བལ་ཡུལ།

བལ་ཡུལ་དེ་བཞིན་བོད་མི་ཚོར་ཉེན་ཁ་ཆེ་བའི་ས་ཁུལ་དུ་འགྱུར་བཞིན་པའི་སྙན་ཐོ་འདོན་སྤེལ།

རྒྱ་ནག་དང་བལ་ཡུལ་གྱི་འགོ་ཁྲིད་བོད་ཀྱི་རྒྱལ་ས་ལྷ་སར་གྲོས་མོལ་བྱ་རྒྱུ་རེད།

རྒྱ་གར་དང་བལ་ཡུལ་ནང་ལ་ཏོག་དབྱིབས་རིམས་ནད་ཀྱི་ནད་རླབས་གཉིས་པའི་ཁྲོད་སྨན་བཅོས་ཀྱི་མཐུན་རྐྱེན་གྱིས་མ་འདང་བ་སོགས་ཀྱི་རྐྱེན་གྱིས་མི་སེར་མང་པོའི་ཚེ་སྲོག་ཤོར་བཞིན་པའི་གནས་སྟངས་ཆགས་ཡོད་པ་དང་། དེ་རིང་འདི་གས་གསར་འགོད་པས་བལ་ཡུལ་སྐུ་ཚབ་དོན་གཅོད་ཚུལ་ཁྲིམས་རྒྱ་མཚོ་ལགས་སུ་ཞལ་པར་བརྒྱུད་ས་གནས་སུ་ཡོད་པའི་བོད་མིའི་གནས་སྟངས་རྒྱུས་ལོན་ཞུ་སྐབས། སྤྱིར་བལ་ཡུལ་ནང་ལ་རྒྱ་གར་དང་གཅིག་མཚུངས་ཐོག་ཏོག་དབྱིབས་རིམས་ནད་ཀྱི་ནད་རླབས་གཉིས་པའི་དཀའ་ངལ་ཁག་འཕྲད་བཞིན་ཡོད་པ་དང་། ཁུལ་དེར་ཡོད་པའི་བོད་མི་ཚོ་ལ་མཚོན་ན། རྒྱལ་ས་མངའ་ཁུལ་དང་། མཐའ་མཚམས་ས་ཁུལ། དེ་བཞིན་སྤོག་ར་བཅས་བོད་མི་གནས་ཡུལ་ས་གནས་ཁག་ཏུ་ཏོག་དབྱིབས་རིམས་ནད་ཀྱི་ཛ་དྲག་ཚོགས་ཆུང་བཙུགས་ཏེ་སྔོན་འགོག་དང་། ལྟ་སྐྱོང་གི་ལས་དོན་ཁག་ཚགས་ཚུད་འགྲོ་བཞིན་ཡོད་པ་དང་། ད་ལྟའི་ཆ་ལ་མཐའ་མཚམས་ཁག་ཏུ་བཞུགས་པའི་བོད་མིའི་ཁྲོད་རིམས་ནད་ཕོག་པའི་གནས་ཚུལ་བྱུང་མེད་པར་གསུངས་སོང་། འོན་ཀྱང་ཏོག་དབྱིབས་རིམས་ནད་ཀྱི་ནད་རླབས་གཉིས་པའི་ཁྲོད་རྒྱལ་ས་མངའ་ཁུལ་དང་སྤོག་ར་བཅས་ཀྱི་ཁྱབ་ཁོངས་ནས་ཁྱོན་བོད་མི་ ༧༨ ལ་ནད་རྟགས་ཐོན་ཡོད་པ་དང་། དེའི་ཁྲོད་ནས་བོད་མི་རྒན་གྲས་གསུམ་འདས་གྲོངས་སུ་གྱུར་ཡོད་པ་དང་། ད་ལྟའི་ཆ་ལ་ནད་རྟགས་ཡོད་མཁན་རྣམས་ཁོངས་སོ་སོའི་ཟུར་འཇོག་ཁང་ལ་བཞུགས་བཞིན་ཡོད་པ་གསུངས་ཡོད། དེ་བཞིན་བལ་ཡུལ་ནང་ལ་ཡོད་པའི་བོད་མི་ཚོར་སྔོན་འགོག་སྨན་ཁབ་ཐོབ་ཡོད་མེད་ཐད་བཀའ་འདྲི་ཞུ་སྐབས། ད་བར་བལ་ཡུལ་ནང་ཡོད་པའི་བོད་མི་ལོ་ངོ་ ༦༥ ཡན་ཚང་མ་དང་། འཕྲོད་བསྟེན་ཞབས་ཞུ་བ། དེ་བཞིན་སློབ་གྲྭ་ཁག་གི་དགེ་ལས་བཅས་ལ་སྨན་ཁབ་རིམ་པ་དང་པོ་དེ་ཐོབ་ཟིན་ཡོད་པ་མ་ཟད། ཉེ་ཆར་ལོ་ངོ་༡༨ ཡན་ཚོར་སྨན་ཁག་རྒྱག་འགོ་བཙུགས་སྐབས་རྒྱལ་ས་མངའ་ཁུལ་གྱི་བོད་རིགས་ལོ་ན་༡༨ ཡན་ཁག་ཅིག་ལ་དེ་མཚུངས་ཀྱི་སྨན་ཁབ་ཐོབ་པ་དང་། ས་གནས་སུ་ཡིག་ཆ་མེད་པར་དཀའ་ངལ་འཕྲད་བཞིན་པའི་བོད་མི་རྣམས་ལ་ས་གནས་འགོ་འཛིན་གྱིས་རྒྱབ་གཉེར་ཐོག་རོགས་རམ་གང་ཐུབ་ཞུ་བཞིན་པ་སོགས་གསུངས་བྱུང་། གཞི་རྩའི་བལ་ཡུལ་ཙམ་མ་ཟད་ད་ལྟའི་ཆ་ལ་རྒྱ་གར་རྒྱལ་ཡོངས་སུ་ཏོག་དབྱིབས་རིམས་ནད་ཀྱི་ནད་རླབས་གཉིས་པའི་ཁྲོད་མང་ཚོགས་རྣམས་ལ་སྨན་བཅོས་དང་། རིམས་ནད་རྟགས་དཔྱད་ཀྱི་ཡོ་ཆས་འདང་ངེས་བཞིན་པ་མེད་པ་སོགས་ཀྱི་དཀའ་ངལ་རབ་དང་རིམ་པ་འཕྲད་བཞིན་པ་དང་འབྲེལ། བོད་མིའི་སྒྲིག་འཛུགས་གཙོས་པའི་གཞུང་འབྲེལ་མ་ཡིན་པའི་ཚོགས་པ་དང་། གང་ཟག་སྒེར་སོགས་ནས་དེའི་ཐད་རོགས་རམ་གང་ཐུབ་གནང་བཞིན་ཡོད་པ་ལྟར། བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་གཞོན་ནུ་ལྷན་ཚོགས་གཙོས་པའི་ཡན་ལགས་གཞོན་ནུའི་ཚོགས་མི་རྣམས་ནས་ས་གནས་ས་ཐོག་ཏུ་རིམས་ནད་དང་འབྲེལ་བའི་ཞབས་ཞུའི་ལས་དོན་སྣ་མང་སྒྲུབ་བཞིན་པ་མ་ཟད། ལྷག་པར་དུ་ད་ཆ་བཞུགས་སྒར་ཁུལ་དུ་ཏོག་དབྱིབས་ནད་རྟགས་ཐོན་མཁན་ཇེ་མང་དུ་འགྲོ་བཞིན་པ་དང་བསྟུན། ཁ་སང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ནས་དྲ་ཐོག་བརྒྱུད། རིམས་ནད་སྔོན་འགོག་དང་གདོང་ལེན་སླད་བོད་ཀྱི་གཞོན་ནུ་ལྷན་ཚོགས་ནས་བཞུགས་སྒར་དུ་ཡོད་པའི་གཞོན་ནུའི་རང་བཙན་མགྲོན་ཁང་དེ་བཞིན་ནད་རྟགས་ཡོད་མཁན་རྣམས་ཟུར་བཀག་ཏུ་བཞུགས་སའི་ཆེད་དམིགས་བསལ་མཐུན་རྐྱེན་སྦྱོར་རྒྱུ་ཡིན་པ་གསལ་བསྒྲགས་གནང་འདུག གཞན་ཡང་རྒྱ་གར་བོད་རང་བཙན་སློབ་ཕྲུག་ཚོགས་པས་དྲ་ཐོག་ནས་དཔལ་འབྱོར་བསྡུ་རུབ་གནང་སྟེ་བཞུགས་སྒར་གཙོས་པའི་ཧི་མ་ཅལ་མངའ་སྡེ། Uttarakhand དང་རྒྱལ་ས་ལྡི་ལི། གཞན་ཡང་རྒྱ་གར་ལྷོ་ཕྱོགས་དང་བྱང་ཤར་སོགས་སུ་ཆགས་པའི་བོད་པའི་གཞིས་ཆགས་དང་སློབ་གྲྭ་ཁག