གསར་འགྱུར།

ཟླ་བ་འདིའི་ཚེས་ ༡༡ ཉིན་རྒྱལ་སྤྱིའི་རིའི་ཉིན་མོ་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཉིན་མོ་དེ་སྲུང་བརྩི་ཞུས་པ་དང་སྦྲགས་ཏེ་ང་ཚོས་ངེས་པར་དུ་འཛམ་གླིང་སྤྱིའི་ཁེ་ཕན་སླད་བོད་མཐོ་སྒང་གི་འཁྱག་རོམ་དང་རི་བོ་སྲུང་སྐྱོབ་གནང་དགོས་ཞེས་གསུངས་སོང་།ཁ་སྔོན་ཨོ་སི་ཀྲོ་ལི་ཡར་གནས་བཞུགས་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱིས་དྲ་ཐོག་བརྒྱུད་རི་བོའི་ཉིན་མོ་སྲུང་བརྩི་དང་སྦྲགས། སྲིད་སྐྱོང་མཆོག་གིས་དབུས་པའི་ཁོར་ཡུག་དོན་གཉེར་བ་དང་ཚན་རིག་པ། ཨོ་གླིང་གི་མི་སྣ་གལ་ཆེ་ཁག་ཅིག རི་འཛེགས་གནང་མཁན་ཁག་ཅིག་གདན་ཞུས་ཀྱིས་བོད་ཀྱི་རི་བོ་དེ་དག་ཅི་ཕྱིར་གལ་གནད་ཆགས་ཀྱི་ཡོད་མེད་ཐད་གཏམ་བཤད་ཀྱི་ལས་རིམ་ཞིག་གོ་སྒྲིག་གནང་ཡོད་པ་རེད།སྐབས་དེར་སྲིད་སྐྱོང་མཆོག་གིས་འཛམ་གླིང་གི་བརྒྱ་ཆ་ ༢༢ ཙམ་ཞིག་ནི་རི་བོ་ཡིན་པ་དང་དེ་བཞིན་བརྒྱ་ཆ་ ༥༠ ཙམ་ཞིག་གི་ཆུ་བོ་ནི་རི་བོ་དེ་དག་ནས་ཡོང་གི་ཡོད་སྟབས་རི་བོ་ནི་ཧ་ཅང་གལ་གནད་ཆགས་ཀྱི་ཡོད་པར་གསུངས་སོང་།    དེའི་ཁོངས་སུ་འཛམ་གླིང་གི་རི་བོ་མཐོ་ཤོས་མང་དག་ཅིག་བོད་མཐོ་སྒང་དུ་ཆགས་ཡོད་ཀྱང་། ད་ཆ་རྒྱ་གཞུང་གིས་བཙན་འཛུལ་འོག་བོད་ནང་འཛུགས་སྐྲུན་གསར་རྒྱག་གི་ལས་གཞི་དང་གཏེར་ཁ་གང་བྱུང་དུ་སྔོག་འདོན་སོགས་བྱེད་བཞིན་རྐྱེན་བོད་མཐོ་སྒང་གི་ཚ་དྲོད་རྒྱས་པ་སོགས་ཁོར་ཡུག་སྤྱི་ཡོངས་ལ་ཤུགས་རྐྱེན་སྤྲོད་ཀྱི་ཡོད་པ་གསུངས་ཡོད།སྲིད་སྐྱོང་མཆོག་གིས་ད་དུང་ཞིབ་འཇུག་པ་ཁག་ཅིག་གིས་བོད་ཀྱི་འཁྱག་རོམ་གྱི་བཞུར་ཚད་དེ་ཧ་ཅང་མྱུར་པོ་ཆགས་རྐྱེན་བརྒྱ་ཆ་ ༣༠ དང་ ༤༠ ཙམ་ཞིག་ད་ཆ་མེད་པར་གྱུར་ཡོད་པ་ལུང་འདྲེན་གྱིས་ཚན་རིག་པ་ཁག་ཅིག་གིས་ཀྱང་ཕྱི་ལོ་ ༢༠༥༠ ལོར་བོད་ཀྱི་འཁྱག་རོམ་གྱི་བཞུར་ཚད་དེ་གསུམ་ཆ་གཉིས་ཙམ་མེད་པར་གྱུར་ངེས་ཡིན་པ་བརྗོད་ཡོད་པ་གསུངས་པར་མ་ཟད། གལ་ཏེ་དེ་ལྟར་འབྱུང་བ་ཡིན་ན་བོད་ཀྱི་ཆུ་བོ་དག་ལ་བརྟེན་མཁན་ཨེ་ཤ་ཡའི་མི་འབོར་ཐེར་འབུམ་གཅིག་ལྷག་གི་འཚོ་བར་དོ་ཕོག་འགྲོ་ངེས་དང་འཛམ་གླིང་སྤྱིར་ཤུགས་རྐྱེན་སྤྲོད་རྒྱུ་ཡིན་སྟབས། བོད་ཀྱི་རི་བོ་དེ་དག་ཧ་ཅང་རྩ་ཆེན་ཆགས་ཡོད་སྐོར་གསུངས་པ་དང་ཆབས་ཅིག ང་ཚོས་ངེས་པར་དུ་འཛམ་གླིང་སྤྱིའི་ཁེ་ཕན་སླད་བོད་མཐོ་སྒང་གི་འཁྱག་རོམ་དང་རི་བོ་སྲུང་སྐྱོབ་གནང་དགོས་ཞེས་གསུངས་སོང་།དེ་བཞིན་ལས་རིམ་དེའི་ཐོག་ལྷན་ཞུགས་གནང་མཁན་ཁོར་ཡུག་དོན་གཉེར་བ་དང་ཚན་རིག་པ། རྩོམ་པ་པོ་ཌོཀ་ཌར་Vandana Shiva ལགས་ཀྱིས་རི་བོ་ནི་ང་ཚོར་སྲུང་སྐྱོབ་བྱེད་མཁན་དང་ཚེ་སྲོག་སྦྱིན་མཁན་ཞིག་ཡིན་པ་དང་།  