Uncategorized

དབྱིན་ཡུལ་ནང་གི་ CIRCA ཞེས་རིག་གཞུང་དང་དེང་དུས་སྒྱུ་རྩལ་གྱི་ལྟེ་གནས་ཁང་གིས་དེ་རིང་ཕྱི་དྲོ་རྒྱལ་ཁབ་དྲུག་ནང་གི་མང་ཚོགས་འདུ་འཛོམས་ཆེ་བའི་གྲོང་ཁྱེར་དྲུག་ནང་གི་བརྡ་ཁྱབ་བྱང་བུ་འདྲ་མིན་སྟེང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་ཐུགས་རེའི་བརྡ་ལན་ཞིག་འདོན་སྤེལ་དང་སྦྲགས་ཏེ་ལྟེ་གནས་ཁང་གི་ཕྱི་ལོ་ ༢༠༢༣ ལོའི་ལས་གཞི་དབུ་འབྱེད་གནང་རྒྱུ་རེད་འདུག The Cultural Institute of  Radical Contemporary Arts  འམ་ CIRCA ཞེས་པའི་ལྟེ་གནས་ཁང་དེས་ཕྱི་ལོ་ ༢༠༢༠ ལོར་དབྱིན་ཡུལ་གྱི་རྒྱལ་ས་ London ནང་གི་ Piccadilly lights ཞེས་པའི་ཆེས་སྙན་གྲགས་ཆེ་བའི་ས་ཚིགས་ནས་དབུ་འཛུགས་གནང་སྟེ་རྒྱལ་སྤྱིའི་གྲོང་ཁྱེར་ཆེ་གྲས་དུ་མར་ཉིན་ལྟར་ཕྱི་དྲོ་ཚོུད་ ༨༌༢༣ ཐོག་བྱང་བུའི་སྟེང་གི་ཁྱབ་བསྒྲགས་ཇི་ཡོད་སྐར་མ་གསུམ་རིང་བཀག་ནས་དེའི་ཐོག སྤྱི་ཚོགས་ལ་སྨན་པའི་བརྗོད་གཞི་སྣ་མང་ལྡན་པའི་འབྲེལ་ཡོད་བརྡ་ཁྱབ་སོགས་ཁྱབ་སྤེལ་ དབུ་འཛུགས་གནང་ཡོད་པ་རེད། བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། ལྟེ་གནས་ཁང་དེས་ Tibet Hope Centre དང་མཉམ་འབྲེལ་ཐོག་དེ་རིང་དབྱིན་ཡུལ་ནང་གི་ཕྱི་དྲོ་ཚོུད་ ༨༌༢༣ ཐོག ༸གོང་ས་~སྐྱབས་མགོན་ཆེན་པོ་མཆོག་གིས་འཛམ་གླིང་ཁྱོན་ལ་ཐུགས་རེ་དང་འགྲོ་བ་མི་གཅིག་གྱུར་གྱི་འདུ་ཤེས་ཐོག་དགོངས་པ་བཞེས་དགོས་གལ་གྱི་ལམ་སྟོན་སྩལ་བའི་ Art of Hope ཞེས་པའི་སྐར་མ་གསུམ་ཅན་གྱི་འགུལ་རིས་བརྙན་ཐུང་གསར་བསྐྲུན་ཞུས་པ་ཞིག་འདོན་སྤེལ་གནང་གི་ཡོད་པ་དང་། དེའང་ཟླ་བ་གཅིག་རིང་ཨ་རིའི་ Los Angeles དང་འཇར་མ་ནིའི་རྒྱལ་ས་ Berlin དེ་ཨོ་སི་ཊོ་ལི་ཡའི་གྲོང་ཁྱེར་ Melbourne  གཞན་ཡང་ཨི་ཊ་ལིའི་མི་ལཱན་གྲོང་ཁྱེར། ཀོ་རི་ཡའི་རྒྱལ་ས་ Seoul བཅས་སུ་ཉིན་བརྒྱ་དུས་གཅིག་ལ་གཟིགས་འབུལ་གནང་གི་འདུག མགོན་པོ་༸གང་ཉིད་མཆོག་གིས་ཐུགས་རེའི་བརྡ་ལན་དེ་དང་བསྟུན་གསུང་འཕྲིན་ཞིག་སྩལ་བའི་ནང་འགྲོ་བ་མི་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་ཡིན་པ་ཡིད་ལ་དྲན་པའི་ཐོག་ནས་ཚང་མས་མུ་མཐུད་དེ་འགྲོ་བ་མི་གཅིག་གྱུར་གྱི་འདུ་ཤེས་ཐོག་དགོངས་པ་བཞེས་དགོས་གལ་ཡིན་པར་མ་ཟད་ལྷག་དོན་ང་ཚོ་དཀའ་ངལ་དང་ཛ་དྲག་གང་འདྲ་ཞིག་གི་ནང་དུ་ལྷུང་ཡང་བསམ་བློ་རྒྱ་ཆེ་ས་ནས་བཏང་ནས་རང་ཉིད་ལ་གདེང་སྤོབས་ཆེན་པོས་དུས་ནམ་ཡང་རེ་བ་བརླག་རྒྱུ་མེད་ཅེས་སོགས་ལམ་སྟོན་མཛད་འདུག CIRCA ལྟེ་གནས་ཁང་གི་སྒྱུ་རྩལ་འགན་འཛིན་སྐུ་ཞབས་ Josef O'Connor ལགས་ཀྱིས་ལྟེ་གནས་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་དེ་འབྲེལ་ལས་གཞི་དབུ་འབྱེད་གནང་རྒྱུ་བྱུང་བ་ནི་སྐལ་པ་བཟང་པོ་ཞིག་ལ་ངོས་འཛིན་གནང་གི་ཡོད་ཅེས་དང་ལྟེ་གནས་ཁང་གི་ངོས་ནས་འདི་ལོ་རང་ཉིད་ཀྱི་དམིགས་ཡུལ་ལྟར་རེ་བའི་གཞི་རྩར་ངོས་འཛིན་གནང་སྟེ་དངོས་སུ་ལག་བསྟར་ཐུབ་པར་སྐུལ་འདེད་གཏོང་ཐུབ་པའི་ཡིད་ཆེས་ཡོད་ཅེས་གསུངས་འདུགཤེས་རྟོགས་བྱུང་བར་དེ་རིང་ཕྱི་དྲོ་དབྱིན་ཡུལ་གྱི་རྒྱལ་ས་ལོན་ཊོན་ནང་གི་ Piccadally Circus ཞེས་པའི་ས་ཚིགས་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རེའི་བརྡ་ལན་ཡོད་པའི་བརྙན་ཐུང་དབུ་འབྱེད་གནང་སྐབས་ས་གནས་ཀྱི་བོད་མི་རྣམས་ཆེད་ཕེབས་ཀྱིས་ལས་གཞི་དེར་དགའ་བསུ་ཞུས་འདུག