རྒྱལ་སྤྱི།

དེང་ཆར་འཛམ་གླིང་ས་ཕྱོགས་གང་སར་གནས་སྡོད་བོད་མི་ཚོགས་སྒེར་ཁག་ནས་གཅིག་རྗེས་གཉིས་མཐུད་ཀྱིས་བོད་དོན་ལས་འགུལ་འདྲ་མིན་སྤེལ་བཞིན་ཡོད་པའི་ཁྲོད་འདིར་ཁ་སང་ཕྱི་ཟླ་ ༩ ཚེས་ ༨ ཉིན་ཞོགས་པ་ཚོུད་ ༩ ཐོག་རྒྱ་ནག་གཞུང་ཚབ་ཁང་མདུན་ཐང་དུ་སུད་སི་ཛུ་རིག་ཚོགས་ཆུང་གི་ཚོགས་གཞོན་སྐུ་ཞབས་བསྟན་རྣམ་ཕུན་ཚོགས་ལགས་ཀྱིས་སྣེ་ཁྲིད་འོག་སྤེན་པ་ཚེ་རིང་ལགས་དང་། བཀྲིས་རྣམ་རྒྱལ་ལགས། དགེ་ལེགས་རྣམ་རྒྱལ་ལགས། དེ་བཞིན་བློ་བཟང་ལགས་བཅས་བོད་མི་ལྔས་མ་སྐུལ་དང་བླངས་ཀྱིས་ངོ་རྒོལ་སྐད་འབོད་སོགས་གནང་སྟེ་སྤྱི་ལེ་ ༣༠༠ ལྷག་ཡོད་པའི་སུད་སི་གྲོང་ཁྱེར་ཛུ་རིག་ནས་ཇི་ནེ་ཝ་བར་བོད་དོན་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་འདུགབོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ལས་འགུལ་གྱི་དབུ་འབྱེད་མཛད་སྒོའི་ཐོག་ཛུ་རིག་བདེ་སྲུང་སྤྱི་ཁྱབ་འགན་འཛིན་ Mario Fehr ལགས་དང་བོད་རིགས་མི་མང་གི་ཚོགས་གཙོ་མཚམས་མདའ་ནོར་བུ་ལགས། ས་གནས་བོད་མི་དང་བོད་དོན་རྒྱབ་སྐྱོར་བ་བཅས་ལྷན་འཛོམས་གནང་ཡོད་པ་དང་། སྐུ་ཞབས་ Mario Fehr ལགས་ཀྱིས་སུད་སི་གཞུང་གིས་བོད་མིའི་རང་སྲིད་རང་སྐྱོང་གི་འཐབ་རྩོད་ལ་རྒྱབ་སྐྱོར་གནང་གི་ཡོད་པ་དང་། ལྷག་དོན་ཐེངས་འདིའི་ཞི་བའི་གོམ་བགྲོད་ཀྱི་འབོད་སྒྲ་ནི་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་བོད་རྒྱ་ཞི་མོལ་གྱི་གྲོས་མོལ་གནང་རྒྱུ་ཡིན་པ་དེ་ནི་ཧ་ཅང་འོས་འཚམས་ཤིག་ཡིན་པ་དང་། སུད་སི་གཞུང་གིས་བོད་དོན་ལ་དུས་རྟག་ཏུ་རྒྱབ་སྐྱོར་ཡོད་པ་ལྟར་མུ་མཐུད་ནས་དེ་ལྟར་གནང་ངེས་ཡིན་པ་མ་ཟད། ཁོང་སྐུ་སྒེར་དང་ཛུ་རིག་ས་གནས་གཞུང་གི་ཚབ་ཞུས་ཏེ་ལས་འགུལ་སྤེལ་དོན་བཞིན་ལམ་ལྷོངས་ཡོང་བའི་སྨོན་འདུན་ཡོད་ཅེས་གསུངས་འདུགརྩ་བའི་ཛུ་རིག་བོད་རིགས་སྤྱི་མཐུན་ཚོགས་པས་རྐང་འགན་བཞེས་ཏེ་གོ་སྒྲིག་གནང་བའི་ལས་འགུལ་དེ་ཁ་སང་ཚེས་ ༨ ཉིན་དབུ་འཛུགས་དང། རྒྱལ་ས་སྦན་བརྒྱུད་རིམ་བཞིན་ཚེས་ ༡༨ ཉིན་སུད་སི་ཇིི་ནི་ཝ་གྲོང་ཁྱེར་དུ་མཇུག་སྒྲིལ་གནང་འཆར་ཡོད་པ་དང་། ལས་འགུལ་བ་རྣམས་ནས་ཐེངས་འདིའི་གོམ་བགྲོད་བརྒྱུད་གཙོ་བོ་སུད་སི་གཞུང་དང་རྒྱལ་ཚོགས་བཅས་ལ་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་བོད་རྒྱ་ཞི་མོལ་ཡོང་ཐབས་དུ་གྲོས་མོལ་དབུ་འཛུགས་གནང་བར་གནོན་ཤུགས་སྤྲོད་དགོས་པ་དང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་དང་སྐུ་འཁོར་ལྷན་རྒྱས་ཀྱི་གནས་སྟངས་གང་ཡིན་མངོན་གསལ་བྱེད་དགོས་པ། དེ་བཞིན་བྱ་བྲལ་རིན་པོ་ཆེ་མཆོག་གློད་བཀྲོལ་དགོས་པ་མ་ཟད། རྒྱ་ནག་ནས་འཛམ་གླིང་ཡོངས་ལ་ཏོག་དབྱིབས་གཉན་རིམས་ཁྱབ་བརྡལ་བཏང་བའི་འགན་འཁྱེར་འཇུག་དགོས་པ། ཨ་རིའི་སྲིད་གཞུང་ནས་བོད་དོན་དང་འབྲེལ་བའི་སྲིད་བྱུས་རྩ་འཛིན་གྱིས་རྒྱ་མིའི་འགོ་ཁྲིད་རྣམས་ཨ་རིར་འགྲོ་སྐྱོད་མཐོང་མཆན་བཀག་སྡོམ་གནང་རྒྱུའི་གྲོས་ཆོད་བཞག་གནང་བ་བཞིན་སུད་སི་གཞུང་གིས་ཀྱང་དེ་མཚུངས་ཀྱི་ཁྲིམས་འཆར་གཏན་འབེབས་གནང་སྟེ་རྒྱ་ནག་གི་བྱས་ཉེས་ལ་ཁྲིམས་མཐུན་རྒོལ་ལན་གནང་དགོས་པ་སོགས་ཀྱི་དགོས་འདུན་ཁག་ཅིག་ཆེད་འདོན་གནང་འདུག