ཁོ་མོའི་གནམ་གཤིས་འགྱུར་ལྡོག་ཐད་ཞིབ་འཇུག་གནང་བའི་བརྒྱུད་རིམ་ཁྲོད་ད་ཆ་ཧི་མཱ་ལ་ཡའི་རི་བོའི་འཁྱག་རོམ་དེ་དག་གནམ་གཤིས་འགྱུར་ལྡོག་རྐྱེན་གྱིས་ཉེན་ཚབས་ཅན་ཏུ་གྱུར་ཡོད་པས་ང་ཚོས་དུས་རྟག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེ་དང་འཚེ་མེད་ཞི་བའི་ཐད་བཀའ་སྩལ་ཁག་སྙིང་ལ་བཅངས་ཀྱིས་འཚེ་མེད་ཞི་བ་དང་བྱམས་བརྩེའི་སྒོ་ནས་རི་བོ་སྲུང་སྐྱོབ་བྱེད་ཐུབ་ཚེ་ང་ཚོའི་འཚོ་གནས་ལ་ངལ་བ་འཕྲད་ཀྱི་མ་རེད་ཅེས་གསུངས་ཡོད། ཨོ་གླིང་དུ་གནས་བཞུགས་སྤྱི་འཐུས་སྐྱིད་འཛོམས་གདོང་གདུས་ལགས་ཀྱིས་བོད་མཐོ་སྒང་གི་རི་བོ་དེ་དག་མིའི་ཚེ་སྲོག་ལ་གལ་འགངས་ཇི་ཙམ་ཆགས་ཀྱི་ཡོད་མེད་སྐོར་འགྲེལ་བརྗོད་དང་སྦྲགས། ད་ཆ་རྒྱ་གཞུང་གིས་བོད་ནང་གཏེར་ཁ་གང་བྱུང་དུ་སྔོག་འདོན་དང་བོད་ཀྱི་རང་བྱུང་ཁོར་ཡུག་གཏོར་བཤིག་སོགས་བྱེད་བཞིན་རྐྱེན་བོད་ཙམ་མིན་པར་བོད་མཐོ་སྒང་གི་ཆུ་བོ་ལ་བརྟེན་མཁན་ཨེ་ཤ་ཡའི་མི་རིགས་སྤྱི་ཡོངས་ལ་དོ་ཕོག་ཐེབས་ངེས་ཡིན་སྟབས། རི་བོ་སྲུང་སྐྱོབ་གནང་རྒྱུ་ནི་གལ་འགངས་ཤིནཏུ་ཆེན་པོ་ཡིན་སྐོར་གསུངས་སོང་།གཏམ་བཤད་གནང་མཁན་དེའི་ཁོངས་སུ་ཡོད་པ་རི་འཛེགས་གནང་མཁན་ཁག་ཅིག་གིས་དེ་སྔ་ Everest འམ་ཇོ་མོ་གླང་མ་དང་གངས་ཅན་རྫོང་ལྔ་སོགས་ལ་འཛེགས་སྐབས་འཁྱག་རོམ་གྱི་བཞུར་ཚད་མྱུར་པོ་ཕྱིན་པར་གཟིགས་ཚོར་བྱུུང་སྐོར་གསུངས་པ་དང་འབྲེལ་ཏེ་ཚང་མས་མཉམ་རུབ་ཀྱིས་གངས་རི་སྲུང་སྐྱོབ་གནང་དགོས་ཞེས་སོགས་གསུངས་ཡོད།

འདས་པའི་ཟླ་ཤས་ནས་ཧི་མཱ་ཅལ་མངའ་ཁུལ་དུ་ཏོག་དབྱིབས་གཉན་རིམས་ཕོག་མཁན་གྱི་གྲངས་འབོར་དེ་ཉིན་རེ་བཞིན་ཇེ་མང་དུ་འགྲོ་མུས་ཁྲོད་འདིར་གཟའ་འཁོར་སྔོན་མར་དྷ་རམ་ས་ལའི་མེག་ལོཌ་ཁུལ་ནས་བོད་མི་ ༡༥ ལ་གཉན་རིམས་དེ་ཕོག་ཡོད་པའི་ནད་རྟགས་ཐོན་འཕྲལ་མེག་གྷན་གྱི་ཆ་ཤས་ཤིག་གམ་མེག་ལོཊ་གསུམ་མདོ་ནས་སྒྲོལ་མ་སྨན་ཁང་བར་དུ་ containment zone ཞེས་བཀག་སྐྱིལ་ས་ཁུལ་ལ་ངོས་འཛིན་གྱིས་དམ་དྲག་གནང་བཞིན་ཡོད་པ་རེད།དེ་རིང་རླུང་འཕྲིན་ཁང་གིས་གནས་ཚུལ་གསར་པ་ཤེས་རྟོགས་བྱུང་བར་དྷ་རམ་ས་ལ་ཁུལ་དུ་ཏོག་དབྱིབས་གཉན་རིམས་ཕོག་པའི་བོད་མི་དགུ་མང་དུ་ཕྱིན་པར་བརྟེན་དྷ་སར་གཉན་རིམས་ཕོག་མཁན་ཁྱོན་བོད་མི་ ༢༤ ཆགས་ཀྱི་འདུག རླུང་འཕྲིན་ཁང་གིས་དེ་དང་འབྲེལ་བའི་གནས་ཚུལ་རྒྱས་པའི་ཐོག་ལ་དྷ་ས་ས་གནས་འགོ་འཛིན་ཀུན་དགའ་ཚེ་རིང་ལགས་སུ་བཅར་འདྲི་ཁག་ཅིག་ཞུས་ཡོད་པས་དེ་དོན་གསན་གནང་ཡོང་བའི་དགོངས་འཇགས་འཚལ།།

རྒྱལ་སྤྱིའི་ཐོག་འགྲོ་བ་མིའི་ཐོབ་ཐང་དང་འབྲེལ་བའི་ཤེས་བྱ་དང་གོ་རྟོགས་ཀྱི་ལས་གཞི་རྒྱ་ཆེ་སྤེལ་མཁན་ Article3.org ཞེས་པའི་ལྟེ་གནས་ཁང་གིས་འདི་ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་ཁ་སང་ཚེས་ ༡༠ ཉིན་༸གོང་ས་མཆོག་གི་ཐུགས་ཉེ་བའི་མཛའ་གྲོགས་ལྷོ་ཨ་ཕི་རི་ཀའི་ཡི་ཤུའི་བླ་ཆེན་སྐུ་ཞབས་ Archbishop Desmond Tutu མཆོག་གིས་ད་བར་འགྲོ་བ་མིའི་ཐོབ་ཐང་དང་ཞི་བདེ། འདྲ་མཉམ་དང་དྲང་བདེན་སོགས་ཀྱི་ཐད་ཕྱག་ལས་རྒྱ་ཆེ་གནང་བར་ཆེ་བསྟོད་ཞུས་པ་དང་སྦྲགས་ཏེ་ཁོང་ལ་ Human Rights Global Treasure Award ཞེས་གོ་ལའི་འགྲོ་བ་མིའི་ཐོབ་ཐང་གི་གཏེར་མཛོད་ཞེས་པའི་བྱ་དགའ་ཞིག་འབུལ་ལམ་ཞུས་འདུགསྐུ་ཞབས་ Desmond Tutu མཆོག་ལ་ཆེས་མཐོའི་གཟེངས་རྟགས་དེ་འབུལ་ལམ་ཞུས་པ་དང་འབྲེལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་ཐུང་བརྒྱུད་སྐུ་ཞབས་ཊུ་ཊུ་མཆོག་ལ་དགའ་བསུའི་འཚམས་འདྲི་མཛད་འདུག