དེ་བཞིན་ཁ་འཐོར་ས་གནས་སོགས་སུ་གནས་པའི་བོད་མི་རྣམས་ལ་ཏོག་དབྱིབས་རིམས་ནད་ཀྱི་ནད་རྟགས་བརྟག་དཔྱད་འབྲེལ་བའི་ཡོ་ཆས་ OxiMeter ཞེས་སྲོག་རླུང་གི་ཚད་གཞི་ལྟ་ཆས་དང་། ཚ་བ་ལྟ་རྒྱུའི་ཐར་མོ་མི་ཀྲར། གཞན་ཡང་རིམས་ནད་སྔོན་འགོག་དང་འབྲེལ་བའི་ཁ་རས་དང་དུག་སེལ་སོགས་ཀྱི་མཐུན་རྐྱེན་བགོ་འགྲེམ་གནང་བཞིན་འདུག གཞི་རྩའི་ད་ལྟའི་ཆར་རྒྱ་གར་ནང་དུ་ཏོག་དབྱིབས་རིམས་ནད་ཀྱི་གནས་སྟངས་ཛ་དྲག་ཆེས་ཆེར་འགྲོ་བཞིན་པའི་ཁྲོད་ཉིན་མ་རེ་རེ་ལ་མི་མང་པའི་ཚེ་སྲོག་ཤོར་བཞིན་ཡོད་པ་མ་ཟད། བཞུགས་སྒར་གཙོས་པའི་བོད་མི་གནས་ཡུལ་ས་གནས་ཁག་ཏུ་ཡང་རིམས་ནད་ཕོག་མཁན་གྱི་གྲངས་འབོར་རིམ་པའི་འཕར་བཞིན་པའི་གནས་སྟངས་སུ་གྱུར་ཡོད།

འདས་པའི་ལོ་ཟླའི་ཁྲོད་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་གི་གནད་དོན་རབ་དང་རིམ་པ་བྱུང་བའི་དོན་རྐྱེན་སོགས་ལས་འཕྲོས་ཏེ་ཉེ་ལམ་རྒྱ་ནག་གཞུང་གིས་ཡུལ་དེའི་བཅིངས་གྲོལ་དམག་གི་ཁོངས་སུ་བོད་རིགས་རྐྱང་པའི་དམག་སྡེ་ཞིག་འཛུགས་འཆར་དང་འབྲེལ་བོད་རང་སྐྱོང་ལྗོངས་ཟེར་བའི་ས་ཁུལ་ཁག་ཅིག་ཏུ་དམག་མིའི་ལས་དོན་སླད་བོད་པའི་ན་གཞོན་བསྡུ་རུབ་བྱེད་བཞིན་པའི་གནས་ཚུལ་ཐོན་བཞིན་པ་དེར་རྒྱ་གར་ངོས་ནས་སེམས་འཚབ་དང་འབྲེལ་ཐུགས་སྣང་ཆེན་པོ་གནང་བཞིན་འདུགདེ་ཡང་རྒྱ་ནག་གཞུང་ནས་བོད་རིགས་རྐྱང་པའི་དམག་གི་སྡེ་ཚན་ཞིག་འཛུགས་རྒྱུའི་སླད་དུ་འདི་ལོའི་ཕྱི་ཟླ་གཉིས་པ་ཙམ་ནས་རྒྱལ་ས་ལྷ་སར་ཡོད་པའི་རྒྱ་ནག་བཅིངས་གྲོལ་དམག་མིའི་འགོ་གཙོ་ཁག་ཅིག་རྒྱ་གཞུང་གིས་དབྱེ་པའི་བོད་རང་སྐྱོང་ལྗོངས་ཁུལ་དུ་ཆགས་པའི་མངའ་རི་དང་། མཐོ་ལྡིང་ས་ཁུལ་སོགས་སུ་བོད་རིགས་གཞོན་སྐྱེས་བསྡུ་རུབ་སླད་བསྐྱོད་བཞིན་ཡོད་པ་དང་། ཁ་སང་ IANS