ལས་འགུལ་སྣེ་ཁྲིད་གནང་མཁན་སྐུ་ཞབས་བསྟན་རྣམ་ཕུན་ཚོགས་ལགས་ཀྱིས་འདི་ག་རླུང་འཕྲིན་ཁང་ལ་ལས་འགུལ་གྱི་དགོས་དམིགས་གང་ཡིན་ངོ་སྤྲོད་གནང་བ་དང་། དེ་བཞིན་ཁོང་གིས་བྱེས་སུ་བཞུགས་པའི་བོད་མི་རྣམས་ལ་བོད་དོན་ལས་འགུལ་རྒྱ་གང་ཆེ་སྤེལ་དགོས་གལ་ཡིན་པའི་གཞེན་སྐུལ་དང་གཞིས་བཞུགས་རྒྱ་ཆེ་མང་ཚོགས་ལ་ཁོང་རྣམ་པའི་མངོན་འདོད་ལྟར་རྒྱལ་ཚོགས་སུ་གང་ཐུབ་ཞུ་ངེས་ཡིན་པར་གསུངས་སོང་། གཞི་རྩའི་ཐེངས་འདིའི་བོད་དོན་གོམ་བགྲོད་དེ་བཞིན་ཕྱི་ཟླ་ ༩ ཚེས་ ༡༨ ཉིན་སུད་སི་གྲོང་ཁྱེར་ཇི་ནེ་ཝར་ལས་འགུལ་མཇུག་སྒྲིལ་གནང་གི་ཡོད་པ་དང་། ལས་འགུལ་བ་རྣམས་ཀྱིས་གོམ་བགྲོད་ཀྱི་བརྒྱུད་རིམ་ཁྲོད་སུད་སི་གཞུང་དང་རྒྱལ་ཚོགས། དེ་བཞིན་རྒྱ་ནག་གི་གཞུང་ཚབ་ཁག་དང་ཡན་ལག་ལས་ཁུངས་བཅས་སུ་ལས་འགུལ་དེའི་དགོས་འདུན་ཐོག་ཞུ་གཏུག་གནང་རྒྱུ་ཡིན་པ་རེད་འདུག

དེ་རིང་སྔ་དྲོ། ཕྱག་ཚོད་ ༡༡ ཐོག   བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་དུ། བོད་ཀྱི་གཞོན་ནུ་དང་བུད་མེད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། དགུ་བཅུ་གསུམ་ལས་འགུལ་ཚོགས་པ། དེ་བཞིན་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ཁང་སོགས་ཚོགས་པ་དྲུག་མཉམ་འཛོམས་ཀྱིས། གསར་འགོད་ལྷན་ཚོགས་ཤིག་སྐོང་འཚོགས་དང་འབྲེལ། རྒྱལ་སྤྱིའི་ཚོགས་སྐྱིད་བརྒྱ་ལྷག་གིས་འདི་ལོའི་སྤྱི་ཟླ་ ༡༠ བའི་ཚེས་ ༡ ཉིན་རྒྱ་ནག་གི་རྒྱལ་སྟོན་དུས་ཆེན་སྐབས་རྒྱ་ནག་གི་རྒྱ་བསྐྱེད་རིང་ལུགས་ཀྱི་སྲིད་བྱུས་ལ་རྒྱལ་སྤྱི་རང་བཞིན་གྱི་ངོ་རྒོལ་ལས་འགུལ་སྤེལ་རྒྱུ་ཡིན་སྐོར་ཡོང་གྲགས་གནང་བ་མ་ཟད། རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་སྤྱི་ལོ་ ༢༠༢༢ ལོའི་དགུན་དུས་ཀྱི་ཨོ་རྩལ་འགྲན་ཚོགས་དེ་པེ་ཅིང་དུ་ཚོགས་རྒྱུའི་ཐག་གཅོད་ཕྱིར་འཐེན་གནང་དགོས་པའི་ཞུ་སྐུལ་གནང་ཡོད་པ་གསུངས་སོང་།

ཟླ་བ་སྔོན་མའི་ཚེས་ ༢༩ དང་ ༣༠ དེ་བཞིན་ཕྱི་ཚེས་ ༣༡ བཅས་ཀྱི་ཉིན་ཞག་རིམ་པར་བོད་པའི་དྭང་སློབ་ཀྱི་དམག་མི་དང་རྒྱ་ནག་གཞུང་གི་དམག་མི་དབར་ལ་གདོང་ཐུག་བྱུང་ཡོད་པ་དང་། ལྷག་དོན་འཕགས་བོད་གཉིས་ཀྱི་ས་མཚམས་སུ་བོད་པའི་དྭང་ཞབས་པ་རྣམས་ནས་ས་ཁམས་མྱུལ་ཞིབ་གནང་སྐབས་དེ་སྔ་ས་འོག་ཏུ་བཞག་པའི་འབར་རྫས་ཤིག་གས་འཐོར་བྱུང་ནས་དྭང་སློབ་རུ་ཤོག་ཨང་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་ཉི་མ་བསྟན་འཛིན་ལགས་འདས་གྲོངས་སུ་གྱུར་བའི་གནས་ཚུལ་ཐོན་ནས་ཉིན་གྲངས་ ༡༠ ཕྱིན་པའི་དུས་མཚམས་འདིར་ཁ་སང་རེས་གཟའ་ཟླ་བ་ཉིན་བཞུགས་སྒར་རྡ་རམ་ས་ལའི་གསེར་སྐྱ་མང་ཚོགས་རྣམས་ཀྱིས་ཕྱག་ཏུ་སྐུ་གཤེགས་དམ་པ་ཉི་མ་བསྟན་འཛིན་ལགས་ཀྱི་སྐུ་པར་དང་བོད་ཀྱི་རྒྱལ་དར་བསྣམས་ཏེ་ཁོང་ལ་གདུང་སེམས་མཉམ་བསྐྱེད་ཞུ་ཕྱིར་མེག་གྷན་ཁྲོམ་གཞུང་དུ་མར་མེ་ཁྲོམ་སྐོར་གནང་སོང་།ཁ་སང་ཚེས་ ༧ ཉིན་གྱི་ཕྱི་དྲོ་ཚོུད་ ༥༌༣༠ སྟེང་རྡ་ས་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་གནང་བའི་ཐོག་ས་གནས་མང་ཚོགས་ནས་རྡ་ས་མེག་གྷན་ཁྲོམ་གཞུང་རང་དུ་མར་མེ་ཁྲོམ་སྐོར་ཐེངས་གསུམ་གནང་སོང་བ་དང་། སྐབས་དེར་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཟུར་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་མང་ཚོགས་འདུ་འཛོམས་དང་མར་མེ་ཁྲོམ་སྐོར་གནང་དོན་སོགས་ངོ་སྤྲོད་གནང་བ་དང་སྦྲགས། ཟླ་བ་འདིའི་ཚེས་ ༡ ཉིན་ཡོངས་གྲགས་མིན་པར་ཉམས་དམའ་བོའི་ཐོག་ནས་དམ་པ་ཁོང་གི་སྐུ་ཕུང་ནང་ལ་གདན་ཞུ་གནང་བར་བློ་ཕམ་བྱུང་སྐོར་གསུངས་པ་དང་ཆབས་ཅིག གཟའ་འཁོར་གཅིག་གི་ནང་ལ་འགྱུར་ལྡོག་ཆེན་པོ་བྱུང་ཡོད་པ་གསུངས་སོང་། ཁོང་གིས་ད་དུང་ད་ལན་འཕགས་བོད་གཉིས་ཀྱི་ས་མཚམས་སུ་འབར་རྫས་གས་འཐོར་དོན་རྐྱེན་ཁྲོད་བོད་མི་ཞིག་གི་སྐུ་སྲོག་ཤོར་ཡོད་ཀྱང་། འཕགས་བོད་གཉིས་ཀར་རྒྱལ་ཁ་ཆེན་པོ་ཐོབ་པ་མ་ཟད་དམ་པ་ཁོང་གི་མཚན་སྙན་ཐོག་ནས་བོད་མི་རིགས་དང་བོད་རྒྱལ་ཁབ་དང་བཅས་པར་དགའ་སྤོབས་གནང་འོས་ཀྱི་གནད་དོན་ཞིག་ཏུ་གྱུར་ཡོད་པར་ཚོར་ཤུགས་ཆེན་པོས་གསུངས་སོང་།དེ་བཞིན་ཁོང་གིས་ཕྱི་ཟླ་བ་ ༦ ནས་རྒྱ་དཀར་ནག་གཉིས་ཀྱི་དམག་མིའི་དབར་དྲག་པོའི་གདོང་ཐུག་གི་གནད་དོན་ཁྲོད་རྒྱ་ནག་གི་དམག་མི་རྒྱ་གར་ས་མཚམས་སུ་བཙན་འཛུལ་བྱས་པར་བརྟེན་རྒྱ་གར་དང་བོད་མི་གཉིས་རྒྱ་ནག་གིས་བརྙས་བཅོས་གཏང་ཡུལ་གཅིག་པ་ཆགས་ཡོད་སྟབས་རྒྱ་གར་གྱི་གནད་ཡོད་མི་དང་མང་ཚོགས་ཀྱིས་བོད་དོན་གླེང་བའི་དུས་སྐབས་ཤིག་ཤར་ཡོད་སྐོར་གསུངས་སོང་།བོད་མི་མང་སྤྱི་འཐུས་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གིས་ཁོང་སྐུ་སྒེར་གྱི་ཐོག་ནས་ཆེད་བཅར་གནང་སྐོར་གསལ་བཤད་གནང་སོང་བ་དང་། སྐུ་གཤེགས་དམ་པ་ཉི་མ་བསྟན་འཛིན་ལགས་ཀྱིས་གཙོས་པའི་དེ་སྔའི་བོད་དམག་ཚོས་བཙན་བྱོལ་བོད་མིའི་གནས་ཡུལ་རྒྱ་གར་གྱི་བདེ་སྲུང་སླད་དུ་རྒྱ་ནག་དང་འཐབ་རྒོལ་གནང་སྟེ་རང་སྲོག་བློས་བཏང་གནང་བ་དེ་ནི་ཆེས་ཐོག་མ་མིན་སྐོར་གསུངས་སོང་།དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་ཀྱང་དྭང་སློབ་དམག་སྒར་གྱི་གནས་སྟངས་དེ་ནི་གསང་བའི་གནད་དོན་ཞིག་ཡིན་པ་ལྟར་གཞོན་ནུ་ལྷན་ཚོགས་ཀྱིས་གསང་གནས་རང་ལ་དམ་བཟུང་གིས་ནང་དོན་དེ་བོད་མི་རིགས་ཀྱི་འཐབ་རྩོད་དང་འབྲེལ་བ་ཡོད་དོན་བཞིན་ཕྱག་ལས་གནང་སྒོ་ཁག་ཞུས་ཡོད་པ་གསུངས་སོང་།དེ་བཞིན་ཁོང་གིས་ཕྱི་ལོ་ ༡༩༦༢ ལོར་བོད་པའི་དྭང་སློབ་ཀྱི་དམག་སྒར་ཆེད་འཛུགས་གནང་བའི་དགོས་དམིགས་ལྟར་ད་བར་ལོ་ངོ་ ༥༨ འགྲོ་ཟིན་ཀྱང་ཐོག་མའི་དམིགས་ཡུལ་བཞིན་དྭང་སློབ་བོད་དམག་དག་གིས་དཔའ་ངར་ཞུམ་པ་མེད་པར་མུ་མཐུད་གནས་ཡོད་པའི་བརྡ་ལན་ཞིག་སྤྲད་ཡོད་པ་གསུངས་ཡོད།དམ་པ་ཁོང་དམག་སར་འདས་གྲོངས་སུ་གྱུར་བའི་གནས་ཚུལ་ཐོན་འཕྲལ་བཙན་བྱོལ་བོད་མི་དང་རྒྱ་གར་བ། དེ་བཞིན་དེ་སྔ་དམག་སྤྱི་གནང་མྱོང་མཁན་རྒྱ་གར་གྱི་ཆེས་མཐོའི་མི་སྣ་དང་རྒྱ་གར་གྱི་གསར་ཁང་ཁག་གིས་ཀྱང་ཁོང་དང་ཤུལ་ལུས་ནང་མིར་གདུང་སེམས་མཉམ་བསྐྱེད་དང་ཡི་རང་བསྔགས་བརྗོད། ཆེ་བསྟོད་བཅས་ཞུ་མུས་ཡིན་པ་རེད།ཁ་སང་སྐུ་ཕུང་ཞུགས་འབུལ་གནང་སྐབས་རྒྱ་གར་གཞུང་འཛིན་ཚོགས་པ་ BJP རྒྱལ་ཡོངས་དྲུང་ཆེ་སྐུ་ཞབས་ Ram Madhav ལགས་ཀྱིས་གཙོས་པའི་གཞུང་འཛིན་ཚོགས་པའི་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། དེ་བཞིན་ཆེས་མཐོའི་མི་སྣ་ཁག་ཅིག་ནས་གདུང་སེམས་མཉམ་བསྐྱེད་དང་ཆེ་བསྟོད་མཚོན་ཕྱིར་ཆེད་བཅར་གནང་ཡོད་པ་རེད། ལྷག་དོན་ཁ་སང་དང་དེ་རིང་བཅས་བོད་མིའི་གནས་ཡུལ་གཞིས་སྒར་ཁག་ཏུ་ས་གནས་བོད་ཀྱི་གཞོན་ནུ་ལྷན་ཚོགས་དང་དྭང་ཞབས་ཟུར་ཚོགས། ས་གནས་བོད་ཀྱི་བེུད་ལྷན་ཚོགས་སོགས་གཞུང་འབྲེལ་མིན་པའི་ཚོགས་སྐྱིད་ཁག་གིས་བཞུགས་སྒར་དྷ་ས་གཙོས་སྦེལ་ཀོབ། མོན་གྷོ་འདོད་རྒུ་གླིང་། ཀོ་ལོ་གྷལ། སྡེ་ར་ལྡུན། ལྡི་ལི་སོགས་སུ་མཆོད་འབུལ་སྨོན་ལམ་དང་མར་མེ་ཁྲོམ་སྐོར་གྱི་ལས་འགུལ་རྒྱ་གང་ཆེ་གནང་བཞིན་འདུག  

འདས་པའི་ཟླ་ཤས་ནས་རྒྱ་དཀར་ནག་གཉིས་ཀྱི་མཐའ་མཚམས་དམག་མི་དབར་གདོང་ཐུག་བྱུང་རྐྱེན་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པ་དང་རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ S Jaishankar མཆོག་གིས་ལ་དྭགས་ཀྱི་གནས་སྟངས་དེ་ཧ་ཅང་རྫ་དྲག་ཏུ་གྱུར་ཡོད་པར་འགྲེལ་བརྗོད་གནང་སྟེ་ཕྱོགས་གཉིས་དབར་ཆབ་སྲིད་ཀྱི་གྲོས་མོལ་གཏིང་ཟབ་གནང་དགོས་པ་གསུངས་འདུགདེ་རིང་བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། རྒྱ་དཀར་ནག་གཉིས་དབར་འཕགས་བོད་ས་མཚམས་དང་འབྲེལ་བའི་རྩོད་རྙོག་ཁྲོད་ཁ་སང་ཕྱི་སྲིད་བློན་ཆེན་སྐུ་ཞབས་ S Jaishankar མཆོག་གིས་ལ་དྭགས་ཤར་ཕྱོགས་ཀྱི་གནས་སྟངས་དེ་ཧ་ཅང་རྫ་དྲག་ཏུ་གྱུར་ཡོད་པར་འགྲེལ་བརྗོད་གནང་བ་དང་སྦྲགས། རྒྱ་གར་ནས་རྒྱ་ནག་དང་ལྷན་དུ་ཆབ་སྲིད་ཀྱི་གྲོས་མོལ་གཏིང་ཟབ་གནང་དགོས་པར་གསུངས་འདུག་པ་མ་ཟད། ད་ལྟའི་ཆར་འཕྲད་བཞིན་པའི་མཐའ་མཚམས་ཀྱི་རྩོད་རྙོག་དེ་རྒྱ་དཀར་ནག་གཉིས་ཀྱི་སྤྱི་ཡོངས་འབྲེལ་ལམ་གྱི་གནས་བབ་དང་ཐ་དད་དུ་འཇོག་རྒྱུ་མེད་པར་གསུངས་འདུགགཞི་རྩའི་ཕྱི་སྲིད་བློན་ཆེན་མཆོག་ནས་གནངས་ཕྱི་ཚེས་ ༡༠ ཉིན་ཨུ་རུ་སུའི་རྒྱལ་ས་ Moscow ནང་རྒྱལ་ཁབ་ཁག་ཅིག་གི་ཕྱི་སྲིད་བློན་ཆེན་གྱི་ཚོགས་འདུར་ཕེབས་རྒྱུ་ཡིན་པ་དང་། སྐབས་དེར་རྒྱ་ནག་གི་ཕྱི་སྲིད་བློན་ཆེན་ Wang Yi དང་ལྷན་དུ་ཐུག་འཕྲད་གནང་རྒྱུ་རེད་འདུག དེའི་བར་ན་རྒྱ་ནག་དམར་ཤོག་ཚོགས་པས་ཁ་སང་རེས་གཟའ་ཟླ་བའི་ཕྱི་དྲོར་རྒྱ་གར་གྱི་དམག་མིས་འཕགས་བོད་ཀྱི་ས་མཚམས་བརྒལ་བ་མ་ཟད་པང་གྷོང་གཡས་གཡོན་དུ་ཡོད་པའི་རྒྱ་ནག་གི་དམག་མིར་འཇིགས་སྐུལ་སོགས་བྱས་ཡོད་པར་བརྗོད་ཡོད་ཀྱང་། དེ་རིང་རྒྱ་གར་གྱི་དམག་མིས་གནད་དོན་དེ་བདེན་པ་མིན་པ་དང་རྒྱ་གར་གྱི་ངོས་ནས་དེ་འབྲེལ་བྱ་སྤྱོད་གང་ཡང་སྤེལ་མེད་པའི་ལན་འདེབས་གནང་འདུག ལྷག་པར་དུ་རྒྱ་ནག་གིས་རྫུན་བསྒྲགས་བྱས་པའི་གནད་དོན་རྣམས་རྒྱ་གཞུང་གི་སྟངས་འཛིན་འོག་ཡོད་པའི་ China Daily དང་། Global Times སོགས་ཀྱིས་གནས་ཚུལ་སྤེལ་ཡོད་སྟབས།  རྒྱ་གར་གྱི་དམག་མིས་རྒྱ་གཞུང་གི་ངོས་ནས་བྱེད་བབས་དེ་ནི་རྒྱ་རིགས་དང་རྒྱལ་སྤྱིའི་མང་ཚོགས་ལ་ལོག་ཁྲིད་བྱེད་བཞིན་པའི་བྱ་སྤྱོད་ཅིག་ཡིན་པར་གསུངས་འདུག སྤྱིར་ལ་དྭགས་སུ་ཡོད་པའི་རྒྱ་དཀར་ནག་གཉིས་ཀྱི་དམག་མི་དབར་གདོང་ཐུག་རིམ་པ་བྱུང་ཡོད་པ་དང་། དེའི་ཁྲོད་ཉེ་ལམ་བོད་པའི་དྭང་སློབ་རུ་ཤོག་ཨང་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་སྐུ་ཞབས་ཉི་མ་བསྟན་འཛིན་ལགས་འབར་རྫས་གས་འཐོར་དོན་རྐྱེན་ཁྲོད་འདས་གྲོངས་སུ་གྱུར་བ་དང་དེ་བཞིན་བོད་མི་དྭང་ཞབས་པ་བསྟན་འཛིན་བློ་ལྡན་ལགས་སུ་རྨས་སྐྱོན་ཕོག་ནས་སྨན་ཁང་དུ་སྨན་བཅོས་གནང་མུས་ཡིན་པ་རེད།

བོད་མི་དང་ཡུ་གུར་བ། དེ་བཞིན་ཧོང་ཀོང་དང་རྒྱ་ནག་གི་མང་གཙོ་དོན་གཉེར་བ་སོགས་ཀྱིས་ཀུ་ཤུ་བཟོ་ཚོང་ཁང་གིས་གནས་ཚུལ་འཁོར་རྒྱུག་ལ་བཀག་སྡོམ་དང་དྲ་ལམ་ནས་གསང་བའི་མྱུལ་ཞིབ་སོགས་བྱེད་ཀྱི་ཡོད་པར་དྲིལ་བསྒྲགས་རིམ་པ་བྱས་པར་བརྟེན། ཀུ་ཤུ་བཟོ་ཚོང་ཁང་གིས་ད་ཆ་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་སྲིད་བྱུས་ཤིག་ཡོངས་གྲགས་གནང་སྟེ། རང་དབང་གི་གནས་ཚུལ་འཁོར་རྒྱུག་དང་སྨྲ་བརྗོད་རང་དབང་བརྩི་བཀུར་ཞུ་རྒྱུ་ཡིན་སྐོར་གསུངས་འདུག དེའང་གནས་ཚུལ་ཐོན་པ་ཁག་ལ་གཞིགས་ན། ཀུ་ཤུ་བཟོ་ཚོང་ཁང་གིས་རྒྱ་ནག་དང་ལག་འབྲེལ་གྱིས་བོད་མི་དང་ཧོང་ཀོང་སོགས་དང་འབྲེལ་བའིི་མཉེན་ཆས་རིགས་མང་པོ་ཞིག་ནག་གསུབ་བཏང་བར་རྟེན། འདི་ལོའི་ཕྱི་ཟླ་ ༢ པའི་ནང་ཚོགས་པའི་ཚོང་ལས་ཁང་གི་ལོ་འཁོར་ཚོགས་ཆེན་སྐབས་སུ། ཤེར་བདག་བརྒྱ་ཆ་ ༤༠ ལྷག་ཙམ་གྱིས་གྲོས་ཆོད་གྲོས་འཆར་ཞིག་གི་ལམ་ནས་ཚོང་ལས་ཁང་གི་ལས་དོན་བྱེད་ཕྱོགས་ལ་སྐྱོན་བརྗོད་ཤུགས་ཆེར་གནང་བ་དང་ཆབས་ཅིག