བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་ཁ་ཉིན་ཟླ་ ༢ ཚེས་ ༧ ཉིན་ཛ་དྲག་གསལ་བསྒྲགས་ཤིག་སྤེལ་བ་བརྒྱུད་རིས་མེད་དགོན་སྡེ་ཁག་དང་སེར་སྐྱ་མང་ཚོགས་ཐུན་མོང་ལ་༸རྒྱལ་བའི་སྐུ་ཕྱྭ་དང་བོད་འབངས་སྤྱིའི་བདེ་ཐབས་ལ་དམིགས་པའི་དགེ་བསྐུལ་གནང་བ་དང་འབྲེལ་ཏེ། བོད་མིའི་མང་ཚོགས་ཁྲོད་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་ཐོག་ལ་ཐུགས་འཚབ་དང་ཁག་ཅིག་གིས་༸གོང་ས་མཆོག་གི་༸སྐུའི་འཕྲོད་བཞེས་སྔར་བཞིན་གསལ་ཐང་ཡིན་མིན་ཐོག་དགོངས་ཚུལ་འདྲ་མིན་གསུང་མཁན་བྱུང་ཡོད་སྟབས། ཆོས་རིག་ལས་ཁུངས་ཀྱིས་ཁ་སང་སླར་ཡང་དེའི་ཐད་ཡོངས་ཁྱབ་གསལ་བཤད་ཤིག་སྤེལ་ནས་དགེ་བསྐུལ་གྱི་ཛ་དྲག་གསལ་བསྒྲགས་ལ་དམིགས་ཡུལ་ངན་འཆང་བྱེད་མཁན་རེ་ཟུང་གིས་མང་ཚོགས་མགོ་རྨོངས་གཞིའི་འགྲེལ་ལོག་དང་བཤད་ལོག་ཅི་རིགས་ཀྱི་སྒོ་ནས་དཀྲོག་གཏམ་འདྲ་མིན་འགྲེམས་སྒྲོག་བྱས་དང་བྱེད་བཞིན་པ་ནི་ཁུངས་ལུང་གཞི་རྩ་མེད་པའི་གཏམ་འཆལ་རང་ཡིན་པར་གསུངས་པ་མ་ཟད། དེ་རིང་སྲིད་སྐྱོང་སྤེན་པ་ཚེ་རིང་མཆོག་གིས་བཞུགས་སྒར་དུ་བོད་ཀྱི་འགྲེམས་སྟོན་ཁང་གསར་པ་དབུ་འབྱེད་ཀྱི་གསུང་བཤད་གནང་སྐབས་ད་ལྟའི་ཆར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་སྔར་བཞིན་གསལ་ཐང་ཡིན་པས་གཞིས་བྱེས་གཉིས་ཀྱི་བོད་མི་ཚོས་ཐུགས་ཁྲལ་གནང་མི་དགོས་པར་ཐུགས་བློ་བདེ་བོ་གནང་རོགས་ཞེས་གསུངས་སོང་།
ཆོས་རིག་ལས་ཁུངས་ཀྱི་ཡོངས་ཁྱབ་གསལ་བཤད་ནང་དུ། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་རྩིས་འབྲས་དང་བླ་ལྷའི་བཀའ་ལུང་དགོངས་དོན་བཀའ་ཡིག་ཞིག་ཕེབས་པ་བཞིན། དགེ་བསྐུལ་གྱི་ཛ་དྲག་གསལ་བསྒྲགས་ཤིག་སྤེལ་བ་ལ་དམིགས་ཡུལ་ངན་འཆང་བྱེད་མཁན་རེ་ཟུང་གིས་མང་ཚོགས་མགོ་རྨོངས་གཞིའི་འགྲེལ་ལོག་དང་། བཤད་ལོག་ཅི་རིགས་ཀྱི་སྒོ་ནས་དཀྲོག་གཏམ་འདྲ་མིན་འགྲེམས་སྒྲོག་བྱས་དང་བྱེད་བཞིན་པ་ནི་ཁུངས་ལུང་གཞི་རྩ་མེད་པའི་གཏམ་འཆལ་རང་རེད་ཅེས་གསུངས་པ་དང་ཆབས་ཅིག གསལ་བསྒྲགས་ཀྱི་མགོར་ཛ་དྲག་ཅེས་བྲིས་པ་དེ་ཡང་སྤྱི་རིམ་སྨིན་སྒྲུབ་ཞུ་རྒྱུ་དུས་ཚོད་ཀྱིས་ཉེ་བར་གཏུགས་ཡོད་པའི་ཆ་ནས་བཀོད་པ་མ་གཏོགས། གནས་སྟངས་བྱེ་བྲག་པར་དམིགས་ཏེ་ཛ་དྲག་ཅེས་བཀོད་པ་ཞིག་མིན་ཞེས་ཡོངས་ཁྱབ་གསལ་བཤད་གནང་འདུག