གསར་ཁང་གཙོས་པའི་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བའི་ནང་དུ་རྒྱ་གར་གྱི་ཕྱི་སྲིད་དང་དམག་གི་སྡེ་ཚན་གྱི་གསང་བའི་ལས་བྱེད་ཅིག་ནས། རྒྱ་ནག་བཅིངས་གྲོལ་དམག་མིའི་འགོ་ཁྲིད་ཁག་ཅིག་གིས་བོད་ཀྱི་ས་གནས་ཁག་ཏུ་དམག་མིའི་ལས་དོན་ཆེད་དུ་བོད་རིགས་གཞོན་སྐྱེས་བསྡུ་རུབ་བྱེད་བཞིན་ཡོད་པ་དང་། དེ་ཡང་ད་བར་བསྡུ་རུབ་བྱས་པ་དེ་དག་དེ་སྔ་བོད་ནང་རྒྱ་གཞུང་གིས་ལས་ཀ་བྱེད་མྱོང་ཡོད་པའི་རྒྱ་ནག་ཧན་མི་རིགས་དང་བོད་པ་བསྲེས་མའི་ཁྱིམ་ཚང་ནས་ཡིན་པ་དང་། དེ་ནི་རྐང་བོད་རིགས་རྐྱང་པའི་དམག་གི་སྡེ་ཚན་དེའི་ནང་དུ་རྒྱ་ནག་གཞུང་ལ་ངོ་ལོག་མི་བྱེད་མཁན་ཁོ་ན་ཚུད་ཐབས་སླད་དུ་ཡིན་པ་གསུངས་འདུག མ་ཟད་ཁོང་ནས་དམག་དོན་སླད་མི་སྣ་བསྡུ་རུབ་བྱེད་སྐབས་མིའི་གཟུགས་སྟོབས་དང་། བདེ་ཐང་། དེ་བཞིན་རིག་སྟོབས་སོགས་ཀྱི་ཐད་དཔྱད་ཞིབ་བྱེད་དགོས་སྟབས།་དེ་ནི་བརྒྱུད་རིམ་གྱི་ཆ་ནས་དུས་ཡུན་རིང་པོ་ཞིག་འགོར་ངེས་ཡིན་སྐོར་གསུངས་འདུག་ལ། ཡང་མིང་མངོན་གསལ་གནང་འདོད་མེད་པའི་གསང་བའི་ལས་ལས་བྱེད་གཞན་ཞིག་ནས། དམག་དོན་སླད་བོད་རིགས་བསྡུ་རུབ་ཀྱི་ལས་དོན་དེ་ཉེ་ཆར་རྒྱལ་ས་ལྷ་སའི་ནང་དུ་སྤེལ་ཡོད་པ་དང་། སྐབས་དེར་རྒྱ་ནག་གཞུང་གི་ལས་བྱེད་ཚོས་བོད་རིགས་དེ་དག་གི་རྒྱབ་ལྗོངས་ལོ་རྒྱུས་ནང་རྒྱ་ནག་ལ་ངོ་རྒོལ་བྱས་ཡོད་མེད་དང་། རྒྱ་གཞུང་གི་སྲིད་བྱུས་ལ་བརྩི་མཐོང་ག་ཚོད་ཡོད་མེད་སོགས་ཀྱི་ཐད་ཀྱང་རྩད་ཞིབ་ནན་པོ་བྱེད་བཞིན་ཡོད་པ་གསུངས་འདུག གཞི་རྩའི་གསང་བའི་ལས་དོན་གཉེར་མཁན་དང་དཔྱད་པ་ཁག་ཅིག་ནས་ད་རེས་རྒྱ་ནག་གཞུང་ནས་བོད་རིགས་རྐྱང་པའི་དམག་སྡེ་ཞིག་འཛུགས་འཆར་ཡོད་པ་དེ་ནི། རྐང་ཉེ་ལམ་བོད་དང་རྒྱ་གར་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་བྱུང་སྐབས་རྒྱ་གར་ཕྱོགས་ནས་བོད་མིའི་དྭང་ཞབས་དམག་སྒར་གྱི་དམག་མི་བཏང་སྟེ་ཕན་ཐོགས་བྱུང་བའི་རྐྱེན་དང་། བོད་པའི་དམག་མི་རྣམས་ལ་རི་མཐོན་པོ་དང་གངས་རི་སོགས་ཀྱི་ཐོག་ལ་བཞུགས་རྒྱུའི་དམིགས་བསལ་ནུས་པ་སོགས་ཡོད