མགོན་པོ་༸གང་ཉིད་མཆོག་གིས་སྐུ་ཞབས་ Desmond Tutu མཆོག་ནི་གུས་ཞབས་དང་དད་གུས་ལྡན་པའི་ཆོས་ཕྱོགས་ཀྱི་དབུ་ཁྲིད་རྒན་པ་ཞིག་དང་ཡུན་རིང་ནས་ཡིད་ཆེས་བློ་འགེལ་ཆོག་པའི་མཛའ་གྲོགས་རྙིང་གྲས་ཤིག་ཀྱང་ཡིན་པ་སོགས་བཀའ་སྩལ་བ་མ་ཟད། ད་རེས་སྐུ་ཞབས་ཁོང་ལ་གོ་ལའི་འགྲོ་བ་མིའི་ཐོབ་ཐང་གི་གཏེར་མཛོད་གཟེངས་རྟགས་ཐོབ་པར་འཚམས་འདྲི་མཛད་འདུག༸གོང་ས་༸སྐྱབས་མགོན་པོ་ཆེན་པོ་གིས་ད་དུང་སྐུ་ཞབས་ Desmond Tutu མཆོག་ད་ཆ་དགུང་གྲངས་དགུ་བཅུར་ཕེབས་ལ་ཉེ་བ་དང་འདས་པའི་ལོ་ཡུན་དེ་དག་རིང་རང་ཚུགས་དང་ཆོད་སེམས་བརྟན་པོས་འགྲོ་བ་མིའི་བདེ་དོན་སྤྱི་དང་ལྷག་པར་ཡི་ཤུའི་ཆོས་ཕྱོགས་དང་འབྲེལ་བའི་རིག་གནས་ཐོག་ཕྱག་ལས་རྒྱ་ཆེ་གནང་བར་ཡི་རང་བསྔགས་བརྗོད་མཛད་འདུག དེ་བཞིན་༸གོང་ས་མཆོག་གིས་མགོན་པོ་༸གང་ཉིད་མཆོག་དང་སྐུ་ཞབས་ Desmond Tutu མཆོག་རྣམ་གཉིས་དབར་ད་ཆ་དགུང་ནའི་བབ་དང་བསྟུན་དངོས་སུ་མཇལ་འཕྲད་མཛད་རྒྱུ་ཁག་པོ་ཆགས་ཀྱི་ཡོད་ཀྱང་། ཆོས་ཕྱོགས་ཀྱི་ཆ་ནས་དུས་དང་རྣམ་པ་ཀུན་ཏུ་ཐུགས་ཉེ་པོ་མཛད་བཞིན་ཡོད་སྐོར་བཀའ་སྩལ་བ་དང་ཆབས་ཅིག་ཏུ་སྐུ་ཞབས་ཊུ་ཊུ་མཆོག་དགུང་གྲངས་བརྒྱ་ལྷག་བཞུགས་ནས་མུ་མཐུད་འགྲོ་བའི་བདེ་ཐབས་ལ་སྨན་པའི་ཕྱག་ལས་གནང་ཐུབ་པར་ཐུགས་སྨོན་མཚམས་སྦྱོར་མཛད་འདུགརྩ་བའི་ཆེས་མཐོའི་གཟེངས་རྟགས་འདི་ཨ་རིའི་གྲོང་ཁྱེར་ San Francisco ནང་རྟེན་གཞི་བྱས་པའི་འགྲོ་བ་མིའི་ཐོང་ཐང་ཐོག་ཕྱག་ལས་གནང་མཁན་གྱི་ལྟེ་གནས་ཆེ་གྲས་ Article3.org ཞེས་པས་ཕུལ་བ་ཞིག་ཆགས་ཀྱི་ཡོད་པ་དང་། ལྟེ་གནས་ཁང་དེའི་འགན་འཛིན་དང་གསར་འཛུགས་གནང་མཁན་ལྕམ་ Darian Swig ལགས་ཀྱིས་སྐུ་ཞབས་ Tutu མཆོག་ནི་བྱམས་བརྩེའི་ཐོག་ནས་འགྲོ་བ་མིའི་བདེ་དོན་ལ་ཐུགས་ཁུར་ཆེ་བཞེས་ཀྱིས་ཕྱག་ལས་གནང་མཁན་ཞིག་དང་། ཁོང་གིས་ད་བར་གནང་བའི་ཕྱག་ལས་མང་དག་ཅིག་གིས་མི་མང་དང་སྤྱི་ཚོགས་ཁྱོན་ལ་ཕན་འབྲས་རླབས་ཆེན་སོན་ཡོད་པ་སོགས་ལ་ཆེ་བསྟོད་ཞུས་འདུགཁ་སང་གཟེངས་རྟགས་འབུལ་བཞེས་ཀྱི་མཛད་སྟོན་དང་བསྟུན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ཟུར་པ་གསུམ་དང་གནད་ཡོད་མི་སྣ་སོགས་མཉམ་ཞུགས་ཀྱིས་འགྲོ་བ་མིའི་ཐོང་ཐང་གི་གནད་དོན་ཐོག་བགྲོ་གླེང་སོགས་གནང་ཡོད་པ་རེད།

ཁ་སང་ཕྱི་ཟླ་ ༡༢ ཚེས་ ༡༠ ཉིན་མོ་དེ་ནི་དེ་སྔ་ཕྱི་ལོ་ ༡༩༤༨ ལོའི་ཟླ་ ༡༢ ཚེས་ ༡༠ ཉིན་མཉམ་འབྲེལ་རྒྱལ་ཚོགས་ཀྱིས་རྒྱལ་སྤྱིའི་རང་བཞིན་ལྡན་པའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་གནང་སྟེ་མི་ལོ་ ༧༢ ཧྲིལ་པོ་འཁོར་བའི་ཉིན་མོ་དང་བསྟུན། ཁ་སང་སུད་སི་ལྟ་བུར་ཆ་མཚོན་ན་སུད་སི་དང་ལིག་ཏེན་སིཊཡན་བོད་རིགས་མི་མང་གི་གོ་སྒྲིག་འོག་ཁུལ་དེར་གནས་སྡོད་བོད་མི་དང་བོད་དོན་རྒྱབ་སྐྱོར་བ་བཅས་ནས་གྲོང་ཁྱེར་ཇི་ནི་ཝ་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་མདུན་ངོས་སུ་འདུ་འཛོམས་ཀྱིས་བོད་ཀྱི་རྒྱལ་དར་འཕྱར་ཞིང་། རྒྱ་གཞུང་གིས་བཙན་གནོན་འོག་བོད་ནང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མངོན་གསལ་གནང་བ་དང་སྦྲགས། རྒྱལ་ཚོགས་ཀྱི་ངོས་ནས་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་འབྲུ་དོན་ལྟར་དོན་འཁྱོལ་ལག་བསྟར་བྱེད་དགོས་པའི་འབོད་སྒྲའི་འོག་ཞི་བའི་སྐད་འབོད་ཀྱི་ལས་འགུལ་དང་རྒྱལ་ཚོགས་ལ་བོད་དོན་ཞུ་གཏུག་གི་ཞུ་སྙན་ཕུལ་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཐེངས་ ༧༢ སྲུང་བརྩི་ཞུས་སོང་། སྐབས་དེར་སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་རྒྱ་ནག་གཞུང་ནི་འཛམ་གླིང་ཐོག་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱལ་ཁབ་ཆེས་སྡུག་ཤོས་ཡིན་པ་རྒྱལ་སྤྱིའི་ཐོག་ཡོངས་གྲགས་ཆགས་ཡོད་པ་དང་། རྒྱ་གཞུང་དེ་སྟོབས་ཤུགས་ཇི་ཙམ་ཆེ་ཡང་༸གོང་ས་མཆོག་གིས་དབུ་ཁྲིད་པའི་བོད་མིའི་བདེ་དོན་གྱི་འཐབ་རྩོད་ཀྱི་ནུས་པ་དེ་དུས་ནམ་ཡང་བསུབ་ཐུབ་ཀྱི་མ་རེད་ཅེས་གསུངས་ཡོད། སྐབས་དེར་ལས་འགུལ་ཐོག་ཕེབས་པའི་སུད་སི་གྲོས་ཚོགས་འཐུས་མི་ཟུར་པ་སྐུ་ཞབས་ Rene Longel ལགས་ཀྱིས་བོད་དོན་འཐབ་རྩོད་ལ་རྒྱབ་སྐྱོར་གནང་བ་འབྲེལ་སླེབས་ལ་ཉེ་བའི་སུད་སི་དང་རྒྱ་ནག་དབར་གྱི་གསང་བའི་གྲོས་མཐུན་བསྐྱར་བཟོ་མཚམས་འཇོག་དགོས་པ་དང་། ཡིག་ཆ་མེད་པའི་སྐྱབས་བཅོལ་བོད་མི་ཚོ་སུད་སི་གཞུང་གིས་བདག་པོ་རྒྱབ་དགོས་པ། དེ་བཞིན་སུད་སི་གཞུང་གིས་རྒྱ་གཞུང་གི་གསང་མྱུལ་དོགས་ཟོན་བྱེད་དགོས་པ་སོགས་གསུངས་ཡོད་པ་རེད། ཡོ་རོབ་བོད་མི་མང་སྤྱི་འཐུས་ཟམ་མདོ་བྱམས་པ་ཚེ་རིང་ལགས་དང་སྤྱི་འཐུས་དབང་པོ་བཀྲས་མཐོང་ལགས་གཉིས་ཀྱིས་རྒྱ་ནག་གཞུང་ལ་བོད་ནང་དུ་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་མཐའ་གཅིག་ཏུ་ཡོད་པ་སོགས་གསུངས་ཏེ་རྒྱ་གཞུང་གི་བྱ་སྤྱོད་ལ་སྐྱོན་བརྗོད་གནང་སོང་།དེ་བཞིན་སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་གཙོ་ནོར་བུ་ལགས་དང་ས་གནས་བེུད་ཚོགས་པ། ཡོ་རོབ་གཞོན་ནུ་མཐུན་ཚོགས་བཅས་ཀྱི་སྐུ་ཚབ་ཚོས་ཀྱང་གཞིས་བཞུགས་བོད་མིའི་སྙིང་སྟོབས་དང་རྒྱ་ནག་གི་བཙན་གནོན་འོག་འདས་གྲོངས་སུ་གྱུར་བའི་བོད་མི་རྣམས་ལ་གདུང་སེམས་མཉམ་བསྐྱེད་དང་མྱ་ངན་གུས་བཏུད་ཞུས་པར་མ་ཟད། རྒྱལ་ཚོགས་གཙོས་པའི་རྒྱལ་སྤྱིའི་གཞུང་ཁག་ཚོས་རྒྱ་ནག་གི་བྱ་སྤྱོད་ཐོག་ཁུ་སིམ་མ་བཞུགས་པར་བོད་ཀྱི་བདེན་དོན་ལ་རྒྱབ་སྐྱོར་གྱིས་བཞེངས་གནང་ཡོང་བའི་གཏམ་བཤད་སོགས་སྤེལ་ཡོད། ཁ་སང་ཕྱི་དྲོ་སུད་སི་རྒྱལ་ས་སྦན་དུ་རྒྱལ་ཁབ་གཞན་གྱི་དབང་སྒྱུར་དང་བཙན་གནོན་འོག་ལྷུང་བའི་མང་ཚོགས་ཀྱི་ཐོབ་ཐང་སྲུང་སྐྱོབ་གནང་མཁན་ Society for threaten People ཚོགས་པའི་གོ་སྒྲིག་འོག་བོད་མི་དང་ཡུ་གུར་བ་བཅས་ནས་ད་བར་རྒྱ་ནག་དམར་པོའི་གཞུང་གིས་བཙན་གནོན་བཏང་བའི་མང་ཚོགས་ལ་གདུང་སེམས་མཉམ་བསྐྱེད་ཀྱི་སྒྲོན་མེའི་ལས་འགུལ་བརྒྱུད་ཉིན་མོ་དེ་སྲུང་བརྩི་ཡང་ཞུས་ཡོད་པ་རེད།དེ་མིན་ཁ་སང་གི་ཉིན་མོ་དེ་འཛམ་གླིང་འགྲོ་བ་མིའི་ཐོབ་ཐང་ཉིན་མོ་དང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་པར་གྲགས་པའི་ནོར་སྦེལ་ཞི་བདེའི་གཟེངས་རྟགས་འབུལ་བཞེས་བསྐྱངས་ནས་བགྲང་བྱ་ ༣༡ ཧྲིལ་པོ་འཁོར་བའི་དུས་ཚིགས་ཀྱང་ཆགས་ཡོད་པ་རེད། དེས་ན་ཡོ་རོབ་ཨོ་སི་ཀྲི་ཡ་དང་འཇར་མ་ནིར་བོད་དོན་ཞི་བའི་ལས་འགུལ་བ་དང་ཡོ་རོབ་རྒྱལ་ཁབ་ཕ་རན་སི་དང་དབྱིན་ཡུལ། ཨི་ཊ་ལི་བཅས་སོ་སོར་ད་ལྟའི་ས་གནས་ཀྱི་གནས་བབ་ལ་གཞིགས་པའི་སྨོན་ལམ་གསུང་འདོན་དང་། དྲ་ལམ་བརྒྱུད་དེ་༸གོང་ས་མཆོག་གི་མཛད་འཕྲིན་ལ་རྗེས་དྲན་གྱི་གླེང་མོལ་ལས་རིམ། རྩོམ་ཡིག་དང་རི་མོ་འགྲན་སྡུར། དེ་བཞིན་ས་གནས་བོད་མི་རྒན་གཞོན་དར་གསུམ་གྱིས་རང་ལུགས་ཟབ་སྦྱོར་ལེགས་པར་སྤྲས་ནས་མགོན་པོ་༸གང་ཉིད་མཆོག་ལ་བསྟོད་དབྱངས་དང་བསྟོད་ཚིགས་བཅས་ཕུལ་ཏེ་དགའ་སྐྱིད་དཔལ་ལ་རོལ་ནས་ཉིན་མོ་དེ་སྲུང་བརྩི་ཞུས་འདུག གཞན་ཡང་ཁེ་ན་ཌའི་གྲོང་ཁྱེར་ཆེ་གྲས་ Toronto ནང་ལ་མཚོན་ན་ཁུལ་དེར་རྟེན་གཞིབྱས་པའི་གངས་ལྗོངས་ཆོས་ལྡན་གླིང་གི་ཚོགས་ཁང་དུ་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་དྲན་དྲྭ་རྒྱ་བརྒྱུད་སྲུང་བརྩི་ཞུས་པ་དང་ས་གནས་བོད་རིགས་གཞོན་སྐྱེས་ཚོར་༸རྒྱལ་བའི་ཕྱག་དེབ་ཁག་དང་གཟེངས་རྟགས་གང་བཞེས་པ་རྣམས་ཀྱི་སྐོར་ངོ་སྤྲོད་ཀྱང་གནང་འདུག དེ་བཞིན་ California ནང་བོད་མི་དང་བླངས་པ་ཁག་ཅིག་ནས་ཁུལ་དེའི་ནང་གི་ Homeless People འམ་ཉམ་ཐག་སྡོད་ཁྱིམ་མེད་པའི་མི་མང་རྣམས་ལ་ཟས་གོས་དང་ཉལ་ཆས་སོགས་ཀྱི་རོགས་རོལ་རྒྱ་ཆེ་གནང་སྟེ་དུས་ཁྱད་དེ་སྲུང་བརྩི་ཞུས་འདུག རྒྱ་གར་གྱི་རྒྱལ་ས་ལྡི་ལིར་མཚོན་ན་འཕགས་བོད་མཛའ་འབྲེལ་ཚོགས་པས་ཁ་སང་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་རྒྱ་གཞུང་གི་བཙན་གནོན་འོག་མི་སྤྱོད་ལས་འདས་པའི་ངལ་བ་མྱོང་བཞིན་པའི་གཞིས་ལུས་བོདམི་དག་ལ་གདུང་སེམས་མཉམ་བསྐྱེད་ཞུ་ཕྱིར་ལྡི་ལིའི་ Raagjatt ནས་བོད་སྒར་བསམ་ཡས་གླིང་བར་སྦག་སྦག་སྐོར་སྐྱོད་ཀྱིས་ལས་འགུལ་སྤེལ་འདུག་པར་མ་ཟད། ལས་འགུལ་ནང་འཕགས་བོད་མཛའ་འབྲེལ་ཚོགས་པའི་ཚོགས་མི་གཙོས་ས་གནས་བོད་མི་ཁྱོན་མི་གྲངས་ ༢༠༠ ཙམ་གྱིས་མཉམ་ཞུགས་གནང་འདུག

དགའ་ལྡན་བྱང་རྩེ་ཏྲེ་ཧོར་ཁང་ཚན་གྱི་དགེ་བཤེས་བསྟན་པ་དར་རྒྱས་ལགས་ཉེ་ཆར་དགོངས་པ་རྫོགས་ནས་ཉིན་གྲངས་བཅུ་དགུ་ལྷག་སོང་ཡང་སྐུ་ཕུང་ལ་དྲི་མ་སོགས་གང་ཡང་མེད་པར་ཐུགས་དམ་ལ་བཞུགས་མུས་རེད་འདུགརྒྱ་གར་ལྷོ་ཕྱོགས་སུ་རྟེན་གཞིར་བྱས་པའི་བྱེས་ཀྱི་གདན་ས་དགའ་ལྡན་བྱང་རྩེའི་ཏྲེ་ཧོར་ཁང་ཚན་གྱིས་ཁ་སང་དགའ་ལྡན་ལྔ་མཆོད་དང་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་ཁྱད་དང་བསྟུན་དགེ་བཤེས་དམ་པ་ཁོང་གི་ཐོས་དོན་སྒྲུབ་ལ་གཞོལ་བའི་ཉམས་རྟོགས་ལ་ཡིད་སྨོན་གྱིས་རྗེས་དྲན་ཞུས་པའི་ཡོངས་ཁྱབ་སྤྱི་བསྒྲགས་ཤིག་སྤེལ་བའི་ནང་། དགེ་བཤེས་བསྟན་པ་དར་རྒྱས་ལགས་ཉེ་ཆར་དགོངས་པ་རྫོགས་ནས་ཉིན་གྲངས་བཅུ་དགུ་ལྷག་སོང་ཡང་སྐུ་ཕུང་ལ་དྲི་མ་སོགས་གང་ཡང་མེད་པར་ཐུགས་དམ་ལ་བཞུགས་མུས་ཡིན་པ་བཀོད་འདུག