CIRCA ལྟེ་གནས་ཁང་གིས་ཕྱི་ལོ་ ༢༠༢༣ ལོའི་ལས་འཆར་དེའི་འོག་རྐང་རེ་བའི་ཕུགས་བསམ་དང་འབྲེལ་བའི་ལེ་ཚན་རིམ་པ་རྒྱང་བསྲིང་ཞུ་འཆར་ཡོད་པ་ལྟར་དེའི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་ཐུགས་རེའི་བརྙན་པར་དང་ལྷན་དྲ་ཐོག་འགྲེམས་སྟོན་དང་། ང་ཚོའི་རེ་བ་ཆེར་བསྐྱེད་གང་འདྲ་གནང་དགོས་མིན་སྐོར་གྱི་བཀའ་འདྲིར་མགོན་པོ་༸གང་ཉིད་མཆོག་གི་དགོངས་གཞི་དང་མང་ཚོགས་ཀྱི་བསམ་ཚུལ་བསྡུ་ལེན་གནང་བའི་ཕྱག་དེབ་འགྲེམས་སྤེལ་ཞུ་རྒྱུ་རེད་འདུགརྩ་བའི་ CIRCA ལྟེ་གནས་ཁང་ནི་དམིགས་ཡུལ་ངེས་ཅན་གྱི་སྤྱི་ཚོགས་དྲ་རྒྱའི་སྒྱུ་རྩལ་དང་རིག་གཞུང་གི་སྡིངས་ཆ་ཞིག་ཆགས་ཀྱི་ཡོད་པ་དང་འདིས་དེ་སྔོན་རྒྱ་ནག་དང་ལྟ་སྤྱོད་མི་མཐུན་མཁན་གྱི་སྒྱུ་རྩལ་བ་གྲགས་ཅན་ Ai Weiwei ལགས་གཙོས་ཨ་རི་དང་འཇར་མ་ནི། དབྱིན་ཡུལ། ཨི་རན་སོགས་ཀྱི་གློག་བརྙན་བཟོ་སྐྲུན་པ་དང་སྒྱུ་རྩལ་བ། དེ་བཞིན་གཞས་མ་དང་རི་མོ་བ་གྲགས་ཅན་སོགས་དང་ལྷན་དུ་ཕྱག་ལས་གནང་མྱོང་ཡོད་པ་རེད།

དེང་སྐབས་བཙན་བྱོལ་ནང་གི་བོད་པའི་སློབ་གྲྭ་ཁག་གི་དགུན་ཁའི་གུང་སེང་ཡིན་པ་དང་སྟབས་བསྟུན། བོད་པའི་གཞིས་ཆགས་གཙོས་པའི་བོད་མིའི་གནས་སྡོད་ས་ཁུལ་ཁག་གི་ནང་གཞི་རིམ་སློབ་ཕྲུག་རྣམས་ལ་ཆེད་དུ་དམིགས་ནས་ཟུར་ཁྲིད་སོགས་ཤེས་ཡོན་གོང་འཕེལ་གྱི་ལས་གཞི་སྣ་མང་ཞིག་སྤེལ་དང་སྤེལ་མུས་ཡིན་པའི་ཁྲོད། འདི་ག་རླུང་འཕྲིན་ནས་བཞུགས་སྒར་དུ་རྟེན་གཞི་བྱས་པའི་ཡོངས་གླིང་སློབ་གྲྭ་དང་དཔེ་སྟོན་སློབ་གྲྭའི་དགེ་རྒན་ཕ་མའི་ཚོགས་ཆུང་སོ་སོའི་གོ་སྒྲིག་འོག་སྔོན་འགྲོའི་འཛིན་གྲྭ་ནས་འཛིན་རིམ་ལྔ་པའི་བར་གྱི་བྱིས་པ་དེ་དག་ལ་དགུན་དུས་ཟུར་ཁྲིད་ཀྱི་ལས་གཞི་སྐྱོང་བཞིན་ཡོད་པར་བརྟེན། ཡོངས་གླིང་སློབ་གྲྭའི་དྲུང་ཡིག་བྱང་ཆུབ་དཔལ་མོ་ལགས་དང་། དཔེ་སྟོན་སློབ་གྲྭའི་དགེ་རྒན་ཕ་མའི་ཚོགས་ཆུང་གི་སྨན་རྩིས་ཁང་ཁུལ་གྱི་འཐུས་མི་སྨན་པ་ཨོ་ཤོ་བསོད་ནམས་སྒྲོལ་དཀར་ལགས་རྣམ་པ་གཉིས་དང་ལྷན་དུ་དེ་འབྲེལ་བཅར་འདྲི་ཞུས་པའི་ཆེད་སྒྲིག་གི་ལས་རིམ་ཞིག་རྒྱང་སྲིང་ཞུས་ཡོད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡི་ཤུའི་བླ་ཆེན་ཟུར་པ་ Pope Benedict པོབ་བྷེ་ནི་ཌིག་ཊི་མཆོག་ཕྱི་ལོ་ ༢༠༢༢ ཟླ་ ༡༢ ཚེས་ ༣༡ ཉིན་དགུང་གྲངས་ ༩༥ ཐོག་སྐུ་ཚེའི་འཕེན་པ་རྫོགས་པར་ཐུགས་གསོ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་ ༡ ཉིན་གནས་མཆོག་རྡོ་རྗེ་གདན་ནས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཡི་ཤུའི་རྣམ་དག་ཆོས་ལུགས་ཀྱི་ཆོས་སྡེའི་ཆེན་པོའི་གཞུང་ཚབ་ Apostolic Nunciature ལ་ཡི་ཤུའི་བླ་ཆེན་ཟུར་པ་པོབ་བྷེ་ནི་ཌིག་ཊི་མཆོག་སྐུ་ཚེའི་འཕེན་པ་རྫོགས་པར་ཐུགས་གསོའི་གསུང་འཕྲིན་སྩལ་བའི་ནང་། མགོན་པོ་༸གང་ཉིད་མཆོག་གིས་ཆོས་གྲོགས་བླ་ཆེན་ཟུར་པ་པོབ་བྷེ་ནི་ཌིག་ཊི་མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་ཐོས་འཕྲལ་ཐུགས་ཕམ་ཆེན་པོ་བྱུང་བ་དང་སྦྲགས། དམ་པ་དེ་ཉིད་ཀྱི་སླད་ཐུགས་སྨོན་གསོལ་འདེབས་དང་ལྷན་ཡི་ཤུའི་རྣམ་དག་ཆོས་ལུགས་ཀྱི་རྗེས་འབྲང་པ་ཡོངས་ལ་ཐུགས་གསོ་མཛད་འདུག