་སྟབས་རྒྱ་ནག་གཞུང་ནས་ལས་གཞི་དེ་འགོ་འཛུགས་བྱས་པ་ཞིག་ཡིན་སྐོར་གསུངས་བཞིན་འདུག་པ་མ་ཟད། རྒྱ་གར་གྱི་འཕྲོད་བསྟེན་མཁས་པ་ཞིག་ནས། ད་ལྟ་ཡོད་བཞིན་པའི་རྒྱ་ནག་བཅིངས་གྲོལ་དམག་མི་རྣམས་ས་མཐོན་མོར་དམག་དོན་གཉེར་སྐབས་འཕྲོད་བསྟེན་དང་འབྲེལ་བའི་དཀའ་ངན་ཆེན་པོ་འཕྲད་བཞིན་ཡོད་སྟབས། རྒྱ་ནག་གཞུང་ནས་ལོ་ལྟར་བོད་ཁུལ་དུ་ཡོད་པའི་དམག་མི་རྣམས་ལ་འཕྲོད་བསྟེན་དང་འབྲེལ་བའི་སློབ་གསོ་འཕར་མ་སྤྲོད་དགོས་པའི་གནས་སྟངས་ཆགས་ཡོད་པ་གསུངས་འདུག མ་ཟད་དེ་སྔ་རྒྱ་གར་ཤར་ཕྱོགས་ཁུལ་གྱི་དམག་དཔོན་གནང་མྱོང་མཁན་སྐུ་ཞབས་ J.R. Mukherjee ལགས་ནས། རྒྱ་ནག་གཞུང་ནས་བོད་རིགས་རྐྱང་པའི་དམག་སྡེ་འཛུགས་ཐབས་ཀྱི་ལས་དོན་དེ་ཧ་ཅང་གནད་འགག་ཆེན་པོ་ཞིག་ལ་ངོས་འཛིན་དང་འབྲེལ། རྒྱ་གཞུང་གིས་དེ་སྔ་བལ་ཡུལ་གྱི་Gurkha མི་རིགས་རྣམས་ཀྱང་རྒྱ་ནག་གི་དམག་སྡེའི་ཁོངས་སུ་བསྡུ་རུབ་བྱེད་ཐབས་བྱས་ཡོད་ཀྱང་། ད་ལྟའི་ཆ་ལ་Gurkhaམི་རིགས་རྣམས་རྒྱ་ནག་གི་བསྡུ་རུབ་བྱེད་ཐུབ་མེད་པ་དང་། དེ་ནི་རྐང་Gurkha མི་རིགས་རྣམས་ལོ་རྒྱུས་རིང་པོའི་ཐོག་ནས་རྒྱ་གར་གྱི་དམག་མི་དང་འབྲེལ་བ་བཟང་པོ་ཡོད་པའི་ཆ་ནས་ཡིན་པ་དང་། ད་རེས་རྒྱ་ནག་གི་བོད་རིགས་བསྡུ་རུབ་བྱས་པ་དེ་ནི་ས་མཐོན་པོའི་ཐོག་རྒྱ་ནག་རང་ཉིད་ཀྱི་དམག་མི་རྣམས་ནུས་པ་ལྡན་པ་ཞིག་མེད་ཙང་རེད་ཅེས་གསུངས་འདུག གཞི་རྩའི་ད་ལྟའི་ཆ་ལ་རྒྱ་ནག་གི་དམག་སྡེའི་ཁྲོད་དུ་བོད་རིགས་རྐྱང་པའི་དམག་གི་སྡེ་ཚན་ཞིག་མེད་ཀྱང་། དམག་དོན་དང་འབྲེལ་བའི་སྙན་ཐོ་ཁག་ཏུ་ད་ལྟའི་ཆ་ལ་རྒྱ་ནག་བཅིངས་གྲོལ་དམག་མིའི་ཁོངས་སུ་བོད་རིགས་༣༠༠༠ནས་༤༠༠༠ བར་ཡོད་པ་ཚོད་དཔག་གནང་གི་འདུག

ཁ་སང་ཟླ་འདིའི་ཚེས་ ༢༦ ནས་དབུ་འཛུགས་ཀྱིས། ཚེས་ ༢༨ བར་སྟེ། ཉིན་གསུམ་གྱི་རིང་བོད་མིའི་སྒྲིག་འཛུགས་ནང་སྲིད་ཁྱབ་ཁོངས་རྒྱ་བལ་འབྲུག་གསུམ་ནང་གནས་འཁོད་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཐེངས་ ༡༣ དྲྭ་ཐོག་བརྒྱུད་ཚོགས་བཞིན་པ་རེད་འདུག

