བོད།

མ་ནཱ་ལི་ནས་དབུ་འཛུགས་ཀྱིས་རྒྱལ་ས་ལྡི་ལི་བར་བོད་ནང་གི་དངོས་ཡོད་གནས་ཚུལ་དང་བོད་དོན་དང་འབྲེལ་བའི་དོན་གནད་གསུམ་གྱི་དགོས་འདུན་བརྒྱུད་བསྒྲགས་འོག་བོད་དོན་ཞི་བའི་གོམ་བགྲོད་གནང་མཁན་བོད་མི་དང་བླངས་པ་གསུམ་པོ་ཁ་སང་ཕྱི་ཚེས་ ༨ ཉིན་རྒྱ་གར་གྱི་རྒྱལ་ས་ལྡི་ལིར་བདེ་འབྱོར་བྱུང་བ་དང་སྦྲགས། དེ་རིང་ཚེས་ ༩ ཉིན་ཁུལ་དེའི་ནང་རྟེན་གཞི་བྱས་པའི་རྒྱ་ནག་གི་གཞུང་ཚབ་ཁང་དང་རྒྱལ་ཚོགས་ལས་ཁུངས་སུ་དགོས་འདུན་ཁག་འགྲེམས་སྤེལ་གནང་སྟེ་ལས་འགུལ་མཇུག་སྒྲིལ་གནང་ཡོད་པ་རེད། དེའང་ཟླ་བ་སྔོན་མའི་ཕྱི་ཚེས་ ༢༣ རེས་གཟའ་ལྷག་པ་ལྷག་དཀར་གྱི་ཉིན་མོ་དང་བསྟུན་རང་ལོ་ ༤༧ སོན་པ་ཚེ་རིང་དོན་གྲུབ་ལགས་དང་ ༤༥ སོན་པ་ཚེ་རིང་དབང་འདུས་ལགས། དེ་བཞིན་ ༦༥ ལ་སོན་པ་པཱ་ཆུང་བདག་ལགས་གསུམ་གྱིས་མ་ནཱ་ལི་ནས་རྒྱལ་ས་ལྡི་ལི་བར་བོད་དོན་ཞི་བའི་གོམ་བགྲོད་ལས་འགུལ་ཞིག་དབུ་འཛུགས་གནང་ཡོད་པ་ལྟར། དེ་དག་གི་ཁོངས་ནས་པཱ་ཆུང་བདག་ལགས་མ་ནཱ་ལི་ནས་སྤྱིལེ་ ༡༣༠ ཙམ་གྱི་ས་ཚིགས་ཤིག་ཏུ་འབྱོར་སྐབས་ལྷམ་བདེ་མིན་གྱི་རྐྱེན་གྱིས་ཞབས་ལ་ཆུ་ལྒང་ཐོན་པར་བརྟེན་གོམ་བགྲོད་ལ་ཞུགས་མ་ཐུབ་པར་ཕྱིར་གཟིམ་ཤག་ཏུ་ཕེབས་དགོས་བྱུང་བ་ལས་དེ་མིན་ཁོང་གི་ཕྱག་རོགས་གཉིས་པོ་དང་དང་བླངས་སློབ་མ་གཅིག་བཅས་བོད་མི་གསུམ་པོ་ཁོང་རྣམ་པའི་རེ་འདུན་བཞིན་རྒྱལ་ས་ལྡི་ལིར་བདེ་འབྱོར་བྱུང་འདུགགོམ་བགྲོད་པ་རྣམས་ཀྱིས་རྒྱ་གར་གྱི་ས་གནས་ས་ཐོག་ཏུ་བོད་དོན་དྲིལ་བསྒྲགས་དང་། ལྷག་པར་དུ་རྒྱ་ནག་གཞུང་ནས་༸གོང་ས་སྐྱབས་མགོན་ཆེན་པོ་མཆོག་བོད་ནང་ཆིབས་བསྒྱུར་བཀའ་དྲིན་བསྐྱང་དུ་འཇུག་དགོས་པ་དང་། བོད་མིའི་དབུ་མའི་ལམ་གྱི་སྲིད་བྱུས་གཞིར་བཞག་གི་དགོངས་དོན་འོག་རྒྱ་ནག་གཞུང་ནས་༸གོང་ས་མཆོག་དང་བོད་མིའི་སྒྲིག་འཛུགས་ལྷན་དུ་ཞི་བའི་གྲོས་མོལ་གནང་དགོས་པ། དེ་བཞིན་རྒྱ་གཞུང་གི་བཙོན་འོག་ཏུ་ཡོད་པ་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་དབུས་པའི་བོད་མིའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་འཕྲལ་དུ་གློག་བཀྲོལ་གཏོང་དགོས་པ་སོགས་ཀྱི་དགོས་འདུན་བརྒྱུད་བསྒྲགས་གནང་སྟེ་ཉིན་མ་རེ་ལ་སྤྱི་ལེ་ ༣༠ ནས་ ༤༠ བར་གོམ་བགྲོད་གནང་སྟེ་ཁ་སང་ཕྱི་ཚེས་ ༨ ཉིན་རྒྱལ་ས་ལྡི་ལིར་འབྱོར་གྱི་ཡོད་པ་དང་། དེ་རིང་ཕྱི་ཚེས་ ༡༩ ཉིན་སྔ་དྲོ་ཚོུད་ ༩ ཐོག་ཞི་བའི་གོམ་བགྲོད་པ་དང་ལྡི་ལི་ཁུལ་དུ་གཉུག་མར་གནས་པའི་ཚོགས་སྐྱིད་ཁག་གི་ཚོགས་མི་རེ་རེ་དང་མང་ཚོགས་བཅས་ཀྱིས་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་དང་རྒྱལ་ཚོགས་ཀྱི་ལས་ཁུངས་སུ་ཞུ་སྙན་ཕུལ་བ་དང་། དེ་བཞིན་རྒྱ་ནག་གི་གཞུང་ཚབ་ཁང་དང་རྒྱལ་ཚོགས་ཀྱི་མདུན་དུ་དགོས་འདུན་ཁག་འགྲེམས་སྤེལ་གྱི་ལས་འགུལ་རྒྱ་ཆེ་སྤེལ་ཡོད་པ་རེད།རླུང་འཕྲིན་ཁང་གིས་ཚེ་རིང་དོན་གྲུབ་ལགས་སུ་ཞལ་པར་བརྒྱུད་ཁོང་རྣམ་པའི་རེ་འདུན་ཡོད་པ་ལྟར་ཁ་སང་རྒྱལ་ས་ལྡི་ལིར་བདེ་འབྱོར་བྱུང་བ་དང་དེ་རིང་སྔ་དྲོར་རྒྱ་ནག་གི་གཞུང་ཚབ་ཁང་དང་རྒྱལ་ཚོགས་ལས་ཁུངས་སུ་དགོས་འདུན་ཁག་འགྲེམས་སྤེལ་དང་བཅས་ཐེངས་འདིའི་ལས་འགུལ་མཇུག་སྒྲིལ་གནང་བའི་ཉིན་མོར་དམིགས་བསལ་ཐུགས་ཚོར་ཇི་བྱུང་སོགས་ཀྱི་གནད་དོན་ཁག་ཅིག་གི་ཐོག་བཀའ་འདྲི་ཡོད།དེ་བཞིན་ཁ་སང་ཁོང་རྣམས་ལ་ཕེབས་བསུའི་སྣེ་ལེན་ཞུ་མཁན་གཙོ་གྲས་སུ་ཡོད་པ་ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་མཆོག་ལ་དེ་ལྟར་སྣེ་ལེན་ཞུ་གནད་གང་ཡིན་ཐོག་བཀའ་འདྲི་ཞུས་པར་ཁོང་གིས་དེ་ལྟར་གསུངས་སོང་།དེ་རིང་གོམ་བགྲོད་པ་རྣམས་ཀྱིས་རྒྱ་ནག་གཞུང་ཚབ་ཁང་དང་རྒྱལ་ཚོགས་ཀྱི་ལས་ཁུངས་ཁུལ་དུ་དགོས་འདུན་འཁོད་པའི་ཡིག་ཆ་འགྲེམས་སྤེལ་གནང་སྐབས་བོད་སྒར་བསམ་ཡས་གླིང་གི་ས་གནས་འགོ་འཛིན་མཆོག་གི་གོ་སྒྲིག་འོག་ལྡི་ལི་ཁུལ་གྱི་ཚོགས་པ་ཁག་གི་ཚོགས་མི་རེ་རེ་ནས་གོམ་བགྲོད་པ་གསུམ་དང་ལྷན་དུ་ལྷན་བཅར་ཞུས་འདུགརྩ་བའི་ད་ལྟའི་ཏོག་དབྱིབས་རིམ་ནད་ཀྱི་ཛ་དྲག་དུས་སྐབས་སུ་མང་ཚོགས་འདུ་འཛོམས་ཐོག་གཞི་རྒྱ་ཆེ་བའི་ལས་འགུལ་སྤེལ་རྒྱུ་ཁག་པོ་ཡིན་སྟབས། འདས་པའི་དུས་སུ་ཁེ་ན་ཊ་དང་སུད་སི། དབྱིན་ཡུལ། ཨ་རི། ཨོ་སི་ཀྲོ་ལི་ཡ། ཧྥ་རན་སུ་སོགས་སུ་བོད་མི་ཁག་ཅིག་གིས་གོམ་བགྲོད་དང་། རྐང་འཁོར་སྐོར་སྐྱོད། དེ་བཞིན་རྒྱང་སྐྱོད་སོགས་བརྒྱུད་དེ་བོད་དོན་ལས་འགུལ་སྤེལ་ཡོད་པ་རེད།

