Day2
བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་བསྐྱེད་ཀྱི་གྲོས་ཆོད་སྤྱི་མོས་ཐོག་གཏན་འབེབས།
བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་ཆོད་སྤྱི་མོས་ཐོག་གཏན་འབེབས་གནང་སོང་།
ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་སྤྱི་འཐུས་རྣམས་ཀྱི་འདྲི་རྩད་དབུ་འཛུགས།
ཆོས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་སྤྱི་འཐུས་རྣམས་ཀྱི་འདྲི་རྩད་དབུ་འཛུགས།
དབུ་མའི་ལམ་གྱི་སྲིད་བྱུས་ལ་བཀའ་ཤག་ཙམ་མིན་པར་གྲོས་ཚོགས་ནས་ཀྱང་འགན་སྲུང་གནང་དགོས།
དབུ་མའི་ལམ་གྱི་སྲིད་བྱུས་ལ་བཀའ་ཤག་ཙམ་མིན་པར་གྲོས་ཚོགས་ནས་ཀྱང་འགན་སྲུང་གནང་དགོས།
བོད་རྒྱའི་དཀའ་རྙོག་ཞི་འགྲིག་མ་བྱུང་བར་བོད་དེ་དུས་ནམ་ཡང་རྒྱ་ནག་གི་ཆ་ཤས་སུ་ཁས་ལེན་ཐབས་མེད།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཉེ་སྔོན་ཨ་རི་ནང་བོད་པའི་གསར་ཁང་ཞིག་གི་བཀའ་འདྲིར་བཀའ་ལན་གནང་བའི་ཁྲོད་བོད་དེ་རྒྱ་ནག་གི་ཆ་ཤས་ཆགས་བསྡད་ཡོད་སྐོར་གསུངས་པ་ལས་འཕྲོས་ཏེ་དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་ཉིན་གཉིས་པའི་ཐོག སྲིད་སྐྱོང་མཆོག་ལ་དེ་འབྲེལ་སྐར་རྟགས་ཅན་གྱི་བཀའ་འདྲི་ཞིག་གནང་བར་མ་ཟད་སྤྱི་འཐུས་མང་དག་ཅིག་གིས་གནད་དེའི་ཐོག་ཐུགས་ཕམ་དང་བཅས་འཕྲོས་དོན་བཀའ་འདྲི་མང་དག་ཅིག་ཕེབས་པར་བརྟེན་དྲི་བ་དྲིས་ལན་གྱི་དུས་ཚོད་འཕར་འགྱངས་གནང་སྟེ། དེ་རིང་གི་ཚོགས་དུས་གསུམ་གནད་དོན་དེའི་ཐོག་བཏང་སོང་།བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིར་ལགས་ཀྱིས་སྲིད་སྐྱོང་མཆོག་ལ་སྐར་རྟགས་ཅན་གྱི་དྲི་བ་གསུམ་ཕུལ་བ་ལས་གཅིག་སྲིད་སྐྱོང་མཆོག་གིས་ཉེ་ཆར་ཨ་རིའི་རྒྱལ་སར་གསར་འགོད་པར་ད་ལྟ་བོད་རྒྱ་ནག་གི་ཆ་ཤས་ཆགས་བསྡད་ཡོད་སྟངས་དང་། ཁྱབ་ཚད་ཀྱི་ཁོངས་གཏོགས་ཇི་ཡིན། དེ་བཞིན་ད་ལྟ་བོད་མི་རྣམས་ཀྱང་རྒྱ་མིའི་ཆ་ཤས་ཆགས་བསྡད་ཡོད་མེད་བཅས་ཀྱི་བཀའ་འདྲི་ཞུས་པར་སྲིད་སྐྱོང་མཆོག་གིས་གོང་ཞུས་བཀའ་མོལ་དེ་འདི་ལོའི་ཕྱི་ཟླ་ ༤ ཚེས་ ༢༥ ཉིན་སྲིད་སྐྱོང་མཆོག་དང་འབྲེལ་ཡོད་ཁག་གཅིག་ཨ་རིའི་བོད་དོན་དམིགས་བསལ་འབྲེལ་མཐུད་པ་མཆོག་ལ་མཇལ་འཕྲད་ཞུས་རྗེས་གསར་འགྱུར་ལས་ཁང་ཞིག་གི་གསར་འགོད་པས་མཇལ་འཕྲད་ཀྱི་བརྒྱུད་རིམ་དང་གྲུབ་འབྲས་སོགས་ཀྱི་སྐོར་དྲིས་པར་ལན་དུ་གསུངས་པ་ཞིག་དང་། སྲིད་སྐྱོང་ཆོག་གི་ལན་འདེབས་དེ་ཨ་རིའི་བོད་དོན་དམིགས་བསལ་འབྲེལ་མཐུད་པ་དང་གོ་བསྡུར་གང་བྱུང་བའི་ནང་དོན་ཞིག་ཡིན་པར་མ་གཏོགས་སྲིད་སྐྱོང་ངམ་བཀའ་ཤག་གི་ངོས་ནས་བོད་ཀྱི་ལོ་རྒྱུས་དང་ད་ལྟའི་གནས་བབ་ལ་ངོས་འཛིན་བྱེད་སྟངས་ཀྱི་འགྲེལ་བཤད་ཞུས་པ་ཞིག་མིན་ལ། བོད་དེ་འདས་པའི་མི་ལོ་ ༧༠ དོན་གྲངས་རིང་བཙན་གི་འོག་ནས་རྒྱ་ནག་གི་ཆ་ཤས་ཆགས་བསྡད་ཡོད་པ་གསལ་པོ་ཡིན་ཞིང་། གཞིས་ལུས་བོད་མི་རྣམས་ཀྱང་ད་ལྟའི་ཆར་རྒྱ་གཞུང་གི་བཙན་བཟུང་འོག་ནས་གནས་ཡོད་པ་བསྙོན་མེད་ཡིན་ཞེས་གསུངས་སོང་།སྲིད་སྐྱོང་མཆོག་གི་སྐར་རྟགས་ཅན་གྱི་དྲི་བ་ཨང་ ༡ པོའི་བཀའ་ལན་ལས་འཕྲོས་ཏེ་སྤྱི་འཐུས་མང་དག་ཅིག་གིས་ཚོར་ཤུགས་ཆེན་པོའི་ཐོག་ནས་སྲིད་སྐྱོང་མཆོག་གི་བཀའ་མོལ་དེ་ལ་བརྟེན་ནས་བོད་ཕྱི་ནང་གཉིས་ཀར་བློ་ཕམ་གནང་མཁན་མང་པོ་བྱུང་ཡོད་པ་ལུང་འདྲེན་གནང་སྟེ་གོང་ཞུས་བཀའ་ལན་གྱི་ཚིག་དེ་དག་ལ་དག་སེལ་གནང་ཐོག་ནིའུ་ཡོག་མི་མང་དང་བོད་མི་མང་ལ་དགོངས་སེལ་ཞུ་དགོས་པའི་དགོངས་འཆར་ཞུ་མཁན་བྱུང་བར་མ་ཟད། ད་རེས་སྐར་རྟགས་ཅན་གྱི་བཀའ་འདྲིའི་བཀའ་ལན་དུའང་བོད་དེ་འདས་པའི་མི་ལོ་ ༧༠ དོན་གྲངས་རིང་བཙན་བཟུང་་འོག་ནས་རྒྱ་ནག་གི་ཆ་ཤས་ཆགས་བསྡད་ཡོད་པ་གསལ་པོ་ཡིན་ཞིང་ཞེས། རྒྱ་ནག་གི་ཆ་ཤས་ཆགས་བསྡད་ཡོད་པ་བསྐྱར་ནན་གནང་བ་དེར་སྤྱི་འཐུས་ཁག་གཅིག་གིས་དོགས་པ་དང་བཅས་ཚོར་ཤུགས་ཆེན་པོས་སྲིད་སྐྱོང་མཆོག་ལ་བཀའ་རྩད་ཞུས་ཡོད།དེ་འབྲེལ་སྲིད་སྐྱོང་མཆོག་གིས་དེ་རིང་གི་གྲོས་ཚོགས་ཐོག་བཀའ་ཤག་གི་ངོས་ནས་བོད་དེ་ལོ་རྒྱུས་ཐོག་ནས་རྒྱ་ནག་གི་ཆ་ཤས་སུ་ངོས་འཛིན་གནང་གི་མེད་ལ། བོད་རྒྱ་ཞི་འགྲིག་མ་བྱུང་བར་བོད་དེ་དུས་ནམ་ཡང་རྒྱ་ནག་གི་ཆ་ཤས་ཡིན་པར་ངོས་འཛིན་གནང་གི་མེད་ཅེས་བསྐྱར་ནན་གནང་བ་དང་ཆབས་ཅིག ལྷག་པར་དུ་བཀའ་ཤག་གིས་བོད་དེ་རྒྱ་ནག་གི་བཙན་འཛུལ་འོག་ནས་རྒྱ་ནག་གི་ཆ་ཤས་ཆགས་བསྡད་ཡོད་པ་གསུངས་པ་དེ་ཁྲིམས་དང་མ་མཐུན་པའི་གནས་བབ་ཞིག་ལ་གོ་བ་བཞེས་པའི་ཐོག་ནས་གསུངས་པ་མ་གཏོགས་བཀའ་ཤག་གི་བཞེངས་ཕྱོགས་ཐོག་མ་ཉིད་ནས་བོད་དེ་བཙན་འཛུལ་བྱས་པ་ཞིག་ལ་འདོད་ཀྱི་ཡོད་པ་དེ་ལྟར་ཡང་། ད་རེས་ཆ་ཤས་ཞེས་ཚིག་དེ་ཉིད་ཀྱི་རྐྱེན་གྱིས་མང་ཚོགས་ཁྲོད་གོ་བ་འདྲ་མིན་ཡོང་བཞིན་པར་བརྟེན་ཚིག་དེ་ཕྱིར་འཐེན་གནང་རྒྱུ་གསལ་བཤད་གནང་སོང་།སྐབས་དེར་ད་དུང་སྤྱི་འཐུས་ཁག་གཅིག་གིས་སྲིད་སྐྱོང་མཆོག་ནས་དེ་རིང་སྐར་རྟགས་ཅན་གྱི་དྲི་བ་ཨང་དང་པོའི་བཀའ་ལན་ནང་གི་ཚིག་གཅིག་ཕྱིར་འཐེན་གནང་དགོས་བྱུང་བ་དེ་དེ་སྔ་ནོར་འཁྲུལ་ཤོར་བར་ངོས་འཛིན་གྱིས་གྲོས་ཚོགས་ར་བའི་ནང་དགོངས་སེལ་ཞུ་མ་ཐུབ་པའི་རྒྱུ་མཚན་གང་ཡིན་དང་། ཁག་གཅིག་གིས་ད་ལྟའི་བཀའ་ཤག་གི་བཞེངས་ཕྱོགས་དང་སྲིད་བྱུས་ལ་འགྱུར་བ་མེད་པ་དེ་ལ་ཡིད་ཆེས་གཙང་མ་ཡོད་སྐོར་དང་དེ་འབྲེལ་འབད་བརྩོན་མུ་མཐུད་ནས་གནང་རོགས་ཞེས་ཞུ་སྐུལ་གནང་སོང་བར་མ་ཟད་སླད་མར་ཚིག་གང་ཞིག་སྤྱོད་དགོས་པར་གྲོས་ཚོགས་ནས་གཏན་ལ་ཕབ་ཐུབ་ཚེ་དགེ་མཚན་དུ་གཟིགས་ཀྱི་ཡོད་པའི་དགོངས་འཆར་ཕུལ་མཁན་བྱུང་ཡོད།དེ་རིང་གི་སྐར་རྟགས་ཅན་གྱི་དྲི་བ་དང་དེའི་བཀའ་ལན་བཅས་ལས་འཕྲོས་ཏེ་ད་དུང་གྲོས་ཚོགས་ནང་སྤྱི་འཐུས་ཁག་གཅིག་གིས་ད་ལྟ་བོད་རྒྱ་ནག་གི་ཆ་ཤས་རེད་ཅེས་བཤད་མཁན་སུ་ཡོད་མིན་སོགས་ཀྱི་དྲི་བ་ཕུལ་མཁན་ཡང་བྱུང་བར་བཀའ་ལན་གནང་བའི་ཁྲོད། སྲིད་སྐྱོང་མཆོག་གིས་ད་ལྟའི་ཆར་བོད་རང་བཙན་ལ་རྒྱབ་སྐྱོར་གནང་མཁན་རྒྱལ་ཁབ་སུའང་མེད་པ་དང་། ཨ་རི་གཞུང་གི་ངོས་ནས་བོད་དེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་ལ་ངོས་འཛིན་གནང་གི་ཡོད་ཀྱང་། ཉེ་ལམ་ནས་ངོས་འཛིན་ཞེས་པའི་ཚིག་དེ་སླ་རུ་བཏང་ནས་དེའི་ཚབ་ཏུ་ང་ཚོའི་ལྟ་སྟངས་ཞེས་འགྱུར་བ་བཏང་ཡོད་པ་དང་། དེ་བཞིན་རྒྱ་གར་གཞུང་གིས་ཀྱང་རྒྱ་ནག་གཅིག་གི་སྲིད་བྱུས་བསྐྱར་ལྡབ་བྱེད་ཀྱི་མེད་པ་སོགས་འགྲེལ་བརྗོད་དང་འབྲེལ། བཀའ་ཤག་གིས་ཨ་རི་དང་རྒྱ་གར་གཙོས་རྒྱལ་སྤྱིའི་གཞུང་ཁག་ལ་བོད་དེ་རྒྱ་ནག་གི་ཆ་ཤས་རེད་ཅེས་གསུངས་ཡོད་པ་དེ་བཙན་བཟུང་འོག་གི་གནས་སྟངས་ཤིག་ཡིན་པར་གསལ་བཟོ་གནང་གལ་ཆེ་བ་དང་། ཡང་ན་བཀའ་མོལ་གནང་སྟངས་དེ་རིགས་བསྐྱར་ལྡབ་མི་གནང་བའི་འབོད་སྐུལ་ཞུ་བཞིན་པར་འགྲེལ་བརྗོད་གནང་སོང་།རྩ་བའི་དེ་རིང་སྔ་དྲོ་སྐར་རྟགས་ཅན་གྱི་དྲི་བ་དྲིས་ལན་གྱི་ལས་རིམ་ནང་ཐོག་མར་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་དྲི་བ་གསུམ་ཕུལ་གནང་བའི་ཐོག་ཕྱིས་སུ་སྤྱི་འཐུས་ ༡༨ ཙམ་གྱིས་འཕྲོས་དོན་དྲི་བ་དང་འབྲེལ་ནས་ཆ་ཤས་བཞེས་སོང་། སྐར་རྟགས་ཅན་གྱི་དྲི་བར་ལན་འདེབས་གྲུབ་མཚམས་སུ་བོད་མིའི་སྒྲིག་འཛུགས་ཆོས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༡༌༢༢ ལོའི་ལས་བསྡོམས་ཐོག་ཕེབས་ཡོད། པར་ཁག བོད་མིའི་སྒྲིག་འཛུགས། བོད་མི་མང་སྤྱི་འཐུས་ལྷན་ཚོགས།
