སྐབས་སྤྱི་འཐུས་གཅིག་གིས་བཀའ་ཤག་གིས་ལྔ་དང་ལྔ་བཅུ་སྐོར་དང་འབྲེལ་ནས་ཕྱི་རྒྱལ་ཁག་ཏུ་ཡོད་པའི་བོད་རིགས་རྣམས་ཀྱི་ནུས་པ་དེ་བོད་མིའི་སྒྲིག་འཛུགས་ཐོག་སྤུངས་རྒྱུར་དགོངས་བཞེས་གནང་དགོས་པའི་དགོངས་འཆར་ཕུལ་བར་སྲིད་སྐྱོང་མཆོག་གིས་རིང་མིན་བཞུགས་སྒར་དུ་ལྔ་དང་ལྔ་བཅུའི་ཚོགས་འདུ་བསྐོང་ཚོགས་ཐོག་ཕྱི་རྒྱལ་གྱི་མཁས་དབང་དང་གནད་ཡོད་མི་སྣ་བརྒྱད་ཅུ། ཕྱི་རྒྱལ་ནས་བོད་རིགས་བཞི་བཅུ་ལྷག དེ་བཞིན་རྡ་རམ་ས་ལ་ནས་བོད་མི་མཉམ་བཞུགས་ཀྱིས་མ་འོངས་པའི་ལོ་ལྔ་དང་ལྔ་བཅུ་སོ་སོའི་ནང་ལས་རིམ་བཀོད་སྒྲིག་གནང་ཕྱོགས་ཐད་དགོངས་ཚུལ་སྤེལ་རེས་གནང་རྒྱུ་ཡིན་པ་གསུངས་སོང་། དེ་བཞིན་བཞུགས་སྒར་དུ་རིང་མིན་ཟླ་བ་རྗེས་མའི་ཚེས་ཤར་དུ་བོད་རིགས་འདྲེས་མའི་ཚོགས་འདུ་ཞིག་ཀྱང་འཚོགས་གཏན་འཁེལ་ཡོད་པ་དང་བསྟུན་སྤྱི་འཐུས་གཅིག་གིས་བཀའ་ཤག་ནས་འཚོགས་ལ་ཉེ་བའི་བོད་རིགས་འདྲེས་མའི་ཚོགས་འདུ་དེ་གཞུང་འབྲེལ་ཐོག་གོ་སྒྲིག་གནང་གི་ཡོད་དམ་ཞེས་བཀའ་འདྲི་ཞུས་པར་སྲིད་སྐྱོང་མཆོག་གིས་འཛིན་སྐྱོང་ནས་བོད་རིགས་འདྲེས་མའི་ཕྲུ་གུ་དེ་དག་བོད་པ་ཞིག་ལ་ངོས་འཛིན་གྱིས་འཚོགས་ལ་ཉེ་བའི་ཚོགས་འདུ་དེར་མཐུན་འགྱུར་སྦྱར་བ་ཙམ་མ་གཏོགས་གོ་སྒྲིག་དང་དེའི་འགན་བཞེས་མཁན་ཡོངས་རྫོགས་བོད་ཕྲུག་དེ་དག་ཆགས་ཀྱི་ཡོད་སྐོར་དང་སྒྲིག་འཛུགས་ཀྱི་ངོས་ནས་དེ་ལྟར་གནང་ཐུབ་ཚེ་མ་འོངས་པར་བོད་ཕྲུག་དེ་དག་ནས་བོད་ཀྱི་རྩ་དོན་སླད་ནུས་པ་སྤུངས་སྲིད་པ་རེད་ཅེས་ཀྱི་ལན་འདེབས་གནང་སོང་། བགྲོ་གླེང་ཐོག་ཆ་ཤས་བཞེས་མཁན་སྤྱི་འཐུས་གཞན་ཞིག་ནས་ཀུན་གཟིགས་༸པཎ་ཆེན་རིན་པོ་ཆེའི་གནས་སྟངས་སྐོར་དང་འབྲེལ། བོད་ནང་གི་ཆབ་སྲིད་བཙོན་པ་དང་བཙོན་ཟུར་ཚོའི་གནས་བབས་ཐོག་རྒྱལ་སྤྱིའི་ཁྲོད་ཁ་ཚ་དགོས་གཏུགས་ཀྱི་བདེ་སྡུག་སྙན་ཞུ་དང་འབྲེལ་ལས་གཞི་མ་བརྩམ་པའི་རྒྱུ་རྐྱེན་གང་ཡིན་དྲིས་པར་སྲིད་སྐྱོང་མཆོག་གིས་ཕྱི་དྲིལ་ལས་ཁུངས་ངོས་ནས་རྒྱལ་སྤྱིའི་ཐོག་ཆབ་སྲིད་དང་དཔལ་འབྱོར། ཁོར་ཡུག་བཅས་ཀྱི་ཐོག་ནས་བོད་དོན་དྲིལ་བསྒྲགས་གནང་མུས་ཐོག་༸པཎ་ཆེན་ཆུང་སྲིད་རིན་པོ་ཆེ་དང་འབྲེལ་ཕྱི་ལོ་ ༢༠༡༨༌༡༩ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་དུས་བཀག་བསྐྱར་ཞིབ་ཐོག་དེ་དོན་ལས་འགུལ་སྤེལ་འཆར་ཡོད་པ་གསུངས་སོང་། གཞན་ཡང་སྤྱི་འཐུས་གཅིག་ནས་ད་བར་བོད་ནང་རང་ལུས་མེར་སྲེག་གནང་པའི་ཁྲོད་བོད་མི་ག་ཚོད་གསོན་གནས་ཐུབ་ཡོད་མེད་དང་དེ་དག་གི་སྐུ་གཟུགས་གནས་སྟངས་གང་འདྲ་ཆགས་ཡོད་མེད་སོགས་ཁ་གསལ་ཤེས་རྟོགས་ཐུབ་ཀྱི་མེད་པར་བརྟེན། དེའི་ཐོག་ཕྱི་དྲིལ་ལས་ཁུངས་ནས་ཞིབ་འཇུག་མཐིལ་ཕྱིན་ཞིག་པ་གནང་སྟེ་ཁོང་རྣམས་ཀྱི་འཕྲོད་བསྟེན་གནས་བབས་ལ་རྒྱུས་ལོན་དང་དོ་འཁུར་བཞེས་ནས་ཕྱི་ཕྱོགས་སུ་སྨན་བཅོས་ཡོང་ཐབས་སླད་ཐུགས་འཁུར་ཆེ་བཞེས་དགོས་པར་དགོངས་འཆར་ཕུལ་བར་སྲིད་སྐྱོང་མཆོག་ནས་ངེས་པར་དུ་དགོང་བཞེས་གནང་རྒྱུ་ཡིན་ཞེས་དང་། རྒྱལ་སྤྱིའི་གཞུང་འབྲེལ་མིན་པའི་ཚོགས་ཁག་བརྒྱུད་བོད་མི་ཆབ་སྲིད་བཙོན་པ་དེ་དག་ཀློད་གྲོལ་དང་སྨན་བཅོས་ཐོབ་ཐབས་སུ་འབད་བརྩོན་ཞུ་མུས་ཡིན་པ་གསུངས་ཡོད། ཕྱི་དྲིལ་ལས་ཁུངས་ཀྱི་ལས་བསྡོམས་སྐོར་ལས་གཞན་ཡང་འཚོགས་ལ་ཉེ་བའི་རྒྱ་ནག་དམར་ཤོག་ཚོགས་པའི་ཚོགས་ཆེན་ཐོག་དམིགས་བསལ་ཐུགས་རེ་གང་གནང་གི་ཡོད་མེད་དང་། ཕྱི་རྒྱལ་མཐོ་སློབ་ཁག་ཏུ་ཁུངས་རྩི་སློབ་གླིང་དང་འབྲེལ་བའི་བོད་ཀྱི་ཆོས་དང་རིག་གཞུང་ཐོག་ཁྱབ་སྤེལ་མི་ཆོག་པའི་དཀའ་ངལ་ཁག་ཅིག་སྐོར་ལ་བཀའ་འདྲི་ཞུ་མཁན་ཡང་བྱུང་སོང་།

བོད་མིའི་སྒྲིག་འཛུགས་དང་བོད་མིའི་འཐབ་རྩོད་ཐོག་ལ་ཡུན་རིང་ནས་རྒྱབ་སྐྱོར་གནང་མཁན་རྒྱ་གར་གྲོས་ཚོགས་འོག་མའི་འཐུས་མི་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་འགན་འཛིན་སྐུ་ཞབས་ཤན་ཏ་ཀུ་མཱར་མཆོག་དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་བརྒྱད་པའི་ཐོག་ཟུང་ཉན་དུ་ཕེབས་སོང་བ་དང་། ཁོང་གིས་གསར་འགོད་པའི་བཅར་འདྲི་དང་ལེན་གནང་སྐབས་སྤྱི་འཐུས་གྲོས་ཚོགས་དེ་བཞིན་ཁྲིམས་སྒྲིག་གཞི་ལྟར་ཞི་འཇམ་པོའི་ཐོག་ནས་སྐྱོད་བཞིན་པར་བསྔགས་བརྗོད་དང་སྦྲགས། བཙན་བྱོལ་བོད་གཞུང་དང་གྲོས་ཚོགས་ཚགས་ཚུད་ངང་སྐྱོད་བཞིན་པར་དགའ་ཚོར་ཆེན་པོ་བྱུང་སོང་ཞེས་གསུངས་གནང་སོང། སྐབས་དེར་ད་དུང་ཁོང་གིས་བཙན་བྱོལ་བོད་གཞུང་དང་གྲོས་ཚོགས་གཉིས་པོ་ཚགས་ཚུད་ལམ་ལྷོང་ལྡན་པའི་ངང་སྐྱོད་བཞིན་པ་དེ་ནི་དངོས་གནས་འཛམ་གླིང་རྒྱལ་ཁབ་གང་དུ་མེད་པ་ཐོུང་མ་ཡིན་པ་ཞིག་ཆགས་ཡོད་པ་རེད། དེ་ཡང་གཙོ་བོ་སྤྱི་ཁྱབ་འོས་བསྡུ་ལས་ཁང་དང་མང་ཚོགས་ཀྱི་འགན་འཁུར་ལ་བརྟེན་ནས་བྱུང་བ་ཡིན་སྟབས། དེ་རིང་གི་གོ་སྐབས་འདིའི་བརྒྱུད་ནས་བོད་མི་ཡོངས་ལ་འཚམས་འདྲི་ཡོད་བཅས་གསུངས་གནང་ཡོད་པ་རེད། རྩ་བའི་སྐུ་ཞབས་ཤན་ཏཱ་ཀུ་མཱར་མཆོག་དེ་རིང་ཉིན་རྒྱབ་གྲོས་ཚོགས་སུ་ཟུར་ཉན་དུ་ཕེབས་སྐབས་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུ་བཞུགས་སྤྱི་འཐུས་རྣམ་པ་དང་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བཀའ་བློན་རྣམ་པ་སྐུ་བཞེངས་ཀྱིས་ཁོང་ལ་ཆེ་བསྟོད་དགའ་བསུའི་འཚམས་འདྲི་ཞུས་ཡོད་པ་རེད། བོད་མི་མང་སྤྱི་འཐུས་གྲོས་ཚོགས་ཚོགས་བཞིན་པའི་སྐབས་སུ་རྒྱ་གར་དང་ཕྱི་རྒྱལ་གྱི་གཞུང་འབྲེལ་དང་གཞུང་འབྲེལ་མིན་པའི་གནད་ཡོད་མི་སྣ་ཁག་ཅིག་ཟུར་ཉན་དུ་ཕེབས་བཞིན་པའི་གལ་གནད་སྐོར་ལ་སྤྱི་འཐུས་གཉིས་ལ་བཅར་འདྲི་ཞུས་སྐབས་དེ་ནི་བོད་མིའི་འཐབ་རྩོད་ལ་རྒྱབ་སྐྱོར་གྱི་རྣམ་པ་ཞིག་ལ་ངོས་འཛིན་གནང་གི་ཡོད་པ་གསུངས་སོང་། གཞི་རྩའི་དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་དུས་ཡུན་མང་ཆེ་བ་དེ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཕྱི་ལོ་ ༢༠༡༥་༡༦ ལོའི་ལོ་འཁོར་ལས་བསྡོམས་ཐོག་ལ་བཏང་གནང་བ་དང་། དེ་ཡང་གྲོས་ཚོགས་འཐུས་མི་རྣམས་ནས་ལས་བསྡོམས་ཐོག་ལ་དོགས་འདྲི་དང་བགྲོ་གླེང་གནང་པའི་ཁྲོད་རྒྱ་རིགས་གཙོས་པའི་བོད་དོན་རྒྱབ་སྐྱོར་ཚོགས་པའི་སྐོར་དང་། དབུ་མའི་ལམ་གྱི་གོ་རྟོགས་དང་དྲིལ་བསྒྲགས་ལས་འགུལ་སྐོར། དེ་བཞིན་དྲིལ་བསྒྲགས་ལས་ཁུངས་ཀྱི་བོད་རྒྱ་དབྱིན་གསུམ་གྱི་གསར་འགྱུར་འདོན་སྤེལ་སོགས་ཀྱི་ཐད་ལ་དོགས་འདྲི་ཁག་ཅིག་ཕེབས་ཡོད། སྐབས་དེའི་བགྲོ་གླེང་གནང་སྐབས་ཕྱི་འབྲེལ་ཁྱབ་ཁོངས་སྐུ་ཚབ་དོན་གཅོད་སྐོར་དང་འབྲེལ་སྤྱི་འཐུས་གཅིག་གིས་སྐུ་ཚབ་དོན་གཅོད་བསྐོ་གཞག་གནང་རྒྱུའི་སྐུ་དབང་སུ་ལ་ཡོད་མེད་སྐོར་བཀའ་འདྲི་ཞུས་པར་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་བློ་བཟང་སེང་གེ་མཆོག་གིས་ད་ནས་སྐུ་ཚབ་དོན་གཅོད་བསྐོ་གཞག་གནང་རྒྱུའི་སྐུ་དབང་དེ་དཔལ་ལྡན་དགའ་ལྡན་ཕོ་བྲང་དང་བཀའ་ཤག་གཉིས་མོས་མཐུན་ཡོད་པའི་ཐོག་ནས་གནང་གི་ཡོད་པ་གསུངས་གནང་སོང་།

དེ་རིང་ཟླ་ ༩ ཚེས་ ༢༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་བརྒྱད་པའི་ཐོག་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་མ་ལག་དང་བཅས་པའི་ལོ་འཁོར་ལས་བསྡོམས་ཐད་བགྲོ་གླེང་གནང་སྐབས་བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་བདེ་སྲུང་ལས་ཁུངས་ཀྱི་ངོས་ནས་ད་བར་གསང་བ་གཅིག་ཀྱང་ཕྱི་ལ་ཤོར་མེད་པ་དང་། མ་འོངས་པར་ཡང་གསང་གནས་དེ་དག་ཕྱིར་མི་ཤོར་བ་ཁས་ལེན་ཞུ་རྒྱུ་ཡིན་ཅེས་གསུངས་སོང། དེའང་ཁ་སང་ནས་དེ་རིང་སྔ་དྲོའི་གྲོས་ཚོགས་བར་སྤྱི་འཐུས་རྣམ་པས་བདེ་སྲང་ལས་ཁུངས་ཀྱི་ལོ་འཁོར་ལས་བསྡོམས་ཐོག་ལ་བགྲོ་གླེང་གནང་སྐབས་སྤྱི་འཐུས་ཁག་ཅིག་གིས་སེམས་ཚོར་ཆེན་པོས་བདེ་སྲུང་ལས་ཁུངས་ཀྱི་ངོས་ནས་༸གོང་ས་མཆོག་གི་༸སྐུའི་སྲུང་བྱའི་ཐོག་སྔར་ལྷག་ཐུགས་སྣང་བཞེས་དགོས་པ་དང། རྣམ་ཀུན་༸གང་ཉིད་མཆོག་གི་མཛད་འཆར་ཉུང་འཕྲིད་གནང་དགོས་པ། དེ་བཞིན་༸གོང་ས་མཆོག་གི་མཚན་སྙན་སྲུང་སྐྱོབ་བྱ་དགོས་པ།  