༸པཎ་རིན་པོ་ཆེ།

ཉེ་ཆར་ཟླ་བ་འདིའི་ཕྱི་ཚེས་ ༨ ཉིན་ཡོ་རོབ་སྦེལ་ཇམ་རྒྱལ་ཁབ་ཀྱི་གྲོས་ཚོགས་འཐུས་མི་དང་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་ Samuel Cogolati མཆོག་གིས་སྦེལ་ཇམ་ཕྱི་སྲིད་ལས་ཁུངས་ཀྱིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ཆ་རྐྱེན་གང་ཡང་མེད་པར་མགྱོགས་མྱུར་གློད་བཀྲོལ་དགོས་པའི་བརྡ་ལན་གསལ་པོ་སྤྲོད་དགོས་པ་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སྦེལ་ཇམ་གཞུང་གི་འགན་འཁུར་གང་འདྲ་བཞེས་ཀྱི་ཡོད་མེད་སོགས་དང་འབྲེལ་བའི་འདྲི་རྩད་ཅན་གྱི་བསྒྲགས་གཏན་ཞིག་སྤེལ་ཡོད་པ་རེད། གྲོས་ཚོགས་འཐུས་མིའི་འདྲི་རྩད་ཅན་གྱི་བསྒྲགས་གཏན་དེའི་ཐད་ཕྱི་ཚེས་ ༢༥ སྟེ་༸ཀུན་གཟིགས་༸པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་ཉིན་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་ཤིག་གནང་བ་བརྒྱུད་ནས་སྦེལ་ཇམ་གཞུང་ནས་དུས་རྟག་ཏུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མའི་ཆབ་སྲིད་བཙོན་པ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་ད་ལྟའི་གནས་སྟངས་གང་འདྲ་ཡོད་མེད་སོགས་ཀྱི་ཐོག་ཐུགས་འཚབ་ཆེན་པོ་གནང་བཞིན་ཡོད་ཅེས་གསུངས་འདུག ཕྱི་སྲིད་བློན་ཆེན་མཆོག་གིས་༸ཀུན་གཟིགས་༸པཎ་ཆེན་རིན་པོ་ཆེའི་གནད་དོན་དེ་ནི་བོད་མིའི་ཆོས་ཕྱོགས་དང་འབྲེལ་བ་ཡོད་སྟབས། རྒྱ་ནག་གཞུང་ནས་དེ་ལ་ཐད་བྱུས་རིགས་བྱེད་རྒྱུའི་ཐོབ་ཐང་ཡོད་མ་རེད་ཅེས་ནན་པོ་གནང་འདུག་པ་མ་ཟད་འདས་པའི་ལོ་དུས་ནང་ལ་བོད་ནང་གི་དངོས་ཡོད་གནས་སྟངས་ཤེས་ཐབས་སུ་སྦེལ་ཇམ་གཞུང་གིས་རྒྱ་ནག་དང་ལྷན་དུ་ཕྱོགས་གཉིས་ཀྱི་འབྲེལ་མོལ་མང་དག་ཅིག་གནང་བ་བརྒྱུད་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་གནང་ཡོད་པ་མ་ཟད། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱ་ནག་ཐོག་གི་དུས་བཀག་བསྐྱར་ཞིབ་ཀྱི་ལས་རིམ་ཐོག་རྒྱ་ནག་གྱི་སྐུ་ཚབ་ལ་དངོས་སུ་འདྲི་རྩད་སོགས་ཀྱང་བྱེད་ཡོད་པ་ལུང་འདྲེན་དང་སྦྲགས། བོད་ཀྱི་གནད་དོན་ཐོག་བློན་ཆེན་སྐུ་སྒེར་གྱི་ངོས་ནས་མུ་མཐུད་དམིགས་བསལ་གྱི་ཐུགས་སྣང་གནང་གི་ཡིན་སྐོར་གསུངས་འདུག དེ་བཞིན་རྒྱ་ནག་གཞུང་གི་རྒྱལ་ཚོགས་ཀྱི་ལྷན་ཚོགས་ཁག་ནས་གྲངས་ཉུང་མི་རིགས་ཀྱི་གནད་དོན་སོགས་ཀྱི་ཐད་འདྲི་རྩད་བྱས་པ་ཁག་ལ་ལན་འདེབས་གནང་སྟངས་དང་། རྒྱལ་ཚོགས་ཀྱི་སྐུ་ཚབ་མི་སྣ་རྒྱ་ནག་དང་བོད་ཁུལ་དུ་ཕེབས་རྒྱུའི་རེ་སྐུལ་ཁག་ནར་འགྱངས་བྱེད་བཞིན་པ་སོགས་འགྲེལ་བརྗོད་དང་སྦྲགས། སྦེལ་ཇམ་གཞུང་ནས་ཡོ་རོབ་མཐུན་ཚོགས་དང་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་ཟུང་འབྲེལ་ཐོག་རྒྱ་ནག་སྤྱི་དང་ལྷག་པར་དུ་བོད་དང་ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་། དེ་བཞིན་ཆོས་དད་རང་དབང་གི་གནས་སྟངས་སོགས་ཀྱི་ཐད་མུ་མཐུད་ཐུགས་སྣང་གང་ཐུབ་གནང་གི་ཡིན་ཅེས་གསུངས་འདུག གཞི་རྩའི་ད་རེས་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་འདི་མ་གནང་བའི་གོང་དུ་ཡོ་རོབ་གྲོས་ཚོགས་འཐུས་མི་ ༣༢ ཀྱིས་ཟུང་འབྲེལ་ཐོག་ཡོ་རོབ་ཕྱི་འབྲེལ་ལས་དོན་ཚོགས་ཆུང་གི་གཙོ་འཛིན་སྐུ་ཞབས་ Josep Borrel མཆོག་ལ་ཡང་ཞུ་སྙན་ཞིག་ཕུལ་ནས་རྒྱ་ནག་གཞུང་གི་ངོས་ནས་ཆ་རྐྱེན་གང་ཡང་མེད་པར་༸པཎ་ཆེན་རིན་པོ་ཆེ་༸སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པའི་ཤུགས་གནོན་སྤྲོད་རྒྱུའི་རེ་སྐུལ་ཞུས་ཡོད་པ་རེད།

༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་ཨ་རིའི་གྲོས་ཚོགས་ཀྱི་རྒྱ་ནག་འཛིན་སྐྱོང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim Mcgovern ལགས་ཀྱིས་རྒྱ་ནག་གཞུང་གིས་འཛིན་བཟུང་བྱས་ཏེ་ད་ཆ་གར་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པའི་ཡོངས་ཁྱབ་ཀྱི་བརྙན་ཐུག་ཞིག་སྤྱི་ཚོགས་དྲྭ་ལམ་བརྒྱུད་སྤེལ་གནང་འདུགཨ་རིའི་ཕོ་བྲང་དཀར་པོའི་མདུན་ཐང་ནས་སྤེལ་བའི་བརྙན་ཐུང་དེའི་ནང་སྐུ་ཞབས་ Jim Mcgovern ལགས་ཀྱིས་རྒྱ་ནག་ནས་ཁྱབ་བརྡལ་བྱུང་བའི་ཏོག་དབྱིབས་ནད་ཡམས་དེའི་རྐྱེན་པས་ད་ཆ་འཛམ་གླིང་ཁྱོན་ཡོངས་ལ་དཀའ་ངལ་ཆེན་པོ་ཞིག་འཕྲད་བཞིན་ཡོད་པའི་ཁར་ནད་དུག་དེ་ཡང་མི་མང་འདུ་འཛོམས་ཀྱི་ཁྲོད་དུ་ཁྱབ་བརྡལ་ཆེན་པོ་འགྲོ་བཞིན་ཡོད་པ་ལྟར་དེ་ནི་རྒྱ་ནག་གཞུང་གི་བཀག་སྐྱིལ་ཁང་དང་བཙོན་ཁང་དག་ལ་དེ་བས་ཀྱང་ཆེས་ཛ་དྲག་གི་གནས་སྟངས་ཤིག་ཆགས་ཡོད་སྟབས། འཛམ་གླིང་འཕྲོད་བསྟེན་ལྷན་ཚོགས་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་ཆབ་སྲིད་བརྩོན་པ་རྣམས་མགྱོགས་མྱུར་གློད་བཀྲོལ་དང་། ལྷག་པར་དུ་ལོ་ངོ་དྲུག་ལ་འཛིན་བཟུང་བྱས་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་གནོན་ཤུགས་སྤྲོད་དགོས་པ་གསུངས་འདུགཁོང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ལོར་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་མཛད་པ་ནས་ཉིན་གསུམ་གྱི་རྗེས་སུ་རྒྱ་ནག་གཞུང་གིས་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་སྟབས་མི་མང་གིས་ད་བར་ལོ་ངོ་ ༢༥ རིང་ཀུན་གཟིགས་པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡིན་སྐོར་བཤད་པ་དེ་ལྟར་ཡང་ད་བར་མིག་མཐོང་རྣ་ཐོས་ཡོད་མཁན་སུ་གང་བྱུང་མྱོང་མེད་སྟབས་རྒྱ་གཞུང་གི་བཤད་པར་ཡིད་ཆེད་རྩ་བ་ནས་བྱེད་ཐབས་མེད་པར་འགྲེལ་བརྗོད་གནང་བ་དང་སྦྲགས། མི་སྣ་སུ་རུང་ཞིག་བཙན་ཁྲིད་བྱས་ནས་མི་ཚེ་ཧྲིལ་པོ་བཀག་སྐྱིལ་འོག་གནས་སུ་བཅུག་པ་ནི་རྒྱལ་སྤྱི་ཐོག་ནས་ཁྲིམས་འགལ་ཞིག་དང་ལྷག་པར་དུ་རིན་པོ་ཆེ་མཆོག་ལ་གཞི་རྩའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། དེ་བཞིན་སྨྲ་བརྗོད་རང་དབང་སོགས་ནི་རང་བཞིན་ལྷན་རྒྱས་སུ་ལྡན་ཡོད་སྟབས། རང་དབང་དེ་དག་ལོངས་སུ་སྤྱོད་འཇུག་དགོས་པ་མ་ཟད་ཆུང་སྲིད་རིན་པོ་ཆེ་མཆོག་ལྟ་བུར་མཚོན་ན་ད་ཆ་སྐུ་གཞོན་པའི་དུས་སྐབས་ཤིག་ཆགས་ཀྱི་ཡོད་སྟབས་ངེས་པར་དུ་མགྱོགས་མྱུར་གློད་བཀྲོལ་དགོས་པ་གསུངས་འདུགརྩ་བའི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་དང་བསྟུན་འཛམ་གླིང་ས་ཕྱོགས་གང་སར་གནས་པའི་བོད་མིའི་ཚོགས་སྒེར་ཁག་ནས་དུས་ཆེན་དེ་སྲུང་བརྩི་དང་འབྲེལ། ཐེམ་སྤང་གི་དུས་སྐབས་འདིར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གཙོས་པའི་ས་གནས་གཞོན་ལྷན་ཡན་ལག་ཁག་གིས་༸སྐུའི་འཁྲུངས་སྲུང་བརྩི་རྣམ་པ་འདྲ་མིན་གྱི་བརྒྱུད་དེ་ཞུས་ཡོད་པའི་ཁྲོད་མི་ནི་སོ་ཊའི་བོད་ཀྱི་གཞོན་ནུ་ལྷན་ཚོགས་ནས་ཁྱིམ་མེད་རྣམས་ལ་ཞལ་ལག་སྦྱིན་གཏོང་གནང་འདུགདབུས་བོད་ཀྱི་བེུད་ལྷན་ཚོགས་ནས་བསང་གསོལ་དང་དྷ་སའི་ཁུལ་དུ་ཡོད་པའི་བོད་མིའི་ཁྱིམ་ཚང་རྣམ་ལ་མཆོད་མར་ཞལ་འདེབས་ཕུལ་ནས་རང་ཁྱིམ་དུ་རིན་པོ་ཆེ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་མཆོད་མེ་ཕུལ་དགོས་པའི་གཞེན་བསྐུལ་གནང་སོང་བ་དང་དེ་བཞིན་ས་གནས་བེུད་ལྷན་ཚོགས་རྣམས་ནས་ཀྱང་ཉིན་མོ་དེ་རྣམ་པ་འདྲ་མིན་བརྒྱུད་དེ་སྲུང་བརྩི་ཞུས་ཡོད།ཕྱོགས་མཚུངས་སྤྱི་ཚོགས་དྲྭ་ལམ་ཁག་ཏུ་ཆུང་སྲིད་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་ཉིན་བོད་རིགས་གཞོན་སྐྱེས་དང་ལྷག་པར་དུ་སློབ་ཕྲུག་རྣམས་ནས་ཀྱང་དོ་སྣང་ཆེན་པོས་རང་ནུས་གང་ལྕོགས་ཀྱིས་རང་ཁྱིམ་དུ་བགྲོ་གླེང་དང་། སྙན་ངག་གྱེར་འདོན། བསྟོད་དབྱངས་ཕུལ་བ་སོགས་རྣམ་པ་འདྲ་མིན་ཐོག་ནས་སྲུང་བརྩི་ཞུས་པའང་མངོན་རྒྱུ་འདུག

ཁ་སང་ཕྱི་ཚེས་ ༢༤ ཉིན་ཡོ་རོབ་གྲོས་ཚོགས་འཐུས་མི་ ༣༢ ཀྱིས་ཟུང་འབྲེལ་ཐོག་ཡོ་རོབ་ཕྱི་འབྲེལ་ལས་དོན་ཚོགས་ཆུང་གི་གཙོ་འཛིན་སྐུ་ཞབས་ Mr Josep Borrel མཆོག་ལ་ཞུ་སྙན་ཞིག་ཕུལ་ནས་རྒྱ་ནག་གཞུང་གི་ངོས་ནས་ཆ་རྐྱེན་གང་ཡང་མེད་པར་༸པཎ་ཆེན་རིན་པོ་ཆེ་༸སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པའི་ཤུགས་གནོན་སྤྲོད་རྒྱུའི་རེ་སྐུལ་ཞུས་འདུགདེའང་ཡོ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Mikulas Peksa ལགས་ཀྱིས་སྣེ་ཁྲིད་པའི་ཐོག་ཕུ་ལ་བའི་ཞུ་སྙན་དེའི་ནང་། དེ་རིང་ཕྱི་ཚེས་ ༢༥ ཉིན་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་༸སྐུའི་འཁྲུངས་སྐར་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་པཎ་ཆེན་སྐུ་འཕྲེང་བཅུ་པའི་ཡང་སྲིད་འཁྲུལ་བྲལ་ཡིན་པར་ངོས་འཛིན་དང་ཡོངས་ཁྱབ་གསལ་བསྒྲགས་མཛད་ནས་ཉིན་གསུམ་གྱི་རྗེས་རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་དང་ཁོང་གི་ཡབ་ཡུམ་གཙོས་པའི་སྐུ་འཁོར་ལྷན་རྒྱས་བཅས་པ་བཙན་ཁྲིད་གསང་ཉར་བྱས་ནས་ད་བར་ལོ་ངོ་ ༢༥ འགྲོ་གི་ཡོད་པ་མ་ཟད། ལྷག་དོན་རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་བཙན་ཁྲིད་གསང་ཉར་བྱས་སྟབས་མི་མང་གིས་ད་བར་ལོ་ངོ་ ༢༥ རིང་༸ཀུན་གཟིགས་༸པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་༸སྐུ་འཚོ་བཞུགས་ཡིན་སྐོར་བཤད་པ་དེ་ལྟར་ཡང་ད་བར་མང་ཚོགས་ཁྲོད་ནས་མིག་མཐོང་རྣ་ཐོས་ཡོད་མཁན་སུ་གང་བྱུང་མྱོང་མེད་པ་རེད། འོན་ཀྱང་རིན་པོ་ཆེ་མཆོག་༸སྐུ་འཚོ་བཞུགས་ཡིན་པར་ཡིད་ཆེས་ཞུ་བཞིན་ཡོད་སྐོར་འཁོད་འདུག དེ་བཞིན་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ཆེད་ལས་མཁས་པའི་ཚོགས་ཆུང་ལ་ཕྱི་ལོ་ ༡༩༩༥ ལོར་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེབ་སྐྱེལ་ཞུས་ཡོད་པ་ལྟར། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེ་གར་སོང་ཆ་མེད་དུ་གྱུར་བའི་གནད་དོན་རྙིང་གྲས་ལས་གཅིག་ཆགས་ཀྱི་ཡོད་པ་དང་རིན་པོ་ཆེ་མཆོག་ནི་འཛམ་གླིང་ནང་གི་ཆབ་སྲིད་བཙོན་པ་དུས་ཡུན་རིང་ཤོས་དང་ལོ་ན་ཆུང་ཤོས་དེ་ཆགས་ཀྱི་ཡོད་པ་གསུངས་འདུགཡོ་རོབ་གྲོས་ཚོགས་ཀྱི་འཐུས་མི་དེ་དག་གི་གཞན་ཡང་འགྲོ་བ་མིའི་ཐོབ་ཐང་དང་རང་དབང་སོགས་ཀྱི་རྨང་གཞིའི་ཐོག་ནས་བོད་ནི་འཛམ་གླིང་ནང་གི་རང་དབང་ཆེས་ཞན་ཤོས་སིརྱའི་རྗེས་སུ་ས་ཁུལ་ཨང་པ་གཉིས་པ་དེ་ཡིན་པར་མངོན་གསལ་གནང་འདུག་པ་མ་ཟད། རྒྱ་ནག་གཞུང་གིས་བོད་མིའི་ཐོག་དྲག་གནོན་དང་དམ་དྲག་ཆེས་ཆེར་བྱས་དང་བྱེད་བཞིན་ཡོད་པས་ད་ལྟའི་ཆར་བོད་འདི་ལོ་བཅུ་ཕྲག་དྲུག་ལྷག་གི་རིང་ལྕགས་ཚུར་དམ་པོ་བཅིངས་པའི་གནས་བབས་འོག་གནས་ཡོད་པ་རེད། རྒྱ་ནག་གཞུང་གི་ངོས་ནས་ད་བར་བོད་མིའི་འགྲོ་བ་མིའི་ཐོབ་ཐང་གི་རང་དབང་ལ་རྩིས་མེད་རྡོག་རོལ་ཇི་ཙམ་བཏང་ཡོད་པའི་དཔེ་མཚོན་ཡག་ཤོས་ནི་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེ་ཆགས་ཡོད་པར་མངོན་གསལ་གནང་འདུག མཐའ་མཇུག་དེར་གྲོས་ཚོགས་འཐུས་མི་དེ་དག་གིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྲིད་བྱུས་དེ་དག་འཕྲལ་མར་བཀག་སྡོམ་བྱེད་དགོས་པ་དང་། ཡོ་རོབ་མཐུན་ཚོགས་ཀྱིས་བོད་ནང་ལ་ཆོས་དད་རང་དབང་ཡོང་བར་རྒྱ་གཞུང་ནས་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་དབུས་པའི་ཡབ་ཡུམ་སྐུ་འཁོར་རྣམ་པ་དང་དེ་བཞིན་བོད་མིའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་ངེས་པར་དུ་གློད་བཀྲོལ་དགོས་པའི་ཞུ་སྐུལ་ནན་པོ་གནང་འདུགགཞན་ཡང་ཉེ་ཆར་ཟླ་ ༤ ཚེས་ ༨ ཉིན་སྦེལ་ཇམ་དབུས་གྲོས་ཚོགས་འོག་མིའི་འཐུས་མི་དང་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་སེ་མུལ་ཁོ་གྷོ་ལ་ཊི་ Samuel Cogolati མཆོག་གིས་ཀུན་གཟིགས་པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་ཀྱི་ཡོད་པའི་སྐུའི་འཁྲུངས་སྐར་དང་འབྲེལ་བའི་བསྒྲགས་གཏམ་ཞིག་སྤེལ་བའི་ནང་རྒྱ་ནག་གཞུང་གིས་ལོ་ངོ་ ༦༠ སྔོན་ལ་བོད་དེ་བཙན་བཟུང་བྱས་པའི་རྗེས་སུ་བོད་ནང་ཆེས་དྲག་གནོན་གྱི་སྲིད་བྱུས་ལག་བསྟར་བྱས་དང་བྱེད་བཞིན་པའི་ཁྲོད་བོད་དེ་འཛམ་གླིང་ནང་དམ་དྲག་ཆེས་ཤོས་ཀྱི་ས་ཁུལ་གྲས་སུ་ངོས་འཛིན་བྱེད་བཞིན་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་པཎ་ཆེན་སྐུ་འཕྲེང་བཅུ་པའི་ཡང་སྲིད་འཁྲུལ་བྲལ་ཡིན་པར་ངོས་འཛིན་དང་ཡོངས་ཁྱབ་གསལ་བསྒྲགས་མཛད་ནས་ཉིན་གསུམ་གྱི་རྗེས་རྒྱ་ནག་གཞུང་གིས་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་ནས་ད་བར་ལོ་ངོ་ ༢༥ འགྲོ་གི་ཡོད་པ་གསུངས་ཡོད་པ་མ་ཟད། རྒྱ་་གཞུང་གིས་རིན་པོ་ཆེ་མཆོག་སྐུ་འཚོ་བཞུགས་ཡིན་སྐོར་བཤད་པར་ཡིད་ཆེད་རྩ་བ་ནས་བྱེད་ཐབས་མེད་པ་བཞིན་གནད་དོན་དེ་གཙོས་པའི་རྒྱ་གཞུང་གིས་བོད་མིའི་ཐོག་དྲག་གནོན་ཚད་མེད་བྱེད་བཞིན་པ་དེ་དག་གི་ཐོག་གླེང་སློང་གནང་རྒྱུ་གལ་ཆིན་པོ་ཡིན་སྐོར་གསུངས་འདུག དེ་བཞིན་ཁོང་གིས་སྦེལ་ཇམ་གྲོས་ཚོགས་ནང་ཡུལ་དེའི་བདེ་སྲུང་དང་ཕྱི་སྲིད་བློན་ཆེན་སྐུ་ཞབས་ Phillipe Goffin མཆོག་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་ཐོག་སྦེལ་ཇམ་གཞུང་གི་བཞེངས་ཕྱོགས་གང་འདྲ་ཡོད་དམ་ཞེས་འདྲི་བརྩད་ཀྱང་གནང་ཡོད་པ་རེད།རྩ་བའི་རྒྱ་ནག་གྲོང་ཁྱེར་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་བརྡལ་རྐྱེན་པས་ད་ཆ་རྒྱ་གར་རྒྱལ་ཡོངས་ཟླ་བ་གཅིག་ལྷག་ཐེམ་སྤང་གི་བཀག་རྒྱའི་འོག་གནས་ཡོད་པ་ལྟར། རྒྱལ་སྤྱིའི་ཁྲོན་དུ་གཞུང་དང་གཞུང་འབྲེལ་མིན་པའི་ལས་ཁུངས་ཡོངས་སུ་སྒོ་བརྒྱབ་ཏེ་མང་ཚོགས་ཀྱི་འགྲོ་འདུག་ལ་ཚད་བཀག་གནང་བའི་དུས་སྐབས་འདིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིས་གཙོས་བོད་མི་དང་བོད་དོན་ཐོག་སེམས་ཁུར་ལྡན་པའི་རྒྱལ་སྤྱིའི་སྤྱི་ཚོགས་དང་སྒེར་བཅས་ནས་རིན་པོ་ཆེ་མཆོག་མགྱོགས་མྱུར་གློད་བཀྲོལ་སླད་ཞུ་གཏུག་གི་ལས་འགུལ་སྤེལ་ཐབས་གནང་དགོས་པའི་འབོད་སྐུལ་གནང་ཡོད་པ་དང་། བོད་མིའི་སྒྲིག་འཛུགས་ཀྱི་ངོས་ནས་ཀྱང་དེ་རིང་ཕྱི་ཚེས་ ༢༥ ཉིན་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་༸སྐུའི་འཁྲུངས་སྐར་དང་། རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་དང་སྐུ་འཁོར་ལྷན་རྒྱས་བཙན་ཁྲིད་གསང་ཉར་བྱས་སྟབས་ད་བར་ལོ་ངོ་ ༢༥ འཁོར་བའི་ཉིན་མོ་དང་བསྟུན་དྲྭ་རྒྱ་ཐོག་ནས་རིན་པོ་ཆེ་མཆོག་གློད་བཀྲོལ་ཡོང་བའི་ཞུ་གཏུག་གི་ལས་འགུལ་རབ་དང་རིམ་པ་སྤེལ་མུས་ཡིན་པ་རེད།