བོད་ནང་གི་ཛ་དྲག་གནས་སྟངས་ཐོག་དོན་ཚན་ ༧ ཅན་གྱི་གྲོས་ཆོད་གཏན་འབེབས།
ཁ་སང་གྲོས་ཚོགས་ཀྱི་ལས་ཉིན་དང་པོའི་ཐོག་རྒྱ་གཞུང་གིས་བོད་ཐོག་འཛིན་པའི་དྲག་གནོན་དང་གདུག་རྩུབ་ཅན་གྱི་སྲིད་བྱུས་རྣམས་འཕྲལ་མར་མཚམས་འཇོག་གིས་བོད་མིའི་འགྲོ་བ་མིའི་ཐོབ་ཐང་ལ་ངེས་པར་དུ་བརྩི་སྲུང་ཞུ་དགོས་པ་དང། བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་འབྲེལ་མོལ་ཡོང་ཐབས་ཀྱི་སྐུལ་ལྕག་བསྐྱར་ནན་དང་སྦྲགས་ཏེ་བོད་ནང་གི་ཛ་དྲག་གནས་སྟངས་ཐོག་དོན་ཚན་ ༧ ཅན་གྱི་གྲོས་ཆོད་གཏན་འབེབས་གནང་སོང་།སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་ཉིན་དང་པོར་ཚོགས་གཙོའི་གསུང་བཤད་དང་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་གྲོས་འཆར་གཏན་འབེབས་ཀྱི་ལས་རིམ་ཁག་གྲུབ་རྗེས་དུས་ཚོད་ཆ་ཚང་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་དང་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཏན་འབེབས་ཐོག་བཏང་ཡོད་པ་རེད།ཐེངས་འདིའི་གྲོས་ཆོད་ཀྱི་སྔོན་གླེང་ནང་འདི་ལོའི་ཕྱི་ཟླ་ ༣ པ་ནས་བཟུང་ད་བར་བོད་ནང་རྒྱ་གཞུང་གི་མི་རིགས་དབྱེ་འབྱེད་དང་གདུག་རྩུབ་ཅན་གྱི་སྲིད་བྱུས་འོག་བོད་མི་རང་ལུས་མེར་སྲེག་གནང་མཁན་གཅིག་དང་རྒྱ་གཞུང་གི་མནར་གཅོད་འོག་འདས་གྲོངས་སུ་གྱུར་བ། འགྲོ་བ་མིའི་ཐོབ་ཐང་ལོངས་སུ་སྤྱོད་པར་རྒྱལ་ཁབ་ཁ་བྲལ་སོགས་ཀྱི་ཉེས་མིང་འོག་ལོ་མང་རིང་བཙོན་འཇུག་ཁྲིམས་ཐག་བཅད་པའི་གནས་ཚུལ་ཤེས་རྟོགས་བྱུང་བ་རྣམས་ཞིབ་ཕྲ་བཀོད་པ་དང་འབྲེལ། བོད་ནང་ཆབ་སྲིད་ཀྱི་ཛ་དྲག་གནས་སྟངས་མུ་མཐུད་ལུས་ཡོད་པའི་ཁར་རྒྱ་གཞུང་གིས་སྲིད་བྱུས་ངན་པ་ཁག་རྒྱུན་ཆད་མེད་པར་ལག་བསྟར་བྱས་འབྲས་སུ་བོད་ཀྱི་སྣོད་བཅུད་གཉིས་ཀའི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་སྐོར་འགྲེལ་བརྗོད་གནང་འདུགདེ་འབྲེལ་གྲོས་ཆོད་ནང་རྒྱ་གཞུང་གི་དྲག་པོའི་སྲིད་བྱུས་འོག་མནར་གཅོད་ག་ཚོད་བཏང་དང་གཏོང་མིན་ལ་ལྟོས་མེད་རང་གི་ལུས་སྲོག་དང་བཅས་པ་བློས་བཏང་གནང་མཁན་བོད་མི་ཡོངས་ལ་གདུང་སེམས་མཉམ་བསྐྱེད་དང་། སྤྱིར་བོད་ནང་བོད་མིའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་ཛ་དྲག་གནས་སྟངས་ཡོད་ཐོག་ཉེ་ལམ་རྒྱ་གཞུང་གིས་གཉན་རིམས་སླད་སྒོར་གྱི་སྲིད་བྱུས་ཟེར་བའི་འོག་དྲག་གནོན་འཕར་མ་མྱོང་བཞིན་པའི་གཞིས་ལུས་བོད་མི་རྣམས་ལ་གདུང་སེམས་མཉམ་བསྐྱེད་ཞུས་པ་དང་སྦྲགས། རྒྱ་གཞུང་གིས་ཆབ་སྲིད་ཀྱི་དགོས་མཁོར་ཆེད་དམིགས་སྤེལ་དང་སྤེལ་བཞིན་པའི་བྱ་སྤྱོད་དེ་དག་འཕྲལ་མར་མཚམས་འཇོག་བྱས་ནས་བོད་མི་རྣམས་རྒྱུན་ལྡན་གྱི་འཚོ་བར་རོལ་རྒྱུའི་མཐུན་འགྱུར་སྦྱོར་དགོས་པ་དང་། བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་ངེས་པར་དུ་བརྩི་སྲུང་ཞུ་དགོས། དེ་བཞིན་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་རྣམས་གང་མགྱོགས་གློད་བཀྲོལ་བཏང་སྟེ་ཁོང་རྣམ་པའི་ཚེ་སྲོོག་གི་འགན་འཁུར་དགོས་པའི་དགོས་འདུན་ཁག་ཅིག་ཆེད་བཏོན་གནང་ཡོད།དེ་བཞིན་གྲོས་ཆོད་གྲོས་འཆར་གྱི་དོན་ཚན་ལྔ་པའི་ནང་། བོད་འདི་ལོ་རྒྱུས་ཀྱི་གནས་བབ་ཐོག་ནས་རྒྱ་ནག་གི་ཆ་ཤས་ནམ་ཡང་མིན་ནའང་བོད་རྒྱའི་དཀའ་རྙོག་སེལ་བའི་ལྡེ་མིག་ལྟ་བུ་དེ་༸གོང་ས་༸སྐྱབས་མགོན་ཆེན་པོ་མཆོག