ཚོང་ལས་ཁང་དེའི་ངོས་ནས་ཡོངས་གྲགས་ཐོག་སྨྲ་བརྗོད་རང་དབང་འགྲོ་བ་མིའི་ཐོབ་ཐང་ལ་ངོས་འཛིན་ཞུས་ཏེ་ལོ་ལྟར་སྨྲ་བརྗོད་རང་དབང་དང་འབྲེལ་བའི་སྲིད་བྱུས་འཛིན་ཕྱོགས་ཐད་སྙན་ཐོ་འདོན་དགོས་པའི་དགོས་འདུན་བཏོན་ཡོད་པ་རེད། དེ་འབྲེལ་ཀུ་ཤུ་བཟོ་ཚོང་ཁང་གིས་ཉེ་ལམ་ཚོང་ལས་ཁང་དེའི་འགན་འཛིན་ལྷན་ཚོགས་ཐོག་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་སྲིད་བྱུས་ཀྱི་རག་ཟིན་གཏན་འབེབས་གནང་ཡོད་པ་དང་། བོད་དོན་ལས་འགུལ་བ་རྣམས་ཀྱིས་ཁྲིམས་གཞི་དེ་དག་ལག་བསྟར་དོན་འཁྱོལ་ཡོང་ཐབས་སུ་ལོ་རྗེས་མའི་ཀུ་ཤུ་བཟོ་ཚོང་ཁང་གི་མ་འཛུགས་ཀྱི་ཚོགས་ཆེན་ཐོག་ཏུ་ཡང་བསྐྱར་ཞུ་སྐུལ་རིམ་པ་གནང་རྒྱུ་རེད་འདུག དེའང་བོད་རང་བཙན་སློབ་ཕྲུག་ཚོགས་པའི་རྒྱལ་སྤྱིའི་དྲིལ་བསྒྲགས་འགན་འཛིན། པདྨ་སྒྲོལ་མ་ལགས་ཀྱིས། ཁོང་ཉིད་ཨ་རིར་སྐྱེས་བའི་བོད་མི་ཞིག་ཡིན་བརྟེན། བོད་མི་དང་ཡུ་གུར་བ། དེ་བཞིན་ཧོང་ཀོང་བ་སོགས་ཀྱི་མི་མང་མཉམ་དུ་ཁྲིད་པའི་ཐོག   བཟོ་ཚོང་གི་བྱེད་ལས་ཀྱི་རྐྱེན་གྱིས་ཤུགས་རྐྱེན་ཐེབས་པའི་སྤྱི་ཚོགས་ཀྱི་འབོད་སྒྲ་དྲིལ་བསྒྲགས་བྱས་ཏེ།  བཟོ་ཚོང་ཁང་གི་ཚོགས་ཆེན་གྱི་ཐོག་ཏུ་གནད་དོན་དེ་དག་གླེང་སློང་ཡོང་བར་ཤུགས་སྣོད་བྱེད་རྒྱུ་ཡིན་པར་བསྒྲགས་འདུགགཞན་ཡང་བོད་དོན་ལས་འགུལ་བསྟི་གནས་ཁང་གི་འགན་འཛིན། སྲི་ཐར་བློ་བཟང་རྒྱ་མཚོ་ལགས་ཀྱིས། ཐེངས་འདིར་ཀུ་ཤུ་བཟོ་ཚོང་ཁང་གིས་འགྲོ་བ་མིའི་ཐོབ་དང་འབྲེལ་བའི་སྲིད་བྱུས་གཏན་འབེབས་ཀྱིས་ལག་བསྟར་བྱེད་བཞིན་པ་དེ་ནི་བཟོ་ཚོང་ཁང་ལེགས་ལམ་དུ་ཕྱོགས་པའི་མདུན་སྐྱོད་ཀྱི་ལམ་ཁ་གལ་ཆེན་ཞིག་ཡིན་པར་འགྲེལ་བརྗོད་ཀྱིས། བཟོ་ཚོང་ཁང་གིས་རྒྱལ་ཁབ་མང་པོའི་ནང་དུ་འགྲོ་བ་མིའི་ཐོབ་ཐང་རྡོལ་རོལ་གྱི་བྱེད་ལས་ལག་བསྟར་བྱེད་བཞིན་པར་བརྟེན། བོད་དོན་ལས་འགུལ་བསྟི་གནས་ཁང་གིས་ཐེངས་འདིར་གཏན་འབེབས་བྱུང་བའི་ཁྲིམས་གཞི་དེ་ལག་བསྟར་ཡོང་བར་ཤུགས་སྣོན་བྱེད་རྒྱུ་ཡིན་པར་གསུངས་འདུག དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ཁང་གི་ལས་བྱེད། ལྕམ་ Mandie McKeown ལགས་ཀྱིས་ཀྱང་ལས་འགུལ་བ་རྣམས་ཀྱིས་ངལ་བ་དང་དུ་བླངས་ནས་ཀུ་ཤུ་བཟོ་ཚོང་ཁང་གི་ཁྲིམས་གཞི་འདི་གཏན་འབེབས་ཀྱི་ཐད་ནས་ཕྱག་ལས་གནང་ཡོད་པར་མངོན་གསལ་གྱིས། བོད་ནང་གི་བོད་མི་རྣམས་ཀྱི་ཐོབ་ཐང་གི་ཕྱིར་ཏུ།  བཟོ་ཚོང་ཁང་གིས་ཁྲིམས་གཞི་འདི་ལག་བསྟར་དོ་ནན་གནང་རྒྱུར་རྟོག་ཞིབ་གནང་དགོས་ལུགས་གསུངས་འདུགརྒྱལ་སྤྱིའི་ཡུ་གུར་ལྷན་ཚོགས་ཀྱི་ཚོགས་མི། ལྕམ་ Zumretay Arkin ལགས་ཀྱིས་ཀྱང་བཟོ་ཚོང་ཁང་གིས་འགྲོ་བ་མིའི་ཐོབ་ཐང་གི་ཁྲིམས་གཞི་གཏན་འབེབས་བྱས་པ་དེ་ནི་རླབས་ཆེན་གྱི་འགྱུར་བ་ཞིག་ཡིན་པར་ངོ་སྤྲོད་དང་སྦྲགས། བོད་མི་དང་ཡུ་གུར་བ། དེ་བཞིན་ཧོང་ཀོང་གི་ལས་འགུལ་བ་རྣམས་ཀྱིས་མཉམ་འབྲེལ་གྱིས་བཟོ་ཚོང་ཁང་གི་ཁྲིམས་གཞི་དེ་ལག་བསྟར་དོན་འཁྱོལ་ཡོང་བར་འབད་བརྩོན་གནང་དགོས་བའི་འབོད་སྐུལ་གནང་འདུག