བོད་རང་སྐྱོང་ལྗོངས་ཟེར་བའི་ཁུལ་གྱི་དགོན་སྡེ་དང་གདན་ས་ཁག་གི་ནང་དུ་དགེ་འདུན་པ་རྣམས་ཉེ་ལམ་ཕྱི་ཟླ་ ༨ པའི་ནང་རྒྱ་ནག་གི་རྒྱལ་ས་པེ་ཅིང་དུ་སྲིད་འཛིན་ཞི་ཅིན་ཕིང་གཙོ་བྱས་པའི་རྒྱ་ནག་དབུས་ཆབ་སྲིད་ཁང་གི་དབུས་རྒྱུན་ཁག་ཅིག་མཉམ་ཞུགས་བྱས་པའི་སྒོ་ནས་སྐོང་ཚོགས་ཀྱིས་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ ༧ པའི་སྐོར་ལ་སློབ་གཉེར་ཚོགས་འདུ་ཞིག་སྐོང་ཚོགས་བྱས་ཏེ་སློབ་སྦྱོང་སྤྲད་ཡོད་པ་རེད་འདུག

ཁ་སང་ཨིན་ཡུལ་གྲོས་ཚོགས་འཐུས་མི་ Sir Iain Duncan Smith ལགས་ཀྱིས་སྣེ་ཁྲིད་འོག ཡུལ་དེའི་གྲོས་ཚོགས་འཐུས་མི་ཁག་ཅིག་གིས་བོད་ཀྱི་གནད་དོན་ཐོག་བགྲོ་གླེང་ལྷན་ཚོགས་ཤིག་ཚོགས་པའི་ཐོག་འདི་ལོ་རྒྱ་ནག་གཞུང་གིས་བོད་མི་ས་ཡ་ཕྱེད་ཀ་ཙམ་བཙན་དབང་གིས་ངལ་རྩོལ་ར་བའི་ནང་དུ་བཞག་ཡོད་པའི་གནད་དོན་དང་འབྲེལ། ཨིན་ཡུལ་གཞུང་གི་ངོས་ནས་རྒྱ་ནག་གི་དགུན་དུས་ Oympic རྩེད་འགྲན་ཐོག་བཞེངས་ཕྱོགས་གསལ་པོ་དང་བོད་མིའི་ཐོག་དྲག་གནོན་བྱེད་མཁན་རྒྱ་ནག་གི་དཔོན་རིགས་ཚོར་ Magnitsky རྒྱལ་སྤྱིའི་ཁྲིམས་གཞི་ལག་བསྟར་གནང་དགོས་པ། ཨིན་ཡུལ་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་ཁྲིམས་གཞི་གཏན་འབེབས་གནང་དགོས་པ་སོགས་རྒྱ་ནག་ཐོག་བཞེངས་ཕྱོགས་མཁྲེགས་ཙམ་འཛིན་དགོས་གལ་ཡིན་པ་གསུངས་འདུགགྲོས་ཚོགས་འཐུས་མི་ Iain Duncan Smith ལགས་ཀྱིས་གོ་སྒྲིག་གནང་སྟེ་དྲ་རྒྱའི་ཐོག་བོད་ཀྱི་གནད་དོན་ཐོག་སྐར་མ་ ༩༠ ཙམ་གྱི་རིང་བགྲོ་གླེང་ལྷན་ཚོགས་ཤིག་ཚོགས་སྐབས་ཡུལ་དེའི་གྲོས་ཚོགས་འཐུས་མི་ ༨ ཙམ་ནས་མཉམ་ཞུགས་གནང་འདུག་པ་དང་། དྲ་ཐོག་བགྲོ་གླེང་ལས་རིམ་དབུ་དབུ་འཛུགས་དང་འབྲེལ་ནས་སྐུ་ཞབས་ Duncan Smith ལགས་ཀྱིས་ཉེ་ཆར་བོད་ནང་གི་གནས་སྟངས་མངོན་གསལ་གནང་བའི་སྙན་ཐོར་ལོ་འདིའི་ཕྱི་ཟླ་ ༡ ནས་ ༧ བར་རྒྱ་ནག་གཞུང་གིས་བོད་མི་ས་ཡ་ཕྱེད་ཀ་ཙམ་བཙན་དབང་གིས་ངལ་རྩོལ་བསྒྱུར་བཀོད་ར་བར་བཞག་སྟེ་དེ་དག་ལ་དམག་གི་སྦྱོང་བརྡར་དང་ཆབ་སྲིད་སློབ་གསོ་སོགས་སྤེལ་ཡོད་པ་ལུང་འདྲེན་དང་འབྲེལ། དེ་ནི་བོད་མི་རིགས་ཀྱི་ངོ་བོ་རྩ་མེད་གཏོང་ཐབས་ཀྱི་བྱ་སྤྱོད་ཅིག་ཡིན་པ་གསུངས་འདུགཁོང་གིས་རིང་མིན་ཕྱི་ལོ་ ༢༠༢༢ ལོར་རྒྱ་ནག་ནང་དུ་དགུན་དུས་ཨོ་རྩེད་འགྲན་ཚོགས་གཏན་ཁེལ་བའི་གནད་དོན་དང་འབྲེལ། གལ་ཏེ་གནད་དོན་དེ་རྒྱ་ནག་མིན་པའི་རྒྱལ་ཁབ་གཞན་ཞིག་ཡིན་ཚེ་ང་ཚོས་ད་བར་རྩེ་འགྲན་ཡོངས་རྫོགས་རྒྱལ་ཁབ་གཞན་ནང་དུ་འཚོགས་རྒྱུའི་དགོས་འདུན་ཆེད་འདོན་གནང་ཟིན་ངེས་ཡིན་སྐོར་དང་འབྲེལ། ཨིན་ཡུལ་གཞུང་གིས་དེའི་ཐོག་མགྱོགས་མྱུར་བཞེངས་ཕྱོགས་མཁྲེགས་འཛིན་གནང་དགོས་པའི་སྐུལ་མ་གནང་འདུགདེ་བཞིན་ Bath ས་ཁུལ་གྱི་གྲོས་ཚོགས་འཐུས་མི་ Wera Hobhouse ལགས་ཀྱིས་བོད་ནང་དྲག་གནོན་གྱི་སྲིད་བྱུས་ལག་བསྟར་བྱེད་མཁན་རྒྱ་ནག་གི་དཔོན་རིགས་ཚོར་ Magnitsky ཞེས་པའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་གྱི་མི་སྣར་ཉེས་ཆད་གཏང་རྒྱུའི་རྒྱལ་སྤྱིའི་ཁྲིམས་གཞི་ལག་བསྟར་དགོས་པ་དང་། ཡུལ་དེའི་གྲོས་ཚོགས་འཐུས་མི་གཞན་རྣམས་ནས་ཨིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་ Tim Laughton ལགས་ཀྱིས་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་ཁྲིམས་འཆར་གནང་བར་རྒྱབ་སྐྱོར་གནང་དགོས་པ་གསུངས་འདུགབགྲོ་གླེང་ནང་མཉམ་ཞུགས་ཡོད་པའི་གྲོས་ཚོགས་འཐུས་མི་ Tim Laughton ལགས་ཀྱིས་རྒྱ་གཞུང་གིས་སྔ་ལོ་དིང་རི་གཙོས་བོད་ཀྱི་ནུབ་ཕྱོགས་ས་ཁུལ་གྱི་ར་ལུག་ཚང་མ་མེད་པ་བཟོས་པ་མ་ཟད། བོད་མི་ཞིང་འབྲོག་མང་ཚོགས་རྣམས་ཀྱི་སྲོལ་རྒྱུན་གྱི་འཚོ་བ་མེད་པ་བཟོས་ཏེ་གླ་ཕོགས་ཉུང་ཉུང་ལས་མེད་པའི་ངལ་རྩོལ་ལས་དོན་གཉེར་འཇུག་བཞིན་ཡོད་པ་དང་། དེ་ནི་ཨིན་ཡུལ་གཞུང་གིས་ཡུལ་དེའི་ Welsh ཞིང་འབྲོག་མང་ཚོགས་ལ་རང་གི་སྒོ་ཕྱུགས་ཡོངས་རྫོགས་བསད་དེ་ཚོང་ཁང་ནང་ལས་ཀ་རྩག་རྩིག་བྱེད་དགོས་པའི་བཙན་བཀའ་བཏང་བ་དང་གཅིག་མཚུངས་ཆགས་ཀྱི་ཡིན་སྟབས་དེར་མཐའ་གཅིག་ཏུ་ངོས་ལེན་གནང་ཐབས་མེད་པའི་གནད་དོན་ཞིག་ཡིན་པ་གསུངས་འདུག དེ་བཞིན་ཨིན་ཡུལ་ནང་གི་ Free Tibet བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགན་འཛིན་ Sam Walton ལགས་ཀྱིས་བགྲོ་གླེང་ལས་རིམ་འདི་བརྒྱུད་ཨིན་ཡུལ་གྲོས་ཚོགས་འཐུས་མི་རྣམས་ནས་རྒྱ་ནག་གི་བོད་ཐོག་དྲག་གནོན་བྱེད་བཞིན་པ་དེའི་སྐོར་གླེང་སློང་གནང་བ་མ་ཟད་ཨིན་ཡུལ་གཞུང་ནས་དེའི་ཐད་རྒྱ་གཞུང་ལ་གདོང་ལེན་གནང་དགོས་པ་གསུང་མཁན་ཡོད་པར་དགའ་སྤོབས་ཆེན་པོ་བྱུང་ཡོད་པ་དང་། ལྷག་པར་དུ་ཁོང་རྣམས་ཀྱིས་དེ་སྔའི་གཞུང་འཛིན་གྱིས་རྒྱ་ནག་ཐོག་གི་སྲིད་བྱུས་རྣམས་ལམ་ལྷོངས་བྱུང་མེད་པ་དང་དེར་བཅོས་དགོས་པའི་རྣམ་པ་ཆེས་མངོན་རྒྱུ་ཡོད་པ་དང་། ཁོང་རྣམས་ཀྱིས་དགོས་འདུན་ཆེད་འདོན་གནང་བའི་ Magnitsky དང་བོད་ནང་འདྲ་མཉམ་འགྲུལ་སྐྱོད་ཀྱི་རང་དབང་དགོས་པའི་ཁྲིམས་འཆར་རྣམས། རྒྱ་ནག་གི་དགུན་དུས་རྩེད་འགྲན་ནས་ཕྱིར་འཐེན་བྱེད་རྒྱུ་སོགས་ཀྱི་གནད་དོན་ཐོག་གླེང་བ་མ་ཟད་ཨིན་ཡུལ་གྱིས་བོད་ཐོག་བཞེངས་ཕྱོགས་གསར་པ་ཞིག་འཛིན་དགོས་གནད་ཡིན་པ་གསུངས་འདུགདེའི་བར་ན་ The Guardian སོགས་རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བར་ཁ་ཉིན་ཨིན་ཡུལ་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཉན་ཞིབ་ལས་རིམ་ཚོགས་པའི་ཐོག་ཨིན་ཡུལ་ཕྱི་སྲིད་དྲུང་ཆེ་ Dominic Raab མཆོག་ལ་ཨིན་ཡུལ་གཞུང་ནས་ཕྱི་ལོ་ ༢༠༢༢ ལོར་རྒྱ་ནག་ནང་འཚོགས་གཏན་ཁེལ་བའི་དགུན་དུས་ Olympic རྩེད་འགྲན་ནང་མཉམ་ཞུགས་གནང་མིན་བཅས་ཀྱི་སྐོར་ལ་དྲི་བ་བཏང་ཡོད་པར་ཁོང་གིས་དུས་རྒྱུན་གཞུང་གི་འབྲེལ་ལམ་དང་ཆབ་སྲིད་བཅས་རྩེད་རིགས་ཀྱི་གནད་དོན་དང་ལོགས་སུ་བཞག་གི་ཡོད་པ་དེ་ལྟར་ཡང་། མཚམས་རེ་དེ་ལྟར་གནང་མ་ཐུབ་པའི་གནས་སྟངས་ཡང་ཆགས་ཀྱི་ཡོད་སྐོར་གསུངས་པ་མ་ཟད་རྒྱལ་སྲས་ William མཆོག་རྩེད་འགྲན་དེའི་ཐོག་ཕེབས་དགོས་མིན་ཐོག་དགོངས་པ་ནན་བཞེས་གནང་དགོས་པ་གསུངས་འདུགཕྱི་སྲིད་དྲུང་ཆེ་མཆོག་གི་ད་དུང་རྒྱ་ནག་གིས་ཤིན་ཅང་ཡུ་གུར་མང་ཚོགས་རྣམས་ངལ་རྩོལ་ར་བའི་ནང་བཅུག་ནས་སྐྱེས་སྒོ་བཀག་པ་སོགས་ཀྱི་གནད་དོན་ལུང་འདྲེན་དང་སྦྲགས། ང་ཚོར་སེམས་འཚབ་ཡང་ཆེ་རུ་འགྲོ་བཞིན་ཡོད་པ་དང་། རྒྱ་གཞུང་གི་བྱ་སྤྱོད་དེ་དག་ཐོག་དཔང་རྟགས་འཕར་མ་ཐོན་རིམ་བཞིན་དུ་རྒྱལ་སྤྱིའི་སྤྱི་ཚོགས་ཁྲོད་ནས་གླེང་སློང་གནང་ངེས་ཡིན་པ་སོགས་གསུངས་འདུག དེ་བཞིན་སྐུ་ཞབས་ Raab མཆོག་གིས་ཁ་ཆེ་རྒྱལ་ཁབ་ཁག་ཅིག་ནས་རང་གི་ཚོང་གི་ཁེ་ཕན་དང་དེ་དག་ལ་བརྟེན་ནས་ཤིན་ཅང་ནང་གི་གནད་དོན་ཐོག་རྒྱ་ནག་ལ་གདོང་ལེན་མ་གནང་བར་ཁ་ཁུ་སིམ་པོར་བཞུགས་པར་སྐྱོན་བརྗོད་ཡང་གནང་འདུག

ཁ་སང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༥ མཇུག་སྒྲིལ་གནང་དང་བསྟུན། ཨ་རི་དང་ཨིན་ཡུལ། འཇར་མ་ནི། ཨོ་སི་ཊོ་ལི་ཡ། ཨོ་སི་ཊེ་ཡ། སྦེལ་འཇམ། སུད་སི། ནོར་ཝེ། ཁེ་ན་ཌ་སོགས་རྒྱལ་ཁབ་ ༣༩ མཉམ་རུབ་ཀྱིས་རྒྱ་གཞུང་གིས་ཤིན་ཅང་དང་ཧོང་ཀོང་དེ་བཞིན་བོད་བཅས་ཀྱི་ནང་དུ་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནས་སྟངས་ཐད་བློ་འཚབ་ཡོད་པའི་བསྒྲགས་གཏམ་ཞིག་སྤེལ་གནང་འདུགརྒྱལ་ཚོགས་ཀྱི་འཇར་མ་ནི་སྐུ་ཚབ་སྐུ་ཞབས་ Christoph Heusgen ལགས་ཀྱིས་འཇར་མ་ནིས་གཙོས་པའི་རྒྱལ་ཁབ་ ༣༩ པོ་དེ་དག་མཉམ་རུབ་ཐོག་སྤེལ་བའི་བསྒྲགས་གཏམ་དེ་རྒྱལ་ཚོགས་སུ་སྙན་སྒྲོན་ཞུས་འདུག་པ་དང་། དེའི་ནང་ཤིན་ཅང་ནང་གི་གནས་སྟངས་དང་དེང་སྐབས་ཧོང་ཀོང་ནང་གི་དེ་བྱུང་ཁག་གི་ཐོག་ཐུགས་འཚབ་ཡོད་སྐོར་དང་འདི་ལོའི་ཕྱི་ཟླ་ ༦ པའི་ནང་དུ་རྒྱལ་ཚོགས་ཀྱི་དམིགས་གསལ་ལས་དོན་འགན་འཁུར་བ་ ༥༠ ནས་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་འཚབ་ཀྱི་ཕྱག་ཡིག་སྤེལ་ཡོད་པ་ལུང་འདྲེན་དང་འབྲེལ་ཏེ་རྒྱ་ནག་གཞུང་ལ་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་དགོས་པའི་རེ་སྐུལ་ཞུས་པ་མ་ཟད། ལྷག་པར་དུ་ཤིན་ཅང་དང་བོད་བཅས་གྲངས་ཉུང་མི་རིགས་ཀྱི་ཐོབ་ཐང་ཁག་སྲུང་སྐྱོབ་བྱེད་དགོས་པ་གསུངས་འདུག རྒྱལ་ཁབ་ ༣༩ ཐུན་མོང་གིས་སྤེལ་བའི་བསྒྲགས་གཏམ་ནང་རྒྱ་གཞུང་གི་ཤིན་ཅང་ནང་དུ་མི་ས་ཡ་གཅིག་ལྷག་བཙན་དབང་གིས་ངལ་རྩོལ་ར་བར་བཞག་པ་དང་ཤིན་ཅང་ཡུ་གུར་མང་ཚོགས་ལ་ཆོས་དད་རང་དབང་དང་འགྲུལ་སྐྱོད། དེ་བཞིན་ཕན་ཚུན་འབྲེལ་ལམ་དང་སྨྲ་བརྗོད་རང་དབང་སོགས་མེད་པའི་ཁར་ངལ་རྩོལ་ར་བར་བེུད་རྣམས་ལ་བཙན་དབང་གིས་སྐྱེས་སྒོ་བཀག་པ་སོགས་ཀྱི་གནད་དོན་ཐོག་ལའང་བློ་འཚབ་ཡོད་པ་མངོན་གསལ་གནང་འདུག དེ་བཞིན་དེ་སྔ་རྒྱལ་ཚོགས་ཀྱི་ཆེད་ལས་པ་ཁག་ཅིག་གིས་འདི་ལོར་རྒྱ་གཞུང་གིས་ཧོང་ཀོང་ནང་ལག་བསྟར་བྱེད་བཞིན་པའི་བདེ་འཇགས་ཀྱི་ཁྲིམས་གཞི་དེ་རྒྱ་ནག་གི་བརྩི་སྲུང་ཞུ་རྒྱུའི་ཁས་ལེན་བྱས་པའི་རྒྱལ་སྤྱིའི་ཁྲིམས་སྒྲིགསཁག་དང་ཡོངས་སུ་འགལ་ཡོད་པར་སྐྱོན་བརྗོད་གནང་བ་བཞིན། ད་རེས་རྒྱལ་ཁབ་ ༣༩ དེ་དག་གིས་ཀྱང་བདེ་འཇགས་ཀྱི་ཁྲིམས་གཞིའི་འོག་ཧོང་ཀོང་ནང་གི་ཁྲིམས་ཀྱི་གྱོད་གཞི་ཁག་ཅིག་རྒྱ་ནག་སྐམ་ས་ཆེན་མོར་ཐག་གཅོད་བྱ་རྒྱུ་སོགས་ཀྱི་འབྲུ་དོན་ཐད་ཐུགས་འཚབ་ཆེན་པོ་ཡོད་སྐོར་གསུངས་པ་དང་ཆབས་ཅིག འབྲེལ་ཡོད་རྒྱ་ནག་གཞུང་འབྲེལ་དཔོན་རིགས་རྣམས་ནས་དེ་སྔ་དབྱིན་ཡུལ་གྱི་ལག་ནས་ཧོང་ཀོང་རྩིས་ལེན་སྐབས་ཧོང་ཀོང་མང་ཚོགས་ལ་སྨྲ་བརྗོད་དང་གསར་འགོད་དེ་བཞིན་འདུ་འཛོམས་བཅས་ཀྱི་རང་དབང་སྤྲོད་ངེས་ཡིན་པར་ཁས་ལེན་བྱས་ཡོད་དོན་ལྟར་ཡུལ་གཉིས་དབར་བཞག་པའི་གྲོས་མཐུན་ལྟར་ཧོང་ཀོང་མང་ཚོགས་ཀྱི་འགྲོ་བ་མིའི་ཐོབ་ཐང་དེ་དག་སྲུང་སྐྱོབ་བྱེད་དགོས་པའི་གཞེན་སྐུལ་བསྐྱར་ནན་གནང་འདུགལྷག་པར་དུ་རྒྱ་ནག་གཞུང་ལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་གཙོ་འཛིན་གྱིས་དབུས་པའི་འབྲེལ་ཡོད་ལས་བྱེད་དང་ལས་དོན་འགན་འཁུར་བ་བཅས་རང་དབང་ཅན་གྱི་རྟོག་ཞིབ་རུ་ཁག་ཤིན་ཅང་ནང་ཐོངས་ཤིག རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་རྒྱ་ནག་ནང་མི་རིགས་དབྱེ་འབྱེད་འགོག་ཐབས་དང་འབྲེལ་བའི་ལམ་སྟོན་དོན་ཚན་ ༨ པོ་དེ་དག་འཕྲལ་དུ་ལག་བསྟར་བྱོས་ཤིག དེ་བཞིན་ཧོང་ཀོང་ནང་གི་རང་སྐྱོང་གི་གནས་བབ་ལ་བརྩི་སྲུང་དང་ཁུལ་དེའི་ཁྲིམས་ཀྱི་དབང་སྒྱུར་ལ་གུས་བརྩི་ཞུས་ཤིག་དང་ལྷག་དོན་རྒྱལ་སྤྱིའི་སྤྱི་ཚོགས་ཀྱི་རྒྱལ་ཁབ་ཁག་ནས་སྒེར་སོ་སོའི་ལུང་པར་ཤིན་ཅང་སོགས་ནས་སྐྱབས་བཅོལ་ཞུ་བར་ཕེབས་མཁན་རྣམས་ཕྱིར་སློག་གནང་རྒྱུ་མེད་པའི་བཞེངས་ཕྱོགས་འཛིན་དགོས་པའི་རེ་སྐུལ་གནང་འདུག

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཟི་ཁྲོན་ཞིང་ཆེན་གྱི་རྒྱལ་རོང་ཁུལ་གྱི་བོད་རིགས་བུད་མེད་ལྷ་མོ་ལགས་ཁོང་གི་ཁྱོ་ག་སྔོན་མས་གཏུམ་སྤྱོད་ཀྱི་དྲག་སྤྱོད་འོག་གསོན་བསྲེགས་བྱས་ཏེ་རང་སྲོག་ཤོར་བར་མང་ཚོགས་ཀྱིས་སེམས་ཁྲལ་གྱིས།  གནད་དོན་དེ་ཁྲིམས་ལྟར་ཐག་གཅོད་ནན་པོ་གནང་རྒྱུ་དང་འབྲེལ། སྤྱི་ཡོངས་ཀྱི་རང་ཁྱིམ་གྱི་གཏུམ་སྤྱོད་ཀྱི་རིགས་དང་འབྲེལ་བའི་གླེང་སློང་བྱེད་མཁན་མང་དུ་འགྲོ་བཞིན་ཡོད་པར་འཁོད་འདུག 

རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གིས་ཤོག་ཁོག་རྒོལ་རྡུང་གི་མིང་ཐོག་ནས་བོད་ཨ་མདོ་བླ་བྲང་བསང་ཆུ་ཁུལ་གྱི་བོད་མི་བོད་མི་བཀྲ་ཤིས་རྒྱ་མཚོ་དང་ཚེ་དབང་སོགས་མི་བཅུ་ལ་ལོ་དགུ་ནས་བཅུ་བཞི་བར་གྱི་ཁྲིམས་ཐག་བཅད་ཡོད་པའི་གནས་ཚུལ་དང་འབྲེལ་ནས། རྒྱ་ནག་གིས་བོད་མི་རྣམས་ལ་དྲང་བདེན་གྱི་ཁྲིམས་བཤེར་བྱེད་དུ་མ་བཅུག་པར་ཁྲིམས་ཐག་གཅོད་བཞིན་ཡོད་སྐོར་མངོན་གསལ་གནང་འདུག