དེ་རིང་རྒྱ་གར་གྱི་IANS གསར་སྤེལ་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་བྱང་ཕྱོགས་ལ་དྭགས་ཁུལ་གྱི་འཕགས་བོད་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་རིམ་པ་བྱུང་བཞིན་པའི་དུས་སྐབས་འདིར། བལ་ཡུལ་གཞུང་ངོས་ནས་རྒྱ་ནག་གི་གནོན་ཤུགས་འོག ཁུལ་དེའི་དམག་མི་དང་གསང་བའི་ལས་ཁུངས་ལ་དམིགས་བསལ་བཀོད་ཁྱབ་བཏང་སྟེ། བོད་མི་དག་གི་འགྲོ་འདུག་ལ་ལྟ་རྟོག་བྱེད་ཤུགས་ཆེ་རུ་གཏོང་དགོས་པའི་ཞུ་སྐུལ་བྱས་འདུག

ཁ་སང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གི་བཅིངས་གྲོལ་དམག་མིས་བལ་ཡུལ་གྱི་ས་མཚམས་བརྒལ་ནས་སྤྱི་ལེ་གཉིས་ཙམ་གྱི་སར་ཁང་བརྩེགས་དགུ་གསར་རྒྱག་བྱས་ཏེ། ས་གནས་ཀྱི་བལ་ཡུལ་གྱི་ཡུལ་མི་རྣམས་ཁུལ་དེར་འགྲོ་སྐྱོད་བྱེད་རྒྱུར་བཀག་འགོག་བྱེད་བཞིན་ཡོད་པའི་གནས་ཚུལ་ཐོན་འདུག

ཉེ་ཆར་རྒྱ་གར་རྒྱལ་ས་ལྡི་ལིའི་ཉེན་རྟོག་པ་དང་རྒྱ་གར་གསང་བའི་ལས་ཁུངས་གཉིས་ཀྱིས་མཉམ་རུབ་ཐོག་ལྡི་ལི་ནང་དུ་རྒྱ་ནག་གཞུང་གི་གསང་ཉུལ་གྱི་ལས་དོན་སྤེལ་བཞིན་པ་ཞིག་ཐེར་འདོན་གྱིས། རྒྱ་གར་གྱི་གསར་འགོད་པ་ཞིག་དང་སློབ་ཕྲུག་ཡིན་ཁུལ་གྱི་རྒྱ་རིག་བེུད་གཅིག དེ་བཞིན་བལ་བོའི་མི་གཅིག་བཅས་ཁྱོན་མི་གསུམ་འཛིན་བཟུང་བྱས་འདུག

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་རེས་གཟའ་ཕུར་བུ་ཆར་ཅན་གོ་སྒྲིག་གནང་བཞིན་པ་ལྟར། དེ་རིང་གི་གསར་འགོད་ལྷན་ཚོགས་ཐོག་གཟའ་འཁོར་འདིའི་ནང་ལ་དྭགས་གཙོས་པའི་རྒྱ་གར་ནང་གི་བཙན་བྱོལ་བོད་མིའི་སྤྱི་ཚོགས་ཁྲོད་བོད་མི་ཁྱོན་ ༤༡ ལ་ Covid-19 གཉན་རིམས་ཕོག་ཡོད་པར་འགྲེལ་བརྗོད་དང་འབྲེལ། བོད་མི་རྣམས་ནས་ད་ལྟའི་ཆར་སྔོན་འགོག་ཐབས་ལམ་ལ་མུ་མཐུད་འབད་དགོས་པ་དང་འགྲུལ་བཞུད་རིགས་གནང་རྒྱུ་མེད་པའི་འབོད་སྐུལ་གནང་སོང་།