་ཆགས་ཡོད་སྟབས། ༸གོང་ས་མཆོག་གི་དགོངས་གཞི་བཞིན་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་འབྲེལ་མོལ་ཡོང་ཐབས་གནང་དགོས་པའི་སྐུལ་ལྕག་བསྐྱར་ནན་ཞུས་པ་གཙོས་རྒྱ་གར་གཞུང་མང་གཙོ་བོར་གྱུར་པའི་ད་བར་བོད་དོན་ལ་ཞལ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་རྒྱལ་སྤྱིའི་ཚོགས་སྒེར་ཡོངས་ལ་ཐུགས་རྗེ་ཆེ་ཞུས་པ་དང་། གཞིས་ལུས་བོད་མི་རྣམས་ཀྱིས་རྒྱ་གཞུང་གི་མནར་གཅོད་སྲིད་བྱུས་ཁྲོད་སྙིང་སྟོབས་དང་ཆོད་སེམས། ལ་རྒྱ་བཅས་པ་འགྱུར་བ་མེད་པའི་རང་བཞིན་ལ་ཡི་རང་སྔགས་བརྗོད་དང་འབྲེལ། རང་རེ་བཙན་བྱོལ་བོད་མི་རྣམས་ཀྱི་ངོས་ནས་དེ་དག་མི་དཔེ་བཞེས་ཏེ་བོད་ཀྱི་འཐབ་རྩོད་དང་བོད་ཀྱི་ཆོས་རིག སྐད་ཡིག་རྣམས་མི་ཉམས་རྒྱུན་འཛིན་གནང་དགོས་གལ་ཡིན་པར་མ་ཟད། བོད་མིའི་ཆིག་སྒྲིལ་གྱི་ནུས་པ་གོང་འཕེལ་ཡོང་བར་ཕྱར་བ་གྲུ་འདེགས་ངང་འབད་བཙོན་གནང་དགོས་པ་བཅས་འཁོད་ཡོད།བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་ལས་རིམ་སྐབས་གྲོས་ཆོད་གྲོས་འཆར་གྱི་དོན་ལྔ་པ་སྟེ། དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་འབྲེལ་མོལ་ཡོངས་ཐབས་གནང་དགོས་པའི་སྐུལ་མ་བསྐྱར་དུ་བྱ་རྒྱུ་ཞེས་པའི་གནད་དོན་ཐོག་སྤྱི་འཐུས་རྣམས་ཀྱིས་དེ་འབྲེལ་བཀའ་མོལ་ལྷུག་པོ་གནང་བ་དང་དེ་བཞིན་བཀའ་འདྲི་དགོངས་སྐོར་ཡང་ཕེབས་ཡོད།སྐབས་དེར་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་མགོ་འདོན་གནང་མཛད་དོན་ལྟར་དབུ་མའི་ལམ་གྱི་སྲིད་བྱུས་ཐོག་ཕེབས་ཀྱི་ཡོད་པ་དང་བཀའ་ཤག་གི་ངོས་ནས་མུ་མཐུད་དེ་འབད་བརྩོན་གནང་བཞིན་ཡོད་པར་གསུངས་ཡོད།ཁ་སང་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་སྲིད་སྐྱོང་མཆོག་གིས་གཙོས་པའི་ཁྱོན་སྤྱི་འཐུས་བཅོ་ལྔས་བགྲོ་གླེང་གི་ཆ་ཤས་བཞེས་ཡོད། པར་ཁག བོད་མིའི་སྒྲིག་འཛུགས། བོད་མི་མང་སྤྱི་འཐུས་ལྷན་ཚོགས།
སྣར་ཐང་དཔར་ཁང་མུ་མཐུད་ཉར་དགོས་པའི་ཐག་གཅོད་ཕེབས་ཚེ་དེ་ལྟར་གནང་རྒྱུ་ཡིན།
ཁ་སང་་བོད་མིའི་སྒྲིག་འཛུགས་ཀྱི་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བཀའ་བཤག་སྐབས
བོད་གཞིས་བྱེས་མཉམ་འཛོམས་སླད་བཀའ་སྤྱི་གཉིས་ནས་གཞི་རྒྱ་ཆེ་བའི་བོད་དོན་ཞུ་གཏུག་གི་ལས་འགུལ་སྤེལ་རྒྱུ།
དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་གཉིས་པའི་ཐོག་བོད་བསྟན་སྲིད་མི་རིགས་ཆེད་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་བའི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་ལྷག་བསམ་དང་སྙིང་སྟོབས་ལ་ཡི་རངས་དང་སྦྲགས། བོད་དོན་བདེན་མཐའ་གསལ་ཐབས་དང་གཞིས་བྱེས་མཉམ་འཛོམས་ཡོང་ཆེད་བཀའ་སྤྱི་གཉིས་ནས་སྣེ་ཁྲིད་ཀྱིས་རྒྱལ་སྤྱིའི་ནང་གཞི་རྒྱ་ཆེ་བའི་བོད་དོན་ཞུ་གཏུག་གི་ལས་འགུལ་སྤེལ་གནང་རྒྱུ་བཅས་དོན་ཚན་བདུན་ཅན་གྱི་གྲོས་ཆོད་ཅིག་སྤྱི་མོས་ཀྱིས་གཏན་འབེབས་གནང་སོང་།དེ་ཡང་བོད་ནང་གི་ཛ་དྲག་གནས་སྟངས་དང་འབྲེལ་བའི་གཞུང་འབྲེལ་གྱི་གདུང་སེམས་མཉམ་སྐྱེད་ཀྱི་གྲོས་ཆོས་གྲོས་འཆར་ཐོག་ཁ་སང་དང་དེ་རིང་བཅས་ཉིན་ཕྱེད་གཉིས་རིང་སྤྱི་འཐུས་བཞི་བཅུ་ལྷག་ནས་ཆ་ཤས་བླངས་པའི་སྒོ་ནས་གྲོས་བསྡུར་ལྷུག་པོ་གནང་རྗེས་དོན་ཚན་གཉིས་ལ་བཟོ་བཅོས་ཀྱི་གྲོས་འཆར་ཐོག་ནས་སྤྱི་མོས་ཀྱིས་གཏན་འབེབས་བྱུང་ཡོད། གྲོས་ཆོད་དེའི་ནང་ བོད་བསྟན་སྲིད་མི་རིགས་ཆེད་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་བའི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་ཤུལ་ལུས་ནང་མི་བཅས་ལ་ཐུགས་གསོ་ཞུ་རྒྱུ་དང་། རྒྱ་ནག་གཞུང་གིས་སླར་ཡང་གདུག་རྩུབ་ཅན་གྱི་རིག་གནས་གསར་བརྗེའི་ལས་འགུལ་བསྐྱར་ལོག་བྱེད་བཞིན་པ་དེའི་རིགས་འཕྲལ་དུ་མཚམས་འཇོག་དགོས་པ། དེ་བཞིན་པཎ་ཆེན་སྐུ་ཕྲེང་༡༡ པ་མཆོག་གི་གཙོས་རྩོམ་པ་པོ་སྒོ་ཤེས་རབ་རྒྱ་མཚོ་སོགས་བོད་ཀྱི་ཆབ་སྲིད་བཙོན་པ་རྣམ་ཀྱི་ཚེ་སྲོག་ལ་རྒྱ་གཞུང་གིས་འགན་འཁུར་དགོས་པ་མ་ཟད། བཙོན་ནས་གློད་གྲོལ་གྱིས་ཁོང་རྣམས་ཀྱི་འགྲོ་བ་མིའི་གཞི་རྩའི་ཐོབ་ཐང་རྣམས་ལོངས་སུ་སྤྱོད་དུ་འཇུག་དགོས་པ་ནན་སྐུལ་དང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ལྕམ་སྐུ་ Michelle Bachelet མཆོག་འདི་ལོའི་ཕྱི་ཟླ་ ༥ ནང་ཤར་ཏུར་ཀི་སི་ཐན་དུ་གཟིགས་སྐོར་སླད་ཆེད་ཕེབས་གནང་གཏན་འཁེལ་བ་བཞིན་བོད་ནང་དུའང་ཕེབས་ཐབས་གནང་དགོས་པའི་འབོད་སྐུལ། གཞན་ཡང་བོད་དོན་བདེ་མཐའ་གསལ་ཐབས་དང་གཞིས་བྱེས་མཉམ་འཛོམས་ཡོང་ཆེད་བཀའ་སྤྱི་གཉིས་ནས་སྣེ་ཁྲིད་ཀྱིས་རྒྱལ་སྤྱིའི་ནང་གཞི་རྒྱ་ཆེ་བའི་བོད་དོན་ཞུ་གཏུག་གི་ལས་འགུལ་སྤེལ་གནང་རྒྱུ་སོགས་འཁོད་ཡོད། ཐེངས་འདིའི་གཞུང་འབྲེལ་གྱི་གདུང་སེམས་མཉམ་སྐྱེད་ཀྱི་གྲོས་ཆོད་དེ་སྤྱི་མོས་ཀྱིས་གཏན་འབེབས་མ་གནང་གོང་དུ་སྤྱི་འཐུས་རྣམས་ཀྱིས་བགྲོ་གླེང་གནང་བའི་ཁྲོད། སྤྱི་འཐུས་ཁག་ཅིག་གིས་གདུང་སེམས་མཉམ་སྐྱེད་ཅེས་པ་ནི་ཡིག་ཐོག་ཙམ་དང་། མཆོད་འབུལ་སྨོན་ལམ་བྱ་རྒྱུ་གཙོས་ཟླ་བ་དྲུག་རེ་མཚམས་ནས་གྲོས་ཚོགས་ནས་གྲོད་ཆོས་གཏན་འབེབས་གནང་རྒྱུ་ཙམ་མིན་པར་རྒྱལ་གཅེས་པ་ཡོངས་ཀྱི་འབོད་ཚིག་དང་ཞལ་ཆེམས་ལྟར་བཀའ་སྤྱི་གཉིས་གཙོས་བོད་མི་རྣམས་ནས་རྒྱལ་སྤྱིའི་སྤྱི་ཚོགས་ཀྱི་སྡིངས་ཆའི་སྟེང་དུ་ཕྱིན་ནས་ལས་འགུལ་སྤེལ་དགོས་པར་གསུངས་དོན་ལྟར། སྲིད་སྐྱོང་མཆོག་གིས་ཀྱང་སྤྱིར་ལས་འགུལ་ཞེས་པར་ངོ་བོ་དང་རྣམ་གྲངས་མང་དག་ཅིག་ཡོད་པར་འགྲེལ་བརྗོད་དང་འབྲེལ། བཀའ་ཤག་ངོས་ནས་སྤྱི་འཐུས་ཚོགས་གཙོ་ཚོགས་གཞོན་དང་ལྷན་དུ་གོ་བསྡུར་གྱིས་ཚོགས་ཆུང་ཆེད་འཛུགས་ཐོག་ནས་འཕྱར་གྲུ་མཉམ་འདེགས་གནང་རྒྱུར་ཆོད་སེམས་བརྟན་པོ་ཡོད་པར་གསུང་སོང་། མ་ཟད་སྐབས་དེར་སྲིད་སྐྱོང་མཆོག་གིས་བཀའ་ཤག་ངོས་ནས་ཕྱག་ལས་གནང་རྒྱུའི་ཐད་ལ་སྐུ་ལས་སྐྱོན་རྒྱུར་ཐེ་ཚོམ་གང་ཡང་མེད་གསུངས་པ་དང་སྦྲགས། གྲོས་ཚོགས་ནས་མཐུན་རྐྱེན་སྦྱོར་དགོས་པ་སྟེ་བཀའ་ཤག་ཆ་ཚང་བ་ཞིག་གནང་ཚེ་མ་འོངས་ལས་དོན་གནང་ཕྱོགས་ཀྱི་ཐད་ལ་མ་འགྲིག་པའི་སྐོར་ལ་གང་གསུངས་ཀྱང་སྐབས་དེའི་དུས་སུ་འགན་བཞེས་རྒྱུ་ཡིན་ཞེས་གསུངས་སོང་།ད་དུང་དེ་རིང་གི་གྲོས་ཚོགས་སུ་སྤྱི་འཐུས་ཁག་ཅིག་གིས་བོད་མིའི་སྒྲིག་འཛུགས་ཀྱི་བཞེངས་ཕྱོགས་དང་འཛིན་སྐྱོང་གནང་ཕྱོགས་དེ་བོད་མིའི་མང་ཚོགས་དང་བོད་དོན་རྒྱབ་སྐྱོར་གནང་མཁན་ཚོར་གོ་བརྡ་གསལ་པོ་ཞིག་འཕྲོད་ཀྱི་མེད་པའི་གནད་དོན་དང་འབྲེལ་ཉེ་ལམ་གསུམ་བཅུའི་དུས་དྲན་ཐེངས་༦༣པའི་ཐོག་བཀའ་ཤག་གི་གསུང་འཕྲིན་དེ་ཉམས་དམའ་བོ་བྱུང་ཡོད་པའི་ཚོར་བ་ཞིག་སླེབས་ཡོད་སྐོར་གསུངས་ཏེ། དགྲ་གཉེན་ངོ་ཤེས་པའི་སྒོ་ནས་བཞེངས་ཕྱོགས་བརྟན་པོ་ཞིག་བཟོ་དགོས་པའི་དགོངས་ཚུལ་ཕེབས་དོན་ལྟར། སྲིད་སྐྱོང་མཆོག་གིས་བཀའ་ཤག་སྐབས་༡༦པ་ཕེབས་ནས་གྲོས་ཚོགས་ནང་ཐེངས་གཉིས་ལས་ཕེབས་མེད་པའི་ཁྲོད་སྐབས་༡༦པའི་བཀའ་ཤག་གི་ཆབ་སྲིད་ཀྱི་བཞེངས་ཕྱོགས་དེ་གསལ་བཤད་གནང་རྒྱུ་བྱུང་མེད་སྟབས། གྲོས་ཚོགས་ཚོགས་དུས་གསུམ་པའི་ཐོག་བཀའ་ཤག་ནས་གསལ་བཤད་གནང་རྒྱུ་ཡིན་པ་གསུངས་པ་དང་ཆབས་ཅིག