མགོན་པོ་༸གང་ཉིད་མཆོག་ནས་དེ་སྔ་བླ་ཆེན་དམ་པ་ཁོང་དང་དངོས་སུ་མཇལ་འཕྲད་གནང་ཡོད་པར་ཐུགས་དྲན་གསོ་དང་སྦྲགས། སྐབས་དེའི་མཇལ་འཕྲད་ཐོག་མགོན་པོ་༸གང་ཉིད་མཆོག་དང་དམ་པ་ཁོང་གི་དབར་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབ་བཅས་ཀྱི་ཐོག་དགོངས་པ་གཅིག་མཚུངས་ཡོད་པ་མཁྱེན་རྟོགས་བྱུང་ཞེས་བཀའ་སྩལ་བ་མ་ཟད། དེ་སྔ་པོབ་བྷེ་ནི་ཌིག་ཊི་དམ་པ་ཁོང་སྐུ་འཚོ་བཞུགས་སྐབས་ཀྱི་ལས་ཡུན་ཁྲོད་གལ་ཆེའི་གནད་དོན་འདི་དག་གོང་སྤེལ་སླད་སྐུ་ལས་བསྐྱོན་ཡོད་པར་སྐུ་ཚེ་དོན་ལྡན་ཞིག་བསྐྱལ་ཡོད་པར་བཀའ་སྩལ་འདུག གསུང་འཕྲིན་དེའི་ནང་ད་དུང་༸གོང་ས་མཆོག་གིས་འདས་པའི་ལོ་ངོ་བཅུ་ཕྲག་མང་པོའི་རིང་ཡི་ཤུའི་རྣམ་དག་ཆོས་ལུགས་ཀྱི་ཚོགས་མི་ལྷན་གྲོས་མོལ་གྱིས་ཉམས་མྱོང་སྤེལ་རེས་མཛད་དེ་ཕན་ཚུན་དབར་ཆོས་ལུགས་ཀྱི་མཁྱེན་རྟོགས་གོང་སྤེལ་གྱིས་ཕན་ཐོགས་ངེས་ཅན་ཞིག་བྱུང་ཡོད་པར་ཐུགས་རེ་མཛད་ཀྱི་ཡོད་ཅེས་བཀའ་སྩལ་དང་འབྲེལ། ལྷག་དོན་མགོན་པོ་༸གང་ཉིད་མཆོག་གིས་དེང་སྐབས་འཛམ་གླིང་གི་ས་ཁུལ་ཁ་ཤས་ནང་མི་མཐུན་པའི་འགལ་ཟླ་ཆེ་རུ་འགྲོ་བཞིན་པའི་དུས་སྐབས་འདིར་ང་ཚོས་དམ་པ་ཁོང་གི་༸སྐུ་ཚེའི་མཛད་འཕྲིན་ལས་སློབ་དགེ་བླངས་ཏེ་འཛམ་གླིང་འདི་ཞི་བདེ་དང་ཆོས་ལུགས་ཕན་ཚུན་མཐུན་སྒྲིལ་གནང་དགོས་གལ་ཡིན་པ་གསུངས་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་དང་བླ་ཆེན་དམ་པ་པོབ་བྷེ་ནི་ཌིག་ཊི་རྣམ་གཉིས་དེ་སྔ་ཕྱི་ལོ་ ༢༠༠༩ ལོར་ཡི་ཤུའི་གདན་ས་ Vatican ཝེ་ཊི་ཀན་ནང་དུ་ཡོངས་གྲགས་མིན་པའི་ཐོག་ནས་མཇལ་འཕྲད་མཛད་ཡོད་པ་དང་སྐབས་དེའི་མཇལ་མོལ་ནི་ཆོས་ཕྱོགས་ཀྱི་རང་བཞིན་ཙམ་ལས་མཇལ་འཕྲད་ཀྱི་མཛད་འཆར་འདི་ཉིད་བླ་ཆེན་དམ་པ་ཁོང་གི་གཞུང་འབྲེལ་མཛད་འཆར་ནང་དུའང་བཀོད་མེད་པ་རེད། དེ་བཞིན་མགོན་པོ་༸གང་ཉིད་མཆོག་ནས་དེ་སྔ་ཝེ་ཊི་ཀན་ནང་ཆིབས་བསྒྱུར་གྱིས་ཡི་ཤུའི་ཆོས་དཔོན་ Pope John Paul པོབ་ཇོན་པོལ་མཆོག་དང་མཇལ་འཕྲད་མཛད་ཡོད་པ་དེའང་ཡོངས་གྲགས་མིན་པ་ཞིག་ཡིན་པ་རེད།  

དེ་རིང་གནས་མཆོག་རྡོ་རྗེ་གདན་གྱི་ཆོས་འབྲེལ་ཉིན་གཉིས་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་འཕྲོ་སྐྱོང་མཛད་པ་དང་། སྐབས་དེར་མགོན་པོ་༸གང་ཉིད་མཆོག་གིས་ནད་ཡམས་ཀྱི་འཇིགས་པ་ཟློག་ཐབས་སུ་ཐུགས་སྨོན་མཛད་པ་མ་ཟད། ཆོས་ཞུ་བ་ཚོས་གནས་དེ་ནས་ཕྱིར་ལོག་རྗེས་རང་ཉིད་ཀྱི་མི་ཚེའི་ནང་བཟང་ཕྱོགས་ཀྱི་འགྱུར་བ་ཞིག་ཡོང་ཐབས་གནང་དགོས་གལ་ཡིན་པ་ལམ་སྟོན་བཀྲིན་ཆེ་བ་སྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་བྱང་ཆུབ་སེམས་འགྲེལ་གྱི་བཀའ་ཆོས་དབུ་འཛུགས་མ་གནང་བའི་གོང་མགོན་པོ་༸གང་ཉིད་མཆོག་དེ་རིང་སླར་ཡང་གནས་ཁྱད་པར་ཅན་འདིར་ཆོས་འབྲེལ་མཛད་རྒྱུ་བྱུང་བར་སྐལ་པ་བཟང་པོ་བྱུང་ཞེས་བཀའ་སྩལ་དང་། དེ་བཞིན་མགོན་པོ་༸གང་ཉིད་མཆོག་དེ་སྔ་ཉི་ཧོང་གི་ཧི་རོ་ཤི་མར་ཆིབས་བསྒྱུར་མཛད་སྐབས་ཁུལ་དེར་རྡུལ་ཕྲན་མཚོན་ཆའི་རྐྱེན་ངན་འོག་མི་མང་ཁྲི་ཚོ་མང་པོ་རྐྱེན་འདས་སུ་ཕྱིན་པ་ཐུགས་ཕམ་ཧ་ཅང་བྱུང་སྟེ་ཐུགས་སྨོན་རྒྱ་ཆེར་མཛད་ཡོད་སྐོར་ཐུགས་དྲན་གསོ་དང་འབྲེལ། ད་ཆ་དམག་འཁྲུག་དང་མི་བསོད་ཁྲག་སྦྱོར་རིགས་མུ་མཐུད་ཡོང་གི་ཡོད་ཀྱང་། རྡུལ་ཕྲན་གྱི་འཇིགས་པ་བསྐྱར་ཟློས་ཡོང་གི་མེད་པ་མ་ཟད། ནད་ཡམས་ཀྱི་འཇིགས་པ་གསར་པ་ཞིག་ཡོང་གི་ཡོད་སྟབས། དེ་རིང་གནས་ཁྱད་པར་ཅན་དེར་ཆོས་ཞུ་བ་ཐོུང་ནས་ཐུགས་སྨོན་རྒྱ་གང་ཆེ་གནང་དགོས་གལ་ཡིན་པ་བཀའ་སྩལ་མཛད་ཡོད།༸གོང་ས་མཆོག་གིས་ད་དུང་གནས་མཆོག་འདིར་འདུ་འཛོམས་བྱུང་བའི་ཆོས་ཞུ་བ་ཚོས་ཉིན་རེ་བཞིན་དཔྱད་སྒོམ་དང་འཇོག་སྒོམ་ཟུང་སྦྲེལ་ཐོག་བྱང་ཆུབ་སེམས་དང་སྟོང་ཉིད་ཀྱི་ལྟ་བར་ཉམས་ལེན་གནང་ཚེ་ནུས་པ་དམིགས་བསལ་ཞིག་འདོན་རྒྱུ་ཡོད་པ་བཀའ་སྩལ་དང་འབྲེལ། ཆོས་ཞུ་བ་རྣམས་གནས་མཆོག་འདི་ནས་ཕྱིར་ལོག་རྗེས་རང་ཉིད་ཀྱི་མི་ཚེའི་ནང་ངེས་པར་དུ་བཟང་ཕྱོགས་ཀྱི་འགྱུར་བ་ཡོང་ཐབས་སླད་འབད་བརྩོན་བྱ་དགོས་གལ་ཡིན་པའི་ལམ་སྟོན་བཀྲིན་ཆེ་བ་སྩལ་གནང་མཛད་པ་དང་ཆབས་ཅིག མགོན་པོ་༸གང་ཉིད་མཆོག་གིས་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་འཕྲོ་སྐྱོང་མཛད་ཡོད།མཛད་འཆར་ལྟར་ན་སང་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞུ་བ་རྣམས་ལ་སྒྲོལ་མ་ཉེར་གཅིག་གི་རྗེས་གནང་བཀྲིན་སྩལ་རྒྱུ་ཡིན་པ་རེད།ཕྱོགས་མཚུངས་ད་ཆ་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆོས་འབྲེལ་གྱི་མཛད་འཕྲིན་ཁག་ཅིག་སྐྱོང་བཞིན་པ་དང་བསྟུན། དེ་རིང་ཉིན་རྒྱབ་བི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏེཤ་ཀུ་མཱར་མཆོག་གནས་མཆོག་རྡོ་རྗེ་གདན་གྱི་༸རྒྱལ་བའི་བཞུགས་གནས་སུ་ཆེད་ཕེབས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཏེ། གནས་མཆོག་རྡོ་རྗེ་གདན་གྱི་བྱང་ཆུབ་ཆེན་པོའི་མཆོད་རྟེན་རིན་པོ་ཆེར་གནས་གཟིགས་གནང་ཡོད།སྤྱི་ཁྱབ་བློན་ཆེན་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་གནས་གཟིགས་ཁག་གྲུབ་མཚམས་སུ་འདི་གའི་ཆེད་གཉེར་གསར་འགོད་པས་སྤྱི་ཁྱབ་བློན་ཆེན་མཆོག་ལ་བཀའ་འདྲི་ཞུ་སྐབས། ཁོང་གིས་ཏོག་དབྱིབས་རིམས་ནད་རྐྱེན་གྱིས་༸གོང་ས་༸སྐྱབས་མགོན་ཆེན་པོ་མཆོག་ལོ་གཉིས་རིང་གནས་མཆོག་རྡོ་རྗེ་གདན་དུ་ཆིབས་བསྒྱུར་མཛད་ཐུབ་མེད་པ་དང་། ཐེངས་འདིར་མགོན་པོ་༸གང་ཉིད་མཆོག་གནས་མཆོག་འདིར་ཆིབས་བསྒྱུར་མཛད་ཡོད་སྟབས་འཕྲལ་དུ་མཇལ་ཁར་བཅར་བ་དང་ལྷན། གནས་ཡངས་པ་ཅན་དུ་ནང་པའི་བསྟི་གནས་ཤིག་གསར་དུ་བཞེངས་བསྐྲུན་གནང་བཞིན་ཡོད་སྟབས། དེ་གྲུབ་མཚམས་སུ་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ཆིབས་བསྒྱུར་བཀའ་དྲིན་མཛད་རྒྱུའི་གསོལ་འདེབས་ཡང་ཞུས་ཡོད་སྐོར་འགྲེལ་བརྗོད་གནང་སོང་།

ཉན་པ།: Listen ཕབ་ལེན། Download ༸གོང་ས་མཆོག་གིས་བྱང་ཆུབ་ཆེན་པོའི་མཆོད་རྟེན་དུ་གནས་གཟིགས་མཛད་པ། རྒྱ་གཞུང་གིས་བོད་ཀྱི་གནད་དོན་དང་འབྲེལ་ཨ་རི་བ་གཉིས་ལ་སྲིད་དོན་གྱི་ཉེས་ཆད་འགེལ་བ། ལྕམ་སྐུ་པེ་ལོ་སི་མཆོག་གིས་གསར་ལྷན་མཐའ་མའི་ཐོག་༸གོང་ས་མཆོག་དང་མཇལ་འཕྲད་སྐོར་གསུངས་པ། བོད་ཀྱི་ཆབ་སྲིད་བཙོན་ཟུར་གྲྭ་ཨ་རྒྱལ་ཚེ་རིང་ལགས་དགོངས་པ་རྫོགས་འདུག བཙན་བྱོལ་བོད་མིའི་གནས་སྟངས། སྦེང་ལོར་བོད་ཁྱིམ་སྡོད་ཁང་གི་ངེས་སྟོན་པ་ཟུར་པ་རྒན་དོན་གྲུབ་ལགས། Friday 23/12/2022 Dalai Lama visits Mahabodhi Stupa in Bodhgaya, Bihar China sanctions 2 US citizens amid Tibet spat Pelosi mentions Dalai Lama in her final weekly press conference as house Speaker Former Tibetan political prisoner Agyal Tsering passes away at 71 DIASPORA: Former Bangalore Youth Hostel Director Dhondup la    