རྩ་བའི་ཆོས་རིང་ལས་ཁུངས་ཀྱིས་དེ་སྔོན་བོད་ཀྱི་རིས་མེད་དགོན་སྡེ་ཁག་དང་སེར་སྐྱ་མང་ཚོགས་ཀྱི་མཚན་ཐོག་སྤེལ་བའི་གསལ་སྒྲགས་ནང་། ༸རྒྱལ་བའི་སྐུ་ཕྱྭ་མཛད་འཕྲིན་རྒྱས་པ་དང་བོད་འབངས་བདེ་ཐབས་སུ་དམིགས་ཏེ་བོད་ཟླ་དང་པོ་ནང་ཚུད་བོད་མིའི་སྡོད་སྒར་སོ་སོ་ནས་རྟེན་ཁྲུས་ཡུལ་ཁྲུས་དང་འབྲེལ་བསངས་གསོལ་དང་རླུང་རྟ་དར་འཛུགས། སྲུང་མ་སྤྱིའི་འཕྲིན་བསྐུལ། རང་རང་སོ་སོའི་འཁོས་ཀ་དྲག་ཞན་ལ་དཔག་པའི་དགེ་སྒྲུབ་གནང་གལ་ཆེ་སྟབས། ས་གནས་སོ་སོའི་འགོ་འཛིན་ཁྱབ་ཁོངས་ཀྱི་ཚོགས་སྐྱིད་སྡེ་ཁག་གིས་སྲོག་བླུ་དང་ངན་སློང་ལ་སྦྱིན་གཏོང་། བྱིས་པར་གསོལ་ཚིགས་གཏོང་བ། ཡང་ན་བརྔན་པ་ཐུམ་སྒྲིལ་བགོས་འགྲེམས་སོགས་རྒྱ་གང་ཆེ་ངེས་གནང་ཡོང་བའི་ཞུ་བསྐུལ་དང་། དེ་ལྟར་གནང་ཐུབ་ཚེ་སྤྱི་སྒེར་གཉིས་སྨན་ཡོང་རྒྱུའི་ལམ་སྟོན་གནང་ཡོད་པ་རེད།
ཆོས་རིག་ལས་ཁུངས་ཀྱི་ངོས་ནས་ད་ཐེངས་ཀྱི་ཡོངས་ཁྱབ་གསལ་བཤད་ནང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། རིས་མེད་བསྟན་འཛིན་གྱི་སྐྱེས་ཆེན་དམ་པ་རྣམས་སྐུ་ཚེ་བརྟན་ཅིང་མཛད་འཕྲིན་རྒྱས་པ། བོད་མིའི་སྤྱི་མཐུན་བསོད་ནམས་གསོག་སྤེལ་དང་། མང་ཚོགས་བདེ་ཐབས་ཀྱི་ཆེད་དུ་རྒྱུན་འཕར་ཞབས་རིམ་ཁག་སྨིན་སྒྲུབ་ཞུ་རྒྱུ་ཆོས་རིག་ལས་ཁུངས་ཀྱི་ལས་འགན་ཁོངས་སུ་ཡོད་པ་བཞིན་༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་སྤྱི་རིམ་ཕེབས་སྒོ་རྣམས་འཕྲལ་མྱུར་ཁུངས་སོ་སོར་བཀོད་མངགས་དང་གསལ་བསྒྲགས་ཞུ་སྒོ་འཚེམས་མེད་ཞུ་མུས་ཡིན་པ་དེ་དེ་བཞིན་ཞུས་པ་ཞིག་ཡིན་སྐོར་གསུངས་པ་མ་ཟད། ཐེངས་འདིའི་ཞབས་རིམ་གྱི་དམིགས་ཡུལ་༸རྒྱལ་བའི་སྐུ་ཕྱ་མཛད་འཕྲིན་རྒྱས་པ་དང་། མང་ཚོགས་བདེ་ཐབས་ཀྱི་ཆེད་དུ་ཡིན་པ་དང་གཞི་འཛིན་ས་ནི་རྩིས་འབྲས་དང་བླ་ལྷའི་བཀའ་ལུང་དགོངས་དོན་ཡིན་པ། དེ་བཞིན་དུས་ཚོད་ཡང་བོད་ཟླ་དང་པོའི་ནང་ཚུན་ཡིན་པ་ལྟར་དུས་ཚོད་ཀྱིས་ཉེ་བར་གཏུགས་ཡོད་པའི་ཆ་ནས་ཛ་དྲག་བཀོད་པ་མ་གཏོགས་གནས་སྟངས་བྱ་བྲག་པར་དམིགས་མིན་སྐོར་གསུངས་འདུག
སྲིད་སྐྱོང་སྤེན་པ་ཚེ་རིང་མཆོག་གིས་དེ་རིང་ཕྱི་ཟླ་ ༢ ཚེས་ ༩ རེས་གཟའ་ལྷག་པ་ཉིན་གྱི་སྔ་དྲོར་བོད་ཀྱི་འགྲེམས་སྟོན་ཁང་གསར་པ་དབུ་འབྱེད་ཀྱི་གསུང་བཤད་གནང་སྐབས་ད་ལྟའི་ཆར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་སྔར་བཞིན་གསལ་ཐང་ཡིན་པ་དང་མགོན་པོ་༸གང་ཉིད་མཆོག་སྐུ་ལྷོད་ལྷོད་ངང་བཞུགས་ཡོད་སྟབས་གཞིས་བྱེས་གཉིས་ཀྱི་བོད་མི་ཚོས་ཐུགས་ཁྲལ་གནང་མི་དགོས་པར་ཐུགས་བློ་བདེ་པོ་གནང་རོགས་ཞེས་གསུངས་སོང་བ་དང་འབྲེལ། དེའང་སྲིད་སྐྱོང་མཆོག་གིས་ཁོང་ཉིད་བོད་མིའི་སྒྲིག་འཛུགས་བཀའ་ཤག་གི་སྲིད་སྐྱོང་ཡིན་པའི་ཆ་ནས་ཐུགས་འགན་ཆ་ཚང་བཞེས་ཏེ་གསུང་གི་ཡོད་ཅེས་གསུངས་ཡོད།