གསུམ་བཅུའི་དུས་དྲན་གྱི་གསུང་འཕྲིན་ནང་རྒྱ་ནག་གཞུང་ལ་མགོ་སྒུར་དགོས་པ་དང་ཉམས་དམའ་བའི་ཚིག་དོན་གང་ཡང་མེད་ཀྱང་དབུ་མའི་ལམ་ཀྱི་སྲིད་བྱུས་ཀྱི་འོག་ནས་རྒྱ་གཞུང་ལ་འབྲེལ་བ་ཞིག་བྱ་དགོས་དུས་ཚིག་འབྲུ་ལ་བསམ་བློ་བཏང་ནས་འབྲི་དགོས་བ་ལས་སྤྲེལ་ལད་བྱས་མེད་པ་གསུངས་སོང་།གཞན་ཡང་སྤྱི་འཐུས་ཁག་ཅིག་གིས་འདི་ལོའི་རྒྱ་ནག་གི་དགུན་དུས་ཨོ་རྩལ་འགྲན་ཚོགས་ཐོག་རྒྱ་ཁབ་མང་དག་ཅིག་ནས་རྒྱ་ནག་གི་འགྲོ་བ་མིའི་ཐོབ་ཐང་ལ་ངོ་རྒོལ་མཚོན་ཆེད་གཞུང་འབྲེལ་མི་སྣ་སོགས་འགྲན་ཚོགས་ལ་ཆེད་གཏོང་མ་གནང་བའི་ཁྲོད། བོད་ཀྱི་གནད་དོན་གླེང་སློང་གནང་མ་ཐུབ་པའི་འཐུས་ཤོར་དེ་ཇི་ལྟར་བྱུང་བ་ཞིག་དང་སྐབས་དེའི་དུས་སུ་བཀའ་ཤག་ནས་བསྒྲགས་གཏམ་ཡང་སྤེལ་མེད་པར་ཐུགས་འཚབ་ཀྱི་རྣམ་པ་སྟོན་མཁན་དང་དོགས་འདྲི་ཞུ་མཁན་ཁག་ཅིག་བྱུང་ཡོད།གཞན་ཡང་སྤྱི་འཐུས་རྣམས་ཀྱིས་བགྲོ་གླེང་གནང་སྐབས་དོན་དམ་པའི་གདུང་སེམས་མཉམ་སྐྱེད་ནི་བོད་ཀྱི་ཐུན་མོང་མ་ཡིན་པའི་ཆོས་དང་སྐད་ཡིག་སྲུང་སྐྱོབ་བྱ་རྒྱུ་དེ་ཡིན་པའི་དགོངས་ཚུལ་གསུང་མཁན་བྱུང་བ་བཞིན་སྲིད་སྐྱོང་ངོས་ནས་ཀྱང་། དེ་རིང་གི་གྲོས་ཚོགས་ཐོག་བོད་ནང་དུ་ད་ལྟའི་ཆར་ཛ་དྲག་ཤོས་དེ་རྒྱ་གཞུང་གིས་བོད་མིའི་སྐད་ཡིག་དང་ནང་ཆོས་རྩ་མེད་བཟོ་རྒྱུའི་སྲིད་བྱུས་དེ་ཡིན་པ་གསུངས་པ་དང་སྦྲགས། གཞིས་བཞུགས་བོད་མིའི་ཚོའི་ལ་རྒྱ་དང་སྙིང་སྟོབས་ལ་བརྟེན་ནས་ད་བར་བོད་མིའི་སྐད་ཡིག་དང་ནང་ཆོས་རྣམས་བདག་གཅེས་གནང་བ་ལྟར་མུ་མཐུད་ཕྱིའི་སྲིད་བྱུས་ཇི་འདྲ་ཞིག་ཡོད་མིན་ལ་ལྟོས་མེད་ནང་སེམས་ཀྱི་སྙིང་སྟོབས་ལ་ཞུམ་པ་མེད་པའི་སྒོ་ནས་ཡིད་ལ་བཅིངས་རོགས་ཞེས་ཞུ་སྐུལ་ནན་པོ་གནང་སོང་།གཞུང་འབྲེལ་གྱི་གདུང་སེམས་མཉམ་སྐྱེད་ཀྱི་གྲོས་ཆོད་དེ་སྤྱི་མོས་ཀྱིས་གཏན་འབེབས་བྱུང་མཚམས། དེ་རིང་གྲོས་ཚོགས་ཀྱི་ལས་ཉིན་གཉིས་པའི་ཉིན་རྒྱབ་ནས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ ༢༠༢༠ དང་༢༡ ལོའི་ལས་ཁུངས་མ་ལག་དང་བཅས་པའི་ལོ་འཁོར་ལས་བསྡོམས་སྙན་སྒྲོན་དང་དེའི་ཐོག་བགྲོ་གླེང་གི་ལས་རིམ་ཐོག་ཕེབས་ཡོད་པ་རེད།
སྐབས་ ༡༧ པའི་སྤྱི་འཐུས་ཀྱི་ལས་བསྡོམས་དང་སྔོན་རྩིས་གྲོས་ཚོགས་ཕྱི་ཟླ་གསུམ་པར་ལྷན་ཚོགས་གནང་འཆར་ཡོད་པ།
དེ་རིང་སྐབས་ ༡༧ པའི་གྲོས་ཚོགས་ཀྱི་ཚོགས་དུས་དང་པོ་མཇུག་སྒྲིལ་དང་སྦྲགས་ཏེ་སྐབས་ ༡༧ པའི་སྤྱི་འཐུས་ཀྱི་ལས་བསྡོམས་དང་སྔོན་རྩིས་གྲོས་ཚོགས་ཕྱི་ལོ་ ༢༠༢༢ ཟླ་ ༣ ནང་ལྷན་དུ་ཚོགས་འཆར་ཡོད་པར་གསུངས་ཡོད། དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྐབས་ ༡༧ པའི་གྲོས་ཚོགས་ཚོགས་དུས་དང་པོའི་མཇུག་བསྡོམས་གསུང་བཤད་གནང་སྐབས་ཚོགས་དུས་དང་པོའི་ལས་ཉིན་གཉིས་ཀྱི་ལས་རིམ་ཁག་ལ་སྤྱི་འཐུས་རྣམས་ནས་ཆ་ཤས་བཞེས་ཕྱོགས་དང་གྲོས་ཆོད་གྲོས་འཆར་ཁག་གཏན་འབེབས། དེ་བཞིན་བཀའ་ཤག་གི་གསལ་བཤད་ཐོག་བགྲོ་གླེང་སོགས་གནང་བ་འགྲེལ་བརྗོད་དང་འབྲེལ། གྲོས་ཚོགས་ཀྱི་འཐུས་མི་རྣམ་པ་དང་ལྷག་པར་དུ་གྲོས་ཚོགས་ཀྱི་ཚོགས་གཙོ་སྦྲེལ་པོས་འཛིན་སྐྱོང་བཀའ་ཤག་དང་ལྷན་དུ་ཕྱག་ལས་འགན་མཉམ་འཁུར་དང་ནུས་པ་མཉམ་སྤུངས་གནང་ཐུབ་པར་འབད་བརྩོན་ཆ་ཚང་ཞུ་རྒྱུ་ཡིན་ཞེས་གསུངས་སོང་།ཐེངས་འདིའི་གྲོས་ཚོགས་ཐོག་ཚོགས་གཙོ་མཆོག་གིས་བཀའ་བློན་འོས་བདེམས་བྱུང་བ་རྣམས་ལ་འཚམས་འདྲི་དང་བཀའ་ཤག་གི་ལས་དོན་དང་ཡོང་རྒྱུ་བསྡད་པའི་བཀའ་བློན་གྱི་འོས་འདེམས་དག་ལམ་ལྷོངས་ཡོང་བར་སྨོན་འདུན་ཞུས་པར་མ་ཟད་ད་ལན་གྲོས་ཚོགས་ཚོགས་དུས་ཟིན་པ་དང་སྤྱིར་འདས་པའི་སྐུ་ངལ་རིམ་པ་འཕྲད་ཁག་ལ་བལྟས་ན་སྤྱི་འཐུས་ཀྱི་ལས་བསྡོམས་གྲོས་ཚོགས་བསྐྱང་ཐུབ་དགོས་གལ་ཡིན་པ་དེ་ལྟར་བྱུང་མེད་སྟབས། ཕྱི་ལོ་ ༢༠༢༢ ལོའི་ཟླ་ ༣ ནང་སྤྱི་འཐུས་ཀྱི་ལས་བསྡོམས་དང་སྔོན་རྩིས་གྲོས་ཚོགས་གཉིས་ལྷན་དུ་འཚོགས་འཆར་དང་དེ་འབྲེལ་སྤྱི་འཐུས་རྒྱུན་ལས་དང་ལྷན་གྲོས་བསྡུར་གནང་སྟེ་ཚོགས་དུས་གཏན་ཁེལ་གནང་རྒྱུ་ཡིན་པར་གསུངས་ཡོད།ཚོགས་གཙོ་མཆོག་གིས་ཚོགས་དུས་དང་པོའི་ཐོག་སྤྱི་འཐུས་རྣམ་པས་བགྲོ་གླེང་སོགས་ལ་ཆ་ཤས་ལེགས་པོ་བཞེས་ཡོད་པ་དང་། འཐུས་མི་ཚང་མས་དགོངས་པ་མཐུན་པ་ཞིག་ཡོང་རྒྱུ་ནི་ཧ་ཅང་དཀའ་ཡང་གྲོས་ཚོགས་ནང་ལུས་ངག་གི་ཀུན་སྤྱོད་དང་ཚིག་སྤྱོད་ཕྱོགས། གྲོས་ཚོགས་ཀྱི་སྐད་ཡིག་དང་མཐུན་པ། དེ་བཞིན་ཆེ་མཐོང་ལྡན་པར་བརྩི་འཇོག་གནང་གལ་ཡིན་པའི་འབོད་སྐུལ་ཞུས་སོང་ལ། ལྷག་དོན་གྲོས་ཚོགས་ཀྱི་འཐུས་མི་རྣམ་པས་ཁྲིམས་སྒྲིག་གཞི་གཏན་འབེབས་ཟིན་པའི་ཐོག་ཐུགས་སྣང་དང་སློབ་སྦྱོང་གནང་དགོས་གལ་ཡིན་སྐོར་གསུངས་སོང་། གཞི་རྩའི་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་དེ་བཞིན་ཁ་སང་དང་དེ་རིང་བཅས་ཉིན་གྲངས་གཉིས་རིང་ཚོགས་ཡོད་པ་དང་ཉིན་གཉིས་ཀྱི་ཚོགས་དུས་ཐོག་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་དང་། བོད་ནང་གི་ཛ་དྲག་གནས་སྟངས་དང་འབྲེལ་བའི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་དང་མཐོལ་བཤགས་ཀྱི་གཞུང་འབྲེལ་གྲོས་ཆོད་ཁག་ཅིག་སྤྱི་མོས་ཀྱིས་གཏན་འབེབས་གནང་ཡོད་པ་དང་། སྤྱི་འཐུས་རྣམ་པའི་ཁྲིམས་བཟོའི་ལས་དོན་ཐད་གྲོས་བསྡུར་དང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསལ་བཤད་དང་ལན་འདེབས་གནང་བ་མ་ཟད། བཀའ་བློན་འོས་འདེམས་ཀྱི་ལས་རིམ་ཐོག་བུད་མེད་བཀའ་བློན་གསུམ་འདེམས་ཐོན་བྱུང་ཡོད་པ་རེད།
བཀའ་བློན་འོས་འདེམས་ཁྲོད་སྤྱི་འཐུས་ཁག་ཅིག་ཕྱིར་ཐོན་རྐྱེན་གྲོས་ཚོགས་ཀྱི་ལས་རིམ་རེ་ཞིག་གནང་ཐུབ་མེད།
དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཉིན་རྒྱབ་ཏུ། སྐབས་ ༡༦ པའི་བཀའ་ཤག་གི་བཀའ་བློན་འོས་འདེམས་ལས་རིམ་ཐོག་ཕེབས་ནས་སྲིད་སྐྱོང་མཆོག་གིས་བཀའ་བློན་འོས་མི་ལྔ་མཚོན་འདོན་གནང་སྟེ་གྲོས་ཚོགས་ནས་བཀའ་བློན་འོས་མི་རེ་རེ་བཞིན་ངོ་སྤྲོད་ཀྱིས་དགག་བྱ་ཡོད་མེད་གཟིགས་རྗེས། འོས་མི་དྲུག་པ་མཚན་འདོན་གནང་རྗེས་སྤྱི་འཐུས་ཁག་ཅིག་གིས་དེར་དགག་བྱ་གནང་བ་དང་འབྲེལ་ནས་གྲོས་ཚོགས་ནས་ཕྱིར་ཐོན་གནང་བའི་རྐྱེན་གྱིས་གྲོས་ཚོགས་སུ་ཚོགས་གཙོ་སྦྲེལ་པོས་གཙོས་པའི་ངོ་ཡོད་སྤྱི་འཐུས་ ༢༦ལས་ལྷག་མེད་སྟབས་གྲོས་ཚོགས་ཀྱི་གྲུབ་ཆ་མ་ལོངས་པའི་རྐྱེན་གྱིས་ལས་རིམ་རེ་ཞིག་མཇུག་སྐྱོང་གནང་ཐུབ་མེད།དེ་རིང་སྐབས་ ༡༧ གྲོས་ཚོགས་ཚོགས་དུས་ ༡ ལས་ཉིན་ ༡ ཚོགས་ཐུན་ ༤ པ། ཕྱི་ཟླ་ ༡༠ ཚེས་ ༡༡ ཉིན་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༢ གཞིར་བཟུང་སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་ནང་བཀའ་བློན་གྱི་འོས་མི་ངོ་སྤྲོད་གནང་གནང་བའི་ཁྲོད་བེུད་བཀའ་བློན་འོས་གཞི་གསུམ་སྟེ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་དང་འགན་འཛིན་ལྷན་ཚོགས་ཀྱི་ཚོགས་མི་ཟུར་པ་ནོར་འཛིན་སྒྲོལ་མ་ལགས་ལ་གསང་བའི་འོས་བསྡུ་གནང་རྗེས་སྤྱི་འཐུས་ ༢༧ གིས་རྒྱབ་སྐྱོར་གནང་བ་དང་། བོད་སློབ་འཛིན་སྐྱོང་ཚོགས་པའི་སློབ་གྲྭ་ཁག་ཅིག་གི་སློབ་སྤྱི་ཟུར་པ་ཐར་ལམ་སྒྲོལ་མ་ལགས་ལ་གསང་བའི་འོས་བསྡུ་གནང་རྗེས་སྤྱི་འཐུས་ ༢༧ གིས་རྒྱབ་སྐྱོར་གནང་བ། དེ་བཞིན་བཀའ་ཟུར་རྒྱ་རི་སྒྲོལ་མ་མཆོག་ལ་གསང་བའི་འོས་བསྡུ་གནང་རྗེས་སྤྱི་འཐུས་ ༣༠ ཡིས་རྒྱབ་སྐྱོར་གནང་བ་བཅས་ཁོང་གསུམ་ལ་མང་མོས་ཀྱི་རྒྱབ་སྐྱོར་ཐོབ་ནས་སྐབས་ ༡༦ པའི་བཀའ་ཤག་གི་བཀའ་བློན་དུ་འོས་འདེམས་བྱུང་ཡོད་། འོན་ཀྱང་དེ་རིང་བཀའ་བློན་གྱི་འོས་གཞིའི་ཁོངས་སུ་མཚན་འདོན་གནང་བའི་བཀའ་ཟུར་ཐུབ་བསྟན་ལུང་རིགས་མཆོག་དང་། དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་གཉིས་ལ་འོས་གྲངས་ ༡༨ དང་ ༡༣ བཅས་ལས་རྒྱབ་སྐྱོར་མ་ཐོབ་སྟབས་བཀའ་བློན་གྱི་འོས་གཞི་ནས་ཟགས་ཡོད།དེའི་རྗེས་སྲིད་སྐྱོང་མཆོག་གིས་འོས་གཞི་དྲུག་པ་བོད་མིའི་སྒྲིག་འཛུགས་ཀྱི་སྲི་ཞུ་བ་ཟུར་པ་སྤྱི་འཐུས་ལས་ཐོག་སོག་སྟོད་དངོས་གྲུབ་རྡོ་རྗེ་ལགས་མཚན་འདོན་གནང་རྗེས། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་དགག་བྱ་དང་འབྲེལ་ཏེ་དེའི་རྗེས་ཀྱི་འོས་མི་ཐོག་མ་ཕེབས་ཚེ་གྲོས་ཚོགས་ནས་ཕྱིར་ཐོན་རྒྱུ་ཡིན་པར་གསུངས་ཀྱང་། དེ་ལྟར་མ་བྱུང་སྟབས། ཁོང་གིས་གཙོས་པའི་སྤྱི་འཐུས་ཁག་ཅིག་གྲོས་ཚོགས་ནས་ཕྱིར་ཐོན་རྐྱེན་གྲོས་ཚོགས་ཀྱི་དགོས་ངེས་གྲུབ་ཆ་མ་ལོངས་སྟབས་གྲོས་ཚོགས་ཀྱི་ལས་རིམ་རེ་ཞིག་གནང་མ་ཐུབ་པའི་གནས་སྟངས་སུ་གྱུར་ཡོད།སྲིད་སྐྱོང་སྤེན་པ་ཚེ་རིང་མཆོག་གིས་དེ་རིང་གྲོས་ཚོགས་ཀྱི་སྔ་དྲོའི་ཚོགས་དུས་སྐབས་སུ་སྐབས་ ༡༦ པའི་འཛིན་སྐྱོང་བཀའ་ཤག་ནས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་དང་ལྷན་དུ་འབྲེལ་བ་གང་འདྲ་འཇོག་མིན་དང་ནུས་པ་མཉམ་སྤུངས་གང་འདྲ་གནང་རྒྱུ་ཡིན་མིན་སྐོར་གསལ་བཤད་ཀྱི་གཏམ་བཤད་གནང་ཡོད།བཀའ་ཤག་གི་གསལ་བཤད་དེའི་ནང་དུ་གཙོ་བོ། ཕྱི་ལོ་ ༢༠༡༡ ལོའི་གསུམ་བཅུའི་དུས་དྲན་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་༸སྐུ་དབང་མི་མང་གི་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་གནང་རྒྱུའི་ཐུགས་ཐག་གཅོད་སྐབས་སྩལ་བའི་བཀའ་སློབ་ཀྱི་དུམ་བུ་ཞིག་ལུང་འདྲེན་གནང་སྟེ། ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་གི་ཆབ་སྲིད་ལམ་སྲོལ་ཇི་སྙེད་ཅིག་སྩལ་བའི་ཁོངས་ནས་མང་གཙོའི་ལམ་སྲོལ་འདི་ཡག་ཤོས་སུ་གཟིགས་པའི་དགོངས་གཞིའི་ཐོག་ནས་བཙན་བྱོལ་བོད་མི་རྣམས་མང་གཙོའི་ལམ་སྲོལ་ཡང་དག་པ་ཞིག་ཏུ་ཁྲིད་ཐབས་ལ་སྐུ་ངལ་བརྒྱ་ཕྲག་ལྷུར་བཞེས་གནང་ཡོད་པ་ལྟར། མི་མང་གི་འདམས་པའི་འགོ་ཁྲིད་ཚོའི་ངོས་ནས་མང་གཙོའི་ལམ་སྲོལ་ནང་དུ་མི་མང་གཙོ་བོ་ཡིན་པའི་རྩ་དོན་འདི་ཡིད་ལ་བཅངས་ཏེ་མི་མང་གི་མངོན་འདོད་དང་ཁེ་ཕན་སྒྲུབ་དགོས་པ་དང་།ཁྲིམས་ཀྱི་དབང་བསྒྱུར་རྩ་དོན་དེ་མངོན་འགྱུར་ཡོང་བར་གལ་འགངས་ཆེན་པོ་ཆགས་ཡོད་སྐོར་གསུངས་པ་དང་ཆབས་ཅིག ཕྱི་ལོ་ ༡༩༩༡ ལོར་གཏན་འབེབས་གནང་བའི་བཙན་བྱོལ་བོད་མིའི་བཅའ་ཁྲིམས་འདི་བཞིན་ད་བར་ཉམས་ལེན་ལག་བསྟར་གནང་བའི་ཉམས་མྱོང་སྤྱི་དང་སྒོས་སུ་ཉེ་ལམ་བཅའ་ཁྲིམས་ཀྱི་དཀའ་རྙོག་འཕྲད་པའི་བརྒྱུད་རིམ་ལ་བལྟས་ན་སྐབས་ ༡༧ པའི་གྲོས་ཚོགས་ནས་ཁྲིམས་ལུགས་མཁས་མྱོང་ཅན་ལས་གྲུབ་པའི་བཅའ་ཁྲིམས་བསྐྱར་ཞིབ་ཚོགས་ཆུང་ཞིག་འཛུགས་ཐབས་བྱུང་ན། འཛིན་སྐྱོང་གི་ངོས་ནས་དེའི་ཐོག་མཐུན་འགྱུར་རོགས་ཕན་ཇི་དགོས་ཞུ་ཆོག་པ་གསུངས་པ་མ་ཟད། དོན་ཚན་བཅུའི་སྒོ་ནས་སྐབས་ ༡༦ པའི་བཀའ་ཤག་གིས་བོད་མི་མང་སྤྱི་འཐུས་ལྷན་ཚོགས་ལ་འགན་ཁུར་ཞུ་སྟངས་སྐོར་གསལ་བཤད་གནང་ཡོད།འབྲེལ་ཡོད་པར་ཁག་བོད་མིའི་སྒྲིག་འཛུགས་ཀྱི་དྲྭ་རྒྱ་གཙོས་སྤྱི་ཚོགས་དྲྭ་རྒྱ་ཁག་ལས་བཏུས།