ཉན་པ།: Listen ཕབ་ལེན། Download ༸གོང་ས་མཆོག་བཞུགས་སྒར་དྷརྨ་སཱ་ལཱ་ནས་ལྡི་ལིར་ཆིབས་བསྒྱུར་མཛད་པ། རྒྱ་གཞུང་གི་རིམས་ནད་བཀག་སྡོམ་འོག་ན་ལོ་གཉིས་ལ་སོན་པའི་བྱིས་པའི་ཚེ་སྲོག་ཤོར་བ། སྲིད་སྐྱོང་མཆོག་གིས་འཕགས་བོད་ས་མཚམས་སུ་རྒྱ་ནག་གིས་རྩོད་རྙོག་སློང་བའི་བྱ་སྤྱོད་དེ་ཕན་མེད་རེད་ཅེས་གསུངས་འདུག བོད་ནང་རིགས་རྫས་བསྡུ་ལེན་ལ་རམ་འདེགས་བྱེད་མཁན་ཚོང་ལས་ཁག་ལ་ཞིབ་འཇུག་དང་ཆད་པ་གཅོད་དགོས། རྒྱ་ནག་གཞུང་གིས་གཉན་རིམས་འོག་མང་ཚོགས་གྲོངས་པའི་གྲངས་ཐོ་སྦས་བསྐུངས་བྱས་པ་མངོན་གསལ། རྒྱལ་སྤྱིའི་སྣུམ་འཁོར་བཟོ་གྲྭ་མང་དག་ཅིག་གིས་ཤིན་ཅང་གི་ངལ་རྩོལ་པས་བཟོས་པའི་ཅ་དངོས་སྤྱོད་བཞིན་པ་ཐེར་འདོན། Monday 19/12/2022 His Holiness the Dalai Lama leaves for Delhi and Bodh Gaya China’s zero-Covid policy claims the life of 2 year old Tibetan kid Sikyong attends Bharat-Tibet sangh committee meet cum-seminar in Jammu US legislators call for sanctions on firms complicit in mass DNA harvesting of Tibetans China hiding Covid deaths, citizens and analysts question official figures 23 major brands suspected of illegally sourcing products made by forced labour in China  

ཉེ་ཆར་རྒྱ་གར་བྱང་ཤར་ཨ་རུ་ནཱ་ཅལ་གྱི་ཡང་རྩེ་ཞེས་པའི་འཕགས་བོད་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་མཐའ་སྲུང་དམག་མི་དབར་གདོང་ཐུག་གི་གནས་ཚུལ་བྱུང་ཡོད་པ་ལྟར་བོད་མིའི་གཞུང་འབྲེལ་མིན་པའི་ཚོགས་པ་ལྔ་དང་དྷ་ས་ཧིན་བོད་མཛའ་འབྲེལ་ཚོགས་པ་བཅས་ཐུན་མོང་གིས་ངོ་རྒོལ་གྱི་ལས་འགུལ་སྤེལ་ཏེ། རྒྱ་ནག་གི་བྱ་སྤྱོད་ལ་སྐྱོན་བརྗོད་གནང་བ་དང་འབྲེལ་ནས་བོད་ཀྱི་བདེན་མཐའ་མ་གསལ་བར་དུ་རྒྱ་དཀར་ནག་གཉིས་ཀྱི་དབར་མཐའ་མཚམས་ཀྱི་རྩོད་རྙོག་མུ་མཐུད་གནས་ངེས་ཡིན་པའི་བརྡ་ལན་ནན་པོ་གནང་སོང་།ཁ་སང་ཕྱི་ཟླ་ ༡༢ ཚེས་ ༡༥ ཉིན་གྱི་སྔ་དྲོ་བཞུགས་སྒར་གྱི་བཞི་མདོར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ Ajit Nehra ལགས་དང་བོད་མིའི་གཞུང་འབྲེལ་མ་ཡིན་པའི་ཚོགས་པ་ལྔ་པོའི་ཚོགས་མི་བཅས་འདུ་འཛོམས་ཀྱིས་ཕྱག་ཏུ་བོད་དང་རྒྱ་གར་གྱི་རྒྱལ་དར་བསྣམས་ནས་རྒྱ་དམར་གྱི་མཐའ་སྲུང་དམག་མིས་རྒྱ་གར་གྱི་ས་མཚམས་ལས་བརྒལ་ནས་ཧམ་འཛུལ་བྱས་པར་ངོ་རྒོལ་སྐད་འབོད་གནང་ཡོད། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་ཇི་སྲིད་བོད་རང་བཙན་གྱི་བདེན་མཐའ་མ་གསལ་བ་དེ་སྲིད་དུ་རྒྱ་དཀར་ནག་གཉིས་ཀྱི་དབར་ས་མཚམས་དང་འབྲེལ་བའི་ངལ་བ་རྣམས་མུ་མཐུད་འཕྲད་ངེས་ཡིན་སྟབས། རྒྱ་གར་གཞུང་མང་གཉིས་ཀྱིས་བོད་རང་བཙན་གྱི་འཐབ་རྩོད་ལ་རྒྱབ་སྐྱོར་གནང་པའི་གཞེན་བསྐུལ་གནང་སོང་།དེ་བཞིན་བཞུགས་སྒར་དུ་རྟེན་གཞི་བྱས་པའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ Ajit Nehra