མགོན་པོ་མཆོག་ས་གནས་ཁག་ཏུ་ཆིབས་སྒྱུ་བསྐྱངས་སྐབས་དང་བླངས་སྐུ་སྲུང་བ་བསྡུ་རུབ་གནང་ཚེ་དེ་དག་གི་རྒྱབ་ལྗོངས་ལ་ཞིབ་འཇུག་གཟབ་ནན་གནང་དགོས་པར་གཞེན་སྐུལ་ཕུལ་བ་དང་ཆབས་ཅིག བདེ་སྲུང་ལས་ཁུངས་ཀྱི་གསང་བའི་གནས་ཚུལ་ཉར་ཕྱོགས་ཐོག་དམ་ཟབ་གནང་དགོས་གལ་ཆེ་བར་གཞེན་སྐུལ་ཡང་བྱུང་སོང་།  སྐབས་དེར་བདེ་སྲུང་བཀའ་བློན་མཆོག་གིས་བདེ་སྲུང་ལས་ཁུངས་ཀྱི་གསང་བའི་ལས་དོན་ཉར་ཚགས་གནང་ཕྱོགས་ཐད་བཀའ་ལན་གནང་པར་ད་བར་བདེ་སྲིད་ལས་ཁུངས་ཀྱི་ངོས་ནས་གསང་བ་གཅིག་ཀྱང་ཕྱི་ལ་ཤོར་མེད་ཅེས་གསུངས་ཡོད་པ་རེད། གྲོས་ཚོགས་སུ་སྤྱི་འཐུས་ལ་ལས་༸གོང་ས་མཆོག་གི་མཚན་སྙན་སྲུང་སྐྱོབ་བྱ་དགོས་གལ་གྱི་གནད་དོན་དང་འབྲེལ་ཏེ་ཉེ་བའི་ཆར་སྤྱི་ཚོགས་ཁྲོད་དྲ་རྒྱའི་མ་ལག་རྒྱ་ཁྱབ་ཏུ་འགྲོ་བཞིན་པའི་དུས་སྐབས་འདིར་མི་སྣ་ཁག་ཅིག་གིས་སྤྱི་ཚོགས་བརྒྱུད་ལམ་ཐོག་མིང་འདྲ་མིན་སྤྱོད་ནས་བཙན་བྱོལ་བོད་མིའི་སྤྱི་ཚོགས་གཏོར་བཤིག་བཏང་པ་མ་ཟད། དེ་བཞིན་རྒྱ་གཞུང་གིས་དངོས་ཤུགས་བརྒྱུད་གསུམ་གྱིས་ཐབས་བྱུས་འདྲ་མིན་བརྒྱུད་༸གོང་ས་མཆོག་ལ་མཚན་སྨད་ཞུ་བ་བཅས་ཀྱི་གནས་ཚུལ་ཡོང་གི་ཡོད་སྟབས། དེ་དག་ཐོག་མྱུལ་ཞིབ་གནང་ཕྱིར་བདེ་སྲུང་ལས་ཁུངས་ནས་དོགས་ཟོན་དང་དམིགས་བསལ་གྱི་ལས་ཁུངས་གསར་འཛུགས་གནང་དགོས་པར་འབོད་སྐུལ་ཞུས་སོང་།   ལྷག་པར་དུ་སྤྱི་འཐུས་ཁག་ཅིག་གིས་༸གོང་ས་མཆོག་ས་གནས་ཁག་ཏུ་ཆིསབ་སྒྱུར་མཛད་སྐབས་བདེ་སྲུང་ལས་ཁུངས་ཀྱི་འབྲེལ་ཡོད་ལས་བྱེད་ཚོས་ས་གནས་ཀྱི་གནད་ཡོད་མི་སྣ་ཁག་དང་མཇལ་འཕྲད་ཀྱི་གོ་སྐབས་མང་ཙམ་བྱུང་ཐུབ་ཚེ་དེ་ནི་དགེ་མཚན་ཆེན་པོ་ཡོད་སྐོར་གྱི་དགོངས་ཚུལ་གསུང་མཁན་ཡང་བྱུང་ཡོད་པ་རེད། སྤྱིར་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་ཐོག་ལ་གྲོས་ཚོགས་ཀྱི་འཐུས་མི་ཚོས་ཐུགས་སྣང་གཞེན་སྐུལ་ཕུལ་བ་ལས་དམིགས་བསལ་ལས་བསྡོམས་རང་གི་ཐོག་དོགས་འདྲི་གནང་མཁན་དེ་ཙམ་བྱུང་མེད་པ་རེད། རྩ་བའི་བོད་མིའི་སྒྲིག་འཛུགས་བདེ་སྲུང་ལས་ཁུངས་ནས་གྲོས་ཚོགས་སུ་དགོས་འབུལ་ཞུས་པའི་ལོ་འཁོར་ལས་བསྡོམས་སྙིང་བསྡུས་ལ་གཞིགས་ན། འདི་ལོའི་ནང་བོད་ནས་གསར་དུ་ཕེབས་མཁན་གྲངས་ ༡༢༨༢ བྱུང་འདུག་པ་དང། དེའི་ཁོངས་ནས་བལ་ཡུལ་དང་རྒྱ་གར་གཞུང་ཚབ་ནས་དམིགས་བསལ་འཛུལ་བཞུགས་ཆོག་པའི་ལག་འཁྱེར་ཞུ་མཁན་གྲངས་ ༩༨ བྱུང་ཡོད་འདུག དེ་བཞིན་གནས་མཇལ་རྗེས་ཕྱིར་བོད་དུ་ཕེབས་མཁན་གྲངས་ ༡༡༩༤ བྱུང་ཡོད་པ་རེད།  གཞན་ཡང་ལོ་འཁོར་མོ་འདིའི་ནང་བོད་ལ་གཉེན་འཕྲད་དུ་ཕེབས་མཁན་བོད་མི་སེར་སྐྱ་གྲངས་ ༢༨༢ བྱུང་ཡོད་པ་དང་། བོད་མི་ཕྱིར་སྐྱོད་ལག་འཁྱེར་ IC ཞུ་མཁན་མི་སྐྱ་ཕོ་མོ་ ༢༧༢༣ དང་གྲྭ་བཙུན་ ༣༤༠ བཅས་ཁྱོན་བསྡོམས་ ༣༠༦༣ བྱུང་ཡོད་འདུག་པ་མ་ཟད། ནང་མི་ཟླ་སྒྲིལ་ Travel Document ཡིག་ཆ་བཟོ་མཁན་གྲངས་ ༢༢ བྱུང་ཡོད་རེད་འདུག

ཁ་སང་ཟླ་ ༩ ཚེས་ ༢༧ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་བདུན་པའི་ཐོག་བཀའ་ཤག་གིས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་བྱེད་ཆོག་པའི་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་བསྣམས་ཕེབས་པ་དེར་ངོ་ཡོད་སྤྱི་འཐུས་གྲངས་ ༣༡ གིས་རྒྱབ་སྐྱོར་གནང་སྟབས་དེ་མང་མོས་གཏན་འབེབས་གནང་སོང་། དེའང་བཀའ་ཤག་ནས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་བྱེད་ཆོག་པའི་ཁྲིམས་འཆར་ཐོག་ཁ་སང་བགྲོ་གླེང་ལྷུག་པོ་གནང་པ་མ་ཟད། ད་དུང་ཡང་སྤྱི་འཐུས་ཁག་ཅིག་གིས་དོགས་འདྲི་མང་དག་ཞིག་གནང་ཡོད་སྟབས། སྲིད་སྐྱོང་མཆོག་གིས་ཁྲིམས་འཆར་དེའི་བཟོ་བཅོས་ཁྲིམས་འཆར་བསྣམ་ཕེབས་རྒྱུ་ཡིན་ཅེས་གསུངས་ཡོད་པ་རེད། རྩ་བའི་བཀའ་ཤག་གི་ངོས་ནས་གྲོས་ཚོགས་ལས་ཉིན་བཞི་པའི་ཐོག་ལས་ཁུངས་སོ་སོའི་ལས་འཆར་ཁག་ཅིག་ལ་དགོས་གལ་ལ་གཞིགས་ཏེ་བཀའ་ཤག་ནས་དམིགས་བསལ་ལས་བྱེད་བསྐོ་གཞག་ཆོག་པའི་ཁྲིམས་འཆར་ཞིག་བསྣམས་ཡོད་པ་དང་། ཁྲིམས་འཆར་དེའི་བརྗོད་པ་དང་པོའི་ཐོག་བསྐྱོད་པར་སྤྱི་འཐུས་ལ་ལས་དེར་དགག་པ་དང་ཡང་ཁ་ཅིག་གིས་རྒྱབ་སྐྱོར་གནང་སྟབས་དེར་བགྲོ་གླེང་དང་དོགས་འདྲི་ལྷུག་པོ་བྱུང་ཡོད་པ་རེད། ཁ་སང་གྲོས་ཚོགས་ཀྱི་ལས་ཉིན་བདུན་པའི་ཐོག་ཁྲིམས་འཆར་དེའི་བརྗོད་པ་གཉིས་པའི་ཐོག་བསྐྱོད་སྐབས་སླར་ཡང་སྤྱི་འཐུས་ཁག་ཅིག་གིས་མུ་མཐུད་འགག་པ་གནང་ཏེ་ཁྲིམས་འཆར་དེ་དང་འབྲེལ་བའི་ཐོག་དོགས་འདྲི་ཁ་ཤས་ཕེབས་སོང་བ་མ་ཟད། བཀའ་ཤག་ནས་དམིགས་བསལ་ལས་བྱེད་ཐད་ཀར་བསྐོ་གཞག་གནང་པ་དེས་བཀའ་ཤག་ལ་སྐྱོན་བརྗོད་རིགས་ཡོང་ཉེན་དང་། ལས་བྱེད་འདེམས་བསྐོ་ལྷན་ཁང་གི་སྐུ་དབང་ལ་དོ་ཕོག་འགྲོ་མིན། དེ་བཞིན་ད་དུང་དེས་སྤྱིར་སྲི་ཞུ་ལས་བྱེད་དང་ལས་བྱེད་གོ་གནས་ལ་དོ་ཕོག་འགྲོ་མིན་དང་། དམིགས་བསལ་དེ་དག་རང་གི་ངོ་ཤེས་པ་ཁག་བསྐོ་འཆར་ཡོད་དམ་ཞེས་སོགས་དྲི་བ་ཡང་ཡང་ཕེབས་ཡོད་སྟབས། སྲིད་སྐྱོང་མཆོག་གིས་དམིགས་བསལ་ཐད་བསྐོ་རྣམས་རང་གི་ངོ་ཤེས་པ་བསྐོ་འཆར་མེད་པ་དང་དེས་སྤྱིར་སྲི་ཞུ་ལས་བྱེད་པ་དང་ལས་བྱེད་པའི་ས་མིག་ལ་དོ་ཕོག་ཡོང་ཉེན་མེེད་ཅེས་ཁ་གསལ་གསུངས་སོང་། ལས་བྱེད་ཐད་བསྐོ་དང་འབྲེལ་བའི་ཁྲིམས་འཆར་དེར་དོགས་འདྲི་མང་དག་ཞིག་ཕེབས་སྟབས་སྲིད་སྐྱོང་མཆོག་གིས་བཟོ་བཅོས་ཁྲིམས་འཆར་བསྣམས་ཕེབས་ཡོད་པར་བརྟེན། གྲོས་ཚོགས་སུ་ངོ་ཡོད་སྤྱི་འཐུས་གྲངས་ ༣༡ གིས་རྒྱབ་སྐྱོར་གནང་བར་བརྟེན་མང་མོས་ཐག་གཅོད་ཀྱིས་གཏན་འབེབས་བྱུང་ཡོད་པ་རེད། སྒྲིག་གཞི་བསྐྱར་བཅོས་ནང་གསལ། དམིགས་བསལ་དགོས་གལ་བྱུང་ཚེ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལྟར་བཀའ་ཤག་ནས་ལས་བྱེད་ས་མིག་རྩ་འབོར་གྱི་བརྒྱ་ཆ་ ༣ མམ་ལས་བྱེད་མི་གྲངས་ ༡༨ ལས་མ་མང་བ་ལོ་དུས་རྒྱས་བཅད་ཐོག་བཀའ་ཤག་སྐབས་སོ་སོའི་ལས་ཡུན་རིང་ལས་བྱེད་འདེམས་ལྷན་དང་གོ་བསྡུར་གྱིས་ཐད་བསྐོ་ཆོག་རྒྱུ། ལས་བྱེད་དེ་རིགས་བཀའ་ཤག་སྐབས་སོ་སོའི་ལས་ཡུན་འཁྱུར་རྗེས་ཟླ་གསུམ་ནང་ཚུན་ལས་མཚམས་འཇོག་དགོས། དེ་དག་གི་ལས་འགན་དང་གནས་རིམ། ཕོགས་ཐོབ། ཁེ་ཕན་གཞན་བཅས་བཀའ་ཤག་གིས་གཏན་འབེབས་བྱ་རྒྱུ་ཡིན་པ་འཁོད་འདུག