ཁ་སང་ཕྱི་ཟླ་ ༩ ཚེས་ ༣ ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Hua Chunying ཡིས་གསར་འགོད་ལྷན་ཚོགས་ཐོག་ཉེ་ལམ་ཨ་རིའི་ཕྱི་སྲིད་བློན་ཆེན་སྐུ་ཞབས་ pompoe མཆོག་གིས་གསར་འགོད་གསལ་བསྒྲགས་གནང་བར་དགག་ལན་དང་སྦྲགས། ཨ་རི་གཞུང་གིས་རྒྱ་ནག་རྒྱལ་ནང་གི་གནད་དོན་དང་འབྲེལ་ནས་བོད་ཀྱི་གནད་དོན་ཐོག་ཐེ་བྱུས་གནང་རྒྱུ་གཙོས་རྒྱ་ནག་གཞུང་ལ་སྐྱོན་བརྗོད་གནང་མཚམས་འཇོག་དགོས་པར་བརྗོད་འདུགརྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Hua Chunying ཡིས་ཁ་སང་གསར་འགོད་ལྷན་ཚོགས་ཐོག་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཤིག་ཡིན་པ་དང་བོད་ཀྱི་གནད་དོན་མཐའ་དག་རྒྱ་ནག་རྒྱལ་ནང་གི་གནད་དོན་ཡིན་པས་དེར་རྒྱལ་ཁབ་གཞན་ནས་ཐེ་གཏོགས་བྱེད་དབང་མེད་པ་དང་། ད་བར་མི་ལོ་དྲུག་ཅུ་ལྷག་གི་རིང་ཞི་བདེ་དང་དཔལ་འབྱོར། སྤྱི་ཚོགས། དེ་བཞིན་རིག་གཞུང་དང་ཁོར་ཡུག་སོགས་ཕྱོགས་ཀུན་ནས་ཡར་རྒྱས་ཆེན་པོ་ཕྱིན་ཡོད་སྐོར་བཤད་པ་དང་འབྲེལ། ཨ་རིས་རྒྱ་ནག་རྒྱལ་ནང་གི་གནད་དོན་དང་འབྲེལ་ཏེ་བོད་ཀྱི་གནད་དོན་ཐོག་ཐེ་བྱུས་གནང་རྒྱུ་གཙོས་རྒྱ་ནག་གཞུང་ལ་སྐྱོན་བརྗོད་གནང་མཚམས་འཇོག་དགོས་པར་བརྗོད་འདུགགསར་འགོད་གསལ་བསྒྲགས་དེའི་ཐོག་ Reuters གསར་ཁང་གིས་གསར་འགོད་པས་རྒྱ་དཀར་ནག་གཉིས་དབར་གདོང་ཐུག་དང་འབྲེལ་ནས་རྒྱ་གར་གཞུང་གི་གསང་བའི་དམག་སྡེ་སྟེ་ཕྱི་ལོ་ ༡༩༦༠ ལོར་ཨ་རིས་དམག་གི་སྦྱོང་བརྡར་སྤྲད་པའི་དྭང་སློབ་ཀྱི་སྐོར་ལ་ཤེས་རྟོགས་ཇི་ཡོད་སྐོར་ལ་འདྲི་རྩད་གནང་སྐབས་མགྲིན་ཚབ་པས་རྒྱ་གར་གཞུང་གི་དམག་སྡེ་ནང་བཙན་བྱོལ་བོད་མིའི་དམག་མི་ཡོད་པ་ཤེས་རྟོགས་མེད་སྐོར་བཤད་པ་དང་སྦྲགས། གསར་འགོད་པས་གསུངས་པའི་ ༡༩༦༠ ཞེས་པ་དང་། CIA དེ་བཞིན་བཙན་བྱོལ་བོད་མི་ཞེས་པའི་ཐ་སྙད་དང་འབྲེལ་ནས་ཨ་རི་གཞུང་ནས་ཆ་ཤས་གང་ཞིག་བཞེས་མིན་ཐོག་བསམ་ཞིབ་བྱེད་དགོས་སྐོར་བརྗོད་དེ་རྒྱ་ནག་གཞུང་གི་ངོས་ནས་བཙན་བྱོལ་བོད་མི་ལ་འཛིན་པའི་ལངས་ཕྱོགས་དེ་རང་སོར་གནས་ཡོད་པ་དང་། དེ་ཡང་རྒྱལ་ཁབ་གང་རུང་ཞིག་གིས་བོད་ཀྱི་རང་དབང་གི་གནད་དོན་དང་ཁ་བྲལ་བའི་བྱ་སྤྱོད་ལ་རོགས་འདེགས་གནང་ཚེ་དགག་པ་མཐའ་གཅིག་ཏུ་ཡོད་པར་བརྗོད་འདུག་པམ་ཟད། བཙན་བྱོལ་བོད་མི་དང་རྒྱ་གར་གྱི་མཐའ་མཚམས་དམག་མི་དབར་གྱི་འབྲེལ་ལམ་ལ་ཡ་མཚན་སྐོར་བཤད་པ་དང་ཆབས་ཅིག ཁྱེད་ཀྱིས་ཞིབ་དཔྱད་ནན་པོ་བྱས་ནས་ཞིབ་གནས་མཁོ་སྤྲོད་ཐུབ་རྒྱུའི་རེ་བ་ཡོད་ཅེས་བརྗོད་འདུག