ཕྱི་ཟླ་ ༢ ཚེས་ ༡༠ ནས་ ༡༤ བར་སུད་སི་གྲོང་ཁྱེར་ཇི་ཝར་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་ཡོད་པ་ལྟར་ཚོགས་ཆེན་དེ་དང་བསྟུན་བོད་མའི་སྐུ་ཚབ་ནས་འབྲེལ་ཡོད་ཚོགས་ཆུང་ལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མིའི་ཆབ་སྲིད་བཙོན་པའི་གནད་དོན་སྐོར་ལ་ཞུ་གཏུག་སྙན་སེང་ཞུས་འདུག གཙོ་བོར་དེ་སྔ་ཕྱི་ལོ་ ༡༩༩༥ ལོར་སུད་སི་སྐུ་ཚབ་དོན་གཅོད་ཁང་ནས་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ལ་རྒྱ་གཞུང་གིས་བཙན་ཁྲིད་བྱས་པའི་འོག་གར་སོང་ཆ་མེད་དུ་གྱུར་བའི་ ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་ཡབ་ཡུབ་གཉིས་ཀྱི་གནད་དོན་གྱོད་གཞི་ཐོ་འཁོད་ངོས་བཞེས་གནང་བ་ནས་བཟུང་ད་བར་རྒྱུན་མི་ཆད་པར་འཇུག་སྣོན་ཞུ་གཏུག་གནང་བཞིན་པའི་ཁྲོད་འདིར་ཉེ་ཆར་སུད་སི་སྐུ་ཚབ་དོན་གཅོད་འཆེ་མེད་རིན་འཛིན་ལགས་ཀྱིས་སྣི་ཁྲིད་འོག་དོན་ཁང་གི་འགྲོ་བ་མིའི་ཐོབ་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་དང་འཕྲིན་ལས་ཆོས་སྐྱིད་ལགས་བཅས་གསུམ་ནས་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་གྱི་ཚོགས་ཐེངས་ ༡༢༠ ཚོགས་པ་དང་བསྟུན་རྒྱལ་ཚོགས་ཀྱི་གར་སོང་ཆ་མེད་ལས་དོན་ཚོགས་ཆུང་ཚོགས་གཞོན་སྐུ་ཞབས་ Tae Uug Baik ལགས་སུ་མཇལ་མོལ་གྱིས་ད་ལྟའི་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གནས་བབས་དང་བོད་མིའི་རང་ལུས་མེར་སྲེག་གི་གནད་དོན། ༸པཎ་ཆེན་དགེ་ཆོས་ཀྱི་ཉི་མ་མཆོག་གི་གནད་དོན་མུ་མཐུད་འཇུག་སྐྱོང་ཞུ་གཏུག་གནང་བ་དང་འབྲེལ། རྒྱལ་ཚོགས་ནས་རྒྱ་གཞུང་ལ་གནོན་ཤུགས་སྤྲད་དེ་རིན་པོ་ཆེ་མཆོག་གིས་གཙོས་པའི་ད་བར་གར་སོང་ཆ་མེད་དུ་གྱུར་བའི་བོད་མི་རྣམས་ཀྱི་གནད་དོན་རྩད་གཅོད་གནང་ཕྱིར་རྒྱལ་ཚོགས་ཀྱི་རང་དབང་རྟོག་ཞིབ་ཚོགས་ཆུང་ཞིག་བོད་ནང་ཆེད་བསྐྱོད་གནང་རྒྱུ། དེ་བཞིན་རྒྱ་གཞུང་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་དང་བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་བྱ་སྤྱོད་རྣམས་འཕྲལ་དུ་མཚམས་འཇོག་ཡོང་བར་གནོན་ཤུགས་སྤྲོད་རོགས་ཞེས་འབོད་སྐུལ་སོགས་གནང་ཡོད་པ་རེད། སྔ་ལོའི་ཕྱི་ཟླ་དགུ་པའི་ནང་ཚོགས་པའི་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་ཐོག་རྟོག་ཞིབ་གནང་མཁན་གྱི་མཁས་ལས་དོན་ཚོགས་ཆུང་གི་ཚོགས་འདུ་ཐེངས་ ༡༡༩ སྟེང་ལས་དོན་ཚོགས་ཆུང་གི་ངོས་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མཆོག་གི་གནད་དོན་དང་འབྲེལ་ཏེ་འདྲི་རྩད་བྱས་པར་རྒྱ་ནག་གཞུང་གིས་༸པཎ་ཆེན་རིན་པོ་མཆོག་རྒྱུན་ལྡན་གྱི་འཚོ་བར་རོལ་བཞིན་ཡོད་སྐོར་བརྗོད་པ་དང་འབྲེལ། ད་ལྟའི་ཆར་གཙུག་ལག་སློབ་གྲྭ་ཆེན་མོ་ཐོན་ནས་ཕྱག་ལས་གནང་གི་ཡོད་ཅེས་བརྗོད་པ་ཙམ་ལས་ཞིབ་ཕྲའི་གནས་ཚུལ་ཁ་གསལ་གང་ཡང་བཤད་མེད་པ་རེད། སྐབས་དེར་རྒྱ་གཞུང་གིས་ལན་འདེབས་དེ་ཕྱི་ལོ་ ༢༠༡༣ ལོར་༸པཎ་རིན་པོ་ཆེའི་གནད་དོན་སྐོར་ལ་རྒྱལ་ཚོགས་ལན་འདེབས་གནང་བའི་རྗེས་ཀྱི་ལན་འདེབས་ཐོག་མ་དེ་ཆགས་ཀྱི་ཡོད་པ་རེད། འོན་ཀྱང་སྐབས་དེར་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་མཁས་ལས་ལས་དོན་དོན་ཚོགས་ཆུང་ནས་རྒྱ་ནག་གཞུང་གིས་གསལ་བཤད་ལན་འདེབས་དེ་ནི་འདོད་བློ་ཁེངས་པ་ཞིག་མི་འདུག་ཅེས་དང། རིན་པོ་ཆེ་མཆོག་གི་གནས་སྟངས་སྐོར་ལ་ཞིབ་འཇུག་དང་ཤེས་རྟོགས་ཁ་གསལ་ཡོང་བའི་གནས་ཚུལ་ཆ་ཚང་བ་ཞིག་རྒྱ་གཞུང་ནས་ལན་འདེབས་ནང་མི་འདུག་པས་ལས་དོན་ཚོགས་ཆུང་ནས་དེ་འབྲེལ་ཐོག་དོ་སྣང་གནང་གནད་ཡིན་སྐོར་རྒྱ་ནག་གཞུང་ལ་བསྐྱར་ནན་གནང་ཡོད་པ་རེད། རྩ་བའི་འཛམ་གླིང་ནང་རྒྱལ་ཁབ་ཁག་གི་ཁྲོད་དུ་གར་སོང་ཆ་མེད་དུ་གྱུར་བའི་གནད་དོན་ཐོག་ལྟ་སྲུང་ རོགས་སྐྱོར་བྱེད་མཁན་མཉམ་འབྲེལ་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དབུ་བརྙེས་ཏེ་འདི་ལོར་ལོ་ངོ་ ༤༠ འཁོར་བ་དང་བསྟུན་ཁ་སང་སྤེལ་བའི་སྤྱི་བསྒྲགས་ནང་འདས་པའི་ལོ་ངོ་དེ་དག་ནང་འཛམ་གླིང་རྒྱལ་ཁབ་འདྲ་མིན་ ༡༠༠ ལྷག་གི་ཁྲོད་ནས་གར་སོང་ཆ་མེད་དུ་གྱུར་བའི་གྱོད་གཞི་ཁྱོན་ ༥༨༠༠༠ ལྷག་ཚོགས་ཆུང་ལ་ཐོ་འཁོད་སྙན་སེང་ཞུས་ཡོད་པའི་ཁྲོད་ནས་གྱོད་གཞི་ ༤༦༠༠༠ དུང་ཡང་གསལ་མ་ཐུབ་པར་ལྷག་ཡོད་པར་མངོན་གསལ་གནང་འདུག་པར་མ་ཟད་བཙན་ཁྲིད་འོག་གར་སོང་ཆ་མེད་དུ་གྱུར་བའི་གནད་དོན་མུ་མཐུད་ནས་འཕྲད་བཞིན་པ་འདིས་འཛམ་གླིང་ནང་ཁྱོན་ཡོངས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐོང་རྡོག་རོལ་གྱི་གནད་དོན་ཚབས་ཆེས་ཆེར་འགྲོ་བཞིན་ཡོད་པར་བརྗོད་འདུག དེ་བཞིན་ཁ་སང་ལས་དོན་ཚོགས་ཆུང་དེ་དབུ་བརྙེས་ནས་ལོ་ངོ་ ༤༠ འཁོར་བའི་དུས་དྲན་སྲུང་བརྩི་དང་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གནས་ཡུལ་དུ་དམིགས་བསལ་གྱི་འདུ་འཛོམས་ཆེས་ཐོག་མ་དེ་གཉེར་ཡོད་པ་དང། སྐབས་དེར་ཚོགས་ཆུང་གིས་སླད་མར་འབྲེལ་ཡོད་འཛམ་གླིང་ས་ཕྱོགས་གང་ས་ནས་ཚོགས་སྡེ་ཁག་དང་མང་ཚོགས་ངོས་ནས་གར་སོང་ཆ་མེད་ཀྱི་གྱོད་གཞི་གང་འདྲ་ཞིག་ཡིན་རུང་སྟབས་བདེ་ཐོག་ལས་དོན་ཚོགས་ཆུང་ལ་ཞུ་གཏུག་ཐོ་འགོད་དང་སྙན་སེང་ཞུ་ཕྱིར་ཆེད་དམིགས་བསལ་བཀོད་སྤྱོད་མཉེན་ཆས་ཤིག་ཀྱང་དབུ་འབྱེད་གནང་ཡོད་པ་རེད། སུད་སི་གཅོད་ཁང་གི་རྒྱལ་ཚོགས་དང་འབྲེལ་ཡོད་ཀྱི་ལས་བྱེད་རྣམས་བོད་མིའི་སྐུ་ཚབ་ཐོག་ནས་མཛད་སྒོར་མཉམ་ཞུགས་ཀྱང་གནང་ཡོད་པ་རེད།

CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་ནས་རྒྱ་ནག་གཞུང་གི་བཙོན་འོག་ཏུ་ཡོད་པ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་དབུས་པའི་བོད་དང་ཡུ་གུར། ཧོང་ཀོང་། དེ་བཞིན་རྒྱ་ནག་བཅས་ཀྱི་འགྲོ་བ་མིའི་ཐོབ་ཐང་རྩོད་ལེན་པ་དང་ཆབ་སྲིད་བཙོན་པ་རྣམས་ངེས་པར་དུ་གློད་བཀྲོལ་དགོས་པ་གསུངས་འདུག ཉེ་ཆར་ཕྱི་ཚེས་ ༨ ཉིན་ཚོགས་ཆུང་དེའི་ངོས་ནས་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་ཀྱི་ཐོག་དཔྱད་ཞིབ་གནང་བའི་ཕྱི་ལོ་ ༢༠༡༩ ལོའི་རྒྱ་ནག་ཐོག་གི་ལོ་འཁོར་སྙན་ཐོ་འདོན་སྤེལ་གནང་བ་དང་འབྲེལ། ཁ་སང་སྐུ་ཞབས་ James McGovern ལགས་ནས་རང་ཉིད་ཀྱི་འཕྲུལ་སྒྲ་ཐོག་བརྙན་ཐུང་ཞིག་གི་བརྒྱུད་རྒྱ་ནག་གཞུང་གི་ད་བར་ཁྲིམས་མཐུན་མ་ཡིན་པར་འཛིན་བཟུང་བཀག་ཉར་དང་བཙོན་འཇུག་སོགས་ཀྱི་ཁྲིམས་ཐག་བཅད་པའི་ཆབ་སྲིད་བཙོན་པ་རྣམས་ལ་རྒྱབ་སྐྱོར་གནང་བ་དང་སྦྲགས་ཏེ་ཁོང་རྣམ་པའི་དངོས་ཡོད་གནས་སྟངས་སྐོར་ཞུ་གཏུག་དང་གླེང་སློང་གནང་རྒྱུ་དེ་ནི་ཚོགས་ཆུང་དེའི་ལས་འགན་གཙོ་བོ་ཞིག་ཏུ་ངོས་འཛིན་གནང་བཞིན་ཡོད་པར་འགྲེལ་བརྗོད་གནང་འདུག་པ་དང་། རྒྱ་ནག་གཞུང་གིས་དེ་སྔ་ ༡༩༩༥ ལོར་འཛིན་བཟུང་བཙན་ཁྲིད་བྱས་པའི་བོད་མིའི་ཆོས་ཕྱོགས་ཀྱི་དབུ་ཁྲིད་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ད་ཆ་དགུང་གྲངས་ ༣༠ ལ་ཕེབས་བཞིན་ཡོད་ཀྱང་རྒྱ་གཞུང་གིས་དམ་དྲག་འོག་རིན་པོ་ཆེ་མཆོག་གིས་གཙོས་པའི་སྐུ་ཉིད་ཀྱི་ནང་མི་རྣམ་པའི་གནས་སྟངས་གང་ཡིན་སོགས་ཤེས་རྟོགས་གང་ཡང་མེད་པར་གྱུར་ཡོད་པར་འགྲེལ་བརྗོད་ཀྱིས་རྒྱ་ནག་གཞུང་ནས་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ངེས་པར་དུ་གློད་བཀྲོལ་གཏོང་དགོས་ཞེས་གསུངས་འདུག སྐུ་ཞབས་མཆོག་ནས་ད་དུང་རྒྱ་ནག་གཞུང་གིས་འཛིན་བཟུང་བཀག་ཉར་དང་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་པ་རྣམས་མཉམ་འབྲེལ་རྒྱལ་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་གི་གཞི་རྩའི་རྩ་འཛིན་ནང་གསལ་ལྟར་སྨྲ་བརྗོད་དང་འདུ་འཛོམས། ཆོས་དད་རང་དབང་བཅས་སོ་སོ་སྒེར་གྱི་རིག་གཞུང་སྲུང་སྐྱོབ་ཀྱི་ལས་དོན་བསྒྲུབ་མཁན་ཡིན་པར་འགྲེལ་བརྗོད་གནང་བ་དང་སྦྲགས། རྒྱ་གཞུང་གི་བཙོན་འཇུག་ཁྲིམས་ཐག་མྱོང་བཞིན་པའི་བོད་ཀྱི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་དང་། དེ་སྔ་༸གོང་ས་མཆོག་གི་༸སྐུའི་གྱ་སྟོན་སྲུང་བརྩི་དང་འབྲེལ་འཛིན་བཟུང་ཁྲིམས་ཐག་བཅད་པ་བོན་ཁོ་སྐྱིད་ལགས་ཀྱིས་གཙོས་པའི་བོད་མིའི་ཆབ་སྲིད་བཙོན་པ་རྣམས་ཀྱང་ངེས་པར་དུ་གློད་བཀྲོལ་གཏོང་དགོས་པ་བསྐྱར་ནན་གསུངས་འདུག དེ་བཞིན་སྐུ་ཞབས་ James McGovern ལགས་ནས་རྒྱ་གཞུང་གི་བཀག་ཉར་དང་བཙོན་འཇུག་འོག་ཡོད་པ་ཁྲིམས་རྩོད་པ་ Gao Zhisheng ལགས་དང་ Li Yuhan ལགས། གསར་འགོད་པ་ Huang Qi ལགས། མང་གཙོ་དོན་གཉེར་བ་ Qin Yongmin ལགས། ངལ་རྩོལ་ཐོབ་ཐང་རྩོད་ལན་པ་ Zhang Zhiyu ལགས། དེ་བཞིན་སློབ་དཔོན་པོ་ Chan Kin-man ལགས་སོགས་ཀྱི་རྒྱབ་ལྗོངས་ལོ་རྒྱུས་མདོར་བསྡུས་སུ་འགྲེལ་བརྗོད་གནང་སྟེ་རྒྱ་ནག་གཞུང་ནས་ཡུ་གུར་དང་ཧོང་ཀོང་། དེ་བཞིན་རྒྱ་ནག་བཅས་ཀྱི་འགྲོ་བ་མིའི་ཐོབ་ཐང་རྩོད་ལེན་པ་དང་ཆབ་སྲིད་བཙོན་པ་རྣམས་ཀྱང་གློད་བཀྲོལ་གཏོང་དགོས་པའི་སྐུལ་མ་གནང་ཡོད་པ་རེད། དེ་བཞིན་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ནས་ རང་ཉིད་ཀྱི་འཕྲུལ་སྒྲ་ཐོག་ཉེ་ཆར་ཕྱི་ཚེས་ ༡༡ ཉིན་རྒྱ་ནག་གཞུང་ནས་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་མི་དམངས་འཐུས་མི་ཚོགས་ཆེན་སྐབས་བཅུ་གཅིག་པའི་ཚོགས་འདུ་ཐེངས་གསུམ་པའི་ཐོག་བོད་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་གཏོད་པའི་སྲོལ་ཡིག་ཞེས་པའི་ཁྲིམས་འཆར་ཞིག་གཏན་འབེབས་བྱས་པ་དེ་ནི་རྒྱ་ནག་གཞུང་ནས་ད་ཆ་ཤིན་ཅང་དུ་ལག་བསྟར་བྱེད་བཞིན་པའི་དྲག་པོའི་སྲིད་བྱུས་དེ་དག་བོད་དུ་ལག་ལྟར་བྱ་རྒྱུའི་ཐབས་བྱུས་ཤིག་ཡིན་པ་གསུངས་འདུག གཞི་རྩའི་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་བཞིན་དུ་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་དང་འབྲེལ་ཨ་རིའི་གྲོས་ཚོགས་ནང་ཉན་ཞིབ་ལས་རིམ་དང་། ཁྲིམས་འཆར་འདོན་སྤེལ་སོགས་གནང་མུས་ལྟར་ཉེ་ཆར་འདོན་སྤེལ་གནང་བའི་ཕྱི་ལོ་ ༢༠༡༩ ལོའི་རྒྱ་ནག་ཐོག་གི་ལོ་འཁོར་སྙན་ཐོར་འདས་ལོ་ ༢༠༡༩ ནང་རྒྱ་ནག་ནང་དུ་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ཁྲིམས་ལུགས་དབང་འཛིན་ལག་བསྟར་བྱེད་ཕྱོགས་ཇེ་སྡུག་ཏུ་ཕྱིན་འདུག་ཅེས་གསུངས་ཡོད།

རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱལ་སྲུང་སྲིད་བྱུས་ཞེས་པའི་འོག ཕྱིའི་འཛམ་བུ་གླིང་དང་བོད་དབར་དེང་དུས་ཀྱི་ཆ་རྐྱེན་ལྡན་པའི་འགག་སྒོ་མཁྲེགས་པོ་ཞིག་བཟོ་བསྐྲུན་བྱེད་དགོས་པའི་དམིགས་ཡུལ་གྱི་འོག་ནས་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་ཞེས་པའི་འཛུགས་སྐྲུན་ལས་གཞི་དེ་འདི་ལོ་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག དེ་ཡང་ཨ་རིའི་རྒྱལ་ས་ Washington DC ནང་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁ་ཉིན་གནས་ཚུལ་སྤེལ་བའི་ནང་དུ། རྒྱ་ནག་གཞུང་གིས་འདི་ལོ་བོད་ཀྱི་ས་མཚམས་ས་ཁུལ་དུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་འཛུགས་བསྐྲུན་ཞེས་པའི་ལས་གཞི་དེ་ཤུགས་ཆེ་རུ་བཏང་བའི་འོག   གྲོང་འཚོ་དེ་དག་གི་ནང་དུ་རྒྱ་ནག་དམར་ཤོག་ཚོགས་པའི་ལས་བྱེད་པ་ཆེད་འཛུགས་ཀྱིས་༸གོང་ས་མཆོག་ལ་དད་གུས་བྱེད་མཁན་བོད་མི་ཚོ་གཙོ་བྱས་པའི་ཕྱིའི་སྟོབས་ཤུགས་སིམ་འཛུལ་གྱི་རིགས་ལ་འགོག་རྒོལ་གྱི་ལས་གཞི་སྤེལ་བཞིན་པ་དང། དེའི་ཁྲོད་བོད་ཀྱི་མཐའ་མཚམས་ས་ཁུལ་ཁག་གི་གྲྭ་བཙུན་རྣམས་ལ་༸གོང་ས་མཆོག་གི་ཤུགས་རྐྱེན་ལ་འགོག་རྒོལ་བྱེད་ཕྱོགས་ཀྱི་དམིགས་གསལ་སྦྱོང་དར་སྤྲད་པ་དང། དེ་བཞིན་བོད་ཀྱི་རྒྱལ་ས་ལྷ་ས་ནས་ཟི་ཁྲོན་ཞིང་ཆེན་བར་དུ་མེ་འཁོར་ལྕགས་ལམ་དང་ཕུག་ལམ་འཛུགས་སྐྲུན་བྱས་ཟིན་པ་སོགས་ཐེར་འདོན་གནང་འདུག ལས་འགུལ་ཁང་གིས་རྒྱ་ནག་གཞུང་འབྲེལ་བརྒྱུད་ལམ་རང་གི་ཐོག་ཐོན་པའི་གནས་ཚུལ་ལ་གཞིགས་ཏེ། རྒྱ་གཞུང་གིས་ཕྱི་ལོ་་༢༠༡༧ ལོ་ནས་ཕྱི་ལོ ༢༠༢༠ བར་གྱི་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་སྲུང་གྲོང་ཚོ་འཛུགས་སྐྲུན་གྱི་ལས་གཞི་ཕྱིར་བསྒྲགས་བྱས་པའི་ནང་དུ། བོད་ཀྱི་མཐའ་མཚམས་ས་ཁུལ་ཁག་ཏུ་གྲོང་ཚོ་འདིའི་རིགས་ ༦༢༤ ཙམ་འཛགས་སྐྲུན་བྱེད་འཆར་ཡོད་པ་དང་། དེ་དག་རྒྱ་གར་གྱི་ཨ་རུ་ན་ཅལ་མངའ་སྡེ་དང་ས་ཐག་ཉེ་བའི་ཉིང་ཁྲི་ས་ཁུལ་དང་། དེ་བཞིན་གཞིས་ཀ་རྩེ་བཅས་ཀྱི་ནང་དུ་འཛུགས་སྐྲུན་བྱེད་འཆར་ཡོད་པ་དང། གྲོང་ཚོ་དེ་དག་ནི་མི་འབོར་ཤུགས་ཆེན་པོ་མེད་པའི་ས་ཁུག་ཁག་དང་། བོད་ནང་གི་བོད་མི་རྣམས་བལ་ཡུལ་དང་རྒྱ་གར་ལ་བྲོས་བྱོལ་ཡོང་སའི་ས་ཁུལ་ཁག་ཏུ་འཛུགས་སྐྲུན་བྱེད་བཞིན་པ་མངོན་གསལ་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་གཞུང་གི་ངོས་ནས་རྒྱ་དཀར་ནག་གཉིས་ཀྱི་ས་མཚམས་ནས་ས་ཐག་རིང་ཐུང་ལ་གཞིགས་ཏེ་སྲུང་སྐྱོབ་ཀྱི་རིམ་པ་དང་པོ་དང་། རིམ་པ་གཉིས་པ་ཞེས་མིང་བཏགས་ཡོད་པ་དང་། ད་ལྟའི་ཆར་རིམ་པ་དང་པོའི་ས་ཁུལ་ཁག་གི་ནང་དུ་གྲོང་ཚོ་ ༤༢༧ འཛུགས་སྐྲུན་ཟིན་པ་དང། དེ་ནས་རིམ་པ་གཉིས་པའི་ས་ཁུལ་ནང་དུ་ད་བར་གྲོང་ཚོ་གསར་པ་༢༠༡ འཛུགས་སྐྲུན་བྱས་ཟིན་པ། དེ་བཞིན་འཛུགས་སྐྲུན་གྱི་ལས་གཞི་དེའི་འོག་ས་གནས་བོད་མི་རྣམས་བཙན་དབང་གིས་གཞིས་སྤོར་བྱེད་དུ་བཅུག་ཡོད་པར་གསུངས་པ་དང་འབྲེལ། རྒྱ་གཞུང་གིས་ས་མཚམས་ཁག་ཏུ་རྒྱལ་སྲུང་གྲོང་ཚོ་གསར་སྐྲུན་གྱི་ལས་གཞིར་དོ་སྣང་ཆེན་པོ་བྱེད་དགོས་དོན་གཅིག་ནི། ས་གནས་བོད་རིགས་འགོ་ཁྲིད་རྣམས་ལ་དམར་ཤོག་ཚོགས་པར་བློ་གཏད་བྱེད་དགོས་པ་དང་། དམར་ཤོག་ཚོགས་པའི་སྟངས་འཛིན་འོག་སྡོད་དུ་འཇུག་རྒྱུའི་ཆེད་དུ་ཡིན་པ་མངོན་རྒྱུ་ཡོད་པ་གསུངས་འདུག དེ་བཞིན་རྒྱ་གཞུང་གིས་རྒྱ་ནག་མི་དམངས་བཅིངས་གྲོལ་དམག་མིའི་དབང་ཚད་རྒྱ་ཆེ་རུ་བཏང་སྟེ་བོད་ཀྱི་ས་མཚམས་བརྒལ་ནས་རྒྱ་གར་དང་བལ་ཡུལ་སོགས་ཀྱི་ནང་དུའང་ཉམས་ཞིབ་བྱེད་དུ་འཇུག་བཞིན་ཡོད་པ་དང་། རྒྱལ་སྲུང་གྲོང་ཚོའི་ནང་གི་དམར་ཤོག་ཚོགས་པའི་ལས་བྱེད་པ་རྣམས་ལ་ཡང་རྒྱ་གར་དང་བལ་ཡུལ་གྱི་ས་མཚམས་ས་ཁུལ་དུ་འབྲེལ་བ་བྱས་པ་བརྒྱུད་རྒྱ་ནག་གི་ཤུགས་རྐྱེན་ཆེ་རུ་གཏོང་རྒྱུའི་ལས་འགན་སྤྲད་ཡོད་པ་ཐེར་འདོན་གནང་འདུག འདི་གའི་གསར་འགོད་པས་གནད་དོན་དེའི་ཐོག་ཕྱི་ལོ་་༢༠༡༧ ཙམ་ནས་ཉམས་ཞིབ་གནང་བཞིན་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པདྨ་རྒྱལ་ལགས་སུ་བཀའ་འདྲི་ཞུས་པར་ཁོང་གིས་རྒྱ་གཞུང་གིས་རྩ་བའི་རྒྱལ་ཁབ་ཀྱི་ས་མཚམས་སྲུང་སྐྱོབ་ཀྱི་མིག་ཐོག་ནས་བོད་མིའི་ཐོག་དམ་དྲག་བྱེད་རྒྱུ་དང་། འདི་ལོ་རྒྱ་ནག་གིས་པཎ་ཆེན་རྒྱལ་མཚན་ནོར་བུ་སྐྱིད་རོང་ཁུལ་དུ་སླེབས་སྐབས་བལ་ཡུལ་ནས་སླེབས་པའི་མི་མང་ཁག་ཅིག་ལ་གཏམ་བཤད་སྤེལ་བ་སོགས་ལ་གཞིགས་ཏེ།  རྒྱ་གཞུང་གི་དམིགས་ཡུལ་གཞན་གཅིག་ནི་ལས་གཞི་དེའི་འོག་རྒྱ་གར་དང་བལ་ཡུལ་གྱི་ས་མཚམས་སུ་གནས་བའི་མི་སེར་རྣམས་རྒྱ་ནག་གི་མི་སེར་ལ་བསྒྱུར་ཐབས་སོགས་ཡིན་པ་གསུངས་སོང་།

༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་ཀྱིས་ད་བར་གར་ཡོད་ཤེས་རྟོགས་མེད་པར་གྱུར་བའི་གནས་སྟངས་ཁྲོད། རྒྱ་ནག་གཞུང་གིས་རྒྱལ་ཚོགས་ལ་ལན་འདེབས་བྱས་པའི་གནས་ཚུལ་ཞིག་ཉེ་ཆར་ཕྱིར་ཐོན་པར་གཞིགས་ན་༸པཎ་ཆེན་དགེ་འདུན་ཆོས་ཀྱི་ཉི་མཆོག་ད་ལྟའི་ཆར་གཙུག་ལག་སློབ་གྲྭ་ཆེན་མོ་ཐོན་ནས་ལས་ཀ་བྱེད་ཀྱི་ཡོད་ཅེས་བརྗོད་འདུག འདི་ལོའི་ཕྱི་ཟླ་དགུ་པའི་ནང་ཚོགས་པའི་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་གྱུར་པའི་མི་སྣ་ཁག་ཐོག་རྟོག་ཞིབ་གནང་མཁན་གྱི་མཁས་ལས་ལས་དོན་ཚོགས་ཆུང་གི་ཚོགས་འདུ་ཐེངས་ ༡༡༩ པའི་སྟེང་ལས་དོན་ཚོགས་ཆུང་གིས་ངོས་ནས་རྒྱ་ནག་གཞུང་ལ་གར་སོང་ཆ་མེད་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མཆོག་གི་དྲིས་རྩད་བྱས་འདུག་པ་དང་། སྐབས་དེར་རྒྱ་ནག་གཞུང་གིས་རྒྱུན་དུ་རྒྱལ་ཚོགས་དང་རྒྱལ་སྤྱིའི་ཁྲོད་བཤད་བཞིན་པ་ཆ་ཅན་གྱི་ལན་འདེབས་ལྟར་༸པཎ་ཆེན་རིན་པོ་མཆོག་རྒྱུན་ལྡན་གྱི་འཚོ་བ་སྐྱེལ་བཞིན་ཡོད་སྐོར་བརྗོད་པ་དང་། ལྷག་པར་དུ་ཚོགས་འདུའི་དེའི་སྐབས་རྒྱ་གཞུངགིས་རིན་པོ་ཆེ་ད་ཆ་གཙུག་ལག་སློབ་གྲྭ་ཆེན་མོ་ཐོན་ནས་ལས་ཀ་བྱེད་ཀྱི་ཡོད་ཅེས་བརྗོད་པ་ལས་ཞིབ་ཕྲའི་གནས་ཚུལ་གང་ཡང་བརྗོད་མེད་པ་རེད། སྐབས་དེར་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་གྱུར་པའི་མཁས་ལས་ལས་དོན་དོན་ཚོགས་ཆུང་ནས་ད་ལན་རྒྱ་ནག་གཞུང་གིས་ལན་འདེབས་དེ་འདོད་བློ་ཁེངས་པ་ཞིག་མ་བྱུང་བ་དང་ལྷག་དོན་༸པཎ་ཆེན་རིན་པོ་ཆེའི་གནས་སྟངས་སྐོར་ཞིབ་འཇུག་དང་ཤེས་རྟོགས་ཁ་གསལ་ཡོང་བའི་གནས་ཚུལ་ཆ་ཚང་བ་ཞིག་རྒྱ་གཞུང་གིས་ལན་འདེབས་བྱས་མི་འདུག་ཅེས་བརྗོད་འདུག རྒྱ་ནག་གཞུང་གིས་རྒྱལ་ཚོགས་ཀྱི་བཙན་འོག་གར་སོང་ཆ་མེད་གྱུར་པའི་མཁས་ལས་ལས་དོན་ཚོགས་ཆུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐོར་ལན་འདེབས་མཐའ་མ་འདི་ཕྱི་ལོ་ ༢༠༡༣ ལོར་སྤྲད་ཡོད་པ་དང་། ད་ལན་རྒྱལ་ཚོགས་ཀྱི་གར་སོང་ཆ་མེད་གྱུར་པའི་ལས་དོན་ཚོགས་ཆུང་ནས་རྒྱ་ནག་གཞུང་ལ་དྲིས་རྩད་བྱས་པའི་སྐབས་སུ་༸པཎ་ཆེན་རིན་པོ་ཆེ་མཆོག་ནི་དོ་སྣང་བྱ་ཡུལ་གྱི་གནད་དོན་ཞིག་ཡིན་ཞེས་བསྐྱར་ནན་ཡང་བྱས་ཡོད་པ་རེད།

ཇི་ནི་ཝའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ ཐོག་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་གར་ཡོད་ཤེས་རྟོགས་མེད་པར་གྱུར་བའི་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་སྐོར་གླེང་བ་དང་འབྲེལ། རིན་པོ་ཆེ་མཆོག་གར་ཡོད་ཤེས་རྟོགས་མེད་པར་གྱུར་བའི་གནད་དོན་འདིས་རྒྱ་ནག་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམ་སྒྲིག་འབྲུ་དོན་རྩིས་མེད་རྡོག་རོལ་བཏང་བ་ཅིག་མཚོན་གྱི་ཡོད་པ་གསུངས་སོང་། ཕྱི་ཟླ་ ༩ ཚེས་ ༩ ནས་སུད་སི་གྲོང་ཁྱེར་ཇི་ནི་ཝའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ འཚོགས་བཞིན་ཡོད་པ་དང། ཁ་སང་ཕྱི་ཚེས་ ༡༡ ཉིན་རྒྱབ་རྒྱལ་ཚོགས་ཚོགས་དུས་ ༨ ཐོག་འཛམ་གླིང་ཁྲོད་གར་སོང་ཆ་མེད་དུ་གྱུར་པའི་མི་སྣ་ཁག་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་གི་སྙན་ཐོ་ལྷན་ཚོགས་ལ་སྙན་སྒྲོན་ཞུས་ཏེ་རྒྱལ་སྤྱིའི་གཞུང་འབྲེལ་མིན་པའི་ཚོགས་ཁག་གིས་གླེང་སློང་གནང་རྒྱུའི་ཚོགས་དུས་ཐོག་ཏུ་འཇར་མ་ནི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Kai muller ལགས་ཀྱིས་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ Helsinki Foundation མཚན་ཐོག་ནས་རྒྱ་གཞུང་གིས་བཙན་ཁྲིད་འོག་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་གར་སོང་ཆ་མེད་དུ་གྱུར་བའི་བོད་མི་ཁག་གི་གནད་དོན་རྒྱལ་ཚོགས་སུ་སྙན་སེང་ཞུས་ཡོད་པ་རེད། སྐབས་དེར་སྐུ་ཞབས་ Kai muller ལགས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ནས་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་ད་བར་གར་ཡོད་ཤེས་རྟོགས་མེད་པར་གྱུར་ནས་ལོ་ངོ་ ༢༤ འཁོར་གྱི་ཡོད་སྟབས་སྐབས་དེར་རྒྱལ་ཚོགས་ལ་བསྐྱར་ནན་དྲན་སྐུལ་ཞུས་པ་དང་འབྲེལ། ད་བར་རྒྱལ་ཚོགས་ཀྱི་གཙོ་འཛིན་མཆོག་གིས་གཙོས་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དང་བྱིས་པའི་ཐོབ་ཐང་ཚོགས་ཆུང། དེ་བཞིན་རྒྱལ་ཚོགས་ཀྱི་དམིགས་བསལ་མཁས་ལས་རྟོག་ཞིབ་པ་གཙོས། རྒྱལ་སྤྱིའི་གཞུང་ཁག་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་དང་ཐུག་འཕྲད་བྱ་རྒྱུའི་སྐོར་ཞུ་སྐུལ་རིམ་པ་བྱས་ཡོད་ཀྱང། ད་བར་རྒྱ་གཞུང་གིས་རིན་པོ་ཆེ་མཆོག་དང་ཐུག་འཕྲད་ཞུ་བཅུག་མེད་པ་མ་ཟད། ད་ཆ་རྒྱ་ནག་གཞུང་གིས་བོད་མི་གཙོས་རྒྱལ་སྤྱིའི་མང་ཚོགས་རྣམས་ལ་རིན་པོ་ཆེ་མཆོག་༸སྐུ་འཚོ་བཞུགས་ཡོད་མེད་བློ་འཚབ་དང་ཚོད་དཔག་དཀའ་བའི་གནས་སྟངས་འོག་ལྷུང་བཅུག་ཡོད་ཅེས་གསུངས་ཡོད་པ་རེད། ལྷག་པར་དུ་ཁོང་གིས་༸པཎ་ཆེན་རིན་པོ་ཆེ་མཆོག་གར་ཡོད་ཤེས་རྟོགས་མེད་པར་གྱུར་བའི་གནད་དོན་འདི་ནི་རྒྱ་ནག་གཞུང་གིས་བོད་བརྒྱུད་ནང་བསྟན་ལམ་སྲོལ་ལ་ཐེ་བྱུས་དང་ཁྱད་གསོད་བྱས་པ་ཞིག་མཚོན་གྱི་ཡོད་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་འབྲུ་དོན་རྩིས་མེད་རྡོག་རོལ་བཏང་བ་ཞིག་ཀྱང་མཚོན་གྱི་ཡོད་ཅེས་གསུངས་སོང། སྐུ་ཞབས་ Muller ལགས་ཀྱིས་ཉེ་ཆར་རྒྱ་ནག་གཞུང་བོད་རྔ་པ་ཁུལ་གྱི་འཛིན་བཟུང་བཙན་ཁྲིད་བྱས་ཏེ་གར་ཡོད་ཤེས་རྟོགས་མེད་པར་གྱུར་པའི་གྲྭ་བློ་བཟང་རྡོ་རྗེ་ལགས་དང། གྲྭ་བློ་བཟང་ཐབས་མཁས་ལགས། དེ་བཞིན་གྲྭ་ཐུབ་པ་ལགས་བཅས་གསུམ་གྱི་གནད་དོན་རྒྱལ་ཚོགས་སུ་སྙན་སེང་ཞུས་པ་དང་འབྲེལ། རྒྱ་ནག་མི་དམངས་སྤྱི་མཐུན་རྒྱལ་ཁབ་མངའ་ཁོངས་སུ་བོད་མི་ཚོ་རྒྱ་ནག་གཞུང་གིས་འཛིནབཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་གནས་ཚུལ་རྒྱུན་མི་ཆད་པ་ཡོང་བཞིན་ཡོད་པ་དང། དེ་བཞིན་བོད་རྔ་པ་ཁུལ་དུ་ཕྱི་ལོ་ ༢༠༠༩ ནས་རང་ལུས་མེར་བསྲེགས་ཀྱི་གནས་ཚུལ་རིམ་པ་བྱུང་རྗེས་ད་ཆ་ས་ཁུལ་དེ་རྒྱ་ནག་གཞུང་ནས་དམ་དྲག་བྱེད་ཡུལ་ཞིག་ཆགས་ཡོད་ཅེས་གསུངས་འདུག དེ་བཞིན་སྐུ་ཞབས་ Muller ལགས་ཀྱིས་དུས་ཡུན་སྐར་མ་གཉིས་ནང་ཚུད་ལ་ལྷན་ཚོགས་སུ་སྙན་སེང་ཞུ་རྒྱུའི་གོ་སྐབས་དེ་བརྒྱུད་ནས་གར་སོང་ཆ་མེད་དུ་གྱུར་བའི་མི་སྣ་ཁག་གི་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་ནས་ད་བར་གར་སོང་ཆ་མེད་དུ་གྱུར་བའི་བོད་མིའི་ཐོག་རྒྱུན་མི་ཆད་པར་ཐུགས་ཁུར་གནང་བཞིན་ཡོད་པར་ཐུགས་རྗེ་ཆེ་ཞུས་པ་དང་འབྲེལ། དེས་གར་སོང་ཆ་མེད་དུ་གྱུར་བའི་བོད་མིའི་གནད་དོན་དེ་མ་བརླག་པར་གསོན་པོར་གནས་ཡོད་པར་ཡིད་ཆེས་ཤིག་སྐྲུན་ཡོད་ཅེས་གསུངས་སོང་བ་མ་ཟད། ལྷག་པར་དུ་ཁོང་གིས་གར་སོང་ཆ་མེད་དུ་གྱུར་བའི་མི་སྣ་ཁག་གི་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་གཙོས་འབྲེལ་ཡོད་ཚོགས་ཆུང་ཁག་ནས་ད་བར་རྒྱ་གཞུང་གིས་བཙན་ཁྲིད་བྱས་པའི་འོག་གར་སོང་ཆ་མེད་དུ་གྱུར་བའི་བོད་མི་སྤྱི་དང་སྒོས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཤེས་རྟོགས་ཡོང་རྒྱུར་རྟོག་ཞིབ་མུ་མཐུད་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད་པ་རེད།

རིང་མིན་རྒྱལ་སྤྱིའི་གར་སོང་ཆ་མེད་ཉིན་མོ་དང་བསྟུན་ཨིན་ཡུལ་ཁུལ་གྱི་བོད་མི་དང་བོད་དོན་རྒྱབ་སྐྱོར་བ་ཚོས་ཁ་སང་རེས་གཟའ་ལྷག་པ་སྟེ་༸རྒྱལ་བའི་༸སྐུའི་བླ་གཟའ་ལྷག་དཀར་ཉིན་ལོ་ཊན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་ད་བར་གང་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མིའི་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་དགོས་པའི་རྔམ་སྟོན་ལས་འགུལ་སྤེལ་འདུག ལས་འགུལ་དེ་རིང་མིན་ཕྱི་ཟླ་ ༣ ཚེས་ ༣༠ ཉིན་རྒྱལ་སྤྱིའི་གར་སོང་ཆ་མེད་ཉིན་མོའི་ཉིན་གཉིས་ཀྱི་སྔ་རོལ་དང་བསྟུན་ཁ་སང་ཨིན་ཡུལ་བོད་རིགས་ཚོགས་པ་དང་བོད་རང་དབང་ཚོགས་པ་གཉིས་ཀྱིས་གོ་སྒྲིག་གནང་ནས་སྤེལ་ཡོད་པ་དང་། སྐབས་དེར་བོད་མི་དང་བོད་དོན་རྒྱབ་སྐྱོར་བ་བཅས་ཀྱི་ལས་འགུལ་བ་ཚོས་རྒྱ་ནག་གཞུང་ཚབ་ཁང་གི་མདུན་ངོས་སུ་ཕྱག་ཏུ་བོད་ཀྱི་རྒྱལ་དར་དང་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར། དེ་བཞིན་ཤོག་བྱང་ཐོག་༸པཎ་ཆེན་རིན་པོ་ཆེ་མཆོག་གང་དུ་ཡོད་དམ། བོད་མིར་རང་དབང་དགོས་ཞེས་པའི་འབོད་ཚིག་ཆེད་བཀོད་དང་། བོད་མིའི་རང་དབང་འཐབ་རྩོད་འོག་རྒྱལ་གཅེས་པའི་འདས་གསོན་རྣམས་ལ་གདུང་སེམས་མཉམ་བསྐྱེད་དང་མྱ་ངན་གུས་ཞུས་ཡོད་པ་རེད། རྩ་བའི་ཨིན་ཡུལ་བོད་རིགས་ཚོགས་པའི་ངོས་ནས་རྒྱུན་དུ་རེས་གཟའ་ལྷག་པ་སྟེ་༸རྒྱལ་བའི་༸སྐུའི་བླ་གཟའ་ལྷག་དཀར་ནམ་ཡིན་ལ་ཕྱི་དྲོ་རྒྱ་ནག་གཞུང་ཚབ་ཁང་གི་མདུན་དུ་བོད་དོན་དང་འབྲེལ་བའི་གནད་དོན་འདྲ་མིན་ཐོག་རྒྱ་གཞུང་ལ་ངོ་རྒོལ་སྐད་འབོད་སོགས་ཀྱི་ལས་འགུལ་རྣམ་པ་འདྲ་མིན་སྤེལ་དང་སྤེལ་མུས་ཡིན་པ་རེད།