དེ་རིང་ཕྱི་ཟླ་ ༡༠ ཚེས་ ༡ གི་ཉིན་མོ་འདི་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་འགོ་ཚུགས་ནས་མི་ལོ་ ༧༡ འཁོར་བའི་ཉིན་མོ་ཡིན་སྟབས། འཛམ་གླིང་ཁྱོན་དུ་གནས་བཞུགས་བོད་མིས་གཙོས་ཡུ་གུར་བ་དང་ལྷོ་སོག།ཧོང་ཀོང་། རྒྱ་རིགས་མང་གཙོ་དོན་གཉེར་བ་བཅས་ཀྱི་མཚོན་པའི་རྒྱལ་སྤྱིའི་ཚོགས་སྡེ་ཁག་ ༡༨༠ ལྷག་ཙམ་གྱིས་དེ་རིང་གི་ཉིན་མོ་འདི་ཉིན་ནག་ཞིག་ཏུ་ངོས་འཛིན་དང་འབྲེལ། འཛམ་གླིང་གི་ཡུལ་གྲུ་གང་སའི་གྲོང་ཁྱེར་ཆེ་ཁག་ ༩༠ ལྷག་ཙམ་གྱི་ནང་ལ་རྣམ་པ་འདྲ་མིན་སྒོ་ནས་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་བ་དང་ཆབས་ཅིག རྒྱལ་སྤྱིའི་གཞུང་ཁག་ནས་ནུས་པ་མཉམ་སྤུངས་ཀྱིས་རྒྱ་ནག་ལ་གདོང་ལེན་དགོས་པའི་ཞུ་སྐུལ་གནང་བཞིན་འདུགདེ་རིང་སྡ་དྲོ་མེག་གྷན་ཁྲོམ་གཞུང་གི་བཞི་མདོ་རུ་དབུས་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ། དེ་བཞིན་བོད་རྒྱལ་ཡོངས་མང་གཙོ་ཚོགས་པ་བཅས་གཞུང་འབྲེལ་མིན་པའི་ཚོགས་པ་ཁག་ལྔས་རྒྱ་དམར་སྲིད་གཞུང་གི་འཁྱོགས་བཤད་དང་བཙན་གནོན་འོག་རྒྱ་ནག་དམར་པོས་རྫུན་གཏམ་གྱིས་འཛམ་གླིང་མི་ཡི་ཚེ་སྲོག་འཕྲོག་ཅེས་པའི་འབོད་ཚིག་དང་འབྲེལ་ནས་ངོ་རྒོལ་གྱི་ལས་འགུལ་སྤེལ་སོང་།ལས་འགུལ་དེའི་ཐོག་རྒྱ་ནག་སྲིད་གཞུང་གིས་ད་བར་བོད་ནང་བོད་མི་ས་ཡ་མང་པོ་དམར་གསོད་བཏང་བ་རྣམས་མཚོན་ཆེད་དུ་ཕུང་གཟུགས་འདྲ་བཟོ་བྱས་པ་སྤུངས་ནས་དེའི་ཉེ་འཁྲིས་སུ་རྒྱ་ནག་གི་སྲིད་འཛིན་ཞི་ཅིན་ཕང་གི་གདོང་འབག་གྱོན་པའི་མི་ཞིག་གི་ལག་ཏུ་ལྕགས་ཐག་ཅིག་ཁྱེར་ནས་ལྕགས་ཐག་དེའི་སྣེ་མོ་རེར་བོད་མིའི་ལས་འགུལ་བ་བཀྲིས་དབང་ཕྱུག་ལགས་དང་། གནམ་སྡེ་སྒོ་མོ་ཆེ་ཡི་དོན་རྐྱེན་དང་འབྲེལ་བའི་ tank man ཞེས་པའི་འཐབ་མོ་བ། དེ་བཞིན་བོད་ནང་གི་ཆབ་སྲིད་བཙོན་པ་ཆ་ཚང་མཚོན་པའི་མི་གསུམ་བཅས་འདུག་པ་མ་ཟད། གཞུང་འབྲེལ་མིན་པའི་ཚོགས་པ་ལྔའི་ཚོགས་གཙོ་དང་ཚོགས་མི་གཙོས་དྷ་ས་ཁུལ་གྱི་མི་མང་ཁག་ཅིག་གིས་མཉམ་ཞུགས་གནང་བའི་ཐོག་མེག་གྷན་གྱི་ཁྲོམ་གཞུང་དུ་ངོ་རྒོལ་སྐད་འབོད་ཀྱི་ལམ་ནས་གོམ་བགྲོད་གནང་སོང་། སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་དེ་རིང་ཉིམ་མོ་དང་བསྟུན་ནས་ཚོགས་པ་ཁག་ལྔས་བསྒྲགས་གཏམ་སྒྲོག་སྦྱང་གནང་སྐབས། རྒྱལ་སྤྱིའི་རྒྱལ་ཁབ་ཀྱིས་རྣམས་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོགས་རོལ་གཏོང་བཞིན་པར་སྐྱོན་བརྗོད་དང་ངོ་རྒོལ་བྱ་དགོས་པའི་ཞུ་སྐུལ་གནང་སོང་བ་མ་ཟད། རྒྱལ་སྤྱིའི་རྒྱལ་ཁབ་ཁག་གི་སྲིད་གཞུང་རྣམས་མཉམ་འབྲེལ་གྱི་སྒོ་ནས་རྒྱ་ནག་ཐོག་ནུས་པ་ལྡན་པའི་བསྒྲགས་གཏམ་གསལ་པོ་ཞིག་སྤེལ་དགོས་པ་སྐོར་གསུངས་སོང་། དེ་བཞིན་རྒྱལ་སྤྱིའི་ཨོ་རྩལ་མཐུན་ཚོགས་ཀྱིས་ཕྱི་ལོ་ ༢༠༢༢ ལོར་རྒྱ་ནག་ཏུ་འཚོགས་འཆར་གྱི་ཨོོ་རྩལ་འགྲན་ཚོགས་དེ་ཕྱིར་འཐེན་བྱ་དགོས་པའི་ཞུ་སྐུལ་དང་། རྒྱ་གར་གཞུང་གི་ངོས་ནས་དེ་སྔའི་ནོར་འཁྲུལ་ཡོ་བསྲང་བྱེད་པའི་དུས་ལ་སླེབ་ཡོད་པ་མ་ཟད། བོད་ཀྱི་གནད་དོན་ཐག་གཅོད་བྱེད་པའི་བྱ་ཐབས་འཚོལ་རྒྱུར་སྣེ་ཁྲིད་དགོས་པའི་ཞུ་སྐུལ་གནང་སོང་། དེ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་དེ་རིང་གི་ཉིན་མོ་འདིར་རྒྱ་ནག་གཞུང་ངོས་ནས་དགའ་དགའ་སྤྲོ་སྤྲོ་བྱ་རྒྱུའི་དུས་ཚིགས་ཤིག་ལ་ངོས་འཛིན་བྱེད་བཞིན་ཡོད་རུང་། རྒྱ་ནག་དམར་པོའི་གཞུང་གིས་མི་ལོ་༧༡ གི་རིང་ལ་བོད་མི་ས་ཡ་ལས་འདས་པའི་ཚེ་སྲོག་འཕྲོག་ཡོད་པ་དང་། དགོན་སྡེ་ཁག་གཏོར་བཤིག་བཏང་བ། དེ་བཞིན་བདག་ཅག་གི་རྩ་བའི་བླ་མ་མི་ཡུལ་དུ་བཙན་བྱོལ་ལ་ཕེབས་དགོས་བྱུང་བ་མ་ཟད། གཞིས་བྱེད་གཉིས་སུ་གྱེས་བ་སོགས་ལ་བརྟེན་ནས་དེ་རིང་གི་ཉིན་མོ་དེ་ནི་ཉིན་ནག་ཞིག་ལ་ངོས་འཛིན་གནང་གི་ཡོད་པར་གསུངས་སོང་། གཞི་རྩའི་དེ་རིང་གི་དུས་ཚིགས་འདི་དང་བསྟུན་ནས་རྒྱ་ནག་གཞུང་གིས་གདུག་རྩུབ་ཅན་གྱི་སྲིད་བྱུས་དང་། བྱ་ངན་ལ་གདོང་ལེན་དང་ངོ་རྒོལ་ཆེད་ཐེ་ཝན་དང་ཨོ་སི་ཊོ་ལི་ཡ། ཉི་ཧོང་། ནི་ཐར་ལེནཊ། ཛུ་རིག་སོགས་སུ་བོད་རིགས་གཙོས་ཡུ་གུར་བ་དང། ལྷོ་སོག་པོ། ཤིན་ཅང་། རྒྱ་རིགས་མང་གཙོ་དོན་གཉེར་བ་བཅས་ནས་མཉམ་རུབ་ཀྱི་སྒོ་ནས་རྒྱལ་ཁབ་ ༢༥ དང་གྲོང་ཁྱེར་ ༩༠ ལྷག་ཙམ་གྱི་ནང་དུ་ཉིན་བརྒྱ་དུས་གཅིག་ཏུ་རྒྱ་ནག་གཞུང་ལ་ངོ་རྒོལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་ཏེ། རྒྱལ་སྤྱིའི་གཞུང་ཁག་ནས་ནུས་པ་མཉམ་སྤུང་གིས་རྒྱ་ནག་ལ་གདོང་ལེན་དགོས་པ་དང་། རྒྱལ་ཁབ་སོ་སོའི་རྒྱ་ནག་གཅིག་གི་སྲིད་བྱུས་ལ་བསྐྱར་ཞིབ་དགོས་པ། དེ་བཞིན་བོད་དང་ཤར་ Turkistan ནང་མི་རིགས་རྩ་མེད་ཀྱི་སྲིད་བྱུས་ཐད་རྒྱ་ནག་ལ་རོགས་འདེགས་བརྒྱུད་ཚོང་གི་ཁེ་ཕན་ལེན་མཁན་ཚོང་ལས་ཁང་ཁག་ལ་དཔལ་འབྱོར་དང་འབྲེལ་བའི་སྲིད་དོན་ཉེས་ཆད་འགེལ་དགོས་པ་སོགས་ཀྱི་དགོས་འདུན་ཁག་གཅིག་བཏོན་འདུག

ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་བོད་ནང་གི་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲོད་བོད་ཀྱི་གནད་དོན་ཐད་ལ་ཡ་ལན་གནང་ཕྱོགས་སྐོར་ལ་ཉན་ཞིབ་ལས་རིམ་ཞིག་ཚོགས་གནང་བ་དང་། ལས་རིམ་དེའི་ཐོག་ཚོགས་ཚུང་དེས་ད་ལྟའི་ཆར་བོད་མིར་འཕྲད་བཞིན་པའི་དཀའ་ངལ་དང་རྒྱ་གཞུང་གིས་བོད་གཙོས་རྒྱ་ནག་གི་དབང་སྒྱུར་འོག་ཡོད་པའི་ས་ཁུལ་སོ་སོའི་སྐད་ཡིག་དང་ཆོས་དད་རང་དབང་ལ་དམ་དྲག་བྱེད་ཕྱོགས་སོགས་ཀྱི་གནད་དོན་རྟོག་ཞིབ་སླད་བྱེས་ཀྱི་གདན་ས་བཀྲིས་ལྷུན་པོའི་མཁན་ཐོག་ལྔ་པ་གཟིག་རྒྱབ་རིན་པོ་ཆེ་མཆོག་དང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་སྐུ་ Sophie Rechardson ལགས། བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་བཅས་གདན་ཞུ་གནང་འདུག ཁ་སང་ཕྱི་ཚེས་ ༣༠ ཉིན་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་ཉན་ཞིབ་ལས་རིམ་ཐོག་གཟིག་རྒྱབ་རིན་པོ་ཆེ་མཆོག་གིས་༸པཎ་ཆེན་སྐུ་ཕྲེང་བཅུ་གཅིག་པ་༸ཀུན་གཟིགས་༸པཎ་ཆེན་རིན་པོ་ཆེ་མཆོག་རྒྱ་གཞུང་གིས་བཙན་ཁྲིད་བྱས་པ་ནས་བཟུང་ད་ཆ་མི་ལོ་ ༢༥ ལྷག་གི་རིང་གར་སོང་ཆ་མེད་དུ་གྱུར་ཡོད་པ་དང་སྒོས་ཨ་རིས་གཙོས་པའི་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པས་༸པཎ་ཆེན་རིན་པོ་ཆེ་མཆོག་གློད་བཀྲོལ་སླད་འབད་རྩོན་ཤུགས་ཆེ་གནང་ཡོད་ཀྱང་། རྒྱ་གཞུང་གིས་རིན་པོ་ཆེ་མཆོག་གློད་བཀྲོལ་ཚབ་ཏུ་ཡང་སྲིད་གཞན་ཞིག་ངོས་འཛིན་བྱས་པས་དེར་ང་ཚོ་བོད་མི་གཙོས་འཛམ་གླིང་སྤྱི་ཡོངས་ནས་ངོས་འཛིན་ཞུ་ཐབས་བྲལ་བ་མ་ཟད། རྒྱ་གཞུང་གིས་ངན་བྱུས་དེས་མི་ལོ་ལྔ་བརྒྱ་ལྷག་གི་ལོ་རྒྱུས་ལྡན་པའི་རྩ་ཆེའི་དགོན་པ་ལ་གནོད་འཚེ་ཧ་ཅང་ཆེན་པོ་བཟོས་ཡོད་སྐོར་གསུངས་ཡོད།ལྷག་དོན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ཐད་ལ་མགོན་པོ་༸གང་ཉིད་མཆོག་གི་དགོངས་པ་ལྟར་གནང་རྒྱུ་ལས་རྒྱ་གཞུང་ནས་ཐེ་བྱུས་བྱེད་དབང་མེད་པ་དང་། Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་གཙོས་པའི་བོད་དོན་དང་འབྲེལ་བའི་ཁྲིམས་འཆར་དེ་དག་ལ་མཇུག་སྐྱོང་དང་རྒྱབ་སྐྱོར་ཤུགས་ཆེ་གནང་དགོས་པ། ཨ་རིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པས་༸པཎ་ཆེན་རིན་པོ་ཆེ་དང་སྐུ་འཁོར་ནང་མི་ལྷན་རྒྱས། དེ་བཞིན་བྱ་བྲལ་རིན་པོ་ཆེ་སོགས་ཀྱི་གནད་སྟངས་ཐོག་རྩད་ཞིབ་ནན་པོ་གནང་དགོས་པའི་རེ་སྐུལ་གསུམ་གནང་སོང་།   དེ་བཞིན་བསྟན་འཛིན་རྡོ་རྗེ་ལགས་ཀྱིས་འདས་པའི་ལོ་ངོ་བཅུ་ཕྲག་བདུན་ལྷག་རིང་རྒྱ་གཞུང་གིས་ཡ་ང་སྙིང་རྗེ་མེད་པར་བོད་མིའི་ངོ་བོ་དང་ཡུལ་སྲོལ་གོམས་གཤིས་རྩ་གཏོར་སླད་དྲག་སྤྱོད་དང་བཙན་འདེད་ཀྱི་ལས་འགུལ་སྤེལ་ཡོད་པ་དང་རྒྱ་ནག་དེ་རྒྱལ་སྤྱིའི་ཁྲོད་སྟོབས་ཤུགས་ཆེ་བའི་རྒྱལ་ཁབ་ཅིག་ཆགས་པ་དང་བསྟུན་ཨ་རི་ལྟ་བུ་རང་དབང་ཅན་གྱི་རྒྱལ་ཁབ་ལའང་རྒྱ་ནག་གིས་གསང་མྱུལ་དང་གསང་བ་རྐུ་འཁྱེར་སོགས་ཀྱི་བྱ་སྤྱོད་བརྒྱུད་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཟོས་ཡོད་པ་གསུངས་སོང་། དེ་བཞིན་ཁོང་གིས་རྒྱ་ནག་གིས་ཐབས་བྱུས་ལྡན་པའི་ཐོག་མང་ཚོགས་ལ་དྲག་གནོན་བྱེད་བཞིན་ཡོད་པ་མ་ཟད། སྐད་འཕྲིན་བརྒྱུད་རྒྱ་གཞུང་དང་ལྟ་སྤྱོད་མི་མཐུན་མཁན་གྱི་འཐབ་རྩོད་པར་མྱུལ་ཞིབ་བྱེད་ཀྱི་ཡོད་པར་འགྲེལ་བརྗོད་གནང་སོང་བ་དང་ཆབས་ཅིག་ཏུ་ཨ་རི་གྲོས་ཚོགས་ནས་རྒྱ་གཞུང་གི་གཞུང་ཚབ་ཡན་ལག་ཁང་ནས་བོད་ནང་བསྐྱོད་པར་བོད་མིའི་མཐོང་མཆན་ཐད་དམ་དྲག་གི་སྲིད་བྱུས་དང་ཨ་མི་རི་ཀའི་མང་ཚོགས་ལ་མྱུལ་ཞིབ་ཀྱི་བྱ་འགུལ་དག་མཚམས་འཇོག་བྱེད་བཅུག་དགོས་སྐོར་གསུངས་འདུག  ལྷག་པར་དུ་ ཨ་རི་གྲོས་ཚོགས་ཀྱིས་བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ལ་ངོས་འཛིན་གནང་དགོས་པའང་གསུངས་ཡོད།ལས་རིམ་དེའི་ཐོག་སྐུ་ཞབས་ Meccaci  ལགས་དང་ལྕམ་སྐུ་ Richardson ལགས་རྣམ་གཉིས་ཀྱིས་རྒྱ་གཞུང་གིས་བོད་མིའི་ཐོག་མི་སྤྱོད་ལས་འདས་པའི་མནར་གཅོད་དང་དྲག་གནོན་ཅན་གྱི་སྲིད་བྱུས་ལག་བསྟར་གྱིས་བོད་ནང་གི་བོད་མིའི་སྐད་ཡིག་གཙོས་ཆོས་དད་རང་དབང་། འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་མ་ཟད། རྒྱ་གཞུང་གིས་བོད་མི་ས་ཡ་ཕྱེད་ཀ་ཙམ་བཙན་དབང་གིས་ངལ་རྩོལ་ནང་བཞུགས་བཅུག་གི་ཡོད་པའི་གནད་དོན་འགྲེལ་བརྗོད་དང་སྦྲགས་ཏེ་ཨ་རིའི་ངོས་ནས་ངེས་པར་དུ་བོད་ཐོག་འཛིན་པའི་སྲིད་བྱུས་ལ་བསྐྱར་བཅོས་ཀྱིས་བོད་གནས་འབྲེལ་མཐུད་པ་མྱུར་དུ་བསྐོ་གཞག་གནང་དགོས་སྐོར་གསུངས་སོང་།  ཨ་རི་གྲོས་ཚོགས་འཐུས་མི་སྐུ་ཞབས་ Marco Rubio ལགས་དང་སྐུ་ཞབས།  Chris Smith ལགས། སྐུ་ཞབས་ Angus King ལགས། སྐུ་ཞབས་ Tom Suozzi ལགས་སོགས་གྲོས་ཚོགས་འཐུས་མི་ཁག་ཅིག་ནས་བོད་ནང་གི་འགྲོ་བ་མིའི་ཐོབ་ཐང་དང་ཉེ་ཆར་འཛིན་བཟུང་བྱས་པའི་རྒྱ་ནག་གི་ཨ་རིའི་ཉེན་རྟོག་གསང་མྱུལ་བ་སོགས་ཀྱི་གནད་དོན་གླེང་སློང་དང་སྦྲགས། ཉན་ཞིབ་ཐོག་ཕེབས་མཁན་རྣམས་ལ་འདྲི་རྩད་སོགས་གནང་སྐབས་སྐུ་ཞབས་ Rubio ལགས་ཀྱིས་རྒྱ་གཞུང་གིས་བོད་མིའི་ཐོག་སྤེལ་བཞིན་པའི་དྲག་གནོན་ཅན་གྱི་སྲིད་བྱུས་བརྒྱུད་བོད་མི་རྣམས་ཀྱི་ངོ་བོ་རྩ་མེད་བཟོ་ཐབས་བྱེད་བཞིན་པ་དེ་དུས་ཡུན་རིང་པོ་གོང་ནས་ཡིག་ཆ་ཁག་ཏུ་འཁོད་ཡོད་པ་མ་ཟད་ང་ཚོས་བོད་ཀྱི་གནད་དོན་དེ་ནམ་ཡང་སྣང་མེད་དུ་འཇོག་ཐབས་མེད་ཅེས་གསུངས་ཡོད། ཉན་ཞིབ་ཀྱི་ལས་རིམ་གྲུབ་མཚམས་སུ་ཚོགས་ཆུང་དེའི་ཚོགས་གཙོ་ཨ་རི་གྲོས་ཚོགས་འོག་མའི་འཐུས་མི་སྐུ་ཞབས་ Jim Mcgovern ལགས་ཀྱིས་ཨ་རིའི་ཆབ་སྲིད་ཚོགས་པའི་ཚོགས་མི་རྣམས་ནས་༸གོང་ས་མཆོག་ལ་གུས་བརྩི་ཡོད་པ་དང་སྒོས་ང་ཚོས་ད་བར་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་ཐད་ཁྲིམས་འཆར་ཁག་ཅིག་གཏན་འབེབས་གནང་སྟབས་སླད་མར་ཡང་མུ་མཐུད་གནང་རྒྱུ་ཡིན་ཞེས་གསུངས་སོང་། ལྷག་པར་དུ་རྒྱ་གཞུང་ནས་ཨ་རིའི་ངོས་ནས་བོད་མིའི་ཐོག་རྒྱབ་སྐྱོར་གནང་བ་དེ་དག་དུས་ཡུན་གང་འཚམས་རྗེས་དང་དེ་བཞིན་༸གོང་ས་མཆོག་༸སྐུ་འཚོ་བཞུགས་མེད་པའི་རྗེས་སུ་མཚམས་འཇོག་གནང་རྒྱུ་ཡིན་པའི་འཁྲུལ་སྣང་ཞིག་གི་འོག་བསྡད་ཡོད་པར་བརྟེན་དེ་ནི་རྒྱ་ནག་ཕྱོགས་ནས་ནོར་འཁྲུལ་ཅན་གྱི་བསམ་བློ་རེད་ཅེས་བསྐྱར་ནན་གསུངས་འདུགགཞི་རྩའི་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་བཞིན་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་དང་འབྲེལ་ཨ་རིའི་གྲོས་ཚོགས་ནང་ཉན་ཞིབ་ལས་རིམ་དང་།  ཁྲིམས་འཆར་འདོན་སྤེལ་དང་།  ལོ་འཁོར་སྙན་ཐོ་བཅས་འདོན་སྤེལ་གནང་གི་ཡོད་པ་ལྟར། ཚོགས་ཆུང་གིས་ཕྱི་ལོ་ ༢༠༡༩ ལོའི་སྙན་ཐོ་ནང་རྒྱ་ནག་གཞུང་གིས་བོད་ནང་གི་ཆོས་དད་རང་དབང་ལ་བརྡལ་བཤིག་གཏོང་བཞིན་པར་སྐྱོན་བརྗོད་དང་སྦྲགས། རྒྱ་གཞུང་ནས་༸གོང་ས་མཆོག་གི་མ་འོངས་པའི་༸སྐུའི་ཡང་སྲིད་ངོས་འཛིན་ཐད་ཐེ་བྱུས་བྱས་ཚེ་ཨ་རི་གཞུང་ནས་རྒྱ་གཞུང་གི་དེ་འབྲེལ་དཔོན་རིགས་ཚོར་ཉེས་འཆད་འགེལ་རྒྱུ་ཡིན་ཞེས་བརྗོད་ཡོད་པ་རེད།

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་བརྒྱུད་ལམ་ཞིབ་བཤེར་དང་དོགས་ཟོན་མྱུལ་ཞིབ་ཅེས་པའི་དམིགས་བསལ་སྙན་མཐོ་ཞིག་འདོན་སྤེལ་གནང་འདུགརྒྱ་གཞུང་གིས་གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་ཤུགས་ཆེ་ལག་བསྟར་དང་། བོད་ནང་དུ་མུ་མཐུད་ཁྲིམས་འགལ་གྱི་ཐོག་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་ཡོད་པ་མ་ཟད། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྒེར་ལངས་རྗེས་སུ་རྒྱ་གཞུང་གིས་བོད་ནང་དམ་དྲག་སྟངས་འཛིན་ཤུགས་ཆེ་རུ་བཏང་ནས་ཞི་རྒོལ་ལས་འགུལ་དེའི་རིགས་བསྐྱར་འབྱུང་མི་ཐུབ་པ་བཟོ་བཞིན་ཡོད་པ་དང་། ཕྱི་ལོ་ ༢༠༡༢ ལོ་ནས་དམར་ཤོག་སྲིད་གཞུང་གིས་སྤྱི་ཚོགས་སྟངས་འཛིན་དོ་དམ་བྱེད་ཐབས་ཤུགས་ཆེ་རུ་བཏང་བ་དེས་བོད་ནང་གི་དངོས་ཡོད་གནས་སྟངས་མཐོང་ཐོས་མེད་པ་བཟོས་ཤིང་། བཙན་དབང་གིས་བོད་རྒྱ་སྒྱུར་བྱེད་ཐབས་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག ལྟེ་གནས་ཁང་གིས་དེ་རིང་དྲྭ་རྒྱར་གསར་དུ་བཏོན་པའི་སྙན་ཐོ་འདིའི་ནང་དུ་རྒྱ་གཞུང་གིས་“དྲ་མིག་ཅན་གྱི་དོ་དམ”དང“གཉིས་ལྡན་དུད་སྦྲེལ”ཟེར་བ་སོགས་གཞི་རྒྱ་ཆེ་བའི་དོགས་ཟོན་མྱུལ་ཞིབ་ཀྱི་བྱེད་ཐབས་སྣ་ཚོགས་འོག་ནས་བོད་ནང་ལོག་ཙམ་མ་ཟད། བཙན་བྱོལ་བོད་མིའི་སྤྱི་ཚོགས་ནང་དུའང་བོད་མི་ཚོ་ཕན་ཚུན་ལ་དོགས་ཟོན་དང་། ལྐོག་ཉན་ལྐོག་ཞུ་བྱེད་དུ་བཅུག་པ་སོགས་ཀྱི་བརྒྱུད་ནས་བོད་ཕྱི་ནང་གཉིས་ཀའི་བོད་ནང་དུ་བོད་མི་ཕན་ཚུན་དང་ཐ་ན་སོ་སོ་རང་ཉིད་ལའང་གཟབ་དགོས་བྱུང་བའི་གནས་སྟངས་ཆགས་ཡོད་སྐོར་དང་། བོད་མི་ཕན་ཚུན་དབར་ལྐོག་ཉན་ལྐོག་ཞུ་དང་ཕན་ཚུན་གཡོ་བཙོང་མ་བྱས་ན་མཇུག་འབྲས་ཚབས་ཆེན་འཁུར་དགོས་པའི་འགན་འཁྲི་བཀོད་ཁྱབ་བཏང་ཡོད་པ་སོགས། གང་ལྟར་རྒྱ་གཞུང་གིས་བོད་མི་ཕན་ཚུན་དབར་ལྐོག་ཉན་ལྐོག་ཞུ་བྱེད་དུ་བཅུག་ནས། བོད་མི་ཚོས་ཆབ་སྲིད་ཀྱི་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ཞི་རྒོལ་དང་ཡང་ན་སོ་སོའི་སྲིད་དོན་དང་རིག་གཞུང་ངོ་བོ་སོགས་གླེང་སློང་ཙམ་ཡང་བྱས་མི་ཆོག་པའི་འཇིགས་སྐུལ་བཏང་བའི་གནས་སྟངས་གསལ་བཀོད་ཀྱིས་བོད་མིའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བཞིན་ཡོད་པ་སོགས་མངོན་གསལ་གནང་འདུགལྟེ་གནས་ཁང་ནས་གསར་དུ་བཏོན་པའི་སྙན་ཐོ་འདིའི་ནང་ད་དུང་རྒྱ་ནག་སྲིད་གཞུང་གིས་བཙན་དབང་དང་མངོན་འཛིང་ཁྲིམས་ཆད་མ་ཕོག་སྔོན་ནས་རང་གིས་རང་ལ་དམ་དྲག་བྱས་པའི་ཁོར་ཡུག་བསྐྲུན་པའི་འོག རང་དང་རང་གི་ནང་མི་སྤུན་མཆེད་སོགས་ལ་བཙོན་འཇུག་མནར་གཅོད་ཀྱི་ཉེས་ཆད་འགེལ་རྒྱུའི་འཇིགས་སྣང་འོག འདོད་མོས་མེད་བཞིན་དུ་རྒྱ་ནག་དམར་ཤོག་སྲིད་གཞུང་གི་ཁེ་ཕན་སྲུང་སྐྱོབ་དང་རང་གིས་རང་ལ་དམ་དྲག་བྱེད་བཞིན་ཡོད་པ་ནི་ཧ་ཅང་བློ་འཚབ་སྐྱེ་གཞི་ཞིག་ཆགས་ཡོད་པ་དང་། དེ་ནི་རྒྱ་ནག་གཞུང་གིས་བོད་མི་རྣམས་དམར་ཤོག་སྲིད་གཞུང་ལ་ཡིད་རྟོན་བློ་དཀར་ཡོང་ཆེད་ཆབ་སྲིད་ཀྱི་ཐབས་བྱུས་གྲས་ཤིག་ཡིན་པ་དང་། རྒྱ་གཞུང་གི་དྲ་མིག་ཅན་གྱི་དོ་དམ་སྲིད་བྱུས་འོག་དོགས་ཟོན་མྱུལ་ཞིབ་བྱས་ནས་དོགས་ཡོད་ས་གནས་ཁག་ཏུ་དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས་ཟེར་བ་སྟོང་ཁྲག་མང་པོ་ཆེད་འཛུགས་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ཞིབ་བཤེར་བྱེད་མུས་ཡིན་པར་མ་ཟད། བོད་ནང་གི་གཞི་རིམ་གྱི་ས་ཁུལ་ནས་ཞིང་ཆེན་རིམ་པའི་ས་ཁུལ་ཁྱོན་ ༥༤༦༤ ནང“དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས”འཛུགས་འཆར་ཡོད་པ་དང་དེའི་བརྒྱུད་བོད་ས་ཡོངས་སུ་ཏང་དང་རྒྱལ་ཁབ་ཀྱི་དབང་ཤུགས་མ་ཁྱབ་པ་མེད་པ་བཟོ་རྒྱུར་དམིགས་བཞིན་ཡོད་པ་མངོན་གསལ་གནང་འདུགལྟེ་གནས་ཁང་གི་ངོས་ནས་བོད་ལྗོངས་ཀྱི་གྲོང་ཁྱེར་ཆེ་ཤོས་ཨང་གསུམ་པ་ཆབ་མདོ་གྲོང་ཁྱེར་ནང་དུ་མང་ཚོགས་ཀྱི་ DNA འམ་རིགས་རྫས་འདུ་ལེན་དང་འབྲེལ་བའི་ལས་གཞིའི་མ་ལག་ཆེད་འཛུགས་ཀྱིས་ས་གནས་ཀྱི་བོད་མི་མང་ཚོགས་ཀྱི་མཛུབ་རྗེས་དང་། ཁྲག་རིགས་མིག་བཤེར་སོགས་ཚུད་པའི་ཆ་འཕྲིན་འདུ་ལེན་བྱེས་པའི་དཔེ་ཚོན་དང་འབྲེལ། རྒྱ་ནག་དེ་དོགས་ཟོན་མྱུལ་ཞིབ་ཀྱི་ཚན་རྩལ་སྔོན་ཐོན་རྒྱལ་ཁབ་ཅིག་ཏུ་བསྐྲུན་ཐབས་བྱེད་བཞིན་ཡོད་པ་མངོན་གསལ་གནང་འདུག དེ་བཞིན་སྙན་ཐོ་དེར་བོད་ནང་ཕེབས་མྱོང་ཡོད་མཁན་སོགས་བོད་མི་མང་པོར་བཅར་འདྲི་དང་ཡིག་ཆ་སོགས་ལག་སོན་བྱུང་ཁག་ཕྱིར་བསྒྲགས་དང་འབྲེལ། རྒྱ་ནག་གཞུང་གིས་བོད་མིིའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་། བཙན་དབང་གིས་རང་གིས་རང་ལ་དམ་དྲག་བྱེད་དུ་བཅུག་པ་དེ་དག་ནི་བོད་ཙམ་མ་ཡིན་པར་རྒྱ་ནག་རྒྱལ་ཡོངས་གཙོས་ཕྱིའི་རྒྱལ་ཁབ་ཁག་ཏུའང་ཁྱབ་སྤེལ་ཕྱིན་ཡོད་པ་དང་། དེ་ནི་རྒྱ་གཞུང་གིས་དབང་ཤུགས་རྒྱ་སྐྱེད་གཏོང་ཐབས་ལ་བརྟེན་ནས་བྱུང་ཡོད་སྐོར་ར་གསུངས་པ་དང་འབྲེལ། རྒྱལ་སྤྱིའི་སྤྱི་ཚོགས་ཀྱི་གཞུང་ཚོགས་ཁག་ནས་ནུས་པ་མཉམ་སྤུངས་ཀྱིས་གདོང་ལེན་གནང་དགོས་པའི་རེ་སྐུལ་གནང་འདུག