དགེ་བཤེས་ལགས་དམ་པ་ཁོང་ནི་མཚན་དང་སྙན་གྲགས་ཀྱི་ཁྱབ་པ་དེ་ཙམ་མིན་ཡང་རྣམ་ཀུན་ནས་གཞན་དང་ལྷན་དུ་དོན་མེད་གྲོགས་འདྲིས་གཏན་ནས་མི་བྱ་བར་ཉིན་གང་པོར་ཞལ་འདོན་དང་སྒོམ་སྒྲུབ་སོགས་ཀྱི་ཉམས་ལེན་ཁོ་ནའི་དུས་ཚོད་འདའ་བར་བྱེད་ཀྱི་ཡོད་པ་མ་ཟད། དམ་པ་ཁོང་གི་སྒོམ་སྒྲུབ་ཉམས་ལེན་དང་ཞལ་འདོན་བྱ་རྒྱུ་དེ་ཡང་ཉིན་རེ་དང་ཟླ་རེ་ཙམ་མིན་པར་རྒྱུན་བསྲིང་ནས་ལོ་ངོ་བཅུ་ཕྲག་མང་པོར་ཉིན་མ་གཅིག་ལྟ་བུ་གནང་གི་ཡོད་པ་བཀོད་འདུག

གཟའ་འཁོར་འདིའི་ནང་བཙན་བྱོལ་བོད་མིའི་འདུ་སྡོད་ཁྲོད་ཏོག་དབྱིབས་གཉན་རིམས་ཕོག་པ་བོད་མི་ ༥༥ བྱུང་ཡོད་པ་དང་དེའི་ཁྲོད་ནས་བོད་མི་ ༡༥ ཐམ་པ་དྷ་རྨ་ས་ལའི་མེག་ལོཊ་ཁུལ་ནས་ཆགས་ཀྱི་འདུག་པར་བརྟེན་ Containment zone ཞེས་བཀག་སྐྱིལ་ས་ཁུལ་ལ་ངོས་འཛིན་གྱིས་ཟ་ཚོང་མགྲོན་གསུམ་གྱི་ལས་མི་གཙོས་པའི་གང་ཟག་སུ་དང་སུ་ཡར་མར་འགྲོ་གནང་གི་ཡོད་མེད་ལ་ཞིབ་དཔྱད་ཀྱིས་དམ་དྲག་གནང་བཞིན་འདུགཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༧ སྤེལ་སྐབས་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་རྒྱ་གར་ནང་གི་བོད་མིའི་འདུ་སྡོད་ས་ཁུལ་ཁག་ཏུ་བོད་མི་ ༥༥ ལ་ཏོག་དབྱིབས་གཉན་རིམས་ཕོག་ཡོད་པ་གསུང་སོང་། དེའི་ཁྲོད་ནས་ལོ་ན་རྒན་ཤོས་དེ་ ༨༩ དང་ལོ་ན་ཆུང་ཤོས་དེ་ ༤ བཅས་ཆགས་ཀྱི་འདུག་པ་དང་། ནད་ཡམས་དེའི་རྐྱེན་གྱིས་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་མན་ཌི་རྫོང་ཁོངས་མཚོ་པདྨ་ནས་སྐྱེས་པ་རང་ལོ་ ༥༦ སོན་པ་གཅིག་འདས་གྲོངས་སུ་གྱུར་འདུག གསར་འགོད་ལྷན་ཚོགས་ཐོག་སྨན་པ་ཚེ་རིང་མཚམས་གཅོད་ལགས་ཀྱིས་ད་བར་རྒྱ་གར་ནང་ཏོག་དབྱིབས་གཉན་རིམས་ཕོག་པའི་རྐྱེན་གྱིས་བོད་མི་སུམ་ཅུ་སོ་ལྔ་འདས་གྲོངས་སུ་གྱུར་ཡོད་སྟབས་དེ་དག་གི་ནང་མིས་གཙོས་པའི་དགའ་གཉེན་ཡོངས་ལ་གདུང་སེམས་མཉམ་བསྐྱེད་ཞུས་པ་དང་སྦྲགས། བོད་མི་ཚོའི་གནས་ཡུལ་རྒྱ་གར་གཞུང་གིས་སྒོ་རྒྱ་དམ་དྲག་ལྷོད་ཡངས་ཀྱི་བཀའ་རྒྱ་གནང་ཟིན་ཀྱང་། བོད་མི་ཚོའི་ངོས་ནས་སྔོན་འགོག་སོགས་ཀྱི་གནང་སྒོ་ཁག་ལ་ཐུགས་སྣང་དང་ལྷག་དོན་སྤྱི་ཚོགས་རྐྱང་བཀྱེད་དང་ཁ་རས་གྱོན་རྒྱུ་མཚོན་པའི་སྔོན་འགོག་གི་ཐབས་ལམ་ཁག་ལ་ལྷོད་ཡེངས་མེད་པར་ཐུགས་གཟབ་གནང་དགོས་པའི་ཐུགས་སྣང་གཞེན་སྐུལ་གྱི་ལམ་སྟོན་གནང་ཡོད་པ་རེད། དེ་བཞིན་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ད་ལྟའི་ཆར་ཧི་མཱ་ཅལ་མངའ་སྡེའི་ཉེན་རྟོག་ལས་ཁུངས་ཀྱིས་མེག་ལོཊ་གསུམ་མདོ་ནས་སྒྲོལ་མ་སྨན་ཁང་བར་དུ་ containment zone ཞེས་བཀག་སྐྱིལ་ས་ཁུལ་ལ་ངོས་འཛིན་གྱིས་ཁུལ་དེར་ཡོད་ཟ་ཚོང་མགྲོན་གསུམ་གྱི་ལས་མི་གཙོས་གང་ཟག་གཞན་སུ་དང་སུ་ཡར་མར་འགྲོ་མིན་ལ་ཞིབ་དཔྱད་གནང་གི་ཡོད་པ་དང་། དེ་བཞིན་མེག་ལོཊ་གཡས་གཡོན་གྱི་ས་ཚིགས་ལ་ Buffer zone