ཉེ་ལམ་འཕགས་བོད་གཉིས་ཀྱི་ས་མཚམས་སུ་བོད་པའི་དྭང་ཞབས་པ་ཞིག་འདས་གྲོངས་སུ་གྱུར་བ་ཤེས་རྟོགས་ཡོད་དམ་ཞེས་འདྲི་རྩད་གནང་བར་འཕགས་བོད་གཉིས་ཀྱི་ས་མཚམས་སུ་མི་སུ་གང་ཡང་འདས་གྲོངས་སུ་གྱུར་མེད་ཀྱང་བརྒྱུད་ལམ་ཁག་ཏུ་གོ་ཐོས་བྱུང་བར་གཞིགས་ན། རྒྱ་གར་གྱི་དམག་མི་ཞིག་རླངས་འཁོར་བརྡབ་སྐྱོན་གྱི་རྐྱེན་པས་འདས་གྲོངས་སུ་གྱུར་ཡོད་པར་ཤེས་རྟོགས་བྱུང་ཞེས་བརྗོད་འདུག གཞན་ཡང་གསར་འགོད་གསལ་བསྒྲགས་དེའི་ཐོག་ཉེ་ཆར་རྒྱ་གར་གཞུང་གིས་རྒྱ་ནག་གི་མཉེན་ཆས་ ༡༨༨ བཀག་སྡོམ་བྱས་པའི་གནད་དོན་དང་འབྲེལ་མགྲིན་ཚབ་པས་རྒྱ་གར་གཞུང་གིས་རྒྱ་གར་མི་སེར་གྱི་རང་དབང་དང་འདོད་མོས་དེ་དག་བློས་བཏང་གིས་རྒྱ་ནག་གི་བཟོ་ཚོང་ཁང་དག་ལའང་གནོད་སྐྱོན་བཟོས་ཡོད་སྟབས། ཐབས་ལམ་དེ་ནི་ཕྱོགས་གཉིས་ཀར་ཕན་ཐོགས་གང་ཡང་མེད་སྐོར་བརྗོད་པ་དང་འབྲེལ། ཨ་རི་གཞུང་གིས་ཀྱང་རྒྱ་གར་གྱི་དྲྭ་རྒྱ་གཙང་སེལ་ཞེས་པ་དེ་དཔེ་བླངས་དགོས་ཞེས་བརྗོད་དེ་རྒྱལ་ཁབ་གཉིས་ཀྱི་འབྲེལ་ལམ་ཞིག་འཛུགས་སྐྲུན་བྱེད་བཞིན་པ་དེར་བསམ་ཞིབ་བྱེད་དགོས་པ་དང་། ཆབ་སྲིད་ཀྱི་གནད་དོན་གལ་ཆེར་ཐུག་སྐབས་ཨ་རིའི་ངོས་ནས་ཡ་ལན་གནང་གི་མེད་པ་དང་། དེ་བཞིན་རྒྱ་གར་གཞུང་གིས་ཕུགས་རྒྱང་རིང་པོའི་འབྲེལ་ལམ་ལ་དགོངས་བཞེས་གནང་དགོས་གལ་ཡིན་པར་བརྗོད་འདུག

ཁ་སང་ཕྱི་ཚེས་ ༢ ཉིན་ཨ་རིའི་ཕྱི་སྲིད་བློན་ཆེན་སྐུ་ཞབས་ Mike Pompeo མཆོག་གིས་ཉེ་ལམ་རྒྱ་ནག་གི་སྲིད་འཛིན་ཞི་ཅིན་ཕིང་གིས་བོད་ནང་ཁ་བྲལ་ལ་གདོང་ལེན་སྤེལ་ཤུགས་ཆེ་རུ་གཏོང་དགོས་ཞེས་པའི་བརྗོད་བབ་ལ་ཐུགས་འཚབ་ཆེན་པོས་རྒྱ་གཞུང་གི་ངོས་ནས་ཆ་རྐྱེན་གང་ཡང་མེད་པར་༸གོང་ས་༸སྐྱབས་མགོན་ཆེན་པོ་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་གྲོས་མོལ་ཞུ་དགོས་པར་གསུངས་འདུག

རྒྱ་ནག་གྱི་ཕྱི་སྲིད་བློན་ཆེན་ Wang Yi ཟླ་ ༨ ཚེས་ ༢༥ ནས་ཨི་ཊ་ལི་དང་ནི་ཐར་ལན་ཌི། ནོར་ཝེ། ཕ་རན་སི། དེ་བཞིན་འཇར་མན་བཅས་ཡོ་རོབ་རྒྱལ་ཁབ་ལྔའི་ནང་གཞུང་འབྲེལ་སྐོར་སྐྱོད་བྱེད་བཞིན་ཡོད་པ་ལྟར་ཕྱི་ཚེས་ ༢༩ ནས་ཁ་སང་བར་ཡོ་རོབ་ཕ་རན་སི་རྒྱ་ཁབ་ནང་བསྐྱོད་དེ་སྲིད་འཛིན་ Emmanuel Macron ལགས་དང་ཕྱི་སྲིད་བློན་ཆེན་ Jean-Yves Le Drian ལགས་གཉིས་དང་ཐུག་འཕྲད་བྱས་ཡོད་པ་རེད།

ཉེ་ཆར་ཟླ་ ༨ ཚེས་ ༢༥ ནས་རྒྱ་ནག་གི་ཕྱི་སྲིད་བློན་ཆེན་ Wang Yi ཨི་ཊ་ལི་དང་ནི་ཐར་ལན་ཌི། ནོར་ཝེ། ཕ་རན་སི། དེ་བཞིན་འཇར་མན་བཅས་ཡོ་རོབ་རྒྱལ་ཁབ་ལྔའི་ནང་གཞུང་འབྲེལ་སྐོར་སྐྱོད་བྱེད་བཞིན་ཡོད་པ་ལྟར། འདས་པའི་ཉིན་གྲངས་གསུམ་གྱི་རིང་ལ་ཁོ་པ་ཨི་ཊ་ལི་དང་ནི་ཐར་ལན་ཌི། ནོར་ཝེ་བཅས་སུ་འགྲོ་སྐབས་ཡུལ་དེ་དག་གི་ཕྱི་སྲིད་བློན་ཆེན་དབུས་གྲོས་ཚོགས་འཐུས་མི་ཁག་ཅིག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་འདྲི་རྩད་གནང་བ་མ་ཟད། ས་གནས་མི་མང་ཚོས་ཝང་ཡིའི་སྐོར་སྐྱོད་དེར་མི་འདོད་པའི་རྣམ་པ་ཆེད་འདོན་དང་ངོ་རྒོལ་སྐད་འབོད་སོགས་གནང་འདུག