ལགས་ཀྱིས་རྒྱ་ནག་གཞུང་གིས་འཕགས་བོད་གཉིས་ཀྱིས་ས་མཚམས་ཁུལ་དུ་དམག་འཁྲུག་སློང་ཚེ་རྒྱ་གར་གྱིས་དེར་རྒོལ་ལན་གནང་རྒྱུའི་ནུས་སྟོབས་ལྡན་ཡོད་སྐོར་གསུངས་པ་དང་འབྲེལ། རྒྱ་གར་གྱི་ངོས་ནས་དུས་རྟག་ཏུ་བོད་མིའི་མངོན་འདོད་ཇི་ཡོད་ལ་རྒྱབ་སྐྱོར་ཡོད་པ་ལྟར་རང་ཉིད་ཀྱིས་དེ་དེ་བཞིན་རྒྱབ་སྐྱོར་ཡོད་ཅེས་གསུངས་པར་མ་ཟད། རྟ་དབང་ས་ཁུལ་གྱི་འཕགས་འབོད་ས་མཚམས་གནད་དོན་ལས་བོད་རང་བཙན་རྒྱ་གར་གྱི་བདེ་འཇགས་ཡིན་ཞེས་པ་དེ་དངོས་ར་གསལ་འཕྲོད་བྱུང་སོང་ཞེས་གསུངས་ཡོད།བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས་ང་ཚོ་འདིར་མཉམ་ཞུགས་ཀྱིས་ངོ་རྒོལ་ལས་འགུལ་སྤེལ་བ་ནི་རྒྱ་གར་གྱི་དམག་མི་དང་རྒྱ་གར་གཞུང་མང་བཅས་ལ་རྒྱབ་སྐྱོར་གྱི་རྣམ་པ་མཚོན་ཕྱིར་ཡིན་སྐོར་གསུངས་པ་དང་འབྲེལ། ཕྱི་ལོ་ ༡༩༥༩ ལོར་རྒྱ་ནག་དམར་ཤོག་གཞུང་གིས་བོད་ལ་བཙན་འཛུལ་བྱས་པ་ནས་བཟུང་སྟེ་དུས་ད་ལྟ་བར་འཕགས་བོད་ཀྱི་ས་མཚམས་དང་འབྲེལ་ཏེ་རྒྱ་དཀར་ནག་གི་མཐའ་དམག་དབར་གདོང་ཐུག་བྱུང་ཡོད་པ་དང་། སླད་མར་བོད་ལ་རང་བཙན་ཐོབ་ན་མ་གཏོགས་ཕྱོགས་གཉིས་དབར་གྱི་དཀའ་རྙོག་དེ་སེལ་ཐུབ་ཀྱི་མ་རེད་ཅེས་གསུངས་པ་དང་ཆབས་ཅིག བོད་རང་བཙན་རྒྱ་གར་གྱི་བདེ་འཇགས་ཡིན། འཕགས་བོད་མཛའ་འབྲེལ་ནི་ནམ་ཡང་གནས་གྱུར་ཅིག་ཅེས་ཚོར་ཤུགས་ཆེན་པོས་འབོད་ཚིག་སྒྲོག་བཞིན་ངོ་རྒོལ་རྔམ་སྟོན་གནང་ཡོད། རྩ་བའི་ཟླ་བ་འདིའི་ཕྱི་ཚེས་ ༩ ཉིན་རྒྱ་གར་བྱང་ཤར་ཨ་རུ་ནཱ་ཅལ་གྱི་ཡང་རྩེ་ཞེས་པའི་འཕགས་བོད་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་མཐའ་སྲུང་དམག་མི་དབར་གདོང་ཐུག་བྱུང་ཡོད་པ་དང་། རྒྱ་གར་བདེ་སྲུང་ལྷན་ཁང་གིས་རྒྱ་ནག་བཅིངས་གྲོལ་དམག་མིས་ས་མཚམས་བརྒལ་བར་བརྟེན། རྒྱ་གར་གྱི་དམག་མིས་དེར་གདོང་ལེན་ནན་པོ་གནང་བ་སོགས་ཕན་ཚུན་དབར་གདོང་ཐུག་བྱུང་ཡོད་པ་མངོན་གསལ་གནང་ཡོད་པ་རེད། ཕྱི་ཉིན་དེར་རྒྱ་གར་གྱི་གྲོས་ཚོགས་འོག་མར་བདེ་སྲུང་བློན་ཆེན་སྐུ་ཞབས་ Rajnath Singh མཆོག་གིས་རྒྱ་དཀར་ནག་གཉིས་ཀྱི་མཐའ་སྲུང་དམག་མི་དབར་གདོང་ཐུག་གི་གནད་དོན་དེ་དང་འབྲེལ་ཏེ་རྒྱ་གར་གྱི་དམག་མི་གཅིག་ཀྱང་རྐྱེན་འདས་སུ་ཕྱིན་མེད་པ་དང་རྨས་སྐྱོན་ཚབས་ཆེན་ཕོག་མེད་པར་མངོན་གསལ་གནང་འདུག་པ་དང་ཆབས་ཅིག་རྒྱ་གར་གྱི་དམག་མིས་རྒྱ་དམག་ལ་ཕར་གདོང་ལེན་ནན་པོ་གནང་ཡོད་པ་སོགས་གསལ་བཤད་གནང་ཡོད་པ་རེད། འབྲེལ་ཡོད་པར་ཁག་སྤྱི་ཚོགས་དྲ་རྒྱ་ལས་བཏུས།

དེ་རིང་ཉིན་རྒྱབ་ཕྱག་ཚོད་ ༥༌༠༠ ཡོལ་ཙམ་ལ་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་རྒྱལ་ས་སིམ་ལར་རྟེན་གཞི་བྱས་པའི་རྡོ་རྗེ་བྲག་དགོན་པའི་དགོན་བདག་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པ་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་ཡང་སྲིད་སྤི་སྟི་ནས་ཡིན་པ་འཇིགས་བྲལ་པདྨ་བཤད་སྒྲུབ་བསྟན་པའི་རྒྱལ་མཚན་མཆོག་བཞུགས་སྒར་དུ་རྟེན་གཞི་བྱས་པའི་གནས་ཆུང་རྡོ་རྗེ་སྒྲ་དབྱངས་གླིང་དུ་༸ཞབས་སོར་བདེ་བར་འཁོད་གནང་སོང་། ༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་༸སྐུ་གོང་མ་ཕྱི་ལོ་ ༢༠༡༥ ལོའི་ཟླ་ ༡༢ ཚེས་ ༢༣ ཉིན་གྱི་ཐོ་རེངས་ཚོུད་ ༢༌༣༠ ཙམ་ལ་རྒྱ་གར་གྱི་གནས་མཆོག་རྡོ་རྗེ་གདན་དུ་རིན་པོ་ཆེ་མཆོག་དགུང་ལོ་ ༨༩ ཐོག་ལ་ཛ་དྲག་གི་སྙུང་གཞི་རིགས་གང་ཡང་མེད་པར་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་ཐོན་རྗེས་གོང་མའི་ཐུགས་སྲས་ལྷོ་བྲག་ནམ་མཁའི་སྙིང་པོ་རིན་པོ་ཆེ་མཆོག་གིས་ལམ་སྟོན་ལྟར་བླ་བྲང་ཐོུང་ནས་འཁོན་རིགས་བསྟན་པའི་སྲོལ་འབྱེད་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ལ་ཡང་སྲིད་བཙལ་འཚོལ་དང་འབྲེལ་བའི་བཀའ་ལུང་གསོལ་འདེབས་ཞུས་པར་དགོན་པའི་ཤར་ཕྱོགས་སུ་སྐུ་འཁྲུངས་ཡོད་པར་བཀའ་ལུང་ཕེབས་དོན་ལྟར། ཡང་སྲིད་ངག་དབང་བཀྲིས་རབ་བརྟེན་མཆོག་ཕྱི་ལོ་ ༢༠༡༨ ཟླ་ ༤ ཚེས་ ༡༦ ཉིན་སྤི་སྟི་ནས་ཡིན་པ་ཡབ་བསོད་ནམས་ཆོས་འཕེལ་ལགས་དང་ཡུམ་སྐལ་བཟང་སྒྲོལ་མ་ལགས་རྣམ་གཉིས་ཀྱི་སྲས་སུ་༸སྐུ་འཁྲུངས་ཏེ་ཡང་སྲིད་འཁྲུལ་བྲལ་དུ་ངོས་འཛིན་མཛད་ཡོད།འདི་ལོའི་ཕྱི་ཟླ་ ༡༡ ཚེས་ ༢༨ ཉིན་སིམ་ལར་རྟེན་གཞི་བྱས་པའི་རྡོ་རྗེ་བྲག་དགོན་པར་གོང་མའི་ཐུགས་སྲས་ལྷོ་བྲག་ནམ་མཁའི་སྙིང་པོ་རིན་པོ་ཆེ་མཆོག་གིས་དབུ་སྐྲ་གཙུག་ཕུད་དང་སྐུ་ཁྲུས་གསོལ་ན་བཟའ་བཞེས་པའི་རྟེན་འབྲེལ་གྱི་མཛད་སྒོ་ཞིག་རྡོ་རྗེ་བྲག་དགོན་དུ་ཚོགས་ནས་འཇིགས་བྲལ་པདྨ་བཤད་སྒྲུབ་བསྟན་པའི་རྒྱལ་མཚན་ཞེས་མཚན་བཟང་པོ་གསོལ་གནང་ཡོད།རིན་པོ་ཆེ་མཆོག་དེ་རིང་བཞུགས་སྒར་དུ་༸ཞབས་སོར་འཁོད་མ་ཐག་གནས་ཆུང་སྒྲ་དབྱངས་གླིང་གྲྭ་ཚང་དུ་ཆིབས་བསྒྱུར་མཛད་སྐབས་གནས་ཆུང་སྐུ་རྟེན་མཆོག རྙིང་མའི་ཆོས་བརྒྱུད་ཀྱི་སྤྱི་འཐུས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་དད་ལྡན་མང་ཚོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་པ་དང་སྦྲགས། ཡང་སྲིད་རིན་པོ་ཆེ་མཆོག་གི་དབུས་པའི་བླ་བྲང་གི་དབུས་ལས་གཙོས་སྐུ་འཁོར་རྣམས་གནས་ཆུང་རྡོ་རྗེ་སྒྲ་དབྱངས་གླིང་གི་འདུ་ཁང་དུ་གདན་འདྲེན་ཞུས་པ་དང་ཆབས་ཅིག་ཡང་སྲིད་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་ཡོད། གཞི་རྩའི་དེ་སྔ་བོད་ལ་དུས་འགྱུར་མ་བྱུང་བའི་སྔོན་དུ་སྔ་འགྱུར་རྙིང་མའི་དབུ་འཛིན་ཁྲི་རབས་ཕེབས་ཕྱོགས་ཀྱི་ལམ་སྲོལ་དམིགས་བསལ་ཞིག་མེད་ཀྱང་། བྱེས་སུ་འབྱོར་རྗེས་རྙིང་མའི་མ་དགོན་དྲུག་ནས་རེ་མོས་ཐོག་དབུ་འཛིན་ཁྲི་རབས་གནང་གི་ཡོད་པ་རེད། སྔ་འགྱུར་རྙིང་མའི་ཆོས་བརྒྱུད་ཀྱི་དབུ་འཛིན་ཆེས་ཐོག་མ་༸སྐྱབས་རྗེ་བདུད་འཇོམས་རིན་པོ་ཆེ་མཆོག་གིས་གནང་བ་དང་དེ་རྗེས་༸སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་མཆོག ༸སྐྱབས་རྗེ་གྲུབ་དབང་པདྨ་ནོར་བུ་མཆོག ༸སྐྱབས་རྗེ་སྨིན་གླིང་ཁྲི་ཆེན་རིན་པོ་ཆེ་མཆོག ༸སྐྱབས་རྗེ་འཁྲུལ་ཞིག་རིན་པོ་ཆེ་མཆོག ༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག ༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་སོགས་ནས་ཁྲི་རབས་ཀྱི་མཚན་གནས་རིམ་པ་བཞེས་ཏེ་བསྟན་འགྲོ་སྤྱི་དང་སྒོས་སྔ་འགྱུར་རྙིང་མའི་ཆོས་བརྒྱུད་ལ་ཕན་ཐོགས་རྒྱ་ཆེན་པོ་བྱུང་ཡོད་པ་རེད།

ཕ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Jacqueline Eustache-Brinio ལགས་དང་། ཕྱི་ལོ་ ༡༩༦༢ ལོར་ཁུལ་དེར་ཐོག་མར་འབྱོར་མཁན་སྲོང་བཙན་མངོན་དགའི་བོད་ཕྲུག་རྣམ་པའི་གོ་སྒྲིག་འོག་ཁུལ་དའི་ Médicis ཚོགས་ཁང་དུ་ད་ཆ་མི་ལོ་ ༦༠ འཁོར་བའི་དུས་དྲན་སྲུང་བརྩི་ཞུས་འདུག མཛད་སྒོ་ཐོག་ཕ་རན་སིའི་གྲོས་ཚོགས་གོང་མའི་འཐུས་མི་ Annick Billon ལགས་དང་། Joseph Else ལགས། གྲོས་ཚོགས་གོང་མའི་འཐུས་མི་ཟུར་པ་ André Gattolin ལགས། བོད་ཕྲུག་ཐོག་མར་ཁྲིད་མཁན་གྲས་ཨོར་ཊོ་ལི་ལགས་ཀྱི་བུ་ Valère Ortoli ལགས། བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། དེ་བཞིན་ཕྱོགས་བཞུགས་སྤྱི་འཐུས་ཐུབ་བསྟན་དབང་ཆེན་ལགས། སྤྱི་འཐུས་ཐུབ་བསྟན་རྒྱ་མཚོ་ལགས། ཕ་རན་སིའི་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས། ཕ་རན་སིར་ཐོག་མར་འབྱོར་མཁན་སྲོང་བཙན་མངོན་དགའི་བོད་ཕྲུག་ད་ཆ་རང་ལོ་ ༦༥ སོན་པའི་ཨོ་རྒྱན་བསྟན་འཛིན་ལགས་ཀྱིས་གཙོས་པའི་བོད་མི་བཅུ་གཅིག་མཉམ་ཞུགས་གནང་ཡོད།དུས་དྲན་གྱི་མཛད་སྒོ་ཐོག་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཡིག་ཕ་རན་སིའི་སྐད་ནང་བསྒྱུར་ཏེ་སྒྲོག་སྦྱང་གནང་ཡོད་པ་དང་དེའི་ནང་མགོན་པོ་༸གང་ཉིད་མཆོག་གིས་ཕ་རན་སིར་ཐོག་མར་འབྱོར་མཁན་གྱི་བོད་ཕྲུག་དེ་དག་ལ་གཟིགས་རྟོག་གནང་མཁན་འབྲེལ་ཡོད་རྣམས་དང་བོད་ཀྱི་རང་དབང་འཐབ་རྩོད་ལ་རྒྱབ་སྐྱོར་མུ་མཐུད་གནང་མཁན་ཡོངས་ལ་ཐུགས་རྗེ་ཆེ་ཞེས་སོགས་བཀའ་སྩལ་མཛད་འདུགསྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་ད་དུང་ད་ལྟའི་བོད་ནང་གི་ཛ་དྲག་གནས་སྟངས་གསུངས་པ་དང་སྦྲགས། གྲོས་ཚོགས་འཐུས་མི་རྣམས་ནས་ཕ་རན་སི་གཞུང་ལ་བོད་མིའི་སྒྲིག་འཛུགས་ཀྱི་ལས་དོན་ཐོག་རྒྱབ་སྐྱོར་གནང་སྐྱོང་ཡོང་འབོད་སྐུལ་གནང་རོགས་ཞེས་གཞེན་སྐུལ་གནང་ཡོད།གཞན་ཡང་མཛད་སྒོ་ཁྲོད་སྲོང་བཙན་མངོན་དགའི་སྐུ་ཚབ་ཨོ་རྒྱན་བསྟན་འཛིན་ལགས་ཀྱིས་གསུང་བཤད་གནང་བའི་ཁྲོད། ཐོག་མ་༧གོང་ས་༧སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་འབྱོར་མཛད་མ་ཐག་རྒྱལ་སྤྱིའི་ནང་བོད་དོན་རྒྱབ་སྐྱོར་ཡོང་བའི་འབོད་སྐུལ་མཛད་པ་ལྟར་སྐབས་དེ་དུས་ཀྱི་ཕ་རན་སིའི་སྲིད་འཛིན་ General de Gaulle མཆོག་གི་རྒྱབ་སྐྱོར་འོག་བོད་ཕྲུག་གྲངས་ཉི་ཤུ་ལེན་རྒྱུའི་ཐག་གཅོད་གནང་སྟེ། ཕྱི་ལོ་ ༡༩༦༢ ལོར་བོད་ཕྲུག་དེ་དག་ཕ་རན་སིར་འབྱོར་བ་དང་ལྷན་ཕ་ཚབ་ཚེ་དབང་ནོར་རྒྱས་ལགས་དང་མ་ཚབ་དམ་པ་སྐལ་ལྡན་ནོར་རྒྱས་ལགས་རྣམ་གཉིས་ཀྱང་བོད་ཕྲུག་དེ་དག་ལ་ལྟ་སྐྱོང་དང་བོད་ཀྱི་སྐད་ཡིག རིག་གཞུང་སོགས་ཀྱི་སློབ་ཁྲིད་གནང་རྒྱུའི་ཆེད་དུ་མངགས་ཏེ་འགན་ཁུར་བཞེས་ཡོད་པ་བཅས་བཙན་བྱོལ་བོད་མིའི་ལོ་རྒྱུས་ཁྲོད་བསུབ་ཐབས་བྲལ་བའི་གནད་སྟངས་དང་། ལྷག་པར་དུ་གནད་དོན་དེ་ནི་ཕ་རན་སི་དང་བོད་བར་ལོ་རྒྱུས་ཀྱི་ཐོག་ནས་གནད་འགག་ཆེན་པོ་ཞིག་ཆགས་ཀྱི་ཡོད་པ་རྣམས་ངོ་སྤྲོད་དང་འབྲེལ། སྐབས་དེ་དུས་ཀྱི་དམག་སྤྱི་སྐུ་ཞབས་ Ortoli ལགས་དང་ཁོང་གི་སྐུ་ཟླ་ལྕམ་ Brynhild Helander ལགས་རྣམ་གཉིས་ནས་ཕྱི་ལོ་ ༡༩༥༩ དང་ ༡༩༦༡ བཅས་སུ་རིམ་པའི་༧བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་ཡོད་པ་སོགས་དང་། བོད་ཕྲུག་དེ་དག་ལ་སྣེ་ལེན་དང་མཐུན་རྐྱེན་འབྱོར་སྤྲོད་སོགས་ཀྱི་འགན་འཁུར་འཐུས་ཚང་བཞེས་པར་བཀའ་དྲིན་རྗེས་དྲན་ཞུས་འདུག མ་ཟད་ཁོང་གིས་དེ་འབྲེལ་གནད་དོན་སྤྱི་དང་ད་ལྟའི་ཆར་བོད་ནང་གི་ཛ་དྲ་གནད་སྟངས་སྐོར་ཁུལ་དེའི་གྲོས་ཚོགས་འཐུས་མི་རྣམས་ལ་གསལ་བཤད་གནང་འདུགདེ་བཞིན་མཛད་སྒོའི་ཐོག་ཁུལ་དེར་བོད་ཕྲུག་རྣམས་ལ་ལྟ་སྐྱོང་སླད་ཆེད་དུ་མངགས་པ་ད་ཆ་རང་ལོ་ ༩༥ སོན་པའི་ཕ་ཚེ་དབང་ནོར་རྒྱས་ལགས་དྲ་ཐོག་ནས་མཉམ་ཞུགས་གནང་ཡོད་པ་རེད། གཞི་རྩའི་དུས་དྲན་ཐོག་དེ་སྔ་ཁུལ་དེར་ཐོག་མར་འབྱོར་མཁན་གྱི་བོད་མི་ ༡༡ མཉམ་ཞུགས་ཐུབ་ཡོད་པ་དང་། ཁོང་རྣམ་པའི་སྡེ་ཁག་ལ་༧གོང་ས་༧སྐྱབས་མགོན་ཆེན་པོ་མཆོག་གིས་སྲོང་བཙན་མངོན་དགའ་ཞེས་མཚན་གསོལ་མཛད་པ་ཞིག་རེད་འདུག འབྲེལ་ཡོད་པར་ཁག་གི་བདག་དབང་བོད་མིའི་སྒྲིག་འཛུགས།