ཞེས་ནད་ཡམས་ཁྱབ་གདལ་ཆེ་ཁུལ་ལ་རྩིས་ནས་དམ་དོན་གནང་གི་ཡོད་སྟབས། ཁུལ་དེར་གནས་བཞུགས་བོད་མི་ཚོས་ས་གནས་བདེ་དོན་ལས་ཁུངས་ཀྱིས་གོ་སྒྲིག་ཞུས་པའི་སྨན་ཞབས་པའི་ཞལ་པར་ཨ་གྲངས་ ༨༤༤༨༤༡༥༦༣༡ ཡིན་པ་དང་ཞལ་པར་དེའི་ཐོག་ནད་རྟགས་གང་ཐོན་འཕྲིན་ཐུང་བརྒྱུད་ནས་འབྲེལ་ལམ་ཞུ་གལ་ཆེ་བ་དང་ལོ་ན་རྒན་པོ་ཚོས་ཐད་ཀར་ཞལ་པར་གནང་ཆོག་གི་ཡོད་སྐོར་སོགས་གསུངས་སོང་། དེའི་བར་ན་དེ་རིང་དྷ་ས་ས་གནས་འགོ་འཛིན་ལས་ཁུངས་ཀྱིས་ཀྱང་མེག་ལོཊ་ཁུལ་དུ་གཉན་རིམས་ཕོག་མཁན་གྱི་གྲངས་འབོར་དེ་ཇེ་མང་དུ་འགྲོ་བཞིན་ཡོད་པར་བརྟེན་དང་བླངས་ཀྱི་སྨན་ཞབས་པ་ཉེར་མཁོ་ཆེ་བའི་འབོད་སྐུལ་གྱི་གསལ་བརྡ་ཞིག་གནང་འདུག གཞི་རྩའི་རྒྱ་བལ་གཉིས་སུ་ཆགས་པའི་བཙན་བྱོལ་བོད་མིའི་སྤྱི་ཚོགས་ཁྲོད་ད་བར་བོད་མི་ཁྱོན་ ༡༣༧༦ ལ་ Covid-19 འམ་ཏོག་དབྱིབས་གཉན་རིམས་ཕོག་དེ་ཡོད་པ་དང་དེའི་ཁོངས་ནས་དྲག་སྐྱེད་བྱུང་བ་ ༡༡༩༧  དང་ ༣༥ འདས་གྲོངས། དེ་བཞིན་ད་ལྟའི་ཆར་ནད་ཀྱིས་མནར་བཞིན་པ་ ༡༤༤ ཆགས་ཡོད་པ་རེད།

དེ་རིང་བོད་ཟླ་བཅུ་པའི་ཚེས་༢༥ ཕྱི་ཟླ་༡༢་ཚེས་༡༠ སྟེ་དགའ་ལྡན་ལྔ་མཆོད་ཉིན་མོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ་དང་ལམ་རིམ་བསྡུས་དོན་གྱི་བཀའ་ཆོས་བཀའ་དྲིན་སྩལ་བ་དང་འབྲེལ། བོད་ནང་གི་བོད་མི་ཚོས་༸གོང་ས་མཆོག་ལ་ཡིད་ཆེས་དང་དད་མོས་ལ་གཟིགས་པ་ཡིན་ན། མགོན་པོ་གང་ཉིད་ནི་བོད་རྒྱ་ཆེའི་མང་ཚོགས་ཀྱི་བླ་སྲོག་ལྟ་བུ་ཞིག་ཆགས་ཡོད་སྟབས་། གང་ཉིད་ནས་བོད་རྒྱ་ཆེའི་མང་ཚོགས་སླད་སྔར་གྱི་ལུང་བསྟན་བཞིན་དགུང་ལོ་བརྒྱ་དང་བཅུ་གྲངས་ཤིག་གི་བར་སྐུ་འཚོ་བཞུགས་མཛད་རྒྱུའི་ཐུགས་སྨོན་མཛད་བཞིན་ཡོད་ཅེས་བཀའ་གནང་སོང་།

དེ་རིང་སྔ་དྲོ་ཕྱག་ཚོད་བཅུ་དང་ཕྱེད་ཀའི་སྟེང་། གངས་སྐྱིད་སྲིད་སྐྱོང་ཚོགས་ཁང་དུ་བཀའ་སྤྱི་གཉིས་ཀྱིས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་ལ་འཛམ་གླིང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་འབུལ་བཞེས་ཀྱི་རྗེས་དྲན་དགའ་སྟོན་མཛད་སྒོ་ཐེངས་ ༣༡ པ་སྲུང་བརྩི་ཞུས་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་བརྒྱུད་འགྲོ་བ་མིའི་འཚོ་རྟེན་དུ་བྱམས་བརྩེའི་དགོས་མཁོ་ཞེས་པའི་བགྲོ་གླེང་གི་ཚོགས་མགོན་དུ་དབུ་བཞུགས་ཀྱིས་བདེ་སྐྱིད་ལྡན་པའི་མི་ཚེ་ཇི་ལྟར་སྐྱེལ་དགོས་པའི་བཀའ་སློབ་བཀྲིན་སྩལ་སོང་།ཨེ་མོ་རི་གཙུག་ལག་ལག་སློབ་གཉེར་ཁང་གི་ནང་ཚན་རྟོག་དཔྱོད་རིག་པ་དང་བྱམས་བརྩེ་ལ་བརྟེན་པའི་བཟང་སྤྱོད་ཀྱི་བསྟི་གནས་ཞེས་པའི་ཚོགས་པས་ཇི་ལྟར་གསོལ་བ་བཏབ་པ་ལྟར། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་ Rob and Melani Walton Foundation ཞེས་པའི་དགེ་རྩ་ཚོགས་པའི་ལྕམ་ Melani Walton ལགས་དང་། CNN ཡི་སྨན་རྫས་སྐོར་གྱི་གསར་འགོད་པ་གཙོ་གྲས་ Sanjay Gupta ལགས་གཉིས་དང་ལྷན་དུ་གོང་ཞུས་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་དང་། སྐབས་དེར་ Emory གཙུག་ལག་མཐོ་སློབ་ཀྱི་འགན་འཛིན་གསར་པས་མགོན་པོ་༸གང་ཉིད་མཆོག་གིས་བླང་དོར་གྱི་བཀའ་སློབ་བཀྲིན་སྩོལ་རྒྱུར་བཀའ་བཞེས་བཟང་པོ་སྨིན་སྩལ་ཐོབ་པར་ཐུགས་རྗེ་ཆེ་ཞུ་དང་དགའ་བསུའི་འཚམས་འདྲི་ཞུས་པ་དང་སྦྲགས། མཐོ་སློབ་དེས་ད་བར་བྱམས་བརྩེ་ལ་བརྟེན་པའི་བཟང་སྤྱོད་ཀྱི་ལས་དོན་གང་དག་སྤེལ་བ་ངོ་སྤྲོད་སྙན་སེང་ཞུས་ཡོད།Rob and Melani Walton དགེ་རྩ་ཚོགས་པའི་ལྕམ་ Melani Walton ལགས་ཀྱིས་དེ་རིང་དྲྭ་ཐོག་གི་བཀའ་སློབ་དང་བཀའ་འདྲི་དགོངས་སྐོར་གྱི་ལས་རིམ་གཙོ་སྐྱོང་གནང་བ་དང་སྦྲགས་ཏེ་དང་ཐོག་དེར་ད་ལྟའི་གཉན་འཕྲང་ཅན་གྱི་དུས་སུ་ང་ཚོའི་ངོས་ནས་དཀའ་ངལ་ཁག་ལ་བྱམས་བརྩེའི་ཐོག་ནས་གདོང་ལེན་ཇི་ལྟར་གནང་དགོས་སམ་ཞེས་བཀའ་འདྲི་དགོངས་སྐོར་ཞུས་པར་མགོན་པོ་༸གང་ཉིད་མཆོག་གིས་དེང་གི་འཛམ་གླིང་ཐོག་འཕྲད་བཞིན་པའི་དཀའ་ངལ་མང་དག་ཅིག་ནི་བཟང་སྤྱོད་མ་འདང་བའི་དབང་གིས་ཡོང་གི་སྟབས། རང་གཅེས་འཛིན་དང་ཁོང་ཁྲོ་སོགས་སེམས་ཚོར་དྲག་པོའི་གཞན་དབང་དུ་སོང་བའི་འགྲོ་བ་གཞན་ལ་ལྷན་སྐྱེས་སུ་ཡོད་པའི་བྱམས་བརྩེའི་བསམ་པ་དང་། ཁྱད་པར་དུ་འགྲོ་བ་མི་གཅིག་གྱུར་གྱི་འདུ་ཤེས་དེ་དག་གོང་འཕེལ་གནང་ཚེ་མིའི་སྤྱི་ཚོགས་འདི་བདེ་སྐྱིད་དང་འདྲ་མཉམ་ལྡན་པ་ཞིག་སྐྲུན་ཐུབ་ངེས་ཡིན་པར་ཐུགས་རེ་ཡོད་ཅེས་བཀའ་སྩལ་སོང་།དེ་བཞིན་སྨན་རྫས་སྐོར་གྱི་གསར་འགོད་པ་ Gupta ལགས་ཀྱིས་ད་ཆ་རྒྱལ་སྤྱིའི་ཁྲོད་གཉན་རིམས་ཁྱབ་གདལ་འགྲོ་མུས་ཀྱི་དུས་འདིར་ང་ཚོ་ཁ་རས་གྱོན་ནས་ཕན་ཚུན་དབར་རྒྱང་བཀྱེད་གནང་དགོས་པའི་གནས་སྟངས་འོག་གཞན་ལ་བྱམས་བརྩེའི་རྣམ་པ་ཇི་ལྟར་སྟོན་ཐུབ་བམ་ཞེས་བཀའ་འདྲི་ཞུས་སྐབས་ འཛམ་གླིང་ཐོག་ཡོད་པའི་མི་ཙམ་མ་ཟད་འགྲོ་བ་ཀུན་ལ་ཆེ་ཆུང་ལ་མ་བལྟས་པར་ང་ཞེས་པའི་ངར་འཛིན་གྱི་བསམ་བློ་དེ་ཡོད་པ་གཅིག་མཚུངས་ཡིན་པ་དེ་ལྟར་ཡང་རང་གཅེས་འཛིན་གྱི་བསམ་བློ་ཇི་ཙམ་ཆེ་བ་དེ་ཚོད་ཀྱིས་རང་ཞེན་གྱི་བསམ་བློ་དང་ཞེད་སྣང་སོགས་ཆེ་བ་ཡོད་པ་རེད། དེས་ན་གཞན་གཅེས་འཛིན་གྱི་བསམ་བློར་འབད་དགོས་གལ་ཡིན་པར་ལམ་སྟོན་སྩལ་སོང་། ༸གོང་ས་མཆོག་གིས་ད་ལྟའི་མི་རབས་གཞོན་པ་རྣམས་ཀྱིས་གོ་ལའི་ཁོར་ཡུག་སྲུང་སྐྱོབ་སླད་འགན་འཁུར་བཞེས་ཕྱོགས་སྐོར་དང་འབྲེལ་བཀའ་སྩལ་བར་ད་ཆ་དངོས་སུ་ལག་བསྟར་གནང་བཞིན་པའི་ཤེས་ཡོན་སློབ་གསོ་ཁྲོད་མཐོང་ཆོས་སུ་ཡོད་པའི་ཕྱིའི་དངོས་པོ་གནད་དོན་ཙམ་ལས་འགྲོ་བ་མིའི་རང་བཞིན་ངོ་མ་བྱམས་སྙིང་རྗེ་དང་འབྲེལ་བའི་བཟང་སྤྱོད་ཀྱི་རིན་ཐང་སྐོར་ཞན་པོ་ཆགས་ཀྱི་ཡོད་སྟབས། ང་ཚོས་ཤེས་ཡོན་སློབ་གསོ་ཁྲོད་དེ་དང་འབྲེལ་བའི་སློབ་ཁྲིད་གནང་དགོས་ཞེས་ལམ་སྟོན་བཀྲིན་ཆེ་བ་སྩལ་ཡོད། ལྷག་དོན་མགོན་པོ་༸གང་ཉིད་མཆོག་གིས་ཆོས་ལུགས་ཚང་མའི་བསླབ་བྱ་གཅིག་མཚུངས་ཡིན་སྐོར་དང་འབྲེལ། ༸གང་ཉིད་མཆོག་༸སྐུ་འཚོ་བཞུགས་རིང་འཛམ་གླིང་འདི་བདེ་སྐྱིད་དང་ལྡན་པ་ཞིག་དང་ཞི་བདེ་ཅན་ཞིག་ཡོང་ཐབས་སུ་མུ་མཐུད་ཞབས་འདེགས་ཞུ་ཐུབ་པའི་ཐུགས་རེ་ཡོད་པས་གྲོགས་ཕོ་མོ་ཚོས་ཀྱང་དེ་ལྟར་ཡོང་བར་འབད་དགོས་ཞེས་བཀའ་སྩལ་སོང་།